Joshua 9
The Book of Joshua
܀ ܝܫܘܥ ܒܪ ܢܘܢ ܛ ܀
1 ܘܟܰܕ ܫ̣ܡܰܥܘ ܟܽܠܗܽܘܢ ܡܰܠ̈ܟܶܐ ܕܺܐܝܬ ܒܥܶܒܪܳܐ ܕܝܽܘܪܕܢܳܢ. ܒܛܽܘܖ̈ܶܐ ܘܰܒܦܰܩ̈ܥܳܬܳܐ. ܘܰܒܟܽܠܗܽܘܢ ܣܦܳܖ̈ܰܘܗܝ ܕܝܰܡܳܐ ܪܰܒܳܐ ܕܠܽܘܩܒܰܠ ܠܶܒܢܳܢ. ܚܺܝܬܳܝ̈ܶܐ. ܘܳܐܡܽܘܖ̈ܳܝܶܐ. ܘܰܟܢܰܥܢܳܝ̈ܶܐ. ܘܦܰܖ̈ܙܳܝܶܐ. ܘܚܳܘܳܝ̈ܶܐ. ܘܝܳܒܽܘܣܳܝ̈ܶܐ.
2 ܐܶܬܟܰܢܰܫܘ ܐܰܟܚܕܳܐ ܠܡܶܥܒܰܕ ܩܪܳܒܳܐ ܥܰܡ ܝܶܫܽܘܥ ܘܥܰܡ ܝܺܣܪܳܐܶܝܠ. ܡܶܢ ܚܰܕ ܦܽܘܡ.
3 ܘܥܳܡܽܘܖ̈ܶܐ ܕܓܶܒܥܽܘܢ ܫ̣ܡܰܥܘ ܡܶܕܶܡ ܕܰܥ̣ܒܰܕ ܝܶܫܽܘܥ ܠܥܳܝ ܘܠܺܐܝܪܺܝܚܽܘ.
4 ܘܰܥ̣ܒܰܕܘ ܐܳܦ ܗܶܢܽܘܢ ܒܰܥܪܺܝܡܽܘܬܳܐ. ܘܶܐܙܰܠܘ ܐܶܙܕܰܘܰܕܘ. ܘܰܐܪܡܺܝܘ ܣܰܩ̈ܶܐ ܒܠܳܝ̈ܶܐ ܥܰܠ ܚܶܡܖ̈ܗܽܘܢ. ܘܙܶܩ̈ܶܐ ܕܚܰܡܪܳܐ ܕܰܒ̈ܠܳܝܳܢ. ܘܰܡܒܰܙ̈ܥܳܢ ܘܰܡܨܰܖ̈ܪܳܢ.
5 ܘܰܡܣܳܐܢ̈ܶܐ ܕܰܒ̈ܠܳܝܳܢ ܘܛܰܖ̈ܡܺܝܣܝܳܬܳܐ ܣܐܺܝܢܺܝܢ ܗܘܰܘ ܒܖ̈ܶܓ̣ܠܰܝܗܽܘܢ. ܘܢܰܚ̈ܬܶܐ ܒ̈ܠܳܝܶܐ ܠܒܺܝܫܺܝܢ ܗܘܰܘ. ܘܠܰܚܡܳܐ ܕܰܙܘܳܕܰܝ̈ܗܽܘܢ ܝܰܒܶܫܘ. ܘܰܗܘܳܐ ܠܶܗ ܦܰܓܽܘܪܳܐ.
6 ܘܶܐܬܘ ܠܘܳܬ ܝܶܫܽܘܥ ܠܡܰܫܪܺܝܬܳܐ ܠܓܰܠܓܳܠܳܐ. ܘܶܐܡܰܪܘ ܠܶܗ ܘܠܰܕܒܶܝܬ ܝܺܣܪܳܐܶܝܠ. ܡܶܢ ܐܰܬܪܳܐ ܪܰܚܺܝܩܳܐ ܐܶܬܰܝܢ. ܗܳܫܳܐ ܗܰܒܘ ܠܰܢ ܝܰܡܺܝܢܳܐ.
7 ܐܳܡܪܺܝܢ ܕܒܶܝܬ ܝܺܣܪܳܐܶܝܠ ܠܚܳܘܳܝ̈ܶܐ. ܐܶܢ ܠܘܳܬܢ ܥܳܡܪܺܝܢ ܐ̱ܢܬܽܘܢ. ܠܡܳܢܳܐ ܗܳܘܝܳܐ ܠܟܽܘܢ ܝܰܡܺܝܢܳܐ.
