1 Maccabees 3
The First Book of Maccabees
܀ ܐ ܡܩܒܝ̈ܐ ܓ ܀
1 ܘܩܳܡ ܚܠܳܦܰܘܗܝ ܒܪܶܗ ܝܺܗܽܘܕܳܐ ܘܡܰܩܒܰܝ.
2 ܘܰܡܥܰܕܪܺܝܢ ܗܘܰܘ ܠܶܗ ܟܽܠܗܽܘܢ ܐܰܚܰܘ̈ܗܝ: ܘܟܽܠܗܽܘܢ ܐܰܝܠܶܝܢ ܕܢܰܩܺܝܦܺܝܢ ܗܘܰܘ ܠܰܐܒܽܘܗܝ ܘܡܰܩܪܒܺܝܢ ܗܘܰܘ ܩܪ̈ܳܒܰܘܗܝ ܕܺܝܣܪܳܐܶܝܠ ܒܒܽܘܣܳܡܳܐ ܘܰܒܚܰܕܽܘܬܳܐ.
3 ܘܰܐܘܪܶܒ ܘܰܐܣܓܺܝ ܝܺܗܽܘܕܳܐ ܬܶܫܒܽܘܚܬܳܐ ܠܥܰܡܶܗ. ܘܰܠܒܶܫ ܫܶܪܝܳܢܳܐ ܐܰܝܟ ܓܰܢܒܳܪܳܐ. ܘܶܐܬܚܰܙܰܩ ܒܡܳܐܢܰܝ̈ ܩܪܳܒܶܗ. ܘܰܥܒܰܕ ܩܪ̈ܳܒܶܐ ܘܟܰܣܺܝ ܡܰܫܪ̈ܳܝܳܬܳܐ ܒܪܽܘܡܚܶܗ.
4 ܘܶܐܬܕܰܡܺܝ ܠܰܐܪܝܳܐ ܒܰܥܒܳܕܰܘ̈ܗܝ. ܘܰܐܝܟ ܓܺܘܪܳܐ ܕܰܐܪܝܳܐ ܕܢܳܗܶܡ ܠܰܬܒܳܪܳܐ.
5 ܘܰܕܪܰܦ ܠܥܰܘ̈ܳܠܶܐ ܒܰܒܛܺܝܠܽܘܬܳܐ. ܘܠܰܐܝܠܶܝܢ ܕܫܳܚܩܺܝܢ ܠܥܰܡܶܗ ܐܰܘܩܶܕ ܒܫܰܠܗܶܒܺܝܬܳܐ.
6 ܘܰܥܪܰܩܘ ܘܶܐܬܪܗܶܒܘ ܥܰܘ̈ܳܠܶܐ ܡܶܢ ܕܶܚܠܬܶܗ. ܘܟܽܠܗܽܘܢ ܦܳܠܚܰܝ̈ ܥܰܘܠܳܐ ܐܶܬܬܙܺܝܥܘ. ܘܶܐܬܺܝܗܶܒܘ ܦܽܩܘܪܩܳܢܳܐ ܒܺܐܝܕܰܘ̈ܗܝ.
7 ܘܡܰܪܡܰܪ ܘܰܐܙܥܶܩ ܠܡܰܠܟ̈ܶܐ ܣܰܓܺܝ̈ܐܶܐ. ܘܚܰܕܺܝ ܘܒܰܣܶܡ ܠܺܝܣܪܳܐܶܝܠ ܒܰܥܒܳܕܰܘ̈ܗܝ. ܘܰܥܕܰܡܳܐ ܠܥܳܠܰܡ ܢܶܗܘܶܐ ܕܽܘܟܪܳܢܶܗ ܠܒܽܘܪܟܬܳܐ.
8 ܘܗܰܠܶܟ ܒܰܡܕܺܝ̈ܢܳܬܳܐ ܕܺܝܗܽܘܕܳܐ: ܘܰܐܘܒܶܕ ܖ̈ܰܫܺܝܥܶܐ ܡܶܢܗܶܝܢ. ܘܰܐܗܦܶܟ ܪܽܘܓܙܳܐ ܡܶܢ ܝܺܣܪܳܐܶܝܠ.
