Joshua 3
The Book of Joshua
܀ ܝܫܘܥ ܒܪ ܢܘܢ ܓ ܀
1 ܘܩܰܕܶܡ ܝܶܫܽܘܥ ܒܨܰܦܪܳܐ ܘܰܫܩܰܠܘ ܡܶܢ ܣܳܛܺܝܡ. ܘܶܐܬܘ ܥܕܰܡܳܐ ܠܝܽܘܪܕܢܳܢ ܟܽܠܗܽܘܢ ܕܒܶܝܬ ܝܺܣܪܳܐܶܝܠ. ܘܒܳܬܘ ܬܰܡܳܢ ܘܠܳܐ ܥ̣ܒܰܪܘ.
2 ܘܡܶܢ ܒܳܬܰܪ ܬܠܳܬܳܐ ܝܰܘܡܺܝ̈ܢ ܥ̣ܒܰܪܘ ܫܰܠܺܝܛܳܢ̈ܶܐ ܒܓܰܘ ܡܰܫܪܺܝܬܳܐ.
3 ܘܦܰܩܶܕܘ ܠܥܰܡܳܐ. ܘܶܐܡܰܪܘ ܠܗܽܘܢ. ܡܳܐ ܕܰܚܙܰܝܬܽܘܢ ܠܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ ܐܰܠܳܗܟܽܘܢ. ܘܟܳܗ̈ܢܶܐ ܘܠܶܘ̈ܳܝܶܐ ܕܰܫܩܺܝܠܺܝܢ ܠܳܗ̇. ܗܳܝܕܶܝܢ ܫܩܽܘܠܘ ܡܶܢ ܐܰܬܪܟܽܘܢ. ܘܙܶܠܘ ܒܳܬܪܳܗ̇.
4 ܘܢܶܗܘܶܐ ܪܰܚܺܝܩ ܒܰܝܢܰܝ̈ܟܽܘܢ ܘܰܠܩܺܐܒܽܘܬܳܐ ܐܰܝܟ ܬܪܶܝܢ ܐܰܠܦܺܝ̈ܢ ܐܰܡܺܝ̈ܢ. ܒܰܠܚܽܘܕ ܒܰܡܫܽܘܚܬܳܐ. ܠܳܐ ܬܶܬܩܰܪܒܽܘܢ ܠܘܳܬܗ̇. ܡܶܛܽܠ ܕܬܶܕܥܽܘܢ ܐܽܘܪܚܳܐ ܕܬܺܐܙܽܠܘܢ ܒܳܗ̇. ܡܶܛܽܠ ܕܠܳܐ ܥܒܰܪܬܽܘܢ ܒܽܐܘܪܚܳܐ ܡܶܢ ܐܶܬܡܳܠܝ ܘܡܶܢ ܡܢܳܬܡܳܠܝ.
5 ܘܶܐܡܰܪ ܝܶܫܽܘܥ ܠܥܰܡܳܐ ܐܶܬܩܰܕܰܫܘ. ܡܶܛܽܠ ܕܰܡܚܳܪ ܥܳܒܶܕ ܡܳܪܝܳܐ ܬܶܕܡܽܘܪܬܳܐ ܒܰܝܢܳܬܟܽܘܢ.
6 ܘܶܐܡܰܪ ܝܶܫܽܘܥ ܠܟܳܗ̈ܢܶܐ. ܫܩܽܘܠܘ ܩܺܐܒܽܘܬܳܐ ܕܕܺܝܰܐܬܺܝܩܺܝ. ܘܰܥܒܰܪܘ ܩܕܳܡ ܥܰܡܳܐ. ܘܰܫܩܰܠܘ ܩܺܐܒܽܘܬܳܐ ܕܕܺܝܰܐܬܺܝܩܺܝ ܘܰܥܒܰܪܘ ܩܕܳܡ ܥܰܡܳܐ.
