Joshua 22
The Book of Joshua
܀ ܝܫܘܥ ܒܪ ܢܘܢ ܟܒ ܀
1 ܗܳܝܕܶܝܢ ܩ̣ܪܳܐ ܝܶܫܽܘܥ ܠܰܒܢܰܝ̈ ܪܽܘܒܺܝܠ. ܘܠܰܒܢܰܝ̈ ܓܳܕ ܘܰܠܦܶܠܓܶܗ ܕܫܰܒܛܳܐ ܕܰܡܢܰܫܶܐ.
2 ܘܶܐܡܰܪ ܠܗܽܘܢ. ܐܰܢ̱ܬܽܘܢ ܢܛܰܪܬܽܘܢ ܟܽܠܡܶܕܶܡ ܕܶܐܡܰܪ ܠܟܽܘܢ ܡܽܘܫܶܐ ܥܰܒܕܶܗ ܕܡܳܪܝܳܐ ܘܰܫܡܰܥܬܽܘܢ ܒܩܳܠܝ ܠܟܽܠ ܡܶܕܶܡ ܕܦܰܩܶܕܬܟܽܘܢ.
3 ܘܠܳܐ ܫܒܰܩܬܽܘܢ ܠܰܐܚܰܝ̈ܟܽܘܢ. ܗܳܐ ܝܰܘ̈ܡܳܬܐ ܣܰܓܺܝ̈ܐܶܐ ܥܕܰܡܳܐ ܠܝܰܘܡܳܢܳܐ. ܘܰܢܛܰܪܬܽܘܢ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܟܽܘܢ.
4 ܘܗܳܫܳܐ ܗܳܐ ܐܰܢܺܝܚ ܡܳܪܝܳܐ ܐܰܠܳܗܟܽܘܢ ܠܰܐܚܰܝ̈ܟܽܘܢ ܐܰܝܟܰܢܳܐ ܕܶܐܡܰܪ ܠܗܽܘܢ ܡܶܟܶܝܠ ܐܶܬܦܢܰܘ ܘܙܶܠܘ ܠܩܽܘܖ̈ܝܟܘܢ. ܘܠܰܐܪܥܳܐ ܕܝܳܪܬܽܘܬܟܽܘܢ. ܕܝܰܗܒ ܠܟܽܘܢ ܡܽܘܫܶܐ ܥܰܒܕܶܗ ܕܡܳܪܝܳܐ. ܒܥܶܒܪܳܐ ܕܝܽܘܪܕܢܳܢ ܡܶܢ ܡܰܕܢܚܳܐ.
5 ܒܰܠܚܽܘܕ ܕܶܝܢ ܐܶܙܕܰܗܪܘ ܛܳܒ. ܘܰܥܒܶܕܘ ܦܽܘܩܕܳܢ̈ܶܐ ܘܢܳܡܽܘܣ̈ܶܐ ܕܦܰܩܶܕܟܽܘܢ ܡܽܘܫܶܐ ܥܰܒܕܶܗ ܕܡܳܪܝܳܐ. ܠܡܶܪܚܰܡ ܠܡܳܪܝܳܐ ܐܰܠܳܗܟܽܘܢ. ܘܰܠܡܶܛܰܪ ܦܽܘܩܕܳܢܰܘ̈ܗܝ. ܘܰܠܡܶܬܢܰܩܳܦܽܘ ܠܶܗ. ܘܰܠܡܶܦܠܚܶܗ. ܒܟܽܠܶܗ ܠܶܒܟܽܘܢ. ܘܰܒܟܽܠܳܗ̇ ܢܰܦܫܟܽܘܢ.
6 ܘܒܰܪܶܟ ܐܶܢܽܘܢ ܝܶܫܽܘܥ. ܘܫܰܕܰܪ ܐܶܢܽܘܢ ܘܶܐܙܰܠܘ ܠܩܽܘܖ̈ܝܗܽܘܢ.
7 ܘܰܠܦܶܠܓܶܗ ܕܫܰܒܛܳܐ ܕܰܡܢܰܫܶܐ. ܝܰܗܒ ܡܽܘܫܶܐ ܒܡܰܬܢܺܝܢ. ܘܰܠܦܶܠܓܶܗ ܝܰܗܒ ܝܶܫܽܘܥ ܥܰܡ ܐܰܚܰܝ̈ܗܽܘܢ. ܒܥܶܒܪܳܐ ܕܝܽܘܪܕܢܳܢ. ܡܶܢ ܡܰܥܪܒܳܐ. ܘܫܰܕܰܪ ܐܶܢܽܘܢ ܝܶܫܽܘܥ ܘܶܐܙܰܠܘ ܠܩܽܘܖ̈ܝܗܽܘܢ. ܘܒܰܪܶܟ ܐܶܢܽܘܢ.
