1 Maccabees 4
The First Book of Maccabees
܀ ܐ ܡܩܒܝ̈ܐ ܕ ܀
1 ܘܰܕܒܰܪ ܓܽܘܪܓܳܝܳܐ ܥܰܡܶܗ ܚܰܡܫܳܐ ܐܰܠܦܺܝ̈ܢ ܪ̈ܶܓܠܳܝܶܢ ܘܰܐܠܦܳܐ ܕܰܓܒܰܝ̈ܳܐ ܘܦܰܪ̈ܳܫܶܐ. ܘܫܶܩܠܶܬ ܡܰܫܪܺܝܬܶܗ ܒܠܺܠܝܳܐ.
2 ܐܰܝܟ ܕܢܰܪܡܽܘܢ ܥܰܠ ܡܰܫܪܺܝܬܶܗ ܕܺܝܗܽܘܕܳܐ ܒܠܺܠܝܳܐ. ܘܰܢܩܰܛܠܽܘܢ ܐܶܢܽܘܢ ܡܶܢ ܫܳܠܝܳܐ. ܘܰܐܝܠܶܝܢ ܕܝܳܬܒܺܝܢ ܗܘܰܘ ܒܶܝܬ ܡܳܪܕܳܐ. ܗܶܢܽܘܢ ܗܘܰܘ ܠܗܽܘܢ ܡܕܰܒܪ̈ܳܢܶܐ.
3 ܘܰܫܡܰܥ ܝܺܗܽܘܕܳܐ: ܘܰܫܩܰܠ ܗܽܘ ܘܚܰܝܠܰܘ̈ܳܬܳܐ ܥܰܡܶܗ.
4 ܠܡܰܪܡܳܝܽܘ ܥܰܠ ܚܰܝܠܶܗ ܕܡܰܠܟܳܐ ܕܰܒܥܰܡܳܐܽܘܣ: ܥܰܕ ܡܒܰܕܰܪ ܗܘܳܐ ܚܰܝܠܶܗ ܡܶܢ ܡܰܫܪܺܝܬܶܗ.
5 ܘܶܐܬܳܐ ܓܽܘܪܓܳܝܳܐ ܠܡܰܫܪܺܝܬܶܗ ܕܺܝܗܽܘܕܳܐ: ܘܠܐ̱ܢܳܫ ܠܳܐ ܐܶܫܟܰܚ. ܘܦܳܩܶܕ ܗܘܳܐ ܠܗܽܘܢ ܒܛܽܘܖ̈ܶܐ. ܡܶܛܽܠ ܕܳܐܡܰܪ ܗܘܳܐ ܕܰܥܪܩܘ ܠܗܽܘܢ ܗܳܠܶܝܢ ܡܶܢܰܢ.
6 ܘܟܰܕ ܗܘܳܐ ܨܰܦܪܳܐ: ܐܶܬܚܙܺܝ ܝܺܗܽܘܕܳܐ ܒܰܦܩܰܥܬܳܐ ܒܰܬܠܳܬܳܐ ܐܰܠܦܺܝ̈ܢ ܪ̈ܶܓܠܳܝܝܶܢ. ܘܠܰܝܬ ܗܘܳܐ ܥܠܰܝܗܽܘܢ ܐܶܠܳܐ ܐܶܢ ܪ̈ܽܘܚܡܶܐ ܘܰܡܓܰܢ̈ܶܐ ܒܰܠܚܽܘܕ: ܐܰܝܟܡ ܕܨܳܒܶܝܢ ܗܘܰܘ.
7 ܘܰܚܙܰܘ ܡܰܫܪܺܝܬܳܐ ܕܥܰܡ̈ܡܶܐ ܡܰܫܪܺܝܬܳܐ ܥܰܫܺܝܢܬܳܐ: ܟܰܕ ܡܚܰܙܩܳܐ ܒܙܰܝܢܳܐ: ܘܰܚܕܺܝܪܺܝܢ ܠܳܗ̇ ܦܰܪ̈ܳܫܶܐ. ܘܗܶܢܽܘܢ ܡܰܠܦܺܝܢ ܗܘܰܘ ܩܪܳܒܳܐ.
