1 Maccabees 2
The First Book of Maccabees
܀ ܐ ܡܩܒܝ̈ܐ ܒ ܀
1 ܘܰܒܗܳܢܽܘܢ ܝܰܘ̈ܡܳܬܳܐ: ܩܳܡ ܡܰܬܺܝܬܳܐ ܒܪܶܗ ܕܝܽܘܚܳܢܳܢ ܒܰܪ ܫܶܡܥܽܘܢ ܟܳܗܢܳܐ ܡܶܢ ܒܢܰܝ̈ ܝܽܘܢܳܕܳܒ ܡܶܢ ܐܽܘܪܺܫܠܶܡ. ܘܺܝܬܶܒ ܒܡܽܘܪܥܺܝܡ.
2 ܘܺܐܝܬ ܗܘܳܐ ܠܶܗ ܚܰܡܫܳܐ ܒܢܺܝ̈ܢ: ܝܽܘܚܳܢܳܢ ܗܰܘ ܕܡܶܬܩܪܶܐ ܓܰܕܝ.
3 ܘܫܶܡܥܽܘܢ ܕܶܐܬܩܪܺܝ ܬܰܪܣܰܝ.
4 ܘܺܝܗܽܘܕܳܐ ܗܰܘ ܕܶܐܬܩܪܺܝ ܡܰܩܒܰܝ.
5 ܘܶܐܠܺܝܥܳܙܰܪ ܗܰܘ ܕܶܐܬܩܪܺܝ ܚܽܘܪܳܢ. ܘܝܽܘܢܳܬܳܢ ܗܰܘ ܕܶܐܬܩܪܺܝ ܚܦܽܘܣ.
6 ܘܰܚܙܰܘ ܓܽܘܕܳܦ̈ܶܐ ܕܗܳܘܶܝܢ ܒܺܝܗܽܘܕܳܐ ܘܒܽܐܘܪܺܫܠܶܡ.
7 ܘܶܐܡܰܪ ܘܳܝ ܠܺܝ. ܠܡܳܢܳܐ ܐܶܬܝܰܠܕܶܬ ܕܶܐܚܙܶܐ ܒܰܬܒܳܪܳܗ̇ ܕܒܰܪܬ ܥܰܡܝ: ܘܕܰܡܕܺܝܢܬܳܐ ܩܰܕܺܝܫܬܳܐ. ܘܺܝܬܶܒܘ ܬܰܡܳܢ ܢܽܘܟܪ̈ܳܝܶܐ. ܡܶܛܽܠ ܕܶܐܬܝܰܗܒܰܬ ܒܺܐܝܕܳܐ ܕܰܒܥܶܠܕܒܳܒ̈ܶܐ. ܘܒܶܝܬ ܡܰܩܕܫܳܗ̇ ܒܺܐܝܕܳܐ ܕܢܽܘܟܪ̈ܳܝܶܐ.
8 ܗܘܳܐ ܗܰܝܟܠܳܗ̇ ܒܰܙܒܰܢ ܐܰܝܟ ܓܰܒܪܳܐ ܡܫܰܒܚܳܐ.
9 ܘܗܳܫܳܐ ܡܳܐܢ̈ܶܐ ܕܬܶܫܒܽܘܚܬܳܗ̇ ܐܶܙܰܠܘ ܒܫܶܒܝܳܐ. ܝܰܠܽܘܕܶܝ̈ܗ̇ ܐܶܬܩܰܛܰܠܘ ܒܰܦܠܳܛܰܘ̈ܳܬܳܗ̇. ܘܰܥܠܰܝ̈ܡܶܝܗ̇ ܒܪܽܘܡܚܶܗ ܕܰܒܥܶܠܕܒܳܒܳܐ.
10 ܐܰܝܢܰܘ ܥܰܡܳܐ ܕܠܳܐ ܝܺܪܶܬ ܒܡܰܠܟܽܘܬܳܗ̇: ܘܰܢܣܰܒ ܡܶܢ ܒܶܙܬܳܗ̇.