9 ܘܶܐܫܬܰܡܰܗ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ. ܘܟܰܢܶܫ ܡܒܰܕܖ̈ܶܐ.
10 ܘܟܰܢܶܫ ܐܰܦܠܳܘܢܝܳܘܣ ܥܰܡ̈ܡܶܐ: ܡܶܢ ܫܳܡܪܺܝܢ ܚܰܝܠܳܐ ܣܰܓܺܝܐܳܐ: ܕܢܰܩܪܶܒ ܥܰܡ ܝܺܣܪܳܐܶܝܠ.
11 ܘܺܝܕܰܥ ܝܺܗܽܘܕܳܐ ܘܰܢܦܰܩ ܠܩܽܘܒܠܗܽܘܢ: ܘܰܐܡܚܳܝܗܝ ܘܰܐܪܡܝܶܗ. ܘܰܢܦܰܠܘ ܡܶܢܗܽܘܢ ܩܛܺܝ̈ܠܶܐ ܣܰܓܺܝ̈ܐܶܐ. ܘܫܰܪܟܗܽܘܢ ܥܪܰܩܘ.
12 ܘܰܢܣܰܒ ܒܶܙܬܗܽܘܢ. ܘܳܐܦ ܣܰܝܦܶܗ ܕܰܐܦܳܠܳܘܢܺܝܳܘܣ ܢܣܰܒ ܝܺܗܽܘܕܳܐ. ܘܒܶܗ ܡܰܩܪܶܒ ܗܘܳܐ ܟܽܠܗܽܘܢ ܝܰܘ̈ܡܳܬܳܐ.
13 ܘܰܫܡܰܥ ܗܺܝܪܳܢ ܪܺܝܫܳܐ ܕܚܰܝ̈ܠܰܘܳܬܳܐ ܕܣܽܘܪܺܝܰܐ: ܕܟܰܢܶܫ ܝܺܗܽܘܕܳܐ ܟܢܽܘܫܬܳܐ ܕܰܡܗܰܝܡ̈ܢܶܐ ܠܘܳܬܶܗ ܕܢܳܦܩܺܝܢ ܠܰܩܪܳܒܳܐ.
14 ܘܶܐܡܰܪ ܕܶܐܥܒܶܕ ܠܺܝ ܫܡܳܐ: ܘܶܐܫܬܰܒܰܚ ܒܡܰܠܟ̈ܘܳܬܳܐ. ܘܰܐܩܪܶܒ ܥܰܡ ܝܺܗܽܘܕܳܐ ܘܥܰܡ ܐܰܝܠܶܝܢ ܕܥܰܡܶܗ ܗܳܠܶܝܢ ܕܡܰܣܠܶܝܢ ܡܶܠܬܶܗ ܕܡܰܠܟܳܐ.
15 ܘܰܐܘܣܶܦ ܠܡܶܣܰܩ. ܘܣܶܠܩܰܬ ܥܰܡܶܗ ܡܰܫܪܺܝܬܳܐ ܪܰܒܬܳܐ ܘܥܰܫܺܝܢܬܳܐ ܕܪ̈ܫܺܝܥܶܐ ܠܥܽܘܕܪܳܢܶܗ: ܠܡܶܥܒܰܕ ܦܽܘܪܥܳܢܳܐ ܒܰܒܢܰܝ̈ ܝܺܣܪܳܐܶܝܠ.
16 ܘܡܰܛܺܝ ܥܕܰܡܳܐ ܠܡܰܣܰܩܬܳܐ ܕܒܶܝܬ ܚܰܘܪܳܢ. ܘܰܢܦܰܩ ܝܺܗܺܘܕܳܐ ܠܽܐܘܪܥܶܗ ܒܐ̱ܢܫ̈ܳܐ ܙܥܽܘܖ̈ܶܐ.
