Romans 9
Epistle to the Romans
܀ ܕܠܘܬ ܪ̈ܗܘܡܝܐ ܛ ܀
1- ܩܽܘܫܬܳܐ ܐܳܡܰܪ ܐ̱ܢܳܐ ܒܰܡܫܺܝܚܳܐ. ܘܠܳܐ ܡܕܰܓܶܠ ܐ̱ܢܳܐ. ܘܪܶܥܝܳܢܝ ܡܰܣܗܶܕ ܥܠܰܝ܇ ܒܪܽܘܚܳܐ ܕܩܽܘܕܫܳܐ܆
2- ܕܟܰܪܝܽܘܬܳܐ ܗ̱ܝ ܠܺܝ ܪܰܒܬܳܐ. ܘܟܺܐܒܳܐ ܕܡܶܢ ܠܶܒܝ ܠܳܐ ܫܳܠܶܐ.
3- ܡܨܰܠܶܐ ܗ̱ܘܺܝܬ ܓܶܝܪ. ܕܶܐܢܳܐ ܩܢܽܘܡܝ ܚܶܪܡܳܐ ܐܶܗܘܶܐ ܡܶܢ ܡܫܺܝܚܳܐ܇ ܚܠܳܦ ܐܰܚܰܝ̈ ܘܰܐ̱ܚܝ̈ܳܢܰܝ. ܕܒܰܒܣܰܪ.
4- ܕܺܐܝܬܰܝܗܽܘܢ ܒܢ̈ܰܝ ܐܺܝܣܪܳܐܶܝܠ. ܕܕܺܝܠܗܽܘܢ ܗܘܳܬ ܣܺܝܡܰܬ ܒܢܰܝ̈ܳܐ. ܘܬܶܫܒܽܘܚܬܳܐ. ܘܰܩܝ̈ܳܡܶܐ. ܘܢܳܡܽܘܣܳܐ. ܘܬܶܫܡܶܫܬܳܐ ܕܒܶܗ. ܘܡܽܘ̈ܠܟܳܢܶܐ.
5- ܘܰܐܒܳܗ̈ܳܬܳܐ. ܘܡܶܢܗܽܘܢ ܐܶܬܚܙܺܝ ܡܫܺܝܚܳܐ ܒܰܒܣܰܪ. ܕܺܐܝܬܰܘܗ̱ܝ ܐܰܠܳܗܳܐ ܕܥܰܠ ܟܽܠ. ܕܠܶܗ ܬܶܫ̈ܒܚܳܢ ܘܒܽܘܪ̈ܟܳܢ܇ ܠܥܳܠܰܡ ܥܳܠܡܺܝܢ ܐܰܡܺܝܢ܀
6- ܠܳܐ ܗ̱ܘܳܐ ܕܶܝܢ ܡܶܦܰܠ ܢܶܦܠܰܬ ܡܶܠܬܶܗ ܕܰܐܠܳܗܳܐ. ܠܳܐ ܗ̱ܘܳܐ ܓܶܝܪ ܟܽܠܗܽܘܢ ܕܡܶܢ ܐܺܝܣܪܳܐܶܝܠ. ܐܺܝܬܰܝܗܽܘܢ ܐܺܝܣܪܳܐܶܝܠ.
7- ܐܳܦܠܳܐ ܡܶܛܽܠ ܕܡܶܢ ܙܰܪܥܶܗ ܐܶܢܽܘܢ ܕܰܐܒܪܳܗܳܡ. ܟܽܠܗܽܘܢ ܒܢܰܝ̈ܳܐ. ܡܶܛܽܠ ܕܶܐܬܶܐܡܰܪ. ܕܒܺܐܝܣܚܳܩ ܢܶܬܩܪܶܐ ܠܳܟ ܙܰܪܥܳܐ.
8- ܗܳܢܰܘ ܕܶܝܢ܆ ܠܳܐ ܗܘܳܐ ܒܢܰܝ̈ܳܐ ܕܒܶܣܪܳܐ. ܐܺܝܬܰܝܗܽܘܢ ܒܢܰܝ̈ܳܐ ܕܰܐܠܳܗܳܐ. ܐܶܠܳܐ ܒܢܰܝ̈ܳܐ ܕܡܽܘܠܟܳܢܳܐ ܡܶܬܚܰܫܒܺܝܢ ܠܙܰܪܥܳܐ.