8 ܘܶܐܡܰܪ ܠܗܽܘܢ. ܒܢܶܟܣ̈ܶܐ ܣܰܓܺܝ̈ܐܶܐ ܗܦܽܘܟܘ ܠܩܽܘܖ̈ܝܟܽܘܢ. ܘܠܰܐܪܥܳܐ ܕܝܳܪܬܽܘܬܟܽܘܢ. ܘܰܒܩܶܢܝܳܢܳܐ ܕܛܳܒ ܣܰܓܺܝ. ܒܣܺܐܡܳܐ. ܘܰܒܕܰܗܒܳܐ. ܘܒܰܢܳܚܫܳܐ. ܘܰܒܦܰܪܙܠܳܐ. ܘܰܒܢܰܚ̈ܬܶܐ ܕܣܰܓܺܝܐܺܝܢ ܛܳܒ. ܘܦܰܠܶܓܘ ܒܶܙܬܳܐ ܕܰܒܥܶܠܕܒܳܒܰܝ̈ܟܽܘܢ. ܥܰܡ ܐܰܚܰܝ̈ܟܽܘܢ.
9 ܘܰܗܦܰܟܘ ܘܶܐܙܰܠܘ ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ ܘܦܶܠܓܶܗ ܕܫܰܒܛܳܐ ܕܰܡܢܰܫܶܐ. ܡܶܢ ܠܘܳܬ ܒܢܰܝ̈ ܝܺܣܪܳܐܶܝܠ. ܡܶܢ ܫܺܝܠܽܘ ܕܒܰܐܪܥܳܐ ܕܰܟܢܰܥܢ. ܠܡܺܐܙܰܠ ܠܰܐܪܥܳܐ ܕܓܶܠܥܳܕ ܠܰܐܪܥܳܐ ܕܝܳܪܬܽܘܬܗܽܘܢ ܕܺܝܪܶܬܘ ܒܳܗ̇. ܥܰܠ ܡܶܠܰܬ ܦܽܘܡܶܗ ܕܡܳܪܝܳܐ ܒܺܐܝܕܳܐ ܕܡܽܘܫܶܐ.
10 ܘܶܐܬܰܘ ܠܓܰܠܓܳܠܳܐ ܕܥܰܠ ܓܶܢ̱ܒ ܝܽܘܪܕܢܳܢ ܕܒܰܐܪܥܳܐ ܕܰܟܢܰܥܢ. ܘܰܒܢܰܘ ܬܰܡܳܢ ܒܢܰܝ̈ ܪܽܘܒܺܝܠ ܘܰܒܢܰܝ̈ ܓܳܕ ܘܦܶܠܓܶܗ ܕܫܰܒܛܳܐ ܕܰܡܢܰܫܶܐ. ܡܰܕܒܚܳܐ ܥܰܠ ܓܶܢ̱ܒ ܝܽܘܪܕܢܳܢ. ܡܰܕܒܚܳܐ ܪܰܒܳܐ ܕܚܶܙܘܳܐ.
11 ܘܰܫ̣ܡܰܥܘ ܒܢܰܝ̈ ܝܺܣܪܳܐܶܝܠ ܕܰܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ ܘܦܶܠܓܶܗ ܕܫܰܒܛܳܐ ܕܰܡܢܰܫܶܐ. ܒܢܰܘ ܡܰܕܒܚܳܐ ܠܽܘܩܒܰܠ ܐܰܪܥܳܐ ܕܰܟܢܰܥܢ. ܒܓܰܠܓܳܠܳܐ ܕܥܰܠ ܓܶܢ̱ܒ ܝܽܘܪܕܢܳܢ ܒܰܐܪܥܳܐ ܕܰܒܢܰܝ̈ ܝܺܣܪܳܐܶܝܠ.
12 ܘܶܐܬܟܰܢܰܫܘ ܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ ܠܫܺܝܠܽܘ. ܠܡܶܣܰܩ ܥܠܰܝܗܽܘܢ ܠܰܩܪܳܒܳܐ.
