1 Corinthians 11
First Epistle to the Corinthians
܀ ܕܩܘܪ̈ܢܬܝܐ ܩܕܡܝܬܐ ܝܐ ܀
1- ܐܶܬܕܰܡܰܘ ܒܺܝ܆ ܐܰܝܟܰܢܳܐ ܕܳܐܦ ܐܶܢܳܐ ܒܰܡܫܺܝܚܳܐ.
2- ܡܫܰܒܰܚ ܐ̱ܢܳܐ ܠܟܽܘܢ ܕܶܝܢ ܐܰܚܰܝ̈܆ ܕܰܒܟܽܠ ܡܶܕܶܡ ܥܰܗܺܝܕܺܝܢ ܐܢ̱ܬܽܘܢ ܠܺܝ܇ ܘܰܐܝܟܰܢܳܐ ܕܰܐܫܠܡܶܬ ܠܟܽܘܢ ܦܽܘܩ̈ܕܳܢܶܐ ܐܰܚܺܝܕܺܝܢ ܐܢ̱ܬܽܘܢ܀
3- ܨܳܒܶܐ ܐ̱ܢܳܐ ܕܶܝܢ ܕܬܶܕܥܽܘܢ܆ ܕܟܽܠ ܓܒܰܪ ܪܺܝܫܶܗ ܡܫܺܝܚܰܐ ܗ̱ܘ. ܘܪܺܝܫܳܗ̇ ܕܰܐܢ̱ܬܬܳܐ ܓܰܒܪܰܐ ܗ̱ܘ. ܘܪܺܝܫܶܗ ܕܰܡܫܺܝܚܳܐ ܐܰܠܳܗܰܐ ܗ̱ܘ.
4- ܟܽܠ ܓܰܒܪܳܐ ܕܰܡܨܰܠܶܐ ܐܰܘ ܡܶܬܢܰܒܶܐ. ܟܰܕ ܡܟܰܣܰܝ ܪܺܝܫܶܗ܆ ܡܰܒܗܶܬ ܪܺܝܫܶܗ.
5- ܘܟܽܠ ܐܰܢ̱ܬܬܳܐ ܕܰܡܨܰܠܝܳܐ ܐܰܘ ܡܶܬܢܰܒܝܳܐ. ܟܰܕ ܓܠܶܐ ܪܺܝܫܳܗ̇܆ ܡܰܒܗܬܳܐ ܪܺܝܫܳܗ̇. ܫܰܘܝܳܐ ܗ̱ܝ ܓܶܝܪ ܥܰܡ ܗܳܝ ܕܰܓܪܺܝܥ ܪܺܝܫܳܗ̇.
6- ܐܶܢ ܓܶܝܪ ܠܳܐ ܡܶܬܟܰܣܝܳܐ ܐܰܢ̱ܬܬܳܐ. ܐܳܦ ܬܶܣܬܰܦܰܪ. ܐܶܢ ܕܶܝܢ ܡܫܰܟܰܪ ܗ̱ܘ ܠܰܐܢ̱ܬܬܳܐ ܠܡܶܣܬܰܦܳܪܽܘ ܐܰܘ ܠܡܶܓܪܰܥ. ܬܶܬܟܰܣܶܐ܀
7- ܓܰܒܪܳܐ ܓܶܝܪ ܠܳܐ ܚܰܝܳܒ ܕܰܢܟܰܣܶܐ ܪܺܝܫܶܗ܆ ܡܶܛܽܠ ܕܰܕܡܽܘܬܰܐ ܗ̱ܘ ܘܬܶܫܒܽܘܚܬܳܐ ܕܰܐܠܳܗܳܐ. ܐܰܢ̱ܬܬܳܐ ܕܶܝܢ ܬܶܫܒܽܘܚܬܳܐ ܗ̱ܝ ܕܓܰܒܪܳܐ.
8- ܠܳܐ ܓܶܝܪ ܐܺܝܬܰܘܗ̱ܝ ܓܰܒܪܳܐ ܡܶܢ ܐܰܢ̱ܬܬܳܐ܆ ܐܶܠܳܐ ܐܰܢ̱ܬܬܳܐ ܡܶܢ ܓܰܒܪܳܐ.
9- ܘܳܐܦܠܳܐ ܓܶܝܪ ܓܰܒܪܳܐ ܐܶܬܒܪܺܝ ܡܶܛܽܠ ܐܰܢ̱ܬܬܳܐ܆ ܐܶܠܳܐ ܐܰܢ̱ܬܬܳܐ ܡܶܛܽܠ ܓܰܒܪܳܐ.