9- ܕܡܽܘܠܟܳܢܳܐ ܓܶܝܪ ܐܺܝܬܶܝܗ̇ ܡܶܠܬܳܐ ܗܳܕܶܐ܇ ܕܰܒܙܰܒܢܳܐ ܗܳܢܳܐ ܐܺܬܶܐ. ܘܢܶܗܘܶܐ ܒܪܳܐ ܠܣܰܪܳܐ.
10- ܘܠܰܘ ܗܳܕܶܐ ܒܰܠܚܽܘܕ. ܐܶܠܳܐ ܐܳܦ ܪܰܦܩܳܐ܆ ܟܰܕ ܥܰܡ ܚܰܕ ܐܰܒܽܘܢ ܐܺܝܣܚܳܩ. ܐܺܝܬ ܗ̱ܘܳܐ ܠܳܗ̇ ܫܰܘܬܳܦܽܘܬܳܐ܇
11- ܥܰܕܠܳܐ ܢܶܬܝܰܠܕܽܘܢ ܒܢܶܝ̈ܗ̇܇ ܘܠܳܐ ܢܶܣܥܪܽܘܢ ܛܳܒܬܳܐ ܐܰܘ ܒܺܝܫܬܳܐ܆ ܩܰܕܡܰܬ ܐܶܬܝܰܕܥܰܬ ܓܰܒܝܽܘܬܶܗ ܕܰܐܠܳܗܳܐ. ܕܗܺܝ ܬܩܰܘܶܐ܆ ܠܳܐ ܒܰܥ̈ܒܳܕܶܐ܇ ܐܶܠܳܐ ܒܝܰܕ ܡܰܢ ܕܰܩܪܳܐ.
12- ܐܶܬܶܐܡܰܪ ܓܶܝܪ. ܕܩܰܫܺܝܫܳܐ ܢܶܗܘܶܐ ܥܰܒܕܳܐ ܠܰܙܥܽܘܪܳܐ.
13- ܐܰܝܟ ܕܰܟܬܺܝܒ. ܕܰܠܝܰܥܩܽܘܒ ܪܶܚܡܶܬ ܘܰܠܥܺܣܽܘ ܣܢܺܝܬ܀
14- ܡܳܢܳܐ ܗܳܟܺܝܠ ܢܺܐܡܰܪ. ܕܰܠܡܳܐ ܥܰܘܠܳܐ ܐܺܝܬ ܠܘܳܬ ܐܰܠܳܗܳܐ؟ ܚܳܣ!
15- ܗܳܐ ܐܳܦ ܠܡܽܘܫܶܐ ܐܶܡܰܪ. ܐܶܪܰܚܶܡ ܥܰܠ ܐܰܝܢܳܐ ܕܰܡܪܰܚܶܡ ܐ̱ܢܳܐ. ܘܶܐܚܽܘܢ ܠܰܐܝܢܳܐ ܕܚܳܐܶܢ ܐ̱ܢܳܐ.
16- ܠܳܐ ܗܳܟܺܝܠ ܒܺܐܝ̈ܕܰܝ ܡܰܢ ܕܨܳܒܶܐ܇ ܘܠܳܐ ܒܺܐܝ̈ܕܰܝ ܡܰܢ ܕܪܳܗܶܛ܆ ܐܶܠܳܐ ܒܺܐܝ̈ܕܰܝ ܐܰܠܳܗܳܐ ܡܪܰܚܡܳܢܳܐ.
17- ܐܶܡܰܪ ܓܶܝܪ ܒܰܟܬܳܒܳܐ ܠܦܶܪܥܽܘܢ܆ ܕܠܳܗ̇ ܠܗܳܕܶܐ ܐܰܩܺܝܡܬܳܟ. ܕܶܐܚܰܘܶܐ ܒܳܟ ܚܰܝܠܝ. ܘܰܕܢܶܬܟܪܶܙ ܫܶܡܝ ܒܰܐܪܥܳܐ ܟܽܠܳܗ̇.