8 ܘܶܐܡܰܪܘ ܠܝܶܫܽܘܥ ܥܰܒܕܰܝ̈ܟ ܚܢܰܢ. ܐܳܡܰܪ ܠܗܽܘܢ ܝܶܫܽܘܥ ܐܰܝܡܶܟܳܐ ܐܰܢ̱ܬܽܘܢ. ܘܡܶܢ ܐܰܝܡܶܟܳܐ ܐܶܬܰܝܬܽܘܢ.
9 ܘܶܐܡܰܪܘ ܠܶܗ. ܡܶܢ ܐܰܬܪܳܐ ܕܪܰܚܺܝܩ ܛܳܒ ܐܶܬܘ ܥܰܒܕܰܝ̈ܟ. ܠܰܫܡܶܗ ܕܡܳܪܝܳܐ ܐܰܠܳܗܳܟ. ܡܶܛܽܠ ܕܰܫܡܰܥܢ ܫܡܶܗ ܘܟܽܠܡܶܕܶܡ ܕܰܥܒܰܕ ܒܡܶܨܪܶܝܢ.
10 ܘܟܽܠ ܕܰܥܒܰܕ ܠܰܬܖ̈ܰܝܗܽܘܢ ܡܰܠ̈ܟܶܐ ܕܳܐܡܽܘܖ̈ܳܝܶܐ ܕܰܒܥܶܒܪܳܐ ܕܝܽܘܪܕܢܳܢ. ܠܣܺܝܚܽܘܢ ܡܰܠܟܳܐ ܕܚܶܫܒܽܘܢ. ܘܰܠܥܽܘܓ ܡܰܠܟܳܐ ܕܡܰܬܢܶܝܢ. ܕܝܳܬܶܒ ܗܘܳܐ ܒܥܶܣܬܪܽܘܬ.
11 ܘܶܐܡܰܪܘ ܠܰܢ ܩܰܫܺܝ̈ܫܰܢ. ܘܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܰܢ. ܣܰܒܘ ܥܰܡܟܽܘܢ ܙܘܳܕ̈ܶܐ ܠܽܐܘܪܚܳܐ ܘܙܶܠܘ ܠܽܐܘܪܥܗܽܘܢ. ܘܶܐܡܰܪܘ ܠܗܽܘܢ ܕܥܰܒܕܰܝ̈ܟܽܘܢ ܚܢܰܢ. ܡܶܟܺܝܠ ܗܰܒܘ ܠܰܢ ܝܰܡܺܝܢܳܐ.
12 ܘܶܐܡܰܪܘ ܠܝܶܫܽܘܥ. ܗܳܢܳܐ ܠܰܚܡܰܢ ܟܰܕ ܚܰܡܺܝܡ ܐܶܙܕܰܘܰܕܢܳܝܗܝ ܡܶܢ ܒܳܬܰܝ̈ܢ. ܒܝܰܘܡܳܐ ܕܰܢܦܰܩܢ ܠܡܶܐܬܳܐ ܠܘܳܬܟܽܘܢ. ܘܗܳܫܳܐ ܗܳܐ ܝܺܒܶܫ ܘܰܗܘܳܐ ܦܰܓܽܘܪܳܐ.
13 ܘܗܳܠܶܝܢ ܙܶܩ̈ܶܐ ܕܚܰܡܪܳܐ. ܡܠܰܝܢ ܐܶܢܶܝܢ ܟܰܕ ܚܰܕ̈ܬܢ. ܘܗܳܐ ܐܶܬܒܰܙܰܥܝ̈. ܘܗܳܠܶܝܢ ܢܰܚ̈ܬܰܝܢ ܘܰܡܣܳܐܢܰܝ̈ܢ. ܟܰܕ ܚܰܕ̈ܬܝܳܢ ܢܣܰܒܢ ܐܶܢܽܘܢ ܠܰܢ. ܘܗܳܐ ܒܠܺܝܘ. ܡܶܛܽܠ ܕܛܳܒ ܣܰܓܺܝܐܳܐ ܗܘܳܬ ܐܽܘܪܚܳܐ.