8 ܘܶܐܡܰܪ ܝܺܗܽܘܕܳܐ ܠܓܰܒܖ̈ܶܐ ܕܥܰܡܶܗ. ܠܳܐ ܬܶܕܚܠܽܘܢ ܡܶܢ ܣܽܘܓܐܗܽܘܢ. ܘܡܶܢ ܛܽܘܝܳܒܗܽܘܢ ܠܳܐ ܬܶܬܪܰܗܒܽܘܢ.
9 ܐܶܬܕܰܟܪܘ ܐܰܝܟܰܢܳܐ ܐܶܬܦܪܶܩܘ ܐܰܒܳܗܰܝ̈ܢ ܒܝܰܡܳܐ ܕܣܽܘܦ: ܟܰܕ ܪܳܕܶܦ ܗܘܳܐ ܠܗܽܘܢ ܦܶܪܥܽܘܢ ܒܚܰܝܠܳܐ ܪܰܒܳܐ.
10 ܘܗܳܫܳܐ ܢܶܓܥܶܐ ܠܘܳܬ ܥܳܡܽܘܪܳܐ ܕܰܫܡܰܝܳܐ: ܕܰܠܡܳܐ ܢܪܰܚܶܡ ܥܠܰܝܢ: ܘܢܶܬܕܟܰܪ ܡܳܪܝܳܐ ܕܺܝܰܬܺܝܩܺܝ ܕܰܐܒܳܗܰܝ̈ܢ: ܢܫܰܚܩܺܝܗ̇ ܠܗܳܕܶܐ ܡܰܫܪܺܝܬܳܐ ܩܕܳܡܰܝܢ ܝܰܘܡܳܢܳܐ.
11 ܘܢܶܕܥܽܘܢ ܟܽܠܗܽܘܢ ܥܰܡ̈ܡܶܐ ܕܺܐܝܬܰܘܗܝ ܡܰܢ ܕܦܳܪܶܩ ܘܰܡܦܰܨܶܐ ܠܺܝܣܪܳܐܶܝܠ.
12 ܘܰܫܩܰܠܘ ܦܶܠܫܬܳܝ̈ܶܐ ܥܰܝܢܰܝ̈ܗܽܘܢ: ܘܰܚܙܰܘ ܐܶܢܽܘܢ ܕܳܐܬܶܝܢ ܠܽܐܘܪܥܗܽܘܢ.
13 ܘܰܢܦܰܩܘ ܡܶܢ ܡܰܫܪ̈ܝܳܬܗܽܘܢ ܠܰܩܪܳܒܳܐ. ܘܰܩܪܰܘ ܒܩܰܪ̈ܢܳܬܳܐ ܕܒܶܝܬ ܝܺܗܽܘܕܳܐ.
14 ܘܝܰܗܒܘ ܥܠܰܝܗܽܘܢ. ܘܶܐܬܬܒܰܪܘ ܥܰܡ̈ܡܶܐ: ܘܰܥܪܰܩܘ ܠܰܦܩܰܥܬܳܐ.
15 ܫܰܪܟܳܐ ܕܶܝܢ ܕܶܐܫܬܚܰܪܘ ܢܦܰܠܘ ܒܚܰܪܒܳܐ. ܘܰܪܕܰܦܘ ܐܶܢܽܘܢ ܥܕܰܡܳܐ ܠܓܙܪ: ܘܰܥܕܰܡܳܐ ܠܰܦܩܰܥܬܳܐ ܕܰܐܕܽܘܡ. ܘܰܥܕܰܡܳܐ ܠܥܶܙܳܐ: ܘܰܥܕܰܡܳܐ ܠܝܰܡܢܺܝܢ. ܘܰܢܦܰܠܘ ܡܶܢܗܽܘܢ ܐܰܝܟ ܬܠܳܬܳܐ ܐܰܠܦܺܝ̈ܢ ܓܰܒܪ̈ܺܝܢ.
16 ܘܰܗܦܰܟ ܝܺܗܽܘܕܳܐ ܘܚܰܝܠܶܗ ܡܶܢ ܒܳܬܰܪܗܽܘܢ ܕܪܳܕܦܺܝܢ ܗܘܰܘ ܠܗܽܘܢ.
