1 Chronicles 13
The first Book of Chronicles
܀ ܐ ܕܘܒܪ ܝܘܡ̈ܬܐ ܝܓ ܀
1 ܘܶܐܬܡܰܠܰܟ ܕܰܘܺܝܕ ܥܰܡ ܪܰܘܖ̈ܒܳܢܶܐ ܕܰܐܠܦ̈ܶܐ ܘܡܰܐܘ̈ܳܬܳܐ. ܘܟܽܠܗܽܘܢ ܪܰܘܖ̈ܒܳܢܶܐ ܘܫܰܠܺܝܛܳܢ̈ܶܐ ܕܺܝܣܪܳܐܶܝܠ.
2 ܘܶܐܡܰܪ ܕܰܘܺܝܕ ܠܟܽܠܗܽܘܢ ܟܢܽܘ̈ܫܳܬܳܐ ܕܺܝܣܪܳܐܶܝܠ. ܐܶܢܗܽܘ ܕܫܰܦܺܝܪ ܒܥܰܝܢܰܝ̈ܟܽܘܢ. ܢܶܒܥܶܐ ܡܶܢ ܡܳܪܝܳܐ ܐܰܠܳܗܰܢ. ܘܰܢܣܺܝܓ ܠܰܢ ܬܽܘܖ̈ܥܳܬܳܐ ܕܰܐܚܰܝ̈ܢ ܕܩܳܝܡܺܝܢ ܒܟܽܠܗܶܝܢ ܩܽܘܖ̈ܝܳܐ ܕܺܝܣܪܳܐܶܝܠ. ܘܢܰܘܬܶܒ ܥܰܡܗܽܘܢ ܟܳܗ̈ܢܶܐ ܘܠܶܘ̈ܳܝܶܐ. ܒܩܽܘܖ̈ܺܝܗܽܘܢ ܘܰܒܟܰܦܖ̈ܽܘܢܰܝܗܽܘܢ.
3 ܘܢܶܬܟܰܢܫܽܘܢ ܘܢܺܐܬܽܘܢ ܠܘܳܬܰܢ. ܘܰܢܨܰܠܽܘܢ ܩܕܳܡ ܡܳܪܝܳܐ. ܐܰܠܳܗܰܢ. ܘܢܶܒܥܶܐ ܡܶܢܶܗ ܥܰܠ ܚܛܳܗܰܝ̈ܢ. ܡܶܛܽܠ ܕܠܳܐ ܨܰܠܺܝܢ ܗܘܰܝܢ ܩܕܳܡܰܘܗܝ ܒܝܰܘ̈ܡܳܬܳܐ ܕܫܳܐܘܳܠ.
4 ܘܳܐܡܖ̈ܳܢ ܟܽܠܗܶܝܢ ܟܢܽܘ̈ܫܳܬܳܐ ܠܡܶܥܒܰܕ ܗܳܟܰܢܳܐ.
5 ܘܟܰܢܶܫ ܕܰܘܺܝܕ ܠܟܽܠܶܗ ܝܺܣܪܳܐܶܝܠ. ܡܶܢ ܢܰܗܪܳܐ ܕܡܶܨܪܶܝܢ. ܘܰܥܕܰܡܳܐ ܠܡܰܥܠܳܢܳܐ ܕܰܐܢܛܺܝܽܘܟܺܝ. ܠܡܰܝܬܳܝܽܘ ܩܺܐܒܽܘܬܶܗ ܕܡܳܪܝܳܐ. ܡܶܢ ܩܽܘܪܝܰܬ ܢܰܥܪܺܝܢ.
6 ܘܰܣܠܶܩ ܕܰܘܺܝܕ ܘܟܽܠܶܗ ܝܺܣܪܳܐܶܝܠ ܠܩܽܘܪܝܰܬ ܢܰܥܪܺܝܢ. ܕܺܐܝܬ ܒܰܬܚܽܘܡ ܐܰܪܰܥ ܫܰܒܛܳܐ ܕܺܝܗܽܘܕܳܐ. ܠܡܰܣܳܩܽܘ ܡܶܢ ܬܰܡܳܢ ܠܩܺܐܒܽܘܬܶܗ ܕܡܳܪܝܳܐ ܐܰܠܳܗܳܐ ܕܝܳܬܶܒ ܥܰܠ ܟܖ̈ܽܘܒܶܐ ܥܶܠܳܝ̈ܶܐ. ܕܶܐܬܩܪܺܝ ܫܡܶܗ ܥܠܰܝܗܽܘܢ.
