1 Maccabees 13
The First Book of Maccabees
܀ ܐ ܡܩܒܝ̈ܐ ܝܓ ܀
1 ܘܰܫܡܰܥ ܫܶܡܥܽܘܢ ܕܟܰܢܶܫ ܛܪܺܝܦܽܘܢ ܚܰܝܠܳܐ ܣܰܓܺܝܐܳܐ ܕܢܺܐܬܶܐ ܠܰܐܪܥܳܐ ܕܺܝܗܽܘܕ ܘܢܶܥܛܶܝܗ̇.
2 ܘܰܚܙܳܝܗܝ ܠܥܰܡܳܐ ܕܰܕܚܺܝܠ ܘܪܰܬܺܝܬ. ܘܰܣܠܶܩ ܠܽܐܘܪܺܫܠܶܡ.
3 ܘܟܰܢܶܫ ܠܥܰܡܳܐ. ܘܒܰܝܰܐ ܐܶܢܽܘܢ ܘܶܐܡܰܪ ܠܗܽܘܢ. ܝܳܕܥܺܝܢ ܐܢ̱ܬܽܘܢ ܟܽܠܡܶܕܶܡ ܕܥܶܒܕܶܬ ܐܶܢܳܐ ܘܰܐܚܰܝ̈ ܘܟܽܠܶܗ ܒܶܝܬ ܐܳܒܝ ܥܰܠ ܐܰܦܰܝ̈ ܢܳܡܽܘܣܳܐ ܘܥܰܠ ܐܰܦܰܝ̈ ܒܶܝܬ ܡܰܩܕܫܳܐ. ܩܪ̈ܳܒܶܐ ܘܽܐܘܠܨܳܢ̈ܶܐ ܕܰܚܙܰܝܢ.
4 ܘܡܶܛܽܠܗܳܕܶܐ ܗܽܘ ܡܺܝܬܘ ܟܽܠܗܽܘܢ ܐܰܚܰܝ̈ ܥܰܠ ܐܰܦܰܝ̈ ܟܽܠܶܗ ܝܺܣܪܳܐܶܝܠ. ܘܶܐܫܬܰܚܪܶܬ ܐܶܢܳܐ ܒܰܠܚܽܘܕܰܝ.
5 ܘܗܳܫܳܐ ܚܳܣ ܠܺܝ ܕܶܐܚܽܘܣ ܥܰܠ ܢܰܦܫܝ ܒܟܽܠ ܙܰܒܢ̈ܶܐ ܕܽܐܘܠܨܳܢܳܐ. ܡܶܛܽܠ ܕܠܳܐ ܗܘܺܝܬ. ܡܝܰܬܰܪ ܡܶܢ ܐܰܚܰܝ̈.
6 ܒܪܰܡ ܕܶܝܢ: ܐܶܬܟܰܬܰܫ ܥܰܠ ܐܰܦܰܝ̈ ܥܰܡܰܢ: ܘܥܰܠ ܐܰܦܰܝ̈ ܒܶܝܬ ܡܰܩܕܫܰܢ: ܘܥܰܠ ܐܰܦܰܝ̈ ܒܢܰܝ̈ܢ. ܡܶܛܽܠ ܕܶܐܬܟܰܢܰܫܘ ܟܽܠܗܽܘܢ ܥܰܡ̈ܡܶܐ ܠܰܡܓܰܡܳܪܽܘܬܰܢ ܡܶܛܽܠ ܒܶܥܠܕܒܳܒܽܘܬܗܽܘܢ.
7 ܘܶܐܬܬܥܺܝܪܰܬ ܘܪܶܬܚܰܬ ܪܽܘܚܶܗ ܕܥܰܡܳܐ: ܒܰܪ ܫܳܥܬܶܗ ܕܰܫܡܰܥ ܡܶܠܰܘ̈ܗܝ.
8 ܘܰܥܢܰܘ ܒܩܳܠܳܐ ܪܳܡܳܐ ܘܶܐܡܰܪܘ ܠܶܗ. ܐܰܢ̱ܬ ܗܽܘ ܡܕܰܒܪܳܢܰܢ ܚܠܳܦ ܝܺܗܽܘܕܳܐ ܘܝܽܘܢܳܬܳܢ ܐܰܚܰܝ̈ܟ.
