1 Maccabees 15
The First Book of Maccabees
܀ ܐ ܡܩܒܝ̈ܐ ܝܗ ܀
1 ܘܫܰܕܰܪ ܐܰܢܛܝܰܟܳܘܣ ܒܪܶܗ ܕܕܺܡܰܛܪܺܝܳܘܣ ܡܰܠܟܳܐ ܐܶܓܪ̈ܳܬܳܐ ܡܶܢ ܓܰܙܪ̈ܳܬܳܐ ܕܝܰܡܳܐ: ܠܫܶܡܥܽܘܢ ܪܰܒ ܟܳܗ̈ܢܶܐ ܘܪܺܝܫ ܥܰܡܳܐ ܕܺܝܗܽܘ̈ܕܳܝܶܐ ܘܰܠܟܽܠܶܗ ܥܰܡܳܐ.
2 ܘܰܟܬܺܝܒ ܗܘܳܐ ܒܗܶܝܢ ܗܳܟܰܢܳܐ. ܐܰܢܛܝܰܟܳܘܣ ܡܰܠܟܳܐ: ܠܫܶܡܥܽܘܢ ܪܰܒ ܟܳܗܢ̈ܶܐ ܪܰܒܐ ܘܪܺܝܫ ܥܰܡܳܐ: ܘܰܠܥܰܡܳܐ ܕܺܝܗܽܘ̈ܕܳܝܶܐ: ܫܠܳܡ.
3 ܡܶܛܽܠ ܕܐ̱ܢܳܫ̈ܳܐ ܒܺܝ̈ܫܶܐ ܐܶܚܰܕܘ ܡܰܠܟܽܘܬܳܐ ܕܰܐܒܳܗܰܝ̈: ܗܳܫܳܐ ܕܶܝܢ ܨܳܒܶܐ ܐ̱ܢܳܐ ܕܶܐܩܽܘܡ ܘܶܐܦܪܩܺܝܗ̇ ܘܶܐܣܒܺܝܗ̇ ܡܶܢܗܽܘܢ: ܘܶܐܥܒܕܺܝܗ̇ ܐܰܝܟ ܕܡܶܢ ܩܕܺܝܡ: ܟܰܢܫܶܬ ܕܶܝܢ ܚܰܝܠܳܐ ܣܰܓܺܝܐܳܐ: ܘܬܰܩܢܶܬ ܐܶܠܦ̈ܶܐ ܕܰܩܪܳܒܳܐ.
4 ܨܳܒܶܐ ܐ̱ܢܳܐ ܗܳܟܺܝܠ ܕܶܐܦܽܘܩ ܥܰܠ ܐܰܪܥܳܐ: ܘܺܐܙܰܠ ܥܰܠ ܐܰܝܠܶܝܢ ܕܚܰܒܶܠܘ ܐܰܪܥܰܢ: ܘܰܐܘܒܶܕܘ ܡܕܺܝ̈ܢܳܬܳܐ ܣܰܓܺܝ̈ܐܳܬܳܐ ܒܡܰܠܟܽܘܬܳܐ.
5 ܘܗܳܫܳܐ ܫܳܒܶܩ ܐ̱ܢܳܐ ܠܳܟ: ܟܽܠܶܗ ܫܩܳܠܳܐ ܕܰܫܒܰܩܘ ܡܰܠ̈ܟܶܐ ܕܡܶܢ ܩܕܳܡܰܝ: ܘܟܽܠܗܶܝܢ ܡܰܘ̈ܗܒܳܬܳܐ ܕܝܰܗܒܘ.
6 ܘܝܶܗܒܶܬ ܠܳܟ ܫܽܘܠܛܳܢܳܐ ܕܬܶܦܣܽܘܩ ܦܣܳܩܳܐ ܘܬܶܦܩܽܘܕ ܦܽܘܩܕܳܢܳܐ ܐܰܝܟ ܕܨܳܒܶܐ ܐܰܢ̱ܬ.
7 ܐܽܘܪܺܫܠܶܡ ܕܶܝܢ ܘܒܶܝܬ ܡܰܩܕܫܳܐ ܢܶܗܘܽܘܢ ܡܚܰܪܪܺܝܢ. ܘܟܽܠܶܗ ܙܰܝܢܳܐ ܕܬܰܩܶܢܬ ܘܚܶܣ̈ܢܶܐ ܕܰܒܢܰܝܬ: ܗܳܢܽܘܢ ܕܰܐܚܺܝܕ ܐܰܢ̱ܬ: ܕܺܝܠܳܟ ܢܶܗܘܽܘܢ.
