Mark 10
The Gospel according to Mark
܀ ܡܪܩܘܣ ܝ ܀
1- ܘܩܳܡ ܡܶܢ ܬܰܡܳܢ܆ ܘܶܐܬܳܐ ܠܰܬܚܽܘܡܳܐ ܕܺܝܗܽܘܕ. ܠܥܶܒܪܳܐ ܕܝܽܘܪܕܢܳܢ. ܘܶܐܙܰܠܘ ܠܬܰܡܳܢ ܠܘܳܬܶܗ ܟܶܢ̈ܫܶܐ ܣܰܓܺܝ̈ܶܐܐ܆ ܘܡܰܠܶܦ ܗ̱ܘܳܐ ܠܗܽܘܢ ܬܽܘܒ. ܐܰܝܟ ܕܰܡܥܳܕ ܗ̱ܘܳܐ.
2- ܘܰܩܪܶܒܘ ܦܪ̈ܺܝܫܶܐ܁ ܡܢܰܣܶܝܢ ܠܶܗ ܘܰܡܫܰܐܠܺܝܢ܆ ܕܶܐܢ ܫܰܠܺܝܛ ܠܓܰܒܪܳܐ. ܕܢܶܫܒܽܘܩ ܐܰܢ̱ܬܬܶܗ؟
3- ܐܳܡܰܪ ܠܗܽܘܢ܁ ”ܡܳܢܳܐ ܦܰܩܶܕܟܽܘܢ ܡܽܘܫܶܐ؟“
4- ܗܶܢܽܘܢ ܕܶܝܢ ܐܳܡܪܺܝܢ. ܡܽܘܫܶܐ ܐܰܦܶܣ ܠܰܢ܆ ܕܢܶܟܬܽܘܒ ܟܬܳܒܳܐ ܕܫܽܘܒܩܳܢܳܐ. ܘܢܶܫܪܶܐ.
5- ܥܢܳܐ ܝܶܫܽܘܥ. ܘܶܐܡܰܪ ܠܗܽܘܢ. ”ܡܽܘܫܶܐ ܠܽܘܩܒܰܠ ܩܰܫܝܽܘܬ ܠܶܒܟܽܘܢ ܟܬܰܒ ܠܟܽܘܢ ܦܽܘܩܕܳܢܳܐ ܗܳܢܳܐ.
6- ܡܶܢ ܒܪܺܝܫܺܝܬ ܕܶܝܢ. ܕܶܟܪܳܐ ܘܢܶܩܒܬܳܐ ܥܒܰܕ ܐܶܢܽܘܢ ܐܰܠܳܗܳܐ.
7- ܡܶܛܽܠ ܗܳܢܳܐ ܢܶܫܒܽܘܩ ܓܰܒܪܳܐ ܠܰܐܒܽܘܗ̱ܝ ܘܠܶܐܡܶܗ. ܘܢܶܩܰܦ ܠܰܐܢ̱ܬܬܶܗ܆
8- ܘܢܶܗܘܽܘܢ ܬܪ̈ܰܝܗܽܘܢ. ܚܰܕ ܒܣܰܪ. ܡܶܟܺܝܠ ܠܳܐ ܗ̱ܘܰܘ ܬܪܶܝܢ܁ ܐܶܠܳܐ ܚܰܕ ܒܣܰܪ.
9- ܡܶܕܶܡ ܕܰܐܠܳܗܳܐ܁ ܗܳܟܺܝܠ ܙܰܘܶܓ܆ ܒܰܪܢܳܫܳܐ. ܠܳܐ ܢܦܰܪܶܫ.“
10- ܘܫܰܐܠܽܘܗ̱ܝ ܬܽܘܒ ܬܰܠܡܺܝ̈ܕܰܘܗ̱ܝ ܒܒܰܝܬܳܐ ܥܰܠ ܗܳܕܶܐ.
11- ܘܶܐܡܰܪ ܠܗܽܘܢ. ”ܟܽܠ ܡܰܢ ܕܢܶܫܪܶܐ ܐܰܢ̱ܬܬܶܗ܁ ܘܢܶܣܰܒ ܐ̱ܚܪܺܬܳܐ. ܓܳܐܰܪ.