9 ܐܰܩܪܶܒ ܩܪ̈ܳܒܰܝܢ. ܘܟܽܠ ܕܬܺܐܡܰܪ ܠܰܢ ܢܶܥܒܶܕ.
10 ܘܟܰܢܶܫ ܫܶܡܥܽܘܢ ܠܟܽܠܗܽܘܢ ܓܰܒܖ̈ܶܐ ܩܖ̈ܰܒܬܳܢܶܐ. ܘܣܰܪܗܶܒ ܠܰܡܫܰܠܳܡܽܘ ܘܠܰܡܫܰܟܠܳܠܽܘ ܫܽܘܪܳܗ̇ ܕܽܐܘܪܺܫܠܶܡ. ܘܰܐܥܫܢܶܗ ܠܟܽܠ ܟܰܕ ܚܳܕܰܪ.
11 ܘܫܰܕܰܪ ܠܝܽܘܢܳܬܳܢ ܒܰܪ ܐܰܒܫܠܳܡ: ܘܥܰܡܶܗ ܚܰܝܠܳܐ ܣܰܓܺܝܐܳܐ: ܠܝܽܘܦܺܐ. ܘܰܐܦܶܩ ܠܰܐܝܠܶܝܢ ܕܺܐܝܬ ܗܘܰܘ ܒܳܗ̇. ܘܰܫܪܳܐ ܬܰܡܳܢ ܗܽܘ.
12 ܘܰܫܩܰܠ ܛܪܺܝܦܽܘܢ ܡܶܢ ܦܛܘܠܡܐܝܣ ܒܚܰܝܠܳܐ ܣܰܓܝܐܳܐ: ܠܡܶܥܰܠ ܠܰܐܪܥܳܐ ܕܺܝܗܽܘܕܳܐ. ܘܝܽܘܢܳܬܳܢ ܥܰܡܶܗ ܗܘܳܐ ܟܰܕ ܡܶܬܢܛܰܪ.
13 ܫܶܡܥܽܘܢ ܕܶܝܢ ܫܪܳܐ ܥܰܠ ܥܕܺܝܪܳܐ ܠܽܘܩܒܰܠ ܦܩܰܥܬܳܐ.
14 ܘܺܝܕܰܥ ܛܪܺܝܦܽܘܢ ܕܩܳܡ ܫܶܡܥܽܘܢ ܚܠܳܦ ܝܽܘܢܳܬܢ ܐܰܚܽܘܗܝ: ܘܕܰܥܬܺܝܕ ܗܽܘ ܠܡܰܩܪܳܒܽܘ ܥܰܡܶܗ. ܘܫܰܕܰܪ ܠܘܳܬܶܗ ܐܺܝܙܓܰܕ̈ܶܐ ܘܶܐܡܰܪ ܠܶܗ.
15 ܚܠܳܦ ܟܶܣܦܳܐ ܗܰܘ ܕܚܰܝܳܒ ܗܘܳܐ ܝܽܘܢܳܬܳܢ ܐܰܚܽܘܟ ܒܶܝܬ ܡܰܠܟܳܐ ܡܶܛܽܠ ܨܶܒ̈ܘܳܬܳܐ ܕܰܐܚܺܝܕ ܗܘܳܐ: ܟܪܺܝܟܺܝܢܰܢ ܠܶܗ.
16 ܘܗܳܫܳܐ ܫܰܕܰܪ ܡܳܐܐ ܟܰܟܪ̈ܺܝܢ ܕܣܺܐܡܳܐ ܘܰܬܪܶܝܢ ܒܢܰܘ̈ܗܝ ܠܰܗܡܺܝܖ̈ܶܐ: ܕܕܰܠܡܳܐ ܟܰܕ ܢܶܫܪܶܝܘܗܝ ܢܶܣܛܶܐ ܘܢܶܦܪܽܘܩ ܠܶܗ ܡܶܢܰܢ: ܘܫܳܪܶܝܢܰܢ ܠܶܗ.
17 ܘܺܝܕܰܥ ܫܶܡܥܽܘܢ ܕܰܒܢܶܟܠܳܐ ܗܽܘ ܡܡܰܠܠܺܝܢ ܥܰܡܶܗ. ܘܫܰܕܰܪ ܟܶܣܦܳܐ ܘܰܛܠܳܝ̈ܶܐ: ܕܰܠܡܳܐ ܢܶܥܒܶܕ ܒܥܶܠܕܳܒܳܒܽܘܬܳܐ ܪܰܒܬܳܐ ܠܺܝܣܪܳܐܶܝܠ ܘܢܺܐܡܰܪ.