13 ܘܫܰܕܰܪܘ ܒܢܰܝ̈ ܝܺܣܪܳܐܶܝܠ ܠܘܳܬ ܒܢܰܝ̈ ܪܽܘܒܺܝܠ. ܘܰܠܘܳܬ ܒܢܰܝ̈ ܓܳܕ ܘܰܠܘܳܬ ܦܶܠܓܶܗ ܕܫܰܒܛܳܐ ܕܰܡܢܰܫܶܐ ܠܰܐܪܥܳܐ ܕܓܶܠܥܳܕ ܠܦܺܝܢܚܶܣ ܒܰܪ ܐܶܠܺܝܥܳܙܳܪ ܟܳܗܢܳܐ.
14 ܘܥܶܣܪܳܐ ܪܰܘܖ̈ܒܳܢܺܝ̈ܢ ܥܰܡܶܗ. ܚܰܕ ܚܰܕ ܪܰܒܳܐ ܡܶܢ ܟܽܠܗܽܘܢ ܫܰܒ̈ܛܶܐ ܕܺܝܣܪܳܐܶܝܠ. ܘܗܶܢܽܘܢ ܓܰܒܖ̈ܶܐ ܗܳܠܶܝܢ. ܖ̈ܺܝܫܶܐ ܗܘܰܘ ܕܚܰܝ̈ܠܰܘܳܬܐ ܕܺܝܣܪܳܐܶܝܠ.
15 ܘܶܐܬܘ ܠܘܳܬ ܒܢܰܝ̈ ܪܽܘܒܺܝܠ. ܘܰܠܘܳܬ ܒܢܰܝ̈ ܓܳܕ ܘܰܠܘܳܬ ܦܶܠܓܶܗ ܕܫܰܒܛܳܐ ܕܰܡܢܰܫܶܐ ܠܰܐܪܥܳܐ ܕܓܶܠܥܳܕ ܘܡܰܠܶܠܘ ܥܰܡܗܽܘܢ. ܘܶܐܡܰܪܘ ܠܗܽܘܢ.
16 ܗܳܟܰܢܳܐ ܐܳܡܪܺܝܢ ܟܽܠܳܗ̇ ܟܢܽܘܫܬܳܐ ܕܡܳܪܝܳܐ. ܡܳܢܳܐ ܗ̱ܝ ܟܰܕܳܒܽܘܬܳܐ ܗܳܕܶܐ ܕܟܰܕܶܒܬܽܘܢ ܒܰܐܠܳܗܳܐ ܕܺܝܣܪܳܐܶܝܠ. ܘܰܗܦܰܟܬܽܘܢ ܡܶܢ ܒܳܬܪܶܗ ܕܡܳܪܝܳܐ. ܘܰܒܢܰܝܬܽܘܢ ܠܟܽܘܢ ܡܰܕܒܚܳܐ ܕܬܶܦܪܩܽܘܢ ܡܶܢ ܕܶܚܠܬܶܗ ܕܡܳܪܝܳܐ.
17 ܠܳܐ ܟܰܕܽܘ ܠܰܢ ܚܛܺܝܬܳܐ ܕܰܦܥܽܘܪ. ܕܠܳܐ ܐܶܬܕܰܟܺܝܢ ܡܶܢܳܗ̇ ܥܕܰܡܳܐ ܠܝܰܘܡܳܢܳܐ. ܘܰܗܘܳܐ ܡܰܘܬܳܢܳܐ ܒܰܟܢܽܘܫܬܶܗ ܕܡܳܪܝܳܐ.
18 ܘܰܐܢ̱ܬܽܘܢ ܡܳܐ ܕܰܗܦܰܟܬܽܘܢ ܝܰܘܡܳܢܳܐ ܡܶܢ ܕܶܚܠܬܶܗ ܕܡܳܪܝܳܐ. ܡܶܢ ܡܚܳܪ ܥܰܠ ܟܽܠܳܗ̇ ܟܢܽܘܫܬܳܐ ܕܺܝܣܪܳܐܶܝܠ ܗܳܘܶܐ ܪܽܘܓܙܳܐ.
