1 Maccabees 12
The First Book of Maccabees
܀ ܐ ܡܩܒܝ̈ܐ ܝܒ ܀
1 ܘܰܚܙܳܐ ܝܽܘܢܳܬܳܢ ܕܙܰܒܢܳܐ ܡܥܰܕܰܪ ܠܶܗ: ܘܰܓܒܳܐ ܓܰܒܖ̈ܶܐ ܘܫܰܕܰܪ ܐܶܢܽܘܢ ܠܪܽܗܘܡܺܝ: ܠܰܡܩܳܡܽܘ ܘܠܰܡܚܰܕܳܬܽܘ ܪܳܚܡܽܘܬܳܐ ܕܰܠܘܳܬܗܽܘܢ.
2 ܘܰܠܘܳܬ ܐܶܣܦܰܪ̈ܛܳܝܶܐ: ܘܠܰܐܬܖ̈ܰܘܳܬܳܐ ܐ̱ܚܪ̈ܳܢܶܐ. ܫܰܕܰܪ ܠܗܽܘܢ ܐܶܬܓܪ̈ܳܬܳܐ ܗܳܟܰܢܳܐ.
3 ܘܶܐܙܰܠܘ ܠܪܽܗܘܡܝ: ܘܥ̣ܰܠܘ ܠܒܶܝܬ ܒܽܘܠܳܐ ܕܺܝܠܗܽܘܢ. ܘܶܐܡܰܪܘ ܠܗܽܘܢ. ܝܽܘܢܳܬܳܢ ܪܰܒ ܟܳܗ̈ܢܶܐ ܘܥܰܡܳܐ ܕܺܝܗܽܘܕܳܝ̈ܶܐ ܫܰܕܪܽܘܢ: ܠܰܚܰܕܳܬܽܘ ܪܳܚܡܽܘܬܳܐ ܘܥܽܘܕܪܳܢܳܐ ܐܰܝܟ ܕܡܶܢ ܩܕܺܝܡ. ܘܩܰܒܶܠܘ ܐܶܢܽܘܢ ܒܢܰܝ̈ ܪܽܗܘܡܝ ܒܚܰܕܽܘܬܳܐ.
4 ܘܝܰܗܒܘ ܠܗܽܘܢ ܐܶܓܪ̈ܳܬܳܐ: ܕܰܒܟܽܠ ܐܰܬܖ̈ܰܘܳܬܳܐ ܕܥܳܡܪܺܝܢ: ܢܶܗܘܽܘܢ ܡܫܰܕܪܺܝܢ ܠܗܽܘܢ ܒܰܫܠܳܡܳܐ ܠܰܐܪܥܳܐ ܕܺܝܗܽܘܕ.
5 ܘܗܳܢܰܘ ܦܶܚܡܳܐ ܕܶܐܓܰܪܬܳܐ ܕܫܰܕܰܪ ܝܽܘܢܳܬܳܢ ܠܶܐܣܦܰܪ̈ܛܳܝܶܐ.
6 ܝܽܘܢܳܬܳܢ ܪܰܒ ܟܳܗ̈ܢܶܐ ܘܣܰܒ̈ܶܐ ܘܟܳܗ̈ܢܶܐ ܘܟܽܠܶܗ ܥܰܡܳܐ ܕܺܝܗܽܘ̈ܕܳܝܶܐ: ܠܶܐܣܦܰܪ̈ܛܳܝܶܐ ܐܰܚܰܝ̈ܢ: ܫܠܳܡ.
7 ܐܳܦ ܓܶܝܪ ܗܳܫܳܐ ܐܶܫܬܰܕܰܪ̈ܝ ܐܶܓܪ̈ܳܬܳܐ ܠܘܳܬ ܚܽܘܢܺܝܳܐ ܪܰܒ ܟܳܗ̈ܢܶܐ ܡܶܢ ܕܰܪܺܝܽܘܫ ܡܰܠܟܟܽܘܢ ܕܺܐܝܬܰܝܟܽܘܢ ܐܰܚܰܝ̈ܢ: ܐܰܝܟ ܕܶܐܓܪ̈ܳܬܳܐ ܡܚܰܘ̈ܝܳܢ.