18 ܥܰܠ ܕܠܳܐ ܫܰܕܰܪ ܟܶܣܦܳܐ ܘܰܛܠܳܝ̈ܶܐ ܗܳܢܽܘܢ ܕܶܐܒܰܕܘ.
19 ܘܫܰܕܰܪ ܛܠܳܝ̈ܶܐ ܘܡܳܐܐ ܟܰܟܪ̈ܺܝܢ. ܘܕܰܓܶܠ ܘܠܳܐ ܫܰܕܰܪ ܠܝܽܘܢܳܬܳܢ.
20 ܘܡܶܢ ܒܳܬܰܪ ܗܳܠܶܝܢ: ܐܶܬܳܐ ܛܪܺܝܦܽܘܢ ܠܰܡܗܰܠܳܟܽܘ ܒܰܐܪܥܳܐ ܕܺܝܗܽܘܕ ܐܝܟ ܕܢܶܥܛܶܝܗ̇. ܘܶܐܙܰܠ ܒܽܐܘܪܚܳܐ ܕܥܳܕܽܘܪܳܐ. ܘܫܶܡܥܽܘܢ ܘܡܰܫܪܺܝܬܶܗ ܩܳܕܶܡ ܗܘܳܐ ܠܶܗ ܠܟܽܠ ܐܰܬܰܪ ܕܳܐܙܶܠ ܗܘܳܐ.
21 ܝܳܬܒܰܝ̈ ܡܶܪܕܳܐ ܕܶܝܢ ܫܰܕܰܪܘ ܠܘܳܬ ܛܪܺܝܦܽܘܢ ܐܺܝܙ̈ܓܰܕܶܐ ܕܢܺܐܬܶܐ ܠܘܳܬܗܽܘܢ ܚܦܺܝܛܳܐܺܝܬ ܒܽܐܘܪܚܳܐ ܡܰܕܒܪܳܝܬܳܐ: ܘܕܰܢܫܰܕܰܪ ܠܗܽܘܢ ܐܰܣܳܢܳܐ.
22 ܘܛܰܝܶܒ ܛܪܺܝܦܽܘܢ ܟܽܠܗܽܘܢ ܦܰܪ̈ܳܫܰܘܗܝ ܕܢܺܐܬܶܐ ܒܗܰܘ ܠܺܠܝܳܐ. ܘܰܗܘܳܐ ܬܰܠܓܳܐ ܪܰܒܳܐ. ܘܠܳܐ ܐܶܫܟܰܚ ܕܢܺܐܬܶܐ ܡܶܛܽܠ ܬܰܠܓܳܐ. ܘܰܫܩܰܠ ܘܶܐܬܳܐ ܠܓܶܠܥܳܕ.
23 ܟܰܕ ܕܶܝܢ ܡܰܛܺܝ ܛܪܺܝܦܽܘܢ ܠܒܶܣ̈ܩܡܶܐ: ܩܰܛܠܶܗ ܠܝܽܘܢܳܬܳܢ ܘܶܐܬܩܒܰܪ ܬܰܡܳܢ.
24 ܘܰܗܦܰܟ ܛܪܺܝܦܽܘܢ ܘܶܐܙܰܠ ܠܰܐܪܥܶܗ.
25 ܘܫܰܕܰܪ ܫܶܡܥܽܘܢ ܘܰܫܩܰܠ ܓܰܪ̈ܡܰܘܗܝ ܕܝܽܘܢܳܬܳܢ ܐܰܚܽܘܗܝ. ܘܩܰܒܪܶܗ ܒܡܽܘܪܥܺܝܡ ܒܰܡܕܺܝܢܬܳܐ ܕܰܐܒܳܗܰܘ̈ܗܝ.
26 ܘܰܒܟܰܘ ܘܶܐܬܶܐܒܶܠܘ ܥܠܰܘܗܝ ܟܽܠܶܗ ܝܺܣܪܳܐܶܝܠ ܝܰܘ̈ܡܳܬܳܐ ܣܰܓܺܝ̈ܐܶܐ.