11 ܟܽܠܶܗ ܨܶܒܬܳܗ̇ ܐܶܬܢܣܶܒ ܡܶܢܳܗ̇. ܘܰܚܠܳܦ ܚܺܐܪܽܘܬܳܗ̇ ܗܘܳܬ ܠܥܰܒܕܽܘܬܳܐ.
12 ܘܗܳܐ ܒܶܝܬ ܡܰܩܕܫܰܢ ܘܨܶܒܬܰܢ ܘܬܶܫܒܽܘܚܬܰܢ ܗܘܰܘ ܠܚܽܘܪܒܳܐ. ܘܣܰܚܶܦܘ ܐܶܢܽܘܢ ܥܰܡ̈ܡܶܐ.
13 ܘܰܠܡܳܢܳܐ ܡܶܟܺܝܠ ܐܳܙܶܠ ܠܰܢ ܠܡܶܚܳܐ.
14 ܣܰܕܶܩܘ ܡܰܬܺܝܬܳܐ ܘܰܒܢܰܘ̈ܗܝ ܢܰܚܬܰܝ̈ܗܽܘܢ: ܘܶܐܬܟܰܣܺܝܘ ܣܰܩܳܐ. ܘܶܐܬܶܐܒܶܠܘ ܪܰܘܪܒܳܐܺܝܬ.
15 ܘܶܐܬܰܘ ܦܳܠܚܰܘ̈ܗܝ ܕܡܰܠܟܳܐ ܗܳܢܽܘܢ ܕܳܐܠܨܺܝܢ ܗܘܰܘ ܥܰܠ ܡܰܣܛܝܳܢܽܘܬܳܐ: ܠܡܽܘܪܥܺܝܡ ܡܕܺܝܢܬܳܐ: ܕܰܢܕܰܒܚܽܘܢ.
16 ܣܰܓܺܝ̈ܐܶܐ ܡܶܢ ܝܺܣܪܳܐܶܝܠ ܐܶܬܰܘ ܠܘܳܬܗܽܘܢ. ܐܳܦ ܡܰܬܺܝܬܳܐ ܘܰܐܝܠܶܝܢ ܕܥܰܡܶܗ ܐܶܬܟܰܢܰܫܘ.
17 ܘܰܥܢܰܘ ܦܳܠܚܰܘ̈ܗܝ ܕܡܰܠܟܳܐ ܘܶܐܡܰܪܘ ܠܡܰܬܺܝܬܳܐ: ܐܰܢ̱ܬ ܗܽܘ ܪܺܝܫܳܐ ܘܪܰܒܳܐ ܘܰܡܫܰܒܚܳܐ ܒܰܡܕܺܝܢܬܳܐ ܗܳܕܶܐ: ܕܰܡܫܰܪܰܪ ܐܰܢ̱ܬ ܘܰܡܩܰܝܰܡ ܒܒܰܢܳܝ̈ܳܐ ܘܒܰܐܚ̈ܶܐ.
18 ܘܗܳܫܳܐ ܗܳܟܺܝܠ ܩܪܽܘܒ ܐܰܢ̱ܬ ܩܰܕܡܳܝܳܐ. ܘܰܥܒܶܕ ܦܽܘܩܕܳܢܶܗ ܕܡܰܠܟܳܐ ܐܰܝܟ ܕܰܥܒܰܕܘ ܟܽܠܗܽܘܢ ܥܰܡ̈ܡܶܐ: ܘܓܰܒܖ̈ܶܐ ܕܺܝܗܽܘܕܳܐ ܐܰܝܠܶܝܢ ܕܶܐܫܬܚܰܪܘ ܒܽܐܘܪܺܫܠܶܡ. ܘܬܶܗܘܶܐ ܐܰܢ̱ܬ ܘܰܒܢܰܝ̈ܟ ܡܶܢ ܪ̈ܳܚܡܶܐ ܕܡܰܠܟܳܐ: ܘܰܐܢ̱ܬ ܘܰܒܢܰܝ̈ܟ ܬܶܒܬܰܒܚܽܘܢ ܒܕܰܗܒܳܐ ܘܰܒܣܺܐܡܳܐ: ܘܰܒܫܰܪܟܳܐ ܕܡܰܘ̈ܗܒܳܬܳܐ ܐ̱ܚܪ̈ܳܢܝܳܬܳܐ.