17 ܘܶܐܡܰܪ ܥܰܡܳܐ. ܠܳܐ ܬܶܬܪܰܓܪܓܽܘܢ ܠܒܶܙܬܳܐ. ܡܶܛܽܠ ܕܰܥܕܰܟܺܝܠ ܩܪܳܒܳܐ ܩܰܝܳܡ ܩܕܳܡܰܝܢ.
18 ܓܽܘܪܓܝܳܐ ܘܚܰܝܠܶܗ ܒܛܽܘܪܳܐ ܐܶܢܽܘܢ: ܘܩܰܪܺܝܒܺܝܢ ܐܶܢܽܘܢ ܠܰܢ. ܐܶܠܳܐ ܩܽܘܡܘ ܗܳܫܳܐ ܠܽܘܩܒܰܠ ܒܥܶܠܕܒܳܒܰܝ̈ܢ. ܘܰܐܩܪܶܒܘ ܥܰܡܗܽܘܢ. ܘܡܶܢ ܒܳܬܰܪ ܗܳܠܶܝܢ ܬܶܣܒܽܘܢ ܒܶܙܬܳܐ ܒܦܰܪܗܶܣܺܝܰܐ.
19 ܘܥܰܕ ܝܺܗܽܘܕܳܐ ܡܡܰܠܶܠ ܗܳܠܶܝܢ: ܐܰܕܺܝܩܘ ܡܶܢ ܛܽܘܪܳܐ ܡܶܢ ܐܰܝܠܶܝܢ ܕܺܐܝܬ ܗܘܰܘ ܥܰܡ ܓܘܪܓܝܳܐ.
20 ܘܰܚܙܰܘ ܕܶܐܙܕܟܰܝ ܠܶܗ: ܘܰܕܒܶܝܬ ܝܺܗܽܘܕܳܐ ܡܰܘܩܕܺܝܢ ܗܘܰܘ ܡܰܫܪ̈ܝܳܬܗܽܘܢ. ܬܶܢܳܢܳܐ ܓܶܝܪ ܕܡܶܬܚܙܶܐ ܗܘܳܐ: ܗܽܘ ܡܰܘܕܰܥ ܗܘܳܐ ܡܶܕܶܡ ܕܰܗܘܳܐ.
21 ܘܟܰܕ ܚܙܰܘ ܕܶܝܢ ܗܳܠܶܝܢ ܕܚܶܠܘ ܣܰܓܺܝ. ܘܬܽܘܒ ܕܰܚܙܰܘ ܠܡܰܫܪܺܝܬܳܐ ܕܺܝܗܽܘܕܳܐ ܒܰܦܩܰܥܬܳܐ ܕܰܡܛܰܝܒܳܐ ܠܰܩܪܳܒܳܐ.
22 ܘܰܥܪܰܩܘ ܟܽܠܗܽܘܢ ܠܰܐܪܥܳܐ ܕܰܦܠܶܫܬܳܝ̈ܶܐ.
23 ܘܰܗܦܰܟ ܝܺܗܽܘܕܳܐ ܥܰܠ ܒܶܙܬܳܗ̇ ܕܡܰܫܪܺܝܬܳܐ. ܘܰܢܣܰܒ ܕܰܗܒܳܐ ܣܰܓܺܝܐܳܐ ܘܟܶܣܦܳܐ: ܘܟܺܐܦ̈ܶܐ ܛܳܒ̈ܳܬܳܐ ܕܗܰܝܩܰܢܬܽܘܢ: ܘܰܐܪܓܘܳܢܳܐ ܕܝܰܡܳܐ ܘܥܽܘܬܪܳܐ ܪܰܒܳܐ.
24 ܘܰܗܦܰܟܘ ܘܰܡܫܰܒܚܺܝܢ ܗܘܰܘ ܘܡܰܘܕܶܝܢ ܠܡܳܪܝܳܐ ܕܒܰܫܡܰܝܳܐ. ܕܛܳܒ ܗܽܘ ܘܰܠܥܳܠܰܡ ܖ̈ܰܚܡܰܘܗܝ.
