1 Maccabees 10
The First Book of Maccabees
܀ ܐ ܡܩܒܝ̈ܐ ܝ ܀
1 ܘܒܰܫܢܰܬ ܡܳܐܐ ܘܶܫܬܺܝܢ: ܣܠܶܩ ܐܰܠܶܟܣܰܢܕܪܽܘܣ ܒܰܪ ܐܰܢܛܝܰܟܳܘܣ ܐܶܦܺܝܦܰܢܳܘܣ ܒܪܶܗ ܕܰܐܢܛܺܝܰܟܳܘܣ. ܘܰܐܚܕܳܗ̇ ܠܰܦܛܽܘܠܡܰܐܺܝܣ ܘܟܰܒܫܳܗ̇. ܩܰܒܠܽܘܗܝ ܘܰܐܡܠܶܟ ܬܰܡܳܢ.
2 ܘܰܫܡܰܥ ܕܺܡܶܛܪܶܝܳܘܣ ܡܰܠܟܳܐ: ܘܟܰܢܶܫ ܚܰܝܠܳܐ ܣܰܓܺܝܐܳܐ ܘܰܢܦܰܩ ܠܽܐܘܪܥܶܗ ܠܰܩܪܳܒܳܐ.
3 ܘܫܰܕܰܪ ܕܺܡܶܛܪܶܝܳܘܣ ܐܶܓܪ̈ܳܬܳܐ ܠܘܳܬ ܝܽܘܢܳܬܳܢ ܒܡ̈ܶܠܶܐ ܕܰܫܠܳܡܳܐ ܐܰܝܟ ܕܰܢܫܰܒܚܺܝܘܗܝ.
4 ܐܶܡܰܪ ܓܶܝܪ ܕܺܡܶܛܪܶܝܳܘܣ: ܢܩܰܕܶܡ ܘܢܶܥܒܶܕ ܥܰܡܶܗ ܪܳܚܡܽܘܬܳܐ: ܡܶܢ ܩܕܳܡ ܕܠܳܐ ܢܺܐܙܰܠ ܘܢܶܥܒܶܕ ܥܰܡ ܐܰܠܶܟܣܰܢܕܪܳܘܣ: ܘܢܶܗܘܶܐ ܠܰܢ ܣܰܩܽܘܒܠܳܐ.
5 ܡܶܬܕܰܟܪ ܓܶܝܪ ܟܽܠܗܶܝܢ ܒܺܝ̈ܫܳܬܳܐ ܕܰܥܒܰܕܢ ܠܶܗ ܘܠܰܐܚܰܘ̈ܗܝ ܘܰܠܥܰܡܶܗ.
6 ܘܝܰܗܒ ܠܶܗ ܫܽܘܠܛܳܢܳܐ ܕܰܢܟܰܢܶܫ ܚܰܝܠܳܐ ܘܰܢܥܰܬܶܕ ܙܰܝܢܳܐ. ܘܢܶܗܘܶܐ ܡܥܰܕܪܳܢܶܗ. ܘܰܗܡܰܝܖ̈ܶܐ ܕܺܐܝܬ ܗܘܳܐ ܒܡܶܪܕܳܐ ܐܶܡܰܪ ܕܢܶܬܝܰܗܒܽܘܢ ܠܶܗ.
7 ܘܶܐܬܳܐ ܝܽܘܢܳܬܳܢ ܠܽܐܘܪܺܫܠܶܡ. ܘܰܩܪܳܐ ܐܶܓܪ̈ܳܬܳܐ ܒܶܐܕܢܰܘ̈ܗܝ ܕܟܽܠܶܗ ܥܰܡܳܐ ܘܰܕܝܳܬܒܰܝ̈ ܡܶܪܕܳܐ.
8 ܘܰܕܚܶܠܘ ܕܶܚܠܬܳܐ ܪܰܒܬܳܐ: ܕܰܫܡܰܥܘ ܕܝܰܗܒ ܠܶܗ ܫܽܘܠܛܳܢܳܐ ܡܰܠܟܳܐ ܠܰܡܟܰܢܳܫܽܘ ܚܰܝܠܳܐ.
9 ܘܰܐܫܠܶܡܘ ܝܳܬܒܰܝ̈ ܡܶܪܕܳܐ ܗܡܰܝܖ̈ܶܐ ܠܝܽܘܢܳܬܳܢ: ܘܰܐܫܠܶܡ ܐܶܢܽܘܢ ܠܳܐ̱ܢܳܫܰܝ̈ܗܽܘܢ.
10 ܘܰܥܡܰܪ ܝܽܘܢܳܬܳܢ ܒܽܐܘܪܺܫܠܶܡ. ܘܫܰܪܺܝܘ ܗܘܳܐ ܡܒܰܢܶܐ ܘܡܚܰܕܶܬ ܠܰܡܕܺܝܢܬܳܐ.
11 ܘܶܐܡܰܪ ܝܽܘܢܳܬܳܢ ܠܥܳܒܕܰܝ̈ ܥܒܳܕܳܐ: ܕܢܶܒܢܽܘܢ ܫܽܘܪܳܐ ܘܛܽܘܪܳܐ ܕܨܺܗܝܽܘܢ ܟܰܕ ܚܳܕܰܪ: ܒܟܺܐܦ̈ܶܐ ܡܖ̈ܰܒܥܳܬܳܐ ܠܚܶܣܢܳܐ. ܘܰܥܒܰܕܘ ܗܳܟܰܢܳܐ.
12 ܘܰܥܪܰܩܘ ܒܢܰܝ̈ ܢܽܘܟܪ̈ܳܝܶܐ ܐܰܝܠܶܝܢ ܕܺܐܝܬ ܗܘܰܘ ܒܚܶܣܢ̈ܶܐ ܗܳܢܽܘܢ ܕܰܒܢܳܐ ܗܘܳܐ ܒܺܝܟܪܺܝܳܘܣ.
13 ܘܰܫܒܰܩ ܟܽܠܢܳܫ ܕܽܘܟܬܶܗ. ܘܶܐܙܰܠܘ ܠܰܐܬܪܗܽܘܢ.