12- ܘܶܐܢ ܐܰܢ̱ܬܬܳܐ ܬܶܫܪܶܐ ܒܰܥܠܳܗ̇܁ ܘܬܶܗܘܶܐ ܠܰܐ̱ܚܪܺܢܳܐ. ܓܳܝܪܳܐ.“
13- ܘܰܡܩܰܪܒܺܝܢ ܗ̱ܘܰܘ ܠܶܗ ܛܠܳܝ̈ܶܐ ܕܢܶܩܪܽܘܒ ܠܗܽܘܢ܁ ܬܰܠܡܺܝ̈ܕܰܘܗ̱ܝ ܕܶܝܢ. ܟܳܐܶܝܢ ܗ̱ܘܰܘ ܒܗܳܠܶܝܢ ܕܰܡܩܰܪܒܺܝܢ ܠܗܽܘܢ.
14- ܝܶܫܽܘܥ ܕܶܝܢ ܚܙܳܐ ܘܶܐܬܒܶܐܫ ܠܶܗ. ܘܶܐܡܰܪ ܠܗܽܘܢ. ”ܫܒܽܘܩܘ ܛܠܳܝ̈ܶܐ܁ ܐܳܬܶܝܢ ܠܘܳܬܝ. ܘܠܳܐ ܬܶܟܠܽܘܢ ܐܶܢܽܘܢ. ܕܕܰܐܝܠܶܝܢ ܓܶܝܪ܁ ܕܰܐܝܟ ܗܳܠܶܝܢ ܐܶܢܽܘܢ. ܐܺܝܬܶܝܗ̇ ܡܰܠܟܽܘܬܳܐ.
15- ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܟܽܠ ܕܠܳܐ ܢܩܰܒܶܠ ܡܰܠܟܽܘܬܳܐ ܕܰܐܠܳܗܳܐ ܐܰܝܟ ܛܰܠܝܳܐ. ܠܳܐ ܢܶܥܽܘܠ ܠܳܗ̇.“
16- ܘܰܫܩܰܠ ܐܶܢܽܘܢ ܥܰܠ ܕܪ̈ܳܥܰܘܗ̱ܝ܆ ܘܣܳܡ ܐܺܝܕܶܗ ܥܠܰܝܗܽܘܢ. ܘܒܰܪܶܟ ܐܶܢܽܘܢ܀
17- ܘܟܰܕ ܪܳܕܶܐ ܒܽܐܘܪܚܳܐ܆ ܪܗܶܛ ܚܰܕ. ܢܦܰܠ ܥܰܠ ܒܽܘܪ̈ܟܰܘܗ̱ܝ܁ ܘܰܡܫܰܐܶܠ ܗ̱ܘܳܐ ܠܶܗ. ܘܳܐܡܰܪ. ܡܰܠܦܳܢܳܐ ܛܳܒܳܐ܅ ܡܳܢܳܐ ܐܶܥܒܶܕ ܕܺܐܪܰܬ ܚܰܝ̈ܶܐ ܕܰܠܥܳܠܰܡ؟
18- ܐܳܡܰܪ ܠܶܗ ܝܶܫܽܘܥ܆ ”ܡܳܢܳܐ ܩܳܪܶܐ ܐܰܢ̱ܬ ܠܺܝ ܛܳܒܳܐ؟ ܠܰܝܬ ܛܳܒܳܐ ܐܶܠܳܐ ܐܶܢ ܚܰܕ ܐܰܠܳܗܳܐ.
19- ܦܽܘܩ̈ܕܳܢܶܐ ܝܳܕܰܥ ܐܰܢ̱ܬ. ܠܳܐ ܬܓܽܘܪ. ܠܳܐ ܬܶܓܢܽܘܒ. ܠܳܐ ܬܶܩܛܽܘܠ. ܠܳܐ ܬܶܣܗܰܕ ܣܳܗܕܽܘܬܳܐ ܕܰܓܳܠܬܳܐ. ܠܳܐ ܬܶܛܠܽܘܡ. ܝܰܩܰܪ ܠܰܐܒܽܘܟ. ܘܠܶܐܡܳܟ.“
20- ܗܽܘ ܕܶܝܢ ܥܢܳܐ ܘܶܐܡܰܪ ܠܶܗ. ܡܰܠܦܳܢܳܐ܆ ܗܳܠܶܝܢ ܟܽܠܗܶܝܢ ܢܶܛܪܶܬ ܐܶܢܶܝܢ. ܡܶܢ ܛܰܠܝܽܘܬܝ.
