1 Maccabees 8
The First Book of Maccabees
܀ ܐ ܡܩܒܝ̈ܐ ܚ ܀
1 ܘܰܫܡܰܥ ܝܺܗܽܘܕܳܐ ܫܶܡܥܗܽܘܢ ܕܰܒܢܰܝ̈ ܪܽܗܘܡܺܝ ܕܥܰܫܺܝܢܺܝܢ ܒܚܰܝܠܳܐ: ܘܡܶܨܛܒܶܝܢ ܒܟܽܠ ܐܰܝܠܶܝܢ ܕܡܶܬܢܰܩܦܺܝܢ ܠܗܽܘܢ. ܘܰܠܟܽܠ ܡܰܢܽܘ ܕܡܶܬܩܰܪܰܒ ܠܘܳܬܗܽܘܢ ܡܩܺܝܡܺܝܢ ܥܰܡܶܗ ܪܳܚܡܽܘܬܳܐ.
2 ܘܶܐܫܬܰܥܺܝܘ ܠܶܗ ܥܰܠ ܓܰܢܒܳܪܽܘܬܗܽܘܢ ܘܰܩܪ̈ܳܒܰܝܗܽܘܢ ܕܰܥܒܰܕܘ ܒܓܰܠܰܛܳܝ̈ܶܐ ܘܶܐܬܥܰܫܰܢܘ ܥܠܰܝܗܽܘܢ: ܘܕܰܥܒܰܕܘ ܐܶܢܽܘܢ ܕܢܶܗܘܽܘܢ ܠܗܽܘܢ ܡܰܣ̈ܩܰܝ ܡܰܕܰܐܬܳܐ.
3 ܘܟܽܠܡܶܕܶܡ ܬܽܘܒ ܕܰܥܒܰܕܘ ܒܰܐܪܥܳܐ ܕܶܐܣܦܰܢܝܰܐ. ܘܕܶܐܚܰܕܘ ܡܶܐܛ̈ܠܶܐ ܕܕܰܗܒܳܐ ܘܰܕܣܺܐܡܳܐ ܕܺܐܝܬ ܬܰܡܳܢ. ܘܕܶܐܚܰܕܘ ܒܡܶܠܟܰܝ̈ܗܽܘܢ ܘܰܒܢܰܓܺܝܪܽܘܬ ܪܽܘܚܗܽܘܢ ܟܽܠ ܐܰܬܰܪ.
4 ܐܰܬܪܳܐ ܕܶܝܢ ܪܰܚܰܝܩ ܗܘܳܐ ܡܶܢܗܽܘܢ ܣܰܓܺܝ. ܘܰܕܐܰܝܟܰܢܳܐ ܬܽܘܒ ܫܰܚܶܩܘ ܠܡܰܠܟ̈ܶܐ ܕܶܐܬܰܘ ܥܠܰܝܗܽܘܢ ܡܶܢ ܣܰܘ̈ܦܶܝܗ̇ ܕܰܐܪܥܳܐ: ܘܰܡܚܰܘ ܒܗܽܘܢ ܡܚܽܘܬܳܐ ܪܰܒܬܳܐ. ܘܫܰܪܟܳܐ ܕܰܐ̱ܚܪ̈ܳܢܶܐ: ܡܰܣܩܺܝܢ ܗܘܰܘ ܠܗܽܘܢ ܡܰܕܰܐܬܳܐ ܟܽܠ ܫܢܳܐ ܒܰܫܢܳܐ.
5 ܐܳܦ ܠܺܦܝܠܺܝܦܳܘܣ ܘܰܠܡܰܠܟܳܐ ܕܟܬܝ̈ܶܐ ܘܠܰܐܝܠܶܝܢ ܕܡܶܫܬܰܩܠܺܝܢ ܗܘܰܘ ܥܠܰܝܗܽܘܢ: ܡܰܟܶܟܘ ܘܫܰܚܶܩܘ ܐܶܢܽܘܢ ܒܰܩܪ̈ܳܒܶܐ. ܘܶܐܬܥܰܫܰܢܘ ܥܠܰܝܗܽܘܢ.