7 ܘܶܐܡܰܪ ܡܳܪܝܳܐ ܠܝܶܫܽܘܥ. ܡܶܢ ܝܰܘܡܳܢܳܐ ܐܶܫܰܪܶܐ ܠܡܰܘܪܳܒܽܘܬܳܟ ܒܥܰܝ̈ܢܰܝ ܟܽܠܶܗ ܝܺܣܪܳܐܶܝܠ. ܕܢܶܕܥܽܘܢ ܕܰܐܝܟܰܢܳܐ ܕܰܗܘܺܝܬ ܥܰܡ ܡܽܘܫܶܐ. ܐܶܗܘܶܐ ܐܳܦ ܥܰܡܳܟ.
8 ܘܰܐܢ̱ܬ ܦܰܩܶܕ ܠܟܳܗ̈ܢܶܐ ܕܰܫܩܺܝܠܺܝܢ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ. ܘܶܐܡܰܪ ܠܗܽܘܢ. ܡܳܐ ܕܡܳܛܶܝܬܽܘܢ ܠܪܺܝܫ ܡܰܝ̈ܳܐ ܕܝܽܘܪܕܢܳܢ. ܒܶܗ ܒܝܽܘܪܕܢܳܢ. ܩܽܘܡܘ.
9 ܘܶܐܡܰܪ ܝܶܫܽܘܥ ܠܰܒܢܰܝ̈ ܝܺܣܪܳܐܶܝܠ. ܩܪܽܘܒܘ ܠܗܳܪܟܳܐ. ܘܰܫܡܰܥܘ ܡܶܠܰܘ̈ܗܝ ܕܡܳܪܝܳܐ ܐܰܠܳܗܟܽܘܢ.
10 ܘܶܐܡܰܪ ܝܶܫܽܘܥ ܒܗܳܕܶܐ ܗܘܰܝܬܽܘܢ ܝܳܕܥܺܝܢ ܕܰܐܠܳܗܳܐ ܚܰܝܳܐ ܒܟܽܘܢ. ܘܚܳܪܶܒ ܡܶܢ ܩܕܳܡܰܝܟܽܘܢ ܠܚܺܝܬܳܝ̈ܶܐ. ܘܠܰܟܢܰܥ̈ܢܳܝܶܐ. ܘܰܠܚܳܘܳܝ̈ܶܐ. ܘܰܠܦܰܖ̈ܙܳܝܶܐ. ܘܰܠܓܰܖ̈ܓܽܘܣܳܝܶܐ. ܘܠܳܐܡܽܘܖ̈ܳܝܶܐ. ܘܰܠܝܳܒܽܘܣܳܝ̈ܶܐ.
11 ܕܗܳܐ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ ܡܳܪܳܗ̇ ܕܟܽܠܳܗ̇ ܐܰܪܥܳܐ ܥܳܒܪܳܐ ܩܕܳܡܰܝܟܽܘܢ ܒܝܽܘܪܕܢܳܢ.
12 ܡܶܟܺܝܠ ܕܒܰܪܘ ܠܟܽܘܢ ܬܪܶܥܣܰܪ ܓܰܒܖ̈ܺܝܢ ܡܶܢ ܟܽܠܗܽܘܢ ܫܰܒ̈ܛܶܐ ܕܺܝܣܪܳܐܶܝܠ. ܚܰܕ ܚܰܕ ܓܰܒܪܳܐ ܡܶܢ ܫܰܒܛܳܐ.
13 ܘܡܳܐ ܕܶܐܬܬܢܺܝ̈ܚܝ ܦܰܣ̈ܳܬܳܐ ܕܖ̈ܶܓܠܰܝܗܽܘܢ ܕܟܳܗ̈ܢܶܐ ܕܰܫܩܺܝܠܺܝܢ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ ܕܟܽܠܳܗ̇ ܐܰܪܥܳܐ ܒܡܰܝ̈ܳܐ ܕܝܽܘܪܕܢܳܢ. ܡܰܝ̈ܳܐ ܕܝܽܘܪܕܢܳܢ ܢܶܬܦܰܠܓܽܘܢ. ܡܰܝ̈ܳܐ ܕܢܳܚܬܺܝܢ ܡܶܢ ܠܥܶܠ ܢܩܽܘܡܽܘܢ ܐܰܝܟ ܕܰܒܙܶܩܳܐ ܚܕܳܐ. ܠܣܶܛܪܳܐ ܚܰܕ.
