Tobit 9
The Book of Tobit
܀ ܛܘܒܝܛ ܛ ܀
1 ܗܳܝܕܶܝܢ ܩܪܳܐ ܛܽܘܒܺܝܳܐ ܠܪܰܦܰܐܶܝܠ ܘܶܐܡܰܪ ܠܶܗ.
2 ܥܶܙܰܪܝܳܐ ܐܳܚܝ. ܕܒܰܪ ܡܶܟܳܐ ܬܪܶܝܢ ܓܰܡ̈ܠܺܝܢ: ܘܰܐܪܒܥܳܐ ܓܰܒܪ̈ܺܝܢ. ܘܙܶܠ ܠܢܶܪܓܰܙ ܠܘܳܬ ܓܰܒܥܳܐܶܝܠ. ܘܗܰܒ ܠܶܗ ܟܬܳܒܳܐ ܗܳܢܳܐ. ܘܣܰܒ ܡܶܢܶܗ ܟܶܣܦܳܐ ܗܰܘ ܘܰܕܒܰܪܳܝܗܝ ܥܰܡܳܟ. ܘܬܳܐ ܠܡܶܫܬܽܘܬܳܐ.
3 ܡܶܛܽܠ ܕܝܳܕܰܥ ܐܰܢ̱ܬ ܕܳܐܒܝ ܠܳܐ ܟܳܠܶܐ ܠܡܶܡܢܳܐ ܝܰܘ̈ܡܳܬܳܐ.
4 ܘܶܐܢܗܽܘ ܕܰܐܘܚܰܪܢ ܚܰܕ ܝܽܘܡ: ܗܳܘܝܳܐ ܟܰܪܝܳܐ ܠܶܗ. ܪܥܽܘܐܶܝܠ ܓܶܝܪ ܝܺܡܳܐ: ܕܥܶܣܪܳܐ ܝܰܘ̈ܡܺܝܢ ܐܶܟܰܬܰܪ ܠܘܳܬܶܗ. ܠܳܐ ܡܶܫܟܰܚ ܐ̱ܢܳܐ ܕܶܐܛܠܽܘܡ ܡܰܘ̈ܡܳܬܶܗ.
5 ܘܶܐܙܰܠ ܪܰܦܰܐܶܝܠ ܘܗܳܢܽܘܢ ܐܰܪܒܥܳܐ ܓܰܒܪ̈ܺܝܢ: ܘܰܬܪܶܝܢ ܓܰܡ̈ܠܺܝܢ. ܠܢܶܪܓܶܙ ܕܡܳܕܰܝ. ܘܶܐܙܰܠܘ ܠܘܳܬ ܓܰܒܥܳܐܶܝܠ ܘܰܫܪܰܘ ܠܘܳܬܶܗ. ܘܝܰܗܒ ܠܶܗ ܪܰܦܰܐܶܝܠ ܟܬܳܒܰܬ ܐܺܝܕܰܝ̈ܳܐ ܘܶܐܡܰܪ ܠܶܗ. ܕܒܰܪ ܛܽܘܒܺܝܛ ܫܩܰܠ ܐܰܢ̱ܬܬܳܐ ܠܒܰܪܬܶܗ ܕܰܪܥܽܘܐܶܝܠ. ܘܬܰܡܳܢ ܗܽܘ. ܘܠܳܟ ܩܳܪܶܐ ܠܳܟ ܠܡܶܫܬܽܘܬܳܐ.
6 ܘܩܳܡ ܓܰܒܥܳܐܶܝܠ. ܘܰܐܥ̣ܶܠ ܚܰܘܝܶܗ ܪ̈ܓܽܘܣܝܳܬܳܐ ܟܰܕ ܚܬܺܝ̈ܡܳܢ. ܘܰܡܢܳܐ ܟܶܣܦܳܐ. ܘܣܳܡ ܥܰܠ ܓܰܡ̈ܠܶܐ. ܘܩܰܕܶܡܘ ܒܫܰܦܪܳܐ.
7 ܘܶܐܬܰܘ ܠܡܶܫܬܽܘܬܳܐ ܕܰܪܥܽܘܐܶܝܠ ܘܶܐܫܟܰܚܘ ܠܛܽܘܒܺܝܳܐ ܟܰܕ ܣܡܺܝܟ. ܘܰܫܘܰܪ: ܘܩܳܡ: ܘܢܰܫܩܶܗ. ܘܶܐܡܰܪ ܠܶܗ ܓܰܒܥܳܐܶܝܠ.
8 ܡܫܰܒܰܚ ܐܰܠܳܗܳܐ ܕܰܝܗܒ ܠܳܟ ܫܠܳܡܳܐ. ܡܶܛܽܠ ܕܰܒܪܶܗ ܐܰܢ̱ܬ ܕܓܰܒܪܳܐ ܛܳܒܳܐ: ܕܰܥܒܰܕ ܙܰܕܺܝܩܽܘܬܳܐ. ܒܪܺܝܟ ܐܰܢ̱ܬ ܘܰܒܪܺܝܟ ܐܰܒܽܘܟ ܘܶܐܡܳܟ.
9 ܘܰܒܪܺܝܟܳܐ ܐܰܢ̱ܬܬܳܟ: ܘܰܐܒܽܘܗ̇ ܘܶܐܡܳܗ̇. ܛܽܘܒܺܝܛ ܕܶܝܢ ܡܳܢܶܐ ܗܘܳܐ ܠܗܽܘܢ ܝܰܘ̈ܡܳܬܳܐ ܡܶܢ ܝܰܘܡܳܐ ܕܰܢܦܰܩ ܛܽܘܒܺܝܳܐ ܒܪܶܗ.