19 ܘܰܥܢܳܐ ܡܰܬܺܝܬܳܐ ܒܩܳܠܳܐ ܪܳܡܳܐ ܘܶܐܡܰܪ. ܐܶܢܗܽܘ ܕܟܽܠܗܽܘܢ ܥܰܡ̈ܡܶܐ ܕܰܬܚܶܝܬ ܫܽܘܠܛܳܢܶܗ ܕܡܰܠܟܳܐ ܡܶܫܬܰܡܥܺܝܢ ܠܶܗ ܕܢܶܦܪܩܽܘܢ ܡܶܢ ܦܽܘܠܚܳܢܳܐ ܕܰܐܒܳܗܰܝ̈ܗܽܘܢ: ܘܢܶܨܛܒܽܘܢ ܒܦܽܘܩܕܳܢܰܘ̈ܗܝ.
20 ܐܶܠܳܐ ܐܶܢܳܐ ܘܰܒܢܰܝ̈ ܘܰܐܚܰܝ̈ ܒܕܺܝܰܬܺܝܩܺܝ ܕܰܐܒܳܗܰܝ̈ܢ ܪܳܕܶܝܢܰܢ.
21 ܚܳܣ ܠܰܢ ܕܢܶܫܒܽܘܩ ܢܳܡܽܘܣܶܗ ܕܡܳܪܝܳܐ ܘܦܽܘܩܕܳܢܰܘ̈ܗܝ.
22 ܠܳܐ ܡܶܫܬܰܡܥܺܝܢܰܢ ܠܡܶܠܬܶܗ ܕܡܰܠܟܳܐ: ܕܢܶܥܒܰܪ ܩܝܳܡܰܢ ܘܦܽܘܠܚܳܢܰܢ: ܐܰܘ ܕܢܶܣܛܶܐ ܡܶܢܗܽܘܢ ܠܝܰܡܺܝܢܳܐ ܘܰܠܣܶܡܳܠܳܐ.
23 ܘܟܰܕ ܫܠܺܝ ܡܰܬܺܝܬܳܐ ܡܶܢ ܕܰܢܡܰܠܶܠ ܗܳܠܶܝܢ ܦܶܬܓܳܡ̈ܶܐ: ܩܪܶܒ ܓܰܒܪܳܐ ܚܰܕ ܝܽܗ̱ܘܕܳܝܳܐ ܠܥܺܝܢ ܟܽܠܶܗ ܥܰܡܳܐ: ܠܰܡܕܰܒܳܚܽܘ ܥܰܠ ܥܠܳܬܳܐ ܕܰܒܡܽܘܪܥܺܝܡ: ܐܰܝܟ ܦܽܘܩܕܳܢܶܗ ܕܡܰܠܟܳܐ.
24 ܘܰܚܙܳܐ ܡܰܬܺܝܬܳܐ ܘܛܰܢ ܘܪܰܬ ܟܽܘ̈ܠܝܳܬܶܗ. ܘܰܐܣܶܩ ܚܶܡܬܳܐ ܐܰܝܟ ܕܺܝܢܳܐ. ܘܰܪܗܶܛ ܘܩܰܛܠܶܗ ܥܰܠ ܥܠܳܬܳܐ.
25 ܘܳܐܦ ܠܪܰܒܳܐ ܕܡܰܠܟܳܐ ܗܰܘ ܕܳܐܠܶܨ ܗܘܳܐ ܕܰܢܕܰܒܚܽܘܢ: ܩܰܛܠܶܗ ܒܗܰܘ ܙܰܒܢܳܐ. ܘܠܰܥܠܳܬܳܐ ܣܚܰܦ.
26 ܘܛܰܢ ܡܰܬܺܝܬܳܐ ܒܢܳܡܽܘܣܳܐ: ܐܰܝܟ ܕܰܥܒܰܕ ܦܺܝܢܚܶܣ ܠܙܰܡܪܺܝ ܒܰܪ ܣܰܠܳܘ.