14 ܒܪܰܡ ܕܶܝܢ ܒܒܶܝܬ ܫܽܘܖ̈ܶܐ ܐܶܫܬܚܰܪܘ: ܡܶܢ ܐܰܝܠܶܝܢ ܕܰܫܒܰܩܘ ܢܳܡܽܘܣܳܐ ܘܦܽܘܩܕܳܢ̈ܶܐ. ܐܺܝܬܶܝܗ̇ ܗܘܳܬ ܠܗܽܘܢ ܓܶܝܪ ܒܶܝܬ ܥܪܽܘܩܝܳܐ.
15 ܘܰܫܡܰܥ ܐܰܠܶܟܣܰܢܕܪܽܘܣ ܡܰܠܟܐ ܟܽܠܡܶܕܶܡ ܕܰܫܠܰܚ ܘܶܐܫܬܰܘܕܺܝ ܕܺܡܶܛܪܶܝܳܘܣ ܠܝܽܘܢܳܬܳܢ. ܘܶܐܫܬܰܥܺܝܘ ܠܶܗ ܥܰܠ ܩܪ̈ܳܒܶܐ ܘܓܰܢܒܳܪ̈ܳܘܳܬܳܐ ܘܢܶܨܚܳܢ̈ܶܐ ܕܰܥܒܰܕ ܗܽܘ ܘܰܐܚܰܘ̈ܗܝ.
16 ܘܶܐܡܰܪ ܕܰܠܡܳܐ ܡܶܫܟܚܺܝܢܰܢ ܐܰܝܟ ܗܳܢܳܐ ܓܰܒܪܳܐ. ܐܶܠܳܐ ܗܳܫܳܐ ܢܶܥܒܕܺܝܘܗܝ ܠܰܢ ܪܳܚܡܳܐ ܘܰܡܥܰܕܪܳܢܳܐ.
17 ܘܰܟܬܰܒ ܐܶܓܰܪܬܳܐ ܘܰܫܠܰܚ ܠܶܗ: ܐܰܝܟ ܗܳܠܶܝܢ ܡ̈ܶܠܶܐ.
18 ܐܰܠܶܟܣܰܢܕܪܽܘܣ ܡܰܠܟܳܐ ܠܝܽܘܢܳܬܳܢ ܐܳܚܝ: ܫܠܳܡ.
19 ܫܡܰܥܢ ܥܠܰܝܟ ܕܓܰܒܪܳܐ ܐܰܢ̱ܬ ܚܰܝܠܬܳܢܳܐ. ܘܚܳܫܰܚ ܐܰܢ̱ܬ ܠܰܢ ܕܬܶܗܘܶܐ ܠܰܢ ܪܳܚܡܳܐ.
20 ܘܗܳܫܳܐ ܐܰܩܺܝܡܢܳܟ ܝܰܘܡܳܢܳܐ ܪܰܒ ܟܳܗ̈ܢܶܐ ܕܥܰܡܳܟ: ܕܬܶܗܘܶܐ ܡܶܬܩܪܶܐ ܪܳܚܡܶܗ ܕܡܰܠܟܳܐ. ܘܫܰܕܰܪ ܠܶܗ ܐܰܪ̈ܓܘܳܢܶܐ ܘܰܟܠܺܝܠܳܐ ܕܕܰܗܒܳܐ. ܘܶܐܡܰܪ ܬܶܗܘܶܐ ܠܶܗ ܫܰܘܬܳܦܽܘܬܳܐ ܠܘܳܬ ܬܰܪܥܺܝܬܰܢ. ܘܢܶܛܰܪ ܪܳܚܡܽܘܬܳܐ ܕܨܶܐܕܰܝܢ.
21 ܘܶܐܬܟܰܣܺܝ ܝܽܘܢܳܬܳܢ ܐܶܣܛܠܳܐ ܩܰܕܺܝܫܬܳܐ ܒܝܰܪܚܳܐ ܫܒܺܝܥܳܝܳܐ: ܒܰܫܢܰܬ ܡܳܐܐ ܘܫܬܺܝܢ ܒܥܰܕܥܺܐܕܳܐ ܕܰܡ̈ܛܰܠܠܶܐ. ܘܟܰܢܶܫ ܚܰܝܠܳܐ ܘܥܰܬܶܕ ܙܰܝܢܳܐ ܣܰܓܺܝܐܳܐ.
22 ܘܰܫܡܰܥ ܕܺܡܶܛܪܶܝܳܘܣ ܗܳܠܶܝܢ ܡ̈ܶܠܶܐ: ܘܶܐܬܬܥܺܝܩ ܘܶܐܡܰܪ.
23 ܡܳܢܳܐ ܥܒܰܕܢ ܕܩܰܕܡܰܢ ܐܶܠܶܟܣܰܢܕܪܽܘܣ ܠܡܶܥܒܰܕ ܪܳܚܡܽܘܬܳܐ ܥܰܡ ܝܺܗܽܘ̈ܕܳܝܶܐ: ܕܢܶܗܘܽܘܢ ܠܶܗ ܡܥܰܕܪ̈ܳܢܶܐ.
24 ܐܶܟܬܽܘܒ ܠܗܽܘܢ ܐܳܦ ܐܶܢܳܐ ܡ̈ܶܠܶܐ ܕܒܳܥܽܘܬܳܐ ܘܰܕܪܽܘܡܪܳܡܳܐ ܘܰܕܡܰܘ̈ܗܒܳܬܳܐ. ܕܢܶܗܘܽܘܢ ܠܰܢ ܠܥܽܘܕܪܳܢܳܐ.
25 ܘܰܫܠܰܚ ܠܗܽܘܢ ܐܰܝܟ ܗܳܠܶܝܢ ܡ̈ܶܠܶܐ: ܕܺܡܶܛܪܶܝܳܘܣ ܡܰܠܟܳܐ ܠܥܰܡܳܐ ܕܺܝܗܽܘ̈ܕܳܝܶܐ: ܫܠܳܡ.
26 ܡܶܛܽܠ ܕܩܰܘܺܝܬܽܘܢ ܒܰܩܝܳܡܳܐ ܕܥܰܡܰܢ. ܘܰܢܛܰܪܬܽܘܢ ܪܳܚܡܽܘܬܳܐ ܕܰܠܘܳܬܰܢ: ܘܠܳܐ ܢܩܶܦܬܽܘܢ ܠܰܒܥܶܠܕܒܳܒܰܝ̈ܢ: ܫܡܰܥܢ ܘܰܚܕܰܝܢ.