17 ܟܰܕ ܕܶܝܢ ܚܙܰܘ ܗܳܠܶܝܢ ܕܥܰܡ ܝܺܗܽܘܕܳܐ: ܠܡܰܫܪܺܝܬܳܐ ܕܳܐܬܝܳܐ ܠܽܘܩܒܰܠܗܽܘܢ ܐܶܡܰܪܘ ܠܺܝܗܽܘܕܳܐ. ܐܰܝܟܰܢܳܐ ܡܶܫܟܚܺܝܢܰܢ ܕܟܰܕ ܙܥܽܘܖ̈ܶܐ ܚܢܰܢ: ܢܰܩܪܶܒ ܥܰܡ ܗܳܢܳܐ ܟܽܠܶܗ ܚܰܝܠܳܐ ܥܰܫܺܝܢܳܐ. ܘܰܚܢܰܢ ܗܳܐ ܥܰܝܺܝܦܺܝܢܰܢ. ܕܠܳܐ ܠܥܺܝܣ ܠܰܢ ܝܰܘܡܳܢܳܐ.
18 ܘܶܐܡܰܪ ܝܺܗܽܘܕܳܐ ܦܫܺܝܩܳܐ ܗ̱ܝ ܗܳܕܳܐ ܕܢܶܫܬܰܠܡܽܘܢ ܣܰܓܺܝ̈ܐܶܐ ܒܺܐܝܕܳܐ ܕܰܙܥܽܘܖ̈ܶܐ. ܘܠܰܝܬ ܟܠܳܝܬܳܐ ܩܕܳܡ ܥܳܡܽܘܪܳܐ ܕܰܫܡܰܝܳܐ. ܠܡܶܦܪܰܩ ܒܣܰܓܺܝ̈ܐܶܐ ܐܰܘ ܒܰܙܥܽܘܖ̈ܶܐ.
19 ܡܶܛܽܠ ܕܠܳܐ ܗܘܳܐ ܒܚܰܝܠܳܐ ܣܰܓܺܝܳܐܐ ܗܳܘܝܳܐ ܙܳܟܽܘܬܳܐ ܕܰܩܪܳܒܳܐ: ܐܶܠܳܐ ܡܶܢ ܫܡܰܝܳܐ ܗܽܘ ܡܶܬܺܝܗܶܒ ܚܰܝܠܳܐ.
20 ܗܶܢܽܘܢ ܐܳܬܶܝܢ ܥܠܰܝܢ ܒܣܽܘܓܳܐܐ ܕܚܰܝܠܳܐ ܕܥܰܘܠܳܐ ܘܰܕܥܰܨܪܳܐ: ܕܰܢܪܺܝܡܽܘܢ ܘܢܰܛܥܽܘܢ ܠܰܢ ܘܰܠܢܶܫܰܝ̈ܢ ܘܠܰܒܢܰܝ̈ܢ ܘܢܶܫܒܽܘܢܳܢ.
21 ܘܰܚܢܰܢ ܕܶܝܢ ܡܰܩܪܒܺܝܢܰܢ ܥܰܠ ܐܰܦܰܝ̈ ܢܰܦ̈ܫܳܬܰܢ ܘܢܳܡܽܘܣܰܝ̈ܢ.
22 ܘܡܳܪܝܳܐ ܢܶܫܚܽܘܩ ܐܶܢܽܘܢ ܩܕܳܡܰܝܢ. ܘܰܐܢ̱ܬܽܘܢ ܠܳܐ ܬܶܕܚܠܽܘܢ ܡܶܢܗܽܘܢ.
23 ܘܟܰܕ ܫܠܺܝ ܕܶܝܢ ܝܺܗܽܘܕܳܐ ܡܶܢ ܕܰܡܡܰܠܶܠ: ܫܘܰܪ ܢܦܰܠ ܒܗܽܘܢ ܡܶܢ ܫܶܠܝܳܐ. ܘܰܢܦܰܠ ܗܺܝܪܳܘܢ ܘܡܰܫܪ̈ܝܳܬܶܗ ܩܕܳܡܰܘܗܝ.
24 ܘܪܳܕܦܺܝܢ ܗܘܰܘ ܠܶܗ ܕܒܶܝܬ ܝܺܗܽܘܕܳܐ ܒܡܰܚܰܬܬܳܐ ܕܒܶܝܬ ܚܰܘܪܳܢ ܥܕܰܡܳܐ ܠܰܦܩܰܥܬܳܐ. ܘܰܢܦܰܠܘ ܡܶܢܗܽܘܢ ܐܰܝܟ ܬܡܳܢܶܡܳܐܐ ܓܰܒܪ̈ܺܝܢ. ܘܫܰܪܟܗܽܘܢ ܥܪܰܩܘ ܠܰܐܪܥܳܐ ܕܰܦܠܶܫܬܳܝ̈ܶܐ.
