Joshua 10
The Book of Joshua
܀ ܝܫܘܥ ܒܪ ܢܘܢ ܝ ܀
1 ܘܟܰܕ ܫ̣ܡܰܥ ܐܰܕܽܘܢܺܝܨܕܶܩ ܡܰܠܟܳܐ ܕܽܐܘܪܺܫܠܶܡ. ܕܟܰܒܫܳܗ̇ ܝܶܫܽܘܥ ܠܥܳܝ ܘܚܰܪܒܳܗ̇. ܐܰܝܟܰܢܳܐ ܕܰܥ̣ܒܰܕ ܠܺܐܝܪܺܝܚܽܘ ܘܰܠܡܰܠܟܳܗ̇. ܗܳܟܰܢܳܐ ܥ̣ܒܰܕ ܠܥܳܝ ܘܰܠܡܰܠܟܳܗ̇. ܘܕܰܫܠܶܡܘ ܥܳܡܽܘܖ̈ܶܝܗ̇ ܕܓܶܒܥܽܘܢ ܥܰܡ ܝܺܣܪܳܐܶܝܠ ܘܰܗܘܰܘ ܒܰܝܢܳܬܗܽܘܢ.
2 ܕܚܶܠ ܛܳܒ. ܡܶܛܽܠ ܕܰܡܕܺܝܢܬܳܐ ܗ̱ܝ ܪܰܒܬܳܐ ܓܶܒܥܽܘܢ. ܐܰܝܟ ܚܕܳܐ ܡܶܢ ܡܕܺܝ̈ܢܳܬܳܐ ܕܡܰܠܟܽܘܬܳܐ. ܘܪܰܒܳܐ ܗܘܳܬ ܡܶܢ ܥܳܝ. ܘܟܽܠܗܽܘܢ ܓܰܒܖ̈ܶܝܗ̇ ܓܰܢ̱ܒܳܖ̈ܺܝܢ ܗܘܰܘ.
3 ܘܫܰܕܰܪ ܐܰܕܽܘܢܺܝܨܕܶܩ ܡܰܠܟܳܐ ܕܽܐܘܪܺܫܠܶܡ ܠܘܳܬ ܗܽܘܗܳܡ ܡܰܠܟܳܐ ܕܚܶܒܪܽܘܢ. ܘܰܠܘܳܬ ܒܰܪܐܳܢ ܡܰܠܟܳܐ ܕܝܰܪܡܽܘܬ. ܘܰܠܘܳܬ ܢܳܦܺܝܥ ܡܰܠܟܳܐ ܕܰܠܟܝܫ. ܘܰܠܘܳܬ ܕܳܒܺܝܪ ܡܰܠܟܳܐ ܕܥܶܓܠܽܘܢ.
4 ܘܰܫܠܰܚ ܠܗܽܘܢ. ܕܣܰܩܘ ܠܘܳܬܝ ܘܰܗܘܰܘ ܠܺܝ ܥܶܕܪܳܐ. ܘܢܶܬܟܰܬܰܫ ܥܰܡ ܓܶܒܥܽܘܢ. ܡܶܛܽܠ ܕܰܐܫܠܡܰܬ ܠܳܗ̇ ܥܰܡ ܝܶܫܽܘܥ. ܘܥܰܡ ܝܺܣܪܳܐܶܝܠ.
5 ܘܶܐܬܟܰܢܰܫܘ ܘܰܣܠܶܩܘ ܚܰܡܫܳܐ ܡܰܠܟܰܝ̈ܗܽܘܢ ܕܳܐܡܽܘܖ̈ܳܝܶܐ. ܡܰܠܟܳܐ ܕܽܐܘܪܺܫܠܶܡ. ܘܡܰܠܟܳܐ ܕܚܶܒܪܽܘܢ. ܘܡܰܠܟܳܐ ܕܝܰܪܡܽܘܬ. ܘܡܰܠܟܳܐ ܕܰܠܟܝܫ. ܘܡܰܠܟܳܐ ܕܥܶܓܠܽܘܢ. ܗܶܢܽܘܢ ܘܟܽܠܗܶܝܢ ܡܰܫܖ̈ܝܳܬܗܽܘܢ. ܘܰܫܪܰܘ ܥܰܠ ܓܶܒܥܽܘܢ. ܘܰܥܒܰܕܘ ܥܰܡܳܗ̇ ܩܪܳܒܳܐ.