27 ܘܗܳܫܳܐ ܩܰܘܰܘ ܒܬܰܪܥܺܝܬܳܐ ܕܰܠܘܳܬܰܢ: ܘܢܶܦܪܽܘܥܟܽܘܢ ܛܳܒ̈ܳܬܳܐ ܣܰܓܺܝ̈ܐܳܬܳܐ. ܐܰܝܟ ܕܰܥܒܰܕܬܽܘܢ ܥܰܡܰܢ.
28 ܘܢܶܫܒܽܘܩ ܠܟܽܘܢ ܫܳܩ̈ܠܶܐ ܣܰܓܺܝ̈ܐܶܐ. ܘܢܶܬܶܠ ܠܟܽܘܢ ܡܰܘ̈ܗܒܳܬܳܐ ܣܰܓܺܝ̈ܐܳܬܳܐ.
29 ܘܗܳܫܳܐ ܫܳܪܶܐ ܐ̱ܢܳܐ ܠܟܽܘܢ ܘܡܰܪܦܶܐ ܐ̱ܢܳܐ ܠܟܽܘܢ ܠܟܽܠܗܽܘܢ ܝܺܗܽܘ̈ܕܳܝܶܐ ܡܶܢ ܫܩ̈ܳܠܶܐ ܘܡܶܢ ܕܡܶܝ̈ܗ̇ ܕܡܶܠܚܳܐ ܘܡܶܢ ܟܠܺܝܠܳܐ.
30 ܘܰܚܕܳܐ ܡܶܢ ܬܠܳܬ ܡܢܰܘ̈ܳܬܳܐ ܕܙܰܪܥܳܐ: ܘܡܶܕܶܡ ܕܗܳܘܶܐ ܗܘܳܐ ܠܺܝ ܡܶܢ ܦܺܐܖ̈ܶܐ ܕܺܐܝܠܶܢ̈ܶܐ: ܫܳܒܶܩ ܐ̱ܢܳܐ ܡܶܢ ܝܰܘܡܳܢܳܐ ܘܰܠܗܰܠ: ܕܠܳܐ ܐܶܣܰܒ ܡܶܢ ܐܰܪܥܳܐ ܕܺܝܗܽܘ̈ܕܳܝܶܐ. ܘܬܽܘܒ ܫܳܒܶܩ ܐ̱ܢܳܐ ܬܠܳܬ ܫܩܳܠܺܝ̈ܢ ܕܶܐܬܬܣܺܝܡܘ ܥܠܶܝܗ̇: ܡܶܢ ܫܳܡܪܺܝܢ ܘܡܶܢ ܓܠܺܝܠܳܐ: ܡܶܢ ܝܰܘܡܳܢܳܐ ܘܰܠܗܰܠ.
31 ܘܽܐܘܪܺܫܠܶܡ ܬܶܗܘܶܐ ܩܰܕܺܝܫܳܐ ܘܰܡܚܰܪܪܳܐ: ܘܟܽܠܗܽܘܢ ܬܚܽܘ̈ܡܶܝܗ̇. ܘܡܰܥܣܳܖ̈ܶܐ ܘܡܰܟ̈ܣܶܐ ܫܳܒܶܩ ܐ̱ܢܳܐ.
32 ܘܫܽܘܠܛܳܢܳܐ ܝܳܗܶܒ ܐ̱ܢܳܐ ܠܪܰܒ ܟܳܗ̈ܢܶܐ ܥܰܠ ܡܶܪܕܳܐ ܕܒܽܐܘܪܺܫܠܶܡ. ܕܰܢܩܺܝܡ ܥܠܰܘܗܝ ܓܰܒܖ̈ܶܐ ܕܢܶܛܪܽܘܢܳܝܗܝ ܐܰܝܠܶܝܢ ܕܗܽܘ ܨܳܒܶܐ.
33 ܘܟܽܠ ܢܰܦܫܳܐ ܕܺܝܗܽܘ̈ܕܳܝܶܐ ܕܶܫܬܰܒܝܰܬ ܡܶܢ ܐܰܪܥܳܐ ܕܺܝܗܽܘܕ ܒܟܽܠܳܗ̇ ܡܰܠܟܽܘܬܝ. ܫܳܒܶܩ ܐ̱ܢܳܐ ܒܰܪܬ ܚܺܐܖ̈ܶܐ ܡܰܓܳܢ. ܘܟܽܠܢܳܫ ܢܶܫܒܩܽܘܢ ܫܩܳܠܰܝ̈ܗܽܘܢ ܘܕܰܒܥܺܝܪܗܽܘܢ.
34 ܘܟܽܠܗܽܘܢ ܥܰܕܥܺܐܕܶܝ̈ܗ̇ ܘܫܰܒܶܝ̈ܗ̇ ܘܺܪܝܫ ܝܰܪ̈ܚܶܝܗ̇: ܘܝܰܘ̈ܡܳܬܳܐ ܝܺܕܺܝ̈ܥܶܐ: ܘܰܬܠܳܬܳܐ ܝܰܘ̈ܡܺܝܢ ܡܶܢ ܩܕܳܡ ܥܰܕܥܺܐܕܳܐ: ܘܰܬܠܳܬܳܐ ܝܰܘ̈ܡܺܝܢ ܡܶܢ ܒܳܬܰܪ ܥܺܕܥܺܐܕܳܐ: ܢܶܗܘܽܘܢ ܡܚܰܪܪܺܝܢ ܘܰܫܒܺܝܩܺܝܢ ܡܶܢ ܡܰܟ̈ܣܶܐ ܠܟܽܠܗܽܘܢ ܝܺܗܽܘ̈ܕܳܝܶܐ: ܕܥܳܡܪܺܝܢ ܒܡܰܠܟܽܘܬܝ.
35 ܘܠܳܐ ܐܺܝܬ ܫܽܘܠܛܳܢܳܐ ܠܐ̱ܢܳܫ ܕܢܶܬܒܰܥ ܐܰܘ ܕܢܶܐܠܽܘܨ ܠܚܰܕ ܡܶܢܗܽܘܢ ܥܰܠ ܟܽܠ ܨܒܽܘ ܕܺܐܝܬ.
