1 Chronicles 16
The first Book of Chronicles
܀ ܐ ܕܘܒܪ ܝܘܡ̈ܬܐ ܝܘ ܀
1 ܘܰܐܝܬܝܽܘܗ̇ ܠܩܺܐܒܽܘܬܳܐ ܕܡܳܪܝܳܐ. ܘܣܳܡܽܘܗ̇ ܒܕܽܘܟܬܳܗ̇. ܒܓܰܘ ܡܰܫܟܢܳܐ ܕܰܢܩܰܫ ܠܳܗ̇ ܕܰܘܺܝܕ. ܘܩܰܪܶܒܘ ܥܠܰܘ̈ܳܬܳܐ ܘܫܰܠ̈ܡܶܐ ܩܕܳܡ ܩܺܐܒܽܘܬܳܐ ܕܡܳܪܝܳܐ.
2 ܘܟܰܕ ܫܰܠܶܡ ܕܰܘܺܝܕ ܠܰܡܩܰܪܳܒܽܘ ܥܠܰܘ̈ܳܬܳܐ ܘܫܰܠ̈ܡܶܐ. ܒܰܪܶܟ ܠܥܰܡܳܐ ܕܺܝܣܪܳܐܶܝܠ ܒܰܫܡܶܗ ܕܡܳܪܝܳܐ ܚܰܝܠܬܳܢܳܐ.
3 ܘܦܰܠܶܓ ܠܟܽܠܶܗ ܥܰܡܳܐ. ܠܟܽܠܗܽܘܢ ܕܒܶܝܬ ܝܺܣܪܳܐܶܝܠ. ܡܶܢ ܓܰܒܖ̈ܶܐ ܘܰܥܕܰܡܳܐ ܠܢܶܫ̈ܶܐ. ܘܡܶܢ ܓܰܕܽܘ̈ܕܶܐ ܠܝܳܢܩܰܝ̈ ܬܕܰܝܳܐ ܠܟܽܠ ܓܒܰܪ ܘܰܓܒܰܪ. ܓܪܺܝܨܬܳܐ ܕܠܰܚܡܳܐ ܚܕܳܐ. ܘܰܡܢܳܬܳܐ ܚܕܳܐ. ܘܰܣܢܳܪܩܳܐ ܚܕܳܐ. ܘܶܐܙܰܠܘ ܟܽܠܶܗ ܥܰܡܳܐ ܐ̱ܢܳܫ ܠܒܰܝܬܶܗ.
4 ܘܝܰܗܒ ܩܕܳܡ ܩܺܐܒܽܘܬܳܐ ܕܡܳܪܝܳܐ. ܠܶܘ̈ܳܝܶܐ ܕܰܡܫܰܡܫܺܝܢ ܩܕܳܡ ܡܳܪܝܳܐ. ܘܡܰܕܟܪܺܝܢ ܘܡܰܘܕܶܝܢ. ܘܰܡܫܰܒܚܺܝܢ ܠܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
5 ܐܳܣܳܦ ܪܺܝܫܗܽܘܢ. ܬܶܢܝܳܢܳܐ ܙܟܰܪܝܳܐ. ܘܝܽܘܥܶܝܠ. ܘܝܽܘܚܳܐܶܝܠ. ܘܡܰܬܺܝܬܳܐ. ܘܶܐܠܝܰܐܒ. ܘܒܰܢܝܳܐ. ܘܳܐܣܳܦ. ܘܥܰܡܺܝܢܳܕܳܒ. ܘܳܐܣܳܦ. ܘܢܰܚܙܳܐܶܝܠ. ܘܳܐܣܳܦ.
6 ܗܳܠܶܝܢ ܟܽܠܗܽܘܢ ܟܳܗ̈ܢܶܐ ܕܩܳܪܶܝܢ ܒܩܰܖ̈ܢܳܬܳܐ. ܐܰܡܺܝܢܳܐܺܝܬ ܩܕܳܡ ܩܺܐܒܽܘܬܶܗ ܕܡܳܪܝܳܐ.
