Joshua 6
The Book of Joshua
܀ ܝܫܘܥ ܒܪ ܢܘܢ ܘ ܀
1 ܘܺܐܝܪܺܝܚܽܘ ܐܰܚܺܝܕܳܐ ܗܘܳܬ ܡܶܢ ܩܕܳܡ ܒܢܰܝ̈ ܝܺܣܪܳܐܶܝܠ. ܘܠܰܝܬ ܗܘܳܐ ܕܢܳܦܶܩ ܘܠܳܐ ܕܥܳܐܶܠ.
2 ܘܶܐܡܰܪ ܡܳܪܝܳܐ ܠܝܶܫܽܘܥ. ܚܙܺܝ ܕܰܐܫܠܡܶܬ ܒܺܐܝܕܰܝ̈ܟ ܠܺܐܝܪܺܝܚܽܘ. ܘܰܠܡܰܠܟܳܗ̇. ܘܰܠܟܽܠܶܗ ܚܰܝܠܶܗ. ܚܽܘܕܪܽܘܗ̇ ܠܰܡܕܺܝܢܬܳܐ ܟܽܠܟܽܘܢ ܓܰܒܖ̈ܶܐ ܥܳܒܕܰܝ̈ ܩܪܳܒܳܐ.
3 ܘܶܐܬܟܽܘܪܟܽܘܗ̇ ܠܰܡܕܺܝܢܬܳܐ ܙܒܰܢ̱ܬܳܐ ܚܕܳܐ ܒܝܰܘܡܳܐ ܚܰܕ. ܗܳܟܰܢܳܐ ܥܒܶܕܘ ܫܬܳܐ ܝܰܘܡܺܝ̈ܢ.
4 ܘܫܰܒܥܳܐ ܟܳܗ̈ܢܶܐ ܢܶܫܩܠܽܘܢ ܩܰܖ̈ܢܳܬܳܐ. ܘܰܢܝܰܒܒܽܘܢ ܩܕܳܡ ܩܺܐܒܽܘܬܳܐ. ܘܰܠܝܰܘܡܳܐ ܕܫܰܒܥܳܐ. ܐܶܬܟܽܘܪܟܽܘܗ̇ ܠܰܡܕܺܝܢܬܳܐ ܫܒܰܥ ܙܰܒܢܺܝ̈ܢ ܘܟܳܗ̈ܢܶܐ ܢܶܩܪܽܘܢ ܒܩܰܖ̈ܢܳܬܳܐ.
5 ܘܡܳܐ ܕܝܰܒܶܒܘ ܒܩܰܖ̈ܢܳܬܳܐ ܘܰܫܡܰܥܬܽܘܢ ܩܳܠܳܐ ܕܩܰܪܢܳܐ. ܢܶܩܥܽܘܢ ܟܽܠܶܗ ܥܰܡܳܐ ܩܥܳܬܳܐ ܪܰܒܬܳܐ. ܘܢܶܦܶܠ ܫܽܘܪܳܐ ܕܰܡܕܺܝܢܬܳܐ ܥܰܠ ܕܽܘܟܬܶܗ. ܘܢܶܣܩܽܘܢ ܥܰܡܳܐ ܐ̱ܢܳܫ ܠܩܽܘܒܠܶܗ.
6 ܘܰܩܪܳܐ ܝܶܫܽܘܥ ܒܰܪܢܽܘܢ ܠܟܳܗ̈ܢܶܐ ܘܶܐܡܰܪ ܠܗܽܘܢ. ܫܩܽܘܠܘ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ. ܘܫܰܒܥܳܐ ܟܳܗ̈ܢܺܝܢ ܢܶܫܩܠܽܘܢ ܫܒܰܥ ܩܰܖ̈ܢܳܢ. ܘܰܢܝܰܒܒܽܘܢ ܩܕܳܡ ܩܺܐܒܽܘܬܶܗ ܕܡܳܪܝܳܐ.
7 ܘܶܐܡܰܪ ܠܥܰܡܳܐ. ܥܒܰܪܘ ܘܶܐܬܟܰܪܟܘ ܠܰܡܕܺܝܢܬܳܐ. ܘܰܐܝܠܶܝܢ ܕܰܡܙܰܝܢܺܝܢ ܢܶܥܒܪܽܘܢ ܩܕܳܡ ܩܺܐܒܽܘܬܳܐ ܕܡܳܪܝܳܐ.
