Joshua 5
The Book of Joshua
܀ ܝܫܘܥ ܒܪ ܢܘܢ ܗ ܀
1 ܘܟܰܕ ܫ̣ܡܰܥܘ ܟܽܠܗܽܘܢ ܡܰܠܟ̈ܶܐ ܕܳܐܡܽܘܖ̈ܳܝܶܐ ܕܰܒܥܶܒܪܳܐ ܕܝܽܘܪܕܢܳܢ ܕܰܒܡܰܥܪܒܳܐ. ܘܟܽܠܗܽܘܢ ܡܰܠ̈ܟܶܐ ܕܰܟܢܰܥܢ ܕܥܰܠ ܝܰܕ ܝܰܡܳܐ. ܕܰܐܘܒܶܫ ܡܳܪܝܳܐ ܡܰܝ̈ܳܐ ܕܝܽܘܪܕܢܳܢ ܡܶܢ ܩܕܳܡ ܒܢܰܝ̈ ܝܺܣܪܳܐܶܝܠ ܥܕܰܡܳܐ ܕܰܥ̣ܒܰܪܘ. ܙܳܥ ܠܶܒܗܽܘܢ. ܘܠܳܐ ܐܶܫܬܰܚܪܰܬ ܒܗܽܘܢ ܢܰܦܫܳܐ ܡܶܢ ܩܕܳܡ ܒܢܰܝ̈ ܝܺܣܪܳܐܶܝܠ.
2 ܒܶܗ ܒܙܰܒܢܳܐ ܗܰܘ. ܐܶܡܰܪ ܡܳܪܝܳܐ ܠܝܶܫܽܘܥ. ܥܒܶܕ ܠܳܟ ܣܰܦܣܺܝܪܳܐ ܕܛܰܪܳܢܳܐ. ܘܰܗܦܽܘܟ ܓܙܽܘܪ ܐܶܢܽܘܢ ܠܰܒܢܰܝ̈ ܝܺܣܪܳܐܶܝܠ ܬܶܢܝܳܢܽܘܬ.
3 ܘܰܥ̣ܒܰܕ ܠܶܗ ܝܶܫܽܘܥ ܣܰܦܣܺܝܪܳܐ ܕܛܰܪܳܢܳܐ. ܘܰܓܙܰܪ ܐܶܢܽܘܢ ܠܰܒܢܰܝ̈ ܝܺܣܪܳܐܶܝܠ ܬܶܢܝܳܢܽܘܬ ܒܪܳܡܬܐ ܕܥܽܘܖ̈ܠܶܐ.
4 ܘܗܳܠܶܝܢ ܐܶܢܽܘܢ ܕܰܓܙܰܪ ܝܶܫܽܘܥ. ܠܟܽܠ ܝܰܠܕܳܐ ܕܥܰܡܳܐ ܕܰܢ̣ܦܰܩܘ ܡܶܢ ܡܶܨܪܶܝܢ ܕܶܟܖ̈ܶܐ. ܡܶܛܽܠ ܕܟܽܠܗܽܘܢ ܓܰܒܖ̈ܶܐ ܥܳܒܕܰܝ̈ ܩܪܳܒܳܐ. ܡܺܝܬܘ ܒܡܰܕܒܪܳܐ ܒܽܐܘܪܚܳܐ ܟܰܕ ܢܦ̣ܰܩܘ ܡܶܢ ܡܶܨܪܶܝܢ.
5 ܡܶܛܽܠ ܕܰܓܙܺܝܪܺܝܢ ܗܘܰܘ ܟܽܠ ܥܰܡܳܐ ܕܰܢ̣ܦܰܩܘ. ܘܟܽܠ ܥܰܡܳܐ ܕܶܐܬܝܠܶܕ ܒܡܰܕܒܪܳܐ. ܒܽܐܘܪܚܳܐ ܟܰܕ ܢ̣ܦܰܩܘ ܡܶܢ ܡܶܨܪܶܝܢ ܠܳܐ ܐܶܬܓܙܰܪܘ.
6 ܡܶܛܽܠ ܕܰܐܪܒܥܺܝܢ ܫܢܺܝ̈ܢ ܗܰܠܶܟܘ ܒܢܰܝ̈ ܝܺܣܪܳܐܶܝܠ ܒܡܰܕܒܪܳܐ. ܥܕܰܡܳܐ ܕܣܳܦܘ ܟܽܠܶܗ ܥܰܡܳܐ ܕܓܰܒܖ̈ܶܐ ܥܳܒܕܰܝ̈ ܩܪܳܒܳܐ ܕܰܢ̣ܦܰܩܘ ܡܶܢ ܡܶܨܪܶܝܢ. ܥܰܠ ܕܠܳܐ ܫ̣ܡܰܥܘ ܒܩܳܠܶܗ ܕܡܳܪܝܳܐ ܐܰܠܳܗܗܽܘܢ. ܘܺܝܡܳܐ ܠܗܽܘܢ ܡܳܪܝܳܐ. ܕܠܳܐ ܢܚܰܘܶܐ ܐܶܢܽܘܢ ܐܰܪܥܳܐ ܕܺܝܡܳܐ ܠܰܐܒܳܗܰܝ̈ܗܽܘܢ ܠܡܶܬܰܠ ܠܗܽܘܢ. ܐܰܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ.
7 ܘܠܰܒܢܰܝ̈ܗܽܘܢ ܕܰܗܘܰܘ ܡܶܢ ܒܳܬܰܪܗܽܘܢ. ܠܗܽܘܢ ܓܙܰܪ ܝܶܫܽܘܥ. ܡܶܛܽܠ ܕܥܽܘܖ̈ܠܺܝܢ ܗܘܰܘ ܠܳܐ ܓܙܺܝܪܺܝܢ ܗܘܰܘ.
