1 Corinthians 13
First Epistle to the Corinthians
܀ ܕܩܘܪ̈ܢܬܝܐ ܩܕܡܝܬܐ ܝܓ ܀
1- ܐܶܢ ܒܟܽܠ ܠܶܫܳܢ ܕܰܒܢܰܝ̈ܢܳܫܳܐ ܐܶܡܰܠܶܠ ܘܒܰܕܡ̈ܰܠܰܐܟܶܐ܇ ܘܚܽܘܒܳܐ ܠܳܐ ܢܶܗܘܶܐ ܒܺܝ܆ ܗܘܺܝܬ ܠܺܝ ܢܚܳܫܳܐ ܕܙܳܐܶܡ܆ ܐܰܘ ܨܺܨܠܳܐ ܕܝܳܗܶܒ ܩܳܠܳܐ.
2- ܘܶܐܢ ܬܶܗܘܶܐ ܒܺܝ ܢܒܺܝܽܘܬܳܐ܇ ܘܶܐܕܰܥ ܐ̱ܪ̈ܳܙܶܐ ܟܽܠܗܽܘܢ ܘܟܽܠܳܗ̇ ܝܺܕܰܥܬܳܐ܇ ܘܶܐܢ ܬܶܗܘܶܐ ܒܺܝ ܗܰܝܡܳܢܽܘܬܳܐ܁ ܐܰܝܟܰܢܳܐ ܕܛܽܘܪܳܐ ܐܶܫܰܢܶܐ܇ ܘܚܽܘܒܳܐ ܠܰܝܬ ܒܺܝ܆ ܠܳܐ ܗܘܺܝܬ ܡܶܕܶܡ.
3- ܘܶܐܢ ܐܰܘܟܶܠ ܟܽܠ ܕܺܐܝܬ ܠܺܝ ܠܡܶܣ̈ܟܺܢܶܐ܇ ܘܶܐܢ ܐܰܫܠܶܡ ܦܰܓܪܝ ܕܢܺܐܩܰܕ܇ ܘܚܽܘܒܳܐ ܠܳܐ ܢܶܗܘܶܐ ܒܺܝ܆ ܡܶܕܶܡ ܠܳܐ ܝܳܬܰܪ ܐ̱ܢܳܐ܀
4- ܚܽܘܒܳܐ ܢܰܓܺܝܪܳܐ ܗ̱ܝ ܪܽܘܚܶܗ. ܘܒܰܣܺܝܡ. ܚܽܘܒܳܐ ܠܳܐ ܚܳܣܶܡ. ܚܽܘܒܳܐ ܠܳܐ ܡܶܫܬܓܶܫ. ܘܠܳܐ ܡܶܬܚܬܰܪ.
5- ܘܠܳܐ ܣܳܥܰܪ ܕܒܶܗܬܬܳܐ. ܘܠܳܐ ܒܳܥܶܐ ܕܺܝܠܶܗ. ܘܠܳܐ ܡܶܬܬܦܺܝܪ. ܘܠܳܐ ܡܶܬܪܰܥܶܐ ܕܒܺܝܫ.
6- ܠܳܐ ܚܳܕܶܐ ܒܥܰܘܠܳܐ܆ ܐܶܠܳܐ ܚܳܕܶܐ ܒܩܽܘܫܬܳܐ.
7- ܟܽܠ ܡܶܕܶܡ ܡܣܰܝܒܰܪ. ܟܽܠܡܶܕܶܡ ܡܗܰܝܡܶܢ. ܟܽܠ ܡܣܰܒܰܪ. ܟܽܠ ܣܳܒܶܠ܀
8- ܚܽܘܒܳܐ ܡܶܡܬܽܘܡ ܠܳܐ ܢܳܦܶܠ. ܢܒܺܝ̈ܰܘܳܬܳܐ ܓܶܝܪ ܢܶܬܒ̈ܰܛܠܳܢ. ܘܠܶܫܳܢ̈ܶܐ ܢܶܫܬܰܬܩܽܘܢ. ܘܺܝܕܰܥܬܳܐ ܬܶܬܒܰܛܰܠ.
9- ܩܰܠܺܝܠ ܗ̱ܘ ܓܶܝܪ ܡܶܢ ܣܰܓܺܝ ܝܳܕܥܺܝܢܰܢ. ܘܩܰܠܺܝܠ ܡܶܢ ܣܰܓܺܝ ܡܶܬܢܰܒܶܝܢܰܢ.
10- ܐܶܡܰܬܝ ܕܶܝܢ ܕܬܺܐܬܶܐ ܓܡܺܝܪܽܘܬܳܐ܆ ܗܳܝܕܶܝܢ ܢܶܬܒܰܛܰܠ ܗܰܘ ܡܶܕܶܡ ܕܩܰܠܺܝܠ ܗ̱ܘܳܐ܀
11- ܟܰܕ ܝܰܠܽܘܕܳܐ ܗ̱ܘܺܝܬ܆ ܐܰܝܟ ܝܰܠܽܘܕܳܐ ܡܶܬܪܰܥܶܐ ܗ̱ܘܺܝܬ. ܘܰܐܝܟ ܝܰܠܽܘܕܳܐ ܡܶܬܚܰܫܰܒ ܗ̱ܘܺܝܬ. ܟܰܕ ܗܘܺܝܬ ܕܶܝܢ ܓܰܒܪܳܐ܆ ܒܰܛܠܶܬ ܗܳܠܶܝܢ ܕܛܰܠܝܽܘܬܳܐ.
12- ܗܳܫܳܐ ܐܰܝܟ ܕܰܒܡܰܚܙܺܝܬܳܐ ܚܳܙܶܝܢ ܚ̱ܢܰܢ ܒܦܶܠܶܐܬܳܐ܆ ܗܳܝܕܶܝܢ ܕܶܝܢ ܐܰܦܺܝ̈ܢ ܠܽܘܩܒܰܠ ܐܰܦܺܝ̈ܢ. ܗܳܫܳܐ ܝܳܕܰܥ ܐ̱ܢܳܐ ܩܰܠܺܝܠ ܡܶܢ ܣܰܓܺܝ܆ ܗܳܝܕܶܝܢ ܕܶܝܢ ܐܶܕܰܥ ܐܰܝܟ ܡܳܐ ܕܶܐܬܝܰܕܥܶܬ.
13- ܗܳܠܶܝܢ ܐܶܢܶܝܢ ܓܶܝܪ ܬܠܳܬ ܕܰܡܟܰܬܪ̈ܳܢ܇ ܗܰܝܡܳܢܽܘܬܳܐ܁ ܘܣܰܒܪܳܐ. ܘܚܽܘܒܳܐ. ܕܪܰܒ ܕܶܝܢ ܡܶܢܗܶܝܢ ܚܽܘܒܳܐ܀