36 ܘܰܕܢܶܬܟܰܬܒܽܘܢ ܡܶܢ ܝܺܗܽܘ̈ܕܳܝܶܐ ܒܚܰܝܠܰܘ̈ܗܝ ܕܡܰܠܟܳܐ ܬܠܳܬܳܐ ܐܰܠܦܺܝ̈ܢ. ܘܢܶܬܝܰܗ̈ܒܳܢ ܠܗܽܘܢ ܡܰܘ̈ܗܒܳܬܳܐ ܐܰܝܟ ܕܙܳܕܶܩ ܠܚܰܝܠܰܘ̈ܗܝ ܕܡܰܠܟܳܐ.
37 ܘܰܢܩܽܘܡܽܘܢ ܡܶܢܗܽܘܢ ܥܰܠ ܚܶܣܢܰܘ̈ܗܝ ܪܰܘܪ̈ܒܶܐ ܕܡܰܠܟܳܐ. ܘܡܶܢܗܽܘܢ ܬܽܘܒ ܢܩܽܘܡܽܘܢ ܥܰܠ ܨܶܒ̈ܘܳܬܳܐ ܡܗܰܝ̈ܡܢܳܬܳܐ ܕܡܰܠܟܳܐ. ܘܰܡܕܰܒܪ̈ܳܢܰܝܗܽܘܢ ܘܪ̈ܺܝܫܳܢܰܝܗܽܘܢ ܢܶܗܘܽܘܢ ܡܶܢܗܽܘܢ. ܘܢܶܬܕܰܒܪܽܘܢ ܒܢܳܡܽܘܣܰܝ̈ܗܽܘܢ ܐܰܝܟ ܕܦܳܩܶܕ ܡܰܠܟܳܐ ܒܰܐܪܥܳܐ ܕܺܝܗܽܘܕ.
38 ܘܰܬܠܳܬܳܐ ܫܩܳܠܺܝ̈ܢ ܕܶܬܬܣܺܝܡܘ ܥܰܠ ܝܺܗܽܘܕܳܐ ܡܶܢ ܐܰܪܥܳܐ ܕܫܳܡܪܺܝܢ ܘܡܶܢ ܕܰܓܠܺܝܠܳܐ: ܢܶܬܝܰܗܒܽܘܢ ܠܶܗ ܠܺܝܗܽܘܕܳܐ: ܕܢܶܗܘܽܘܢ ܟܽܠܗܽܘܢ ܬܚܶܝܬ ܚܰܕ ܫܽܘܠܛܳܢܳܐ. ܕܠܳܐ ܐ̱ܢܳܫ ܐ̱ܚܪܺܝܢ ܢܶܫܬܰܠܰܛ ܥܠܰܝܗܽܘܢ: ܐܶܠܳܐ ܐܶܢ ܖ̈ܰܒܰܝ ܟܳܗ̈ܢܐ ܒܰܠܚܽܘܕ.
39 ܘܠܰܦܛܽܘܠܡܰܐܺܝܣ ܕܶܝܢ ܘܰܠܟܽܠܶܗ ܫܽܘܠܛܳܢܳܗ̇: ܝܶܗܒܶܬ ܠܩܰܕܺܝ̈ܫܶܐ ܕܒܽܐܘܪܺܫܠܶܡ ܠܰܢܦܰܩܬܳܐ ܕܒܶܝܬ ܡܰܩܕܫܳܐ.
40 ܘܶܐܢܳܐ ܝܶܗܶܒ ܐ̱ܢܳܐ ܒܟܽܠ ܫܢܳܐ: ܚܰܡܫܬܰܥܣܰܪ ܐܰܠܦܺܝ̈ܢ ܕܟܶܣܦܳܐ ܡܶܢ ܒܶܝܬ ܓܰܙܶܗ ܕܡܰܠܟܳܐ.
41 ܘܟܽܠܡܶܕܶܡ ܕܡܶܬܚܺܝܒ ܠܺܝ ܡܶܢ ܨܶܒ̈ܘܳܬܳܐ ܐܰܝܠܶܝܢ ܕܠܳܐ ܐܶܬܺܝܗܶܒ ܠܺܝ: ܐܰܝܟ ܕܰܠܥܰܡ̈ܡܶܐ ܩܰܕܡܳܝ̈ܶܐ: ܡܶܢ ܗܳܫܳܐ ܢܶܬܝܰܗ̈ܒܳܢ ܠܰܥܒܳܕܶܗ ܕܒܰܝܬܳܐ.
42 ܘܬܽܘܒ ܚܰܡܫܳܐ ܐܰܠܦܺܝ̈ܢ ܕܟܶܣܦܳܐ: ܗܳܢܽܘܢ ܕܢܳܣܶܒ ܗܘܺܝܬ ܡܶܢ ܨܶܒܘ̈ܳܬܳܐ ܕܒܶܝܬ ܡܰܩܕܫܳܐ: ܒܟܽܠ ܫܢܳܐ ܘܰܫܢܳܐ ܫܳܒܶܩ ܐ̱ܢܳܐ. ܡܶܛܽܠ ܕܰܠܟܳܗ̈ܢܶܐ ܗܽܘ ܙܳܕܶܩ: ܕܰܡܫܰܡܫܺܝܢ ܒܗܰܝܟܠܳܐ.
43 ܘܟܽܠ ܐܰܝܠܶܝܢ ܕܢܶܥܪܩܽܘܢ ܘܢܶܬܓܰܘܣܽܘܢ ܒܗܰܝܟܠܳܐ ܕܒܽܐܘܪܺܫܠܶܡ: ܘܰܒܟܽܠܗܽܘܢ ܬܚܽܘܡܰܘ̈ܗܝ ܕܚܰܝܳܒܺܝܢ ܚܰܘܒܬܳܐ ܕܡܰܠܟܳܐ ܐܰܘ ܟܽܠ ܨܒܽܘ: ܢܶܗܘܽܘܢ ܡܶܫܬܪܶܝܢ. ܘܟܽܠܡܶܕܶܡ ܕܺܐܝܬ ܠܗܽܘܢ ܒܡܰܠܟܽܘܬܝ.
44 ܘܕܰܗܘܳܐ ܡܶܬܒܢܶܐ ܘܡܶܬܚܰܕܰܬ ܒܶܝܬ ܡܰܩܕܫܳܐ.
45 ܘܰܕܢܶܬܒܢܶܐ ܫܽܘܪܳܗ̇ ܕܽܐܘܪܺܫܠܶܡ: ܘܢܶܬܥܫܶܢ ܟܰܕ ܚܳܕܰܪ. ܘܰܢܦܰܩܬܳܐ ܬܶܬܺܝܗܶܒ ܠܗܽܘܢ ܡܶܢ ܒܰܝܬܶܗ ܕܡܰܠܟܳܐ. ܘܰܕܢܶܒܢܽܘܢ ܫܽܘܪ̈ܝܶܗ̇ ܕܺܝܗܽܘܕܳܐ.
