Joshua 4
The Book of Joshua
܀ ܝܫܘܥ ܒܪ ܢܘܢ ܕ ܀
1 ܘܟܰܕ ܫܠܶܡܘ ܟܽܠܶܗ ܥܰܡܳܐ ܠܡܶܥܒܰܪ ܝܽܘܪܕܢܳܢ. ܐܶܡܰܪ ܡܳܪܝܳܐ ܠܝܶܫܽܘܥ.
2 ܕܒܰܪ ܠܟܽܘܢ ܡܶܢ ܥܰܡܳܐ ܬܪܶܥܣܰܪ ܓܰܒܖ̈ܺܝܢ. ܚܰܕ ܚܰܕ ܓܰܒܪܳܐ ܡܶܢ ܫܰܒܛܳܐ.
3 ܘܦܰܩܶܕ ܐܶܢܽܘܢ. ܘܶܐܡܰܪ ܠܗܽܘܢ. ܣ̣ܰܒܘ ܠܟܽܘܢ ܡܶܟܳܐ ܡܶܢ ܓܰܘ ܝܽܘܪܕܢܳܢ ܡܶܢ ܬܚܶܝܬ ܖ̈ܶܓܠܰܝܗܽܘܢ ܕܟܳܗ̈ܢܶܐ. ܛܰܝܶܒܘ ܬܰܪܬܰܥܶܣܖ̈ܶܐ ܟܺܐܦܺܝ̈ܢ. ܘܰܐܥܒܰܪܘ ܐܶܢܶܝܢ ܥܰܡܟܽܘܢ. ܘܣܺܝܡܘ ܐܶܢܶܝܢ ܒܶܝܬ ܒܰܘܬܳܐ ܕܒܳܝܬܺܝܢ ܐ̱ܢܬܽܘܢ ܒܶܗ ܒܠܺܠܝܳܐ.
4 ܘܰܩܪܳܐ ܝܶܫܽܘܥ ܠܰܬܪܶܥܣܰܪ ܓܰܒܖ̈ܺܝܢ ܗܳܢܽܘܢ ܕܛܰܝܶܒܘ ܡܶܢ ܒܢܰܝ̈ ܝܺܣܪܳܐܶܝܠ. ܚܰܕ ܚܰܕ ܓܰܒܪܳܐ ܡܶܢ ܫܰܒܛܳܐ.
5 ܘܶܐܡܰܪ ܠܗܽܘܢ ܝܶܫܽܘܥ. ܥܒܰܪܘ ܩܕܳܡ ܩܺܐܒܽܘܬܶܗ ܕܡܳܪܝܳܐ ܐܰܠܳܗܟܽܘܢ ܒܓܰܘ ܝܽܘܪܕܢܳܢ. ܘܣܺܝܡܘ ܓܒܰܪ ܟܺܐܦܶܗ ܥܰܠ ܟܰܬܦܶܗ. ܒܡܶܢܝܳܢܳܐ ܕܫܰܒ̈ܛܶܐ ܕܰܒܢܰܝ̈ ܝܺܣܪܳܐܶܝܠ.
6 ܡܶܛܽܠ ܕܬܶܗܘܶܐ ܐܳܬܳܐ ܗܳܕܶܐ ܒܰܝܢܳܬܟܽܘܢ. ܕܟܰܕ ܢܫܰܐܠܽܘܢܳܟܽܘܢ ܒܢܰܝ̈ܟܽܘܢ ܡܶܢ ܡܚܳܪ. ܘܢܺܐܡܪܽܘܢ ܠܟܽܘܢ. ܡܳܢܳܐ ܐܶܢܶܝܢ ܟܺܐܦ̈ܶܐ ܗܳܠܶܝܢ.
7 ܐܶܡܰܪܘ ܠܗܽܘܢ. ܕܶܐܬܦܠܶܓܘ ܡܰܝ̈ܳܐ ܕܝܽܘܪܕܢܳܢ ܡܶܢ ܩܕܳܡ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ. ܟܰܕ ܥܒܰܪܢ ܒܝܽܘܪܕܢܳܢ. ܐܶܬܦܠܶܓܘ ܡܰܝ̈ܳܐ ܕܝܽܘܪܕܢܳܢ. ܘܰܗܘܰܝ̈ ܗܳܠܶܝܢ ܟܺܐܦ̈ܶܐ ܕܽܘܟܪܳܢܳܐ ܠܰܒܢܰܝ̈ ܝܺܣܪܳܐܶܝܠ ܠܥܳܠܰܡ.