21- ܝܶܫܽܘܥ ܕܶܝܢ ܚܳܪ ܒܶܗ. ܘܰܐܚܒܶܗ. ܘܶܐܡܰܪ ܠܶܗ. ”ܚܕܳܐ ܚܰܣܺܝܪܳܐ ܠܳܟ. ܙܶܠ ܙܰܒܶܢ ܟܽܠ ܡܶܕܶܡ ܕܺܐܝܬ ܠܳܟ. ܘܗܰܒ ܠܡܶܣ̈ܟܺܢܶܐ: ܘܬܶܗܘܶܐ ܠܳܟ ܣܺܝܡܬܳܐ ܒܰܫܡܰܝܳܐ܆ ܘܣܰܒ ܨܠܺܝܒܳܐ. ܘܬܳܐ ܒܳܬܰܪܝ.“
22- ܗܽܘ ܕܶܝܢ ܐܶܬܟܡܰܪ ܒܡܶܠܬܳܐ ܗܳܕܶܐ. ܘܶܐܙܰܠ. ܟܰܕ ܥܰܝܺܝܩܳܐ ܠܶܗ. ܐܺܝܬ ܗ̱ܘܳܐ ܠܶܗ ܓܶܝܪ ܢܶܟ̈ܣܶܐ ܣܰܓܺܝ̈ܶܐܐ.
23- ܚܳܪ ܕܶܝܢ ܝܶܫܽܘܥ ܒܬܰܠܡܺܝ̈ܕܰܘܗ̱ܝ ܘܶܐܡܰܪ ܠܗܽܘܢ. ”ܟܡܳܐ ܥܰܛܠܳܐ ܠܰܐܝܠܶܝܢ ܕܺܐܝܬ ܠܗܽܘܢ ܢܶܟ̈ܣܶܐ܇ ܕܢܶܥܠܽܘܢ ܠܡܰܠܟܽܘܬܳܐ ܕܰܐܠܳܗܳܐ!“
24- ܬܰܠܡܺܝ̈ܕܶܐ ܕܶܝܢ ܡܶܬܕܰܡܪܺܝܢ ܗ̱ܘܰܘ ܥܰܠ ܡܶܠܰܘ̈ܗ̱ܝ. ܘܰܥܢܳܐ ܬܽܘܒ ܝܶܫܽܘܥ. ܘܶܐܡܰܪ ܠܗܽܘܢ. ”ܒܢ̈ܰܝ܆ ܟܡܳܐ ܥܰܛܠܳܐ ܠܰܐܝܠܶܝܢ ܕܰܬܟܺܝܠܺܝܢ ܥܰܠ ܢܶܟܣܰܝ̈ܗܽܘܢ ܕܢܶܥܠܽܘܢ ܠܡܰܠܟܽܘܬܳܐ ܕܰܐܠܳܗܳܐ!
25- ܦܫܺܝܩ ܗ̱ܘ ܠܓܰܡܠܳܐ ܕܢܶܥܽܘܠ ܒܰܚܪܽܘܪܳܐ ܕܰܡܚܰܛܳܐ܆ ܐܰܘ ܥܰܬܺܝܪܳܐ ܠܡܰܠܟܽܘܬܶܗ ܕܰܐܠܳܗܳܐ ܠܡܶܥܰܠ.“
26- ܗܶܢܽܘܢ ܕܶܝܢ ܝܰܬܺܝܪܳܐܺܝܬ ܡܶܬܕܰܡܪܺܝܢ ܗ̱ܘܰܘ. ܘܳܐܡܪܺܝܢ ܒܰܝ̈ܢܰܝܗܽܘܢ. ܡܰܢܽܘ ܡܶܫܟܰܚ ܠܡܶܚܳܐ؟
27- ܚܳܪ ܕܶܝܢ ܒܗܽܘܢ ܝܶܫܽܘܥ. ܘܶܐܡܰܪ ܠܗܽܘܢ. ”ܠܘܳܬ ܒܢ̈ܰܝ ܐ̱ܢܳܫ̈ܳܐ܁ ܗܳܕܶܐ ܠܳܐ ܡܶܫܟܚܳܐ܆ ܐܶܠܳܐ ܠܘܳܬ ܐܰܠܳܗܳܐ. ܟܽܠ ܡܶܕܶܡ ܓܶܝܪ. ܡܶܫܟܚܳܐ ܠܘܳܬ ܐܰܠܳܗܳܐ.“
28- ܘܫܰܪܺܝ ܟܺܐܦܳܐ ܠܡܺܐܡܰܪ. ܗܳܐ ܚܢܰܢ ܫܒܰܩܢ ܟܽܠ ܡܶܕܶܡ. ܘܰܢܩܶܦܢܳܟ.