8 ܘܟܽܠܳܗ̇ ܚܰܘܒܬܳܐ ܕܡܰܠܟܳܐ: ܘܟܽܠ ܕܥܳܐܶܠ ܗܘܳܐ ܠܒܶܝܬ ܡܰܠܟܳܐ: ܟܽܠܶܗ ܫܒܺܝܩ ܡܶܢ ܗܳܫܳܐ ܘܰܠܗܰܠ.
9 ܐܶܡܰܬܝ ܕܶܝܢ ܕܬܶܬܩܰܢ ܡܰܠܟܽܘܬܰܢ ܢܫܰܒܚܳܟ ܘܰܠܗܰܝܟܠܳܐ ܘܰܠܥܰܡܳܟ: ܒܬܶܫܒܽܘܚܬܳܐ ܪܰܒܬܳܐ. ܐܰܝܟ ܕܬܶܬܚܙܶܐ ܬܶܫܒܽܘܚܬܟܽܘܢ ܒܟܽܠܳܗ̇ ܐܰܪܥܳܐ.
10 ܒܰܫܢܰܬ ܡܳܐܐ ܘܫܰܒܥܺܝܢ ܘܰܐܪܒܰܥ: ܢܦܰܩ ܐܰܢܛܝܰܟܳܘܣ ܠܰܐܪܥܳܐ ܕܰܐܒܳܗܰܘ̈ܗܝ. ܘܶܐܬܟܰܢܰܫܘ ܠܘܳܬܶܗ ܟܽܠܗܽܘܢ ܚܰܝ̈ܠܶܐ: ܐܰܝܟ ܕܠܳܐ ܐܶܫܬܚܰܪ ܠܘܳܬ ܛܪܺܝܦܽܘܢ: ܐܶܠܳܐ ܐܶܢ ܐ̱ܢܳܫ̈ܳܐ ܙܥܽܘܖ̈ܶܐ.
11 ܘܪܰܕܦܶܗ ܐܰܢܛܝܰܟܳܘܣ ܡܰܠܟܳܐ. ܘܶܐܬܳܐ ܛܪܺܝܦܽܘܢ ܟܰܕ ܥܳܪܶܩ ܠܕܽܘܪܳܐ ܕܥܰܠ ܣܦܳܖ̈ܰܝ ܝܰܡܳܐ.
12 ܚܙܳܐ ܓܶܝܪ ܕܰܣܓܺܝ ܠܗܶܝܢ ܥܠܰܘܗܝ ܒܺܝ̈ܫܳܬܳܐ ܘܫܰܒܩܶܗ ܚܰܝܠܶܗ.
13 ܘܰܫܪܳܐ ܐܰܢܛܝܰܟܳܘܣ ܥܰܠ ܕܽܘܪܳܐ. ܘܥܰܡܶܗ ܬܰܪܬܰܥܶܣܖ̈ܶܐ ܪ̈ܶܒܘܳܢ ܓܒܰܖ̈ܶܐ ܩܖ̈ܰܒܬܳܢܶܐ: ܘܰܬܡܳܢܝܳܐ ܐܰܠܦܺܝ̈ܢ ܦܰܪ̈ܳܫܶܐ.
14 ܘܟܰܪܟܳܗ̇ ܠܰܡܕܺܝܢܬܳܐ: ܘܶܐܚܰܕ ܐܰܠܦ̈ܶܐ. ܘܳܐܠܶܨ ܗܘܳܐ ܠܳܗ̇ ܡܶܢ ܝܰܡܳܐ ܘܡܶܢ ܝܰܒܫܳܐ. ܘܠܳܐ ܫܳܒܶܩ ܗܘܳܐ ܠܐ̱ܢܳܫ ܠܡܶܥܰܠ ܘܠܰܡܦܰܩ.
