Joshua 23
The Book of Joshua
܀ ܝܫܘܥ ܒܪ ܢܘܢ ܟܓ ܀
1 ܘܡܶܢ ܒܳܬܰܪ ܝܰܘ̈ܡܳܬܐ ܣܰܓܺܝ̈ܐܶܐ. ܐܰܢܺܝܚ ܡܳܪܝܳܐ ܠܺܝܣܪܳܐܶܝܠ ܡܶܢ ܟܽܠܗܽܘܢ ܒܥܶܠܕܒܳܒܰܝ̈ܗܽܘܢ ܕܰܟܪܺܝܟܝܢ ܠܗܽܘܢ. ܘܝܶܫܽܘܥ ܩܰܫ ܘܥܰܠ ܒܰܫܢܰܝ̈ܳܐ.
2 ܘܰܩܪܳܐ ܝܶܫܽܘܥ ܠܟܽܠܶܗ ܝܺܣܪܳܐܶܝܠ. ܠܩܰܫܺܝܫܰܘ̈ܗܝ ܘܰܠܖ̈ܺܝܫܰܘܗܝ ܘܰܠܕܰܝܳܢܰܘ̈ܗܝ. ܘܰܠܣܳܦܖ̈ܰܘܗܝ. ܘܶܐܡܰܪ ܠܗܽܘܢ. ܐܶܢܳܐ ܣܶܐܒܶܬ ܘܥܶܠܶܬ ܒܰܫܢܰܝ̈ܳܐ.
3 ܘܰܐܢ̱ܬܽܘܢ ܚܙܰܝܬܽܘܢ ܟܽܠ ܕܰܥ̣ܒܰܕ ܡܳܪܝܳܐ ܐܰܠܳܗܟܽܘܢ ܠܟܽܠܗܽܘܢ ܥܰܡ̈ܡܶܐ ܗܳܠܶܝܢ. ܘܰܐܘܒܶܕ ܐܶܢܽܘܢ ܡܶܢ ܩܕܳܡܰܝܟܽܘܢ. ܘܡܳܪܝܳܐ ܐܰܠܳܗܟܽܘܢ ܗܽܘܝܽܘ ܥܳܒܶܕ ܩܪܳܒܟܽܘܢ.
4 ܚܙܰܘ ܕܶܝܢ ܕܠܳܐ ܦܰܠܓܶܬ ܠܟܽܘܢ ܥܰܡ̈ܡܶܐ ܗܳܠܶܝܢ ܕܶܐܫܬܚܰܪܘ ܒܝܳܪܬܽܘܬܐ ܕܫܰܒ̈ܛܰܝܟܽܘܢ. ܡܶܢ ܝܽܘܪܕܢܳܢ ܘܟܽܠܗܽܘܢ ܥܰܡ̈ܡܶܐ ܕܚܶܪܒܶܬ. ܘܝܰܡܳܐ ܪܰܒܳܐ ܒܡܰܥܖ̈ܳܒܰܝ ܫܶܡܫܳܐ ܦܰܠܓܶܬ ܠܟܽܘܢ.
5 ܡܳܪܝܳܐ ܐܰܠܳܗܟܽܘܢ ܗܽܘ ܢܶܬܒܰܪ ܐܶܢܽܘܢ. ܘܢܶܚܪܽܘܒ ܐܶܢܽܘܢ ܡܶܢ ܩܕܳܡܰܝܟܽܘܢ. ܘܬܺܐܪܬܽܘܢ ܐܰܪܥܗܽܘܢ. ܐܰܝܟ ܕܶܐܡܰܪ ܠܟܽܘܢ ܡܳܪܝܳܐ ܐܰܠܳܗܟܽܘܢ.
6 ܒܰܠܚܽܘܕ ܐܶܬܚܰܝܰܠܘ ܛܳܒ. ܘܛܰܪܘ ܘܰܥܒܶܕܘ ܟܽܠ ܕܰܟܬܝܒ ܒܣܶܦܪܳܐ ܕܢܳܡܽܘܣܳܐ ܕܡܽܘܫܶܐ ܥܰܒܕܶܗ ܕܡܳܪܝܳܐ. ܘܠܳܐ ܬܶܣܛܽܘܢ ܡܶܢܶܗ ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ.