7 ܗܳܝܕܶܝܢ ܦܬܰܚ ܦܽܘܡܶܗ ܕܰܘܺܝܕ ܒܝܰܘܡܳܐ ܗܰܘ. ܗܽܘ ܘܖ̈ܺܝܫܰܝ ܟܽܠܗܽܘܢ ܟܳܗ̈ܢܶܐ ܘܠܶܘ̈ܳܝܶܐ ܠܰܡܫܰܒܳܚܽܘ ܠܡܳܪܝܳܐ. ܥܰܠ ܛܝܳܪܳܐ ܕܳܐܣܳܦ ܘܕܰܐܚܰܘ̈ܗܝ ܘܗܳܠܶܝܢ ܖ̈ܺܝܫܶܐ ܕܬܶܫܒ̈ܚܳܬܳܐ ܕܶܐܡܰܪ ܕܰܘܺܝܕ. ܩܕܳܡ ܩܺܐܒܽܘܬܶܗ ܕܡܳܪܝܳܐ ܒܝܰܘܡܳܐ ܗܰܘ.
8 ܐܰܘܕܰܘ ܠܡܳܪܝܳܐ. ܘܰܩܪܰܘ ܫܡܶܗ. ܐܰܘܕܰܥܘ ܒܶܝܬ ܥܰܡ̈ܡܶܐ ܥܒܳܕܰܘ̈ܗܝ.
9 ܫܰܒܰܚܘ ܠܶܗ. ܘܰܐܘܕܰܘ ܠܶܗ. ܐܶܫܬܰܥܰܘ ܟܽܠܗܶܝܢ ܓܰܒܳܖ̈ܘܳܬܶܗ.
10 ܐܶܫܬܰܒܰܚܘ ܒܰܫܡܳܐ ܕܩܽܘܕܫܶܗ. ܢܶܚܕܶܐ ܠܶܒܳܐ ܕܟܽܠ ܕܒܳܥܶܝܢ ܠܡܳܪܝܳܐ ܘܰܠܥܽܘܫܢܶܗ.
11 ܨܰܠܰܘ ܩܕܳܡܰܘܗܝ ܐܰܡܺܝܢܳܐܺܝܬ.
12 ܐܶܬܕܰܟܪܘ ܓܒܰܖ̈ܘܳܬܶܗ ܕܰܥܒܰܕ. ܓܒܰܖ̈ܘܳܬܶܗ ܘܕܺܝܢ̈ܶܐ ܕܦܽܘܡܶܗ.
13 ܙܰܪܥܶܗ ܕܰܐܒܪܳܗܳܡ ܥܰܒܕܶܗ. ܘܰܒܢܰܘ̈ܗܝ ܕܝܰܥܩܽܘܒ ܓܒܰܝ̈ܳܐ ܕܰܓܒܳܐ.
14 ܗܽܘܝܽܘ ܡܳܪܝܳܐ ܐܰܠܳܗܰܢ. ܕܰܒܟܽܠܳܗ̇ ܐܰܪܥܳܐ ܢܳܡܽܘܣܰܘ̈ܗܝ.
15 ܐܶܬܕܰܟܪܘ ܠܥܳܠܰܡ ܕܺܝܰܐܬܺܝܩܺܝ ܕܺܝܠܶܗ. ܡܶܠܬܳܐ ܕܦܰܩܶܕ ܠܳܐܠܶܦ ܕܳܖ̈ܺܝܢ.
16 ܕܺܝܡܳܐ ܠܰܐܒܪܳܗܳܡ. ܘܕܺܝܰܐܬܺܝܩܺܝ ܕܝܰܗܒ ܠܰܒܢܰܘ̈ܗܝ ܕܺܐܝܣܚܳܩ. ܘܓܰܙܪܳܗ̇ ܠܝܰܥܩܽܘܒ ܠܥܳܠܰܡ.
17 ܠܺܝܣܪܳܐܶܝܠ ܝܰܗܒ ܠܗܽܘܢ ܕܺܝܰܐܬܺܝܩܺܝ ܠܥܳܠܰܡ ܥܳܠܡܺܝܢ.
18 ܘܶܐܡܰܪ ܠܗܽܘܢ. ܕܰܠܟܽܘܢ ܝܳܗܶܒ ܐ̱ܢܳܐ ܠܳܗ̇ ܐܰܪܥܳܐ ܕܰܟܢܰܥܢ. ܦܶܨܬܳܐ ܕܝܳܪܬܽܘܬܟܽܘܢ.