8 ܘܩܰܒܠܶܗ ܚܽܘܢܺܝܳܐ ܠܓܰܒܪܳܐ ܗܰܘ ܕܶܐܫܬܰܕܰܪ ܗܘܳܐ ܒܬܶܫܒܽܘܚܬܳܐ: ܘܩܰܒܶܠ ܐܶܓܪ̈ܳܬܳܐ ܗܳܠܶܝܢ ܕܰܟܬܺܝ̈ܒܳܢ ܗܘܰܝ̈ ܥܰܠ ܥܽܘܕܪܳܢܳܐ ܘܥܰܠ ܪܳܚܡܽܘܬܳܐ.
9 ܚܢܰܢ ܕܶܝܢ ܠܳܐ ܗܘܳܐ ܥܰܠ ܗܳܠܶܝܢ ܬܟܺܝܠܺܝܢܰܢ. ܡܶܛܽܠ ܕܺܐܝܬ ܗܘܳܐ ܠܰܢ ܒܽܘܝܳܐܳܐ ܟܬܳܒ̈ܶܐ ܩܰܕܺܝ̈ܫܶܐ ܕܒܺܐܝ̈ܕܰܝܢ.
10 ܡܶܛܽܠ ܗܳܕܶܐ ܕܶܝܢ ܨܒܰܝܢ ܕܰܢܫܰܕܰܪ ܠܘܳܬܟܽܘܢ ܕܰܢܚܰܕܶܬ ܪܳܚܡܽܘܬܳܐ ܘܰܐܚܽܘܬܳܐ ܕܰܠܘܳܬܟܽܘܢ: ܕܠܳܐ ܢܶܗܘܶܐ ܠܟܽܘܢ ܐܰܝܟ ܢܽܘܟܪ̈ܳܝܶܐ. ܗܳܐ ܓܶܝܪ ܙܰܒܢܳܐ ܣܰܓܺܝܐܳܐ ܥܒܰܪ ܡܶܢ ܕܫܰܕܰܪܬܽܘܢ ܨܶܐܕܰܝܢ.
11 ܚܢܰܢ ܕܶܝܢ ܒܟܽܠܙܒܰܢ ܕܠܳܐ ܫܰܠܝܽܘ: ܒܥܰܕܥܺܐܕ̈ܶܐ ܘܰܒܝܰܘ̈ܡܳܬܳܐ ܝܺܕܺܝ̈ܥܶܐ ܡܶܬܕܰܟܪܺܝܢܰܢ ܠܟܽܘܢ: ܒܟܽܠ ܩܽܘܪ̈ܒܳܢܶܐ ܕܰܡܩܰܪܒܺܝܢܰܢ ܒܟܽܠ ܨܰܠ̈ܘܳܬܰܢ: ܐܰܝܟ ܕܡܶܬܒܥܶܐ ܘܙܳܕܶܩ ܕܐ̱ܢܳܫ ܠܰܐܚܰܘ̈ܗܝ ܢܶܬܕܟܰܪ.
12 ܘܣܰܓܺܝ ܡܶܬܒܰܣܡܺܝܢܰܢ ܥܰܠ ܬܶܫܒܽܘܚܬܟܽܘܢ.
13 ܠܰܢ ܕܶܝܢ ܚܰܕܪܽܘܢ ܐܽܘ̈ܠܨܳܢܶܐ ܣܰܓܺܝ̈ܐܶܐ: ܘܰܩܪ̈ܳܒܶܐ ܪܰܘܪ̈ܒܶܐ ܕܰܐܩܪܶܒܘ ܥܰܡܰܢ ܟܽܠܗܽܘܢ ܡܰܠ̈ܟܶܐ ܕܰܚܕܳܖ̈ܰܝܢ.
14 ܘܠܳܐ ܨܒܰܝܢ ܕܢܰܗܰܪܟܽܘܢ: ܠܳܐ ܠܟܽܘܢ ܐܳܦܠܳܐ ܠܫܰܪܟܳܐ ܕܪ̈ܳܚܡܰܝܢ ܘܰܡܥܰܕܪ̈ܳܢܰܝܢ ܒܟܽܠܗܽܘܢ ܩܪ̈ܳܒܰܝܢ.
15 ܐܺܝܬ ܗܽܘ ܠܰܢ ܓܶܝܪ ܥܽܘܕܪܳܢܳܐ ܕܡܶܢ ܫܡܰܝܳܐ ܕܗܽܘ ܡܥܰܕܰܪ ܠܰܢ. ܕܦܰܨܝܰܢ ܡܶܢ ܒܥܶܠܕܒܳܒܰܝ̈ܢ: ܘܡܰܟܶܟ ܐܶܢܽܘܢ ܩܕܳܡܰܝܢ.