29- ܥܢܳܐ ܝܶܫܽܘܥ. ܘܶܐܡܰܪ. ”ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܠܰܝܬ ܐ̱ܢܳܫ ܕܫܳܒܶܩ ܒ̈ܳܬܶܐ ܐܰܘ ܐܰܚ̈ܶܐ ܐܰܘ ܐܰܚ̈ܘܳܬܳܐ܇ ܐܰܘ ܐܰܒܳܐ ܐܰܘ ܐܶܡܳܐ܇ ܐܰܘ ܐܰܢ̱ܬܬܳܐ ܐܰܘ ܒܢܰܝ̈ܳܐ܇ ܐܰܘ ܩܽܘܪ̈ܝܳܐ܁ ܡܶܛܽܠܳܬܝ. ܘܡܶܛܽܠ ܣܒܰܪܬܝ܇
30- ܘܠܳܐ ܢܩܰܒܶܠ ܚܰܕ ܒܰܡܳܐܐ. ܗܳܫܳܐ ܒܙܰܒܢܳܐ ܗܳܢܳܐ܇ ܒ̈ܳܬܶܐ܁ ܘܰܐܚ̈ܶܐ ܘܰܐܚ̈ܘܳܬܳܐ ܘܶܐܡܗ̈ܳܬܳܐ܇ ܘܰܒܢܰܝ̈ܳܐ ܘܩܽܘܪ̈ܝܳܐ. ܥܰܡ ܪܕܽܘܦܝܳܐ. ܘܰܒܥܳܠܡܳܐ ܕܳܐܬܶܐ. ܚܰܝ̈ܶܐ ܕܰܠܥܳܠܰܡ.
31- ܣܰܓܺܝ̈ܶܐܐ ܓܶܝܪ ܩܰܕ̈ܡܳܝܶܐ܁ ܕܢܶܗܘܽܘܢ ܐ̱ܚܪ̈ܳܝܶܐ܆ ܘܰܐ̱ܚܪ̈ܳܝܶܐ ܩܰܕ̈ܡܳܝܶܐ.“
32- ܟܰܕ ܣܳܠܩܺܝܢ ܗ̱ܘܰܘ ܕܶܝܢ ܒܽܐܘܪܚܳܐ ܠܽܐܘܪܺܫܠܶܡ܆ ܗܽܘ ܝܶܫܽܘܥ ܩܰܕܺܝܡ ܗ̱ܘܳܐ ܠܗܽܘܢ܁ ܘܡܶܬܬܰܡܗܺܝܢ ܗ̱ܘܰܘ. ܘܳܐܙܺܠ̱ܝܢ ܗ̱ܘܰܘ ܒܳܬܪܶܗ ܟܰܕ ܕܰܚܺܝܠܺܝܢ. ܘܰܕܒܰܪ ܠܰܬܪܶܥܣܰܪܬܶܗ܆ ܘܫܰܪܺܝ ܕܢܺܐܡܰܪ ܠܗܽܘܢ ܡܶܕܶܡ ܕܰܥܬܺܝܕ ܕܢܶܗܘܶܐ ܠܶܗ.
33- ”ܕܗܳܐ ܣܳܠܩܺܝܢ ܚ̱ܢܰܢ ܠܽܐܘܪܺܫܠܶܡ. ܘܰܒܪܶܗ ܕܐ̱ܢܳܫܳܐ ܡܶܫܬܠܶܡ ܠܪ̈ܰܒܰܝ ܟܳܗ̈ܢܶܐ. ܘܰܠܣܳܦܪ̈ܶܐ. ܘܰܢܚܰܝܒܽܘܢܳܝܗ̱ܝ ܠܡܰܘܬܳܐ. ܘܢܰܫܠܡܽܘܢܳܝܗ̱ܝ ܠܥܰܡ̱̈ܡܶܐ܆
34- ܘܰܢܒܰܙܚܽܘܢ ܒܶܗ܁ ܘܰܢܢܰܓܕܽܘܢܳܝܗ̱ܝ܁ ܘܢܶܪܩܽܘܢ ܒܰܐܦܰܘ̈ܗ̱ܝ. ܘܢܶܩܛܠܽܘܢܳܝܗ̱ܝ. ܘܰܠܝܰܘܡܳܐ ܕܰܬܠܳܬܳܐ ܢܩܽܘܡ.“
35- ܘܰܩܪܶܒܘ ܠܘܳܬܶܗ ܝܰܥܩܽܘܒ ܘܝܽܘܚܰܢܳܢ ܒܢ̈ܰܝ ܙܰܒܕܰܝ ܘܳܐܡܪܺܝܢ ܠܶܗ. ܡܰܠܦܳܢܳܐ܆ ܨܳܒܶܝܢ ܚ̱ܢܰܢ܁ ܕܟܽܠ ܕܢܶܫܰܐܠ. ܬܶܥܒܶܕ ܠܰܢ.