8 ܘܰܥ̣ܒܰܕܘ ܗܳܟܰܢܳܐ ܒܢܰܝ̈ ܝܺܣܪܳܐܶܝܠ ܐܰܝܟ ܕܦܰܩܶܕ ܐܶܢܽܘܢ ܝܶܫܽܘܥ. ܘܰܫ̣ܩܰܠܘ ܬܰܪܬܰܥܶܣܖ̈ܶܐ ܟܺܐܦܺܝ̈ܢ ܡܶܢ ܓܰܘ ܝܽܘܪܕܢܳܢ. ܐܰܝܟ ܕܶܐܡܰܪ ܡܳܪܝܳܐ ܠܝܶܫܽܘܥ. ܒܡܶܢܝܳܢܳܐ ܕܫܰܒ̈ܛܶܐ ܕܰܒܢܰܝ̈ ܝܺܣܪܳܐܶܝܠ. ܘܰܐܥܒܰܪܘ ܐܶܢܶܝܢ ܥܰܡܗܽܘܢ ܠܒܶܝܬ ܒܰܘܬܳܐ. ܘܰܫܒܰܩܘ ܐܶܢܶܝܢ ܬܰܡܳܢ.
9 ܘܬܰܪܬܰܥܶܣܖ̈ܶܐ ܟܺܐܦܺܝ̈ܢ ܐܰܩܺܝܡܘ. ܕܰܢ̣ܣܰܒܘ ܡܶܢ ܓܰܘ ܝܽܘܪܕܢܳܢ. ܡܶܢ ܬܚܶܝܬ ܖ̈ܶܓܠܰܝܗܽܘܢ ܕܟܳܗ̈ܢܶܐ ܕܰܫܩܺܝܠܺܝܢ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ ܘܰܗܘܰܝ̈ ܬܰܡܳܢ ܥܕܰܡܳܐ ܠܝܰܘܡܳܢܳܐ.
10 ܘܟܳܗ̈ܢܶܐ ܕܰܫܩܺܝܠܺܝܢ ܗܘܰܘ ܩܺܐܒܽܘܬܳܐ ܩܳܝܡܺܝܢ ܗܘܰܘ ܒܓܰܘ ܝܽܘܪܕܢܳܢ. ܥܕܰܡܳܐ ܕܰܫ̣ܠܶܡܘ ܟܽܠܗܽܘܢ ܦܶܬܓܳܡ̈ܶܐ ܕܦ̣ܰܩܶܕ ܡܳܪܝܳܐ ܠܝܶܫܽܘܥ. ܠܡܺܐܡܰܪ ܦܶܬܓܳܡ̈ܶܐ ܕܦ̣ܰܩܶܕ ܡܳܪܝܳܐ ܠܝܶܫܽܘܥ. ܠܡܺܐܡܰܪ ܠܥܰܡܳܐ. ܐܰܝܟܰܢܳܐ ܕܦܰܩܕܶܗ ܡܽܘܫܶܐ ܠܝܶܫܽܘܥ. ܘܶܐܣܬܰܪܗܰܒܘ ܥܰܡܳܐ ܘܥ̣ܒܰܪܘ.
11 ܘܟܰܕ ܥ̣ܒܰܪܘ ܟܽܠܶܗ ܥܰܡܳܐ ܡܫܰܡܠܝܳܐܺܝܬ. ܘܥܶܒܪܰܬ ܩܺܐܒܽܘܬܳܐ ܕܡܳܪܝܳܐ. ܘܟܳܗ̈ܢܶܐ ܩܕܳܡ ܥܰܡܳܐ.
12 ܘܰܥ̣ܒܰܪܘ ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ ܘܦܶܠܓܶܗ ܕܫܰܒܛܳܐ ܕܰܡܢܰܫܶܐ. ܟܰܕ ܡܙܰܝܢܺܝܢ ܩܕܳܡ ܒܢܰܝ̈ ܝܺܣܪܳܐܶܝܠ. ܐܰܝܟܰܢܳܐ ܕܶܐܡܰܪ ܠܗܽܘܢ ܡܽܘܫܶܐ.
13 ܐܰܪܒܥܺܝܢ ܐܰܠܦܺܝ̈ܢ ܟܰܕ ܡܙܰܝܢܺܝܢ ܒܚܰܝܠܳܐ. ܥ̣ܒܰܪܘ ܩܕܳܡ ܡܳܪܝܳܐ ܠܰܩܪܳܒܳܐ ܒܰܦܩܰܥܬܳܐ ܕܺܐܝܪܺܝܚܽܘ.
14 ܒܶܗ ܒܝܰܘܡܳܐ ܗܰܘ. ܐܰܘܪܶܒ ܡܳܪܝܳܐ ܠܝܶܫܽܘܥ ܒܥܰܝ̈ܢܰܝ ܟܽܠܶܗ ܝܺܣܪܳܐܶܝܠ. ܘܰܕܚܶܠܘ ܡܶܢܶܗ ܐܰܝܟܰܢܳܐ ܕܕܳܚܠܺܝܢ ܗܘܰܘ ܡܶܢ ܡܽܘܫܶܐ. ܟܽܠܗܽܘܢ ܝܰܘ̈ܡܳܬܐ ܕܚܰܝܰܘ̈ܗܝ.
15 ܘܶܐܡܰܪ ܡܳܪܝܳܐ ܠܝܶܫܽܘܥ.