14 ܘܰܢ̣ܣܰܒܘ ܓܰܒܖ̈ܶܐ ܗܳܠܶܝܢ ܡܶܢ ܙܘܳܕܰܝ̈ܗܽܘܢ ܘܶܐܙܰܠ̣ܘ. ܘܡܶܢ ܦܽܘܡܶܗ ܕܡܳܪܝܳܐ ܠܳܐ ܫܐܶܠܘ.
15 ܘܰܥܒܰܕ ܠܗܽܘܢ ܝܶܫܽܘܥ ܫܠܳܡܳܐ. ܘܝܰܗܒ ܠܗܽܘܢ ܝܰܡܺܝܢܳܐ ܠܚܰܝܰܝ̈ܗܽܘܢ. ܘܺܝܡܰܘ ܠܗܽܘܢ ܪܰܘܖ̈ܒܳܢܶܐ ܕܰܟܢܽܘܫܬܳܐ.
16 ܘܡܶܢ ܒܳܬܰܪ ܬܠܳܬܳܐ ܝܰܘܡܺܝ̈ܢ. ܡܶܢ ܒܳܬܰܪ ܕܝܰܗܒܘ ܠܗܽܘܢ ܝܰܡܺܝܢܳܐ. ܫ̣ܡܰܥܘ ܕܩܰܪܺܝܒܺܝܢ ܐܶܢܽܘܢ ܠܗܽܘܢ. ܘܒܰܝܢܳܬܗܽܘܢ ܫܪܶܝܢ.
17 ܘܰܫܩܰܠܘ ܒܢܰܝ̈ ܝܺܣܪܳܐܶܝܠ. ܘܶܐܬܘ ܠܩܽܘܖ̈ܝܗܽܘܢ ܒܝܰܘܡܳܐ ܕܰܬܠܳܬܳܐ. ܘܰܫܡܳܗ̈ܶܐ ܕܩܽܘܖ̈ܝܗܽܘܢ. ܓܶܒܥܽܘܢ. ܘܰܟܦܺܝܪܳܐ. ܘܥܺܝܪܽܘܬ. ܘܩܽܘܪܝܰܬ ܢܰܥܪܺܝܢ.
18 ܘܠܳܐ ܩܰܛܶܠܘ ܐܶܢܽܘܢ ܒܢܰܝ̈ ܝܺܣܪܳܐܶܝܠ. ܡܶܛܽܠ ܕܺܝܡܰܘ ܠܗܽܘܢ ܪܰܘܖ̈ܒܳܢܶܐ ܕܰܟܢܽܘܫܬܳܐ ܒܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܘܪܳܛܢܺܝܢ ܗܘܰܘ ܘܪܳܝܒܺܝܢ ܟܽܠܳܗ̇ ܟܢܽܘܫܬܳܐ ܥܰܠ ܪܰܘܖ̈ܒܳܢܶܐ.
19 ܘܳܐܡܪܺܝܢ ܪܰܘܖ̈ܒܳܢܶܐ ܕܰܟܢܽܘܫܬܳܐ. ܚܢܰܢ ܝܺܡܰܝܢ ܠܗܽܘܢ ܒܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܡܶܟܺܝܠ ܠܳܐ ܡܶܫܟܚܺܝܢܰܢ ܠܡܰܗܳܪܽܘ ܐܶܢܽܘܢ.
20 ܗܳܟܰܢܳܐ ܕܶܝܢ ܥܳܒܕܺܝܢ ܚܢܰܢ ܘܡܰܚܶܝܢ ܚܢܰܢ ܠܗܽܘܢ. ܕܠܳܐ ܢܶܗܘܶܐ ܥܠܰܝܢ ܪܽܘܓܙܳܐ. ܡܶܛܽܠ ܡܰܘܡܳܬܳܐ ܕܺܝܡܰܢ ܠܗܽܘܢ.