6 ܘܫܰܕܰܪܘ ܐ̱ܢܳܫ̈ܳܐ ܕܓܶܒܥܽܘܢ ܠܘܳܬ ܝܶܫܽܘܥ ܠܡܰܫܪܺܝܬܳܐ ܠܓܰܠܓܳܠܳܐ ܘܶܐܡܰܪܘ ܠܶܗ. ܠܳܐ ܬܰܪܫܶܠ ܐܺܝܕܰܝ̈ܟ ܡܶܢ ܥܰܒܕܰܝ̈ܟ. ܡܶܛܽܠ ܕܶܐܬܟܰܢܰܫܘ ܥܠܰܝܢ ܟܽܠܗܽܘܢ ܡܰܠܟܰܝ̈ܗܽܘܢ ܕܳܐܡܽܘܖ̈ܳܝܶܐ ܕܥܳܡܪܺܝܢ ܒܛܽܘܪܳܐ.
7 ܘܰܣܠܶܩ ܝܶܫܽܘܥ ܡܶܢ ܓܰܠܓܳܠܳܐ. ܗܽܘ ܘܟܽܠܶܗ ܥܰܡܳܐ ܩܪܰܒܬܢܳܐ ܕܥܰܡܶܗ. ܘܟܽܠܗܽܘܢ ܓܰܢ̱ܒܳܖ̈ܰܝ ܚܰܝܠܳܐ.
8 ܘܶܐܡܰܪ ܡܳܪܝܳܐ ܠܝܶܫܽܘܥ. ܠܳܐ ܬܶܕܚܰܠ ܡܶܢܗܽܘܢ. ܡܶܛܽܠ ܕܒܺܐܝܕܰܝ̈ܟ ܐܰܫܠܡܶܬ ܐܶܢܽܘܢ. ܘܚܰܕ ܡܶܢܗܽܘܢ ܠܳܐ ܡܶܫܟܰܚ ܠܰܡܩܳܡ ܩܕܳܡܰܝܟ.
9 ܘܶܐܬܐ ܠܘܳܬܗܽܘܢ ܝܶܫܽܘܥ ܡܶܢ ܫܶܠܝܳܐ. ܟܽܠܶܗ ܠܺܠܝܳܐ ܣ̣ܠܶܩ ܗܘܳܐ ܡܶܢ ܓܰܠܓܳܠܳܐ.
10 ܘܕܰܠܰܚ ܐܶܢܽܘܢ ܡܳܪܝܳܐ ܩܕܳܡ ܝܺܣܪܳܐܶܝܠ. ܘܰܡ̣ܚܰܘ ܐܶܢܽܘܢ ܡܚܽܘܬܐ ܪܰܒܬܳܐ ܒܓܶܒܥܽܘܢ ܕܒܶܝܬ ܚܽܘܪܳܢ. ܘܰܪܕܰܦܘ ܐܶܢܽܘܢ ܒܽܐܘܪܚܳܐ ܕܡܰܣܩܳܢܳܐ ܕܒܶܝܬ ܚܽܘܪܳܢ. ܘܰܚܪܰܒܘ ܐܶܢܽܘܢ ܥܕܰܡܳܐ ܠܥܳܟܪ. ܘܰܥܕܰܡܳܐ ܠܡܳܩܳܪ.
11 ܘܟܰܕ ܥܪܰܩܘ ܡܶܢ ܩܕܳܡ ܝܺܣܪܳܐܶܝܠ. ܘܢܳܚܬܺܝܢ ܗܘܰܘ ܒܡܰܚܰܬܬܳܐ ܕܒܶܝܬ ܚܽܘܪܳܢ. ܘܡܳܪܝܳܐ ܫܕܳܐ ܥܰܠܝܗܽܘܢ ܟܺܐܦ̈ܶܐ ܪܰܘܖ̈ܒܳܬܳܐ ܡܶܢ ܫܡܰܝܳܐ. ܥܕܰܡܳܐ ܠܥܳܟܳܪ ܘܡܺܝܬܘ. ܘܣܰܓܺܝܐܺܝܢ ܗܘܰܘ ܕܡܺܝܬܘ ܒܟܺܐܦ̈ܶܐ ܕܒܰܪܕܳܐ. ܡܶܢ ܗܳܢܽܘܢ ܕܰܚܪܰܒܘ ܒܢܰܝ̈ ܝܺܣܪܳܐܶܝܠ ܒܚܰܪܒܳܐ.