10- ܡܶܛܽܠ ܗܳܢܳܐ ܚܰܝܳܒܳܐ ܐܰܢ̱ܬܬܳܐ܆ ܕܫܽܘܠܛܳܢܳܐ ܢܶܗܘܶܐ ܥܰܠ ܪܺܝܫܳܗ̇܇ ܡܶܛܽܠ ܡ̈ܰܠܰܐܟܶܐ.
11- ܒܪܰܡ ܕܶܝܢ ܠܳܐ ܓܰܒܪܳܐ ܠܒܰܪ ܡܶܢ ܐܰܢ̱ܬܬܳܐ܆ ܐܳܦܠܳܐ ܐܰܢ̱ܬܬܳܐ ܠܒܰܪ ܡܶܢ ܓܰܒܪܳܐ ܒܡܳܪܰܢ.
12- ܐܰܝܟܰܢܳܐ ܓܶܝܪ ܕܰܐܢ̱ܬܬܳܐ ܡܶܢ ܓܰܒܪܳܐ܆ ܗܳܟܰܢܳܐ ܐܳܦ ܓܰܒܪܳܐ ܒܝܰܕ ܐܰܢ̱ܬܬܳܐ. ܟܽܠܡܶܕܶܡ ܕܶܝܢ ܡܶܢ ܐܰܠܳܗܰܐ ܗ̱ܘ܀
13- ܕܽܘܢܘ ܒܰܝ̈ܢܰܝܟܽܘܢ ܠܢܰܦܫܟܽܘܢ. ܝܳܐܶܐ ܠܰܐܢ̱ܬܬܳܐ ܕܟܰܕ ܓܠܶܐ ܪܺܝܫܳܗ̇ ܬܨܰܠܶܐ ܠܰܐܠܳܗܳܐ܆
14- ܐܳܦܠܳܐ ܗܽܘ ܟܝܳܢܳܐ ܡܰܠܶܦ ܠܟܽܘܢ܆ ܕܓܰܒܪܳܐ ܡܳܐ ܕܩܳܐܶܡ ܣܰܥܪܶܗ܇ ܨܰܥܪܰܐ ܗ̱ܘ ܠܶܗ.
15- ܘܰܐܢ̱ܬܬܳܐ ܡܳܐ ܕܰܡܪܰܒܰܝ ܣܰܥܪܳܗ̇܆ ܬܶܫܒܽܘܚܬܳܐ ܗ̱ܝ ܠܳܗ̇܇ ܡܶܛܽܠ ܕܣܰܥܪܳܗ̇ ܚܠܳܦ ܬܰܟܣܺܝܬܰܐ ܗ̱ܘ ܐܶܬܺܝܗܶܒ ܠܳܗ̇.
16- ܐܶܢ ܐ̱ܢܳܫ ܕܶܝܢ ܡܶܬܚܪܶܐ ܥܰܠ ܗܳܠܶܝܢ܆ ܠܰܢ ܠܰܝܬ ܥܝܳܕܳܐ ܕܰܐܝܟ ܗܳܢܳܐ܇ ܘܠܳܐ ܠܥܺܕܬܶܗ ܕܰܐܠܳܗܳܐ܀
17- ܗܳܕܶܐ ܕܶܝܢ ܕܰܡܦܰܩܶܕ ܐ̱ܢܳܐ܆ ܠܳܐ ܐܰܝܟ ܡܫܰܒܰܚ ܐ̱ܢܳܐ ܠܟܽܘܢ. ܡܶܛܽܠ ܕܠܳܐ ܗ̱ܘܳܐ ܠܰܩܕܳܡܰܝܟܽܘܢ ܐܶܬܰܝܬܽܘܢ܆ ܐܶܠܳܐ ܠܰܒܨܺܝܪܽܘܬܰܐ ܗ̱ܘ ܢܚܶܬܬܽܘܢ.
18- ܠܽܘܩܕܰܡ ܓܶܝܪ ܡܳܐ ܕܡܶܬܟܰܢܫܺܝܢ ܐܢ̱ܬܽܘܢ ܒܥܺܕܬܳܐ܆ ܦܳܠܰܓܘ̈ܳܬܳܐ ܫܳܡܰܥ ܐ̱ܢܳܐ ܕܺܐܝܬ ܒܰܝܢܳܬܟܽܘܢ. ܘܡܶܕܶܡ ܡܶܕܶܡ ܡܗܰܝܡܶܢ ܐ̱ܢܳܐ.