27 ܘܰܩܪܳܐ ܡܰܬܺܝܬܳܐ ܒܰܡܕܺܝܢܬܳܐ ܒܩܳܠܳܐ ܪܳܡܳܐ ܘܶܐܡܰܪ: ܟܽܠ ܡܰܢܽܘ ܕܛܳܐܶܢ ܒܢܳܡܽܘܣܳܐ ܘܰܡܩܺܝܡ ܕܺܝܰܬܺܝܩܺܝ: ܢܺܐܬܶܐ ܒܳܬܰܪܝ.
28 ܘܰܥܪܰܩ ܗܽܘ ܘܰܒܢܰܘ̈ܗܝ ܠܛܽܘܪܳܐ. ܘܰܫܒܰܩܘ ܡܶܕܶܡ ܕܺܐܝܬ ܗܘܳܐ ܠܗܽܘܢ ܒܰܡܕܺܝܢܬܳܐ.
29 ܗܳܝܕܶܝܢ ܢܚܶܬܘ ܣܰܓܺܝ̈ܐܶܐ ܕܒܳܥܶܝܢ ܗܘܰܘ ܙܰܕܺܝܩܽܘܬܳܐ ܘܕܺܝܢܳܐ: ܠܰܐܪܥܳܐ ܕܡܰܕܒܪܳܐ ܕܢܶܬܒܽܘܢ ܬܰܡܳܢ.
30 ܗܶܢܽܘܢ ܘܰܒܢܰܝ̈ܗܽܘܢ ܘܢܶܫܰܝ̈ܗܽܘܢ ܘܰܒܥܺܝܪܗܽܘܢ. ܡܶܛܽܠ ܕܰܣܓܺܝ ܥܠܰܝܗܽܘܢ ܒܺܝ̈ܫܳܬܳܐ.
31 ܘܶܐܬܶܐܡܰܪ ܠܦܳܠܚܰܘ̈ܗܝ ܕܡܰܠܟܳܐ ܘܰܠܚܰܝ̈ܠܰܘܳܬܳܐ ܕܺܐܝܬ ܒܽܐܘܪܺܫܠܶܡ ܒܰܡܕܺܝܢܬܶܗ ܕܕܰܘܺܝܕ. ܕܰܢܚܶܬܘ ܐ̱ܢܳܫ̈ܳܐ ܐܰܝܠܶܝܢ ܕܒܰܛܶܠܘ ܦܽܘܩܕܳܢܶܗ ܕܡܰܠܟܳܐ. ܘܺܐܝܬܰܝܗܽܘܢ ܒܛܳܫ̈ܝܳܬܳܐ ܕܡܰܕܒܪܳܐ.
32 ܘܰܪܗܶܛܘ ܥܠܰܝܗܽܘܢ ܣܰܓܺܝ̈ܐܶܐ ܘܰܐܕܪܶܟܘ ܐܶܢܽܘܢ: ܘܰܥܒܰܕܘ ܥܰܡܗܽܘܢ ܩܪܳܒܳܐ ܒܝܰܘܡܳܐ ܕܫܰܒܬܳܐ.
33 ܘܶܐܡܰܪܘ ܠܗܽܘܢ: ܣܳܦܩܳܐ ܠܟܽܘܢ ܥܕܰܡܳܐ ܠܗܳܕܶܐ. ܦܽܘܩܘ ܘܰܥܒܶܕܘ ܐܰܝܟ ܦܽܘܩܕܳܢܶܗ ܕܡܰܠܟܳܐ ܘܰܚܝܰܘ.
34 ܘܶܐܡܰܪܘ ܠܳܐ ܢܳܦܩܺܝܢܰܢ. ܘܳܐܦܠܳܐ ܥܳܒܕܺܝܢܰܢ ܡܶܠܬܶܗ ܕܰܡܠܟܳܐ: ܠܡܶܫܪܳܐ ܘܠܰܡܒܰܛܳܠܽܘ ܝܰܘܡܳܐ ܕܫܰܒܬܳܐ.