18- ܡܳܕܶܝܢ ܥܰܠ ܡܰܢ ܕܨܳܒܶܐ ܗ̱ܘ ܡܪܰܚܶܡ܆ ܘܥܰܠ ܡܰܢ ܕܨܳܒܶܐ ܡܩܰܫܶܐ.
19- ܘܰܟܒܰܪ ܬܺܐܡܰܪ܆ ܕܰܠܡܳܢܳܐ ܪܳܫܶܐ؟ ܡܰܢܽܘ ܓܶܝܪ ܕܰܢܩܽܘܡ ܠܽܘܩܒܰܠ ܨܶܒܝܳܢܶܗ؟
20- ܐܰܢ̱ܬ ܗܳܟܺܝܠ ܡܰܢ ܐܰܢ̱ܬ ܐܳܘ ܒܰܪܢܳܫܳܐ܇ ܕܦܶܬܓܳܡܳܐ ܠܰܐܠܳܗܳܐ ܝܳܗܶܒ ܐܰܢ̱ܬ؟ ܕܰܠܡܳܐ ܐܳܡܪܳܐ ܓܒܺܝܠܬܳܐ ܠܡܰܢ ܕܓܰܒܠܳܗ̇ ܕܰܠܡܳܢܳܐ ܗܳܟܰܢܳܐ ܓܒܰܠܬܳܢܝ؟
21- ܐܰܘ ܠܳܐ ܫܰܠܺܝܛ ܦܰܚܳܪܳܐ ܥܰܠ ܛܺܝܢܶܗ܇ ܕܡܶܢܳܗ̇ ܡܶܢ ܓܒܺܝܠܬܳܐ ܢܶܥܒܶܕ ܡܳܐܢ̈ܶܐ܇ ܚܰܕ ܠܺܐܝܩܳܪܳܐ. ܘܚܰܕ ܠܨܰܥܪܳܐ؟܀
22- ܐܶܢ ܕܶܝܢ ܨܒܳܐ ܐܰܠܳܗܳܐ ܕܰܢܚܰܘܶܐ ܪܽܘܓܙܶܗ. ܘܢܰܘܕܰܥ ܚܰܝܠܶܗ܆ ܐܰܝܬܺܝ ܒܣܽܘܓܳܐܐ ܕܡܰܓܪܰܬ ܪܽܘܚܶܗ ܪܽܘܓܙܳܐ܇ ܥܰܠ ܡܳܐܢ̈ܶܐ ܕܪܽܘܓܙܳܐ ܕܰܓܡܺܝܪܺܝܢ ܠܰܐܒܕܳܢܳܐ܆
23- ܘܰܐܫܦܰܥ ܪ̈ܰܚܡܰܘܗ̱ܝ ܥܰܠ ܡܳܐܢ̈ܶܐ ܕܪ̈ܰܚܡܶܐ. ܕܰܡܛܰܝܒܺܝܢ ܗ̱ܘܰܘ ܠܰܐܠܳܗܳܐ ܠܬܶܫܒܽܘܚܬܳܐ.
24- ܕܺܐܝܬܰܝܢ ܚ̱ܢܰܢ ܩܪ̈ܰܝܳܐ܆ ܠܳܐ ܗ̱ܘܳܐ ܒܰܠܚܽܘܕ ܡܶܢ ܝܺܗܽܘ̈ܕܳܝܶܐ܇ ܐܶܠܳܐ ܐܳܦ ܡܶܢ ܥܰܡ̱̈ܡܶܐ.
25- ܐܰܝܟܰܢܳܐ ܕܳܐܦ ܒܗܽܘܫܳܥ ܐܶܡܰܪ. ܕܶܐܩܪܶܐ ܠܰܐܝܠܶܝܢ ܕܠܳܐ ܗ̱ܘܰܘ ܥܰܡܝ. ܥܰܡܳܐ ܕܺܝܠܝ܆ ܘܰܠܠܳܐ ܐܶܬܪܰܚܡܰܬ. ܐܶܬܪܰܚܡܰܬ.