46 ܘܟܰܕ ܫܡܰܥ ܕܶܝܢ ܝܽܘܢܳܬܳܢ ܘܥܰܡܳܐ ܡ̈ܶܠܶܐ ܗܳܠܶܝܢ ܡ̈ܶܠܶܐ ܕܰܫܠܰܚ ܕܺܡܶܛܪܶܝܳܘܣ: ܠܳܐ ܗܰܝܡܢܽܘܗܝ: ܘܠܳܐ ܩܰܒܶܠܘ ܡܶܢܶܗ. ܐܶܬܕܰܟܪܘ ܓܶܝܪ ܠܟܽܠܳܗ̇ ܒܺܝܫܬܳܐ ܕܰܥܒܰܕ ܒܺܐܝܣܪܳܐܶܝܠ: ܘܕܰܐܠܶܨ ܐܶܢܽܘܢ ܪܰܘܪ̈ܒܳܐܺܝܬ.
47 ܐܶܠܳܐ ܐܶܨܛܒܺܝܘ ܒܰܐܠܶܟܣܰܢܕܪܽܘܣ. ܡܶܛܽܠ ܕܗܽܘ ܗܘܳܐ ܠܗܽܘܢ ܪܺܝܫܳܐ ܕܡ̈ܶܠܶܐ ܕܰܫܠܳܡܳܐ. ܘܰܡܥܰܕܪܺܝܢ ܗܘܰܘ ܠܶܗ ܟܽܠܗܽܘܢ ܝܰܘ̈ܡܳܬܳܐ.
48 ܘܟܰܢܶܫ ܐܰܠܶܟܣܰܢܪܺܘܣ ܡܰܠܟܳܐ ܚܰܝܠܳܐ ܪܰܒܳܐ: ܘܰܫܪܳܐ ܠܽܘܩܒܰܠ ܕܺܡܶܛܪܶܝܳܘܣ.
49 ܘܫܰܪܺܝܘ ܠܡܰܩܪܳܒܽܘ ܬܖ̈ܰܝܗܽܘܢ ܡܰܠܟ̈ܶܐ. ܘܥܶܪܩܰܬ ܡܰܫܪܶܝܬܶܗ ܕܕܺܡܶܛܪܶܝܳܘܣ. ܘܰܪܕܰܦ ܐܶܢܽܘܢ ܐܰܠܶܟܣܰܢܕܪܽܘܣ ܘܶܐܬܥܰܫܰܢ ܥܠܰܝܗܽܘܢ.
50 ܘܰܥܫܶܢ ܩܪܳܒܳܐ ܣܰܓܺܝ ܥܕܰܡܳܐ ܕܰܥܪܰܒ ܫܶܡܫܳܐ. ܘܰܢܦܰܠ ܕܺܡܶܛܪܶܝܳܘܣ ܒܗܰܘ ܝܰܘܡܳܐ.
51 ܘܫܰܕܰܪ ܐܰܠܶܟܣܰܢܕܪܽܘܣ ܒܗܰܘ ܝܰܘܡܳܐ ܠܘܳܬ ܦܛܽܘܠܡܶܐܳܘܣ ܡܰܠܟܳܐ ܕܡܶܨܪܶܝܢ ܐܺܝܙܓܰܕ̈ܶܐ ܒܗܳܠܶܝܢ ܡ̈ܶܠܶܐ.
52 ܡܶܛܽܠ ܕܗܶܦܟܶܬ ܠܡܰܠܟܽܘܬܝ: ܘܝܶܬܒܶܬ ܥܰܠ ܟܽܘܪܣܝܳܐ ܕܰܐܒܳܗܰܝ̈: ܘܶܐܚܕܶܬ ܪܺܝܫܢܽܘܬܳܐ ܘܰܬܒܰܪܬܶܗ ܠܕܺܡܶܛܪܶܝܳܘܣ: ܘܶܐܬܥܰܫܢܶܬ ܘܶܐܚܕܶܬ ܐܰܪ̈ܥܳܬܰܢ.
53 ܐܰܩܪܒܶܬ ܓܶܝܪ ܥܰܡܶܗ. ܘܶܐܬܬܒܰܪ ܗܽܘ ܘܡܰܫܪܺܝܬܶܗ ܩܕܳܡܰܝܢ: ܘܝܶܬܒܶܬ ܥܰܠ ܟܽܘܪܣܝܳܐ ܕܡܰܠܟܽܘܬܶܗ.
54 ܘܗܳܫܳܐ ܢܩܺܝܡ ܚܰܕ ܥܰܡ ܚܰܕ ܪܳܚܡܽܘܬܳܐ. ܘܗܰܒܠܺܝ ܒܳܪܬܳܟ ܠܰܐܢ̱ܬܬܳܐ: ܘܶܐܗܘܶܐ ܠܳܟ ܚܰܬܢܳܐ. ܘܶܐܬܶܠ ܠܳܟ ܘܠܳܗ̇ ܡܰܘ̈ܗܒܳܬܳܐ ܕܫܳܘ̈ܝܳܢ ܠܳܟ.
55 ܘܰܥܢܳܐ ܦܛܽܘܠܡܶܐܳܘܣ ܡܰܠܟܳܐ ܘܶܐܡܰܪ. ܫܰܦܺܝܪ ܢܶܗܘܶܐ ܝܰܘܡܳܐ ܕܰܗܦܰܟܬ ܠܰܐܪܥܳܐ ܕܰܐܒܳܗܰܝ̈ܟ. ܘܺܝܬܶܒܬ ܥܰܠ ܟܽܘܪܣܝܳܐ ܕܡܰܠܟܽܘܬܳܐ.
56 ܘܗܳܫܳܐ ܐܶܥܒܶܕ ܠܳܟ ܟܽܠܡܶܕܶܡ ܕܰܫܠܰܚܬ. ܐܶܠܳܐ ܠܰܦܛܽܘܠܡܰܐܺܝܣ: ܬܰܡܳܢ ܢܶܚܙܶܐ ܚܰܕ ܠܚܰܕ. ܘܶܐܬܠ ܠܳܟ ܠܰܒܪܰܬܝ ܐܰܝܟ ܕܶܐܡܰܪܬ.
