Joshua 2
The Book of Joshua
܀ ܝܫܘܥ ܒܪ ܢܘܢ ܒ ܀
1 ܘܫܰܕܰܪ ܝܶܫܽܘܥ ܒܰܪܢܽܘܢ ܡܶܢ ܣܳܛܺܝܡ ܬܪܶܝܢ ܓܰܒܖ̈ܺܝܢ ܕܝܳܕܥܺܝܢ ܒܰܐܪܥܳܐ. ܘܶܐܡܰܪ ܠܗܽܘܢ. ܙܶܠܘ ܚܙܰܘ ܠܰܐܪܥܳܐ ܕܺܐܝܪܺܝܚܽܘ ܘܶܐܙܰܠܘ ܘܥܰܠܘ ܠܘܳܬ ܐܰܢ̱ܬܬܳܐ ܙܳܢܺܝܬܳܐ ܕܰܫܡܳܗ̇ ܪܳܚܳܒ. ܘܒܳܬܘ ܬܰܡܳܢ.
2 ܘܶܐܬܶܐܡܰܪ ܠܡܰܠܟܳܐ ܕܺܐܝܪܺܝܚܽܘ. ܕܗܳܐ ܓܰܒܖ̈ܶܐ ܐܶܬܰܘ ܠܗܳܪܟܳܐ ܒܠܺܠܝܳܐ ܡܶܢ ܒܢܰܝ̈ ܝܺܣܪܳܐܶܝܠ ܠܡܶܓܰܫ ܐܰܪܥܳܐ.
3 ܘܫܰܕܰܪ ܡܰܠܟܳܐ ܕܺܐܝܪܺܝܚܽܘ ܠܘܳܬ ܪܳܚܳܒ. ܘܶܐܡܰܪ ܠܳܗ̇. ܐܰܦܶܩ ܠܓܰܒܖ̈ܶܐ ܕܥ̣ܰܠܘ ܠܘܳܬܶܟܝ ܒܠܺܠܝܳܐ. ܡܶܛܽܠ ܕܰܠܡܶܓܰܫ ܐܰܪܥܰܢ ܐܶܬܰܘ.
4 ܘܕܶܒܪܰܬ ܐܰܢ̱ܬܬܳܐ ܠܰܬܖ̈ܰܝܗܽܘܢ ܓܰܒܖ̈ܶܐ ܘܛܰܫܝܰܬ ܐܶܢܽܘܢ. ܘܶܐܡܪܰܬ ܫܰܪܺܝܪܳܐܺܝܬ ܐܶܬܰܘ ܠܘܳܬܝ ܓܰܒܖ̈ܶܐ. ܘܠܳܐ ܝܶܕܥܶܬ ܡܶܢ ܐܰܝܡܶܟܳܐ ܐܶܢܽܘܢ.
5 ܘܟܰܕ ܗܘܳܐ ܙܰܒܢܳܐ ܕܡܶܬܬܚܶܕ ܬܰܪܥܳܐ ܒܪܰܡܫܳܐ ܢ̣ܦܰܩܘ ܠܗܽܘܢ. ܘܠܳܐ ܝܶܕܥܶܬ ܠܰܐܝܟܳܐ ܐܶܙܰܠܘ. ܦܽܘܩܘ ܥܓܰܠ ܒܳܬܰܪܗܽܘܢ. ܡܶܛܽܠ ܕܡܰܕܪܟܺܝܢ ܐ̱ܢܬܽܘܢ ܠܗܽܘܢ.
6 ܘܗܺܝ ܐܰܣܩܰܬ ܐܶܢܽܘܢ ܠܶܐܓܳܪܳܐ. ܘܛܰܫܝܰܬ ܐܶܢܽܘܢ ܒܶܝܬ ܟܰܖ̈ܣܒܳܢܶܐ ܕܟܶܬܳܢܳܐ ܕܣܺܝܡܺܝܢ ܗܘܰܘ ܠܳܗ̇ ܥܰܠ ܐܶܓܳܪܳܐ.
7 ܘܓܰܒܖ̈ܶܐ ܢ̣ܦܰܩܘ ܒܳܬܰܪܗܽܘܢ ܒܽܐܘܪܚܳܐ ܕܝܽܘܪܕܢܳܢ ܕܥܰܠ ܡܰܥܒܰܪܬܳܐ. ܘܬܰܪܥܳܐ ܐܶܚܰܕܘ ܒܳܬܰܪ ܕܰܢ̣ܦܰܩܘ ܖ̈ܳܕܽܘܦܶܐ ܒܳܬܰܪ ܓܳܫܽܘ̈ܫܶܐ.
8 ܘܗܶܢܽܘܢ ܥܕܰܡܳܐ ܠܗܳܫܳܐ ܠܳܐ ܫܟܶܒܘ ܗܘܰܘ. ܘܗܺܝ ܣܶܠܩܰܬ ܠܘܳܬܗܽܘܢ ܠܶܐܓܳܪܳܐ.