35 ܘܣܰܪܗܶܒܘ ܥܠܰܝܗܽܘܢ ܩܪܳܒܳܐ.
36 ܘܠܳܐ ܝܰܗܒܘ ܠܗܽܘܢ ܦܶܬܓܳܡܳܐ: ܐܳܦܠܳܐ ܟܺܐܦܳܐ ܫܕܰܘ ܒܗܽܘܢ. ܘܳܐܦܠܳܐ ܣܟܰܪܘ ܒܰܐܦܰܝ̈ܗܽܘܢ ܡܛܰܫ̈ܝܳܬܳܐ.
37 ܐܶܠܳܐ ܐܶܡܰܪܘ. ܢܡܽܘܬ ܟܽܠܰܢ ܒܰܦܫܺܝܛܽܘܬܰܢ. ܘܗܳܐ ܣܳܗܕܺܝܢ ܥܠܰܝܢ ܫܡܰܝܳܐ ܘܰܐܪܥܳܐ. ܕܰܕܠܳܐ ܒܕܺܝܢܳܐ ܡܰܘܒܕܺܝܢ ܐܢ̱ܬܽܘܢ ܠܰܢ.
38 ܘܩܳܡܘ ܥܠܰܝܗܽܘܢ ܒܝܰܘܡܳܐ ܕܫܰܒܬܳܐ ܘܩܰܛܶܠܘ ܐܶܢܽܘܢ: ܘܰܠܢܶܫܰܝ̈ܗܽܘܢ ܘܠܰܒܢܰܝ̈ܗܽܘܢ ܘܠܰܒܥܺܝܪܗܽܘܢ: ܐܰܝܟ ܐܳܠܶܦ ܢܰܦ̈ܫܳܢ ܕܰܒܢܰܝ̈ܢܳܫܳܐ.
39 ܘܰܫܡܰܥ ܡܰܬܺܝܬܳܐ ܘܪ̈ܳܚܡܰܘܗܝ. ܘܶܐܬܶܐܒܶܠܘ ܥܠܰܝܗܽܘܢ ܐܶܒܠܳܐ ܪܰܒܳܐ.
40 ܘܶܐܡܰܪܘ ܓܒܰܪ ܠܩܪܺܝܒܶܗ. ܐܶܢܗܽܘ ܕܢܶܥܒܶܕ ܟܽܠܰܢ ܐܰܝܟ ܕܰܥܒܰܕܘ ܐܰܚܰܝ̈ܢ. ܘܠܳܐ ܢܰܩܪܶܒ ܥܰܡ ܥܰܡ̈ܡܶܐ ܥܰܠ ܐܰܦܰܝ̈ ܢܰܦܫܰܢ ܘܥܰܠ ܐܰܦܰܝ̈ ܢܳܡܽܘܣܰܢ܆ ܒܰܥܓܰܠ ܡܰܘܒܕܺܝܢ ܘܰܡܪܺܝܡܺܝܢ ܠܰܢ ܡܶܢ ܐܰܪܥܳܐ.
41 ܘܶܐܬܡܰܠܰܟܘ ܒܗܰܘ ܝܰܘܡܳܐ ܘܶܐܡܰܪܘ ܕܟܽܠ ܓܰܒܪܳܐ ܕܢܺܐܬܶܐ ܥܠܰܝܢ ܠܰܩܪܳܒܳܐ ܒܝܰܘܡܳܐ ܕܫܰܒܬܳܐ: ܢܰܩܪܶܒ ܥܰܡܶܗ. ܘܠܳܐ ܢܡܽܘܬ ܟܽܠܰܢ ܐܰܝܟ ܕܡܺܝܬܘ ܟܽܠܗܽܘܢ ܐܰܚܰܝ̈ܢ ܒܰܡܛܰܫ̈ܝܳܬܳܐ.
