1 Corinthians 10
First Epistle to the Corinthians
܀ ܕܩܘܪ̈ܢܬܝܐ ܩܕܡܝܬܐ ܝ ܀
1- ܨܳܒܶܐ ܐ̱ܢܳܐ ܕܶܝܢ ܕܬܶܕܥܽܘܢ ܐܰܚܰܝ̈܆ ܕܰܐܒܳܗܰܝ̈ܢ ܟܽܠܗܽܘܢ ܬܚܶܝܬ ܥܢܳܢܳܐ ܗܘܰܘ. ܘܟܽܠܗܽܘܢ ܒܝܰܡܳܐ ܥܒܰܪܘ.
2- ܘܟܽܠܗܽܘܢ ܒܝܰܕ ܡܽܘܫܶܐ ܥܡܰܕܘ ܒܰܥܢܳܢܳܐ ܘܰܒܝܰܡܳܐ.
3- ܘܟܽܠܗܽܘܢ ܚܕܳܐ ܡܶܐܟܽܘܠܬܳܐ ܕܪܽܘܚܳܐ ܐܶܟܰܠܘ.
4- ܘܟܽܠܗܽܘܢ ܚܰܕ ܡܰܫܬܝܳܐ ܕܪܽܘܚܳܐ ܐܶܫܬܺܝܘ. ܫܳܬܶܝܢ ܗ̱ܘܰܘ ܓܶܝܪ ܡܶܢ ܟܺܐܦܳܐ ܕܪܽܘܚܳܐ ܕܳܐܬܝܳܐ ܗ̱ܘܳܬ ܥܰܡܗܽܘܢ܆ ܟܺܐܦܳܐ ܕܶܝܢ ܗܳܝ. ܗܽܘ ܗܘܳܐ ܡܫܺܝܚܳܐ.
5- ܐܶܠܳܐ ܠܳܐ ܗ̱ܘܳܐ ܒܣܽܘܓܐܗܽܘܢ ܐܶܨܛܒܺܝ ܐܰܠܳܗܳܐ܆ ܢܦܰܠܘ ܓܶܝܪ ܒܡܰܕܒܪܳܐ܀
6- ܗܳܠܶܝܢ ܕܶܝܢ ܛܽܘܦܣܳܐ ܠܰܢܽ ܗ̱ܘ ܗܘܰܘ܆ ܕܠܳܐ ܗܘܰܝܢ ܪܳܓܺܝܢ ܒܺܝ̈ܫܳܬܳܐ ܐܰܝܟܰܢܳܐ ܕܗܶܢܽܘܢ ܪܰܓܘ.
7- ܘܳܐܦܠܳܐ ܢܶܗܘܶܐ ܦܳܠܚ̈ܰܝ ܦܬܰܟܪ̈ܶܐ܇ ܐܰܝܟܰܢܳܐ ܕܳܐܦ ܡܶܢܗܽܘܢ ܦܠܰܚܘ. ܐܰܝܟ ܕܰܟܬܺܝܒ܆ ܕܺܝܬܶܒ ܥܰܡܳܐ ܠܡܶܐܟܰܠ ܘܰܠܡܶܫܬܳܐ܆ ܘܩܳܡܘ ܠܡܶܫܬܥܳܝܽܘ.
8- ܘܳܐܦܠܳܐ ܢܙܰܢܶܐ. ܐܰܝܟܰܢܳܐ ܕܡܶܢܗܽܘܢ ܙܰܢܺܝܘ܇ ܘܰܢܦܰܠܘ ܒܚܰܕ ܝܰܘܡܳܐ ܥܶܣܪܺܝܢ ܘܰܬܠܳܬܳܐ ܐܰܠܦܺܝ̈ܢ.
9- ܘܠܳܐ ܢܢܰܣܶܐ ܠܰܡܫܺܝܚܳܐ. ܐܰܝܟܰܢܳܐ ܕܡܶܢܗܽܘܢ ܢܰܣܺܝܘ܇ ܘܰܐܘܒܶܕܘ ܐܶܢܽܘܢ ܚܘܰܘ̈ܳܬܳܐ.