6 ܘܠܰܐܢܛܺܝܰܟܳܘܣ ܡܰܠܟܳܐ ܪܰܒܳܐ ܕܰܐܣܝܰܐ: ܗܰܘ ܕܶܐܙܰܠ ܗܘܳܐ ܥܠܰܝܗܽܘܢ ܠܰܩܪܳܒܳܐ: ܘܺܐܝܬ ܗܘܳܐ ܥܰܡܶܗ ܡܳܐܐ ܘܥܶܣܪܺܝܢ ܦܺܝ̈ܠܺܝܢ: ܘܦܰܪ̈ܳܫܶܐ ܘܡܰܪ̈ܟܒܳܬܳܐ ܘܚܰܝܠܳܐ ܣܰܓܺܝܐܳܐ ܘܥܰܫܺܝܢܳܐ: ܫܰܚܩܽܘܗ̇ ܠܟܽܠܳܗ̇ ܡܰܫܪܺܝܬܶܗ.
7 ܘܠܶܗ ܐܰܚܕܽܘܗܝ ܟܰܕ ܚܰܝ. ܘܰܐܩܺܝܡ ܕܰܗܘܳܐ ܡܰܣܶܩ ܠܗܽܘܢ ܗܽܘ ܘܡܰܠ̈ܟܶܐ ܕܡܶܢ ܒܳܬܪܶܗ ܡܰܕܰܐܬܳܐ ܪܰܒܬܳܐ ܒܟܽܠ ܫܢܳܐ ܒܰܫܢܳܐ. ܘܕܰܗܘܰܘ ܝܳܗܒܺܝܢ ܗܡܰܝܖ̈ܶܐ ܘܦܽܘܪ̈ܫܳܢܶܐ.
8 ܘܠܰܐܪܥܳܐ ܕܗܶܢܕܽܘ ܘܰܕܡܳܕܰܝ ܘܰܕܠܘܕܝܐ: ܡܶܢ ܐܰܪ̈ܥܳܬܶܗ ܐܰܪ̈ܥܳܬܳܐ ܓܰܒ̈ܝܳܬܳܐ. ܘܟܰܕ ܢܣܰܒ ܐܶܢܶܝܢ ܡܶܢܶܗ: ܝܰܗܒ ܐܶܢܶܝܢ ܠܐܘܡܢܝܘܣ ܡܰܠܟܳܐ.
9 ܘܟܰܕ ܬܽܘܒ ܨܒܰܘ ܕܢܺܐܬܽܘܢ ܡܶܢ ܗܰܠܶܣ ܕܢܶܥܛܽܘܢ ܘܢܶܓܡܪܽܘܢ ܐܶܢܽܘܢ.
10 ܘܶܐܬܝܰܕܥܰܬ ܠܗܽܘܢ ܡܶܠܬܳܐ: ܫܰܕܰܪ ܥܠܰܝܗܽܘܢ ܠܚܰܕ ܡܶܢ ܐܶܣܛܖ̈ܰܛܺܝܓܶܐ: ܘܰܐܩܪܶܒ ܥܰܡܗܽܘܢ. ܘܰܢܦܰܠܘ ܡܶܢܗܽܘܢ ܩܛܺܝ̈ܠܶܐ ܣܰܓܺܝ̈ܐܶܐ. ܘܰܫܒܰܘ ܢܶܫܰܝ̈ܗܽܘܢ ܘܰܒܢܰܝ̈ܗܽܘܢ: ܘܒܰܙܘ ܐܶܢܽܘܢ. ܘܶܐܚܰܕܘ ܘܶܐܬܥܰܫܰܢܘ ܥܰܠ ܐܰܪܥܗܽܘܢ. ܘܣܰܚܶܦܘ ܚܶܣܢܰܝ̈ܗܽܘܢ: ܘܫܰܥܒܶܕܘ ܐܶܢܽܘܢ ܥܕܰܡܳܐ ܠܝܰܘܡܳܐ ܗܳܢܳܐ.
11 ܘܰܠܫܰܪܟܳܐ ܕܡܰܠܟ̈ܘܳܬܳܐ ܘܰܠܓܳܙܪ̈ܳܬܳܐ. ܘܰܚܕܳܐ ܙܒܰܢ ܠܟܽܠ ܐܰܝܠܶܝܢ ܕܩܳܝܡܺܝܢ ܗܘܰܘ ܠܽܘܩܒܰܠܗܽܘܢ: ܡܚܰܒܠܺܝܢ ܗܘܰܘ ܠܗܽܘܢ ܘܒܳܙܺܝܢ ܘܫܳܒܶܝܢ. ܘܰܡܫܰܥܒܕܺܝܢ ܗܘܰܘ ܠܗܽܘܢ ܠܥܰܒܕܽܘܬܳܐ.