57 ܘܰܢܦܰܩ ܦܛܽܘܠܡܶܐܳܘܣ ܡܶܢ ܡܶܨܪܶܝܢ. ܗܽܘ ܘܰܩܠܶܐܘܦܰܛܪܰܐ ܒܰܪܬܶܗ. ܘܶܐܬܰܘ ܠܰܦܛܽܘܠܡܰܐܺܝܣ: ܒܰܫܢܰܬ ܡܳܐܐ ܘܫܬܺܝܢ ܘܬܰܪܬܶܝܢ.
58 ܘܰܐܪܥܶܗ ܐܰܠܶܟܣܰܢܕܪܽܘܣ ܡܰܠܟܳܐ. ܘܝܰܗܒ ܠܶܗ ܠܰܩܠܶܐܘܦܰܛܪܰܐ ܒܰܪܬܶܗ. ܘܰܥܒܰܕܘ ܡܶܫܬܽܘܬܳܐ ܒܰܦܛܳܘܠܡܶܐܺܝܣ ܐܰܝܟ ܡܰܠ̈ܟܶܐ ܒܬܶܫܒܽܘܚܬܳܐ ܪܰܒܬܳܐ.
59 ܘܰܟܬܰܒ ܐܰܠܶܟܣܰܢܕܪܽܘܣ ܡܰܠܟܳܐ ܠܝܽܘܢܳܬܳܢ ܕܢܺܐܬܶܐ ܠܽܐܘܪܥܶܗ.
60 ܘܶܐܙܰܠ ܝܽܘܢܳܬܳܢ ܒܬܶܫܒܽܘܚܬܳܐ ܠܰܦܛܽܘܠܡܰܐܺܝܣ: ܘܰܐܪܰܥ ܐܶܢܽܘܢ ܠܰܬܖ̈ܰܝܗܽܘܢ ܡܰܠ̈ܟܶܐ. ܘܝܰܗܒ ܠܗܽܘܢ ܕܰܗܒܳܐ ܕܣܺܐܡܳܐ ܘܡܰܘ̈ܗܒܳܬܳܐ ܘܰܠܪ̈ܳܚܡܰܝܗܽܘܢ. ܘܶܐܫܟܰܚ ܖ̈ܰܚܡܶܐ ܩܕܳܡ ܥܰܝܢܰܝ̈ܗܽܘܢ.
61 ܘܶܐܬܟܰܢܰܫܘ ܠܘܳܬܶܗ ܐ̱ܢܳܫ̈ܳܐ ܒܺܝ̈ܫܶܐ ܡܶܢ ܝܺܣܪܳܐܶܝܠ: ܓܰܒܖ̈ܶܐ ܥܰܘ̈ܳܠܶܐ: ܠܡܶܩܒܰܠ ܥܰܠ ܝܽܘܢܳܬܳܢ. ܘܠܳܐ ܚܳܪ ܒܗܽܘܢ ܡܰܠܟܳܐ: ܘܠܳܐ ܩܰܒܶܠ ܐܶܢܽܘܢ.
62 ܘܰܦܩܰܕ ܡܰܠܟܳܐ: ܘܰܐܫܠܚܽܘܗܝ ܠܝܽܘܢܳܬܳܢ ܢܰܚܬܰܘ̈ܗܝ: ܘܰܐܠܒܫܽܘܗܝ ܐܰܪ̈ܘܳܓܶܐ. ܘܟܰܕ ܥܒܰܕܘ ܠܶܗ ܗܳܟܰܢܳܐ.
63 ܐܰܘܬܒܶܗ ܥܰܡܶܗ ܡܰܠܟܳܐ. ܘܶܐܡܰܪ ܠܪܰܘܪ̈ܒܳܢܰܘܗܝ. ܦܽܘܩܘ ܥܰܡܶܗ ܠܶܡܨܥܰܬ ܡܕܺܝܢܬܳܐ. ܘܶܐܟܪܶܙܘ ܕܠܳܐ ܐ̱ܢܳܫ ܢܶܩܒܽܘܠ ܥܠܰܘܗܝ ܥܰܠ ܟܽܠ ܨܒܽܘ ܕܺܐܝܬ. ܘܠܳܐ ܢܰܗܪܺܝܘܗܝ ܥܰܠ ܟܽܠ ܡܶܠܳܐ ܕܺܐܝܬ.
64 ܘܟܰܕ ܚܙܰܘ ܗܳܠܶܝܢ ܕܩܳܒܠܺܝܢ ܗܘܰܘ ܥܰܠ ܝܽܘܢܳܬܳܢ ܬܶܫܒܽܘܚܬܶܗ: ܐܰܝܟ ܕܰܐܟܪܶܙ ܩܕܳܡܰܘܗܝ ܟܳܪ̈ܽܘܙܶܐ: ܟܰܕ ܡܟܰܣܰܝ ܐܰܪ̈ܓܘܳܢܶܐ: ܥܪܰܩܘ ܟܽܠܗܽܘܢ.
65 ܘܫܰܒܚܶܗ ܡܰܠܟܳܐ ܠܝܽܘܢܳܬܳܢ: ܘܟܰܬܒܶܗ ܡܶܢ ܪ̈ܺܝܫܶܗ ܕܪ̈ܳܚܡܰܘܗܝ. ܘܣܳܡܶܗ ܪܰܒ ܚܰܝܠܳܐ ܘܪܰܒ ܥܰܡܳܐ.
66 ܘܰܗܦܰܟ ܝܽܘܢܳܬܳܢ ܠܽܐܘܪܺܫܠܶܡ ܒܰܫܠܳܡܳܐ ܘܰܒܒܽܘܣܳܡܳܐ.
67 ܘܒܰܫܢܰܬ ܡܳܐܐ ܘܫܬܺܝܢ ܘܚܰܡܶܫ: ܐܶܬܳܐ ܕܺܡܶܛܪܶܝܳܘܣ ܒܶܪܗ ܕܕܺܡܶܛܪܶܝܳܘܣ ܡܶܢ ܩܶܪܛܳܐ ܠܰܐܪܥܳܐ ܕܰܐܒܳܗܰܘ̈ܗܝ.