27 ܘܰܒܢܳܐ ܫܶܡܥܽܘܢ ܠܥܶܠ ܡܶܢ ܩܰܒܖ̈ܶܐ ܕܰܐܒܽܘܗܝ ܘܕܰܐܚܰܘ̈ܗܝ. ܘܪܰܡܪܡܶܗ ܒܰܚܙܳܬܶܗ ܒܟܺܐܦ̈ܶܐ ܦܠܺܝ̈ܚܳܬܳܐ: ܕܰܓܠܺܝ̈ܦܳܢ ܡܶܢ ܬܖ̈ܰܝܗܽܘܢ ܓܰܒܰܝ̈ܗܶܝܢ.
28 ܘܰܐܩܺܝܡ ܫܒܰܥ ܢܰܦ̈ܫܳܢ ܚܕܳܐ ܠܽܘܩܒܰܠ ܚܕܳܐ: ܠܰܐܒܽܘܗܝ ܘܠܶܐܡܶܗ ܘܠܰܐܪ̈ܒܥܳܬܰܝܗܽܘܢ ܐܰܚܰܘ̈ܗܝ.
29 ܘܰܥܒܰܕ ܡܳܐܟܶܢܳܘ̈ܣ. ܘܰܐܩܺܝܡ ܠܗܶܝܢ ܐܶܣܛܽܘܢ̈ܶܐ ܪܰܘܪ̈ܒܶܐ. ܘܰܓܠܰܦ ܥܰܠ ܐܶܣܛܽܘ̈ܢܶܐ: ܟܽܠ ܡܳܐܢܰܝ̈ ܙܰܝܢܳܐ ܕܰܩܪܳܒܳܐ ܠܰܫܡܳܐ ܕܰܠܥܳܠܰܡ. ܥܰܠ ܓܶܢܒ ܡܳܐܢܰܝ̈ ܙܰܝܢܳܐ: ܥܒܰܕ ܐܶܠܦ̈ܶܐ ܓܠܺܝ̈ܦܳܬܳܐ ܘܪܰܡܪܶܡ. ܕܰܗܘܰܝ̈ ܡܶܬܚܰܙ̈ܝܳܢ ܠܟܽܠ ܢܳܚܬܰܝ̈ ܝܰܡܳܐ.
30 ܗܳܢܳܐ ܩܰܒܪܳܐ ܕܰܥܒܰܕ ܫܶܡܥܽܘܢ ܒܡܽܘܪܥܺܝܡ ܥܕܰܡܳܐ ܠܝܰܘܡܳܢܳܐ.
31 ܛܪܺܝܦܽܘܢ ܕܶܝܢ ܡܗܰܠܶܟ ܗܘܳܐ ܒܢܶܟܠܳܐ ܥܰܡ ܐܰܢܛܝܰܟܳܘܣ ܡܰܠܟܳܐ ܪܰܒܳܐ. ܘܩܰܛܠܶܗ.
32 ܘܰܐܡܠܶܟ ܚܠܳܦܰܘܗܝ. ܘܰܩܛܰܪ ܬܳܓܳܐ ܕܰܐܣܝܰܐ. ܘܰܥܒܰܕ ܡܚܽܘܬܳܐ ܪܰܒܬܳܐ ܒܰܐܪܥܳܐ.
33 ܘܰܒܢܳܐ ܫܶܡܥܽܘܢ ܚܶܣ̈ܢܶܝܗ̇ ܕܺܝܗܽܘܕܳܐ: ܘܰܐܚܕܰܪ ܐܶܢܽܘܢ ܒܡܰܓܕ̈ܠܶܐ ܪ̈ܳܡܶܐ: ܘܰܒܫܽܘܖ̈ܶܐ ܪܰܘܪ̈ܒܶܐ: ܘܰܒܬܰܪ̈ܥܶܐ ܘܰܒܡܽܘ̈ܟܠܶܐ. ܘܣܳܡ ܐܰܣܳܢܳܐ ܒܚܶܣ̈ܢܶܐ.