25 ܘܰܗܘܳܐ ܦܽܘܪܩܳܢܳܐ ܠܺܝܣܪܳܐܶܝܠ ܒܗܰܘ ܝܰܘܡܳܐ26. ܫܰܪܟܶܐ ܕܶܝܢ ܕܶܐܫܬܚܰܪܘ ܡܶܢ ܦܠܶܫܬܳܝ̈ܶܐ: ܐܶܬܰܘ ܘܚܰܘܺܝܘ ܠܠܽܘܣܺܝܳܐ ܡܶܕܶܡ ܕܰܓܕܰܫ.
27 ܗܽܘ ܕܶܝܢ ܟܰܕ ܫܡܰܥ ܐܶܬܪܫܶܠ ܘܶܐܬܬܥܺܝܩ ܣܰܓܺܝ. ܕܠܳܐ ܗܘܳܐ ܐܰܝܟ ܕܨܳܒܶܐ ܗܘܳܐ: ܗܳܟܘܳܬ ܗܘܳܝܗܝ ܠܺܐܝܣܪܳܐܶܝܠ. ܘܠܳܐ ܐܰܝܟ ܕܦܰܩܕܶܗ ܡܰܠܟܳܐ: ܗܳܟܘܳܬ ܥܒܰܕ.
28 ܘܰܠܒܳܬܪܳܗ̇ ܕܫܰܢܬܳܐ: ܟܰܢܶܫ ܠܽܘܣܺܝܳܐ ܓܰܒܖ̈ܶܐ ܡܰܓܒܳܝ̈ܶܐ ܫܬܺܝܢ ܐܰܠܦܺܝ̈ܢ: ܘܚܰܡܫܳܐ ܐܰܠܺܦܺܝ̈ܢ ܦܰܪ̈ܳܫܶܐ: ܐܰܝܟ ܕܰܢܩܪܒܽܘܢ ܥܰܡ ܝܺܣܪܳܐܶܝܠ.
29 ܘܶܐܬܰܘ ܠܰܐܕܽܘܡ. ܘܰܫܪܰܘ ܒܒܶܝܬ ܫܽܘܖ̈ܶܐ. ܘܰܐܪܰܥ ܐܶܢܽܘܢ ܝܺܗܽܘܕܳܐ ܒܥܶܣܪܳܐ ܐܰܠܦܺܝ̈ܢ ܓܰܒܪ̈ܺܝܢ.
30 ܘܰܚܙܳܐ ܡܫܰܪ̈ܝܳܬܳܐ ܕܰܒܥܶܠܕܒܳܢܰܝ̈ܗܽܘܢ ܡܫܰܪ̈ܝܳܬܳܐ ܥܰܫܺܝ̈ܢܳܬܳܐ. ܘܨܰܠܺܝ ܘܶܐܡܰܪ. ܒܪܺܝܟ ܐܰܢ̱ܬ ܗܽܘ ܦܳܪܽܘܩܶܗ ܕܺܝܣܪܳܐܶܝܠ. ܗܰܘ ܕܰܫܚܰܩܬ ܬܽܘܟܠܳܢܶܗ ܕܓܰܢܒܳܪܳܐ ܒܺܐܝܕܶܗ ܕܕܰܘܝܺܕ ܥܰܒܕܳܟ: ܘܰܐܫܠܶܡܬ ܡܰܫܪܺܝܬܳܐ ܕܰܦܠܶܫܬܳܝ̈ܶܐ ܒܺܐܝܕܶܗ ܕܝܽܘܢܳܬܳܢ ܒܰܪ ܫܳܐܘܳܠ ܘܰܕܫܳܩܶܠ ܡܳܐܢܰܘ̈ܗܝ.
31 ܘܳܐܦ ܗܳܫܳܐ ܚܒܽܘܫ ܡܰܫܪܺܝܬܳܐ ܗܳܕܶܐ ܒܺܐܝܕܶܗ ܕܥܰܡܳܟ ܝܺܣܪܳܐܶܝܠ. ܘܢܶܒܗܬܽܘܢ ܒܚܰܝܠܗܽܘܢ ܘܰܒܦܰܪ̈ܳܫܰܝܗܽܘܢ.