68 ܘܰܫܡܰܥ ܐܰܠܶܟܣܰܢܕܪܽܘܣ ܡܰܠܟܳܐ: ܘܶܐܬܬܥܺܝܩ ܣܰܓܺܝ. ܘܰܗܦܰܟ ܠܰܐܢܛܝܳܟܺܝܰܐ.
69 ܘܰܐܩܺܝܡ ܕܺܡܶܛܪܶܝܳܘܣ ܠܰܐܦܳܠܳܘܢܺܝܳܘܣ ܗܰܘ ܕܰܥܒܺܝܕ ܗܘܳܐ ܥܰܠ ܣܽܘܪܺܝܰܐ. ܘܟܰܢܶܫ ܚܰܝܠܳܐ ܣܰܓܺܝܐܳܐ: ܘܰܫܪܳܐ ܥܰܠ ܝܰܡܢܺܝܢ. ܘܫܰܕܰܪ ܠܘܳܬ ܝܽܘܢܳܬܳܢ ܪܰܒ ܟܳܗ̈ܢܶܐ ܘܶܐܡܰܪ ܠܶܗ.
70 ܐܰܢ̱ܬ ܒܰܠܚܽܘܕܰܝܟ ܡܶܬܬܪܺܝܡ ܐܰܢ̱ܬ ܥܠܰܝܢ. ܘܶܐܢܳܐ ܗܘܺܝܬ ܠܚܶܣܕܳܐ ܘܰܠܒܶܙܚܳܐ ܡܶܛܽܠܳܬܳܟ. ܘܰܠܡܳܢܳܐ ܡܶܫܬܰܠܰܛ ܐܰܢ̱ܬ ܥܠܰܝܢ ܘܒܰܬܚܽܘ̈ܡܰܝܢ.
71 ܗܳܫܳܐ ܐܶܢܗܽܘ ܕܰܬܟܺܝܠ ܐܰܢ̱ܬ ܥܰܠ ܚܰܝܠܳܟ: ܚܽܘܬ ܠܘܳܬܰܢ ܠܰܦܩܰܥܬܳܐ: ܘܰܢܩܰܒܶܠ ܐܰܦ̈ܶܐ ܚܰܕ ܕܚܰܕ ܬܰܡܳܢ. ܡܶܛܽܠ ܕܥܰܡܝ ܐܺܝܬ ܚܰܝܠܳܐ ܕܰܡܕܺܝ̈ܢܳܬܳܐ.
72 ܫܰܐܶܠ ܘܰܚܙܺܝ ܕܡܰܢܽܘ ܐܶܢܳܐ. ܘܡܰܢ ܐܶܢܽܘܢ ܡܥܰܕܪ̈ܳܢܰܝܢ ܗܳܠܶܝܢ ܕܳܐܡܪܺܝܢ ܕܠܰܝܬ ܠܟܽܘܢ ܩܝܳܡ ܪ̈ܶܓܠܶܐ ܩܕܳܡܰܝܢ. ܡܶܛܽܠ ܕܬܰܪܬܶܝܢ ܙܰܒܢܺܝ̈ܢ ܐܶܙܕܟܺܝܘ ܐܰܒܳܗܰܝ̈ܟ ܒܰܐܪܥܗܽܘܢ.
73 ܘܗܳܫܳܐ ܠܳܐ ܡܶܬܡܨܶܐ ܐܰܢ̱ܬ ܚܰܝܠܳܐ ܠܰܡܩܳܡ ܩܕܳܡ ܚܰܝܠܰܢ ܘܦܰܪ̈ܳܫܰܘܗܝ ܒܰܦܩܰܥܬܳܐ. ܐܰܝܟܳܐ ܕܠܰܝܬ ܠܳܐ ܟܺܐܦܳܐ ܘܠܳܐ ܛܰܪܳܢܳܐ: ܘܳܐܦܠܳܐ ܐܰܬܪܳܐ ܠܡܶܥܪܰܩ.
74 ܘܟܰܕ ܫܡܰܥ ܝܽܘܢܳܬܳܢ ܡܶܠܰܘ̈ܗܝ ܕܰܐܦܳܠܳܘܢܺܝܳܘܣ ܐܶܬܚܰܡܰܬ ܘܶܐܬܥܰܙܰܙ ܒܪܶܥܝܳܢܶܗ. ܘܰܓܒܳܐ ܥܶܣܪܳܐ ܐܰܠܦܺܝ̈ܢ ܓܰܒܖ̈ܶܐ ܡܶܢ ܐܽܘܪܺܫܠܶܡ. ܘܰܐܪܥܶܗ ܫܶܡܥܽܘܢ ܐܰܚܽܘܗܝ ܠܥܽܘܕܪܳܢܶܗ.
75 ܘܰܫܪܳܐ ܝܽܘܢܳܬܳܢ ܥܰܠ ܝܽܘܦܺܐ. ܘܰܐܚܕܽܘܗ̇ ܥܳܡܽܘܪ̈ܶܝܗ̇ ܠܰܡܕܺܝܢܬܳܐ: ܡܶܛܽܠ ܕܡܰܛܰܪܬܳܐ ܕܰܐܦܳܠܳܘܢܺܝܳܘܣ ܐܺܝܬ ܗܘܳܐ ܒܳܗ̇ ܘܰܐܩܪܶܒܘ ܥܰܡܳܗ̇.
76 ܘܰܕܚܶܠܘ ܥܳܡܽܘܪ̈ܶܝܗ̇ ܕܰܡܕܺܝܢܬܳܐ: ܘܰܦܬܰܚܘ ܠܗܽܘܢ. ܘܶܐܫܬܰܠܰܛ ܝܽܘܢܳܬܳܢ ܥܰܠ ܝܽܘܦܺܐ.
77 ܘܰܫܡܰܥ ܐܰܦܳܠܳܘܢܺܝܳܘܣ: ܕܒܰܪ ܬܠܳܬܳܐ ܐܰܠܦܺܝ̈ܢ ܦܰܪ̈ܳܫܶܐ ܘܚܰܝܠܳܐ ܣܰܓܺܝܐܳܐ. ܘܶܐܙܰܠ ܠܙܘܛܘܣ ܐܰܝܟ ܥܳܒܽܘܪܳܐ. ܘܩܰܕܶܡ ܗܘܳܐ ܠܗܽܘܢ ܠܰܦܩܰܥܬܳܐ ܡܶܛܽܠ ܚܰܝܠܳܐ ܕܦܰܪ̈ܳܫܶܐ ܕܺܐܝܬ ܗܘܳܐ ܥܰܡܶܗ: ܘܰܬܟܺܝܠ ܗܘܳܐ ܥܠܰܝܗܽܘܢ.