34 ܘܰܓܒܳܐ ܫܶܡܥܽܘܢ ܓܰܒܖ̈ܶܐ: ܘܫܰܕܰܪ ܠܘܳܬ ܕܺܡܰܛܪܺܝܳܘܣ ܡܰܠܟܳܐ ܠܡܶܥܒܰܕ ܫܽܘܒܩܳܢܳܐ ܠܰܐܪܥܳܐ. ܡܶܛܽܠ ܕܟܽܠܗܽܘܢ ܣܽܘܥܪ̈ܳܢܰܘܗܝ ܕܺܛܪܺܝܦܽܘܢ ܚܛܽܘܦܝܳܐ ܐܺܝܬܰܝܗܽܘܢ ܗܘܰܘ.
35 ܘܫܰܕܰܪ ܕܺܡܰܛܪܺܝܳܘܣ ܡܰܠܟܳܐ ܐܰܝܟ ܗܳܠܶܝܢ ܡ̈ܶܠܶܐ. ܘܰܟܬܰܒ ܠܶܗ ܥܶܢܝܳܢܳܐ ܒܶܐܓܰܪܬܳܐ ܗܳܟܰܢܳܐ.
36 ܕܺܡܰܛܪܺܝܳܘܣ ܡܰܠܟܳܐ: ܠܫܶܡܥܽܘܢ ܪܰܒ ܟܳܗ̈ܢܶܐ ܘܪܳܚܡܳܐ ܕܡܰܠܟܳܐ: ܘܰܠܣܳܒ̈ܶܐ ܘܰܠܥܰܡܳܐ ܕܺܝܗܽܘ̈ܕܳܝܶܐ: ܫܠܳܡ.
37 ܟܠܺܝܠܳܐ ܕܕܰܗܒܳܐ ܘܰܫܠܺܝܚܽܘܬܳܐ ܕܫܰܕܰܪܬܽܘܢ ܠܰܢ ܩܰܒܶܠܢ. ܘܰܥܬܺܝܕܺܝܢܰܢ ܠܡܶܥܒܰܕ ܠܟܽܘܢ ܫܠܳܡܳܐ ܪܰܒܳܐ: ܘܰܕܢܶܟܬܽܘܒ ܠܰܐܝܠܶܝܢ ܕܰܥܒܺܝܕܺܝܢ ܥܰܠ ܨܶܒ̈ܘܳܬܳܐ: ܕܢܶܫܒܩܽܘܢ ܠܟܽܘܢ ܫܩ̈ܳܠܶܐ.
38 ܘܟܽܠ ܕܰܫܠܰܚܢ ܠܟܽܘܢ ܩܰܝܳܡ. ܘܚܶܣ̈ܢܶܐ ܕܰܒܢܰܝܬܽܘܢ: ܕܺܝܠܟܽܘܢ ܢܶܗܘܽܘܢ.
39 ܘܫܳܩܒܩܺܝܢܰܢ ܕܶܝܢ ܐܳܦ ܚܛܳܗ̈ܶܐ ܘܣܰܟ̈ܠܘܳܬܳܐ ܕܰܥܕܰܡܳܐ ܠܝܰܘܡܳܢܳܐ: ܘܰܟܠܺܝܠܳܐ ܗܰܘ ܕܚܰܝܳܒܺܝܢ ܗܘܰܝܬܽܘܢ.
40 ܘܟܽܠ ܡܰܢ ܕܝܳܗܶܒ ܗܘܳܐ ܡܰܟܣܳܐ ܒܽܐܘܪܺܫܠܶܡ: ܡܶܟܺܝܠ ܠܳܐ ܢܶܗܘܶܐ ܝܳܗܶܒ. ܘܟܽܠ ܡܰܢܽܘ ܡܶܢ ܕܺܝܠܟܽܘܢ ܕܨܳܒܶܝܢ ܕܢܶܬܟܰܬܒܽܘܢ ܥܰܡ ܕܺܝܠܰܢ: ܢܶܬܟܰܬܒܽܘܢ. ܘܢܶܗܘܶܐ ܒܰܝܢܳܬܰܢ ܫܠܳܡܳܐ.
41 ܒܰܫܢܰܬ ܡܳܐܐ ܘܫܰܒܥܺܝܢ: ܐܶܬܬܪܺܝܡ ܢܺܝܪܳܐ ܕܥܰܡ̈ܡܶܐ ܡܶܢ ܝܺܣܪܳܐܶܝܠ.
