Zechariah 7
The Book of Zechariah
܀ ܙܟ̣ܪܝܐ ܙ ܀
1 ܘܰܗܘܳܐ ܒܰܫܢܰܬ ܐܰܪܒܰܥ ܕܕܰܪܝܳܘܳܫ ܡܰܠܟܳܐ: ܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܙܟܰܪܝܳܐ: ܒܰܐܪܒܰܥܬܳܐ ܒܝܰܪܚܳܐ ܕܬܶܫܥܳܐ ܕܗܽܘ ܟܳܢܽܘܢ.
2 ܘܫܰܕܰܪ ܠܒܶܝܬ ܐܶܝܠ: ܠܫܳܪܳܐܨܰܪ ܘܪܰܒܡܳܓ: ܘܰܫܠܰܚ ܡܰܠܟܳܐ ܘܓܰܢ̱ܒܳܖ̈ܰܘܗܝ ܠܰܡܨܰܠܳܝܽܘ ܥܠܰܘܗܝ ܩܕܳܡ ܡܳܪܝܳܐ.
3 ܘܰܠܡܺܐܡܰܪ ܠܟܳܗ̈ܢܶܐ ܕܰܒܒܰܝܬܶܗ ܕܡܳܪܝܳܐ ܚܰܝܠܬܳܢܳܐ: ܘܠܰܢܒܺܝ̈ܶܐ: ܐܶ݀ܒܟܶܐ ܒܝܰܪܚܳܐ ܚܡܺܝܫܳܝܳܐ ܐܰܘ ܐܶܬܢܙܰܪ: ܐܰܝܟ ܡܳܐ ܕܥܳܒܶܕ ܗ̱ܘܺܝܬ ܗܳܐ ܟܡܳܐ ܫܢܺܝ̈ܢ.
4 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
5 ܐܶܡܰܪ ܠܟܽܠܶܗ ܥܰܡܳܐ ܕܰܐܪܥܳܐ ܘܰܠܟܳܗ̈ܢܶܐ: ܕܨܳܡ̣ܬܽܘܢ ܘܰܐܪܩܶܕܬܽܘܢ ܒܝܰܪܚܳܐ ܚܡܺܝܫܳܝܳܐ ܘܰܫܒܺܝܥܳܝܳܐ: ܗܳܐ ܫܰܒܥܺܝܢ ܫܢܺܝ̈ܢ: ܕܰܠܡܳܐ ܨܰܘܡܳܐ ܨܳܡ̣ܬܽܘܢ ܠܺܝ.
6 ܘܶܐܢ ܐܳܟܠܺܝܢ ܐܢ̱ܬܽܘܢ ܘܫܳܬܶܝܢ: ܘܠܳܐ ܗ̱ܘܳܐ ܐܰܢ̱ܬܽܘܢ ܐܳܟܠܺܝܢ ܘܫܳܬܶܝܢ.
7 ܗܳܠܶܝܢ ܐܶܢܶܝܢ ܡ̈ܶܠܶܐ ܕܰܐܟܪܶܙ ܡܳܪܝܳܐ ܒܺܐܝܕܳܐ ܕܰܢܒܺܝ̈ܶܐ ܩܰܕܡܳܝ̈ܶܐ: ܟܰܕ ܝܳܬܒܳܐ ܗ̱ܘܳܬ ܐܽܘܪܺܫܠܶܡ ܘܫܰܠܝܳܐ: ܘܩܽܘܖ̈ܝܳܐ ܚܕܺܝܖ̈ܳܢ ܠܶܗ: ܘܛܽܘܖ̈ܶܐ ܘܦܰܩ̈ܥܳܬܳܐ ܝܳܬܒܺܝܢ ܗ̱ܘܰܘ.
8 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܙܟܰܪܝܳܐ ܠܡܺܐܡܰܪ.
9 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܕܺܝܢܳܐ ܕܩܽܘܫܬܳܐ ܕܽܘܢܝ: ܘܛܰܝܒܽܘܬܳܐ ܘܖ̈ܰܚܡܶܐ ܥܒܶܕܘ ܐ̱ܢܳܫ ܥܰܡ ܐܰܚܽܘܗܝ.
10 ܘܠܰܐܖ̈ܡܠܳܬܳܐ ܘܰܠܝܰܬܡ̈ܶܐ: ܘܰܠܡܶܣܟܺܢ̈ܶܐ: ܘܠܰܕܡܶܬܦܢܶܐ ܠܘܳܬܝ ܠܳܐ ܬܶܥܠܒܽܘܢ: ܘܠܳܐ ܬܶܛܠܡܽܘܢ: ܘܒܺܝܫܬܳܐ ܓܒܰܪ ܥܰܠ ܐܰܚܽܘܗܝ ܠܳܐ ܬܶܬܚܰܫܒܽܘܢ ܒܠܶܒܟܽܘܢ.
11 ܘܠܳܐ ܨܒܰܘ ܠܡܶܫܡܥܰܢܝ: ܘܰܥ̣ܒܰܕܘ ܟܰܬܦܗܽܘܢ ܡܳܪܽܘܕܬܳܐ: ܘܶܐܕܢܰܝ̈ܗܽܘܢ ܣܰܟܰܪܘ ܕܠܳܐ ܢܶܫܡܥܽܘܢ.
12 ܘܠܶܒܗܽܘܢ ܥܒܰܕܘ ܐܰܝܟ ܫܳܡܺܝܪܳܐ: ܕܠܳܐ ܢܶܫܡܥܽܘܢ ܢܳܡܽܘ̈ܣܶܐ ܘܦܽܘܩ̈ܕܳܢܶܐ: ܕܫܰܕܰܪ ܡܳܪܝܳܐ ܚܰܝܠܬܳܢܳܐ ܒܪܽܘܚܶܗ ܒܝܰܕ ܢܒܺܝ̈ܶܐ ܩܰܕܡܳܝ̈ܶܐ: ܘܰܗܘܳܐ ܪܽܘܓܙܳܐ ܪܰܒܳܐ ܡܶܢ ܩܕܳܡ ܡܳܪܝܳܐ ܚܰܝܠܬܳܢܳܐ.
13 ܥܰܠ ܕܰܩܪܺܝ݀ܬ ܐܶܢܽܘܢ ܘܠܳܐ ܫ̣ܡܰܥܘ: ܗܳܟܰܢܳܐ ܢܶܩܪܽܘܢܳܢܝ ܘܠܳܐ ܐܶܫܡܰܥ ܐܶܢܽܘܢ ܐܳܡܰܪ ܡܳܪܝܳܐ ܚܰܝܠܬܳܢܳܐ.
14 ܘܶܐܒܰܕܰܪ ܐܶܢܽܘܢ ܒܟܽܠܗܽܘܢ ܥܰܡ̈ܡܶܐ ܕܠܳܐ ܝܺܕܰܥܘ ܐܶܢܽܘܢ: ܘܰܐܪܥܳܐ ܬܶܨܕܶܐ ܒܳܬܰܪܗܽܘܢ ܡܶܢ ܒܠܰܝ ܕܥܳܒܰܪ ܘܰܕܬܳܐܶܒ: ܥܰܠ ܕܰܥ̣ܒܰܕܘ ܐܰܪܥܳܐ ܕܪܶܓܬܳܐ ܠܚܽܘܪܒܳܐ.