Mark 2
The Gospel according to Mark
܀ ܡܪܩܘܣ ܒ ܀
1- ܘܥܰܠ ܬܽܘܒ ܝܶܫܽܘܥ ܠܰܟܦܰܪܢܰܚܽܘܡ. ܠܝܰܘ̈ܡܳܬܳܐ. ܘܟܰܕ ܫܡܰܥܘ ܕܰܒܒܰܝܬܰܐ ܗ̱ܘ܆
2- ܐܶܬܟܰܢܰܫܘ ܣܰܓܺܝ̈ܶܐܐ܆ ܐܰܝܟܰܢܳܐ ܕܠܳܐ ܐܶܫܟܰܚ ܐܳܚܶܕ ܐܶܢܽܘܢ. ܐܳܦܠܳܐ ܩܕܳܡ ܬܰܪܥܳܐ. ܘܰܡܡܰܠܶܠ ܗ̱ܘܳܐ ܥܰܡܗܽܘܢ ܡܶܠܬܳܐ.
3- ܘܶܐܬܰܘ ܠܘܳܬܶܗ܆ ܘܰܐܝܬܺܝܘ ܠܶܗ ܡܫܰܪܝܳܐ. ܟܰܕ ܫܩܺܝܠܺܝܢ ܠܶܗ ܒܶܝܬ ܐܰܪܒܥܳܐ.
4- ܘܰܕܠܳܐ ܐܶܫܟܰܚܘ ܠܡܶܬܩܰܪܳܒܽܘ ܠܘܳܬܶܗ ܡܶܛܽܠ ܟܶܢܫܳܐ܆ ܣܠܶܩܘ ܠܗܽܘܢ ܠܶܐܓܳܪܳܐ. ܘܰܐܪܺܝܡܘ ܬܰܛܠܺܝܠܳܐ ܕܰܐܬܰܪ ܕܺܐܝܬܰܘܗ̱ܝ ܗ̱ܘܳܐ ܝܶܫܽܘܥ܆ ܘܫܰܒܽܘܗ̇ ܠܥܰܪܣܳܐ ܕܰܪܡܶܐ ܗ̱ܘܳܐ ܒܳܗ̇ ܡܫܰܪܝܳܐ܀
5- ܟܰܕ ܚܙܳܐ ܕܶܝܢ ܝܶܫܽܘܥ ܗܰܝܡܳܢܽܘܬܗܽܘܢ. ܐܶܡܰܪ ܠܗܰܘ ܡܫܰܪܝܳܐ. ”ܒܶܪܝ܁ ܫܒܺܝܩܺܝܢ ܠܳܟ ܚܛܳܗ̈ܰܝܟ!“
6- ܐܺܝܬ ܗ̱ܘܰܘ ܕܶܝܢ ܬܰܡܳܢ ܡܶܢ ܣܳܦܪ̈ܶܐ ܘܰܦܪ̈ܺܝܫܶܐ ܕܝܳܬܒܺܝܢ. ܘܡܶܬܪܰܥܶܝܢ ܗ̱ܘܰܘ ܒܠܶܒܗܽܘܢ܁
7- ܕܡܳܢܳܐ ܗܳܢܳܐ ܡܡܰܠܶܠ؟ ܓܽܘܕܳܦܳܐ! ܡܰܢܽܘ ܡܶܫܟܰܚ ܠܡܶܫܒܰܩ ܚܛܳܗ̈ܶܐ؟ ܐܶܠܳܐ ܐܶܢ ܚܰܕ ܐܰܠܳܗܳܐ.
