1 Chronicles 10
The first Book of Chronicles
܀ ܐ ܕܘܒܪ ܝܘܡ̈ܬܐ ܝ ܀
1 ܘܰܦܠܶܫܬܳܝ̈ܶܐ ܡܶܬܟܰܬܫܺܝܢ ܗܘܰܘ ܥܰܡ ܝܺܣܪܳܐܶܝܠ. ܘܰܥܪܰܩܘ ܓܰܒܖ̈ܶܐ ܕܺܝܣܪܳܐܶܝܠ ܡܶܢ ܦܠܶܫܬܳܝ̈ܶܐ. ܘܰܢܦܰܠܘ ܩܛܺܝ̈ܠܶܐ ܣܰܓܺܝ̈ܐܶܐ ܒܛܽܘܪܳܐ ܕܓܶܠܒܽܘܥ.
2 ܘܰܐܕܪܶܟܘ ܦܠܶܫܬܳܝ̈ܶܐ ܠܫܳܐܘܳܠ ܘܠܰܒܢܰܘ̈ܗܝ. ܘܰܚܪܰܒܘ ܦܠܶܫܬܳܝ̈ܶܐ ܠܝܽܘܢܳܬܳܢ ܘܰܠܝܰܫܘܺܝ. ܘܰܠܡܰܠܟܝܶܫܽܘܥ ܒܢܰܘ̈ܗܝ ܕܫܳܐܘܳܠ.
3 ܘܰܥܫܶܢ ܩܪܳܒܳܐ ܥܰܠ ܫܳܐܘܳܠ. ܘܶܐܫܟܚܽܘܗܝ ܐ̱ܢܳܫ̈ܳܐ ܩܰܫ̈ܳܬܶܐ ܕܽܐܘܡܳܢܺܝܢ ܛܳܒ ܠܡܶܫܕܳܐ ܒܩܶܫܬܳܐ. ܘܟܰܕ ܚ̣ܙܳܐ ܫܳܐܘܳܠ. ܕܚܶܠ ܛܳܒ ܡܶܢ ܩܕܳܡܰܝܗܽܘܢ.
4 ܘܶܐܡܰܪ ܫܳܐܘܳܠ ܠܫܳܩܶܠ ܡܳܐܢܰܘ̈ܗܝ. ܫܡܽܘܛ ܚܰܪܒܳܟ ܘܰܕܩܽܘܪܰܝܢܝ ܒܳܗ̇. ܥܰܕܠܳܐ ܢܺܐܬܽܘܢ ܥܽܘܖ̈ܠܶܐ ܗܳܠܶܝܢ. ܘܢܶܩܛܠܽܘܢܳܢܝ. ܘܢܶܫܬܰܢܕܽܘܢ ܒܺܝ. ܘܠܳܐ ܨܒܳܐ ܫܳܩܶܠ ܡܳܐܢܰܘ̈ܗܝ. ܡܶܛܽܠ ܕܰܕܚܶܠ ܛܳܒ. ܘܰܫܡܰܛ ܫܳܐܘܳܠ ܣܰܝܦܶܗ. ܘܰܢܦܰܠ ܥܠܰܘܗܝ.
5 ܘܰܚܙܳܐ ܫܳܩܶܠ ܡܳܐܢܰܘ̈ܗܝ ܕܡܺܝܬ ܠܶܗ ܫܳܐܘܳܠ. ܘܰܢܦܰܠ ܐܳܦ ܗܽܘ ܥܰܠ ܣܰܝܦܶܗ. ܘܡܺܝܬ ܥܰܡܶܗ.
6 ܘܡܺܝܬ ܫܳܐܘܳܠ. ܘܰܬܠܳܬܳܐ ܒܢܰܘ̈ܗܝ. ܘܫܳܩܶܠ ܡܳܐܢܰܘ̈ܗܝ. ܘܟܽܠ ܓܰܢ̱ܒܳܖ̈ܰܘܗܝ ܡܺܝܬܘ ܒܝܰܘܡܳܐ ܗܰܘ ܐܰܟܚܕܳܐ.
7 ܘܰܚܙܰܘ ܟܽܠ ܐ̱ܢܳܫ̈ܳܐ ܕܺܝܣܪܳܐܶܝܠ ܕܺܐܝܬ ܒܥܶܒܪܳܐ ܕܒܰܦܩܰܥܬܳܐ. ܘܕܺܐܝܬ ܒܥܶܒܪܳܐ ܕܝܽܘܪܕܢܳܢ. ܕܰܥܪܰܩ ܠܶܗ ܥܰܡܳܐ ܕܺܝܣܪܳܐܶܝܠ. ܘܕܶܐܬܩܛܶܠ ܫܳܐܘܳܠ ܘܰܒܢܰܘ̈ܗܝ ܘܰܫܒܰܩܘ ܩܽܘܖ̈ܝܳܐ ܘܰܥܪܰܩܘ. ܘܶܐܬܰܘ ܦܠܶܫܬܳܝ̈ܶܐ. ܘܰܥܡܰܪܘ ܒܗܶܝܢ.