42 ܗܳܝܕܶܝܢ ܐܶܬܟܰܢܰܫܘ ܠܘܳܬܡ ܗܳܠܶܝܢ ܕܒܶܝܬ ܡܰܬܺܝܬܳܐ: ܟܢܽܘܫܬܳܐ ܕܰܐܣܺܝܪ̈ܳܝܶܐ ܡܶܢ ܝܺܣܪܳܐܶܝܠ ܕܥܰܫܺܝܢܺܝܢ ܒܚܰܝܠܳܐ: ܟܽܠ ܡܰܢܽܘ ܕܡܶܨܛܒܶܐ ܒܢܳܡܽܘܣܳܐ.
43 ܘܶܐܬܰܬܘܣܰܦܘ ܥܠܰܝܗܽܘܢ ܟܽܠܗܽܘܢ ܐܰܝܠܶܝܢ ܕܥܳܪܩܺܝܢ ܡܶܢ ܒܺܝ̈ܫܳܬܳܐ: ܘܰܗܘܰܘ ܠܗܽܘܢ ܠܫܽܘܪܳܪܳܐ.
44 ܘܰܐܩܺܝܡܘ ܚܰܝܠܳܐ: ܘܩܰܛܶܠܘ ܠܥܰܘ̈ܳܠܶܐ ܒܪܽܘܓܙܗܽܘܢ: ܘܠܰܐ̱ܢܳܫ̈ܳܐ ܥܳܒܖ̈ܰܝ ܢܳܡܽܘܣܳܐ ܒܚܶܡܬܗܽܘܢ. ܘܫܰܪܟܳܐ ܥܪܰܩܘ ܠܒܶܝܬ ܥܰܡ̈ܡܶܐ ܕܢܶܬܦܰܨܽܘܢ.
45 ܘܶܐܬܟܪܶܟܘ ܡܰܬܺܝܬܳܐ ܘܪ̈ܳܚܡܰܘܗܝ. ܘܣܰܚܶܦܘ ܥܳܠ̈ܰܘܳܬܳܐ.
46 ܘܰܓܙܰܪܘ ܛܠܳܝ̈ܶܐ ܐܰܝܠܶܝܢ ܕܠܳܐ ܓܙܺܝܪܺܝܢ ܗܘܰܘ: ܕܶܐܫܟܰܚܘ ܒܰܬܚܽܘ̈ܡܶܐ ܕܺܝܣܪܳܐܶܝܠ ܒܥܽܘܫܢܳܐ ܘܰܒܚܰܝܠܳܐ.
47 ܘܰܪܕܰܦܘ ܠܫܰܒܗܪ̈ܳܢܶܐ: ܘܶܐܬܩܰܝܰܡ ܥܒܳܕܳܐ ܒܺܐܝܕܰܝ̈ܗܽܘܢ.
48 ܘܢܰܣܒܽܘܗܝ ܠܢܳܡܽܘܣܳܐ ܡܶܢ ܐܺܝܕܳܐ ܕܥܰܡ̈ܡܶܐ: ܘܡܶܢ ܐܺܝܕܳܐ ܕܡܰܠܟܰܝ̈ܗܽܘܢ. ܘܠܳܐ ܝܰܗܒܘ ܕܬܶܬܪܺܝܡ ܩܰܪܢܶܗ ܕܥܰܘܠܳܐ.
49 ܘܰܩܪܶܒܘ ܝܰܘ̈ܡܳܬܳܐ ܕܡܰܬܺܝܬܳܐ ܕܰܢܡܽܘܬ ܘܶܐܡܰܪ ܠܰܐܒܢܰܘ̈ܗܝ: ܗܳܫܳܐ ܐܶܫܬܰܪܰܬ ܫܰܒܗܪܳܢܽܘܬܳܐ ܘܡܰܟܣܳܢܽܘܬܳܐ: ܘܙܰܒܢܳܐ ܕܣܽܘܚܳܦܳܐ ܘܚܶܡܬܳܐ ܕܪܽܘܓܙܳܐ.
50 ܗܳܫܳܐ ܒܢܰܝ̈: ܛܰܢܘ ܒܢܳܡܽܘܣܳܐ: ܘܗܰܒܘ ܢܰܦ̈ܫܳܬܟܽܘܢ ܥܰܠ ܐܰܦܰܝ̈ ܕܺܝܰܬܺܝܩܺܝ ܕܰܐܒܳܗܰܝ̈ܢ.