32 ܘܰܐܪܡܳܐ ܥܠܰܝܗܽܘܢ ܕܶܚܠܬܳܐ. ܘܰܫܚܽܘܩ ܥܽܘܫܢܳܐ ܕܚܰܝܠܗܽܘܢ. ܘܢܶܬܬܙܺܝܥܽܘܢ ܒܰܬܒܳܪܗܽܘܢ.
33 ܐܰܪܡܳܐ ܐܶܢܽܘܢ ܒܪܽܘܡܚܳܐ ܕܚܰܒܺܝ̈ܒܰܝܟ. ܘܰܢܫܰܒܚܳܢܳܟ ܟܽܠܗܽܘܢ ܝܳܕܥܰܝ̈ ܫܡܳܟ ܒܬܶܫܒ̈ܚܳܬܳܐ.
34 ܘܶܐܩܪܶܒܘ ܚܰܕ ܥܰܡ ܚܰܕ. ܘܰܢܦܰܠܘ ܡܶܢ ܡܰܫܪܺܝܬܶܗ ܕܠܽܘܣܺܝܳܐ ܐܰܝܟ ܚܰܡܫܳܐ ܐܰܠܦܺܝ̈ܢ ܓܰܒܪ̈ܺܝܢ. ܘܶܐܬܬܒܰܪܘ ܩܕܳܡܰܝܗܽܘܢ.
35 ܟܰܕ ܚܙܳܐ ܕܶܝܢ ܠܽܘܣܺܝܳܐ ܕܶܐܙܕܰܟܝܰܬ ܠܳܗ̇ ܡܰܫܪܺܝܬܶܗ. ܘܕܶܐܬܥܰܫܢܰܬ ܡܰܫܪܺܝܬܶܗ ܕܺܝܗܽܘܕܳܐ: ܘܕܰܥܬܺܝܕܺܝܢ ܐܶܢܽܘܢ ܓܰܢܒܳܪܳܐܺܝܬ ܕܰܢܡܽܘܬܽܘܢ ܐܰܘ ܕܢܺܚܽܘܢ. ܫܩܰܠ ܡܶܢ ܬܰܡܳܢ: ܘܶܐܙܰܠ ܠܶܗ ܠܰܐܢܛܝܳܟܺܝܰܐ. ܘܟܰܢܶܫ ܠܶܗ ܚܰܝܠܳܐ ܣܰܓܺܝܐܳܐ: ܘܥܰܬܶܕ ܢܰܦܫܶܗ. ܘܡܶܬܚܰܫܰܒ ܗܘܳܐ ܕܬܽܘܒ ܢܶܣܰܩ ܥܰܠ ܝܺܗܽܘܕܳܐ.
36 ܐܶܡܰܪ ܕܶܝܢ ܝܺܗܽܘܕܳܐ ܘܰܐܚܰܘ̈ܗܝ ܗܳܐ ܐܶܬܬܒܰܪܘ ܒܥܶܠܕܒܳܒܰܝ̈ܢ. ܢܶܣܰܩ ܘܰܢܕܰܟܶܐ ܒܶܝܬ ܡܰܩܕܫܳܐ ܘܰܢܚܰܕܬܺܝܘܗܝ.
37 ܘܶܐܬܟܰܢܫܰܬ ܟܽܠܳܗ̇ ܡܰܫܪܺܝܬܳܐ: ܘܰܣܠܶܩܘ ܠܛܽܘܪܳܐ ܕܨܶܗܝܽܘܢ.
38 ܘܰܚܙܰܘ ܠܒܶܝܬ ܡܰܩܕܫܳܐ ܕܡܰܚܪܰܒ. ܘܰܠܡܰܕܒܚܳܐ ܕܰܚܪܶܒ. ܘܰܠܬܰܪ̈ܥܶܐ ܕܡܰܘܩܕܺܝܢ. ܘܰܒܕܳܖ̈ܶܐ ܕܺܝܥܰܘ ܐܺܝ̈ܠܳܢܶܐ ܐܰܝܟ ܕܰܒܥܳܒ̈ܶܐ: ܐܰܘ ܐܰܝܟ ܕܰܒܚܰܕ ܡܶܢ ܛܽܘܖ̈ܶܐ. ܘܟܽܠܗܽܘܢ ܬܰܨܒ̈ܝܳܬܳܐ ܕܰܡܣܰܚܦܺܝܢ.
