Joshua 7
The Book of Joshua
܀ ܝܫܘܥ ܒܪ ܢܘܢ ܙ ܀
1 ܘܰܐܥܠܺܝܘ ܒܢܰܝ̈ ܝܺܣܪܳܐܶܝܠ ܥܰܘܠܳܐ ܒܚܶܪܡܳܐ. ܘܰܢܣܰܒ ܥܳܟܪ ܒܰܪ ܟܰܪܡܺܝ. ܒܰܪ ܙܰܒܕܺܝ. ܒܰܪ ܙܳܪܳܚ. ܡܶܢ ܫܰܒܛܳܐ ܕܺܝܗܽܘܕܳܐ. ܡܶܢ ܚܶܪܡܳܐ ܘܛܰܫܺܝ ܘܶܐܬܚܰܡܰܬ ܪܽܘܓܙܶܗ ܕܡܳܪܝܳܐ ܥܰܠ ܒܢܰܝ̈ ܝܺܣܪܳܐܶܝܠ.
2 ܘܫܰܕܰܪ ܝܶܫܽܘܥ ܓܰܒܖ̈ܶܐ ܡܶܢ ܐܺܝܪܺܝܚܽܘ ܠܥܳܝ. ܕܥܰܠ ܓܶܢ̱ܒ ܒܶܝܬ ܐܳܘܳܢ. ܡܶܢ ܡܰܕܢܚܳܐ ܕܒܶܝܬ ܐܺܝܠ. ܘܶܐܡܰܪ ܠܗܽܘܢ ܣܰܩܘ ܓܽܘܫܘ ܐܰܪܥܳܐ. ܘܰܣܠܶܩܘ ܓܰܒܖ̈ܶܐ ܘܓܰܫܽܘܗ̇ ܠܥܳܝ.
3 ܘܰܗܦܰܟܘ ܠܘܳܬ ܝܶܫܽܘܥ. ܘܳܐܡܪܺܝܢ ܠܶܗ. ܠܳܐ ܢܶܣܰܩ ܟܽܠܶܗ ܥܰܡܳܐ. ܐܶܠܳܐ ܐܰܝܟ ܬܪܶܝܢ ܬܠܳܬܳܐ ܐܰܠܦܺܝ̈ܢ ܓܰܒܖ̈ܺܝܢ ܢܶܣܩܽܘܢ ܢܶܚܪܒܽܘܢܳܗ̇ ܠܥܳܝ. ܠܳܐ ܬܫܰܕܰܪ ܠܟܽܠܶܗ ܥܰܡܳܐ. ܡܶܛܽܠ ܕܰܙܥܽܘܪܺܝܢ ܐܶܢܽܘܢ.
4 ܘܰܣܠܶܩܘ ܡܶܢ ܥܰܡܳܐ ܠܬܰܡܳܢ. ܐܰܝܟ ܬܠܳܬܳܐ ܐܰܠܦܺܝ̈ܢ ܓܰܒܖ̈ܺܝܢ. ܘܰܥܪܰܩܘ ܠܗܽܘܢ ܡܶܢ ܩܕܳܡ ܐ̱ܢܳܫܶܝ̈ܗ̇ ܕܥܳܝ.
5 ܘܰܚܪܰܒܘ ܐ̱ܢܳܫܶܝ̈ܗ̇ ܕܥܳܝ ܡܶܢ ܝܺܣܪܳܐܶܝܠ. ܬܠܳܬܺܝܢ ܘܶܫܬܳܐ ܓܰܒܖ̈ܺܝܢ. ܘܰܪܕܰܦܘ ܐܶܢܽܘܢ ܩܕܳܡ ܬܰܪܥܳܐ ܥܕܰܡܳܐ ܕܶܐܬܬܒܰܪܘ. ܘܰܡܚܰܘ ܒܗܽܘܢ ܡܚܽܘܬܐ. ܘܙܳܥ ܠܶܒܶܗ ܕܥܰܡܳܐ. ܘܰܗܘܳܐ ܐܰܝܟ ܡܰܝ̈ܳܐ.
6 ܘܨܰܪܺܝ ܝܶܫܽܘܥ ܠܒܽܘܫܰܘ̈ܗܝ. ܘܰܢܦܰܠ ܥܰܠ ܐܰܦܰܘ̈ܗܝ ܥܰܠ ܐܰܪܥܳܐ. ܩܕܳܡ ܩܺܐܒܽܘܬܶܗ ܕܡܳܪܝܳܐ ܥܕܰܡܳܐ ܠܪܰܡܫܳܐ. ܗܽܘ ܘܩܰܫܺܝ̈ܫܶܐ ܕܺܝܣܪܳܐܶܝܠ. ܘܰܐܪܡܺܝܘ ܥܰܦܪܳܐ ܥܰܠ ܖ̈ܺܝܫܰܝܗܽܘܢ.