7 ܘܣܳܡܘ ܩܺܐܒܽܘܬܶܗ ܕܡܳܪܝܳܐ ܒܰܥܓܶܠܬܳܐ ܚܕܰܬܳܐ. ܘܫܰܩܠܽܘܗ̇ ܘܰܢܦܰܩܘ ܡܶܢ ܒܶܝܬ ܐܰܒܺܝܢܳܕܳܒ. ܘܥܰܙܳܐ ܘܰܐܚܰܘ̈ܗܝ. ܕܳܒܪܺܝܢ ܗܘܰܘ ܠܥܓܶܠܬܳܐ.
8 ܘܕܰܘܺܝܕ ܘܟܽܠܶܗ ܝܺܣܪܳܐܶܝܠ. ܡܫܰܒܚܺܝܢ ܗܘܰܘ ܩܕܳܡ ܡܳܪܝܳܐ. ܒܥܰܫܺܝܢܽܘܬܳܐ. ܘܰܒܬܶܫܒ̈ܚܳܬܳܐ. ܘܰܒܟܶܢܳܖ̈ܶܐ. ܘܰܒܢܰܒ̈ܠܶܐ. ܘܨܶܨ̈ܠܶܐ. ܘܒܰܖ̈ܒܺܝܥܶܐ.
9 ܘܶܐܬܰܘ ܠܶܐܕܪܳܐ ܕܰܪܡܺܝܢ. ܘܰܐܘܫܶܛ ܥܰܙܳܐ ܐܺܝܕܶܗ. ܠܡܶܣܡܟܳܗ̇ ܠܩܺܐܒܽܘܬܳܐ. ܡܶܛܽܠ ܕܰܪܗܶܛܘ ܗܘܰܘ ܠܗܽܘܢ ܬܰܘܖ̈ܶܐ ܠܶܐܕܪܳܐ.
10 ܘܶܐܬܚܰܡܰܬ ܡܳܪܝܳܐ ܥܰܠ ܥܰܙܳܐ. ܘܰܡܚܳܝܗܝ ܗܘܳܐ ܬܰܡܳܢ. ܥܰܠ ܕܰܐܘܫܶܛ ܗܘܳܐ ܐܺܝܕܶܗ ܥܰܠ ܩܺܐܒܽܘܬܳܐ. ܘܡܺܝܬ ܬܰܡܳܢ ܩܕܳܡܶܝܗ̇ ܕܩܺܐܒܽܘܬܳܐ.
11 ܘܟܶܪܝܰܬ ܗܘܳܬ ܠܕܰܘܺܝܕ. ܡܶܛܽܠ ܕܰܬܪܰܥ ܗܘܳܐ ܡܳܪܝܳܐ ܬܽܘܪܰܥܬܳܐ ܒܥܰܙܳܐ. ܘܶܐܬܩܰܪܝܰܬ ܕܽܘܟܬܳܐ ܗܳܝ ܬܽܘܪܰܥܬܳܐ ܕܥܰܙܳܐ ܥܕܰܡܳܐ ܠܝܰܘܡܳܢܳܐ.
12 ܘܰܕܚܶܠ ܗܘܳܐ ܕܰܘܺܝܕ ܡܶܢ ܡܳܪܝܳܐ. ܒܝܰܘܡܳܐ ܗܰܘ. ܘܶܐܡܰܪ. ܐܰܝܟܰܢܳܐ ܐܰܥܶܠ ܠܘܳܬܝ ܩܺܐܒܽܘܬܶܗ ܕܡܳܪܝܳܐ.
13 ܘܠܳܐ ܨܒܳܐ ܗܘܳܐ ܕܰܘܺܝܕ ܕܬܶܥܽܘܠ ܠܘܳܬܶܗ ܩܺܐܒܽܘܬܳܐ ܠܰܩܪܺܝܬܳܐ ܕܕܰܘܺܝܕ. ܘܶܐܡܰܪ ܕܰܘܺܝܕ ܕܢܰܘܒܠܽܘܢܳܗ̇ ܠܒܰܝܬܶܗ ܕܥܽܘܒܳܪ ܐܰܕܽܘܡ ܓܳܬܳܝܳܐ.
14 ܘܝܶܬܒܰܬ ܩܺܐܒܽܘܬܶܗ ܕܡܳܪܝܳܐ ܒܒܰܝܬܶܗ ܕܥܽܘܒܳܪ ܐܰܕܽܘܡ ܓܳܬܳܝܳܐ ܬܠܳܬܳܐ ܝܰܖ̈ܚܺܝܢ. ܘܒܰܪܶܟ ܡܳܪܝܳܐ ܠܒܰܝܬܶܗ ܕܥܽܘܒܳܪ ܐܰܕܽܘܡ ܓܳܬܳܝܳܐ. ܘܰܠܟܽܠ ܡܶܕܶܡ ܕܺܐܝܬ ܠܶܗ.