10- ܘܳܐܦܠܳܐ ܬܶܪܛܢܽܘܢ. ܐܰܝܟܰܢܳܐ ܕܡܶܢܗܽܘܢ ܪܛܶܢܘ܇ ܘܶܐܒܰܕܘ ܒܺܐܝ̈ܕܰܝ ܡܚܰܒܠܳܢܳܐ.
11- ܗܳܠܶܝܢ ܕܶܝܢ ܟܽܠܗܶܝܢ ܕܰܓܕ̈ܰܫܝ ܠܗܽܘܢ ܠܛܽܘܦܣܰܢ ܗ̱ܘ̈ܰܝ. ܘܶܐܬܟܬܶܒ̈ܝ ܡܶܛܽܠ ܡܰܪܕܽܘܬܳܐ ܕܺܝܠܰܢ܇ ܕܚܰܪܬܗܽܘܢ ܕܥܳܠܡ̈ܶܐ ܥܠܰܝܢ ܡܰܛܝܰܬ܀
12- ܡܶܟܺܝܠ ܡܰܢ ܕܣܳܒܰܪ ܕܩܳܡ܆ ܢܶܙܕܗܰܪ ܕܠܳܐ ܢܶܦܶܠ.
13- ܢܶܣܝܽܘܢܳܐ ܠܳܐ ܡܰܛܺܝܟܽܘܢ. ܐܶܠܳܐ ܕܰܒܢܰܝ̈ܢܳܫܳܐ. ܡܗܰܝܡܰܢܽ ܗ̱ܘ ܕܶܝܢ ܐܰܠܳܗܳܐ܆ ܕܠܳܐ ܢܰܪܦܶܝܟܽܘܢ ܕܬܶܬܢܰܣܽܘܢ ܝܰܬܺܝܪ ܡܶܢ ܡܶܕܶܡ ܕܰܡܨܶܝܢ ܐܢ̱ܬܽܘܢ. ܐܶܠܳܐ ܢܶܥܒܶܕ ܠܢܶܣܝܽܘܢܟܽܘܢ ܡܰܦܩܳܢܳܐ܆ ܐܰܝܟܰܢܳܐ ܕܬܶܫܟܚܽܘܢ ܠܰܡܣܰܝܒܳܪܽܘ܀
14- ܡܶܛܽܠ ܗܳܢܳܐ ܚܰܒܺܝ̈ܒܰܝ܆ ܥܪܽܘܩܘ ܡܶܢ ܦܽܘܠܚܳܢܳܐ ܕܰܦܬܰܟܪ̈ܶܐ.
15- ܐܰܝܟ ܕܰܠܚܰܟܺܝ̈ܡܶܐ ܐܳܡܰܪ ܐ̱ܢܳܐ. ܕܽܘܢܘ ܐܰܢ̱ܬܽܘܢ ܡܶܕܶܡ ܕܳܐܡܰܪ ܐ̱ܢܳܐ.
16- ܟܳܣܳܐ ܗܰܘ ܕܬܰܘܕܺܝܬܳܐ ܕܰܡܒܰܪܟܺܝܢܰܢ܆ ܠܳܐ ܗ̱ܘܳܐ ܫܰܘܬܳܦܽܘܬܳܐ ܐܺܝܬܰܘܗ̱ܝ ܕܰܕܡܶܗ ܕܰܡܫܺܝܚܳܐ܆ ܘܠܰܚܡܳܐ ܗܰܘ ܕܩܳܨܶܝܢܰܢ܆ ܠܳܐ ܗ̱ܘܳܐ ܫܰܘܬܳܦܽܘܬܳܐ ܐܺܝܬܰܘܗ̱ܝ ܕܦܰܓܪܶܗ ܕܰܡܫܺܝܚܳܐ؟
17- ܐܰܝܟܰܢܳܐ ܕܚܰܕ ܗ̱ܘ ܠܰܚܡܳܐ ܗܰܘ܆ ܗܳܟܰܢܳܐ ܟܽܠܰܢ ܚܰܕ ܚܢܰܢ ܦܓܰܪ. ܟܽܠܰܢ ܓܶܝܪ ܡܶܢ ܗܰܘ ܗ̱ܘ ܚܰܕ ܠܰܚܡܳܐ ܢܳܣܒܺܝܢܰܢ.