12 ܥܰܡ ܪ̈ܳܚܡܰܝܗܽܘܢ ܕܶܝܢ ܘܥܰܡ ܐܶܝܠܶܝܢ ܕܰܡܚܺܝܢܺܝܢ ܗܘܰܘ ܨܶܐܕܰܝܗܽܘܢ: ܢܳܛܪܺܝܢ ܗܘܰܘ ܪܳܚܡܽܘܬܳܐ. ܘܶܐܚܰܕܘ ܘܶܐܬܥܰܫܰܢܘ ܥܰܠ ܡܰܠܟ̈ܶܐ ܕܪܰܚܺܝܩܺܝܢ ܘܩܰܪܺܝܒܺܝܢ. ܘܟܽܠ ܕܫܳܡܥܺܝܢ ܗܘܰܘ ܫܶܡܥܽܘܢ ܡܶܬܬܙܺܝܥܺܝܢ ܗܘܰܘ ܡܶܢܗܽܘܢ. ܘܰܠܟܽܠ ܡܰܢܽܘ ܕܨܳܒܶܝܢ ܗܘܰܘ ܕܰܢܥܰܕܪܽܘܢ ܘܢܰܡܠܟܽܘܢ ܡܰܡܠܶܟ ܗܘܳܐ.
13 ܘܰܠܟܽܠ ܡܰܢܽܘ ܕܨܳܒܶܝܢ ܗܘܰܘ ܕܰܢܡܰܟܟܽܘܢ ܡܡܰܟܟܺܝܢ ܗܘܰܘ. ܘܶܐܬܬܪܺܝܡܘ ܘܶܐܬܥܰܫܰܢܘ ܣܰܓܺܝ.
14 ܘܰܒܗܳܠܶܝܢ ܟܽܠܗܶܝܢ ܠܳܐ ܩܛܰܪ ܐܳܦܠܳܐ ܚܰܕ ܡܶܢܗܽܘܢ ܬܳܓܳܐ. ܘܠܳܐ ܐܶܬܟܰܣܺܝ ܐܰܪ̈ܓܘܳܢܶܐ ܐܰܝܟ ܕܢܶܬܪܰܘܪܰܒ ܒܗܽܘܢ.
15 ܘܰܥܒܰܕܘ ܠܗܽܘܢ ܒܶܝܬ ܒܽܘܠܳܐ. ܘܟܽܠ ܝܽܘܡ ܡܶܬܡܰܠܟܺܝܢ ܗܘܰܘ ܬܠܳܬ ܡܳܐܐ ܘܥܶܣܪܺܝܢ ܓܰܒܪ̈ܺܝܢ ܐܰܟܚܕܳܐ ܒܢܰܝ̈ ܡܰܠܟܳܐ. ܘܡܶܬܚܰܫܒܺܝܢ ܗܘܰܘ ܕܰܐܝܟܰܢܳܐ ܢܺܐܨܦܽܘܢ ܘܰܢܕܰܒܪܽܘܢ ܠܥܰܡܳܐ.
16 ܘܡܰܫܠܡܺܝܢ ܗܘܰܘ ܪܺܝܫܳܢܽܘܬܳܐ ܠܚܰܕ ܓܰܒܪܳܐ ܒܫܰܢܬܳܐ. ܘܗܽܘ ܦܳܩܶܕ ܗܘܳܐ ܘܡܶܫܬܰܠܰܛ ܥܰܠ ܟܽܠܳܗ̇ ܐܰܪܥܗܽܘܢ. ܘܟܽܠܗܽܘܢ ܡܶܫܬܰܡܥܺܝܢ ܗܘܰܘ ܠܚܰܕ ܓܰܒܪܳܐ. ܘܠܳܐ ܐܺܝܬ ܗܘܳܐ ܒܰܝܢܳܬܗܽܘܢ ܚܣܳܡܳܐ ܘܠܳܐ ܪܶܛܢܳܐ.
17 ܘܰܓܒܳܐ ܝܺܗܽܘܕܳܐ ܠܐܶܘܦܠܺܝܡܳܘܣ ܒܪܶܗ ܕܝܽܘܚܳܢܳܢ ܒܰܪ ܐܰܩܽܘܣ: ܘܠܺܐܝܳܣܽܘܢ ܒܪܶܗ. ܘܫܰܕܰܪ ܐܶܢܽܘܢ ܠܪܽܗܘܡܺܝ: ܕܰܢܩܺܝܡܽܘܢ ܥܰܡܗܽܘܢ ܪܳܚܡܽܘܬܳܐ ܘܥܽܘܕܪܳܢܳܐ.