8 ܘܰܐܝܟ ܕܶܐܡܰܪ ܝܶܫܽܘܥ ܠܥܰܡܳܐ. ܫܰܒܥܳܐ ܟܳܗ̈ܢܶܐ ܫܩܺܝܠܺܝܢ ܗܘܰܘ ܫܒܰܥ ܩܰܖ̈ܢܳܢ. ܘܰܡܝܰܒܒܺܝܢ ܗܘܰܘ ܩܕܳܡ ܩܺܐܒܽܘܬܶܗ ܕܡܳܪܝܳܐ. ܘܩܳܪܶܝܢ ܗܘܰܘ ܒܩܰܖ̈ܢܳܬܳܐ. ܘܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ ܐܳܬܝܳܐ ܗܘܳܬ ܒܳܬܰܪܗܽܘܢ.
9 ܘܕܰܡܙܰܝܢܺܝܢ ܗܘܰܘ ܐܳܙܺܠܝܢ ܗܘܰܘ ܩܕܳܡ ܟܳܗ̈ܢܶܐ ܕܩܳܪܶܝܢ ܗܘܰܘ ܒܩܰܖ̈ܢܳܬܳܐ. ܘܕܰܡܟܰܢܫܺܝܢ ܐܳܙܺܠܝܢ ܗܘܰܘ ܒܳܬܰܪ ܩܺܐܒܽܘܬܳܐ. ܘܰܡܗܰܠܟܝܢ ܗܘܰܘ ܘܩܳܪܶܝܢ ܒܩܰܖ̈ܢܳܬܳܐ.
10 ܘܰܠܥܰܡܳܐ ܦܰܩܶܕ ܝܶܫܽܘܥ. ܘܶܐܡܰܪ. ܠܳܐ ܬܶܩܥܽܘܢ ܘܠܳܐ ܬܰܫܡܥܽܘܢ ܩܳܠܟܽܘܢ. ܘܡܶܠܳܐ ܠܳܐ ܬܶܦܽܘܩ ܡܶܢ ܦܽܘܡܟܽܘܢ. ܥܕܰܡܳܐ ܠܝܰܘܡܳܐ ܕܺܐܡܰܪ ܠܟܽܘܢ ܕܰܩܥܰܘ. ܘܗܳܝܕܶܝܢ ܬܶܩܥܽܘܢ.
11 ܘܶܐܬܟܰܪܟܰܬ ܩܺܐܒܽܘܬܶܗ ܕܡܳܪܝܳܐ ܠܰܡܕܺܝܢܬܳܐ ܙܒܰܢ̱ܬܳܐ ܚܕܳܐ. ܘܶܐܬܘ ܠܡܰܫܪܺܝܬܳܐ. ܘܒܳܬܘ ܒܡܰܫܪܺܝܬܳܐ.
12 ܘܩܰܕܶܡ ܝܶܫܽܘܥ ܒܨܰܦܪܳܐ. ܘܰܫ̣ܩܰܠܘ ܟܳܗ̈ܢܶܐ ܩܺܐܒܽܘܬܶܗ ܕܡܳܪܝܳܐ.
13 ܘܫܰܒܥܳܐ ܟܳܗ̈ܢܶܐ ܫܩܺܝܠܺܝܢ ܗܘܰܘ ܫܒܰܥ ܩܰܖ̈ܢܳܢ. ܘܳܐܙܺܠܝܢ ܗܘܰܘ ܩܕܳܡ ܩܺܐܒܽܘܬܶܗ ܕܡܳܪܝܳܐ. ܘܰܡܗܰܠܟܝܢ ܗܘܰܘ ܘܩܳܪܶܝܢ ܒܩܰܖ̈ܢܳܬܳܐ. ܘܰܐܝܠܶܝܢ ܕܰܡܙܰܝܢܺܝܢ ܗܘܰܘ ܐܳܙܺܠܝܢ ܩܕܳܡܰܝܗܽܘܢ. ܘܕܰܡܟܰܢܫܺܝܢ ܗܘܰܘ ܐܳܙܺܠܝܢ ܗܘܰܘ ܒܳܬܰܪ ܩܺܐܒܽܘܬܶܗ ܕܡܳܪܝܳܐ. ܘܩܳܪܶܝܢ ܗܘܰܘ ܒܩܰܖ̈ܢܳܬܳܐ.
14 ܘܶܐܬܟܰܪܟܽܘܗ̇ ܠܰܡܕܺܝܢܬܳܐ ܗܳܝ ܒܝܰܘܡܳܐ ܕܰܬܪܶܝܢ ܙܒܰܢ̱ܬܳܐ ܚܕܳܐ. ܘܰܗܦܰܟܘ ܠܗܽܘܢ ܠܡܰܫܪܺܝܬܳܐ. ܗܳܟܰܢܳܐ ܥܳܒܕܺܝܢ ܗܘܰܘ ܫܬܳܬܰܝ̈ܗܽܘܢ ܝܰܘ̈ܡܳܬܐ.
