Joshua 11
The Book of Joshua
܀ ܝܫܘܥ ܒܪ ܢܘܢ ܝܐ ܀
1 ܘܟܰܕ ܫ̣ܡܰܥ ܢܳܒܺܝܢ ܡܰܠܟܳܐ ܕܚܳܨܽܘܪ. ܫܰܕܰܪ ܥܰܠ ܝܽܘܒܳܒ ܡܰܠܟܳܐ ܕܡܰܪܽܘܢ. ܘܥܰܠ ܡܰܠܟܳܐ ܕܫܳܡܪܺܝܢ ܘܥܰܠ ܡܰܠܟܳܐ ܕܰܐܟܫܳܦ.
2 ܘܥܰܠ ܡܰܠܟ̈ܶܐ ܕܰܠܓܰܪܒܝܳܐ ܡܶܢܶܗ. ܕܰܒܛܽܘܪܳܐ. ܘܰܒܬܰܝܡܢܳܐ. ܘܒܰܦܩܰܥܬܳܐ ܕܟܶܢܪܰܬ. ܘܰܒܦܰܩ̈ܥܳܬܳܗ̇ ܘܒܰܢܦܶܬܕܽܘܪ ܕܡܶܢ ܡܰܥܪܒܳܐ.
3 ܘܠܰܟܢܰܥ̈ܢܳܝܶܐ ܕܡܶܢ ܡܰܕܢܚܳܐ ܘܡܶܢ ܡܰܥܪܒܳܐ. ܘܳܐܡܽܘܖ̈ܳܝܶܐ. ܘܚܺܝܬܳܝ̈ܶܐ. ܘܦܰܖ̈ܙܳܝܶܐ. ܘܝܳܒܽܘܣܳܝ̈ܶܐ. ܕܰܒܛܽܘܪܳܐ. ܘܰܠܚܳܘܳܝ̈ܶܐ ܕܰܬܚܶܝܬ ܛܽܘܪܳܐ ܕܚܶܪܡܽܘܢ. ܕܒܰܐܪܥܳܐ ܕܕܰܘܩ̈ܶܐ.
4 ܘܰܢܦܰܩܘ ܗܶܢܽܘܢ ܘܟܽܠܗܶܝܢ ܡܰܫܖ̈ܝܳܬܗܽܘܢ ܥܰܡܗܽܘܢ ܣܰܓܺܝܐܺܝܢ ܐܰܝܟ ܚܳܠܳܐ ܕܥܰܠ ܣܶܦܬܶܗ ܕܝܰܡܳܐ. ܘܖ̈ܰܟܫܳܐ ܘܩܳܖ̈ܽܘܟܶܐ ܣܽܘܓܳܐܐ ܕܛܳܒ.
5 ܘܶܐܬܘܰܥܰܕܘ ܟܽܠܗܽܘܢ ܡܰܠܟ̈ܶܐ ܗܳܠܶܝܢ. ܘܰܫܪܰܘ ܐܰܟܚܕܳܐ ܥܰܠ ܡܰܝ̈ܳܐ ܕܡܶܪܽܘܢ. ܘܶܐܬܛܰܝܰܒܘ ܠܡܶܥܒܰܕ ܩܪܳܒܳܐ ܥܰܡ ܝܺܣܪܳܐܶܝܠ.
6 ܘܶܐܡܰܪ ܡܳܪܝܳܐ ܠܝܶܫܽܘܥ. ܠܳܐ ܬܶܕܚܰܠ ܡܶܢܗܽܘܢ. ܡܶܛܽܠ ܕܰܡܚܳܪ ܠܗܳܢܳܐ ܥܶܕܳܢܳܐ. ܥܳܒܶܕ ܐ̱ܢܳܐ ܠܗܽܘܢ ܠܟܽܠܗܽܘܢ ܟܰܕ ܚܪܺܝܒܺܝܢ ܩܕܳܡ ܒܢܰܝ̈ ܝܺܣܪܳܐܶܝܠ. ܘܖ̈ܰܟܫܗܽܘܢ ܐܶܓܰܡܰܪ. ܘܩܳܖ̈ܽܘܟܰܝܗܽܘܢ ܐܰܘܩܶܕ ܒܢܽܘܪܳܐ.