18 ܘܰܕܢܶܣܒܽܘܢ ܡܶܢܗܽܘܢ ܢܺܝܪܳܐ. ܡܶܛܽܠ ܕܡܰܠܟܽܘܬܳܐ ܕܝܘ̈ܢܳܝܶܐ ܡܫܰܥܒܕܳܐ ܗܘܳܬ ܠܺܝܣܪܳܐܶܝܠ ܠܥܰܒܕܽܘܬܳܐ.
19 ܘܶܐܙܰܠܘ ܕܶܒܝܬ ܐܶܘܦܠܺܝܡܳܘܣ ܠܪܽܗܘܡܺܝ. ܐܽܘܪܚܳܐ ܕܶܝܢ ܪܰܒܳܐ ܗܘܳܬ ܣܰܓܺܝ. ܘܥܰܠܘ ܠܒܶܝܬ ܒܽܘܠܳܐ ܕܺܝܠܗܽܘܢ. ܘܰܥܢܰܘ ܘܶܐܡܰܪܘ ܠܗܽܘܢ.
20 ܝܺܗܽܘܕܳܐ ܡܰܩܒܰܝ ܘܰܐܚܰܘ̈ܗܝ ܘܥܰܡܳܐ ܕܺܝܗܽܘܕܳܝ̈ܶܐ ܫܰܕܪܽܘܢ ܠܘܳܬܟܽܘܢ. ܠܰܡܩܳܡܽܘ ܥܰܡܟܽܘܢ ܥܽܘܕܪܳܢܳܐ ܘܪܳܚܡܽܘܬܳܐ. ܘܰܕܬܶܟܬܒܽܘܢ ܠܰܢ ܖ̈ܰܚܡܰܝܟܽܘܢ ܘܰܡܥܰܕܪܳܢܽܘܬܟܽܘܢ.
21 ܘܫܶܦܪܰܬ ܡܶܠܬܳܐ ܒܥܰܝܢܰܝ̈ܗܽܘܢ.
22 ܘܗܳܢܰܘ ܦܶܚܡܳܐ ܕܶܐܓܰܪܬܳܐ ܕܰܟܬܰܒܘ ܒܦܰܢܩܺܝܬܳܐ ܕܰܢܚܳܫܳܐ: ܘܫܰܕܰܪ ܠܽܐܘܪܺܫܠܶܡ: ܕܬܶܗܘܶܐ ܠܘܳܬܗܽܘܢ ܠܥܽܘܗܕܳܢܳܐ ܕܪܳܚܡܽܘܬܳܐ ܘܰܕܥܽܘܕܪܳܢܳܐ ܘܕܰܫܠܳܡܳܐ.
23 ܫܰܦܺܝܪ ܢܶܗܘܶܐ ܠܪ̈ܽܗܘܡܳܝܶܐ ܘܰܠܥܰܡܳܐ ܕܺܝܗܽܘܕܳܝ̈ܶܐ: ܒܰܝܡܳܐ ܘܰܒܝܰܒܫܳܐ ܠܥܳܠܰܡ. ܘܪܽܘܡܚܳܐ ܘܰܒܥܶܠܕܒܳܒܳܐ ܢܶܬܪܰܚܰܩ ܡܶܢܗܽܘܢ.
24 ܐܶܢ ܕܶܝܢ ܢܩܽܘܡ ܩܪܳܒܳܐ ܥܰܠ ܪ̈ܽܗܘܡܳܝܶܐ ܠܽܘܩܕܰܡ ܐܰܘ ܥܰܠ ܡܥܰܕܪ̈ܳܢܰܝܗܽܘܢ: ܐܰܘ ܥܰܠ ܟܽܠ ܐܰܝܟܳܐ ܕܰܡܫܰܠܛܺܝܢ.
25 ܢܺܐܬܶܐ ܠܥܽܘܕܪܳܢܗܽܘܢ ܥܰܡܳܐ ܕܺܝܗܽܘܕܳܝ̈ܶܐ. ܐܰܟܡܳܐ ܕܫܳܐܶܠ ܙܰܒܢܳܐ ܒܠܶܒܳܐ ܡܰܠܝܳܐ.
26 ܘܠܰܒܥܶܠܕܒܳܒ̈ܶܐ ܕܡܰܩܪܒܺܝܢ ܥܰܡܗܽܘܢ: ܠܳܐ ܢܶܬܠܽܘܢ ܠܗܽܘܢ ܢܒܺܐܫܳܐ. ܘܢܶܟܠܽܘܢ ܡܶܢܗܽܘܢ ܚܶܛ̈ܶܐ ܘܙܰܝܢܳܐ: ܘܟܶܣܦܳܐ ܘܶܐܠܦ̈ܶܐ: ܐܰܝܟ ܕܫܳܦܰܪ ܠܪ̈ܽܗ̱ܘܡܳܝܶܐ. ܘܢܶܛܪܽܘܢ ܢܛܽܘܪ̈ܳܬܗܽܘܢ ܟܰܕ ܡܶܕܶܡ ܠܳܐ ܢܶܣܒܽܘܢ ܡܶܢܗܽܘܢ.