7 ܘܶܐܡܰܪ ܝܶܫܽܘܥ. ܐܽܘܢ ܡܳܪܝܳܐ ܐܰܠܳܗܳܐ. ܠܡܳܢܳܐ ܐܰܥܒܰܪܬܳܝܗܝ ܠܥܰܡܳܐ ܗܳܢܳܐ ܝܽܘܪܕܢܳܢ. ܕܬܰܫܠܡܰܢ ܒܺܐܝܕܳܐ ܕܳܐܡܽܘܖ̈ܳܝܶܐ. ܐܶܠܽܘ ܝܺܬܶܒܢ ܗܘܰܝܢ ܠܰܢ ܟܰܝ ܒܥܶܒܪܳܐ ܕܝܽܘܪܕܢܳܢ.
8 ܡܳܢܳܐ ܡܶܟܺܝܠ ܐܺܡܰܪ. ܕܰܐܦܢܺܝ ܝܺܣܪܳܐܶܝܠ ܩܕܳܠܶܗ ܩܕܳܡ ܒܥܶܠܕܒܳܒܰܘ̈ܗܝ.
9 ܘܢܶܫܡܥܽܘܢ ܟܢܰܥ̈ܢܳܝܶܐ ܘܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ. ܘܢܶܬܟܰܢܫܽܘܢ ܥܠܰܝܢ. ܘܢܰܘܒܕܽܘܢ ܫܡܰܢ ܡܶܢ ܐܰܦܰܝ̈ ܐܰܪܥܳܐ. ܘܡܳܢܳܐ ܕܶܝܢ ܥܳܒܶܕ ܐܰܢ̱ܬ ܠܰܫܡܳܟ ܪܰܒܳܐ.
10 ܘܶܐܡܰܪ ܡܳܪܝܳܐ ܠܝܶܫܽܘܥ. ܩܽܘܡ ܠܳܟ. ܠܡܳܢܳܐ ܪܡܶܐ ܐܰܢ̱ܬ ܥܰܠ ܐܰܦܰܝ̈ܟ ܥܰܠ ܐܰܪܥܳܐ.
11 ܚ̣ܛܳܐ ܝܺܣܪܳܐܶܝܠ. ܘܰܥܒܰܪܘ ܥܰܠ ܦܽܘܩܕܳܢܳܐ ܕܦܰܩܕܶܬ ܐܶܢܽܘܢ. ܘܰܢ̣ܣܰܒܘ ܡܶܢ ܚܶܪܡܳܐ. ܐܳܦ ܓܢܰܒܘ. ܐܳܦ ܟܰܕܶܒܘ. ܘܛܰܫܺܝܘ ܒܡܳܐܢܰܝ̈ܗܽܘܢ.
12 ܘܠܳܐ ܢܶܫܟܚܽܘܢ ܬܽܘܒ ܒܢܰܝ̈ ܝܺܣܪܳܐܶܝܠ ܠܰܡܩܳܡ ܩܕܳܡ ܒܥܶܠܕܒܳܒܰܝ̈ܗܽܘܢ. ܐܶܠܳܐ ܩܕܳܠܗܽܘܢ ܢܰܦܢܽܘܢ ܩܕܳܡ ܒܥܶܠܕܒܳܒܰܝ̈ܗܽܘܢ. ܡܶܛܽܠ ܕܰܗܘܰܘ ܠܚܶܪܡܳܐ. ܘܬܽܘܒ ܠܳܐ ܐܶܗܘܶܐ ܥܰܡܟܽܘܢ. ܐܶܠܳܐ ܐܶܢ ܐܰܦܪܶܩܬܽܘܢ ܚܶܪܡܳܐ ܡܶܢ ܒܰܝܢܳܬܟܽܘܢ.
13 ܩܽܘܡ ܙܰܡܶܢܳܝܗܝ ܠܥܰܡܳܐ ܗܳܢܳܐ. ܘܶܐܡܰܪ. ܐܶܙܕܰܡܢܘ ܡܚܳܪ. ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܚܶܪܡܳܐ ܒܓܰܘܟ ܝܺܣܪܳܐܶܝܠ. ܬܽܘܒ ܠܳܐ ܡܶܫܟܰܚ ܐܰܢ̱ܬ ܠܰܡܩܳܡ ܩܕܳܡ ܒܥܶܠܕܒܳܒܰܝ̈ܟ. ܥܕܰܡܳܐ ܕܬܰܦܪܩܽܘܢ ܚܶܪܡܳܐ ܡܶܢ ܒܰܝܢܳܬܟܽܘܢ.