15 ܘܰܒܝܰܘܡܳܐ ܕܫܰܒܥܳܐ. ܩܰܕܶܡܘ ܒܨܰܦܪܳܐ ܘܶܐܬܟܰܪܟܽܘܗ̇ ܠܰܡܕܺܝܢܬܳܐ ܐܰܝܟ ܢܳܡܽܘܣܳܐ ܗܳܢܳܐ ܫܒܰܥ ܙܰܒܢܺܝ̈ܢ. ܒܰܠܚܽܘܕ ܕܶܝܢ ܒܶܗ ܒܗܰܘ ܝܰܘܡܳܐ ܐܶܬܟܰܪܟܽܘܗ̇ ܫܒܰܥ ܙܰܒܢܺܝ̈ܢ.
16 ܘܒܰܙܒܰܢ̱ܬܳܐ ܗܳܝ ܕܰܫܒܰܥ. ܩ̣ܪܰܘ ܟܳܗ̈ܢܶܐ ܒܩܰܖ̈ܢܳܬܳܐ. ܘܶܐܡܰܪ ܝܶܫܽܘܥ ܠܥܰܡܳܐ ܩܥܰܘ. ܡܶܛܽܠ ܕܰܐܫܠܡܳܗ̇ ܠܟܽܘܢ ܡܳܪܝܳܐ ܠܰܡܕܺܝܢܬܳܐ.
17 ܘܬܶܗܘܶܐ ܡܕܺܝܢܬܳܐ ܗܳܕܶܐ ܘܟܽܠ ܕܺܐܝܬ ܒܳܗ̇ ܚܶܪܡܳܐ ܠܡܳܪܝܳܐ. ܒܰܠܚܽܘܕ ܠܪܳܚܳܒ ܙܳܢܺܝܬܳܐ ܐܰܚܰܘ ܠܳܗ̇ ܘܰܠܟܽܠ ܕܺܐܝܬ ܥܰܡܳܗ̇ ܒܒܰܝܬܳܐ. ܡܶܛܽܠ ܕܛܰܫܝܰܬ ܠܗܳܢܽܘܢ ܓܳܫܽܘ̈ܫܶܐ ܕܫܰܕܰܪܢ.
18 ܐܰܢ̱ܬܽܘܢ ܕܶܝܢ ܗܘܰܝܬܽܘܢ ܙܗܺܝܪܺܝܢ ܡܶܢ ܚܶܪܡܳܐ. ܕܠܳܐ ܬܛܰܘܫܽܘܢ ܘܬܶܣܒܽܘܢ ܡܶܢ ܚܶܪܡܳܐ. ܘܬܶܥܒܕܽܘܢܳܗ̇ ܠܡܰܫܪܺܝܬܳܐ ܕܺܝܣܪܳܐܶܝܠ ܚܶܪܡܳܐ. ܘܰܬܕܰܠܚܽܘܢܳܗ̇.
19 ܟܽܠ ܣܺܐܡܳܐ. ܘܕܰܗܒܳܐ. ܘܡܳܐܢ̈ܶܐ ܕܰܢܚܳܫܳܐ. ܘܰܕܦܰܪܙܠܳܐ. ܩܰܕܺܝܫܺܝܢ ܐܶܢܽܘܢ ܠܡܳܪܝܳܐ. ܠܒܶܝܬ ܓܰܙܶܗ ܕܡܳܪܝܳܐ ܢܶܥܠܽܘܢ.
20 ܘܰܩܥܰܘ ܥܰܡܳܐ. ܘܰܩ̣ܪܘ ܒܩܰܖ̈ܢܳܬܳܐ. ܘܟܰܕ ܫ̣ܡܰܥܘ ܥܰܡܳܐ ܩܳܠܳܐ ܕܩܰܖ̈ܢܳܬܳܐ. ܩ̣ܥܳܐ ܥܰܡܳܐ ܩܥܳܬܳܐ ܪܰܒܬܳܐ ܕܛܳܒ. ܘܰܢܦܰܠ ܫܽܘܪܳܐ ܥܰܠ ܕܽܘܟܬܶܗ. ܘܰܣܠܶܩܘ ܥܰܡܳܐ ܠܰܡܕܺܝܢܬܳܐ ܐ̱ܢܳܫ ܠܩܽܘܒܠܶܗ. ܘܟܰܒܫܽܘܗ̇ ܠܰܡܕܺܝܢܬܳܐ.
21 ܘܰܚܪܰܒܘ ܠܟܽܠ ܕܺܐܝܬ ܒܳܗ̇. ܡܶܢ ܓܰܒܖ̈ܶܐ ܘܰܥܕܰܡܳܐ ܠܢܶܫ̈ܶܐ. ܘܡܶܢ ܛܠܳܝ̈ܶܐ ܘܰܥܕܰܡܳܐ ܠܩܰܫܺܝ̈ܫܶܐ. ܘܰܥܕܰܡܳܐ ܠܬܰܘܖ̈ܶܐ. ܘܰܥܕܰܡܳܐ ܠܥܳܢ̈ܳܐ ܘܰܠܚܶܡܖ̈ܳܐ. ܚܪܰܒܘ ܒܦܽܘܡܳܐ ܕܣܰܝܦܳܐ.
