Zechariah 13
The Book of Zechariah
܀ ܙܟ̣ܪܝܐ ܝܓ ܀
1 ܒܶܗ ܒܝܰܘܡܳܐ ܗܰܘ: ܢܶܗܘܶܐ ܡܰܒܽܘܥܳܐ ܕܡܶܬܦܬܰܚ ܠܰܕܒܶܝܬ ܕܰܘܺܝܕ: ܘܰܠܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܠܰܪܣܳܣܳܐ ܘܰܠܬܰܕܟܺܝܬܳܐ.
2 ܒܶܗ ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܐܰܘܒܶܕ ܫܡܳܐ ܕܰܦܬܰܟܖ̈ܶܐ ܡܶܢ ܐܰܪܥܳܐ: ܘܬܽܘܒ ܠܳܐ ܢܶܬܕܰܟܪܽܘܢ: ܘܰܐܥܒܰܪ ܡܶܢ ܐܰܪܥܳܐ ܢܒܺܝ̈ܶܐ ܕܰܓ̈ܳܠܶܐ ܘܖ̈ܽܘܚܶܐ ܛܰܢ̈ܦܳܬܳܐ.
3 ܘܶܐܢ ܬܽܘܒ ܢܶܬܢܰܒܶܐ ܓܰܒܪܳܐ: ܢܺܐܡܪܽܘܢ ܠܶܗ ܐܰܒܽܘܗܝ ܘܶܐܡܶܗ ܠܳܐ ܬܺܚܶܐ: ܡܶܛܽܠ ܕܕܰܓܳܠܽܘܬܳܐ ܡܰܠܶܠܬ ܒܰܫܡܶܗ ܕܡܳܪܝܳܐ: ܘܢܺܐܣܪܽܘܢܶܗ ܐܰܒܽܘܗܝ ܘܶܐܡܶܗ ܕܝܰܠܕܽܘܗܝ ܡܳܐ ܕܶܐܬܢܰܒܺܝ.
4 ܒܶܗ ܒܝܰܘܡܳܐ ܗܰܘ: ܢܶܒܗܬܽܘܢ ܢܒܺܝ̈ܶܐ ܕܰܓ̈ܳܠܶܐ ܐ̱ܢܳܫ ܡܶܢ ܚܶܙܘܳܐ ܕܰܢܒܺܝܽܘܬܶܗ: ܘܠܳܐ ܢܶܬܟܰܒܢܽܘܢ ܡܶܫܟܳܐ ܕܣܰܥܪܳܐ ܡܶܛܽܠ ܕܟܰܕܶܒܘ.
5 ܘܢܺܐܡܰܪ ܠܳܐ ܗܘܺܝ݀ܬ ܢܒܺܝܳܐ: ܐܶܠܳܐ ܓܰܒܪܳܐ ܐ̱ܢܳܐ ܕܦܳܠܰܚ ܒܰܐܪܥܳܐ: ܘܒܰܪܢܳܫܳܐ ܐܰܛܢܰܢܝ ܡܶܢ ܛܰܠܝܽܘܬܝ.
6 ܘܢܺܐܡܪܽܘܢ ܠܶܗ: ܡܳܢܳܐ ܐܶܢܶܝܢ ܗܳܠܶܝܢ ܡܰܚ̈ܘܳܬܳܐ ܕܒܺܐܝܕܰܝ̈ܟ: ܘܢܺܐܡܰܪ ܗܳܠܶܝܢ ܡܰܚ̈ܘܳܬܳܐ ܕܒܶܠܥܶ݀ܬ ܒܶܝܬ ܖ̈ܳܚܡܰܝ.
7 ܣܰܝܦܳܐ ܐܶܬܬܥܺܝܪ ܥܰܠ ܪܳܥܝܳܐ ܕܺܝܠܝ: ܘܥܰܠ ܓܰܒܪܳܐ ܪܳܚܶܡܝ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܡܚܺܝ ܠܪܳܥܝܳܐ ܘܬܶܬܒܰܕܰܪ ܥܳܢ̈ܶܗ: ܘܰܐܗܦܶܟ ܐܺܝܕܝ ܥܰܠ ܥܰܠܠܳܢ̈ܶܐ.
8 ܘܢܶܗܘܶܐ ܒܟܽܠܳܗ̇ ܐܰܪܥܳܐ ܐܳܡܰܪ ܡܳܪܝܳܐ: ܘܬܰܪܬܶܝܢ ܡ̈ܢܰܘܳܢ ܕܒܳܗ̇ ܢܣܽܘܦܽܘܢ: ܘܢܺܐܒܕܽܘܢ: ܘܬܽܘܠܬܳܐ ܢܶܫܬܚܰܪ ܒܳܗ̇.
9 ܘܰܐܥܠܺܝܘܗܝ ܠܬܽܘܠܬܳܐ ܕܢܶܫܬܚܰܪ ܒܢܽܘܪܳܐ: ܘܶܐܨܪܽܘܦ ܐܶܢܽܘܢ ܐܰܝܟ ܕܨܳܪܦܺܝܢ ܠܣܺܐܡܳܐ: ܘܶܐܒܚܽܘܪ ܐܶܢܽܘܢ ܐܰܝܟ ܕܒܳܚܪܺܝܢ ܠܕܰܗܒܳܐ: ܗܽܘ ܢܶܩܪܶܐ ܒܫܶܡܝ ܘܶܐܢܳܐ ܐܶܥܢܶܝܘܗܝ: ܘܶܐܡܰܪ ܕܗܳܢܰܘ ܥܰܡܝ: ܘܗܽܘ ܢܺܐܡܰܪ ܡܳܪܝܳܐ ܐܰܠܳܗܝ.