25 ܘܫܰܪܝܰܬ ܕܶܚܠܬܶܗ ܕܺܝܗܽܘܕܳܐ ܘܕܰܐܚܰܘ̈ܗܝ ܘܙܰܘܥܬܗܽܘܢ ܢܳܦܠܳܐ ܥܰܠ ܟܽܠܗܽܘܢ ܥܰܡ̈ܡܶܐ ܕܰܚܕܳܖ̈ܰܝܗܽܘܢ.
26 ܘܡܰܛܺܝ ܫܡܶܗ ܥܕܰܡܳܐ ܠܡܰܠܟܳܐ. ܘܥܰܠ ܣܽܘܥܪ̈ܳܢܰܘܗܝ ܕܺܝܗܽܘܕܳܐ ܡܬܰܢܶܝܢ ܗܘܰܘ ܟܽܠܗܽܘܢ ܥܰܡ̈ܡܶܐ.
27 ܟܰܕ ܫܡܰܥ ܕܶܝܢ ܐܰܢܛܝܰܟܳܘܣ ܗܳܠܶܝܢ ܡ̈ܶܠܶܐ: ܐܶܬܚܰܡܰܬ ܒܪܽܘܓܙܳܐ. ܘܫܰܕܰܪ ܟܰܢܶܫ ܠܟܽܠܶܗ ܚܰܝܠܳܐ ܕܡܰܠܟܽܘܬܶܗ: ܡܰܫܪܺܝܬܳܐ ܪܰܒܬܳܐ ܥܰܫܺܝܢܬܳܐ.
28 ܘܰܦܬܰܚ ܒܶܝܬ ܓܰܙܰܘ̈ܗܝ. ܘܝܰܗܒ ܡܰܘ̈ܗܒܳܬܳܐ ܠܚܰܝ̈ܠܰܘܗܝ ܠܰܚܕܳܐ ܫܰܢܬܳܐ. ܘܰܦܩܰܕ ܠܗܽܘܢ ܕܢܶܗܘܽܘܢ ܥܬܺܝܕܺܝܢ ܘܰܡܛܰܝܒܺܝܢ ܠܟܽܠ ܨܒܽܘ.
29 ܘܰܚܙܳܐ ܕܶܐܬܒܰܨܰܪ ܠܶܗ ܟܶܣܦܳܐ ܡܶܢ ܒܶܝܬ ܓܰܙܰܘ̈ܗܝ: ܘܰܫܩܳܠܶܝ̈ܗ̇ ܕܰܐܪܥܳܐ ܙܥܽܘܪܺܝܢ: ܡܶܛܽܠ ܦܳܠܓܽܘܬܳܐ ܘܰܡܚܽܘܬܳܐ ܕܰܥܒܰܕ ܒܰܐܪܥܳܐ: ܕܰܨܒܳܐ ܕܰܢܪܺܝܡ ܢܳܡܽܘܣܳܐ ܕܰܐܒܳܗܰܝ̈ܗܽܘܢ ܕܡܶܢ ܩܕܺܝܡ.
30 ܘܰܕܚܶܠ ܕܰܠܡܳܐ ܠܳܐ ܢܶܫܬܟܰܚ ܠܶܗ ܠܡܶܬܰܠ ܙܒܰܢܬܳܐ ܕܬܰܪܬܶܝܢ. ܡܶܛܽܠ ܕܡܰܣܓܶܐ ܗܘܳܐ ܓܶܝܪ ܠܡܶܬܰܠ ܒܺܐܝܕܳܐ ܪܰܒܬܳܐ: ܝܰܬܺܝܪ ܡܶܢ ܡܰܠܟ̈ܶܐ ܕܡܶܢ ܩܕܳܡܰܘܗܝ.