16 ܓܒܰܝܢ ܕܶܝܢ ܠܢܽܘܡܺܢܝܳܘܣ ܒܰܪ ܐܰܢܛܝܰܟܳܘܣ ܘܠܰܐܢܛܝܦܪܘܣ ܒܰܪ ܐܺܝܳܣܽܘܢ. ܘܫܰܕܪܰܢ ܠܘܳܬ ܒܢܰܝ̈ ܪܽܗܘܡܝ ܠܰܡܚܰܕܳܬܽܘ ܥܽܘܕܪܳܢܳܐ ܘܪܳܚܡܽܘܬܳܐ ܕܰܠܘܳܬܗܽܘܢ.
17 ܘܦܰܩܶܕܢ ܐܶܢܽܘܢ ܕܳܐܦ ܠܘܳܬܟܽܘܢ ܢܺܐܬܽܘܢ: ܘܰܢܫܰܐܠܽܘܢ ܒܰܫܠܳܡܟܽܘܢ: ܘܢܶܬܠܽܘܢ ܠܟܽܘܢ ܐܶܓܪ̈ܳܬܰܢ: ܥܰܠ ܚܽܘܕܳܬܳܐ ܕܰܐܚܽܘܬܳܐ ܕܨܶܕܰܝܟܽܘܢ.
18 ܘܗܳܫܳܐ ܫܰܦܺܝܪ ܥܳܒܕܺܝܢ ܐܢ̱ܬܽܘܢ ܐܶܢܗܽܘ ܕܬܶܟܬܒܽܘܢ ܠܰܢ ܦܶܚܡܗܶܝܢ ܕܗܳܠܶܝܢ.
19 ܗܳܢܰܘ ܦܶܚܡܳܐ ܕܶܐܓܰܪܬܳܐ ܕܫܰܕܰܪ ܗܘܳܐ ܐܰܢܺܝܪܣ ܡܰܠܟܳܐ ܕܶܐܣܦܰܪ̈ܛܳܝܶܐ.
20 ܠܚܽܘܢܺܝܳܐ ܪܰܒ ܟܳܗ̈ܢܶܐ: ܫܠܳܡ.
21 ܐܶܫܬܟܰܚ ܒܰܟܬܳܒܳܐ ܠܘܳܬ ܣܦܰܪ̈ܛܳܝܶܐ ܘܥܰܠ ܝܺܗܽܘ̈ܕܳܝܶܐ: ܕܺܐܝܬܰܝܗܽܘܢ ܐܰܚ̈ܶܐ: ܘܺܐܝܬܰܝܗܽܘܢ ܡܶܢ ܙܰܪܥܶܐ ܕܰܐܒܪܳܗܳܡ.
22 ܘܗܳܫܳܐ ܡܶܢ ܗܳܠܶܝܢ ܕܺܝܕܰܥܢ: ܫܰܦܺܝܪ ܥܳܒܕܺܝܢ ܐܢ̱ܬܽܘܢ ܕܟܳܬܒܺܝܢ ܐܢ̱ܬܽܘܢ ܠܰܢ ܥܰܠ ܫܠܳܡܟܽܘܢ.
23 ܘܰܚܢܰܢ ܟܬܳܒܢܰܢ ܠܟܽܘܢ ܥܰܠ ܟܽܠܡܶܕܶܡ ܕܰܠܘܳܬܰܢ. ܡܶܛܽܠ ܕܟܽܠ ܕܺܐܝܬ ܠܟܽܘܢ: ܕܺܝܠܰܢ ܗܽܘ. ܘܟܽܠ ܕܺܐܝܬ ܠܰܢ ܕܺܝܠܟܽܘܢ ܗܽܘ. ܦܰܩܶܕܢ ܐܶܢܽܘܢ ܕܶܝܢ ܕܗܳܠܶܝܢ ܟܽܠܗܶܝܢ ܢܺܐܡܪܽܘܢ ܠܟܽܘܢ.
