1 Chronicles 19
The first Book of Chronicles
܀ ܐ ܕܘܒܪ ܝܘܡ̈ܬܐ ܝܛ ܀
1 ܘܰܗܘܳܐ ܡܶܢ ܒܳܬܰܪ ܗܳܠܶܝܢ. ܘܡܺܝܬ ܢܳܚܳܫ ܡܰܠܟܳܐ ܕܰܒܢܰܝ̈ ܥܰܡܽܘܢ ܘܰܐܡܠܶܟ ܚܳܢܽܘܢ ܒܪܶܗ ܒܳܬܪܶܗ.
2 ܘܶܐܡܰܪ ܕܰܘܺܝܕ. ܡܶܥܒܰܕ ܐܶܥܒܶܕ ܚܶܣܕܳܐ ܥܰܡ ܚܳܢܽܘܢ ܒܰܪ ܢܳܚܳܫ. ܐܰܝܟܰܢܳܐ ܕܰܥܒܰܕ ܐܰܒܽܘܗܝ ܥܰܡܝ ܚܶܣܕܳܐ ܘܫܰܕܰܪ ܕܰܘܺܝܕ ܐܺܝܙܓܰܕ̈ܶܐ ܠܰܡܒܰܝܳܐܽܘܬܶܗ ܥܰܠ ܐܰܒܽܘܗܝ ܘܶܐܬܰܘ ܥܰܒܕܰܘ̈ܗܝ ܕܕܰܘܺܝܕ ܠܰܐܪܥܳܐ ܕܰܒܢܰܝ̈ ܥܰܡܽܘܢ. ܠܘܳܬ ܚܳܢܽܘܢ ܠܰܡܒܰܝܳܐܽܘܬܶܗ.
3 ܘܳܐܡܪܺܝܢ ܪܰܘܖ̈ܒܳܢܶܐ ܕܰܒܢܰܝ̈ ܥܰܡܽܘܢ ܠܚܳܢܽܘܢ ܡܳܪܗܽܘܢ. ܡܝܰܩܳܪܽܘ ܡܝܰܩܰܪ ܗܘܳܐ ܕܰܘܺܝܕ ܠܰܐܒܽܘܟ ܒܚܰܝܰܘ̈ܗܝ ܡܶܛܽܠ ܕܗܳܐ ܫܰܕܰܪ ܠܳܟ ܡܒܰܝ̈ܐܳܢܶܐ. ܡܶܛܽܠ ܕܰܠܡܶܓܰܫ ܡܕܺܝܢܬܳܐ. ܘܰܠܡܶܕܰܥ ܡܰܦܩܳܢ̈ܶܐ ܘܡܰܥܠܳܢ̈ܶܐ. ܫܰܕܰܪ ܕܰܘܺܝܕ ܥܰܒܕܰܘ̈ܗܝ ܠܘܳܬܰܢ.
4 ܘܰܕܒܰܪ ܚܳܢܽܘܢ ܠܥܰܒܕܰܘ̈ܗܝ ܕܕܰܘܺܝܕ. ܘܰܓܪܰܥ ܦܶܠܓܽܘܬ ܕܰܩܢܰܝ̈ܗܽܘܢ. ܘܦܶܠܓܽܘܬ ܖ̈ܺܝܫܰܝܗܽܘܢ. ܘܩܰܕܶܕ ܟܽܘܬܺܝܢ̈ܝܳܬܗܽܘܢ. ܥܕܰܡܳܐ ܠܰܟܢܽܘܬ ܫܶܖ̈ܰܝܗܽܘܢ. ܘܫܰܕܰܪ ܐܶܢܽܘܢ.
5 ܘܚܰܘܺܝܘ ܠܕܰܘܺܝܕ. ܘܫܰܕܰܪ ܠܽܐܘܪܥܗܽܘܢ ܕܓܰܒܖ̈ܶܐ. ܡܶܛܽܠ ܕܒܰܗܺܝܬܺܝܢ ܗܘܰܘ. ܘܶܐܡܰܪ ܠܗܽܘܢ ܡܰܠܟܳܐ. ܬܶܒܘ ܒܺܐܝܪܺܝܚܽܘ ܥܕܰܡܳܐ ܠܰܐܝܟܳܐ ܕܢܺܐܥܽܘܢ ܕܰܩܢܰܝ̈ܟܽܘܢ. ܘܬܶܗܦܟܽܘܢ.