7 ܘܠܳܐ ܬܶܬܚܰܠܛܽܘܢ ܒܥܰܡ̈ܡܶܐ ܗܳܠܶܝܢ ܕܶܐܫܬܚܰܪܘ ܒܰܝܢܳܬܟܽܘܢ. ܘܰܫܡܳܐ ܕܰܐܠܳܗܰܝ̈ܗܽܘܢ ܠܳܐ ܬܶܬܕܰܟܪܽܘܢ. ܘܠܳܐ ܬܺܐܡܽܘܢ ܒܗܽܘܢ. ܘܠܳܐ ܬܶܦܠܚܽܘܢ ܐܶܢܽܘܢ. ܘܠܳܐ ܬܶܣܓܕܽܘܢ ܠܗܽܘܢ.
8 ܐܶܠܳܐ ܠܡܳܪܝܳܐ ܐܰܠܳܗܟܽܘܢ ܐܶܬܢܰܩܦܘ. ܐܰܝܟܰܢܳܐ ܕܰܥܒܰܕܬܽܘܢ ܥܕܰܡܳܐ ܠܝܰܘܡܳܢܳܐ.
9 ܘܰܚܪܰܒ ܡܳܪܝܳܐ ܡܶܢ ܩܕܳܡܰܝܟܽܘܢ ܥܰܡ̈ܡܶܐ ܪܰܘܖ̈ܒܶܐ ܘܥܰܫܺܝܢ̈ܶܐ. ܘܐ̱ܢܳܫ ܠܳܐ ܩܳܡ ܠܽܘܩܒܰܠܟܽܘܢ ܥܕܰܡܳܐ ܠܝܰܘܡܳܢܳܐ.
10 ܓܰܒܪܳܐ ܚܰܕ ܡܶܢܟܽܘܢ. ܢܶܪܕܽܘܦ ܠܰܐܠܦܳܐ ܡܶܛܽܠ ܕܡܳܪܝܳܐ ܐܰܠܳܗܟܽܘܢ ܥܰܡܟܽܘܢ. ܘܗܽܘ ܥܳܒܶܕ ܩܪܳܒܟܽܘܢ ܐܰܝܟܰܢܳܐ ܕܶܐܡܰܪ ܠܟܽܘܢ.
11 ܐܶܙܕܰܗܪܘ ܛܳܒ ܒܢܰܦܫܟܽܘܢ ܠܡܶܕܚܰܠ ܠܡܳܪܝܳܐ ܐܰܠܳܗܟܽܘܢ.
12 ܐܶܢ ܕܶܝܢ ܬܶܗܦܟܽܘܢ ܘܬܶܬܢܰܩܦܽܘܢ ܒܫܰܪܟܳܐ ܕܗܳܠܶܝܢ ܥܰܡ̈ܡܶܐ ܕܶܐܫܬܚܰܪܘ ܒܰܝܢܳܬܟܽܘܢ. ܘܬܶܗܘܢ ܠܗܽܘܢ ܚܰܬܢ̈ܶܐ. ܘܬܶܬܚܰܠܛܽܘܢ ܒܗܽܘܢ ܘܗܶܢܽܘܢ ܒܟܽܘܢ.
13 ܗܘܰܝܬܽܘܢ ܝܳܕܥܺܝܢ. ܕܬܽܘܒ ܠܳܐ ܡܰܘܣܶܦ ܡܳܪܝܳܐ ܐܰܠܳܗܟܽܘܢ ܠܡܶܚܪܰܒ ܠܗܳܠܶܝܢ ܥܰܡ̈ܡܶܐ ܡܶܢ ܩܕܳܡܰܝܟܽܘܢ. ܘܢܶܗܘܽܘܢ ܠܟܽܘܢ ܠܦܰܚ̈ܶܐ ܘܰܠܬܘܩ̈ܠܳܬܳܐ. ܘܠܽܘܠ̈ܝܳܬܳܐ ܒܨܶܕܥܰܝ̈ܟܽܘܢ. ܘܨܶܢܳܖ̈ܝܳܬܳܐ ܒܥܰܝ̈ܢܰܝܟܽܘܢ. ܥܕܰܡܳܐ ܕܬܺܐܒܕܽܘܢ ܡܶܢ ܐܰܪܥܳܐ ܛܳܒܬܐ ܕܝܰܗܒ ܠܟܽܘܢ ܡܳܪܝܳܐ ܐܰܠܳܗܟܽܘܢ.