7 ܘܶܐܬܐ ܝܶܫܽܘܥ ܠܡܰܝ̈ܳܐ ܕܡܶܪܽܘܢ ܡܶܢ ܫܶܠܝܳܐ. ܗܽܘ ܘܟܽܠܶܗ ܥܰܡܳܐ ܥܳܒܕܰܝ̈ ܩܪܳܒܳܐ ܕܺܐܝܬ ܗܘܳܐ ܥܰܡܶܗ. ܘܰܢܦܰܠܘ ܒܗܽܘܢ.
8 ܘܰܐܫܠܶܡ ܐܶܢܽܘܢ ܡܳܪܝܳܐ ܒܺܐܝܕܳܐ ܕܺܝܣܪܳܐܶܝܠ. ܘܰܚܪܰܒܘ ܐܶܢܽܘܢ. ܘܰܪܕܰܦܘ ܐܶܢܽܘܢ ܥܕܰܡܳܐ ܠܨܰܝܕܽܘܢ ܪܰܒܳܐ. ܘܰܥܕܰܡܳܐ ܠܒܶܝܬ ܟܶܢܫܳܐ ܕܡܰܝ̈ܳܐ. ܘܰܥܕܰܡܳܐ ܠܰܦܩܰܥܬܳܐ ܕܡܰܨܦܝܳܐ ܕܰܒܡܰܕܢܚܳܐ. ܘܰܚܪܰܒܘ ܐܶܢܽܘܢ. ܘܠܳܐ ܫܒܰܩܘ ܡܶܢܗܽܘܢ ܣܪܺܝܕܳܐ.
9 ܘܰܥܒܰܕ ܠܗܽܘܢ ܝܶܫܽܘܥ ܐܰܝܟ ܕܶܐܡܰܪ ܠܶܗ ܡܳܪܝܳܐ. ܖ̈ܰܟܫܗܽܘܢ ܓܰܡܰܪ. ܘܩܳܖ̈ܽܘܟܰܝܗܽܘܢ ܐܰܘܩܶܕ ܒܢܽܘܪܳܐ.
10 ܘܰܗܦܰܟ ܝܶܫܽܘܥ ܒܙܰܒܢܳܐ ܗܰܘ. ܘܰܟܒܰܫ ܠܚܳܨܽܘܪ. ܘܰܠܡܰܠܟܳܗ̇ ܩܛܰܠ ܒܚܰܪܒܳܐ. ܡܶܛܽܠ ܕܡܶܢ ܩܕܺܝܡ ܚܳܨܽܘܪ ܗܘܳܬ ܪܺܝܫܗܶܝܢ ܕܡܰܠܟܘ̈ܳܬܳܐ ܗܳܠܶܝܢ.
11 ܘܰܚܪܰܒ ܠܟܽܠ ܢܰܦ̈ܫܳܬܳܐ ܕܒܳܗ̇ ܒܦܽܘܡܳܐ ܕܚܰܪܒܳܐ. ܘܠܳܐ ܫܒܰܩ ܡܶܢܗܶܝܢ ܢܫܰܡܬܳܐ. ܘܰܠܚܳܨܽܘܪ ܐܰܘܩܶܕ ܒܢܽܘܪܳܐ.
12 ܘܰܠܟܽܠܗܶܝܢ ܡܕܺܝ̈ܢܳܬܳܐ ܕܡܰܠ̈ܟܶܐ ܗܳܠܶܝܢ. ܘܰܠܡܰܠܟܰܝ̈ܗܶܝܢ ܟܒܰܫ ܝܶܫܽܘܥ. ܘܰܚܪܰܒ ܐܶܢܽܘܢ ܒܦܽܘܡܳܐ ܕܚܰܪܒܳܐ. ܐܰܝܟܰܢܳܐ ܕܦܰܩܕܶܗ ܡܽܘܫܶܐ ܥܰܒܕܶܗ ܕܡܳܪܝܳܐ.