9 ܘܶܐܡܪܰܬ ܠܓܰܒܖ̈ܶܐ. ܕܰܐܫܠܡܳܗ̇ ܠܟܽܘܢ ܡܳܪܝܳܐ ܠܰܐܪܥܳܐ. ܘܢܶܦܠܰܬ ܕܶܚܠܰܬܟܽܘܢ ܥܠܰܝܢ. ܐܳܦ ܕܚܶܠܘ ܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ ܡܶܢ ܩܕܳܡܰܝܟܽܘܢ.
10 ܡܶܛܽܠ ܕܰܫܡܰܥܢ ܕܰܐܘܒܶܫ ܡܳܪܝܳܐ ܡܰܝ̈ܳܐ ܕܝܰܡܳܐ ܕܣܽܘܦ ܡܶܢ ܩܕܳܡܰܝܟܽܘܢ. ܟܰܕ ܢܦܰܩܬܽܘܢ ܡܶܢ ܡܶܨܪܶܝܢ ܘܡܶܕܶܡ ܕܰܥܒܰܕܬܽܘܢ ܠܰܬܪܶܝܢ ܡܰܠܟ̈ܶܐ ܕܳܐܡܽܘܖ̈ܳܝܶܐ. ܠܣܺܝܚܽܘܢ ܘܰܠܥܽܘܓ ܕܰܚܪܰܒܬܽܘܢ ܐܶܢܽܘܢ.
11 ܘܟܰܕ ܫܡܰܥܢ ܙܳܥ ܠܶܒܰܢ. ܘܠܳܐ ܐܶܫܬܰܚܪܰܬ ܪܽܘܚܳܐ ܒܐ̱ܢܳܫ ܡܶܢܰܢ ܡܶܢ ܩܕܳܡܰܝܟܽܘܢ. ܡܶܛܽܠ ܕܡܳܪܝܳܐ ܐܰܠܳܗܟܽܘܢ. ܗܽܘܝܽܘ ܐܰܠܳܗܳܐ ܒܰܫܡܰܝܳܐ ܡܶܢ ܠܥܶܠ. ܘܒܰܐܪܥܳܐ ܡܶܢ ܠܬܰܚܬ.
12 ܡܶܟܺܝܠ ܝܺܡܰܘ ܠܺܝ ܒܡܳܪܝܳܐ. ܡܶܛܽܠ ܕܥܶܒܕܶܬ ܒܟܽܘܢ ܛܰܝܒܽܘܬܐ. ܘܰܥܒܶܕܘ ܘܳܐܦ ܐܰܢ̱ܬܽܘܢ ܒܺܝ. ܘܰܒܒܶܝܬ ܐܳܒܝ ܛܰܝܒܽܘܬܳܐ. ܘܗܰܒܘ ܠܺܝ ܐܳܬܳܐ ܕܩܽܘܫܬܳܐ.
13 ܘܰܐܚܰܘ ܠܺܝ. ܘܠܳܐܒܝ. ܘܠܶܐܡܝ. ܘܠܰܐܚܰܝ̈. ܘܠܰܐܚ̈ܘܳܬܝ. ܘܰܠܟܽܠ ܕܺܐܝܬ ܠܰܢ. ܘܦܰܨܰܘ ܢܰܦ̈ܫܳܬܰܢ ܡܶܢ ܡܰܘܬܳܐ.
14 ܘܶܐܡܰܪܘ ܠܳܗ̇ ܓܰܒܖ̈ܶܐ. ܢܰܦ̈ܫܳܬܰܢ ܕܺܝܠܰܢ ܝܳܗܒܺܝܢ ܚܢܰܢ ܚܠܳܦܰܝܟܽܘܢ ܠܡܰܘܬܳܐ. ܐܶܢ ܠܳܐ ܕܶܝܢ ܡܚܰܘܶܝܢ ܐ̱ܢܬܽܘܢ ܡܶܠܬܳܐ ܗܳܕܶܐ. ܘܡܳܐ ܕܝܰܗܒܳܗ̇ ܠܰܢ ܡܳܪܝܳܐ ܠܰܐܪܥܳܐ ܗܳܕܶܐ. ܥܳܒܕܺܝܢ ܚܢܰܢ ܥܰܡܶܟܝ ܛܰܝܒܽܘܬܐ ܘܩܽܘܫܬܳܐ.
15 ܘܰܐܚܬܰܬ ܐܶܢܽܘܢ ܒܚܰܒܠܳܐ ܡܶܢ ܟܰܘܬܳܐ. ܡܶܛܽܠ ܕܒܰܝܬܳܗ̇ ܒܶܐܣܬܳܐ ܗܘܳܐ ܕܫܽܘܪܳܐ. ܘܥܰܠ ܫܽܘܪܳܐ ܝܳܬܒܳܐ ܗܘܳܬ.