39 ܘܨܰܪܺܝܘ ܢܰܚܬܰܝ̈ܗܽܘܢ: ܘܰܐܪܩܶܕܘ ܡܰܪܩܽܘܕܬܳܐ ܪܰܒܬܳܐ. ܘܰܐܪܡܺܝܘ ܥܰܦܪܳܐ ܥܰܠ ܪ̈ܺܝܫܰܝܗܽܘܢ.
40 ܘܰܢܦܰܠܘ ܥܰܠ ܐܰܦܰܝ̈ܗܽܘܢ ܥܰܠ ܐܰܪܥܳܐ. ܘܰܩܪܰܘ ܒܩܰܪ̈ܢܳܬܳܐ ܝܺܕܺܝ̈ܥܳܬܳܐ. ܘܰܓܥܰܘ ܠܘܳܬ ܥܳܡܽܘܪܳܐ ܕܰܫܡܰܝܳܐ.
41 ܗܳܝܕܶܝܢ ܦܩܰܕ ܝܺܗܽܘܕܳܐ: ܘܰܐܩܺܝܡ ܓܰܒܖ̈ܶܐ ܕܢܶܬܟܰܬܫܽܘܢ ܘܢܰܩܪܒܽܘܢ ܥܰܡ ܐܰܝܠܶܝܢ ܕܝܳܬܒܺܝܢ ܒܚܰܣܢ̈ܶܐ: ܥܕܰܡܳܐ ܕܰܢܕܰܟܶܐ ܗܽܘ ܠܒܶܝܬ ܡܩܰܕܫܳܐ.
42 ܘܰܓܒܳܐ ܟܳܗ̈ܢܶܐ ܕܠܰܝܬ ܒܗܽܘܢ ܡܽܘܡܳܐ: ܘܰܡܨܰܒܬܺܝܢ ܒܢܳܡܽܘܣܳܐ.
43 ܘܕܰܟܺܝ ܠܒܶܝܬ ܡܰܩܕܫܳܐ. ܘܰܢܣܰܒ ܟܺܐܦ̈ܶܐ ܕܛܰܡܐܽܘܬܳܐ. ܘܣܳܡ ܐܶܢܶܝܢ ܒܰܐܬܪܳܐ ܛܰܡܳܐܐ.
44 ܘܶܐܬܡܰܠܰܟ ܥܰܠ ܡܕܰܒܚܳܐ ܕܩܽܘܪܒܳܢܳܐ ܗܰܘ ܕܶܐܣܬܰܝܰܒ: ܕܡܳܢܳܐ ܢܶܥܒܕܽܘܢ ܠܶܗ.
45 ܘܢܶܦܠܰܬ ܠܗܽܘܢ ܡܰܚܫܰܒܬܳܐ ܛܳܒܬܳܐ ܕܢܶܫܪܽܘܢܳܝܗܝ. ܕܕܰܠܡܳܐ ܡܶܢ ܡܬܽܘܡ ܢܶܗܘܶܐ ܠܗܽܘܢ ܠܚܶܣܕܳܐ: ܡܶܛܽܠ ܕܣܰܝܒܽܘܗܝ ܗܘܰܘ ܥܰܡ̈ܡܶܐ. ܘܰܫܪܰܐܘܽܗܝ ܠܡܰܕܒܚܳܐ.
46 ܘܣܳܡܘ ܟܺܐܦ̈ܶܐ ܒܰܐܬܪܳܐ ܝܺܕܺܝܥܳܐ ܥܰܠ ܓܶܢܒ ܚܕܳܖ̈ܰܘܗܝ ܕܒܰܝܬܳܐ: ܥܕܰܡܳܐ ܕܢܺܐܬܶܐ ܢܒܺܝܳܐ ܘܢܺܐܡܰܪ ܕܡܳܢܳܐ ܢܶܗܘܶܐ ܠܗܶܝܢ.