14 ܘܟܰܕ ܫ̣ܩܰܠܘ ܥܰܡܳܐ ܡܶܢ ܡܰܫܟܢܰܝ̈ܗܽܘܢ ܠܡܶܥܒܰܪ ܝܽܘܪܕܢܳܢ. ܟܳܗ̈ܢܶܐ ܕܰܫܩܺܝܠܺܝܢ ܗܘܰܘ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ. ܐܳܙܺܠܝܢ ܗܘܰܘ ܩܕܳܡ ܥܰܡܳܐ.
15 ܘܟܰܕ ܡܰܛܺܝܘ ܫܩܺܝ̈ܠܰܝ ܩܺܐܒܽܘܬܳܐ ܥܕܰܡܳܐ ܠܝܽܘܪܕܢܳܢ. ܖ̈ܶܓܠܰܝܗܽܘܢ ܕܟܳܗ̈ܢܶܐ ܕܰܫܩܺܝܠܺܝܢ ܗܘܰܘ ܩܺܐܒܽܘܬܳܐ ܐܶܨܛܰܒܰܥ̈ܝ ܒܰܣܦܳܖ̈ܰܝ ܡܰܝ̈ܳܐ. ܘܝܽܘܪܕܢܳܢ ܡ̇ܠܶܐ̣ ܗܘܳܐ ܣܦܳܐ ܒܣܶܦܳܐ ܟܽܠܗܽܘܢ ܝܰܘ̈ܡܳܬܐ ܕܰܚܨܳܕܳܐ.
16 ܘܩ̣ܳܡܘ ܡܰܝ̈ܳܐ ܕܢܳܚܬܺܝܢ ܗܘܰܘ ܡܶܢ ܠܥܶܠ ܩ̣ܳܡܘ ܐܰܝܟ ܕܰܒܙܶܩܳܐ ܚܕܳܐ ܠܣܶܛܪܳܐ ܚܰܕ. ܐܰܪܚܶܩܘ ܛܳܒ ܡܶܢ ܐܳܪܳܡ ܩܪܺܝܬܐ ܕܺܐܝܬ ܥܰܠ ܓܶܢ̱ܒ ܨܰܪܬܰܡ. ܘܰܕܢܳܚܬܺܝܢ ܠܝܰܡܳܐ ܕܡܰܥܪܒܳܐ ܝܰܡܳܐ ܕܡܶܠܚܳܐ. ܓܡܰܪܘ ܘܶܐܬܦܠܶܓܘ ܥܰܡܳܐ ܕܶܝܢ ܥܒܰܪܘ ܠܽܘܩܒܰܠ ܐܺܝܪܺܝܚܽܘ.
17 ܘܩ̣ܳܡܘ ܟܳܗ̈ܢܶܐ ܕܰܫܩܺܝܠܺܝܢ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ ܒܝܰܒܫܳܐ ܒܓܰܘ ܝܽܘܪܕܢܳܢ. ܘܶܐܬܛܰܝܰܒܘ ܟܽܠܗܽܘܢ ܕܒܶܝܬ ܝܺܣܪܳܐܶܝܠ ܥܳܒܪܺܝܢ ܒܝܰܒܫܳܐ. ܥܕܰܡܳܐ ܕܰܫ̣ܠܶܡܘ ܟܽܠܶܗ ܥܰܡܳܐ ܠܡܶܥܒܰܪ ܝܽܘܪܕܢܳܢ.