16 ܘܶܐܡܪܰܬ ܠܗܽܘܢ. ܒܛܽܘܪܳܐ ܛܽܘܪܳܐ ܙܶܠܘ. ܕܰܠܡܳܐ ܢܶܦܓܥܽܘܢ ܒܟܽܘܢ ܗܳܢܽܘܢ ܕܰܢ̣ܦܰܩܘ ܒܳܬܰܪܟܽܘܢ. ܘܶܐܬܛܰܫܰܘ ܬܰܡܳܢ ܬܠܳܬܳܐ ܝܰܘܡܺܝ̈ܢ ܥܕܰܡܳܐ ܕܗܳܦܟܺܝܢ. ܘܗܳܝܕܶܝܢ ܬܺܐܙܽܠܘܢ ܒܽܐܘܪܚܟܽܘܢ.
17 ܘܶܐܡܰܪܘ ܠܳܗ̇ ܓܰܒܖ̈ܶܐ. ܡܚܰܣܶܝܢ ܚܢܰܢ ܡܶܢ ܡܰܘܡܬܳܐ ܗܳܕܶܐ ܕܰܐܘܡܺܝܬܺܝܢ.
18 ܗܳܐ ܚܢܰܢ ܥܳܐܠܺܝܢ ܚܢܰܢ ܠܰܐܪܥܳܐ. ܚܽܘܛܳܐ ܕܶܝܢ ܕܰܙܚܽܘܪܺܝܬܐ ܩܛܽܘܪܝ ܒܟܘܬܳܐ ܕܰܐܚܶܬܬܺܝܢ ܡܶܢܳܗ̇. ܘܠܰܐܒܽܘܟܝ. ܘܠܶܐܡܶܟܝ. ܘܠܰܐܚܰܝ̈ܟܝ. ܘܰܠܟܽܠܶܗ ܒܶܝܬ ܐܰܒܽܘܟܝ. ܐܰܥܶܠܝ ܠܘܳܬܶܟܝ ܠܓܰܘ ܒܰܝܬܳܐ.
19 ܘܟܽܠܡܰܢ ܕܢܳܦܶܩ ܡܶܢ ܬܰܪܥܳܐ ܕܒܰܝܬܶܟܝ ܠܒܰܪ. ܕܡܶܗ ܒܪܺܝܫܶܗ. ܘܰܚܢܰܢ ܡܦܰܨܶܝܢ ܚܢܰܢ ܡܶܢ ܥܝܳܪܬܶܗ. ܐܶܢ ܐ̱ܢܳܫ ܢܰܗܪܺܝܘܗܝ
20 ܘܶܐܢ ܬܚܰܘܶܝܢ ܡܶܠܬܳܐ ܗܳܕܶܐ. ܗܘܰܝܢ ܡܚܰܣܶܝܢ ܡܶܢ ܡܰܘܡܬܳܐ ܗܳܕܶܐ ܕܰܐܘܡܺܝܬܺܝܢ.
21 ܘܶܐܡܪܰܬ ܠܗܽܘܢ. ܐܰܝܟ ܡܶܠܰܬܟܽܘܢ ܗܳܟܰܢܳܐ ܢܶܗܘܶܐ. ܘܫܰܕܪܰܬ ܐܶܢܽܘܢ ܘܶܐܙܰܠܘ. ܘܩܶܛܪܰܬ ܚܽܘܛܳܐ ܕܰܙܚܽܘܪܺܝܬܐ ܒܟܘܬܳܐ.
22 ܘܶܐܙܰܠܘ ܠܛܽܘܪܳܐ. ܘܺܝܬܒܘ ܬܰܡܳܢ ܬܠܳܬܳܐ ܝܰܘܡܺܝ̈ܢ. ܥܕܰܡܳܐ ܕܰܗܦܰܟܘ ܗܳܢܽܘܢ ܕܶܐܙܰܠܘ ܒܳܬܰܪܗܽܘܢ ܠܡܶܐܬܳܐ. ܘܰܒܥܰܘ ܐܶܢܽܘܢ ܗܳܢܽܘܢ ܕܰܢܦܰܩܘ ܒܳܬܰܪܗܽܘܢ ܒܟܽܠܳܗ̇ ܐܽܘܪܚܳܐ. ܘܟܰܕ ܠܳܐ ܐܶܫܟܰܚܘ ܐܶܢܽܘܢ ܗܦܰܟܘ ܠܗܽܘܢ.
23 ܘܗܳܢܽܘܢ ܬܪܶܝܢ ܓܳܫܽܘ̈ܫܺܝܢ ܢܚܶܬܘ ܡܶܢ ܛܽܘܪܳܐ. ܘܰܥܒܰܪܘ ܘܶܐܙܰܠܘ ܠܘܳܬ ܝܶܫܽܘܥ ܒܰܪܢܽܘܢ. ܘܶܐܫܬܰܥܺܝܘ ܠܶܗ ܟܽܠ ܡܶܕܶܡ ܕܰܓ̣ܕܰܫ ܠܗܽܘܢ.
24 ܘܶܐܡ̣ܰܪܘ ܠܶܗ ܠܝܶܫܽܘܥ. ܐܰܫܠܡܳܗ̇ ܡܳܪܝܳܐ ܒܺܐܝܕܰܝ̈ܢ ܠܟܽܠܳܗ̇ ܐܰܪܥܳܐ. ܐܳܦ ܕܚ̣ܶܠܘ ܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ ܡܶܢ ܩܕܳܡܰܝܢ.