8- ܝܶܫܽܘܥ ܕܶܝܢ ܝܺܕܰܥ ܒܪܽܘܚܶܗ. ܕܗܳܠܶܝܢ ܡܶܬܪܰܥܶܝܢ ܒܢܰܦܫܗܽܘܢ ܘܶܐܡܰܪ ܠܗܽܘܢ. ”ܡܳܢܳܐ ܡܶܬܪܰܥܶܝܢ ܐܢ̱ܬܽܘܢ ܗܳܠܶܝܢ ܒܠܶܒܟܽܘܢ؟
9- ܐܰܝܕܳܐ ܦܫܺܝܩܳܐ ܠܡܺܐܡܰܪ ܠܰܡܫܰܪܝܳܐ؟ ܕܰܫܒܺܝܩܺܝܢ ܠܳܟ ܚܛܳܗ̈ܰܝܟ܆ ܐܰܘ ܠܡܺܐܡܰܪ. ܕܩܽܘܡ ܫܩܽܘܠ ܥܰܪܣܳܟ. ܘܗܰܠܶܟ؟
10- ܕܬܶܕܥܽܘܢ ܕܶܝܢ ܕܫܰܠܺܝܛ ܗ̱ܘ ܒܪܶܗ ܕܐ̱ܢܳܫܳܐ ܒܰܐܪܥܳܐ ܠܡܶܫܒܰܩ ܚܛܳܗ̈ܶܐ.“ ܐܶܡܰܪ ܠܰܡܫܰܪܝܳܐ.
11- ”ܠܳܟ ܐܳܡܰܪ ܐ̱ܢܳܐ. ܩܽܘܡ܁ ܫܩܽܘܠ ܥܰܪܣܳܟ. ܘܙܶܠ ܠܒܰܝܬܳܟ!“
12- ܘܩܳܡ ܒܰܪ ܫܳܥܬܶܗ. ܘܰܫܩܰܠ ܥܰܪܣܶܗ܁ ܘܰܢܦܰܩ ܠܥܺܝܢ ܟܽܠܗܽܘܢ. ܐܰܝܟܰܢܳܐ ܕܢܶܬܕܰܡܪܽܘܢ ܟܽܠܗܽܘܢ ܘܰܢܫܰܒܚܽܘܢ ܠܰܐܠܳܗܳܐ. ܟܰܕ ܐܳܡܪܺܝܢ. ܕܠܳܐ ܡܶܡܬܽܘܡ ܚܙܰܝܢ ܗܳܟܰܢܳܐ!܀
13- ܘܰܢܦܰܩ ܬܽܘܒ ܠܘܳܬ ܝܰܡܳܐ. ܘܟܽܠܶܗ ܟܶܢܫܳܐ ܐܳܬܶܝܢ ܗ̱ܘܰܘ ܠܘܳܬܶܗ܆ ܘܡܰܠܶܦ ܗ̱ܘܳܐ ܠܗܽܘܢ.
14- ܘܟܰܕ ܥܳܒܰܪ܆ ܚܙܳܐ ܠܠܶܘܺܝ ܒܰܪ ܚܰܠܦܰܝ. ܕܝܳܬܶܒ ܒܶܝܬ ܡܳܟ̈ܣܶܐ. ܘܶܐܡܰܪ ܠܶܗ. ”ܬܳܐ ܒܳܬܰܪܝ!“ ܘܩܳܡ ܐܶܙܰܠ ܒܳܬܪܶܗ.
15- ܘܰܗܘܳܐ ܕܟܰܕ ܣܡܺܝܟ ܒܒܰܝܬܶܗ܆ ܣܰܓܺܝ̈ܶܐܐ ܡܳܟ̈ܣܶܐ ܘܚܰܛܳܝ̈ܶܐ ܣܡܺܝܟܺܝܢ ܗ̱ܘܰܘ ܥܰܡ ܝܶܫܽܘܥ ܘܥܰܡ ܬܰܠܡܺܝ̈ܕܰܘܗ̱ܝ. ܐܺܝܬܰܝܗܽܘܢ ܗ̱ܘܰܘ ܓܶܝܪ ܣܰܓܺܝ̈ܶܐܐ. ܘܶܐܬܰܘ ܒܳܬܪܶܗ.