15 ܘܶܐܬܳܐ ܢܽܘܡܢܝܘܣ ܘܰܐܝܠܶܝܢ ܕܥܰܡܶܗ ܡܶܢ ܪܽܗܘܡܺܝ: ܟܰܕ ܐܺܝܬ ܥܠܰܗܽܘܢ ܐܶܓܪ̈ܳܬܳܐ ܠܘܳܬ ܡܰܠܟܳܐ ܘܰܐܪ̈ܥܳܬܳܐ: ܘܰܟܬܺܝܒ ܗܘܳܐ ܒܗܶܝܢ ܗܳܟܰܢܳܐ.
16 ܠܽܘܩܺܝܳܘܣ ܗܽܘܦܳܛܳܘܣ ܕܪܽܗܘܡܺܝ ܠܰܦܛܽܘܠܡܶܐܳܘܣ ܡܰܠܟܳܐ: ܫܠܳܡ.
17 ܐܶܬܰܘ ܠܳܘܬܰܢ ܣܳܒ̈ܶܐ ܕܺܝܗܽܘ̈ܕܳܝܶܐ ܪ̈ܳܚܡܰܝܢ ܘܰܡܥܰܕܪ̈ܳܢܰܝܢ: ܘܠܰܡܚܰܕܳܬܽܘ ܪܳܚܡܽܘܬܳܐ ܘܥܽܘܕܪܳܢܳܐ ܕܡܶܢ ܩܕܺܝܡ. ܕܰܡܫܰܕܪܺܝܢ ܡܶܢ ܫܶܡܥܽܘܢ ܪܒ ܟܳܗ̈ܢܶܐ ܘܥܰܡܳܐ ܕܺܝܗܽܘ̈ܕܳܝܶܐ.
18 ܐܰܝܬܺܝܘ ܠܰܡ ܕܶܝܢ ܥܰܡܗܽܘܢ ܡܓܰܢܳܐ ܕܕܰܗܒܳܐ ܕܳܐܠܶܦ ܡܢܺܝ̈ܢ.
19 ܫܦܰܪ ܠܰܢ ܗܳܟܺܝܠ ܕܢܶܟܽܬܽܘܒ ܠܡܰܠ̈ܟܶܐ ܘܰܐܪ̈ܥܳܬܳܐ: ܕܠܳܐ ܐ̱ܢܳܫ ܢܶܥܒܶܕ ܠܗܽܘܢ ܒܺܝܫܬܳܐ. ܐܳܦܠܳܐ ܢܰܩܪܒܽܘܢ ܥܰܡܗܽܘܢ ܐܰܘ ܥܰܡ ܡܕܺܝ̈ܢܳܬܗܽܘܢ ܐܰܘ ܥܰܡ ܐܰܪ̈ܥܳܬܗܽܘܢ. ܘܰܕܠܳܐ ܢܶܗܽܘܘܢ ܡܥܰܕܪ̈ܳܢܶܐ ܠܰܐܝܠܶܝܢ ܕܡܰܩܪܒܺܝܢ ܥܰܡܗܽܘܢ.
20 ܘܰܫܦܰܪ ܠܰܢ ܕܶܝܢ ܕܰܢܩܰܒܶܠ ܡܶܢܗܽܘܢ ܐܳܦ ܡܓܰܢܳܐ.
21 ܟܽܠ ܐ̱ܢܳܫ̈ܳܐ ܗܳܟܺܝܠ ܒܺܝ̈ܫܶܐ ܕܰܥܪܰܩܘ ܡܶܢ ܐܰܪܥܗܽܘܢ ܘܶܐܬܰܘ ܠܘܳܬܟܽܘܢ: ܐܰܫܠܶܡܘ ܐܶܢܽܘܢ ܠܫܶܡܥܽܘܢ ܪܰܒ ܟܳܗ̈ܢܶܐ ܕܢܶܥܒܶܕ ܡܶܢܗܽܘܢ ܕܺܝܢܳܐ ܘܰܬܒܰܥܬܳܐ ܐܰܝܟ ܢܳܡܽܘܣܗܽܘܢ.
22 ܘܰܕܐܰܝܟ ܗܳܠܶܝܢ ܬܽܘܒ ܡ̈ܶܠܶܐ ܟܬܰܒ ܠܕܺܝܡܶܛܪܺܝܳܘܣ ܡܰܠܟܳܐ ܘܠܳܐܛܶܠܳܘܣ: ܘܠܰܐܪܺܝܪܳܬ ܘܠܰܐܪܣܰܩ.