42 ܘܫܰܪܺܝܘ ܥܰܡܳܐ ܟܳܬܒܺܝܢ ܘܫܳܩܠܺܝܢ: ܘܝܳܗܒܺܝܢ ܒܫܰܢܬܳܐ ܩܰܕܡܳܝܬܳܐ: ܒܰܫܡܶܗ ܕܫܶܡܥܽܘܢ ܪܰܒ ܟܳܗܢ̈ܶܐ ܪܰܒܳܐ ܘܪܺܝܫܳܐ ܘܰܡܕܰܒܪܳܢܳܐ ܕܺܝܗܽܘܕܳܝܶܐ.
43 ܒܗܳܢܽܘܢ ܝܰܘ̈ܡܳܬܳܐ: ܝܺܬܶܒ ܫܶܡܥܽܘܢ ܥܰܠ ܥܶܐܙܳܐ: ܘܚܰܕܪܳܗ̇ ܒܡܰܫܪܺܝܬܳܐ. ܘܰܥܒܰܕ ܡܰܓܕ̈ܠܶܐ ܕܩܰܝܣܳܐ ܥܰܫܺܝ̈ܢܶܐ. ܘܰܩܪܶܒ ܠܫܽܘܪܳܐ ܕܰܡܕܺܝܢܬܳܐ. ܘܰܗܓܰܡ ܚܰܕ ܡܰܓܕܠܳܐ. ܘܰܐܚܕܳܗ̇ ܠܰܡܕܺܝܢܬܳܐ.
44 ܘܰܫܘܰܪܘ ܘܰܢܦܰܩܘ ܡܶܢ ܓܰܘ ܡܰܓ̈ܕܠܳܐ ܕܩܰܝܣܳܐ ܓܰܒܖ̈ܶܐ ܕܚܰܝܠܳܐ. ܘܰܢܚܶܬܘ ܠܰܡܕܺܝܢܬܳܐ. ܘܰܗܘܳܐ ܙܰܘܥܳܐ ܪܰܒܳܐ ܒܓܰܘ ܡܕܺܝܢܬܳܐ.
45 ܘܰܣܠܶܩܘ ܒܢܰܝ̈ ܡܕܺܝܢܬܳܐ ܥܰܡ ܢܶܫܰܝ̈ܗܽܘܢ ܘܰܒܢܰܝ̈ܗܽܘܢ ܟܰܕ ܡܣܰܕܩܺܝܢ ܢܰܚܬܰܝ̈ܗܽܘܢ. ܘܰܓܥܰܘ ܒܩܳܠܳܐ ܪܳܡܳܐ ܘܒܥܰܘ ܡܶܢ ܫܶܡܥܽܘܢ ܕܢܶܬܶܠ ܠܗܽܘܢ ܝܰܡܺܝܢܳܐ.
46 ܘܶܐܡܰܪܘ ܠܶܗ. ܠܳܐ ܬܶܥܒܶܕ ܠܰܢ ܐܰܝܟ ܒܺܝܫܽܘܬܰܢ: ܐܶܠܳܐ ܐܰܝܟ ܛܰܝܒܽܘܬܳܟ.
47 ܘܰܫܒܰܩ ܐܶܢܽܘܢ ܫܶܡܥܽܘܢ ܘܠܳܐ ܐܰܩܪܶܒ ܥܰܡܗܽܘܢ. ܘܰܐܦܶܩ ܐܶܢܽܘܢ ܡܶܢ ܡܺܕܝܢܬܳܐ. ܘܕܰܟܺܝ ܒ̈ܳܬܶܐ ܐܰܝܟܳܐ ܕܺܐܝܬ ܗܘܳܐ ܦܬܰܟܖ̈ܶܐ. ܘܗܳܟܰܢܳܐ ܥ̣ܰܠ ܠܳܗ̇ ܟܰܕ ܡܫܰܒܰܚ ܘܰܡܒܰܪܶܟ.
48 ܘܰܐܦܶܩ ܡܶܢܳܗ̇ ܟܽܠܳܗ̇ ܛܰܡܐܽܘܬܳܐ. ܘܰܐܘܬܶܒ ܬܰܡܳܢ ܓܰܒܖ̈ܶܐ ܐܰܝܠܶܝܢ ܕܡܶܨܛܒܶܝܢ ܒܢܳܡܽܘܣܳܐ. ܘܰܒܢܳܐ ܒܳܗ̇ ܚܶܣܢܳܐ. ܘܰܥܒܰܕ ܠܶܗ ܒܳܗ̇ ܒܰܝܬܳܐ.