12 ܗܳܝܕܶܝܢ ܡܰܠܶܠ ܝܶܫܽܘܥ ܩܕܳܡ ܡܳܪܝܳܐ. ܒܝܰܘܡܳܐ ܕܰܐܫܠܶܡ ܡܳܪܝܳܐ ܠܳܐܡܽܘܖ̈ܳܝܶܐ ܩܕܳܡ ܝܺܣܪܳܐܶܝܠ. ܘܶܐܡܰܪ ܝܶܫܽܘܥ ܩܕܳܡ ܒܢܰܝ̈ ܝܺܣܪܳܐܶܝܠ. ܫܶܡܫܳܐ ܒܓܶܒܥܽܘܢ ܟܰܬܰܪ. ܘܰܐܢ̱ܬ ܣܰܗܪܳܐ ܒܰܦܩܰܥܬܳܐ ܕܰܐܝܠܽܘܢ.
13 ܘܟܰܬܰܪ ܫܶܡܫܳܐ. ܘܣܰܗܪܳܐ ܩܳܡ. ܥܕܰܡܳܐ ܕܶܐܬܦܪܰܥ ܥܰܡܳܐ ܡܶܢ ܒܥܶܠܕܒܳܒܰܘ̈ܗܝ. ܘܗܳܐ ܟܬܝܒ ܒܣܶܦܪܳܐ ܕܬܶܫ̈ܒܚܳܬܳܐ. ܘܩܳܡ ܫܶܡܫܳܐ ܒܦܶܠܓܽܘܬ ܫܡܰܝܳܐ. ܘܠܳܐ ܣܰܪܗܶܒ ܠܡܶܥܪܰܒ. ܘܰܗܘܳܐ ܐܰܝܟ ܝܰܘܡܳܐ ܫܰܠܡܳܐ.
14 ܘܠܳܐ ܗܘܳܐ ܐܰܝܟ ܝܰܘܡܳܐ ܗܰܘ ܩܕܳܡܰܘܗܝ ܐܰܘ ܒܳܬܪܶܗ. ܐܰܝܟܰܢܳܐ ܕܰܫ̣ܡܰܥ ܡܳܪܝܳܐ ܒܩܳܠܶܗ ܕܐ̱ܢܳܫ. ܡܶܛܽܠ ܕܡܳܪܝܳܐ ܥܳܒܶܕ ܗܘܳܐ ܩܪܳܒܳܐ ܠܺܝܣܪܳܐܶܝܠ.
15 ܘܰܗܦܰܟ ܝܶܫܽܘܥ ܘܟܽܠܶܗ ܝܺܣܪܳܐܶܝܠ ܥܰܡܶܗ ܠܡܰܫܪܺܝܬܳܐ ܠܓܰܠܓܳܠܳܐ.
16 ܘܰܥܪܰܩܘ ܚܰܡܫܳܐ ܡܰܠܟܺܝ̈ܢ ܗܳܠܶܝܢ. ܘܶܐܬܛܰܫܺܝܘ ܒܰܡܥܰܪܬܳܐ ܕܡܳܩܳܪ.
17 ܘܶܐܫܬܡܰܥ ܠܝܶܫܽܘܥ ܘܶܐܡܰܪܘ ܠܶܗ. ܕܶܐܫܬܟܰܚܘ ܚܰܡܫܳܐ ܡܰܠܟܺܝ̈ܢ ܗܳܠܶܝܢ. ܟܰܕ ܛܫܶܝܢ ܒܰܡܥܰܪܬܳܐ ܕܡܳܩܳܪ.
18 ܘܶܐܡܰܪ ܝܶܫܽܘܥ. ܥܰܓܶܠܘ ܟܺܐܦ̈ܶܐ ܪܰܘܖ̈ܒܳܬܳܐ. ܘܰܐܪܡܰܘ ܥܰܠ ܬܰܪܥܳܗ̇ ܕܰܡܥܰܪܬܳܐ. ܘܰܫܒܽܘܩܘ ܬܰܡܳܢ ܓܰܒܖ̈ܶܐ ܕܢܶܛܪܽܘܢ ܐܶܢܽܘܢ.