6 ܘܰܚܙܰܘ ܒܢܰܝ̈ ܥܰܡܽܘܢ ܕܰܐܣܟܶܠܘ ܒܥܰܒܕܰܘ̈ܗܝ ܕܕܰܘܺܝܕ ܘܫܰܕܰܪ ܚܳܢܽܘܢ ܘܰܒܢܰܝ̈ ܥܰܡܽܘܢ ܠܡܶܐܓܰܪ ܠܗܽܘܢ ܒܳܐܠܶܦ ܟܰܟܖ̈ܺܝܢ ܕܟܶܣܦܳܐ. ܡܶܢ ܐܳܪܳܡ ܢܰܗܖ̈ܺܝܢ. ܘܡܶܢ ܚܳܪܳܢ. ܘܡܶܢ ܢܨܺܝܒܺܝܢ. ܘܡܶܢ ܐܰܕܽܘܡ. ܙܰܘ̈ܓܶܐ ܘܦܰܖ̈ܳܫܶܐ.
7 ܘܶܐܓܰܪܘ ܠܗܽܘܢ ܬܠܳܬܺܝܢ ܘܰܬܪܶܝܢ ܐܰܠܦܺܝ̈ܢ ܦܰܖ̈ܳܫܺܝܢ. ܘܰܠܡܰܠܟܳܐ ܕܚܳܪܳܢ. ܘܰܠܡܰܠܟܳܐ ܕܰܐܕܽܘܡ. ܘܰܠܡܰܠܟܳܐ ܕܳܐܪܳܡ ܢܰܗܪܺܝܢ. ܘܰܠܡܰܠܟܳܐ ܕܰܢܨܺܝܒܺܝܢ. ܘܰܠܚܰܝ̈ܠܘܳܬܗܽܘܢ ܘܶܐܬܰܘ ܘܰܫܪܰܘ ܩܕܳܡ ܡܰܐܕܒܳܐ. ܘܰܒܢܰܝ̈ ܥܰܡܽܘܢ ܐܶܬܟܰܢܰܫܘ ܡܶܢ ܩܽܘܖ̈ܺܝܗܽܘܢ. ܘܶܐܬܰܘ ܠܰܩܪܳܒܳܐ.
8 ܘܰܫܡܰܥ ܕܰܘܺܝܕ. ܘܫܰܕܰܪ ܠܝܽܘܐܳܒ. ܘܰܠܟܽܠ ܚܰܝ̈ܠܘܳܬܐ ܕܓܰܢ̱ܒܳܖ̈ܶܐ.
9 ܘܰܢܦܰܩܘ ܒܢܰܝ̈ ܥܰܡܽܘܢ. ܘܰܥܒܰܕܘ ܩܪܳܒܳܐ ܩܕܳܡ ܬܰܪܥܳܐ. ܘܗܳܠܶܝܢ ܡܰܠ̈ܟܶܐ ܗܶܢܽܘܢ ܘܚܰܝ̈ܠܘܳܬܗܽܘܢ ܫܪܶܝܢ ܗܘܰܘ ܒܰܠܚܽܘܕܰܝܗܽܘܢ ܒܚܰܩ̈ܠܳܬܳܐ.
10 ܘܰܚܙܳܐ ܝܽܘܐܳܒ ܕܰܥܫܶܢ ܥܠܰܘܗܝ ܩܪܳܒܳܐ. ܡܶܢ ܩܕܳܡܰܘܗܝ ܘܡܶܢ ܒܶܣܬܪܶܗ. ܘܰܓܒܳܐ ܠܶܗ ܡܶܢ ܟܽܠܗܽܘܢ ܓܰܢ̱ܒܳܖ̈ܶܐ ܕܺܝܣܪܳܐܶܝܠ. ܘܰܥܒܰܕ ܩܪܳܒܳܐ ܠܽܘܩܒܰܠ ܐܰܕܽܘܡ.
11 ܘܫܰܪܟܳܐ ܕܥܰܡܳܐ. ܐܰܫܠܶܡ ܠܰܐܒܺܝܫܺܝ ܐܰܚܽܘܗܝ. ܘܰܣܕܰܪ ܠܽܘܩܒܰܠ ܒܢܰܝ̈ ܥܰܡܽܘܢ.
12 ܘܶܐܡܰܪ ܠܶܗ. ܐܶܢܗܽܘ ܕܢܶܬܩܰܦ ܡܶܢܝ ܐܰܕܽܘܡ. ܬܺܐܬܶܐ ܬܦܰܨܶܝܢܝ ܘܶܐܢ ܒܢܰܝ̈ ܥܰܡܽܘܢ ܢܶܬܩܦܽܘܢ ܡܶܢܳܟ. ܐܺܬܶܐ ܘܶܐܦܰܨܶܝܟ ܡܶܢܗܽܘܢ.