16- ܘܣܳܦܪ̈ܶܐ ܘܰܦܪ̈ܺܝܫܶܐ܁ ܟܰܕ ܚܙܰܐܘܽܗ̱ܝ ܕܠܳܥܶܣ ܥܰܡ ܡܳܟ̈ܣܶܐ ܘܥܰܡ ܚܰܛܳܝ̈ܶܐ܆ ܐܶܡܰܪܘ ܠܬܰܠܡܺܝ̈ܕܰܘܗ̱ܝ. ܡܳܢܰܘ ܥܰܡ ܡܳܟ̈ܣܶܐ ܘܚܰܛܳܝ̈ܶܐ ܐܳܟܶܠ ܘܫܳܬܶܐ؟
17- ܟܰܕ ܫܡܰܥ ܕܶܝܢ ܝܶܫܽܘܥ ܐܶܡܰܪ ܠܗܽܘܢ. ”ܠܳܐ ܣܢܺܝܩܺܝܢ ܚܠܺܝ̈ܡܶܐ ܥܰܠ ܐܳܣܝܳܐ. ܐܶܠܳܐ ܐܰܝܠܶܝܢ ܕܒܺܝܫ ܒܺܝܫ ܥܒܺܝܕܺܝܢ. ܠܳܐ ܐܶܬܺܝܬ ܕܶܐܩܪܶܐ ܠܙܰܕܺܝ̈ܩܶܐ܁ ܐܶܠܳܐ ܠܚܰܛܳܝ̈ܶܐ.“
18- ܬܰܠܡܺܝ̈ܕܰܘܗ̱ܝ ܕܶܝܢ ܕܝܽܘܚܰܢܳܢ ܘܰܦܪ̈ܺܝܫܶܐ ܨܳܝܡܺܝܢ ܗ̱ܘܰܘ. ܘܶܐܬܰܘ ܘܳܐܡܪܺܝܢ ܠܶܗ. ܠܡܳܢܳܐ ܬܰܠܡܺܝ̈ܕܰܘܗ̱ܝ ܕܝܽܘܚܰܢܳܢ ܘܕܰܦܪ̈ܺܝܫܶܐ ܨܳܝܡܺܝܢ܇ ܘܬܰܠܡܺܝ̈ܕܰܝܟ ܕܺܝܠܳܟ ܠܳܐ ܨܳܝܡܺܝܢ؟
19- ܐܳܡܰܪ ܠܗܽܘܢ ܝܶܫܽܘܥ. ”ܕܰܠܡܳܐ ܡܶܫܟܚܺܝܢ ܒܢ̈ܰܘܗ̱ܝ ܕܰܓܢܽܘܢܳܐ܆ ܟܡܳܐ ܕܚܰܬܢܳܐ ܥܰܡܗܽܘܢܽ ܗ̱ܘ ܕܰܢܨܽܘܡܽܘܢ؟ ܠܳܐ.
20- ܢܺܐܬܽܘܢ ܕܶܝܢ ܝܰܘ̈ܡܳܬܳܐ܁ ܕܡܳܐ ܕܶܐܫܬܩܶܠ ܡܶܢܗܽܘܢ ܚܰܬܢܳܐ܆ ܗܳܝܕܶܝܢ ܢܨܽܘܡܽܘܢ ܒܗܰܘ ܝܰܘܡܳܐ.
21- ܠܳܐ ܐ̱ܢܳܫ ܩܳܐܶܕ ܐܽܘܪܩܰܥܬܳܐ ܚܕܰܬܳܐ ܘܚܳܐܶܛ ܥܰܠ ܡܳܐܢܳܐ ܒܠܳܝܳܐ. ܕܠܳܐ ܢܳܣܒܳܐ ܡܰܠܝܽܘܬܳܗ̇ ܗܳܝ ܚܕܰܬܳܐ ܡܶܢ ܒܠܳܝܳܐ܆ ܘܗܳܘܶܐ ܣܶܕܩܳܐ ܝܰܬܺܝܪܳܐ.