24 ܘܰܫܡܰܥ ܝܽܘܢܳܬܳܢ ܕܰܗܦܰܟܘ ܪܰܘܪ̈ܒܳܢܶܐ ܕܚܰܝܠܰܘ̈ܗܝ ܕܕܺܡܰܛܪܺܝܳܘܣ ܒܚܰܝܠܳܐ ܣܰܓܺܝܐܳܐ: ܝܰܬܺܝܪ ܡܶܢ ܗܰܘ ܩܰܕܡܳܝܳܐ ܕܢܰܩܪܒܽܘܢ ܥܰܡܶܗ.
25 ܘܰܫܩܰܠ ܝܽܘܢܳܬܳܢ ܡܶܢ ܐܽܘܪܺܫܠܶܡ. ܘܰܐܪܰܥ ܐܶܢܽܘܢ ܒܰܐܪܥܳܐ ܕܚܶܡ̈ܬܳܝܶܐ. ܠܳܐ ܓܶܝܪ ܝܰܗܒ ܗܘܳܐ ܠܗܽܘܢ ܐܰܬܪܳܐ ܕܰܢܕܽܘܫܽܘܢ ܒܰܐܪܥܶܗ.
26 ܘܫܰܕܰܪ ܓܳܫܽܘ̈ܫܶܐ ܠܡܰܫܪܺܝܬܗܽܘܢ: ܘܰܗܦܰܟܘ ܘܶܐܡܰܪܘ ܠܶܗ: ܕܗܳܟܰܢܳܐ ܡܶܬܚܰܫܒܺܝܢ ܕܰܒܠܺܠܝܳܐ ܢܰܪܡܽܘܢ ܥܠܰܝܟܽܘܢ.
27 ܟܰܕ ܥܪܰܒ ܕܶܝܢ ܫܶܡܫܳܐ: ܦܩܰܕ ܝܽܘܢܳܬܳܢ ܠܰܐܝܠܶܝܢ ܕܥܰܡܶܗ: ܕܰܗܘܰܘ ܥܺܝܪܺܝܢ: ܘܰܡܛܰܝܒܺܝܢ ܙܰܝܢܗܽܘܢ. ܘܰܡܥܰܬܕܺܝܢ ܠܰܩܪܳܒܳܐ ܟܽܠܶܗ ܠܺܠܝܳܐ. ܘܰܐܦܶܩ ܢܳܛܽܘܖ̈ܶܐ ܠܒܰܪ ܡܶܢ ܡܰܫܪܺܝܬܳܐ ܒܟܽܠܗܽܘܢ ܚܕܳܪ̈ܶܝܗ̇.
28 ܫܡܰܥܘ ܒܥܶܠܕܒܳܒܰܝ̈ܗܽܘܢ ܕܰܡܥܰܬܕ ܗܽܘ ܝܽܘܢܳܬܳܢ ܘܰܐܝܠܶܝܢ ܕܥܰܡܶܗ ܠܰܩܪܳܒܳܐ: ܘܰܕܚܶܠܘ ܘܙܳܥܘ ܒܠܶܒܗܽܘܢ. ܘܰܐܪܦܺܝܘ ܢܽܘܪܳܐ ܒܡܰܫܪ̈ܝܳܬܗܽܘܢ: ܘܰܥܪܰܩܘ.
29 ܝܽܘܢܳܬܳܢ ܕܶܝܢ ܘܰܐܝܠܶܝܢ ܕܥܰܡܶܗ: ܠܳܐ ܝܺܕܰܥܘ ܥܕܰܡܳܐ ܠܨܰܦܪܳܐ. ܚܳܙܶܝܢ ܗܘܰܘ ܓܶܝܪ ܢܽܘܪܳܐ ܕܝܳܩܕܳܐ.
30 ܘܰܪܕܰܦ ܝܽܘܢܳܬܳܢ ܒܳܬܰܪܗܽܘܢ: ܘܠܳܐ ܐܰܕܪܶܟ ܐܶܢܽܘܢ. ܥܰܒܪܽܘܗܝ ܗܘܰܘ ܓܶܝܪ ܠܢܰܗܪܳܐ ܕܡܶܬܩܪܶܐ ܒܰܪ ܚܺܐܖ̈ܶܐ.
31 ܘܰܗܦܰܟ ܝܽܘܢܳܬܳܢ ܥܰܠ ܥܰܖ̈ܰܒܳܝܶܐ ܗܳܢܽܘܢ ܕܡܶܬܩܪܶܝܢ ܙܒܺܝܕܳܝ̈ܶܐ: ܘܰܡܚܳܐ ܐܶܢܽܘܢ: ܘܰܢܣܰܒ ܒܶܙܬܗܽܘܢ.