14 ܘܰܒܨܰܦܪܳܐ ܩܰܪܶܒܘ ܫܰܒܛܰܝ̈ܟܽܘܢ ܘܫܰܒܛܳܐ ܕܢܶܐܚܕܺܝܘܗܝ ܡܳܪܝܳܐ. ܢܶܬܩܰܪܰܒ ܠܫܰܖ̈ܒܳܬܐ. ܘܫܰܪܒܬܳܐ ܕܢܶܐܚܕܺܝܗ̇ ܡܳܪܝܳܐ. ܬܶܬܩܰܪܰܒ ܠܒ̈ܳܬܺܝܢ. ܘܒܰܝܬܳܐ ܕܢܶܐܚܕܺܝܘܗܝ ܡܳܪܝܳܐ. ܢܶܬܩܰܪܰܒ ܠܓܰܒܖ̈ܺܝܢ.
15 ܘܡܰܢ ܕܡܶܬܬܚܶܕ ܒܶܗ ܒܚܶܪܡܳܐ. ܢܺܐܩܰܕ ܒܢܽܘܪܳܐ ܗܽܘ ܘܟܽܠ ܡܶܕܶܡ ܕܺܐܝܬ ܠܶܗ. ܥܰܠ ܕܰܥܒܰܪ ܥܰܠ ܦܽܘܩܕܳܢܶܗ ܕܡܳܪܝܳܐ. ܘܥܰܠ ܕܰܥܒܰܕ ܥܰܘܠܳܐ ܒܺܝܣܪܳܐܶܝܠ.
16 ܘܩܰܕܶܡ ܝܶܫܽܘܥ ܒܨܶܦܪܳܐ. ܘܩܰܪܒܶܗ ܠܺܝܣܪܳܐܶܝܠ ܠܫܰܒ̈ܛܺܝܢ. ܘܶܐܬܬܚܶܕ ܫܰܒܛܳܐ ܕܺܝܗܽܘܕܳܐ.
17 ܘܩܰܪܶܒ ܫܰܒܛܳܐ ܕܺܝܗܽܘܕܳܐ ܠܫܰܖ̈ܒܳܬܐ. ܘܶܐܬܬܰܚܕܰܬ ܫܰܪܒܬܳܐ ܕܙܳܪܳܚ. ܘܩܰܪܶܒ ܫܰܪܒܬܳܐ ܕܙܳܪܳܚ ܠܒ̈ܳܬܺܝܢ. ܘܶܐܬܬܚܶܕ ܙܰܒܕܺܝ.
18ܘܩܰܪܶܒ ܒܰܝܬܶܗ ܠܓܰܒܖ̈ܺܝܢ. ܘܶܐܬܬܚܶܕ ܥܳܟܪ. ܒܰܪ ܟܰܪܡܺܝ. ܒܰܪ ܙܰܒܕܺܝ. ܒܰܪ ܙܳܪܳܚ. ܡܶܢ ܫܰܒܛܳܐ ܕܺܝܗܽܘܕܳܐ.
19 ܘܶܐܡܰܪ ܝܶܫܽܘܥ ܠܥܳܟܪ. ܗܰܒ ܪܰܒܽܘܬܳܐ ܠܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܘܗܰܒ ܠܶܗ ܬܰܘܕܺܝܬܳܐ. ܘܚܰܘܳܐ ܡܶܕܶܡ ܕܰܥܒܰܕܬ ܘܠܳܐ ܬܛܰܫܶܐ ܡܶܢܝ.
20 ܥ̣ܢܳܐ ܥܳܟܪ ܘܶܐܡܰܪ ܠܝܶܫܽܘܥ. ܫܰܪܺܝܪܳܐܺܝܬ ܐܶܢܳܐ ܚܛܺܝܬ ܠܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܘܗܳܟܰܢܳܐ ܥܶܒܕܶܬ.