19 ܐܰܢ̱ܬܽܘܢ ܕܶܝܢ ܠܳܐ ܬܩܽܘܡܽܘܢ. ܐܶܠܳܐ ܪܕܽܘܦܘ ܒܳܬܰܪ ܒܥܶܠܕܒܳܒܰܝ̈ܟܽܘܢ ܘܰܐܕܪܶܟܘ ܐܶܢܽܘܢ ܘܠܳܐ ܬܶܫܒܩܽܘܢ ܐܶܢܽܘܢ ܕܢܶܥܠܽܘܢ ܠܰܡܕܺܝܢܬܳܐ. ܡܶܛܽܠ ܕܰܐܫܠܶܡ ܐܶܢܽܘܢ ܡܳܪܝܳܐ ܐܰܠܳܗܟܽܘܢ ܒܺܐܝ̈ܕܰܝܟܽܘܢ.
20 ܘܟܰܕ ܓܰܡܰܪ ܝܶܫܽܘܥ ܘܰܒܢܰܝ̈ ܝܺܣܪܳܐܶܝܠ ܠܡܶܚܪܰܒ ܐܶܢܽܘܢ ܚܰܪܒܳܐ ܪܰܒܬܳܐ. ܥܕܰܡܳܐ ܕܰܓܡܰܪܘ. ܘܰܣܪܺܝܕܳܐ ܠܳܐ ܐܶܫܬܚܰܪ ܡܶܢܗܽܘܢ. ܘܰܐܥܶܠܘ ܠܗܳܢܽܘܢ ܡܖ̈ܺܝܕܶܐ ܕܓܶܒܥܽܘܢ ܠܟܰܪܟܗܽܘܢ.
21 ܗܳܝܕܶܝܢ ܗܦܰܟ ܟܽܠܶܗ ܥܰܡܳܐ ܠܡܰܫܪܺܝܬܳܐ ܠܘܳܬ ܝܶܫܽܘܥ ܠܡܳܩܳܪ ܒܰܫܠܳܡܳܐ. ܘܠܳܐ ܐܰܗܰܪܘ ܡܶܢ ܕܒܶܝܬ ܝܺܣܪܳܐܶܝܠ ܓܒܰܪ ܒܠܶܫܳܢܶܗ.
22 ܘܶܐܡܰܪ ܝܶܫܽܘܥ. ܦܬܰܚܘ ܦܽܘܡܳܗ̇ ܕܰܡܥܰܪܬܳܐ. ܘܰܐܦܶܩܘ ܠܺܝ ܚܰܡ̈ܫܳܬܰܝܗܽܘܢ ܡܰܠ̈ܟܶܐ ܗܳܠܶܝܢ ܡܶܢ ܡܥܰܪܬܳܐ.
23 ܘܰܥܒܰܕܘ ܐܰܝܟ ܕܶܐܡܰܪ ܠܗܽܘܢ ܝܶܫܽܘܥ. ܘܰܐܦܶܩܘ ܠܘܳܬܶܗ ܠܚܰܡ̈ܫܳܬܰܝܗܽܘܢ ܡܰܠ̈ܟܶܐ ܗܳܠܶܝܢ ܡܶܢ ܡܥܰܪܬܳܐ. ܠܡܰܠܟܳܐ ܕܽܐܘܪܺܫܠܶܡ. ܘܰܠܡܰܠܟܳܐ ܕܚܶܒܪܽܘܢ. ܘܰܠܡܰܠܟܳܐ ܕܝܰܪܡܽܘܬ. ܘܰܠܡܰܠܟܳܐ ܕܰܠܟܝܫ. ܘܰܠܡܰܠܟܳܐ ܕܥܶܓܠܽܘܢ.
24 ܘܟܰܕ ܐܰܦܶܩܘ ܐܶܢܽܘܢ ܠܡܰܠܟ̈ܶܐ ܗܳܠܶܝܢ ܠܘܳܬ ܝܶܫܽܘܥ. ܩܪܳܐ ܝܶܫܽܘܥ ܠܟܽܠܗܽܘܢ ܫܰܠܺܝܛܳܢ̈ܶܐ ܥܳܒܕܰܝ̈ ܩܪܳܒܳܐ ܕܰܡܗܰܠܟܝܢ ܥܰܡܶܗ. ܘܶܐܡܰܪ ܠܗܽܘܢ. ܩܪܽܘܒܘ ܘܣܺܝܡܘ ܖ̈ܶܓܠܰܝܟܽܘܢ ܥܰܠ ܨܰܘܖ̈ܰܝܗܽܘܢ ܕܡܰܠܟ̈ܶܐ ܗܳܠܶܝܢ. ܘܰܩܪܶܒܘ ܘܣܳܡܘ ܖ̈ܶܓܠܰܝܗܽܘܢ ܥܰܠ ܨܰܘܖ̈ܰܝܗܽܘܢ ܕܡܰܠܟ̈ܶܐ ܗܳܠܶܝܢ.