14 ܐܶܢܳܐ ܕܶܝܢ ܗܳܐ ܐܳܙܶܠ ܐ̱ܢܳܐ ܒܽܐܘܪܚܳܐ ܕܟܽܠܳܗ̇ ܐܰܪܥܳܐ. ܐܰܢ̱ܬܽܘܢ ܕܶܝܢ ܝܳܕܥܺܝܢ ܐ̱ܢܬܽܘܢ ܒܟܽܠܶܗ ܠܶܒܟܽܘܢ ܘܰܒܟܽܠܳܗ̇ ܢܰܦܫܟܽܘܢ. ܕܠܳܐ ܒܶܛܠܰܬ ܡܶܠܬܳܐ ܚܕܳܐ ܡܶܢ ܟܽܠܗܶܝܢ ܡ̈ܶܠܶܐ ܛܳܒ̈ܳܬܐ ܕܶܐܡܰܪ ܡܳܪܝܳܐ ܐܰܠܳܗܟܽܘܢ ܥܠܰܝܟܽܘܢ. ܐܶܠܳܐ ܟܽܠܗܶܝܢ ܐܶܬܰܝ̈ ܥܠܰܝܟܽܘܢ. ܘܠܳܐ ܒܶܛܠܰܬ ܡܶܠܬܳܐ ܚܕܳܐ.
15 ܘܰܐܝܟܰܢܳܐ ܕܶܝܢ ܕܶܐܬܰܝ̈ ܥܠܰܝܟܽܘܢ ܟܽܠܗܶܝܢ ܡ̈ܶܠܶܐ ܛܳܒ̈ܳܬܐ ܕܶܐܡܰܪ ܠܟܽܘܢ ܡܳܪܝܳܐ ܐܰܠܳܗܟܽܘܢ. ܗܳܟܰܢܳܐ ܢܺܐܬܝ̈ܳܢ ܥܠܰܝܟܽܘܢ ܟܽܠܗܶܝܢ ܠܰܘ̈ܛܳܬܳܐ. ܥܕܰܡܳܐ ܕܢܰܘܒܶܕܟܽܘܢ ܡܶܢ ܐܰܪܥܳܐ ܗܳܕܶܐ ܛܳܒܬܐ ܕܝܰܗܒ ܠܟܽܘܢ.
16 ܐܶܢ ܬܶܥܒܪܽܘܢ ܥܰܠ ܕܺܝܰܬܺܝܩܺܝ ܕܡܳܪܝܳܐ ܐܰܠܳܗܟܽܘܢ. ܘܥܰܠ ܦܽܘܩ̈ܕܳܢܶܐ ܕܶܐܬܦܰܩܰܕܬܽܘܢ. ܘܬܺܐܙܽܠܘܢ ܘܬܶܦܠܚܽܘܢ ܠܰܐܠܳܗ̈ܶܐ ܐ̱ܚܖ̈ܳܢܶܐ. ܘܬܶܣܓܕܽܘܢ ܠܗܽܘܢ. ܢܶܬܚܰܡܰܬ ܪܽܘܓܙܶܗ ܕܡܳܪܝܳܐ ܐܰܠܳܗܟܽܘܢ ܥܠܰܝܟܽܘܢ. ܘܬܺܐܒܕܽܘܢ ܒܰܥܓܰܠ ܡܶܢ ܐܰܪܥܳܐ ܛܳܒܬܐ ܕܝܰܗܒ ܠܟܽܘܢ.