31 ܒܢܰܦܫܶܗ ܕܶܝܢ ܣܰܓܺܝ ܡܶܬܬܥܺܝܩ ܗܘܳܐ. ܘܶܐܬܚܰܫܰܒ ܐܰܢܛܝܰܟܳܘܣ ܕܢܺܐܙܰܠ ܠܳܦܪܶܣ: ܘܰܕܢܶܣܰܒ ܫܩܳܠܶܝ̈ܗ̇ ܕܰܐܪܥܳܐ: ܘܠܰܡܟܰܢܳܫܽܘ ܟܶܣܦܳܐ ܣܰܓܺܝܐܳܐ.
32 ܘܰܫܒܰܩ ܠܠܽܘܣܺܝܳܐ ܓܰܒܪܳܐ ܡܫܰܒܚܳܐ: ܕܡܶܢ ܓܶܢܣܳܐ ܗܘܳܐ ܕܡܰܠܟܽܘܬܳܐ: ܥܰܠ ܥܒܺܝ̈ܕܳܬܶܗ ܕܡܰܠܟܳܐ: ܡܶܢ ܢܰܗܪܳܐ ܦܪܳܬ: ܘܰܥܕܰܡܳܐ ܠܰܬܚܽܘܡܳܗ̇ ܕܡܶܨܪܶܝܢ.
33 ܘܠܰܡܪܰܒܳܝܽܘ ܠܰܒܪܶܗ ܕܰܢܛܺܝܰܟܳܘܣ: ܥܕܰܡܳܐ ܕܢܶܗܦܽܘܟ ܘܢܺܐܬܶܐ.
34 ܘܰܐܫܠܶܡ ܠܶܗ ܦܺܝ̈ܠܶܐ ܘܦܶܠܓܶܗ ܕܚܰܝܠܶܗ. ܘܦܰܩܕܶܗ ܥܰܠ ܟܽܠܡܶܕܶܡ ܕܨܳܒܶܐ ܗܘܳܐ ܘܥܰܠ ܥܳܡܽܘܪ̈ܶܝܗ̇ ܕܺܝܗܽܘܕܳܐ ܘܕܽܐܘܪܺܫܠܶܡ.
35 ܠܰܡܫܰܕܳܪܽܘ ܥܠܰܝܗܽܘܢ ܚܰܝܠܳܐ: ܘܰܠܡܶܥܛܳܐ ܘܠܰܡܓܰܡܳܪܽܘ ܚܰܝܠܶܗ ܕܺܝܣܪܳܐܶܝܠ: ܘܰܠܡܰܘܒܳܕܽܘ ܫܰܪܟܳܗ̇ ܕܽܐܘܪܺܫܠܶܡ: ܘܠܰܡܪܳܡܽܘ ܕܽܘܟܪܳܢܗܽܘܢ ܡܶܢ ܐܰܬܪܳܐ.
36 ܘܰܠܡܰܘܬܳܒܽܘ ܒܢܰܝ̈ ܢܽܘܟܪ̈ܳܝܶܐ ܒܟܽܠ ܬܚܽܘܡܰܝ̈ܗܽܘܢ: ܘܰܠܡܰܘܪܳܬܽܘ ܐܰܪܥܗܽܘܢ.
37 ܘܡܰܠܟܳܐ ܕܒܰܪ ܦܶܠܓܶܗ ܕܚܰܝܠܳܐ ܗܰܘ ܕܶܐܫܬܚܰܪ: ܘܰܫܩܰܠ ܡܶܢ ܐܰܢܛܝܳܟܺܝܰܐ ܡܕܺܝܢܬܳܐ ܕܡܰܠܟܽܘܬܶܗ. ܒܰܫܢܰܬ ܡܳܐܐ ܘܰܐܪܒܥܺܝܢ ܘܰܫܒܰܥ. ܘܰܥܒܰܪ ܠܢܰܗܪܳܐ ܦܪܳܬ: ܘܰܡܗܰܠܶܟ ܗܘܳܐ ܒܰܐܪ̈ܥܳܬܳܐ ܥܶܠܳܝ̈ܳܬܳܐ.
38 ܘܰܓܒܳܐ ܠܽܘܣܺܝܳܐ ܠܰܦܛܽܘܠܡܶܐܳܘܣ ܒܶܪܗ ܕܕܰܘܪܡܺܝܳܘܣ: ܘܰܠܢܺܝܩܳܢܳܘܪ ܘܰܠܓܽܘܪܓܳܝܳܐ: ܐ̱ܢܳܫ̈ܳܐ ܚܰܝܠܬܳܢ̈ܶܐ ܡܶܢ ܪ̈ܳܚܡܰܘܗܝ ܕܡܰܠܟܳܐ.