19 ܟܰܕ ܗܘܰܝܬܽܘܢ ܐ̱ܢܳܫܰܝ̈ ܡܶܢܝܳܢܳܐ. ܙܥܽܘܖ̈ܺܝܢ ܘܥܳܡܽܘܖ̈ܺܝܢ ܒܳܗ̇.
20 ܘܶܐܫܬܒܺܝܬܽܘܢ ܡܶܢ ܥܰܡܳܐ ܠܥܰܡܳܐ. ܘܡܶܢ ܡܰܠܟܽܘܬܳܐ ܠܡܰܠܟܽܘܬܳܐ ܐ̱ܚܪܺܬܳܐ.
21 ܠܳܐ ܫܒܰܩ ܠܫܰܠܺܝܛܳܢ̈ܶܐ ܕܢܰܗܪܽܘܢܳܟܽܘܢ. ܘܰܪܕܳܐ ܡܶܛܽܠܬܟܽܘܢ ܡܰܠ̈ܟܶܐ. ܘܶܐܡܰܪ ܠܗܽܘܢ.
22 ܠܳܐ ܬܶܬܩܰܪܒܽܘܢ ܠܰܡܫܺܝܚܰܝ̈. ܘܰܠܢܒܺܝܰܝ̈ ܠܳܐ ܬܰܒܐܫܽܘܢ.
23 ܫܰܒܰܚܘ ܠܡܳܪܝܳܐ ܟܽܠܳܗ̇ ܐܰܪܥܳܐ. ܣܰܒܰܪܘ ܟܽܠܝܽܘܡ ܒܝܽܘܡ ܦܽܘܪܩܳܢܶܗ.
24 ܐܶܫܬܰܥܰܘ ܒܶܝܬ ܥܰܡ̈ܡܶܐ ܐܺܝܩܳܪܶܗ.
25 ܡܶܛܽܠ ܕܪܰܒ ܗܽܘ ܡܳܪܝܳܐ ܘܰܫܒܺܝܚ ܛܳܒ. ܘܰܕܚܺܝܠ ܗܽܘ ܥܰܠ ܟܽܠܗܽܘܢ ܡܰܠ̈ܟܶܐ.
26 ܡܶܛܽܠ ܕܟܽܠܗܽܘܢ ܦܬܰܟܖ̈ܶܐ ܕܥܰܡ̈ܡܶܐ ܨܰܠ̈ܡܶܐ ܐܶܢܽܘܢ. ܘܡܳܪܝܳܐ ܫܡܰܝܳܐ ܥܒܰܕ.
27 ܬܶܫܒܽܘܚܬܳܐ ܘܝܳܐܝܽܘܬܳܐ ܩܕܳܡܰܘܗܝ. ܥܽܘܫܢܳܐ ܘܪܰܒܽܘܬܳܐ ܒܡܰܩܕܫܶܗ.
28 ܐܰܘܕܰܘ ܠܡܳܪܝܳܐ ܫܰܖ̈ܒܳܬܳܐ ܕܥܰܡ̈ܡܶܐ. ܐܰܘܕܰܘ ܩܕܳܡ ܡܳܪܝܳܐ ܒܺܐܝܩܳܪܶܗ ܘܰܒܥܽܘܫܢܶܗ.
29 ܐܰܘܕܰܘ ܠܡܳܪܝܳܐ ܒܺܐܝܩܳܪܳܐ ܕܰܫܡܶܗ. ܫܩܽܘܠܘ ܩܽܘܖ̈ܒܳܢܶܐ. ܘܰܐܘܕܰܘ ܩܕܳܡܰܘܗܝ ܒܰܨܠܽܘܬܳܐ ܕܦܽܘܡܟܽܘܢ ܘܰܣܓܽܘܕ ܠܡܳܪܝܳܐ ܒܬܶܫܒ̈ܚܳܬܳܐ ܕܩܽܘܕܫܳܐ.
30 ܬܙܽܘܥ ܡܶܢ ܩܕܳܡܰܘܗܝ ܟܽܠܳܗ̇ ܐܰܪܥܳܐ. ܘܬܶܬܩܰܢ ܬܺܒܶܝܠ ܕܠܳܐ ܬܙܽܘܥ.