47 ܘܰܢܣܰܒܘ ܟܺܐܦ̈ܶܐ ܡܫܰܠ̈ܡܳܬܳܐ ܐܰܝܟ ܕܰܟܬܺܝܒ ܒܢܳܡܽܘܣܳܐ: ܘܰܒܢܰܘ ܠܡܕܰܒܚܳܐ ܐܰܝܟ ܕܡܶܢ ܩܕܺܝܡ.
48 ܘܰܒܢܰܘ ܠܒܶܝܬ ܡܰܩܕܫܳܐ ܘܰܠܟܽܠܶܗ ܓܰܘܶܐ ܕܒܰܝܬܳܐ. ܘܰܠܕܳܖ̈ܶܐ ܩܰܕܶܫܘ.
49 ܘܰܥܒܰܕܘ ܡܳܐܢܰܝ̈ ܩܽܘܕ̈ܫܶܐ ܚܰܕ̈ܬܶܐ. ܘܰܐܥܶܠܘ ܡܢܳܪܬܳܐ ܘܡܰܕܒܚܳܐ ܕܒܶܣ̈ܡܶܐ: ܘܦܳܬܽܘܪܳܐ ܠܗܰܝܟܠܳܐ.
50 ܘܰܕܒܰܚܘ ܥܰܠ ܡܰܕܒܚܳܐ. ܘܰܐܢܗܰܪܘ ܫܪ̈ܳܓܶܐ ܕܥܰܠ ܡܢܳܪܬܳܐ. ܘܡܰܢܗܪܺܝܢ ܗܘܰܘ ܒܗܰܝܟܠܳܐ.
51 ܘܣܳܡܘ ܥܰܠ ܦܳܬܽܘܪܳܐ ܠܰܚܡܳܐ. ܘܰܬܠܰܘ ܐܰܦܰܝ̈ ܬܰܪ̈ܥܶܐ. ܘܫܰܠܶܡܘ ܟܽܠܗܽܘܢ ܥܒܳܕܰܝ̈ܗܽܘܢ.
52 ܘܩܰܕܶܡܘ ܠܨܰܦܪܶܗ ܕܝܰܘܡܳܐ: ܒܚܰܡܫܳܐ ܘܥܶܣܪܺܝܢ ܒܝܰܪܚܳܐ ܕܬܶܫܥܳܐ: ܕܺܐܝܬܰܘܗܝ ܟܳܢܽܘܢ ܩܕܶܡ: ܒܰܫܢܰܬ ܡܳܐܐ ܘܰܐܪܒܥܺܝܢ ܘܰܬܡܳܢܶܐ ܫܢܺܝ̈ܢ ܕܰܠܡܰܠܟܽܘܬܳܐ.
53 ܘܰܐܣܶܩܘ ܩܽܘܪ̈ܒܳܢܶܐ ܐܰܝܟ ܢܳܡܽܘܣܳܐ ܥܰܠ ܡܰܕܒܚܳܐ ܕܝܰܩܕܳܐ ܗܰܘ ܚܰܕܬܳܐ ܕܰܥܒܰܕܘ ܗܘܰܘ.
54 ܐܰܝܟ ܝܰܘ̈ܡܳܬܳܐ ܘܰܐܝܟ ܙܰܒܢ̈ܶܐ: ܗܳܢܽܘܢ ܕܣܰܝܒܽܘܗܝ ܗܘܰܘ ܥܰܡ̈ܡܶܐ: ܒܶܗ ܒܝܰܘܡܳܐ ܗܰܘ: ܗܳܐ ܚܽܘܕܳܬܶܗ ܒܡܰܙܡܽܘܖ̈ܶܐ ܘܰܒܩܺܝܬܳܖ̈ܶܐ ܘܰܒܟܶܢܳܖ̈ܶܐ.
55 ܘܰܢܦܰܠܘ ܟܽܠܶܗ ܥܰܡܳܐ ܥܰܠ ܐܰܦܰܝ̈ܗܽܘܢ ܘܰܣܓܶܕܘ. ܘܒܰܪܟܶܘ ܠܥܳܡܽܘܪܳܐ ܕܰܫܡܰܝܳܐ ܗܰܘ ܕܬܰܩܶܢ ܘܛܰܝܶܒ ܐܽܘܪܚܗܽܘܢ.