51 ܕܰܥܒܰܕܘ ܒܕܳܖ̈ܰܝܗܽܘܢ. ܘܩܰܒܶܠܘ ܬܶܫܒܽܘܚܬܳܐ ܪܰܒܬܳܐ ܘܰܫܠܳܡܳܐ ܕܰܠܥܳܠܰܡ.
52 ܐܰܒܪܳܗܳܡ ܠܳܐ ܗܘܳܐ ܒܢܶܣܝܽܘܢܳܐ ܣܶܫܬܟܰܚ ܡܗܰܝܡܰܢ: ܘܶܐܬܚܰܫܒܰܬ ܠܶܗ ܠܙܰܕܺܝܩܽܘܬܳܐ.
53 ܘܝܰܘܣܶܦ ܒܙܰܒܢܳܐ ܕܽܐܘܠܨܳܢܶܗ ܢܛܰܪ ܢܳܡܽܘܣܳܐ: ܘܰܗܘܳܐ ܡܳܪܳܐ ܕܡܶܨܪܶܝܢ.
54 ܦܺܝܢܚܶܣ ܐܰܒܽܘܢ ܒܰܛܢܳܢܳܐ ܕܛܰܢ ܢܣܰܒ ܕܺܝܰܬܺܝܩܺܝ ܕܟܳܗܢܽܘܬܳܐ ܕܰܠܥܳܠܰܡ.
55 ܘܝܶܫܽܘܥ. ܒܰܕܫܰܡܠܺܝ ܡܶܠܬܳܐ ܗܘܳܐ ܕܰܝܳܢܳܐ ܥܰܠ ܝܺܣܪܳܐܶܝܠ.
56 ܘܟܳܠܳܒ. ܒܕܰܐܣܗܶܕ ܥܰܠ ܟܢܽܘܫܬܳܐ ܢܣܰܒ ܐܰܪܥܳܐ ܕܝܽܘܪܬܳܢܳܐ.
57 ܕܰܘܺܝܕ ܒܰܡܪܰܚܡܳܢܽܘܬܶܗ ܝܺܪܶܬ ܬܪܽܘܢܳܘܣ ܕܡܰܠܟܽܘܬܳܐ ܕܰܠܥܳܠܰܡ ܥܳܠܡܺܝܢ.
58 ܘܺܐܠܺܝܳܐ ܒܰܕܛܰܢ ܛܢܳܢܶܗ ܕܢܳܡܽܘܣܳܐ ܐܶܬܥܰܠܺܝ ܠܰܫܡܰܝܳܐ.
59 ܘܚܰܢܰܢܝܳܐ ܘܥܰܙܰܪܝܳܐ ܘܡܺܝܫܰܐܶܝܠ ܕܗܰܝܡܶܢܘ ܐܶܬܦܰܨܺܝܘ ܡܶܢ ܫܰܠܗܶܒܺܝܬܳܐ ܕܢܽܘܪܳܐ.
60 ܘܕܳܢܺܝܐܶܝܠ ܒܰܦܫܺܝܛܽܘܬܶܗ ܐܶܬܦܰܨܺܝ ܡܶܢ ܦܽܘܡܳܐ ܕܰܐܪ̈ܝܰܘܳܬܳܐ.
61 ܘܗܳܟܰܢܳܐ ܐܶܬܚܰܫܰܒܘ ܕܰܒܟܽܠ ܕܳܪ ܘܕܳܪ: ܟܽܠ ܐܰܝܠܶܝܢ ܕܣܰܒܰܪܘ ܒܶܗ: ܠܳܐ ܐܶܫܬܰܦܰܠܘ ܘܠܳܐ ܐܶܬܟܪܰܗܘ.
62 ܡܶܢ ܡܶܠܰܘ̈ܗܝ ܕܓܰܒܪܳܐ ܥܰܘܳܠܳܐ ܠܳܐ ܬܶܕܚܠܽܘܢ. ܡܶܛܽܠ ܕܬܶܫܒܽܘܚܬܶܗ ܠܙܶܒܠܳܐ ܘܰܠܬܰܘܠܥܳܐ ܗܳܘܝܳܐ.