78 ܘܰܪܕܰܦ ܝܽܘܢܳܬܳܢ ܒܳܬܪܶܗ ܠܙܘܛܳܘܣ. ܘܰܩܪ̈ܶܒܝ ܡܰܫܪ̈ܝܳܬܳܐ ܐܰܟܚܕܳܐ ܠܰܩܪܳܒܳܐ.
79 ܘܰܫܒܰܩ ܐܰܦܳܠܳܘܢܺܝܳܘܣ ܐܳܠܶܦ ܦܰܪ̈ܳܫܺܝܢ ܡܶܢ ܒܶܣܬܰܪܗܽܘܢ ܒܰܟܡܺܐܢܳܐ.
80 ܘܺܝܕܰܥ ܝܽܘܢܳܬܳܢ ܕܰܟܡܺܐܢܳܐ ܐܺܝܬ ܒܶܣܬܪܶܗ. ܘܶܐܬܟܰܪܟܽܘܗ̇ ܠܡܰܫܪܺܝܬܶܗ. ܘܰܫܕܰܘ: ܘܶܐܬܛܰܠܰܩܘ ܓܺܐܖ̈ܰܝܗܽܘܢ ܒܥܰܡܳܐ: ܡܶܢ ܨܰܦܪܳܐ ܘܰܥܕܰܡܳܐ ܠܦܳܢܝܳܐ.
81 ܥܰܡܳܐ ܕܶܝܢ ܩܳܐܶܡ ܗܘܳܐ ܐܰܝܟ ܕܰܦܩܰܕ ܝܽܘܢܳܬܳܢ: ܘܰܠܐܺܝܘ ܦܰܪ̈ܳܫܰܝܗܽܘܢ.
82 ܘܰܢܓܰܕ ܫܶܡܥܽܘܢ ܠܚܰܝܠܶܗ: ܘܰܐܩܪܶܒ ܥܰܡ ܦܠܰܓ̈ܶܐ. ܥܕܰܡܳܐ ܕܶܐܫܬܪܺܝܘ ܦܰܪ̈ܳܫܶܐ ܘܚܰܝ̈ܠܶܐ: ܘܶܐܬܬܒܰܪܘ ܘܰܥܪܰܩܘ ܡܶܢ ܩܕܳܡܰܘܗܝ.
83 ܘܦܰܪ̈ܳܫܶܐ ܐܶܬܬܒܰܪܘ ܒܰܦܩܰܥܬܳܐ: ܘܰܥܪܰܩܘ ܠܙܘܛܘܣ. ܘܥ̣ܰܠܘ ܠܒܶܝܬ ܕܳܓܽܘܢ ܦܬܰܟܪܗܽܘܢ ܕܢܶܫܬܰܘܙܒܽܘܢ.
84 ܘܰܐܘܩܶܕܶܗ ܝܽܘܢܳܬܳܢ ܠܒܶܝܬ ܦܬܰܟܪܗܽܘܢ. ܘܠܰܐܝܠܶܝܢ ܕܰܥܪܰܩܘ ܠܡܶܬܓܰܘܳܣܽܘ ܒܶܝܬ ܕܳܓܽܘܢ ܐܰܘܩܶܕܘ ܐܶܢܽܘܢ ܥܰܡܶܗ. ܘܠܙܘܛܘܣ ܘܠܰܡܕܺܝ̈ܢܳܬܳܐ ܕܰܚܕܺܝܪ̈ܳܢ ܠܳܗ̇: ܐܰܘܩܶܕ ܐܶܢܶܝܢ ܒܢܽܘܪܳܐ: ܘܰܢܣܰܒ ܒܶܙܬܗܶܝܢ.
85 ܘܰܗܘܰܘ ܐܰܝܠܶܝܢ ܕܰܢܦܰܠܘ ܒܚܰܪܒܳܐ ܥܰܡ ܐܰܝܠܶܝܢ ܕܺܝܩܶܕܘ: ܐܰܝܟ ܬܡܳܝܢܳܐ ܐܰܠܦܺܝ̈ܢ ܓܰܒܪ̈ܺܝܢ.
86 ܘܰܫܩܰܠ ܡܶܢ ܬܰܡܳܢ ܝܽܘܢܳܬܳܢ: ܘܰܫܪܳܐ ܥܰܠ ܐܰܫܩܳܠܽܘܢ. ܘܰܢܦܰܩܘ ܝܰܬܳܒܶܝ̈ܗ̇ ܕܰܡܕܺܝܢܬܳܐ ܠܽܐܘܪܥܶܗ ܒܬܶܫܒܽܘܚܬܳܐ ܪܰܒܬܳܐ.
87 ܘܰܗܦܰܟ ܝܽܘܢܳܬܳܢ ܠܽܐܘܪܺܫܠܶܡ ܥܰܡ ܐܰܝܠܶܝܢ ܕܥܰܡܶܗ: ܟܰܕ ܐܺܝܬ ܥܰܡܗܽܘܢ ܒܶܙܬܳܐ ܣܰܓܺܝܐܬܳܐ.
88 ܘܟܰܕ ܫܡܰܥ ܐܰܠܶܟܣܰܢܕܪܽܘܣ ܡܰܠܟܳܐ ܠܳܗܠܶܝܢ ܡ̈ܶܠܶܐ. ܐܰܘܣܶܦ ܠܰܡܫܰܒܳܚܽܘܬܶܗ ܠܝܽܘܢܳܬܳܢ.
89 ܘܫܰܕܰܪ ܠܶܗ ܦܺܝܒܠܳܐ ܕܕܰܗܒܳܐ: ܐܰܝܟ ܕܺܐܝܬ ܥܝܳܕܳܐ ܠܡܶܬܺܝܗܳܒܽܘ ܠܰܒܢܰܝ̈ ܛܽܘܗܡܗܽܘܢ ܕܡܰܠܟ̈ܶܐ. ܘܝܰܗܒ ܠܶܗ ܠܥܶܩܪܽܘܢ: ܘܰܠܟܽܠܗܽܘܢ ܬܚܽܘ̈ܡܶܝܗ̇ ܠܝܳܪܬܽܘܬܳܐ.