13 ܬܩܰܦ. ܘܬܶܬܩܰܦ ܡܶܢܗܽܘܢ܆ ܥܰܠ ܐܰܦܰܝ̈ ܥܰܡܰܢ. ܘܥܰܠ ܐܰܦܰܝ̈ ܩܽܘܖ̈ܝܳܐ ܕܰܐܠܳܗܳܐ. ܘܡܳܪܝܳܐ ܢܶܥܒܶܕ ܡܶܕܶܡ ܕܫܰܦܺܝܪ ܒܥܰܝܢܰܘ̈ܗܝ.
14 ܘܰܩܪܶܒ ܝܽܘܐܳܒ ܘܥܰܡܳܐ ܕܺܐܝܬ ܥܰܡܶܗ. ܠܡܶܬܟܰܬܳܫܽܘ ܥܰܡ ܐܰܕܽܘܡܳܝ̈ܶܐ. ܘܰܥܪܰܩܘ ܡܶܢ ܩܕܳܡܰܘܗܝ.
15 ܘܰܒܢܰܝ̈ ܥܰܡܽܘܢ ܚܙܰܘ ܕܰܥܪܰܩܘ ܐܰܕܽܘܡܳܝ̈ܶܐ. ܘܰܥܪܰܩܘ ܐܳܦ ܗܶܢܽܘܢ ܡܶܢ ܩܕܳܡ ܐܰܒܺܝܫܰܝ ܐܰܚܽܘܗܝ. ܘܶܐܬܰܘ ܠܰܩܪܺܝܬܳܐ. ܘܰܗܦܰܟ ܝܽܘܐܳܒ ܠܽܐܘܪܺܫܠܶܡ.
16 ܘܰܚܙܰܘ ܐܰܕܽܘܡܳܝ̈ܶܐ ܕܶܐܬܬܒܰܪܘ ܩܕܳܡ ܒܢܰܝ̈ ܝܺܣܪܳܐܶܝܠ. ܘܫܰܕܰܪܘ ܐܺܝܙܓܰܕ̈ܶܐ. ܘܰܐܦܶܩܘ ܠܰܐܕܽܘܡܳܝ̈ܶܐ ܕܺܐܝܬ ܡܶܢ ܥܒܳܪ ܢܰܗܪܳܐ. ܘܶܐܬܰܘ ܠܚܺܝܠܰܡ. ܘܰܫܒܽܘܟ ܪܰܒ ܚܰܝܠܶܗ ܕܰܗܕܰܪܥܙܰܪ ܩܕܳܡܰܝܗܽܘܢ.
17 ܘܚܰܘܺܝܘ ܠܕܰܘܺܝܕ. ܘܟܰܢܶܫ ܠܟܽܠܶܗ ܝܺܣܪܳܐܶܝܠ. ܘܶܐܬܳܐ ܥܠܰܝܗܽܘܢ ܘܰܣܕܰܪ ܕܰܘܺܝܕ ܠܽܘܩܒܰܠ ܐܰܕܽܘܡܳܝ̈ܶܐ ܩܪܳܒܳܐ. ܘܶܐܬܟܰܬܰܫ ܥܰܡܗܽܘܢ.
18 ܘܰܥܪܰܩܘ ܐܰܕܽܘܡܳܝ̈ܶܐ ܡܶܢ ܩܕܳܡ ܒܢܰܝ̈ ܝܺܣܪܳܐܶܝܠ ܘܰܚܪܰܒ ܕܰܘܺܝܕ ܒܰܐܕܽܘܡܳܝ̈ܶܐ. ܫܰܒܥܳܐ ܐܰܠܦܺܝ̈ܢ ܙܰܘ̈ܓܺܝܢ. ܘܰܐܪܒܥܳܐ ܐܰܠܦܺܝ̈ܢ ܓܰܒܖ̈ܶܐ ܖ̈ܶܓܠܳܝܶܐ. ܘܰܫܒܽܘܟ ܪܰܒ ܚܰܝܠܶܗ ܕܰܗܕܰܪܥܙܰܪ ܐܶܬܩܛܶܠ ܬܰܡܳܢ.
19 ܘܰܚܙܰܘ ܥܰܒܕܰܘ̈ܗܝ ܕܰܗܕܰܪܥܙܰܪ ܕܶܐܬܬܒܰܪܘ ܩܕܳܡ ܒܢܰܝ̈ ܝܺܣܪܳܐܶܝܠ ܘܰܐܫܠܶܡܘ ܠܕܰܘܺܝܕ. ܘܦܰܠܚܽܘܗܝ. ܘܠܳܐ ܨܒܰܘ ܐܰܕܽܘܡܳܝ̈ܶܐ ܠܰܡܥܰܕܳܪܽܘ ܬܽܘܒ ܠܰܒܢܰܝ̈ ܥܰܡܽܘܢ.