23 ܘܰܠܟܽܠܗܶܝܢ ܐܰܪ̈ܥܳܬܳܐ: ܘܰܠܠܰܡܣܳܩܳܘܣ ܘܠܰܣܦܰܪ̈ܛܳܝܶܐ: ܘܰܠܕܰܐܠܳܘܣ ܘܠܰܡܢܺܝܕܳܘܣ ܘܠܰܣܩܺܝܢܳܘܣ ܘܠܰܩܪܶܝܢ: ܘܰܠܣܳܡܳܘܣ ܘܰܠܦܰܡܦܘܠܺܝܰܐ ܘܰܠܠܽܘܩܺܝܰܐ: ܘܠܶܐܠܺܝܩܰܪܢܰܣܽܘܣ ܘܰܠܪܽܘܕܽܘܣ: ܘܰܠܦܰܣܰܠܺܝܕܳܐ: ܘܰܠܩܳܘ. ܘܰܠܣܺܝܕܳܐ: ܘܰܠܕܽܘܪ̈ܛܺܝܢܳܐ: ܘܠܰܩܢܺܝܕܳܘܣ. ܘܰܠܩܽܘܦܪܽܘܣ ܘܠܐܪܘܕܘܣ: ܘܰܠܩܺܝܪ̈ܢܳܝܶܐ.
24 ܦܶܚܡܗܶܝܢ ܕܶܝܢ ܕܗܳܠܶܝܢ: ܟܰܬܒ ܠܫܶܡܥܽܘܢ ܪܰܒ ܟܳܗ̈ܢܶܐ.
25 ܐܺܢܛܺܝܰܟܳܘܣ ܕܶܝܢ ܫܪܰܐ ܥܰܠ ܕܰܘܪܳܐ. ܘܰܒܝܰܘܡܳܐ ܕܰܬܪܶܝܢ ܥܒܰܕܘ ܡܰܐܟ̈ܢܘܣ. ܘܶܐܬܩܪܶܒܘ ܨܶܐܕܶܝ̈ܗ̇. ܘܶܐܚܕܶܗ ܠܰܛܪܺܝܦܽܘܢ ܡܶܢ ܟܽܠܗܽܘܢ ܣܶܛܖ̈ܰܘܗܝ ܐܰܝܟ ܕܠܳܐ ܢܶܫܟܰܚ ܠܡܶܦܰܩ.
26 ܘܫܰܕܰܪ ܠܶܗ ܫܶܡܥܽܘܢ ܬܪܺܝܢ ܐܰܠܦܺܝ̈ܢ ܓܰܒܖ̈ܶܐ ܡܰܓܒܳܝ̈ܶܐ ܠܥܽܘܕܪܳܢܶܗ. ܘܕܰܗܒܳܐ ܘܣܺܐܡܳܐ ܘܡܳܐܢ̈ܶܐ ܣܰܓܺܝ̈ܐܶܐ.
27 ܘܠܳܐ ܨܳܒܶܐ ܗܘܳܐ ܕܰܢܩܰܒܶܠ ܐܶܢܽܘܢ. ܐܶܠܳܐ ܕܰܓܶܠ ܒܟܽܠ ܡܶܕܶܡ ܕܶܐܫܬܰܘܕܺܝ ܗܘܳܐ ܡܶܢ ܩܕܺܝܡ. ܘܶܐܫܬܰܚܠܰܦ ܥܠܰܘܗܝ.
28 ܘܫܰܕܰܪ ܠܘܳܬܶܗ ܚܰܕ ܡܶܢ ܪ̈ܳܚܡܰܘܗܝ ܠܐܬܢܒܝܘܣ. ܘܦܰܩܕܶܗ ܒܶܝܬ ܠܶܗ ܘܠܶܗ: ܕܡܳܢܳܐ ܢܺܐܙܰܠ ܘܢܶܥܒܶܕ. ܘܢܺܐܡܰܪ ܠܗܽܘܢ. ܕܰܐܢܬܽܘܢ ܐܰܚܺܝܕܺܝܢ ܐܢ̱ܬܽܘܢ ܠܝܽܘܦܺܐ ܘܰܠܓܙܪ ܘܰܠܡܶܪܕܳܐ ܕܒܽܐܘܪܺܫܠܶܡ ܡܕܺܝ̈ܢܳܬܳܐ ܕܡܰܠܟܽܘܬܝ.