56 ܘܰܥܒܰܕܘ ܚܽܘܕܳܬܶܗ ܕܡܰܕܒܚܳܐ ܬܡܳܢܝܳܐ ܝܰܘ̈ܡܺܝܢ. ܘܩܰܪܶܒܘ ܕܶܒ̈ܚܶܐ ܒܒܽܘܣܳܡܳܐ. ܘܕܰܒܰܚܘ ܕܶܒ̈ܚܶܐ ܕܦܽܘܪܩܳܢܳܐ ܘܰܕܬܶܫܒܬܘܚܬܳܐ.
57 ܘܨܰܒܶܬܘ ܩܕܳܡ ܐܰܦܰܝ̈ ܗܰܝܟܠܳܐ ܒܰܟܠܺܝ̈ܠܶܐ ܕܕܰܗܒܳܐ ܘܒܰܡܓܰܢ̈ܶܐ. ܘܚܰܕܶܬܘ ܬܰܪ̈ܥܶܐ: ܘܟܽܠܗܽܘܢ ܡܳܐܢܰܝ̈ ܬܰܨܒܺܝܬܳܐ.
58 ܘܰܗܘܳܐ ܒܽܘܣܳܡܳܐ ܪܰܒܳܐ ܘܚܰܕܽܘܬܳܐ ܣܰܓܺܝܐܬܳܐ ܠܥܰܡܳܐ. ܘܰܗܦܰܟ ܚܶܣܕܳܐ ܕܥܰܡ̈ܡܶܐ.
59 ܘܰܐܩܺܝܡܘ ܝܺܗܽܘܕܳܐ ܘܰܐܚܰܘ̈ܗܝ ܘܟܽܠܳܗ̇ ܟܢܽܘܫܬܳܐ ܕܺܝܣܪܳܐܶܝܠ. ܕܢܶܗܘܽܘܢ ܗܳܘܶܝܢ ܝܰܘ̈ܡܳܬܳܐ ܕܚܽܘܕܳܬܶܗ ܕܡܰܕܒܚܳܐ ܒܙܰܒܢܗܽܘܢ: ܡܶܢ ܫܢܳܐ ܠܰܫܢܳܐ: ܬܡܳܢܝܳܐ ܝܰܘ̈ܡܺܝܢ: ܡܶܢ ܚܰܡܫܳܐ ܘܥܶܣܪܺܝܢ ܒܟܳܢܽܘܢ ܩܕܶܡ: ܒܚܰܕܽܘܬܳܐ ܘܰܒܒܽܘܣܳܡܳܐ.
60 ܘܰܒܢܰܘ ܒܗܰܘ ܙܰܒܢܳܐ ܠܛܽܘܪܳܐ ܕܨܶܗܝܽܘܢ ܟܰܕ ܚܳܕܰܪ: ܒܫܽܘܖ̈ܶܐ ܪ̈ܳܡܶܐ ܘܰܒܡܰܓܕ̈ܠܶܐ ܚܰܣܺܝ̈ܢܶܐ: ܕܰܠܡܳܐ ܡܶܢ ܡܬܽܘܡ ܢܺܐܬܽܘܢ ܥܰܡ̈ܡܶܐ ܘܰܢܕܽܘܫܽܘܢܳܝܗܝ ܐܰܝܟ ܕܰܥܒܰܕܘ ܡܶܢ ܩܕܺܝܡ.
61 ܘܣܳܡܘ ܬܰܡܳܢ ܚܰܝܠܳܐ ܕܰܗܘܳܐ ܢܳܛܰܪ ܠܶܗ. ܘܰܐܥܫܢܶܗ ܠܒܰܝܬܳܐ ܫܽܘܖ̈ܶܐ: ܕܢܶܗܘܶܐ ܐܺܝܬ ܠܶܗ ܠܥܰܡܳܐ ܚܶܣܢܳܐ ܠܽܘܩܒܰܠ ܐܰܕܽܘܡ.