8 ܘܰܗܘܳܐ ܡܶܢ ܒܳܬܰܪ ܝܰܘܡܳܐ. ܘܶܐܬܰܘ ܦܠܶܫܬܳܝ̈ܶܐ ܠܰܡܚܰܠܳܨܽܘ ܩܛܺܝ̈ܠܶܐ. ܘܶܐܫܟܰܚܘ ܠܫܳܐܘܳܠ ܘܠܰܬܠܳܬܳܐ ܒܢܰܘ̈ܗܝ ܩܛܺܝܠܺܝܢ. ܘܰܪܡܶܝܢ ܒܛܽܘܪܳܐ ܕܓܶܠܒܽܘܥ.
9 ܘܰܫܩܰܠܘ ܖ̈ܺܝܫܰܝܗܽܘܢ. ܘܫܰܠܰܚܘ ܡܳܐܢܰܝ̈ܗܽܘܢ. ܘܫܰܕܰܪܘ ܠܰܐܪܥܳܐ ܕܰܦܠܶܫܬܳܝ̈ܶܐ. ܠܩܽܘܖ̈ܝܳܐ ܘܠܰܡܕܺܝ̈ܢܳܬܳܐ ܘܰܠܟܰܖ̈ܟܶܐ. ܠܰܡܣܰܒܳܪܽܘ ܒܶܝܬ ܦܬܰܟܖ̈ܰܝܗܽܘܢ. ܘܰܠܥܰܡܗܽܘܢ.
10 ܘܣܳܡܘ ܡܳܐܢܰܝ̈ܗܽܘܢ ܘܙܰܝܢܗܽܘܢ ܒܶܝܬ ܦܬܰܟܖ̈ܰܝܗܽܘܢ ܘܦܰܓܖ̈ܰܝܗܽܘܢ ܬܠܰܘ ܒܫܽܘܪܳܐ ܕܒܶܝܬ ܝܳܫܳܢ.
11 ܘܰܫܡܰܥܘ ܝܳܬܒܰܝ̈ ܝܳܒܺܝܫ ܕܓܶܠܥܳܕ ܡܶܕܶܡ ܕܰܥܒܰܕܘ ܦܠܶܫܬܳܝ̈ܶܐ ܠܫܳܐܘܳܠ.
12 ܘܩܳܡܘ ܟܽܠ ܓܒܰܪ ܡܳܪܶܐ ܚܰܝܠܳܐ. ܘܶܐܙܰܠܘ ܟܽܠܶܗ ܠܺܠܝܳܐ. ܘܰܢܣܰܒܘ ܦܰܓܪܶܗ ܕܫܳܐܘܳܠ ܘܦܰܓܖ̈ܶܐ ܕܰܒܢܰܘ̈ܗܝ ܡܶܢ ܫܽܘܪܳܐ ܕܒܶܝܬ ܝܳܫܳܢ. ܘܰܐܝܬܺܝܘ ܠܝܳܒܺܝܫ. ܘܰܐܘܩܶܕܘ ܐܶܢܽܘܢ ܬܰܡܳܢ. ܘܰܢܣܰܒܘ ܓܰܖ̈ܡܰܝܗܽܘܢ. ܛܡܰܪܘ ܬܚܶܝܬ ܒܶܛܡܬܳܐ ܕܰܒܝܳܒܺܝܫ ܘܨܳܡܘ ܫܰܒܥܳܐ ܝܰܘܡܺܝ̈ܢ.
13 ܘܡܺܝܬ ܫܳܐܘܳܠ. ܥܰܠ ܕܟܰܕܶܒ ܟܰܕܳܒܽܘܬܳܐ ܒܡܳܪܝܳܐ. ܘܡܶܕܶܡ ܕܦܰܩܕܶܗ ܠܳܐ ܢܛܰܪ.
14 ܘܳܐܦ ܫܐܶܠ ܒܙܰܟܽܘܖ̈ܶܐ. ܘܰܒܡܳܪܝܳܐ ܐܰܠܳܗܶܗ ܠܳܐ ܫܐܶܠ ܘܶܐܬܝܰܗܒܰܬ ܡܰܠܟܽܘܬܶܗ ܠܕܰܘܺܝܕ ܒܰܪ ܐܺܝܫܰܝ.