29 ܘܰܐܚܪܶܒܬܽܘܢ ܬܚܽܘܡܰܝ̈ܗܶܝܢ. ܘܰܥܒܰܕܬܽܘܢ ܡܚܽܘܬܳܐ ܪܰܒܬܳܐ ܒܰܐܪܥܳܐ. ܘܶܐܫܬܠܰܛܬܽܘܢ ܥܰܠ ܐܰܬܖ̈ܰܘܳܬܳܐ ܣܰܓܺܝ̈ܐܶܐ ܕܽܐܘܚܕܳܢܳܗ̇ ܕܡܰܠܟܽܘܬܝ.
30 ܗܳܫܳܐ ܗܳܟܺܝܠ ܐܰܫܠܶܡܘ ܡܕܺܝ̈ܢܳܬܳܐ ܕܶܐܚܰܕܬܽܘܢ ܘܰܫ̈ܩܳܠܶܐ ܕܰܐܬܖ̈ܰܘܳܬܳܐ ܗܳܢܽܘܢ ܕܶܐܫܬܰܠܰܛܬܽܘܢ ܥܠܰܝܗܽܘܢ: ܠܒܰܪ ܡܶܢ ܬܚܽܘ̈ܡܶܐ ܕܺܝܗܽܘܕܳܐ.
31 ܘܶܐܠܳܐ ܗܰܒ ܚܠܳܦܰܝܗܶܝܢ ܚܰܡܶܫܡܳܐܐ ܟܰܟܪ̈ܺܝܢ ܕܟܶܣܦܳܐ. ܚܠܳܦ ܚܽܘ̈ܒܳܠܶܐ ܕܚܰܒܶܠܬܽܘܢ ܘܰܫ̈ܩܳܠܶܐ ܕܰܡܕܺܝ̈ܢܳܬܳܐ ܚܰܡܶܫ ܡܳܐܐ ܟܰܟܪ̈ܺܝܢ ܐ̱ܚܪ̈ܳܢܺܝܢ. ܘܶܐܢ ܕܶܐܢ ܠܳܐ ܬܶܬܠܽܘܢ: ܢܺܐܬܶܐ ܘܢܰܩܪܶܒ ܥܰܡܟܽܘܢ.
32 ܘܶܐܬܳܐ ܐܳܬܳܐܢܳܘܒܺܝܳܘܣ ܪܳܚܡܶܗ ܕܡܰܠܟܳܐ ܠܽܐܘܪܺܫܠܶܡ. ܘܰܚܙܳܐ ܬܶܫܒܽܘܚܬܶܗ ܕܫܶܡܥܽܘܢ ܘܬܶܫܡܶܫܬܶܗ ܕܕܰܗܒܳܐ ܘܰܕܣܺܐܡܳܐ: ܘܡܳܐܢܰܝ̈ ܐܺܝܩܳܖ̈ܶܐ ܡܝܰܬܖ̈ܶܐ: ܘܶܐܡܰܪ ܠܫܶܡܥܽܘܢ ܡܶܠܰܘ̈ܗܝ ܕܡܰܠܟܳܐ.
33 ܘܰܥܢܳܐ ܫܶܡܥܽܘܢ ܘܶܐܡܰܪ ܠܶܗ. ܠܳܐ ܐܰܪܥܳܐ ܢܽܘܟܪܳܝܬܳܐ ܢܣܰܒܢ. ܘܠܳܐ ܐܶܚܰܕܢ ܡܶܕܶܡ ܕܠܳܐ ܗܘܳܐ ܕܺܝܠܰܢ.ܐܶܠܳܐ ܐܶܢ ܝܳܪܬܽܘܬܳܐ ܕܰܐܒܳܗܰܝ̈ܢ. ܒܰܙܒܰܢ ܕܶܝܢ ܐܶܬܬܚܶܕ ܡܶܢ ܒܥܶܠܕܒܳܒ̈ܶܐ ܕܠܳܐ ܒܕܺܝܢܳܐ ܘܰܕܠܳܐ ܒܦܽܘܪܫܳܢܳܐ.