21 ܚܙܺܝܬ ܒܒܶܙܬܳܐ. ܐܳܡܶܠܳܐ ܚܕܳܐ ܒܳܒܠܳܝܬܳܐ. ܘܫܰܦܺܝܪܳܐ ܗܘܳܬ. ܘܡܰܐܬܶܝܢ ܡܰܬܩ̈ܳܠܺܝܢ ܕܣܺܐܡܳܐ. ܘܠܶܫܳܢܳܐ ܚܰܕ ܕܕܰܗܒܳܐ. ܕܬܩܶܠ ܚܰܡܫܺܝܢ ܡܰܬܩ̈ܳܠܺܝܢ ܘܪܶܓܶܬ ܐܶܢܽܘܢ. ܘܢܶܣܒܶܬ ܐܶܢܽܘܢ. ܘܗܳܐ ܛܡܺܝܪܺܝܢ ܠܺܝ ܒܰܐܪܥܳܐ ܒܡܰܫܟܰܢܝ. ܘܣܺܐܡܳܐ ܡܶܢ ܠܬܰܚܬ.
22 ܘܫܰܕܰܪ ܝܶܫܽܘܥ ܓܰܒܖ̈ܶܐ. ܘܰܪܗܶܛܘ ܠܡܰܫܟܢܶܗ. ܘܰܚܙܰܘ ܕܰܛܡܺܝܪܺܝܢ ܒܡܰܫܟܢܶܗ. ܘܣܺܐܡܳܐ ܡܶܢ ܠܬܰܚܬ.
23 ܘܰܢ̣ܣܰܒܘ ܐܶܢܽܘܢ ܡܶܢ ܡܰܫܟܢܶܗ ܘܰܐܝܬܺܝܘ ܐܶܢܽܘܢ ܠܘܳܬ ܝܶܫܽܘܥ. ܘܰܠܘܳܬ ܟܽܠܶܗ ܝܺܣܪܳܐܶܝܠ ܘܣܳܡ ܐܶܢܽܘܢ ܩܕܳܡ ܡܳܪܝܳܐ.
24 ܘܕܰܒܪܶܗ ܝܶܫܽܘܥ ܠܥܳܟܳܪ ܒܰܪ ܙܳܪܳܚ. ܘܰܢ̣ܣܰܒ ܠܣܺܐܡܳܐ. ܘܠܳܐܡܶܠܳܐ. ܘܰܠܠܶܫܳܢܳܐ ܕܕܰܗܒܳܐ ܘܰܕܒܰܪ ܠܰܒܢܰܘ̈ܗܝ. ܘܠܰܒ̈ܢܳܬܶܗ. ܘܰܠܬܘܖ̈ܰܘܗܝ. ܘܰܠܚܶܡܖ̈ܶܗ. ܘܰܠܥܳܢ̈ܶܗ. ܘܰܠܡܰܫܟܢܶܗ. ܘܰܠܟܽܠܡܶܕܶܡ ܕܺܐܝܬ ܠܶܗ. ܘܰܠܟܽܠܶܗ ܝܺܣܪܳܐܶܝܠ ܥܰܡܶܗ. ܘܰܐܣܶܩ ܐܶܢܽܘܢ ܠܥܽܘܡܩܳܐ ܕܥܳܟܪ.
25 ܘܶܐܡܰܪ ܠܶܗ ܝܶܫܽܘܥ. ܠܡܳܢܳܐ ܕܰܠܰܚܬܳܢܝ. ܢܕܰܠܚܳܟ ܡܳܪܝܳܐ ܒܝܰܘܡܳܐ ܗܳܢܳܐ. ܘܪܰܓܡܽܘܗܝ ܒܟܺܐܦ̈ܶܐ ܟܽܠܶܗ ܝܺܣܪܳܐܶܝܠ. ܠܶܗ ܘܰܠܟܽܠ ܕܺܐܝܬ ܠܶܗ. ܘܰܐܘܩܶܕܘ ܐܶܢܽܘܢ ܒܢܽܘܪܳܐ.
26 ܘܰܐܩܺܝܡܘ ܥܠܰܘܗܝ ܝܰܓܪܳܐ ܕܟܺܐܦ̈ܶܐ ܪܰܘܖ̈ܒܳܬܳܐ ܥܕܰܡܳܐ ܠܝܰܘܡܳܢܳܐ. ܘܶܐܬܬܢܺܝܚ ܡܳܪܝܳܐ ܡܶܢ ܚܡܬܳܐ ܕܪܽܘܓܙܶܗ ܡܶܛܽܠ ܗܳܢܳܐ ܐܶܬܩܪܺܝ ܫܡܶܗ ܕܰܐܬܪܳܐ ܗܰܘ. ܥܽܘܡܩܳܐ ܕܥܳܟܪ ܥܕܰܡܳܐ ܠܝܰܘܡܳܢܳܐ.