39 ܘܫܰܕܰܪ ܥܰܡܗܽܘܢ ܐܰܪܒܺܝܢ ܐܰܠܦܺܝ̈ܢ ܪ̈ܶܓܠܳܝܶܐ: ܘܫܰܒܥܳܐ ܐܰܠܦܺܝ̈ܢ ܦܰܪ̈ܳܫܶܐ: ܠܡܺܐܙܰܠ ܠܰܐܪܥܳܐ ܕܺܝܗܽܘܕܳܐ: ܠܰܡܚܰܒܳܠܽܘܬܳܗ̇ ܐܰܝܟ ܡܶܠܬܶܗ ܕܡܰܠܟܳܐ.
40 ܘܰܫܩܰܠܘ ܕܒܶܝܬ ܦܛܽܘܠܡܶܐܳܘܣ ܥܰܡ ܟܽܠܶܗ ܚܰܝܠܗܽܘܢ: ܘܶܐܬܰܘ ܘܰܫܪܰܘ ܥܰܠ ܓܢܶܒ ܥܰܡܐܽܘܣ ܒܰܐܪܥܳܐ ܕܰܦܩܰܥܬܳܐ.
41 ܘܰܫܡܰܥܘ ܬܰܓܳܖ̈ܶܐ ܕܰܐܪܥܳܐ ܫܶܡܥܗܽܘܢ. ܘܰܢܣܰܒܘ ܟܶܣܦܳܐ ܘܕܰܗܒܳܐ ܣܰܓܺܝܐܳܐ: ܘܩܰܘ̈ܕܶܐ ܘܣܽܘ̈ܛܡܶܐ: ܘܶܐܬܰܘ ܠܰܡܫܪܺܝܬܳܐ ܠܡܶܣܰܒ ܠܰܒܢܰܝ̈ ܝܺܣܪܳܐܶܝܠ ܠܥܰܒܕ̈ܶܐ. ܘܶܐܬܬܰܘܣܰܦ ܥܠܰܝܗܽܘܢ ܚܰܝܠܳܐ ܕܣܽܘܪܺܝܰܐ ܘܥܰܡܳܐ ܕܰܦܠܶܫܬܳܝ̈ܶܐ.
42 ܘܰܚܙܳܐ ܝܺܗܽܘܕܳܐ ܘܰܐܚܰܘ̈ܗܝ ܕܰܣܓܺܝ ܒܺܝ̈ܫܳܬܳܐ: ܘܚܰܝܠܳܐ ܟܪܺܝܟ ܠܰܬܚܽܘܡܰܝ̈ܗܽܘܢ. ܘܺܝܠܶܦܘ ܐܳܦ ܡܶܠܰܘ̈ܗܝ ܕܡܰܠܟܳܐ: ܗܳܠܶܝܢ ܕܰܦܩܰܕ ܡܶܛܽܠ ܥܰܡܳܐ ܕܢܰܘܒܕܽܘܢ ܘܢܶܥܛܽܘܢܳܝܗܝ.
43 ܘܶܐܡܰܪ ܓܒܰܪ ܠܩܰܪܺܝܒܶܗ. ܢܩܺܝܡ ܣܽܘܚܦܶܗ ܕܥܰܡܰܢ. ܘܢܰܩܪܶܒ ܥܰܠ ܐܰܦܰܝ̈ ܥܰܡܰܢ ܘܩܽܘܕܫܰܢ.
44 ܘܶܐܬܟܰܢܰܫܘ ܟܢܽܘܫܬܗܽܘܢ ܕܰܗܘܳܬ ܡܛܰܝܒܳܐ ܠܰܩܪܳܒܳܐ: ܘܠܰܡܨܰܠܳܝܽܘ ܘܰܠܡܶܫܐܰܠ ܖ̈ܰܚܡܶܐ ܘܰܚܢܳܢܳܐ.