31 ܢܶܚܕܽܘܢ ܫܡܰܝܳܐ. ܘܰܬܫܰܒܰܚ ܐܰܪܥܳܐ. ܘܢܺܐܡܪܽܘܢ ܒܶܝܬ ܥܰܡ̈ܡܶܐ. ܡܳܪܝܳܐ ܐܰܡܠܶܟ.
32 ܢܫܰܒܰܚ ܝܰܡܳܐ ܒܰܡܠܳܐܶܗ ܘܢܶܚ̈ܕܝܳܢ ܚܰܩ̈ܠܳܬܳܐ ܘܟܽܠ ܕܺܐܝܬ ܒܗܶܝܢ.
33 ܗܳܝܕܶܝܢ ܢܫܰܒܚܽܘܢ ܐܺܝ̈ܠܳܢܶܐ ܕܥܳܒܳܐ. ܡܶܢ ܩܕܳܡ ܡܳܪܝܳܐ ܕܳܐܬܶܐ ܠܰܡܕܳܢܳܗ̇ ܠܰܐܪܥܳܐ. ܢܕܽܘܢ ܬܺܒܶܝܠ ܒܟܺܐܢܽܘܬܳܐ. ܘܢܰܟܶܣ ܠܥܰܡ̈ܡܶܐ ܒܗܰܝܡܳܢܽܘܬܳܐ.
34 ܘܶܐܡܰܪ. ܐܰܘܕܰܘ ܠܡܳܪܝܳܐ ܕܛܳܒ ܗܽܘ. ܘܰܠܥܳܠܰܡ ܛܰܝܒܽܘܬܶܗ.
35 ܦܪܽܘܩܰܝܢ ܡܳܪܝܳܐ. ܦܪܽܘܩܰܝܢ ܘܟܰܢܶܫܰܝܢ. ܘܩܰܪܶܒܰܝܢ ܡܶܢ ܒܶܝܬ ܥܰܡ̈ܡܶܐ. ܠܡܰܘܕܳܝܽܘ ܠܰܫܡܳܐ ܕܩܽܘܕܫܳܟ. ܘܠܰܡܫܰܒܳܚܽܘ ܬܶܫܒ̈ܚܳܬܳܟ.
36 ܒܪܺܝܟ ܡܳܪܶܐ ܡܳܖ̈ܰܘܳܬܳܐ ܕܺܝܣܪܳܐܶܝܠ. ܡܶܢ ܥܳܠ̈ܡܶܐ ܘܰܥܕܰܡܳܐ ܠܥܳܠ̈ܡܶܐ. ܘܢܺܐܡܰܪ ܟܽܠܶܗ ܥܰܡܳܐ ܐܰܡܺܝܢ. ܒܦܽܘܡܳܐ ܒܰܣܺܝܡܳܐ ܘܕܰܟܝܳܐ. ܢܫܰܒܚܽܘܢ ܠܰܐܠܳܗܗܽܘܢ.
37 ܘܰܫܒܰܩ ܬܰܡܳܢ ܩܕܳܡ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ. ܠܳܐܣܳܦ ܘܠܰܐܚܰܘ̈ܗܝ. ܠܰܡܫܰܡܳܫܽܘ ܩܕܳܡ ܡܳܪܝܳܐ ܐܰܡܺܝܢܳܐܺܝܬ. ܐ̱ܢܳܫ ܐ̱ܢܳܫ ܒܝܰܘܡܶܗ.
38 ܘܥܽܘܒܳܪ ܐܰܕܽܘܡ ܘܰܐܚܰܘ̈ܗܝ ܫܬܺܝܢ ܘܰܬܡܳܢܝܳܐ ܘܥܽܘܒܳܪ ܐܰܕܽܘܡ ܙܥܽܘܪܳܐ ܒܪܶܗ ܕܝܽܘܬܳܡ. ܘܚܳܣܽܘ ܗܳܠܶܝܢ ܟܽܠܗܽܘܢ ܢܳܛܖ̈ܰܝ ܬܰܖ̈ܥܶܐ ܒܰܖ̈ܳܝܶܐ.
39 ܘܨܳܕܽܘܩ ܟܳܗܢܳܐ. ܘܰܐܚܰܘ̈ܗܝ ܟܳܗ̈ܢܶܐ. ܗܳܠܶܝܢ ܟܽܠܗܽܘܢ ܟܳܗ̈ܢܶܐ ܕܰܡܫܰܡܫܺܝܢ ܩܕܳܡ ܡܰܫܟܢܶܗ ܕܡܳܪܝܳܐ. ܒܒܽܘܣܳܡܳܐ ܪܰܒܳܐ ܒܩܽܘܪܝܰܬ ܓܶܒܥܽܘܢ.