49 ܝܳܬܒܰܝ̈ ܡܶܪܕܳܐ ܕܶܝܢ ܕܒܽܐܘܪܺܫܠܶܡ ܡܶܬܟܠܶܝܢ ܗܘܰܘ ܠܡܶܥܰܠ ܘܰܠܡܶܦܰܩ: ܘܰܠܡܶܙܒܰܢ ܘܠܰܡܙܰܒܳܢܽܘ. ܘܰܟܦܶܢܘ ܣܰܓܺܝ. ܘܡܺܝܬܘ ܡܶܢܗܽܘܢ ܣܰܓܺܝ̈ܐܶܐ ܡܶܢ ܟܰܦܢܳܐ.
50 ܘܰܒܥܰܘ ܡܶܢ ܫܶܡܥܽܘܢ ܕܢܶܬܶܠ ܠܗܽܘܢ ܝܰܡܺܝܢܳܐ. ܘܝܰܗܒ ܠܗܽܘܢ. ܘܰܐܦܶܩ ܐܶܢܽܘܢ ܡܶܢ ܬܰܡܳܢ. ܘܕܰܟܝܶܗ ܠܒܶܝܬ ܡܶܪܕܳܐ ܡܶܢ ܟܽܠܳܗ̇ ܛܰܡܐܽܘܬܳܐ.
51 ܘܥ̣ܰܠܘ ܠܒܶܝܬ ܡܶܪܕܳܐ: ܒܥܶܣܪܺܝܢ ܘܰܬܠܳܬܳܐ ܒܝܰܪܚܳܐ ܕܰܬܪܶܝܢ: ܒܰܫܢܰܬ ܡܳܐܐ ܘܫܰܒܥܺܝܢ ܘܰܚܕܳܐ: ܒܚܰܕܽܘܬܳܐ ܘܰܒܬܶܫܒܽܘܚܬܳܐ: ܘܒܽܐܘܫܰܥ̈ܢܶܐ: ܘܰܒܩܺܝܬܳܖ̈ܶܐ ܘܰܒܟܶܢܳܖ̈ܶܐ. ܡܶܛܽܠ ܕܶܐܬܬܒܰܪ ܒܥܶܠܕܒܳܒܳܐ ܪܰܒܳܐ ܡܶܢ ܝܺܣܪܳܐܶܝܠ. ܘܰܫܠܺܝ ܢܽܘܟܪܳܝܳܐ ܡܶܢ ܕܰܠܡܰܩܪܳܒܽܘ ܥܰܡ ܝܺܣܪܳܐܶܝܠ.
52 ܘܰܐܩܺܝܡܘ ܕܰܗܘܰܘ ܥܳܒܕܺܝܢ ܠܶܗ ܠܗܳܢܳܐ ܝܰܘܡܳܐ ܒܟܽܠ ܫܢܳܐ ܘܰܫܢܳܐ: ܘܰܒܒܽܘܣܳܡܳܐ ܘܰܒܚܰܕܽܘܬܳܐ.
53 ܘܰܐܥܫܶܢܘ ܠܛܽܘܪܳܐ ܕܗܰܝܟܠܳܐ ܕܥܰܠ ܓܶܢܒ ܒܶܝܬ ܡܶܪܕܳܐ. ܘܥܳܡܰܪ ܗܘܳܐ ܬܰܡܳܢ ܫܶܡܥܽܘܢ ܗܽܘ ܘܰܒܢܰܝ̈ ܒܰܝܬܶܗ ܥܰܡܶܗ.
54 ܘܰܚܙܳܐ ܫܶܡܥܽܘܢ ܠܝܽܘܚܰܢܳܢ ܒܪܶܗ ܕܓܰܢܒܳܪ ܗܽܘ. ܘܰܐܩܺܝܡܶܗ ܡܕܰܒܪܳܢܳܐ ܕܟܽܠܗܽܘܢ ܚܰܝ̈ܠܶܐ. ܘܰܥܡܰܪ ܗܽܘ ܒܰܓܙܺܝܪܳܐ.