22 ܘܠܰܬܪܶܝܢ ܓܰܒܖ̈ܺܝܢ ܗܳܢܽܘܢ ܕܓܰܫܽܘܗ̇ ܠܰܐܪܥܳܐ ܐܶܡܰܪ ܝܶܫܽܘܥ. ܥܽܘܠܘ ܠܒܶܝܬ ܐܰܢ̱ܬܬܳܐ ܗܳܝ ܙܳܢܺܝܬܳܐ. ܘܰܐܦܩܽܘܗ̇ ܡܶܢ ܬܰܡܳܢ ܠܳܗ̇ ܠܰܐܢ̱ܬܬܳܐ ܘܰܠܟܽܠ ܕܺܐܝܬ ܠܳܗ̇. ܐܰܝܟܰܢܳܐ ܕܺܝܡܰܝܬܽܘܢ ܠܳܗ̇.
23 ܘܶܐܙܰܠܘ ܓܳܫܽܘ̈ܫܶܐ ܘܰܐܦܩܽܘܗ̇ ܠܪܳܚܳܒ. ܘܠܰܐܒܽܘܗ̇. ܘܠܶܐܡܳܗ̇. ܘܠܰܐܚܶܝ̈ܗ̇. ܘܰܠܟܽܠ ܕܺܐܝܬ ܠܳܗ̇. ܘܰܠܟܽܠܳܗ̇ ܫܰܪܒܬܗ̇ ܐܰܦܶܩܘ. ܘܰܐܫܪܺܝܘ ܐܶܢܽܘܢ ܠܒܰܪ ܡܶܢ ܡܰܫܪܺܝܬܳܐ ܕܺܝܣܪܳܐܶܝܠ.
24 ܘܠܰܡܕܺܝܢܬܳܐ ܐܰܘܩܕܽܘܗ̇ ܒܢܽܘܪܳܐ ܘܰܠܟܽܠ ܕܺܐܝܬ ܒܳܗ̇. ܒܰܠܚܽܘܕ ܠܕܰܗܒܳܐ. ܘܰܠܣܺܐܡܳܐ. ܘܰܠܡܳܐܢ̈ܶܐ ܕܰܢܚܳܫܳܐ. ܘܰܕܦܰܪܙܠܳܐ. ܐܰܝܬܺܝܘ ܐܶܢܽܘܢ ܠܒܶܝܬ ܓܰܙܶܗ ܕܡܳܪܝܳܐ.
25 ܘܰܠܪܳܚܳܒ ܙܳܢܺܝܬܳܐ. ܘܰܠܒܶܝܬ ܐܰܒܽܘܗ̇ ܘܰܠܟܽܠ ܕܺܐܝܬ ܠܳܗ̇ ܐܰܚܺܝ ܝܶܫܽܘܥ. ܘܶܝܬܒܰܬ ܒܓܰܘ ܒܢܰܝ̈ ܝܺܣܪܳܐܶܝܠ ܥܕܰܡܳܐ ܠܝܰܘܡܳܢܳܐ. ܡܶܛܽܠ ܕܛܰܫܝܰܬ ܓܳܫܽܘ̈ܫܶܐ ܕܫܰܕܰܪ ܝܶܫܽܘܥ ܠܡܶܓܰܫ ܠܺܐܝܪܺܝܚܽܘ.
26 ܘܺܝܡܳܐ ܝܶܫܽܘܥ ܒܙܰܒܢܳܐ ܗܰܘ. ܘܶܐܡܰܪ. ܠܺܝܛ ܗܽܘ ܓܰܒܪܳܐ ܩܕܳܡ ܡܳܪܝܳܐ. ܕܰܢܩܽܘܡ ܘܢܶܒܢܶܝܗ̇ ܠܰܡܕܺܝܢܬܳܐ ܗܳܕܶܐ ܐܺܝܪܺܝܚܽܘ ܒܒܽܘܟܪܶܗ ܢܶܒܢܶܝܗ̇. ܘܒܰܙܥܽܘܪܶܗ ܢܩܺܝܡ ܬܰܖ̈ܥܶܝܗ̇.
27 ܘܰܗܘܳܐ ܡܳܪܝܳܐ ܥܰܡ ܝܶܫܽܘܥ ܘܫܶܡܥܶܗ ܐܳܙܶܠ ܗܘܳܐ ܒܟܽܠܳܗ̇ ܐܰܪܥܳܐ.