32 ܘܰܫܩܰܠ ܘܶܐܬܳܐ ܠܕܰܪܡܣܽܘܩ. ܘܰܥܒܰܪ ܒܰܐܪ̈ܥܳܬܳܐ.
33 ܘܫܶܡܥܽܘܢ ܢܦܰܩ ܘܶܐܙܰܠ ܥܕܰܡܳܐ ܠܰܐܫܩܳܠܽܘܢ ܘܰܠܚܶܣܢ̈ܶܐ ܕܰܚܕܳܪ̈ܶܝܗ̇. ܘܰܐܪܟܶܢ ܠܝܽܘܦܺܐ ܘܟܰܒܫܳܗ̇.
34 ܫܡܰܥ ܓܶܝܪ ܕܰܠܚܶܣܢܳܐ ܒܳܥܶܝܢ ܗܘܰܘ ܕܢܰܫܠܡܽܘܢܳܝܗܝ ܠܰܕܒܶܝܬ ܕܺܡܰܛܪܺܝܳܘܣ: ܘܰܐܘܬܶܒ ܬܰܡܳܢ ܡܰܛܰܪܬܳܐ ܕܰܗܘܰܘ ܢܳܛܪܺܝܢ ܠܶܗ.
35 ܘܰܗܦܰܟ ܝܽܘܢܳܬܳܢ ܘܟܰܢܶܫ ܠܣܳܒܰܘ̈ܗܝ ܕܥܰܡܳܐ. ܘܶܐܬܡܰܠܰܟ ܥܰܡܗܽܘܢ ܕܢܶܒܢܶܐ ܒܺܝܗܽܘܕ ܚܶܣܢ̈ܶܐ.
36 ܘܰܢܪܰܡܪܶܡ ܫܽܘܪ̈ܶܝܗ̇ ܕܽܐܘܪܺܫܠܶܡ. ܘܰܥܒܰܕ ܪܰܘܡܳܐ ܪܰܒܳܐ ܒܰܝܢܳܬ ܡܶܪܕܳܐ ܠܰܡܕܺܝܢܬܳܐ. ܕܰܗܘܳܐ ܦܰܪܺܝܩ ܡܶܢ ܡܕܺܝܢܬܳܐ. ܕܬܶܗܘܶܐ ܡܕܺܝܢܬܳܐ ܡܶܢܶܗ ܘܰܠܗܰܠ: ܐܰܝܟ ܕܠܳܐ ܗܘܳܐ ܙܳܒܢܺܝܢ ܐܳܦܠܳܐ ܡܙܰܒܢܺܝܢ.
37 ܘܶܐܬܟܰܢܰܫܘ ܠܡܶܒܢܳܐ ܠܰܡܕܺܝܢܬܳܐ. ܘܰܢܦܰܠ ܡܶܢ ܫܽܘܪܳܐ ܥܰܠ ܓܶܢܒ ܢܰܚܠܳܐ ܕܡܰܕܢܚܳܐ: ܘܛܰܡܪܳܗ̇ ܠܕܽܘܟܬܳܐ ܕܡܶܬܩܰܪܝܳܐ ܟܶܣܦܰܢܬܳܐ.
38 ܘܫܶܡܥܽܘܢ ܒܢܳܐ ܠܰܥܕܺܝܪܳܐ ܕܰܒܨܰܦܺܝܠܳܐ ܘܰܐܥܫܢܳܗ̇ ܒܬܰܪ̈ܥܶܐ ܘܰܒܡܽܘ̈ܟܠܶܐ.
39 ܘܰܨܒܳܐ ܛܺܪܝܦܽܘܢ ܕܢܰܡܠܶܟ ܥܰܠ ܐܰܣܝܰܐ: ܘܢܶܩܛܽܘܪ ܬܳܓܳܐ: ܘܢܰܘܫܶܛ ܐܺܝܕܳܐ ܥܰܠ ܐܰܢܛܝܰܟܳܘܣ ܡܰܠܟܳܐ.