36- ܐܳܡܰܪ ܠܗܽܘܢ܁ ”ܡܳܢܳܐ ܨܳܒܶܝܢ ܐܢ̱ܬܽܘܢ ܐܶܥܒܶܕ ܠܟܽܘܢ؟“
37- ܐܳܡܪܺܝܢ ܠܶܗ. ܗܰܒ ܠܰܢ ܕܚܰܕ ܢܶܬܶܒ ܡܶܢ ܝܰܡܺܝܢܳܟ. ܘܚܰܕ ܡܶܢ ܣܶܡܳܠܳܟ ܒܫܽܘܒܚܳܟ.
38- ܗܽܘ ܕܶܝܢ ܐܶܡܰܪ ܠܗܽܘܢ. ”ܠܳܐ ܝܳܕܥܺܝܢ ܐܢ̱ܬܽܘܢ ܡܳܢܳܐ ܫܳܐܠܺܝܢ ܐܢ̱ܬܽܘܢ. ܡܶܫܟܚܺܝܢ ܐܢ̱ܬܽܘܢ ܕܬܶܫܬܽܘܢ ܟܳܣܳܐ ܕܶܐܢܳܐ ܫܳܬܶܐ ܐ̱ܢܳܐ܆ ܘܡܰܥܡܽܘܕܺܝܬܳܐ ܕܶܐܢܳܐ ܥܳܡܶܕ ܐ̱ܢܳܐ܁ ܬܶܥܡܕܽܘܢ؟“
39- ܐܳܡܪܺܝܢ ܠܶܗ. ܡܶܫܟܚܺܝܢܰܢ. ܐܳܡܰܪ ܠܗܽܘܢ ܝܶܫܽܘܥ. ”ܟܳܣܳܐ ܕܫܳܬܶܐ ܐ̱ܢܳܐ. ܬܶܫܬܽܘܢ. ܘܡܰܥܡܽܘܕܺܝܬܳܐ ܕܥܳܡܶܕ ܐ̱ܢܳܐ. ܬܶܥܡܕܽܘܢ.
40- ܕܬܶܬܒܽܘܢ ܕܶܝܢ ܡܶܢ ܝܰܡܺܝܢܝ ܘܡܶܢ ܣܶܡܳܠܝ܆ ܠܳܐ ܗ̱ܘܳܬ ܕܺܝܠܝ ܠܡܶܬܰܠ܇ ܐܶܠܳܐ ܠܰܐܝܠܶܝܢ ܕܰܡܛܰܝܒܳܐ.“
41- ܘܟܰܕ ܫܡܰܥܘ ܥܶܣܪܳܐ܆ ܫܰܪܺܝܘ ܪܳܛܢܺܝܢ ܥܰܠ ܝܰܥܩܽܘܒ ܘܝܽܘܚܰܢܳܢ.
42- ܘܰܩܪܳܐ ܐܶܢܽܘܢ ܝܶܫܽܘܥ. ܘܶܐܡܰܪ ܠܗܽܘܢ. ”ܝܳܕܥܺܝܢ ܐܢ̱ܬܽܘܢ ܕܰܐܝܠܶܝܢ ܕܡܶܣܬܰܒܪܺܝܢ ܪ̈ܺܝܫܶܐ ܕܥܰܡ̱̈ܡܶܐ. ܡܳܪ̈ܰܝܗܽܘܢ ܐܶܢܽܘܢ. ܘܪܰܘܪ̈ܒܳܢܰܝܗܽܘܢ ܫܰܠܺܝܛܺܝܢ ܥܠܰܝܗܽܘܢ.
43- ܠܳܐ ܕܶܝܢ ܗܳܟܰܢܳܐ ܢܶܗܘܶܐ ܒܰܝܢܳܬܟܽܘܢ. ܐܶܠܳܐ ܡܰܢ ܕܨܳܒܶܐ ܒܟܽܘܢ ܕܢܶܗܘܶܐ ܪܰܒܳܐ܆ ܢܶܗܘܶܐ ܠܟܽܘܢ ܡܫܰܡܫܳܢܳܐ.