19 ܒܪܰܡ ܕܶܝܢ ܐܶܢ ܡܛܰܘܫܳܐ ܗ̱ܝ ܐܰܪܥܳܐ ܕܝܳܪܬܽܘܬܟܽܘܢ. ܥܒܰܪܘ ܠܟܽܘܢ ܠܰܐܪܥܳܐ ܕܝܳܪܬܽܘܬܗ ܕܡܳܪܝܳܐ. ܐܰܝܟܳܐ ܕܫܳܪܶܐ ܡܰܫܟܢܶܗ ܕܡܳܪܝܳܐ. ܘܺܝܪܰܬܘ ܥܰܡܰܢ. ܘܰܒܕܶܚܠܬܶܗ ܕܡܳܪܝܳܐ ܠܳܐ ܬܶܒܣܽܘܢ. ܘܰܥܠܰܝܢ ܠܳܐ ܬܶܡܪܕܽܘܢ. ܡܶܛܽܠ ܕܰܒܢܰܝܬܽܘܢ ܠܟܽܘܢ ܡܰܕܒܚܳܐ ܠܒܰܪ ܡܶܢ ܡܰܕܒܚܶܗ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
20 ܠܳܐ ܚܙܰܝܬܽܘܢ ܕܥܳܟܪ ܒܰܪ ܟܰܪܡܺܝ ܪܕܰܓ ܗܘܳܐ ܘܰܢܣܰܒ ܡܶܢ ܚܶܪܡܳܐ. ܥܰܠ ܟܽܠܳܗ̇ ܗܽܘ ܟܢܽܘܫܬܳܐ ܕܺܝܣܪܳܐܶܝܠ ܗܘܳܐ ܪܽܘܓܙܳܐ. ܘܗܽܘ ܚܕ ܗܘܳܐ ܓܒܰܪ. ܘܟܽܠܰܢ ܒܠܰܥܢ ܒܰܚܛܺܝܬܶܗ.
21 ܘܰܥܢܰܘ ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ ܘܦܶܠܓܶܗ ܕܫܰܒܛܳܐ ܕܰܡܢܰܫܶܐ. ܘܡܰܠܶܠܘ ܥܰܡ ܦܺܝܢܚܶܣ ܒܰܪ ܐܶܠܺܝܥܳܙܳܪ ܟܳܗܢܳܐ. ܘܥܰܡ ܖ̈ܺܝܫܶܐ ܕܚܰܝ̈ܠܰܘܳܬܐ ܕܺܝܣܪܳܐܶܝܠ. ܘܶܐܡܰܪܘ ܠܗܽܘܢ.
22 ܡܳܪܝܳܐ ܗܽܘ ܐܰܠܳܗܳܐ ܕܰܐܠܳܗ̈ܶܐ. ܐܰܠܳܗ ܐܰܠܳܗ̈ܺܝܢ ܡܳܪܝܰܐ ܗ̱ܘ. ܘܗܽܘܝܽܘ ܐܰܠܳܗܰܢ. ܘܠܺܝܣܪܳܐܶܝܠ ܗܽܘ ܝܳܕܰܥ. ܘܠܰܢ ܗܽܘ ܝܳܕܰܥ. ܐܶܢ ܕܢܶܦܪܽܘܩ ܡܶܢܶܗ ܘܶܐܢ ܕܢܶܟܠܶܐ ܗܽܘ ܒܕܶܚܠܬܶܗ ܕܡܳܪܝܳܐ ܥܒܰܕܢ ܗܳܟܰܢܳܐ. ܠܳܐ ܢܶܦܪܩܰܢ ܝܰܘܡܳܢܳܐ.
23 ܐܶܢ ܒܢܰܝܢ ܠܰܢ ܡܰܕܒܚܳܐ ܕܢܶܗܦܽܘܟ ܡܶܢ ܕܶܚܠܬܶܗ ܕܡܳܪܝܳܐ. ܐܰܘ ܕܰܢܩܰܪܶܒ ܥܠܰܘܗܝ ܕܶܒ̈ܚܳܬܳܐ. ܐܰܘ ܦܽܘܠܚܳܢ ܐ̱ܚܪܺܝܢ. ܡܳܪܝܳܐ ܢܶܬܒܰܥ ܒܺܐܝܕܰܢ.
24 ܐܶܢ ܠܳܐ ܗܘܳܐ ܡܶܢ ܕܶܚܠܬܶܗ ܥܒܰܕܢܳܗ̇ ܗܳܕܶܐ. ܘܰܕܠܳܐ ܢܺܐܡܪܽܘܢ ܡܶܢ ܡܚܳܪ ܒܢܰܝ̈ܟܽܘܢ ܠܰܒܢܰܝ̈ܢ. ܡܳܢܳܐ ܐܺܝܬ ܠܟܽܘܢ ܠܘܳܬ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ.