40 ܘܰܕܚܶܠ ܕܰܠܡܳܐ ܠܳܐ ܢܶܫܒܩܺܝܘܗܝ ܢܽܘܢܳܬܳܢ: ܐܰܘ ܕܰܠܡܳܐ ܢܰܩܪܶܒ ܥܰܡܶܗ. ܘܒܳܥܶܐ ܗܘܳܐ ܠܶܗ ܐܰܬܪܳܐ ܕܢܺܐܚܕܺܝܘܗܝ ܠܝܽܘܢܳܬܳܢ ܘܢܰܘܒܕܺܝܘܗܝ. ܘܰܫܩܰܠ ܘܶܐܬܳܐ ܠܒܶܝܬ ܝܳܫܳܢ.
41 ܘܰܢܦܰܩ ܝܽܘܢܳܬܳܢ ܒܰܐܪܒܥܺܝܢ ܐܰܠܦܺܝ̈ܢ ܓܰܒܖ̈ܶܐ ܡܰܓܒܳܝ̈ܶܐ ܠܰܩܪܳܒܳܐ. ܘܰܫܩܰܠ ܘܶܐܬܳܐ ܠܒܶܝܬ ܝܳܫܳܢ.
42 ܘܰܚܙܳܐ ܛܪܺܝܦܽܘܢ ܕܶܐܬܳܐ ܝܽܘܢܳܬܳܢ ܒܚܰܝܠܳܐ ܣܰܓܺܝܐܳܐ: ܘܰܕܚܶܠ ܕܢܰܘܫܶܛ ܥܠܰܘܗܝ ܐܺܝܕܳܐ.
43 ܘܩܰܒܠܶܗ ܒܬܶܫܒܽܘܚܬܳܐ ܘܪܰܡܪܡܶܗ ܩܕܳܡ ܟܽܠܗܽܘܢ ܪ̈ܳܚܡܰܘܗܝ. ܘܝܰܗܒ ܠܶܗ ܡܰܘܗ̈ܒܳܬܳܐ. ܘܶܐܡܰܪ ܠܪ̈ܳܚܡܰܘܗܝ. ܘܝܰܗܒܘ ܠܶܗ ܐܳܦ ܗܶܢܽܘܢ ܡܰܘܗ̈ܒܳܬܳܐ ܘܰܠܚܰܝܠܶܗ. ܘܰܦܩܰܕ ܕܢܶܗܘܽܘܢ ܡܶܫܬܰܡܥܺܝܢ ܠܶܗ ܐܰܝܟ ܕܠܶܗ.
44 ܘܶܐܡܰܪ ܠܶܗ ܠܝܽܘܢܳܬܳܢ. ܠܡܳܢܳܐ ܫܚܰܩܬ ܘܰܐܝܬܺܝܬ ܠܗܳܢܳܐ ܟܽܠܶܗ ܥܰܡܳܐ: ܟܰܕ ܠܰܝܬ ܠܰܢ ܩܪܳܒܳܐ.
45 ܘܗܳܫܳܐ ܫܰܕܰܪ ܐܶܢܽܘܢ ܐ̱ܢܳܫ ܠܒܰܝܬܶܗ. ܘܰܓܒܺܝ ܠܳܟ ܐ̱ܢܳܫ̈ܳܐ ܙܥܽܘܖ̈ܶܐ ܕܢܶܗܘܽܘܢ ܥܰܡܳܟ. ܘܬܳܐ ܥܰܡܝ ܠܰܦܛܽܘܠܡܰܐܺܝܣ: ܘܰܐܫܠܡܺܝܗ̇ ܠܳܟ: ܘܰܠܫܰܪܟܳܐ ܕܚܶܣܢ̈ܶܐ ܘܰܠܫܰܪܟܳܐ ܕܚܰܝܠܳܐ. ܘܰܠܟܽܠܗܽܘܢ ܐܰܝܠܶܝܢ ܕܩܳܝܡܺܝܢ ܥܰܠ ܨܶܒ̈ܘܳܬܳܐ. ܘܶܐܗܦܽܘܟ ܘܺܐܙܰܠ ܡܶܛܽܠܗܳܕܶܐ ܗܽܘ ܓܶܝܪ ܐܶܬܺܝܬ.
46 ܘܗܰܝܡܢܶܗ ܘܰܥܒܰܕ ܐܰܝܟ ܕܶܐܡܰܪ ܠܶܗ. ܘܫܰܕܪܶܗ ܠܚܰܝܠܶܗ ܕܝܽܘܢܳܬܳܢ: ܘܶܐܙܰܠ ܠܰܐܪܥܳܐ ܕܺܝܗܽܘܕܳܐ.