26- ܢܶܗܘܶܐ ܓܶܝܪ ܒܕܽܘܟܬܳܐ ܟܰܪ ܕܡܶܬܩܪܶܝܢ ܗ̱ܘܰܘ ܠܳܐ ܥܰܡܝ܆ ܬܰܡܳܢ ܢܶܬܩܪܽܘܢ ܒܢܰܝ̈ܳܐ ܠܰܐܠܳܗܳܐ ܚܰܝܳܐ.
27- ܐܶܫܰܥܝܳܐ ܕܶܝܢ ܐܰܟܪܶܙ ܥܰܠ ܒܢ̈ܰܝ ܐܺܝܣܪܳܐܶܝܠ. ܕܶܐܢ ܢܶܗܘܶܐ ܡܶܢܝܳܢܳܐ ܕܰܒܢ̈ܰܝ ܐܺܝܣܪܳܐܶܝܠ ܐܰܝܟ ܚܳܠܳܐ ܕܰܒܝܰܡܳܐ܆ ܫܰܪܟܳܢܳܐ ܕܡܶܢܗܽܘܢ ܢܺܚܶܐ.
28- ܡܶܠܬܳܐ ܓܪܰܡ ܘܰܦܣܰܩ. ܘܢܶܥܒܕܺܝܗ̇ ܡܳܪܝܳܐ ܥܰܠ ܐܰܪܥܳܐ.
29- ܘܰܐܝܟ ܡܶܕܶܡ ܕܩܰܕܶܡ ܐܶܡܰܪ ܗܽܘ ܐܶܫܰܥܝܳܐ. ܕܶܐܠܽܘ ܠܳܐ ܡܳܪܝܳܐ ܨܒܰܐܘܽܬ ܐܰܘܬܰܪ ܠܰܢ ܣܪܺܝܕܳܐ܆ ܐܰܝܟ ܣܕܽܘܡ ܗܳܘܶܝܢ ܗ̱ܘܰܝܢ܇ ܘܰܠܥܳܡܽܘܪܳܐ ܡܶܬܕܰܡܶܝܢ ܗ̱ܘܰܝܢ܀
30- ܡܳܢܳܐ ܗܳܟܺܝܠ ܢܺܐܡܰܪ؟ ܕܥܰܡ̱̈ܡܶܐ ܕܠܳܐ ܪܳܗܛܺܝܢ ܗ̱ܘܰܘ ܒܳܬܰܪ ܟܺܐܢܽܘܬܳܐ܆ ܐܰܕܪܶܟܘ ܟܺܐܢܽܘܬܳܐ؟ ܟܺܐܢܽܘܬܳܐ ܕܶܝܢ ܐܰܝܕܳܐ ܕܡܶܢ ܗܰܝܡܳܢܽܘܬܳܐ ܗ̱ܝ.
31- ܐܺܝܣܪܳܐܶܝܠ ܕܶܝܢ ܕܪܳܗܶܛ ܗ̱ܘܳܐ ܒܳܬܰܪ ܢܳܡܽܘܣܳܐ ܕܟܺܐܢܽܘܬܳܐ܆ ܠܢܳܡܽܘܣܳܐ ܕܟܺܐܢܽܘܬܳܐ ܠܳܐ ܐܰܕܪܶܟ.
32- ܡܶܛܽܠ ܡܳܢܳܐ؟ ܡܶܛܽܠ ܕܠܳܐ ܗ̱ܘܳܐ ܡܶܢ ܗܰܝܡܳܢܽܘܬܳܐ܆ ܐܶܠܳܐ ܡܶܢ ܥ̈ܒܳܕܰܘܗ̱ܝ ܕܢܳܡܽܘܣܳܐ. ܐܶܬܬܩܶܠܘ ܓܶܝܪ ܒܟܺܐܦܳܐ ܕܬܽܘܩܰܠܬܳܐ܇
33- ܐܰܝܟ ܕܰܟܬܺܝܒ. ܕܗܳܐ ܣܳܐܶܡ ܐ̱ܢܳܐ ܒܨܶܗܝܽܘܢ܆ ܟܺܐܦܳܐ ܕܬܽܘܩܰܠܬܳܐ ܘܟܺܐܦܳܐ ܕܡܰܟܫܽܘܠܳܐ. ܘܡܰܢ ܕܒܳܗ̇ ܢܗܰܝܡܶܢ ܠܳܐ ܢܶܒܗܰܬ܀