Zechariah 3
The Book of Zechariah
܀ ܙܟ̣ܪܝܐ ܓ ܀
1 ܘܚܰܘܝܰܢܝ ܠܝܶܫܽܘܥ ܟܳܗܢܳܐ ܪܰܒܳܐ: ܟܰܕ ܩܳܐܶܡ ܩܕܳܡ ܡܰܠܰܐܟܶܗ ܕܡܳܪܝܳܐ: ܘܣܳܛܳܢܳܐ ܩܳܐܶܡ ܗ̱ܘܳܐ ܡܶܢ ܝܰܡܺܝܢܶܗ ܕܢܰܟܶܝܘܗܝ.
2 ܘܶܐܡܰܪ ܡܰܠܰܐܟܶܗ ܕܡܳܪܝܳܐ ܠܣܳܛܳܢܳܐ: ܣܳܛܳܢܳܐ: ܢܶܓܥܽܘܪ ܒܳܟ ܡܳܪܝܳܐ: ܢܶܓܥܽܘܪ ܒܳܟ ܡܳܪܝܳܐ ܕܰܓܒܳܗ̇ ܠܽܐܘܪܺܫܠܶܡ: ܗܳܢܰܘ ܐܽܘܕܳܐ ܕܶܐܬܦܰܠܰܛ ܡܶܢ ܢܽܘܪܳܐ.
3 ܘܝܶܫܽܘܥ ܠܒܺܝܫ ܗ̱ܘܳܐ ܡܳܐܢ̈ܶܐ ܨܳܐܶܐ: ܘܩܳܐܶܡ ܗ̱ܘܳܐ ܩܕܳܡ ܡܰܠܰܐܟܶܗ ܕܡܳܪܝܳܐ.
4 ܘܰܥܢܳܐ ܡܰܠܰܐܟܳܐ ܘܶܐܡܰܪ ܠܶܗܢܽܘܢ ܕܩܳܝܡܺܝܢ ܩܕܳܡܰܘܗܝ: ܐܰܥܒܰܪܘ ܡܶܢܗ ܡܳܐܢ̈ܶܐ ܨܳܐܶܐ: ܘܶܐܡܰܪ ܠܶܗ: ܚܙܺܝ ܕܰܐܥܒܪܶܬ ܡܶܢܟ ܥܰܘܠܳܟ: ܘܰܐܠܒܶܫܬܳܟ ܡܳܐܢ̈ܶܐ ܛܳܒ̈ܶܐ.
5 ܘܶܐܡܰܪ ܢܣܺܝܡܽܘܢ ܟܠܺܝܠܳܐ ܕܰܟܝܳܐ ܒܪܺܝܫܶܗ: ܘܰܐܠܒܫܽܘܗܝ ܡܳܐܢ̈ܶܐ ܛܳܒ̈ܶܐ: ܘܡܰܠܰܐܟܶܗ ܕܡܳܪܝܳܐ ܩܳܐܶܡ.
6 ܘܰܐܣܗܶܕ ܡܰܠܰܐܟܶܗ ܕܡܳܪܝܳܐ ܒܝܶܫܽܘܥ: ܘܶܐܡܰܪ.
7 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܐܶܢ ܒܽܐܘܪܚܝ ܬܺܐܙܰܠ ܘܦܽܘܩ̈ܕܳܢܰܝ ܬܶܛܰܪ: ܐܰܢ̱ܬ ܬܕܽܘܢܺܝܘܗܝ ܠܒܰܝܬܝ ܘܬܶܛܰܪ ܕܳܖ̈ܳܬܝ: ܘܶܐܬܶܠ ܠܳܟ ܕܰܡܗܰܠܟܺܝܢ ܒܰܝܢܳܬ ܗܳܠܶܝܢ ܕܩܳܝܡܺܝܢ.
8 ܫܡܰܥ ܝܶܫܽܘܥ ܟܳܗܢܳܐ ܪܰܒܳܐ: ܐܰܢ̱ܬ ܘܚܰܒܖ̈ܰܝܟ ܗܳܠܶܝܢ ܕܩܳܝܡܺܝܢ ܩܕܳܡܝܟ: ܡܶܛܽܠ ܕܓܰܒܖ̈ܶܐ ܐܰܢ̱ܬܽܘܢ ܕܬܶܕܡܽܘܪܬܳܐ: ܕܗܳܐ ܡܰܝܬܶܐ ܐ̱ܢܳܐ ܠܥܰܒܕܝ ܕܶܢܚܶܐ.
9 ܡܶܛܽܠ ܕܗܳܐ ܟܺܐܦܳܐ ܕܝܶܗܒܶܬ ܩܕܳܡ ܝܶܫܽܘܥ: ܥܰܠ ܟܺܐܦܳܐ ܚܕܳܐ ܫܒܰܥ ܥܰܝܢܺܝ̈ܢ: ܗܳܐ ܦܳܬܰܚ ܐ̱ܢܳܐ ܬܰܖ̈ܥܶܝܗ̇ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܘܶܐܡܽܘܫ ܥܰܘܠܶܗ ܕܰܐܪܥܳܐ ܗܳܝ ܒܝܰܘܡܳܐ ܗܰܘ.
10 ܒܶܗ ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܬܶܩܪܽܘܢ ܐ̱ܢܳܫ ܠܚܰܒܪܶܗ ܬܚܶܝܬ ܓܦܶܬܳܐ ܘܰܬܚܶܝܬ ܬܺܬܳܐ.