25 ܘܶܐܡܰܪ ܠܗܽܘܢ ܝܶܫܽܘܥ. ܠܳܐ ܬܶܕܚܠܽܘܢ ܘܠܳܐ ܬܙܽܘܥܽܘܢ. ܐܶܬܚܰܝܠܘ ܘܶܐܬܥܰܫܢܘ. ܡܶܛܽܠ ܕܗܳܟܰܢܳܐ ܥܳܒܶܕ ܡܳܪܝܳܐ ܠܟܽܠܗܽܘܢ ܒܥܶܠܕܒܳܒܰܝ̈ܟܽܘܢ ܕܡܶܬܟܰܬܫܺܝܢ ܐ̱ܢܬܽܘܢ ܥܰܡܗܽܘܢ.
26 ܘܒܳܬܰܪ ܗܳܝܕܶܝܢ ܩܰܛܶܠ ܐܶܢܽܘܢ ܝܶܫܽܘܥ. ܘܰܙܩܰܦ ܐܶܢܽܘܢ ܥܰܠ ܚܰܡܫܳܐ ܩܰܝ̈ܣܺܝܢ. ܘܰܗܘܰܘ ܙܩܺܝܦܺܝܢ ܥܰܠ ܩܰܝ̈ܣܶܐ ܥܕܰܡܳܐ ܠܪܰܡܫܳܐ.
27 ܘܰܒܙܰܒܢܳܐ ܕܡܰܥܖ̈ܳܒܰܝ ܫܶܡܫܳܐ. ܦܩܰܕ ܝܶܫܽܘܥ ܘܰܐܚܶܬܘ ܐܶܢܽܘܢ ܡܶܢ ܩܰܝ̈ܣܶܐ ܠܰܙܩܺܝ̈ܦܶܐ. ܘܰܐܪܡܺܝܘ ܐܶܢܽܘܢ ܒܰܡܥܰܪܬܳܐ ܕܰܛܫܶܝܢ ܗܘܰܘ ܒܳܗ̇. ܘܣܳܡܘ ܟܺܐܦ̈ܶܐ ܪܰܘܖ̈ܒܳܬܳܐ ܥܰܠ ܦܽܘܡܳܗ̇ ܕܰܡܥܰܪܬܳܐ ܥܕܰܡܳܐ ܠܝܰܘܡܳܢܳܐ.
28 ܘܰܠܡܳܩܳܪ ܟܒܰܫ ܝܶܫܽܘܥ ܒܝܰܘܡܳܐ ܗܰܘ. ܘܚܰܪܒܳܗ̇ ܒܦܽܘܡܳܐ ܕܚܰܪܒܳܐ. ܘܰܠܡܰܠܟܳܗ̇ ܘܰܠܟܽܠ ܕܺܐܝܬ ܒܳܗ̇ ܩܰܛܶܠ. ܘܠܳܐ ܫܒܰܩ ܡܶܢܗܽܘܢ ܣܪܺܝܕܳܐ. ܘܰܥܒܰܕ ܠܡܰܠܟܳܐ ܕܡܳܩܳܪ ܐܰܝܟܰܢܳܐ ܕܰܥܒܰܕ ܠܡܰܠܟܳܐ ܕܺܐܝܪܺܝܚܽܘ.
29 ܘܰܥܒܰܪ ܝܶܫܽܘܥ ܘܟܽܠܶܗ ܝܺܣܪܳܐܶܝܠ ܥܰܡܶܗ ܡܶܢ ܡܳܩܳܪ ܠܠܶܒܢܳܐ. ܘܶܐܬܟܰܬܰܫ ܥܰܡ ܠܶܒܢܳܐ.