16 ܦܰܩܶܕ ܠܟܳܗ̈ܢܶܐ ܕܰܫܩܺܝܠܺܝܢ ܩܺܐܒܽܘܬܳܐ ܕܣܳܗܕܽܘܬܳܐ. ܘܢܶܣܩܽܘܢ ܡܶܢ ܓܰܘ ܝܽܘܪܕܢܳܢ.
17 ܘܦܰܩܶܕ ܝܶܫܽܘܥ ܠܟܳܗ̈ܢܶܐ. ܘܶܐܡܰܪ ܠܗܽܘܢ. ܣܰܩܘ ܡܶܢ ܓܰܘ ܝܽܘܪܕܢܳܢ.
18ܘܟܰܕ ܣܠܶܩܘ ܗܘܰܘ ܟܳܗ̈ܢܶܐ ܕܰܫܩܺܝܠܺܝܢ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ ܡܶܢ ܓܰܘ ܝܽܘܪܕܢܳܢ. ܣܡܰܟ̈ܝ ܦܰܣ̈ܳܬܳܐ ܕܖ̈ܶܓܠܰܝܗܽܘܢ ܕܟܳܗ̈ܢܶܐ ܒܝܰܒܫܳܐ. ܘܰܗܦܰܟܘ ܡܰܝ̈ܳܐ ܕܝܽܘܪܕܢܳܢ ܠܕܽܘܟܰܬܗܽܘܢ. ܘܗܰܠܶܟܘ ܐܰܝܟ ܕܡܶܢ ܩܕܺܝܡ ܥܰܠ ܟܽܠܗܽܘܢ ܣܦܳܖ̈ܰܘܗܝ ܕܝܽܘܪܕܢܳܢ.
19 ܘܥܰܡܳܐ ܣܠ̣ܶܩ ܡܶܢ ܓܰܘ ܝܽܘܪܕܢܳܢ. ܒܰܥܣܰܪܬܳܐ ܒܝܰܪܚܳܐ ܩܰܕܡܳܝܳܐ. ܘܰܫ̣ܪܰܘ ܒܓܰܠܓܳܠܳܐ ܒܣܰܘ̈ܦܰܝ ܡܰܕܢܳܚܶܝܗ̇ ܕܺܐܝܪܺܝܚܽܘ.
20 ܘܬܰܪܬܰܥܶܣܖ̈ܶܐ ܟܺܐܦܺܝ̈ܢ ܗܳܠܶܝܢ ܕܰܢ̣ܣܰܒܘ ܡܶܢ ܓܰܘ ܝܽܘܪܕܢܳܢ. ܐܰܩܺܝܡ ܐܶܢܶܝܢ ܝܶܫܽܘܥ ܒܓܰܠܓܳܠܳܐ.
21 ܘܶܐܡܰܪ ܝܶܫܽܘܥ ܠܰܒܢܰܝ̈ ܝܺܣܪܳܐܶܝܠ. ܟܰܕ ܢܫܰܐܠܽܘܢܳܟܽܘܢ ܒܢܰܝ̈ܟܽܘܢ ܡܶܢ ܡܚܳܪ. ܘܢܺܐܡܪܽܘܢ ܠܟܽܘܢ. ܡܳܢܳܐ ܐܶܢܶܝܢ ܟܺܐܦ̈ܶܐ ܗܳܠܶܝܢ.
22 ܚܰܘܰܘ ܐܶܢܶܝܢ ܠܰܒܢܰܝ̈ܟܽܘܢ. ܘܶܐܡܰܪܘ ܠܗܽܘܢ. ܕܰܒܝܰܒܫܳܐ ܥ̣ܒܰܪܘ ܒܢܰܝ̈ ܝܺܣܪܳܐܶܝܠ ܝܽܘܪܕܢܳܢ ܗܳܢܳܐ.
23 ܘܰܐܘܒܶܫ ܡܳܪܝܳܐ ܐܰܠܳܗܗܽܘܢ ܡܰܝ̈ܳܐ ܕܝܽܘܪܕܢܳܢ ܡܶܢ ܩܕܳܡܝܗܽܘܢ ܥܕܰܡܳܐ ܕܰܥ̣ܒܰܪܘ. ܐܰܝܟ ܕܰܥ̣ܒܰܕ ܡܳܪܝܳܐ ܐܰܠܳܗܟܽܘܢ ܠܝܰܡܳܐ ܕܣܽܘܦ. ܘܰܐܘܒܫܶܗ ܡܶܢ ܩܕܳܡܰܝܢ ܥܕܰܡܳܐ ܕܰܥܒܰܪܢ.
24 ܕܢܶܕܥܽܘܢ ܟܽܠܗܽܘܢ ܥܰܡ̈ܡܶܐ ܕܰܐܪܥܳܐ. ܐܺܝܕܶܗ ܕܡܳܪܝܳܐ ܕܚܰܝܠܬܢܝܳܐ ܗܝ. ܘܬܶܕܚܠܽܘܢ ܠܡܳܪܝܳܐ ܐܰܠܳܗܟܽܘܢ ܟܽܠܗܽܘܢ ܝܰܘ̈ܡܳܬܳܐ.