47 ܫܒܰܩ ܕܶܝܢ ܠܘܳܬܶܗ ܬܠܳܬܳܐ ܐܰܠܦܺܝ̈ܢ ܓܰܒܪ̈ܺܝܢ. ܘܰܬܪܶܝܢ ܐܰܠܦܺܝ̈ܢ ܡܶܢܗܽܘܢ ܐܰܪܦܺܝ ܒܰܓܠܺܝܠܳܐ. ܐܳܠܶܦ ܕܶܝܢ ܐܶܙܰܠܘ ܥܰܡܶܗ.
48 ܟܰܕ ܕܶܝܢ ܥ̣ܰܠ ܝܽܘܢܳܬܳܢ ܠܰܦܛܽܘܠܡܰܐܺܝܣ ܡܕܺܝܢܬܳܐ: ܚܰܒܫܽܘܗܝ ܬܰܡܳܢ. ܘܰܠܟܽܠܗܽܘܢ ܐܰܝܠܶܝܢ ܕܥ̣ܰܠܘ ܥܰܡܶܗ ܩܰܛܶܠܘ ܐܶܢܽܘܢ ܒܚܰܪܒܳܐ.
49 ܘܫܰܕܰܪ ܛܪܺܝܦܽܘܢ ܚܰܝܠܳܐ ܘܦܰܪ̈ܳܫܶܐ ܠܰܓܠܺܝܠܳܐ ܘܠܰܦܩܰܥܬܳܐ ܪܰܒܬܳܐ. ܠܡܰܘܒܳܕܽܘ ܠܟܽܠܗܽܘܢ ܕܒܶܝܬ ܝܽܘܢܳܬܳܢ.
50 ܘܺܝܕܰܥܘ ܕܶܐܬܬܶܚܕ ܠܶܗ ܝܽܘܢܳܬܳܢ. ܘܶܐܒܰܕ ܠܶܗ ܗܽܘ ܘܰܐܝܠܶܝܢ ܕܥܰܡܶܗ. ܘܠܰܒܶܒܘ ܘܒܰܝܰܐܘ ܢܰܦܫܗܽܘܢ. ܘܶܐܙܰܠܘ ܟܰܕ ܟܢܺܝܫܺܝܢ ܠܰܩܪܳܒܳܐ.
51 ܘܰܚܙܰܘ ܪ̈ܳܕܽܘܦܰܝܗܽܘܢ ܕܡܶܪܰܬ ܠܳܗ̇ ܠܗܽܘܢ ܥܕܰܡܳܐ ܠܢܰܦܫܳܐ. ܘܡܶܢ ܟܽܠܶܗ ܚܰܝܠܗܽܘܢ ܡܶܬܟܰܬܫܺܝܢ: ܘܰܗܦܰܟܘ ܠܗܽܘܢ ܡܶܢܗܽܘܢ.
52 ܘܶܐܬܰܘ ܟܽܠܗܽܘܢ ܒܰܫܠܳܡܳܐ ܠܰܐܪܥܳܐ ܕܺܝܗܽܘܕ. ܘܶܐܬܶܐܒܶܠܘ ܥܰܠ ܝܽܘܢܳܬܳܢ ܘܥܰܠ ܐܰܝܠܶܝܢ ܕܥܰܡܶܗ. ܘܰܕܚܶܠܘ ܕܶܚܠܬܳܐ ܪܰܒܬܳܐ. ܘܶܐܬܶܐܒܶܠܘ ܟܽܠܶܗ ܝܺܣܪܳܐܶܝܠ ܐܶܒܠܳܐ ܪܰܒܳܐ.
53 ܘܰܨܒܰܘ ܟܽܠܗܽܘܢ ܥܰܡ̈ܡܶܐ ܕܰܚܕܳܖ̈ܰܝܗܽܘܢ ܠܰܡܓܰܡܳܪܽܘ ܐܶܢܽܘܢ. ܐܶܡܰܪܘ ܓܶܝܪ ܕܠܰܝܬ ܠܗܽܘܢ ܪܺܝܫܳܐ ܕܰܡܥܰܕܰܪ ܠܗܽܘܢ. ܗܳܫܳܐ ܬܰܘ ܢܶܬܟܰܬܰܫ ܥܰܡܗܽܘܢ ܘܰܢܪܺܝܡ ܕܽܘܟܪܳܢܗܽܘܢ ܡܶܢ ܒܢܰܝ̈ܢܳܫܳܐ.