18- ܚܙܰܘ ܠܺܐܝܣܪܳܐܶܝܠ ܕܒܰܒܣܰܪ. ܠܳܐ ܗ̱ܘܳܐ ܐܰܝܠܶܝܢ ܕܳܐܟܠܺܝܢ ܕܶܒܚ̈ܶܐ܆ ܗܳܘܶܝܢ ܫܰܘ̈ܬܳܦܶܐ ܠܡܰܕܒܚܳܐ܆
19- ܡܳܢܳܐ ܗܳܟܺܝܠ ܐܳܡܰܪ ܐ̱ܢܳܐ؟ ܕܰܦܬܰܟܪܳܐ ܡܶܕܶܡ ܐܺܝܬܰܘܗ̱ܝ܆ ܐܰܘ ܕܶܒܚܳܐ ܕܰܦܬܰܟܪܳܐ ܡܶܕܶܡ ܗ̱ܘ܆ ܠܳܐ.
20- ܐܶܠܳܐ ܗܰܘ ܡܶܕܶܡ ܕܕܳܒܚܺܝܢ ܚܰܢ̈ܦܶܐ܆ ܠܫ̈ܺܐܕܶܐ ܗ̱ܘ ܕܳܒܚܺܝܢ. ܘܠܳܐ ܠܰܐܠܳܗܳܐ. ܠܳܐ ܕܶܝܢ ܨܳܒܶܐ ܐ̱ܢܳܐ ܕܬܶܗܘܽܘܢ ܫܰܘ̈ܬܳܦܶܐ ܠܫ̈ܺܐܕܶܐ.
21- ܠܳܐ ܡܶܫܟܚܺܝܢ ܐܢ̱ܬܽܘܢ ܕܬܶܫܬܰܘܬܦܽܘܢ ܒܦܳܬܽܘܪܳܐ ܕܡܳܪܰܢ ܘܰܒܦܳܬܽܘܪܳܐ ܕܫ̈ܺܐܕܶܐ. ܘܠܳܐ ܡܶܫܟܚܺܝܢ ܐܢ̱ܬܽܘܢ ܕܬܶܫܬܽܘܢ ܟܳܣܳܐ ܕܡܳܪܰܢ. ܘܟܳܣܳܐ ܕܫ̈ܺܐܕܶܐ.
22- ܐܰܘ ܕܰܠܡܳܐ ܡܰܛܳܢܽܘ ܡܰܛܢܺܝܢܰܢ ܠܡܳܪܰܢ؟ ܕܰܠܡܳܐ ܚܰܣܺܝܢܺܝܢܰܢ ܡܶܢܶܗ܆܀
23- ܟܽܠ ܡܶܕܶܡ ܫܰܠܺܝܛ ܠܺܝ܆ ܐܶܠܳܐ ܠܳܐ ܟܽܠ ܡܶܕܶܡ ܦܰܩܳܚ. ܟܽܠ ܡܶܕܶܡ ܫܰܠܺܝܛ ܠܺܝ܆ ܐܶܠܳܐ ܠܳܐ ܟܽܠ ܡܶܕܶܡ ܡܒܰܢܶܐ.
24- ܠܳܐ ܐ̱ܢܳܫ ܕܢܰܦܫܶܗ ܢܶܗܘܶܐ ܒܳܥܶܐ܆ ܐܶܠܳܐ ܟܽܠܢܳܫ ܐܳܦ ܕܚܰܒܪܶܗ.
25- ܟܽܠܡܶܕܶܡ ܕܡܶܙܕܰܒܰܢ ܒܡܰܩܶܠܳܘܢ ܗܘܰܝܬܽܘܢ ܐܳܟܠܺܝܢ܇ ܕܠܳܐ ܥܽܘܩܳܒܳܐ ܡܶܛܽܠ ܬܺܐܪܬܳܐ.