45 ܐܽܘܕܺܫܠܶܡ ܕܶܝܢ ܐܺܝܬܺܝܗ̇ ܗܘܳܬ ܚܰܪܒܬܳܐ ܕܠܳܐ ܝܰܬܒܳܐ. ܘܠܰܝܬ ܕܥܳܐܶܠ ܘܢܳܦܶܩ ܒܳܗ̇ ܡܶܢ ܝܰܠ̈ܕܶܝܗ̇. ܘܒܶܝܬ ܡܰܩܕܫܳܗ̇ ܡܶܬܬܕܺܝܫ ܗܘܳܐ. ܘܰܒܢܰܝ̈ ܢܽܘܟܪ̈ܳܝܶܐ ܝܳܬܒܺܝܢ ܗܘܰܘ ܒܶܝܬ ܡܶܪܕܳܗ̇. ܘܰܗܘܳܬ ܒܶܝܬ ܡܰܫܪܝܳܐ ܠܥܰܡ̈ܡܶܐ. ܘܶܐܫܬܰܩܠܰܬ ܚܰܕܽܘܬܳܐ ܡܶܢ ܝܰܥܩܽܘܒ. ܘܰܓܡܰܪܘ ܡܶܢܳܗ̇ ܩܺܝܬܳܖ̈ܶܐ ܘܟܶܢܳܖ̈ܶܐ.
46 ܘܶܐܬܰܟܰܫܘ ܘܥ̣ܰܠܘ ܠܡܰܨܦܝܳܐ ܠܽܘܩܒܰܠ ܐܽܘܪܺܫܠܶܡ. ܡܶܛܽܠ ܕܒܶܝܬ ܨܠܽܘܬܳܐ ܗܘܳܬ ܡܶܢ ܩܕܺܝܡ ܡܰܨܦܝܳܐ ܠܺܝܣܪܳܐܶܝܠ.
47 ܘܨܳܡܘ ܒܗܰܘ ܝܰܘܡܳܐ ܘܶܐܬܟܰܣܺܝܘ ܣܰܩ̈ܶܐ. ܘܰܐܪܡܺܝܘ ܥܰܦܪܳܐ ܥܰܠ ܪ̈ܺܝܫܰܝܗܽܘܢ. ܘܣܰܕܶܩܘ ܡܳܐܢܰܝ̈ܗܽܘܢ.
48 ܘܰܦܪܰܣܘ ܟܶܪܟܶܗ ܕܢܳܡܽܘܣܳܐ. ܘܩܳܒܠܺܝܢ ܗܘܰܘ ܩܕܳܡ ܩܰܕܺܝܫܳܐ ܥܰܠ ܥܰܡ̈ܡܶܐ ܕܳܐܠܨܺܝܢ ܗܘܰܘ ܠܗܽܘܢ: ܕܢܶܬܕܰܒܪܽܘܢ ܒܰܕܡܽܘܬܗܽܘܢ.
49 ܘܰܐܝܬܺܝܘ ܡܳܐܢܰܝ̈ ܟܳܗܢܽܘܬܳܐ ܘܪܺܝܫ ܥܰܠ̈ܠܳܬܳܐ ܘܡܰܥܣܳܖ̈ܶܐ. ܘܰܐܩܺܝܡܘ ܠܰܢܙܺܝܖ̈ܶܐ ܗܳܢܽܘܢ ܕܡܰܠܺܝܘ ܝܰܘ̈ܡܳܬܳܐ ܕܰܢܙܺܝܪܽܘܬܗܽܘܢ.
50 ܘܰܓܥܰܘ ܠܘܳܬ ܥܳܒܽܘܕܳܐ ܕܰܫܡܰܝܳܐ ܘܶܐܡܰܪܘ. ܡܳܢܳܐ ܢܶܥܒܶܕ ܠܗܽܘܢ ܠܗܳܠܶܝܢ. ܐܰܘ ܠܰܐܝܟܳܐ ܢܰܘܒܶܠ ܐܶܢܽܘܢ.
51 ܘܗܳܐ ܒܶܝܬ ܡܰܩܕܫܳܟ ܡܶܬܬܕܺܝܫ ܘܡܶܣܬܰܝܰܒ. ܘܟܳܗܢܰܝ̈ܟ ܒܶܐܒܠܳܐ ܘܰܒܡܽܘܟܳܟܳܐ ܐܺܝܬܰܝܗܽܘܢ.