27 ܘܶܐܢ ܕܶܝܢ ܠܥܰܡܳܐ ܕܺܝܗܽܘܕܳܝ̈ܶܐ ܢܶܓܕܰܫ ܠܽܘܩܕܰܡ ܩܪܳܒܳܐ: ܢܶܬܟܰܬܫܽܘܢ ܘܰܢܥܰܕܪܽܘܢ ܐܶܢܽܘܢ ܒܢܰܝ̈ ܪܽܗ̱ܘܡܺܝ ܡܶܢ ܟܽܠܳܗ̇ ܢܰܦܫܗܽܘܢ: ܐܰܝܟ ܡܳܐ ܕܙܰܒܢܳܐ ܫܳܐܶܠ.
28 ܘܠܰܐܝܠܶܝܢ ܕܡܶܬܟܰܬܫܺܝܢ ܘܡܰܩܪܒܺܝܢ ܥܰܡܗܽܘܢ: ܠܳܐ ܢܶܬܠܽܘܢ ܚܶܛ̈ܶܐ ܘܙܰܝܢܳܐ ܘܟܶܣܦܳܐ ܘܶܐܠܦ̈ܶܐ: ܐܰܝܟ ܕܫܳܦܰܪ ܠܰܒܢܰܝ̈ ܪܽܗ̱ܘܡܺܝ. ܘܢܶܛܪܽܘܢ ܢܛܽܘܪ̈ܳܬܗܽܘܢ ܟܰܕ ܡܶܕܶܡ ܠܳܐ ܢܶܣܒܽܘܢ ܡܶܢܗܽܘܢ ܕܠܳܐ ܒܢܶܟܠܳܐ.
29 ܐܰܝܟ ܗܳܠܶܝܢ ܡ̈ܶܠܶܐ ܐܰܩܺܝܡܘ ܒܢܰܝ ܪܽܗ̱ܘܡܺܝ ܥܰܡ ܟܢܶܫܳܐ ܕܺܝܗܽܘܕܳܝ̈ܶܐ.
30 ܐܶܢ ܕܶܝܢ ܡܶܢ ܒܳܬܰܪ ܡ̈ܶܠܶܐ ܗܳܠܶܝܢ: ܕܢܶܨܒܽܘܢ ܗܳܠܶܝܢ ܠܡܶܒܨܰܪ ܐܰܘ ܠܡܰܘܣܳܦܽܘ: ܢܶܥܒܕܽܘܢ ܟܽܠ ܕܫܳܦܰܪ ܠܬܰܪܥܺܝܬܗܽܘܢ. ܘܟܽܠ ܕܰܢܒܰܨܪܽܘܢ ܐܰܘ ܕܢܰܘܣܦܽܘܢ: ܢܶܗܘܶܐ ܫܰܠܺܝܛ ܠܗܽܘܢ.
31 ܘܥܰܠ ܒܺܝ̈ܫܳܬܳܐ ܕܶܝܢ ܕܰܥܒܰܕ ܨܶܐܕܰܝܟܽܘܢ ܕܺܡܰܛܪܺܝܳܘܣ ܡܰܠܟܳܐ: ܟܬܰܒܢ ܘܰܫܠܰܚܢ ܠܶܗ: ܕܰܠܡܳܢܳܐ ܐܰܘܩܰܪܬ ܘܰܐܥܫܶܢܬ ܢܺܝܪܳܟ ܥܰܠ ܪ̈ܳܚܡܰܝܢ ܘܰܡܥܰܕܪ̈ܳܢܰܝܢ ܝܽܗܘܕܳܝ̈ܶܐ.
32 ܐܶܢ ܗܳܟܺܝܠ ܬܽܘܒ ܢܩܰܒܠܽܘܢ ܥܠܰܝܟ: ܢܶܥܒܶܕ ܠܗܽܘܢ ܬܒܰܥܬܳܐ ܘܕܺܝܢܳܐ ܘܢܰܩܪܶܒ ܥܰܡܳܟ ܒܝܰܡܳܐ ܘܰܒܝܰܒܫܳܐ.