34 ܗܳܫܳܐ ܕܶܝܢ ܕܰܗܘܳܐ ܠܰܢ ܙܰܒܢܳܐ: ܢܣܰܒܢ ܝܳܪܬܽܘܬܳܐ ܕܰܐܒܳܗܰܝ̈ܢ.
35 ܘܥܰܠ ܝܽܘܦܺܐ ܕܶܝܢ ܘܥܰܠ ܓܙܪ ܕܫܶܐܠܶܬ: ܗܳܠܶܝܢ ܥܳܒ̈ܕܳܢ ܗܘܰܝ̈ ܡܚܽܘܬܳܐ ܪܰܒܬܳܐ ܒܥܰܡܰܢ ܘܒܰܐܪܥܰܢ. ܚܠܳܦ ܗܳܠܶܝܢ ܝܳܗܒܺܝܢܰܢ ܡܳܐܐ ܟܰܟܪ̈ܺܝܢ. ܘܠܳܐ ܐܰܬܺܝܒܶܗ ܦܶܬܓܳܡܳܐ ܐܬܐܢܘܒܝܘܣ.
36 ܘܰܗܦܰܟ ܒܚܶܡܬܳܐ ܠܘܳܬ ܡܰܠܟܳܐ: ܘܰܐܘܕܥܶܗ ܗܳܠܶܝܢ ܟܽܠܗܶܝܢ ܡ̈ܶܠܶܐ: ܘܬܶܫܒܽܘܚܬܶܗ ܕܫܶܡܥܽܘܢ ܘܟܽܠ ܡܶܕܶܡ ܕܰܚܙܳܐ. ܘܶܐܬܚܰܡܰܬ ܡܰܠܟܳܐ ܒܪܽܘܓܙܳܐ ܪܰܒܳܐ.
37 ܛܪܺܝܦܽܘܢ ܕܶܝܢ ܝܺܬܶܒ ܒܶܐܠܦܳܐ. ܘܰܥܪܰܩ ܠܐܪܬܘܣܝܐ.
38 ܘܰܐܩܺܝܡ ܡܰܠܟܳܐ ܠܩܰܢܕܳܒܺܝܳܘܣ ܪܺܝܫܳܐ ܥܰܠ ܦܪܰܗܠܳܘܣ. ܘܝܰܗܒ ܠܶܗ ܚܰܝܠܳܐ ܕܦܰܪ̈ܳܫܶܐ ܘܰܕܖ̈ܰܓܳܠܶܐ.
39 ܘܶܐܡܰܪ ܠܶܗ ܕܢܶܫܪܶܐ ܠܽܘܩܒܰܠ ܝܺܗܽܘܕܳܐ. ܘܦܰܩܕܶܗ ܕܢܶܒܢܶܐ ܠܚܶܒܪܽܘܢ: ܘܰܢܥܰܫܶܢ ܠܬܰܪ̈ܥܶܝܗ̇: ܘܢܰܩܪܶܒ ܥܰܡ ܥܰܡܳܐ. ܡܰܠܟܳܐ ܕܶܝܢ ܪܳܕܶܦ ܗܘܳܐ ܠܰܛܪܺܝܦܽܘܢ.
40 ܘܶܐܬܳܐ ܩܰܢܕܳܒܺܝܳܘܣ ܠܝܰܡܢܺܝܢ: ܘܫܰܪܺܝ ܡܓܰܪܶܓ ܘܰܡܥܺܝܩ ܠܥܰܡܳܐ. ܘܥܳܐܶܠ ܘܳܐܙܶܠ ܠܺܝܗܽܘܕܳܐ: ܘܰܡܩܰܛܶܠ ܘܫܳܒܶܐ.
41 ܘܰܒܢܳܐ ܩܰܢܕܳܒܺܝܳܘܣ ܠܚܶܒܪܽܘܢ. ܘܣܳܡ ܬܰܡܳܢ ܚܰܝܠܳܐ ܕܦܰܪ̈ܳܫܶܐ ܘܰܕܖ̈ܰܓܳܠܶܐ. ܕܰܗܘܰܘ ܢܳܦܩܺܝܢ ܘܰܡܗܰܠܟܺܝܢ ܒܽܐܘܪܚܳܐ ܕܺܝܗܽܘܕܳܐ ܐܰܝܟ ܕܦܰܩܕܶܗ ܗܘܳܐ ܡܰܠܟܳܐ.