13 ܘܰܠܟܽܠܗܶܝܢ ܩܽܘܖ̈ܝܳܐ ܕܩܳܝ̈ܡܳܢ ܥܰܠ ܬܶܠܳܐ ܐܰܘܩܶܕ ܐܶܢܶܝܢ ܝܺܣܪܳܐܶܝܠ. ܘܰܠܚܳܨܽܘܪ ܐܰܘܩܶܕ ܝܶܫܽܘܥ.
14 ܘܰܠܟܽܠܳܗ̇ ܒܶܙܬܳܐ ܕܰܡܕܺܝ̈ܢܳܬܳܐ ܗܳܠܶܝܢ. ܘܰܒܥܺܝܪܳܐ ܒܰܙܘ ܠܗܽܘܢ ܒܢܰܝ̈ ܝܺܣܪܳܐܶܝܠ. ܘܰܠܟܽܠܗܽܘܢ ܒܢܰܝ̈ܢܳܫܳܐ ܚܪܰܒܘ ܒܦܽܘܡܳܐ ܕܣܰܝܦܳܐ ܥܕܰܡܳܐ ܕܓܰܡܰܪܘ ܐܶܢܽܘܢ. ܘܠܳܐ ܫ̣ܒܰܩܘ ܡܶܢܗܽܘܢ ܢܫܰܡܬܳܐ.
15 ܐܰܝܟܰܢܳܐ ܕܦܰܩܶܕ ܡܳܪܝܳܐ ܠܡܽܘܫܶܐ ܥܰܒܕܶܗ. ܗܳܟܰܢܳܐ ܦܰܩܕܶܗ ܡܽܘܫܶܐ ܠܝܶܫܽܘܥ. ܘܗܳܟܰܢܳܐ ܥܒܰܕ ܝܶܫܽܘܥ. ܘܠܳܐ ܒܰܛܶܠ ܡܶܠܬܳܐ ܡܶܢ ܟܽܠܡܶܕܶܡ ܕܦܰܩܶܕ ܡܳܪܝܳܐ ܠܡܽܘܫܶܐ.
16 ܘܢܰܣܒܳܗ̇ ܝܶܫܽܘܥ ܠܟܽܠܳܗ̇ ܐܰܪܥܳܐ ܗܳܕܶܐ ܕܛܽܘܪܳܐ. ܘܰܠܟܽܠܶܗ ܬܰܝܡܢܳܐ. ܘܰܠܟܽܠܳܗ̇ ܐܰܪܥܳܐ ܕܰܦܩܰܥܬܳܐ. ܘܰܠܛܽܘܖ̈ܶܐ ܟܽܠܗܽܘܢ. ܘܰܠܦܰܩ̈ܥܳܬܗܽܘܢ.
17 ܡܶܢ ܛܽܘܪܳܐ ܕܦܳܠܶܓ ܘܣܳܠܶܩ ܠܣܳܥܺܝܪ. ܘܰܥܕܰܡܳܐ ܠܓܰܕܓܳܕ ܕܒܰܦܩܰܥܬܳܐ ܕܠܶܒܢܳܢ ܕܰܬܚܶܝܬ ܛܽܘܪܳܐ ܕܚܶܪܡܽܘܢ. ܘܰܠܟܽܠܗܽܘܢ ܡܰܠܟܰܝ̈ܗܽܘܢ ܟܒܰܫ. ܘܩܰܛܶܠ ܐܶܢܽܘܢ ܝܶܫܽܘܥ.
18 ܘܝܰܘ̈ܡܳܬܶܐ ܣܰܓܺܝ̈ܐܶܐ ܥܒܰܕ ܝܶܫܽܘܥ ܩܪܳܒܳܐ. ܥܰܡ ܟܽܠܗܽܘܢ ܗܳܠܶܝܢ.