21 ܘܳܐܡܪܺܝܢ ܪܰܘܖ̈ܒܳܢܶܐ ܠܰܒܢܰܝ̈ ܝܺܣܪܳܐܶܝܠ. ܢܺܚܽܘܢ. ܘܢܶܗܘܽܘܢ ܠܳܩܛܺܝܢ ܩܰܝ̈ܣܶܐ. ܘܡܳܠܶܝܢ ܡܰܝ̈ܳܐ ܠܟܽܠܳܗ̇ ܟܢܽܘܫܬܳܐ. ܘܰܗܘܰܘ ܠܳܩܛܰܝ̈ ܩܰܝ̈ܣܶܐ ܘܡܳܠܶܝܢ ܡܰܝ̈ܳܐ ܠܰܟܢܽܘܫܬܶܗ ܕܡܳܪܝܳܐ ܥܕܰܡܳܐ ܠܝܰܘܡܳܢܳܐ. ܐܰܝܟܰܢܳܐ ܕܶܐܡܰܪܘ ܠܗܽܘܢ ܪܰܘܖ̈ܒܳܢܶܐ.
22 ܘܰܩܪܳܐ ܐܶܢܽܘܢ ܝܶܫܽܘܥ ܘܶܐܡܰܪ ܠܗܽܘܢ. ܠܡܳܢܳܐ ܢܟܠܬܽܘܢܳܢ ܘܶܐܡܰܪܬܽܘܢ ܠܰܢ ܕܛܳܒ ܪܰܚܺܝܩܺܝܢ ܚܢܰܢ ܡܶܢܟܽܘܢ. ܘܗܳܐ ܠܘܳܬܰܢ ܥܳܡܪܺܝܢ ܐ̱ܢܬܽܘܢ.
23 ܡܶܟܺܝܠ ܬܶܗܘܢ ܠܺܝܛܺܝܢ. ܘܠܳܐ ܢܶܥܢܰܕ ܡܶܢܟܽܘܢ ܓܰܒܪܳܐ ܠܳܩܶܛ ܩܰܝ̈ܣܶܐ ܘܡܳܠܶܐ ܡܰܝ̈ܳܐ ܠܒܰܝܬܶܗ ܕܰܐܠܳܗܳܐ.
24 ܘܰܥܢܰܘ ܘܶܐܡܰܪܘ ܠܝܶܫܽܘܥ. ܡܶܫܬܡܳܥܽܘ ܐܶܫܬܡܰܥ ܠܥܰܒܕܰܝ̈ܟ ܡܶܕܶܡ ܕܦܰܩܶܕ ܡܳܪܝܳܐ ܐܰܠܳܗܳܟ ܠܡܽܘܫܶܐ ܥܰܒܕܶܗ. ܠܡܶܬܰܠ ܠܟܽܘܢ ܟܽܠܳܗ̇ ܐܰܪܥܳܐ. ܘܰܠܡܰܘܒܳܕܽܘ ܠܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ ܡܶܢ ܩܕܳܡܰܝܟܽܘܢ. ܘܰܕܚܶܠܢ ܛܳܒ ܡܶܢ ܢܰܦܫܰܢ ܘܰܥܒܰܕܢ ܗܳܟܰܢܳܐ.
25 ܗܳܫܳܐ ܗܳܐ ܒܺܐܝܕܰܝ̈ܟ ܚܢܰܢ. ܐܰܝܟܰܢܳܐ ܕܫܰܦܺܝܪ ܒܥܰܝܢܰܝ̈ܟ ܠܡܶܥܒܰܕ ܠܰܢ. ܥܒܶܕ ܠܰܢ.
26 ܘܰܥܒܰܕ ܠܗܽܘܢ ܝܶܫܽܘܥ ܗܳܟܰܢܳܐ. ܘܦܰܨܺܝ ܐܶܢܽܘܢ ܡܶܢ ܐܺܝܕܳܐ ܕܺܝܣܪܳܐܶܝܠ. ܘܠܳܐ ܩܰܛܠܘ ܐܶܢܽܘܢ.
27 ܘܰܥܒܰܕ ܐܶܢܽܘܢ ܝܶܫܽܘܥ ܒܶܗ ܒܝܰܘܡܳܐ ܗܰܘ. ܠܳܩܛܰܝ̈ ܩܰܝ̈ܣܶܐ. ܘܡܳܠ̈ܝܰܝ ܡܰܝ̈ܳܐ ܠܰܟܢܽܘܫܬܳܐ ܘܰܠܡܰܕܒܚܶܗ ܕܡܳܪܝܳܐ ܥܕܰܡܳܐ ܠܝܰܘܡܳܢܳܐ. ܒܰܐܬܪܳܐ ܕܨܳܒܶܐ ܡܳܪܝܳܐ.