19- ܥܬܺܝܕܺܝܢ ܐܶܢܽܘܢ ܓܶܝܪ ܐܳܦ ܚܶܪ̈ܝܳܢܶܐ ܕܢܶܗܘܽܘܢ ܒܰܝܢܳܬܟܽܘܢ܆ ܕܰܐܝܠܶܝܢ ܕܰܒܩܶܝܢ ܒܟܽܘܢ ܢܶܬܝܰܕܥܽܘܢ.
20- ܡܳܐ ܗܳܟܺܝܠ ܕܡܶܬܟܰܢܫܺܝܢ ܐܢ̱ܬܽܘܢ܆ ܠܰܘ ܐܰܝܟ ܕܙܳܕܶܩ ܠܝܰܘܡܶܗ ܕܡܳܪܰܢ. ܐܳܟܠܺܝܢ ܐܢ̱ܬܽܘܢ ܘܫܳܬܶܝܢ.
21- ܐܶܠܳܐ ܐ̱ܢܳܫ ܐ̱ܢܳܫ ܚܫܳܡܺܝܬܶܗ ܩܳܕܶܡ ܐܳܟܶܠ ܠܳܗ̇. ܘܗܳܘܶܐ ܚܰܕ ܟܦܶܢ. ܘܚܰܕ ܪܘܶܐ.
22- ܕܰܠܡܳܐ ܒ̈ܳܬܶܐ ܠܰܝܬ ܠܟܽܘܢ ܕܬܶܐܟܠܽܘܢ ܘܬܶܫܬܽܘܢ؟ ܐܰܘ ܒܥܺܕܬܶܗ ܕܰܐܠܳܗܳܐ ܒܳܣܶܝܢ ܐܢ̱ܬܽܘܢ؟ ܘܡܰܒܗܬܺܝܢ ܐܢ̱ܬܽܘܢ ܠܰܐܝܠܶܝܢ ܕܠܰܝܬ ܠܗܽܘܢ؟ ܡܳܢܳܐ ܐܺܡܰܪ ܠܟܽܘܢ܆ ܐܶܫܰܒܰܚܟܽܘܢ ܒܗܳܕܶܐ܆ ܠܳܐ ܡܫܰܒܰܚ ܐ̱ܢܳܐ܀
23- ܐܶܢܳܐ ܓܶܝܪ ܩܰܒܠܶܬ ܡܶܢ ܡܳܪܰܢ܆ ܗܰܘ ܡܶܕܶܡ ܕܰܐܫܠܡܶܬ ܠܟܽܘܢ. ܕܡܳܪܰܢ ܝܶܫܽܘܥ ܒܗܰܘ ܠܺܠܝܳܐ ܕܡܶܫܬܠܶܡ ܗ̱ܘܳܐ܆ ܢܣܰܒ ܗ̱ܘܳܐ ܠܰܚܡܳܐ܁
24- ܘܒܰܪܶܟ ܘܰܩܨܳܐ ܘܝܰܗ̱ܒ ܠܗܽܘܢ. ܘܶܐܡܰܪ. ܣܰܒܘ. ܐܰܟܽܘܠܘ. ܗܳܢܰܘ ܦܰܓܪܝ܁ ܕܥܰܠ ܐܰܦܰܝ̈ܟܽܘܢ ܡܶܬܩܨܶܐ. ܗܳܟܰܢܳܐ ܗܘܰܝܬܽܘܢ ܥܳܒܕܺܝܢ ܠܕܽܘܟܪܳܢܝ.
25- ܗܳܟܰܢܳܐ ܡܶܢ ܒܳܬܰܪ ܕܰܐܚܫܶܡܘ܆ ܐܳܦ ܟܳܣܳܐ ܝܰܗ̱ܒ. ܘܶܐܡܰܪ. ܗܳܢܳܐ ܟܳܣܳܐ ܐܺܝܬܰܘܗ̱ܝ ܕܺܝܰܬܺܩܺܐ ܚܕܰܬܳܐ ܒܕܶܡܝ. ܗܳܟܰܢܳܐ ܗܘܰܝܬܽܘܢ ܥܳܒܕܺܝܢ܇ ܟܽܠ ܐܶܡܰܬܝ ܕܫܳܬܶܝܢ ܐܢ̱ܬܽܘܢ. ܠܕܽܘܟܪܳܢܝ܇
26- ܟܽܠ ܐܶܡܰܬܝ ܓܶܝܪ ܕܳܐܟܠܺܝܢ ܐܢ̱ܬܽܘܢ ܠܰܚܡܳܐ ܗܳܢܳܐ܁ ܘܫܳܬܶܝܢ ܐܢ̱ܬܽܘܢ ܟܳܣܳܐ ܗܳܢܳܐ܆ ܡܰܘܬܶܗ ܗ̱ܘ ܕܡܳܪܰܢ ܡܰܥܗܕܺܝܢ ܐܢ̱ܬܽܘܢ. ܥܕܰܡܳܐ ܠܡܶܐܬܺܝܬܶܗ.