25 ܕܗܳܐ ܬܚܽܘܡܳܐ ܝܰܗܒ ܡܳܪܝܳܐ ܒܰܝ̈ܢܰܝܢ ܘܰܠܟܽܘܢ ܝܽܘܪܕܢܳܢ ܗܳܢܳܐ. ܡܶܟܶܝܠ ܠܰܝܬ ܠܟܽܘܢ ܡܢܳܬܳܐ ܒܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ ܘܰܢܒܰܛܠܽܘܢ ܒܢܰܝ̈ܟܽܘܢ ܡܶܢ ܡܚܳܪ ܠܰܒܢܰܝ̈ܢ ܕܠܳܐ ܢܶܕܚܠܽܘܢ ܠܡܳܪܝܳܐ.
26 ܡܶܛܽܠ ܗܳܢܳܐ ܗܽܘ ܐܶܡܰܪܢ ܕܢܶܥܒܶܕ ܠܰܢ ܡܰܕܒܚܳܐ. ܠܳܐ ܠܕܶܒܚܬܳܐ. ܘܠܳܐ ܠܩܽܘܪܒܳܢܳܐ.
27 ܐܶܠܳܐ ܠܣܳܗܕܽܘܬܳܐ ܒܰܝ̈ܢܰܝܢ ܘܰܠܟܽܘܢ. ܘܒܶܝܬ ܕܳܖ̈ܰܝܢ ܡܶܢ ܒܳܬܪܰܢ. ܘܰܚܢܰܢ ܘܕܳܖ̈ܰܝܢ ܡܶܢ ܒܳܬܪܰܢ. ܦܽܘܠܚܳܢܶܗ ܗܽܘ ܕܡܳܪܝܳܐ ܦܳܠܚܺܝܢܰܢ ܩܕܳܡܰܘܗܝ ܒܰܥ̈ܠܰܘܳܬܰܢ. ܘܰܒܕܶܒܚܰܝ̈ܢ. ܘܰܒܩܽܘܖ̈ܒܢܰܝ̈ܢ ܒܰܐܬܪܳܐ ܕܓܳܒܶܐ ܡܳܪܝܳܐ ܠܡܰܫܪܳܝܽܘ ܫܡܶܗ ܬܰܡܳܢ. ܘܰܕܠܳܐ ܢܺܐܡܪܽܘܢ ܒܢܰܝ̈ܟܽܘܢ ܡܶܢ ܡܚܳܪ ܠܰܒܢܰܝ̈ܢ. ܠܰܝܬ ܠܟܽܘܢ ܡܢܳܬܳܐ ܒܡܳܪܝܳܐ.
28 ܘܶܐܡܰܪܢ. ܡܳܐ ܕܶܐܡܰܪܘ ܠܰܢ. ܘܰܠܕܳܖ̈ܰܝܢ ܡܶܢ ܡܚܳܪ. ܢܺܐܡܪܽܘܢ ܠܗܽܘܢ. ܚܙܰܘ ܕܡܽܘܬܳܐ ܕܡܰܕܒܚܶܗ ܕܡܳܪܝܳܐ ܕܰܥܒܰܕܘ ܐܰܒܳܗܰܝ̈ܢ. ܠܳܐ ܠܝܰܩܕܳܐ ܫܰܠܡܳܐ. ܘܠܳܐ ܠܕܶܒܚܬܳܐ. ܐܶܠܳܐ ܕܢܶܗܘܶܐ ܣܳܗܕܳܐ ܒܰܝ̈ܢܰܝܢ ܘܰܠܟܽܘܢ.
29 ܚܳܣ ܠܰܢ ܕܢܰܣܠܶܐ ܕܶܚܠܬܶܗ ܕܡܳܪܝܳܐ. ܘܢܶܗܦܽܘܟ ܡܶܢ ܕܶܚܠܬܶܗ ܕܰܐܠܳܗܳܐ. ܘܢܶܒܢܶܐ ܠܰܢ ܡܰܕܒܚܳܐ ܠܝܰܩܕܳܐ ܫܰܠܡܳܐ. ܘܰܠܩܽܘܪܒܳܢܳܐ. ܘܰܠܕܶܒܚܬܳܐ. ܠܒܰܪ ܡܶܢ ܡܰܕܒܚܶܗ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ ܕܺܐܝܬ ܩܕܳܡ ܡܰܫܟܢܶܗ.