52 ܘܗܳܐ ܥܰܡ̈ܡܶܐ ܐܶܬܟܰܢܰܫܘ ܥܠܰܝܢ ܕܰܢܪܺܝܡܽܘܢܳܢ. ܐܰܢ̱ܬ ܝܳܕܰܥ ܐܰܢ̱ܬ ܡܶܕܶܡ ܕܡܶܬܚܰܫܒܺܝܢ ܥܠܰܝܢ.
53 ܐܰܝܟܰܢܳܐ ܡܶܫܟܚܺܝܢܰܢ ܕܰܢܩܽܘܡ ܠܽܘܩܒܰܠܗܽܘܢ: ܐܶܢܗܽܘ ܕܰܐܢ̱ܬ ܠܳܐ ܡܥܰܕܰܪ ܐܰܢ̱ܬ ܠܰܢ.
54 ܘܰܩܪܰܘ ܒܩܰܪ̈ܢܳܬܳܐ. ܘܰܓܥܰܘ ܒܩܳܠܳܐ ܪܳܡܳܐ.
55 ܘܡܶܢ ܒܳܬܰܪ ܗܳܠܶܝܢ: ܐܰܩܺܝܡ ܝܺܗܽܘܕܳܐ ܡܕܰܒܪܳܢܳܐ ܠܥܰܡܳܐ: ܖ̈ܰܒܰܝ ܐܰܠܦ̈ܶܐ ܘܖ̈ܰܒܰܝ ܡܰܐܘ̈ܳܬܳܐ ܘܖ̈ܰܒܰܝ ܚܰܡܫܺܝܢ.
56 ܘܶܐܡܰܪ ܠܰܐܝܠܶܝܢ ܕܰܒܢܶܝܢ ܠܗܽܘܢ ܒ̈ܳܬܶܐ ܘܰܡܟܺܝܪ̈ܳܢ ܠܗܽܘܢ ܢܶܫ̈ܶܐ ܘܰܢܨܺܝܒܺܝܢ ܠܗܽܘܢ ܟܰܪ̈ܡܶܐ: ܘܰܠܕܰܚܽܘܠܬܳܢ̈ܶܐ: ܕܢܶܗܦܟܽܘܢ ܐ̱ܢܳܫ ܠܒܰܝܬܶܗ ܐܰܝܟ ܕܶܐܡܰܪ ܢܳܡܽܘܣܳܐ.
57 ܘܫܶܩܠܶܬ ܡܰܫܪܺܝܬܳܐ: ܘܰܫܪܳܬ ܡܶܢ ܬܝܰܡܢܳܝܳܗ̇ ܕܥܰܡܳܐܽܘܣ.
58 ܘܶܐܡܰܪ ܝܺܗܽܘܕܳܐ. ܐܶܚܰܙܰܩܘ ܘܰܗܘܰܘ ܒܢܰܝ̈ ܚܰܝܠܳܐ. ܘܰܗܘܰܘ ܡܛܰܝܒܺܝܢ ܠܨܰܦܪܳܐ: ܠܡܰܩܪܳܒܽܘ ܥܰܡ ܗܳܠܶܝܢ ܥܰܡ̈ܡܶܐ ܕܶܐܬܟܰܢܰܫܘ ܥܠܰܝܢ ܕܢܰܪܡܽܘܢܳܢ ܘܰܠܒܶܝܬ ܡܰܩܕܫܰܢ.
59 ܡܶܛܽܠ ܕܦܰܩܳܚ ܗܽܘ ܠܰܢ ܕܰܢܡܽܘܬ ܒܰܩܪܳܒܳܐ ܐܰܘ ܕܢܶܚܙܶܐ ܒܒܺܝܫܬܶܗ ܕܥܰܡܰܢ ܘܰܕܡܰܩܕܫܰܢ.
60 ܘܰܐܝܟ ܕܺܝܬ ܨܶܒܝܳܢܳܐ ܩܕܳܡ ܥܳܡܽܘܪܳܐ ܕܰܫܡܰܝܳܐ: ܗܳܟܘܳܬ ܢܶܥܒܶܕ.