8 ܘܟܰܕ ܓܡܰܪܘ ܟܽܠܶܗ ܥܰܡܳܐ ܠܡܶܬܓܙܳܪܽܘ. ܘܺܝܬܒܘ ܒܕܽܘ̈ܟܝܳܬܗܽܘܢ ܒܡܰܫܪܺܝܬܳܐ ܥܕܰܡܳܐ ܕܶܐܬܐܣܺܝܘ.
9 ܘܶܐܡܰܪ ܡܳܪܝܳܐ ܠܝܶܫܽܘܥ. ܝܰܘܡܳܢܳܐ ܐܰܥ̇ܒܪܶܬ ܚܶܣܕܳܐ ܕܡܶܨܖ̈ܳܝܶܐ ܡܶܢܟܽܘܢ ܘܰܩܪܳܐ ܫܡܶܗ ܕܰܐܬܪܰܐ ܗܰܘ ܓܰܠܓܳܠܳܐ ܥܕܰܡܳܐ ܠܝܰܘܡܳܢܳܐ.
10 ܘܰܫܪܰܘ ܒܢܰܝ̈ ܝܺܣܪܳܐܶܝܠ ܒܓܰܠܓܳܠܳܐ. ܘܰܥ̣ܒܰܕܘ ܦܶܨܚܳܐ ܒܰܐܪܒܰܥܶܣܪܳܐ ܒܝܰܪܚܳܐ ܩܰܕܡܳܝܳܐ. ܒܪܰܡܫܳܐ ܒܰܦܩܰܥܬܳܐ ܕܺܐܝܪܺܝܚܽܘ.
11 ܘܶܐܟܰܠܘ ܡܶܢ ܥܒܽܘܪܳܐ ܕܰܐܪܥܳܐ ܡܶܢ ܒܳܬܰܪ ܦܶܨܚܳܐ. ܦܰܛܺܝܖ̈ܶܐ. ܘܩܶܠ̈ܝܳܬܳܐ ܐܶܟܰܠܘ ܒܶܗ ܒܝܰܘܡܳܐ ܗܳܢܳܐ.
12 ܘܶܐܫܬܩܶܠ ܡܰܢܢܳܐ ܡܶܢ ܒܳܬܰܪ ܝܰܘܡܳܐ. ܟܰܕ ܐܶܟܰܠܘ ܡܶܢ ܥܒܽܘܪܳܐ ܕܰܐܪܥܳܐ. ܘܠܳܐ ܗܘܳܐ ܬܽܘܒ ܡܰܢܢܳܐ ܠܰܒܢܰܝ̈ ܝܺܣܪܳܐܶܝܠ. ܘܶܐܟܰܠܘ ܡܶܢ ܥܠܰܠܬܳܗ̇ ܕܰܐܪܥܳܐ ܕܰܟܢܰܥܢ ܒܳܗ̇ ܒܫܰܢ̱ܬܳܐ ܗܳܝ.
13 ܘܟܰܕ ܗܘܳܐ ܝܶܫܽܘܥ ܒܰܦܩܰܥܬܳܐ ܕܺܐܝܪܺܝܚܽܘ. ܐܰܪܺܝܡ ܥܰܝܢܰܘ̈ܗܝ ܘܰܚܙܳܐ ܓܰܒܪܳܐ ܚܰܕ ܩܳܐܶܡ ܠܩܽܘܒܠܶܗ. ܘܣܰܝܦܶܗ ܫܡܺܝܛ ܘܰܐܚܺܝܕ ܒܺܐܝܕܶܗ. ܘܶܐܙܰܠ ܝܶܫܽܘܥ ܠܘܳܬܶܗ ܘܶܐܡܰܪ ܠܶܗ. ܡܶܢܰܢ ܐܰܢ̱ܬ ܐܰܘ ܡܶܢ ܒܥܶܠܕܒܳܒܰܝ̈ܢ.
14 ܐܳܡܰܪ ܠܶܗ. ܐܶܢܳܐ ܪܰܒ ܚܰܝ̈ܠܰܘܳܬܶܗ ܐ̱ܢܳܐ ܕܡܳܪܝܳܐ. ܘܗܳܫܳܐ ܐܶܬܺܝܬ. ܘܰܢܦܰܠ ܝܶܫܽܘܥ ܥܰܠ ܐܰܦܰܘ̈ܗܝ ܥܰܠ ܐܰܪܥܳܐ ܘܰܣܓܶܕ. ܘܶܐܡܰܪ. ܡܳܢܳܐ ܐܳܡܰܪ ܡܳܪܝ ܠܥܰܒܕܶܗ.
15 ܘܶܐܡܰܪ ܪܰܒ ܚܰܝ̈ܠܰܘܳܬܶܗ. ܕܡܳܪܝܳܐ ܠܝܶܫܽܘܥ. ܫܪܺܝ ܡܣܳܐܢܰܝ̈ܟ ܡܶܢ ܖ̈ܶܓܠܰܝܟ. ܡܶܛܽܠ ܕܕܽܘܟܬܳܐ ܕܩܳܐܶܡ ܐܰܢ̱ܬ ܒܳܗ̇ ܩܰܕܺܝܫܳܐ ܗ̱ܝ. ܘܰܥܒܰܕ ܝܶܫܽܘܥ ܗܳܟܰܢܳܐ.