30 ܘܰܐܫܠܡܳܗ̇ ܡܳܪܝܳܐ ܐܳܦ ܠܳܗ̇ ܒܺܐܝܕܳܐ ܕܺܝܣܪܳܐܶܝܠ ܘܚܰܪܒܽܘܗ̇ ܘܰܠܡܰܠܟܳܗ̇ ܒܦܽܘܡܳܐ ܕܚܰܪܒܳܐ. ܘܰܠܟܽܠ ܢܰܦ̈ܫܳܬܳܐ ܕܺܐܝܬ ܗܘܰܝ̈ ܒܳܗ̇. ܘܠܳܐ ܫܒܰܩ ܒܳܗ̇ ܣܪܺܝܕܳܐ. ܘܰܥܒܰܕ ܝܶܫܽܘܥ ܠܡܰܠܟܳܗ̇ ܐܰܝܟ ܕܰܥܒܰܕ ܠܡܰܠܟܳܐ ܕܺܐܝܪܺܝܚܽܘ.
31 ܘܰܥܒܰܪ ܝܶܫܽܘܥ ܘܟܽܠܶܗ ܝܺܣܪܳܐܶܝܠ ܥܰܡܶܗ ܡܶܢ ܠܶܒܢܳܐ ܠܰܠܟܝܫ. ܘܰܫܪܳܐ ܥܠܶܝܗ̇. ܘܰܥܒܰܕ ܥܰܡܳܗ̇ ܩܪܳܒܳܐ.
32 ܘܰܐܫܠܡܳܗ̇ ܡܳܪܝܳܐ ܠܰܠܟܝܫ ܒܺܐܝܕܳܐ ܕܺܝܣܪܳܐܶܝܠ. ܘܟܰܒܫܳܗ̇ ܒܝܰܘܡܳܐ ܕܰܬܪܶܝܢ. ܘܚܰܪܒܳܗ̇ ܒܦܽܘܡܳܐ ܕܣܰܝܦܳܐ. ܘܰܠܟܽܠܗܶܝܢ ܢܰܦ̈ܫܳܬܳܐ ܕܺܐܝܬ ܗܘܰܝ̈ ܒܳܗ̇. ܐܰܝܟܰܢܳܐ ܕܰܥܒܰܕ ܠܠܶܒܢܳܐ.
33 ܗܳܝܕܶܝܢ ܣܠܶܩ ܗܰܪܡܽܘܢ ܡܰܠܟܳܐ ܕܓܳܙܳܪ ܠܰܡܥܰܕܳܪܽܘܬܗ̇ ܠܰܠܟܝܫ. ܘܚܰܪܒܶܗ ܝܶܫܽܘܥ ܐܳܦ ܠܶܗ ܘܰܠܥܰܡܶܗ ܒܦܽܘܡܳܐ ܕܚܰܪܒܳܐ. ܘܠܳܐ ܫܒܰܩ ܠܶܗ ܣܪܺܝܕܳܐ.
34 ܘܰܥ̣ܒܰܪ ܝܶܫܽܘܥ ܘܟܽܠܶܗ ܝܺܣܪܳܐܶܝܠ ܥܰܡܶܗ ܡܶܢ ܠܟܝܫ ܠܥܶܓܠܽܘܢ. ܘܰܫܪܳܐ ܥܠܶܝܗ̇ ܘܰܥܒܰܕ ܥܰܡܳܗ̇ ܩܪܳܒܳܐ.
35 ܘܟܰܒܫܳܗ̇ ܒܝܰܘܡܳܐ ܗܰܘ. ܘܚܰܪܒܳܗ̇ ܒܦܽܘܡܳܐ ܕܣܰܝܦܳܐ. ܘܰܠܟܽܠ ܢܰܦ̈ܫܳܬܳܐ ܕܺܐܝܬ ܗܘܰܝ̈ ܒܳܗ̇. ܐܰܝܟܰܢܳܐ ܕܰܥܒܰܕ ܠܰܠܟܝܫ.
36 ܘܰܣܠܶܩ ܝܶܫܽܘܥ ܘܟܽܠܶܗ ܝܺܣܪܳܐܶܝܠ ܥܰܡܶܗ ܡܶܢ ܥܶܓܠܽܘܢ ܠܚܶܒܪܽܘܢ. ܘܰܥܒܰܕ ܥܰܡܳܗ̇ ܩܪܳܒܳܐ.