30 ܘܰܫ̣ܡܰܥ ܦܺܝܢܚܶܣ ܒܰܪ ܐܶܠܺܝܥܳܙܳܪ ܟܳܗܢܳܐ. ܘܪܰܘܖ̈ܒܳܢܶܐ ܕܰܟܢܽܘܫܬܳܐ. ܖ̈ܺܝܫܶܐ ܕܚܰܝ̈ܠܰܘܳܬܐ ܕܺܝܣܪܳܐܶܝܠ ܕܥܰܡܶܗ. ܡ̈ܶܠܶܐ ܕܡܰܠܶܠܘ ܒܢܰܝ̈ ܪܽܘܒܺܝܠ. ܕܰܒܢܰܝ̈ ܓܳܕ ܘܦܶܠܓܶܗ ܕܫܰܒܛܳܐ ܕܰܡܢܰܫܶܐ. ܘܰܫܦܰܖ̈ܝ ܒܥܰܝܢܰܝ̈ܗܽܘܢ.
31 ܘܶܐܡܰܪ ܦܺܝܢܚܶܣ ܒܰܪ ܐܶܠܺܝܥܳܙܳܪ ܟܳܗܢܳܐ. ܠܰܒܢܰܝ̈ ܪܽܘܒܺܝܠ. ܘܠܰܒܢܰܝ̈ ܓܳܕ ܘܠܰܒܢܰܝ̈ ܡܢܰܫܶܐ. ܝܰܘܡܳܢܳܐ ܝܺܕܰܥܢ ܕܒܰܝܢܳܬܰܢ ܗܽܘ ܡܳܪܝܳܐ. ܕܠܳܐ ܕܰܓܶܠܬܽܘܢ ܒܡܳܪܝܳܐ ܕܰܓܳܠܘܳܬܐ ܗܳܕܶܐ. ܡܶܟܺܝܠ ܐܰܢ̱ܬܽܘܢ ܦܰܨܺܝܬܽܘܢ ܠܰܒܢܰܝ̈ ܝܺܣܪܳܐܶܝܠ. ܕܠܳܐ ܬܶܗܘܶܐ ܒܗܽܘܢ ܐܺܝܕܶܗ ܕܡܳܪܝܳܐ ܠܪܽܘܓܙܳܐ.
32 ܘܰܗܦܰܟ ܦܺܝܢܚܶܣ ܒܰܪ ܐܶܠܺܝܥܳܙܳܪ ܟܳܗܢܳܐ ܘܪܰܘܖ̈ܒܳܢܶܐ ܕܥܰܡܶܗ. ܡܶܢ ܠܘܳܬ ܒܢܰܝ̈ ܪܽܘܒܺܝܠ. ܘܡܶܢ ܠܘܳܬ ܒܢܰܝ̈ ܓܳܕ ܘܰܡܢܰܫܶܐ ܡܶܢ ܐܰܪܥܳܐ ܕܓܶܠܥܳܕ ܠܰܐܪܥܳܐ ܕܰܟܢܰܥܢ. ܠܘܳܬ ܒܢܰܝ̈ ܝܺܣܪܳܐܶܝܠ. ܘܰܐܬܝܒܘ ܐܶܢܽܘܢ ܦܶܬܓܳܡܳܐ.
33 ܘܰܫܦܰܪ ܦܶܬܓܳܡܳܐ ܒܥܰܝ̈ܢܰܝ ܒܢܰܝ̈ ܝܺܣܪܳܐܶܝܠ. ܘܒܰܪܶܟܘ ܒܢܰܝ̈ ܝܺܣܪܳܐܶܝܠ ܠܰܐܠܳܗܳܐ. ܘܠܳܐ ܐܶܡܰܪܘ ܕܢܶܣܩܽܘܢ ܥܠܰܝܗܽܘܢ ܠܰܩܪܳܒܳܐ ܠܡܰܚܪܳܒܽܘܬܗ̇ ܠܰܐܪܥܳܐ ܕܰܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ ܘܰܒܢܰܝ̈ ܡܢܰܫܶܐ ܝܳܬܒܺܝܢ ܒܳܗ̇.
34 ܘܰܩܪܰܘ ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ ܘܰܒܢܰܝ̈ ܡܢܰܫܶܐ ܠܡܰܕܒܚܳܐ ܕܰܥܒܰܕܘ. ܡܰܕܒܚܳܐ ܕܣܳܗܕܽܘܬܳܐ. ܡܶܛܽܠ ܕܣܳܗܕܽܘܬܳܐ ܗܽܘ ܒܰܝܢܳܬܗܽܘܢ. ܘܡܳܪܝܳܐ ܗܽܘ ܒܰܠܚܽܘܕ ܐܰܠܳܗܳܐ.