44- ܘܰܐܝܢܳܐ ܡܶܢܟܽܘܢ ܕܨܳܒܶܐ ܕܢܶܗܘܶܐ ܩܰܕܡܳܝܳܐ܆ ܢܶܗܘܶܐ ܥܰܒܕܳܐ ܕܟܽܠܢܳܫ.
45- ܐܳܦ ܒܪܶܗ ܓܶܝܪ ܕܐ̱ܢܳܫܳܐ܆ ܠܳܐ ܐܶܬܳܐ ܕܢܶܫܬܰܡܰܫ܁ ܐܶܠܳܐ ܕܰܢܫܰܡܶܫ. ܘܰܕܢܶܬܶܠ ܢܰܦܫܶܗ ܦܽܘܪܩܳܢܳܐ ܚܠܳܦ ܣܰܓܺܝ̈ܶܐܐ.“
46- ܘܶܐܬܰܘ ܠܺܐܝܪܺܝܚܽܘ. ܘܟܰܕ ܢܦܰܩ ܝܶܫܽܘܥ ܡܶܢ ܐܺܝܪܺܝܚܽܘ: ܗܽܘ ܘܬܰܠܡܺܝ̈ܕܰܘܗ̱ܝ ܘܟܶܢܫܳܐ ܣܰܓܺܝܳܐܐ܆ ܛܺܝܡܰܝ܁ ܒܰܪ ܛܺܝܡܰܝ ܣܰܡܝܳܐ܇ ܝܳܬܶܒ ܗ̱ܘܳܐ ܥܰܠ ܝܰܕ ܐܽܘܪܚܳܐ. ܘܚܳܕܰܪ.
47- ܘܰܫܡܰܥ ܕܝܶܫܽܘܥ ܗ̱ܘ ܢܳܨܪܳܝܳܐ. ܘܫܰܪܺܝ ܠܡܶܩܥܳܐ. ܘܰܠܡܺܐܡܰܪ. ܒܪܶܗ ܕܕܰܘܺܝܕ܅ ܐܶܬܪܰܚܰܡ ܥܠܰܝ!
48- ܘܟܳܐܶܝܢ ܗ̱ܘܰܘ ܒܶܗ ܣܰܓܺܝ̈ܶܐܐ ܕܢܶܫܬܽܘܩ. ܗܽܘ ܕܶܝܢ ܝܰܬܺܝܪܳܐܺܝܬ ܩܳܥܶܐ ܗ̱ܘܳܐ. ܘܳܐܡܰܪ. ܒܪܶܗ ܕܕܰܘܺܝܕ܅ ܐܶܬܪܰܚܰܡ ܥܠܰܝ!
49- ܘܩܳܡ ܝܶܫܽܘܥ. ܘܰܦܩܰܕ ܕܢܶܩܪܽܘܢܳܝܗ̱ܝ. ܘܰܩܪܰܐܘܽܗ̱ܝ ܠܣܰܡܝܳܐ. ܘܳܐܡܪܺܝܢ ܠܶܗ. ܐܶܬܠܰܒِܒ܁ ܩܽܘܡ܁ ܩܳܪܶܐ ܠܳܟ!
50- ܗܽܘ ܕܶܝܢ ܣܰܡܝܳܐ ܫܕܳܐ ܠܒܳܫܶܗ܆ ܘܩܳܡ ܐܶܬܳܐ ܠܘܳܬ ܝܶܫܽܘܥ.
51- ܐܳܡܰܪ ܠܶܗ ܝܶܫܽܘܥ. ”ܡܳܢܳܐ ܨܳܒܶܐ ܐܰܢ̱ܬ ܐܶܥܒܶܕ ܠܳܟ؟“ ܗܽܘ ܕܶܝܢ ܣܰܡܝܳܐ. ܐܶܡܰܪ ܠܶܗ. ܪܰܒܺܝ ܕܶܐܚܙܶܐ.
52- ܘܝܶܫܽܘܥ ܐܶܡܰܪ ܠܶܗ. ”ܚܙܺܝ܁ ܗܰܝܡܳܢܽܘܬܳܟ ܐܰܚܝܰܬܳܟ!“ ܘܡܶܚܕܳܐ ܐܶܬܚܙܺܝ ܠܶܗ܆ ܘܳܐܙܶܠ ܗ̱ܘܳܐ ܒܽܐܘܪܚܳܐ܀