27- ܐܰܝܢܳܐ ܗܳܟܺܝܠ ܕܳܐܟܶܠ ܡܶܢ ܠܰܚܡܶܗ ܕܡܳܪܝܳܐ ܘܫܳܬܶܐ ܡܶܢ ܟܳܣܶܗ. ܘܠܳܐ ܫܳܘܶܐ ܠܶܗ܆ ܡܚܰܝܰܒ ܗ̱ܘ ܠܰܕܡܶܗ ܕܡܳܪܝܳܐ ܘܰܠܦܰܓܪܶܗ܀
28- ܡܶܛܽܠ ܗܳܢܳܐ ܢܶܗܘܶܐ ܐ̱ܢܳܫ ܒܳܩܶܐ ܢܰܦܫܶܗ܆ ܘܗܳܝܕܶܝܢ ܐܳܟܶܠ ܡܶܢ ܠܰܚܡܳܐ ܗܳܢܳܐ. ܘܫܳܬܶܐ ܡܶܢ ܟܳܣܳܐ ܗܳܢܳܐ.
29- ܡܰܢ ܕܳܐܟܶܠ ܓܶܝܪ ܘܫܳܬܶܐ ܡܶܢܶܗ ܟܰܕ ܠܳܐ ܫܳܘܶܐ܆ ܚܽܘܝܳܒܰܐ ܗ̱ܘ ܠܢܰܦܫܶܗ ܐܳܟܶܠ ܘܫܳܬܶܐ܇ ܕܠܳܐ ܦܪܰܫ ܦܰܓܪܶܗ ܕܡܳܪܝܳܐ.
30- ܡܶܛܽܠ ܗܳܢܳܐ ܣܰܓܺܝ̈ܐܺܝܢ ܒܟܽܘܢ ܡܰܪ̈ܥܶܐ ܘܰܟܪ̈ܺܝܗܶܐ܆ ܘܣܰܓܺܝ̈ܶܐܐ ܕܕܳܡܟܺܝܢ
31- ܐܶܠܽܘ ܓܶܝܪ ܢܰܦܫܰܢ ܕܳܝܢܺܝܢ ܗ̱ܘܰܝܢ܆ ܠܳܐ ܡܶܬܬܕܺܝܢܺܝܢ ܗ̱ܘܰܝܢ.
32- ܟܰܕ ܡܶܬܬܕܺܝܢܺܝܢܰܢ ܕܶܝܢ ܡܶܢ ܡܳܪܰܢ܆ ܡܶܬܪܕܳܝܽܘ ܡܶܬܪܕܶܝܢܰܢ܇ ܕܠܳܐ ܥܰܡ ܥܳܠܡܳܐ ܢܶܬܚܰܝܰܒ܀
33- ܡܶܟܺܝܠ ܐܰܚܰܝ̈܆ ܐܶܡܰܬܝ ܕܡܶܬܟܰܢܫܺܝܢ ܐܢ̱ܬܽܘܢ ܠܡܶܐܟܰܠ܆ ܗܘܰܝܬܽܘܢ ܡܩܰܘܶܝܢ ܚܰܕ ܠܚܰܕ.
34- ܡܰܢ ܕܶܝܢ ܕܰܟܦܶܢ܁ ܒܒܰܝܬܶܗ ܢܶܠܥܰܣ܆ ܕܠܳܐ ܠܚܰܝܳܒܽܘܬܳܐ ܬܶܗܘܽܘܢ ܡܶܬܟܰܢܫܺܝܢ. ܥܰܠ ܫܰܪܟܳܐ ܕܶܝܢ. ܡܳܐ ܕܶܐܬܺܝܬ ܐܶܦܰܩܶܕܟܽܘܢ܀