22- ܘܠܳܐ ܐ̱ܢܳܫ ܪܳܡܶܐ ܚܰܡܪܳܐ ܚܰܕ̱ܬܳܐ ܒܙܶܩ̈ܶܐ ܒܠܳܝ̈ܳܬܳܐ. ܕܠܳܐ ܚܰܡܪܳܐ ܡܨܰܪܶܐ ܠܙܶܩ̈ܶܐ܆ ܘܙܶܩ̈ܶܐ ܐܳܒ̈ܕܳܢ. ܘܚܰܡܪܳܐ ܡܶܬܶܐܫܶܕ. ܐܶܠܳܐ ܪܳܡܶܝܢ ܚܰܡܪܳܐ ܚܰܕ̱ܬܳܐ ܒܙܶܩ̈ܶܐ ܚ̈ܰܕ̱ܬܳܬܳܐ!.“
23- ܘܰܗܘܳܐ ܕܟܰܕ ܐܳܙܶܠ ܝܶܫܽܘܥ ܒܫܰܒܬܳܐ ܒܶܝܬ ܙܰܪ̈ܥܶܐ܆ ܬܰܠܡܺܝ̈ܕܰܘܗ̱ܝ ܡܗܰܠܟܺܝܢ ܗ̱ܘܰܘ. ܘܡܳܠܓܺܝܢ ܫܶܒ̈ܠܶܐ.
24- ܘܳܐܡܪܺܝܢ ܠܶܗ ܦܪ̈ܺܝܫܶܐ. ܚܙܺܝ ܡܳܢܳܐ ܥܳܒܕܺܝܢ ܒܫܰܒܬܳܐ܁ ܡܶܕܶܡ ܕܠܳܐ ܫܰܠܺܝܛ؟
25- ܐܳܡܰܪ ܠܗܽܘܢ ܝܶܫܽܘܥ. ”ܠܳܐ ܡܶܡܬܽܘܡ ܩܪܰܝܬܽܘܢ ܡܳܢܳܐ ܥܒܰܕ ܕܰܘܺܝܕ؟ ܟܰܕ ܐܶܣܬܢܶܩ ܘܰܟܦܶܢ ܗܽܘ ܘܰܕܥܰܡܶܗ:
26- ܐܰܝܟܰܢܳܐ ܥܰܠ ܠܒܰܝܬܶܗ ܕܰܐܠܳܗܳܐ: ܟܰܕ ܐܰܒܺܝܬܳܪ ܪܰܒ ܟܳܗ̈ܢܶܐ: ܘܠܰܚܡܳܐ ܕܦܳܬܽܘܪܶܗ ܕܡܳܪܝܳܐ ܐܶܟܰܠ: ܗܰܘ ܕܠܳܐ ܫܰܠܺܝܛ ܠܡܶܐܟܰܠ. ܐܶܠܳܐ ܐܶܢ ܠܟܳܗ̈ܢܶܐ ܘܝܰܗ̱ܒ ܐܳܦ ܠܰܐܝܠܶܝܢ ܕܥܰܡܶܗ ܗ̱ܘܰܘ.“
27- ܘܶܐܡܰܪ ܠܗܽܘܢ܁ ”ܕܫܰܒܬܳܐ ܡܶܛܽܠ ܒܰܪܢܳܫܳܐ ܐܶܬܒܰܪܝܰܬ܆ ܘܠܳܐ ܗ̱ܘܳܐ ܒܰܪܢܳܫܳܐ ܡܶܛܽܠ ܫܰܒܬܳܐ.
28- ܡܳܪܳܗܿܽ ܗ̱ܘ ܗܳܟܺܝܠ ܘܳܐܦ ܕܫܰܒܬܳܐ ܒܪܶܗ ܕܐ̱ܢܳܫܳܐ.“