40 ܠܰܡܩܰܪܳܒܽܘ ܥܠܰܘ̈ܳܬܳܐ ܠܡܳܪܝܳܐ ܥܰܠ ܡܰܕܒܚܳܐ ܕܰܥܠܳܬܳܐ. ܐܰܡܺܝܢܳܐܺܝܬ ܒܨܰܦܪܳܐ ܘܰܒܪܰܡܫܳܐ. ܘܰܠܡܶܥܒܰܕ ܟܽܠ ܡܳܐ ܕܰܟܬܺܝܒ ܒܢܳܡܽܘܣܳܐ ܕܡܳܪܝܳܐ. ܕܝܰܗܒ ܥܰܠ ܐܺܝܕܳܐ ܕܡܽܘܫܶܐ. ܠܡܰܠܳܦܽܘ ܠܰܒܢܰܝ̈ ܝܺܣܪܳܐܶܝܠ.
41 ܘܗܳܠܶܝܢ ܫܡܳܗ̈ܶܐ ܕܓܰܒܖ̈ܶܐ ܕܩܳܝܡܺܝܢ ܒܬܶܫܒ̈ܚܳܬܳܐ. ܗܳܡܳܢ ܘܳܐܪܺܝܬܽܘܢ. ܘܫܰܪܟܳܐ ܕܐ̱ܢܳܫ̈ܳܐ ܙܰܕܺܝ̈ܩܶܐ ܐܰܝܠܶܝܢ ܕܶܐܬܟܰܣܺܝܘ ܫܡܳܗܰܝ̈ܗܽܘܢ. ܠܡܰܘܕܳܝܽܘ ܠܡܳܪܝܳܐ ܡܶܛܽܠ ܕܰܠܥܳܠܰܡ ܛܰܝܒܽܘܬܶܗ.
42 ܘܗܶܢܽܘܢ ܗܳܠܶܝܢ ܐ̱ܢܳܫ̈ܳܐ ܙܰܕܺܝ̈ܩܶܐ ܡܫܰܒܚܺܝܢ ܗܘܰܘ. ܠܳܐ ܗܘܳܐ ܒܡܳܐܢܰܝ̈ ܬܶܫܒ̈ܚܳܬܳܐ. ܘܠܳܐ ܒܰܦ̈ܠܰܓܶܐ. ܘܠܳܐ ܒܰܖ̈ܒܺܝܥܶܐ. ܘܠܳܐ ܒܩܰܖ̈ܢܳܬܳܐ ܟܦܺܝ̈ܦܳܬܳܐ. ܘܳܐܦܠܳܐ ܒܰܦܫܺܝ̈ܛܳܬܳܐ. ܘܳܐܦܠܳܐ ܒܨܶܨ̈ܠܶܐ ܡܫܰܒܚܺܝܢ ܗܘܰܘ. ܐܶܠܳܐ ܒܦܽܘܡܳܐ ܒܰܣܺܝܡܳܐ. ܘܒܰܨܠܽܘܬܳܐ ܕܟܺܝܬܳܐ ܘܰܡܫܰܡܠܰܝܬܳܐ. ܘܰܒܟܺܐܢܽܘܬܳܐ ܘܰܒܬܰܡܺܝܡܽܘܬܳܐ. ܠܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܡܳܪܶܗ ܕܺܝܣܪܳܐܶܝܠ. ܡܳܪܳܐ ܕܟܽܠܗܽܘܢ ܥܰܒܕ̈ܶܐ.
43 ܘܰܫܪܳܐ ܕܰܘܺܝܕ ܠܥܰܡܳܐ. ܘܶܐܙܰܠܘ ܥܰܡܳܐ ܐ̱ܢܳܫ ܐ̱ܢܳܫ ܠܒܰܝܬܶܗ ܘܰܗܦܰܟ ܕܰܘܺܝܕ ܠܒܰܝܬܶܗ ܠܰܡܒܰܪܳܟܽܘ ܠܰܒܢܰܝ̈ ܒܰܝܬܶܗ.