19 ܘܠܳܐ ܐܶܫܬܰܚܪܰܬ ܩܪܺܝܬܐ ܕܠܳܐ ܐܶܫܬܰܠܡܰܬ ܠܰܒܢܰܝ̈ ܝܺܣܪܳܐܶܝܠ ܘܚܰܪܒܽܘܗܝ ܐܶܠܳܐ ܐܶܢ ܚܳܘܳܝ̈ܶܐ ܕܝܳܬܒܺܝܢ ܒܓܶܒܥܽܘܢ. ܕܰܐܚܺܝ ܐܶܢܽܘܢ ܝܶܫܽܘܥ. ܘܰܫܒܰܩ ܐܶܢܽܘܢ ܝܶܫܽܘܥ ܕܢܶܦܠܚܽܘܢ ܠܺܝܣܪܳܐܶܝܠ. ܘܰܠܟܽܠܗܶܝܢ ܡܰܠܟ̈ܘܳܬܐ ܗܳܠܶܝܢ ܫܒܳܐ ܐܶܢܶܝܢ ܝܶܫܽܘܥ ܘܰܚܪܰܒ ܐܶܢܶܝܢ.
20 ܡܶܛܽܠ ܕܡܶܢ ܩܕܳܡ ܡܳܪܝܳܐ ܗܘܳܬ ܗܳܕܶܐ. ܕܢܶܬܚܰܝܰܠ ܠܶܒܗܽܘܢ ܕܢܶܦܩܽܘܢ ܠܰܩܪܳܒܳܐ ܥܰܠ ܝܺܣܪܳܐܶܝܠ. ܡܶܛܽܠ ܕܢܶܚܪܒܽܘܢ ܐܶܢܽܘܢ ܘܠܳܐ ܬܶܗܘܶܐ ܥܠܰܝܗܽܘܢ ܬܰܟܫܶܦܬܳܐ. ܡܶܛܽܠ ܕܰܐܘܒܶܕ ܐܶܢܽܘܢ ܐܰܝܟܰܢܳܐ ܕܦܰܩܶܕ ܡܳܪܝܳܐ ܠܡܽܘܫܶܐ.
21 ܘܶܐܬܐ ܝܶܫܽܘܥ ܒܙܰܒܢܳܐ ܗܰܘ. ܘܰܚܪܰܒ ܠܓܰܢ̱ܒܳܖ̈ܶܐ ܕܰܒܛܽܘܪܳܐ. ܡܶܢ ܚܶܒܪܽܘܢ. ܘܡܶܢ ܕܳܒܺܝܪ. ܘܡܶܢ ܓܒܶܠ. ܘܡܶܢ ܟܽܠܶܗ ܛܽܘܪܳܐ ܕܺܝܗܽܘܕܳܐ. ܘܡܶܢ ܟܽܠܶܗ ܛܽܘܪܳܐ ܕܺܝܣܪܳܐܶܝܠ. ܥܰܡ ܡܕܺܝ̈ܢܳܬܗܽܘܢ ܚܪܰܒ ܐܶܢܽܘܢ ܝܶܫܽܘܥ.
22 ܘܠܳܐ ܐܶܫܬܰܚܰܪܘ ܓܰܢ̱ܒܳܖ̈ܶܐ ܒܰܐܪܥܳܐ ܕܰܒܢܰܝ̈ ܝܺܣܪܳܐܶܝܠ. ܐܶܠܳܐ ܐܶܢ ܒܥܳܐܙܳܐ. ܘܰܒܓܳܬ. ܘܒܰܐܫܕܽܘܕ ܐܶܫܬܚܰܪܘ.
23 ܘܢܰܣܒܳܗ̇ ܝܶܫܽܘܥ ܠܟܽܠܳܗ̇ ܐܰܪܥܳܐ. ܐܰܝܟ ܕܶܐܡܰܪ ܡܳܪܝܳܐ ܠܡܽܘܫܶܐ. ܘܝܰܗܒܳܗ̇ ܝܶܫܽܘܥ ܝܽܘܪܬܢܳܐ ܠܺܝܣܪܳܐܶܝܠ ܒܦܳܠܰܓ̈ܘܳܬܳܐ ܠܫܰܒܛܰܝ̈ܗܽܘܢ. ܘܰܐܪܥܳܐ ܐܶܬܬܢܺܝܚܰܬ ܡܶܢ ܩܪܳܒܳܐ.