63 ܝܰܘܡܳܢܳܐ ܡܶܬܬܪܺܝܡ ܘܠܰܡܚܰܪ ܠܳܐ ܐܺܝܬܰܘܗܝ. ܡܶܛܽܠ ܕܗܳܦܶܟ ܠܶܗ ܠܥܰܦܪܶܗ. ܘܡܰܚܫܰܒܬܶܗ ܐܳܒܕܳܐ.
64 ܘܰܐܢ̱ܬܽܘܢ ܒܢܰܝ̈: ܐܶܬܚܰܝܰܠܘ ܘܶܐܬܥܰܫܰܢܘ ܒܢܳܡܽܘܣܳܐ. ܡܶܛܽܠ ܕܒܶܗ ܬܶܫܬܰܒܚܽܘܢ.
65 ܘܗܳܐ ܫܶܡܥܽܘܢ ܐܰܚܽܘܟܽܘܢ: ܝܳܕܰܥ ܐ̱ܢܳܐ ܕܓܰܒܪܰܐ ܗ̱ܘ ܕܡܶܠܟܳܐ ܘܰܕܬܰܪܥܺܝܬܳܐ. ܠܶܗ ܗܘܰܝܬܽܘܢ ܡܶܫܬܰܡܥܺܝܢ ܟܽܠܗܽܘܢ ܝܰܘ̈ܡܳܬܟܽܘܢ. ܘܗܽܘ ܢܶܗܘܶܐ ܠܟܽܘܢ ܪܺܝܫܳܐ ܘܰܡܕܰܒܪܳܢܳܐ.
66 ܘܺܝܗܽܘܕܳܐ ܡܰܩܒܰܝ: ܥܰܫܺܝܢ ܚܰܝܠܳܐ ܡܶܢ ܛܰܠܝܽܘܬܶܗ. ܗܽܘ ܢܶܗܘܶܐ ܠܟܽܘܢ ܪܺܝܫܳܐ ܘܰܡܕܰܒܪܳܢܳܐ ܕܰܩܪ̈ܳܒܶܐ. ܘܗܽܘ ܢܰܩܪܶܒ ܩܪܳܒܳܐ ܥܰܡ ܥܰܡ̈ܡܶܐ.
67 ܘܰܐܢ̱ܬܽܘܢ ܩܰܪܶܒܘ ܠܘܳܬܟܽܘܢ ܠܟܽܠܗܽܘܢ ܥܳܒܽܘܕܰܘ̈ܗܝ ܕܢܳܡܽܘܣܳܐ. ܘܰܬܒܰܥܘ ܬܒܰܥܬܶܗ ܕܥܰܡܟܽܘܢ.
68 ܘܰܦܪܽܘܥܘ ܦܽܘܪܥܳܢܳܐ ܠܥܰܡ̈ܡܶܐ. ܘܚܽܘܪܘ ܒܦܽܘܩܕܳܢܰܘ̈ܗܝ ܕܢܳܡܽܘܣܳܐ.
69 ܘܒܰܪܶܟ ܐܶܢܽܘܢ ܘܶܐܬܟܰܢܰܫ ܠܘܳܬ ܐܰܒܳܗܰܘ̈ܗܝ.
70 ܘܡܺܝܬ ܡܰܬܺܝܬܳܐ: ܒܰܫܢܰܬ ܡܳܐܐ ܘܰܐܪܒܥܺܝܢ ܘܰܬܡܳܢܶܐ ܕܡܰܠܟܽܘܬܳܐ: ܘܩܰܒܪܽܘܗܝ ܒܢܰܘ̈ܗܝ ܒܩܰܒܪܳܐ ܕܰܐܒܳܗܰܘ̈ܗܝ ܒܡܽܘܪܥܺܝܡ. ܘܶܐܬܶܐܒܶܠܘ ܥܠܰܘܗܝ ܟܽܠܶܗ ܝܺܣܪܳܐܶܝܠ ܐܶܒܠܳܐ ܪܰܒܳܐ.