26- ܕܡܳܪܝܳܐ ܗ̱ܝ ܓܶܝܪ ܐܰܪܥܳܐ ܒܰܡܠܳܐܳܗ̇.
27- ܐܶܢ ܐ̱ܢܳܫ ܕܶܝܢ ܡܶܢ ܚܰܢ̈ܦܶܐ܁ ܩܳܪܶܐ ܠܟܽܘܢ܆ ܘܨܳܒܶܝܢ ܐܢ̱ܬܽܘܢ ܠܡܺܐܙܰܠ܆ ܟܽܠܡܶܕܶܡ ܕܡܶܬܬܣܺܝܡ ܩܕܳܡܰܝܟܽܘܢ ܐܰܟܽܘܠܘ܇ ܕܠܳܐ ܥܽܘܩܳܒܳܐ ܡܶܛܽܠ ܬܺܐܪܬܳܐ.
28- ܐܶܢ ܐ̱ܢܳܫ ܕܶܝܢ ܢܺܐܡܰܪ ܠܟܽܘܢ. ܕܗܳܢܳܐ ܕܰܕܒܺܝܚܰܐ ܗ̱ܘ܆ ܠܳܐ ܬܶܐܟܠܽܘܢ. ܡܶܛܽܠ ܗܰܘ ܕܳܐܡܰܪ ܠܟܽܘܢ. ܘܡܶܛܽܠ ܬܺܐܪܬܳܐ.
29- ܬܺܐܪܬܳܐ ܕܶܝܢ ܐܳܡܰܪ ܐ̱ܢܳܐ. ܠܳܐ ܗ̱ܘܳܐ ܕܺܝܠܟܽܘܢ܆ ܐܶܠܳܐ ܕܗܰܘ ܕܳܐܡܰܪ. ܠܡܳܢܳܐ ܓܶܝܪ ܚܺܐܪܽܘܬܝ ܡܶܬܬܕܺܝܢܳܐ ܡܶܢ ܬܺܐܪܬܳܐ ܕܰܐ̱ܚܪ̈ܳܢܶܐ؟
30- ܐܶܢ ܐܶܢܳܐ ܒܛܰܝܒܽܘܬܳܐ ܡܶܬܚܰܫܰܚ ܐ̱ܢܳܐ܆ ܡܳܢܳܐ ܡܶܬܓܰܕܰܦ ܐ̱ܢܳܐ ܥܰܠ ܡܶܕܶܡ ܕܶܐܢܳܐ ܡܰܘܕܶܐ ܐ̱ܢܳܐ؟
31- ܐܶܢ ܐܳܟܠܺܝܢ ܐܢ̱ܬܽܘܢ ܗܳܟܺܝܠ. ܘܶܐܢ ܫܳܬܶܝܢ ܐܢ̱ܬܽܘܢ܇ ܘܶܐܢ ܡܶܕܶܡ ܥܳܒܕܺܝܢ ܐܢ̱ܬܽܘܢ܆ ܟܽܠܡܶܕܶܡ ܠܬܶܫܒܽܘܚܬܳܐ ܕܰܐܠܳܗܳܐ ܗܘܰܝܬܽܘܢ ܥܳܒܕܺܝܢ.
32- ܕܠܳܐ ܬܽܘܩܠܳܐ ܗܘܰܘ ܠܺܝܗܽܘ̈ܕܳܝܶܐ ܘܠܰܐܪ̈ܡܳܝܶܐ ܘܰܠܥܺܕܬܶܗ ܕܰܐܠܳܗܳܐ.
33- ܐܰܝܟ ܕܳܐܦ ܐܶܢܳܐ ܒܟܽܠ ܡܶܕܶܡ ܠܟܽܠܢܳܫ ܫܳܦܰܪ ܐ̱ܢܳܐ܆ ܘܠܳܐ ܒܳܥܶܐ ܐ̱ܢܳܐ ܡܶܕܶܡ ܕܠܺܝ ܦܰܩܳܚ܆ ܐܶܠܳܐ ܡܶܕܶܡ ܕܰܠܣܰܓܺܝ̈ܶܐܐ ܦܰܩܳܚ. ܕܢܺܚܽܘܢ܀