37 ܘܟܰܒܫܳܗ̇ ܘܚܰܪܒܳܗ̇ ܒܦܽܘܡܳܐ ܕܣܰܝܦܳܐ. ܘܰܠܡܰܠܟܳܗ̇ ܘܰܠܟܽܠܗܶܝܢ ܩܽܘܖ̈ܝܳܐ ܕܺܝܠܳܗ̇. ܘܰܠܟܽܠܗܶܝܢ ܢܰܦ̈ܫܳܬܳܐ ܕܺܐܝܬ ܗܘܰܝ̈ ܒܳܗ̇. ܘܠܳܐ ܫ̣ܒܰܩ ܡܶܢܗܶܝܢ ܣܪܺܝܕܳܐ ܐܰܝܟ ܕܰܥܒܰܕ ܠܥܶܓܠܽܘܢ. ܘܰܠܟܽܠ ܢܰܦ̈ܫܳܬܳܐ ܕܺܐܝܬ ܗܘܰܝ̈ ܒܳܗ̇. ܕܰܚܪܰܒ ܐܶܢܶܝܢ.
38 ܘܰܗܦܰܟ ܝܶܫܽܘܥ ܘܟܽܠܶܗ ܝܺܣܪܳܐܶܝܠ ܥܰܡܶܗ ܠܕܳܒܺܝܪ. ܘܶܐܬܟܰܬܰܫ ܥܰܡܳܗ̇.
39 ܘܟܰܒܫܳܗ̇. ܘܰܠܡܰܠܟܳܗ̇. ܘܰܠܟܽܠܗܶܝܢ ܩܽܘܖ̈ܝܳܗ̇. ܘܰܚܪܰܒ ܐܶܢܶܝܢ ܒܦܽܘܡܳܐ ܕܣܰܝܦܳܐ. ܘܰܚܪܰܒ ܠܟܽܠ ܢܰܦ̈ܫܳܬܳܐ ܕܒܳܗ̇. ܘܠܳܐ ܫܒܰܩ ܡܶܢܗܶܝܢ ܣܪܺܝܕܳܐ. ܐܰܝܟ ܕܰܥܒܰܕ ܠܚܶܒܪܽܘܢ. ܗܳܟܰܢܳܐ ܥܒܰܕ ܠܕܳܒܺܝܪ ܘܰܠܡܰܠܟܳܗ̇. ܘܰܐܝܟܰܢܳܐ ܕܰܥܒܰܕ ܠܠܶܒܢܳܐ ܘܰܠܡܰܠܟܳܗ̇.
40 ܘܚܰܪܒܳܗ̇ ܝܶܫܽܘܥ ܠܟܽܠܳܗ̇ ܐܰܪܥܳܐ. ܠܛܽܘܪܳܐ. ܘܰܠܬܰܝܡܢܳܐ. ܘܠܰܦܩܰܥܬܳܐ. ܘܠܰܐܫܕܽܘܕ ܘܰܠܟܽܠܗܽܘܢ ܡܰܠܟܰܝ̈ܗܽܘܢ. ܘܠܳܐ ܫ̣ܒܰܩ ܡܶܢܗܽܘܢ ܣܪܺܝܕܳܐ. ܘܰܠܟܽܠܶܗ ܚܰܝܠܗܽܘܢ ܚܪܰܒ. ܐܰܝܟܰܢܳܐ ܕܦܰܩܕܶܗ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
41 ܘܰܚܪܰܒ ܐܶܢܽܘܢ ܝܶܫܽܘܥ. ܡܶܢ ܪܩܶܡ ܕܓܰܐܝܳܐ ܥܕܰܡܳܐ ܠܥܳܐܙܳܐ. ܘܰܠܟܽܠܳܗ̇ ܐܰܪܥܳܐ ܕܓܶܫܳܢ. ܘܰܥܕܰܡܳܐ ܠܓܶܒܥܽܘܢ.
42 ܘܰܠܟܽܠܗܽܘܢ ܡܰܠܟ̈ܶܐ ܗܳܠܶܝܢ ܘܠܰܐܬܖ̈ܰܘܳܬܗܽܘܢ ܟܒܰܫ ܝܶܫܽܘܥ ܒܙܰܒܢܳܐ ܚܰܕ. ܡܶܛܽܠ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ ܥܰܡܶܗ. ܘܗܽܘܝܽܘ ܥܳܒܶܕ ܩܪܳܒܳܐ ܠܺܝܣܪܳܐܶܝܠ.