1 Chronicles 23
The first Book of Chronicles
܀ ܐ ܕܘܒܪ ܝܘܡ̈ܬܐ ܟܓ ܀
1 ܘܕܰܘܺܝܕ ܩܰܫ ܘܰܣܒܰܥ ܒܝܰܘ̈ܡܳܬܶܗ. ܘܰܐܩܺܝܡ ܠܰܫܠܶܝܡܽܘܢ ܒܪܶܗ ܒܡܰܠܟܽܘܬܳܐ ܥܰܠ ܝܺܣܪܳܐܶܝܠ.
2 ܘܟܰܢܶܫ ܟܽܠܗܽܘܢ ܩܰܫܺܝ̈ܫܶܐ ܕܟܳܗ̈ܢܶܐ ܘܰܕܠܶܘ̈ܳܝܶܐ.
3 ܘܶܐܬܡܢܺܝܘ ܠܶܘ̈ܳܝܶܐ ܡܶܢ ܒܰܪ ܬܠܳܬܺܝܢ ܫܢܺܝ̈ܢ ܘܰܠܥܶܠ. ܘܰܗܘܳܐ ܡܶܢܝܳܢܳܐ ܕܓܰܒܖ̈ܶܐ ܠܪܺܝܫ ܐ̱ܢܳܫ. ܬܠܳܬܺܝܢ ܘܰܬܡܳܢܝܳܐ ܐܰܠܦܺܝ̈ܢ.
4 ܘܰܐܩܺܝܡ ܡܶܢܗܽܘܢ ܕܰܘܺܝܕ ܫܰܠܺܝܛܳܢ̈ܶܐ ܥܰܠ ܥܒܺܝ̈ܕܳܬܳܐ ܕܒܰܝܬܶܗ ܕܡܳܪܝܳܐ. ܥܶܣܪܺܝܢ ܘܰܐܪܒܥܳܐ ܓܰܒܖ̈ܺܝܢ ܥܰܠ ܐܳܠܶܦ. ܘܕܰܝܳܢ̈ܶܐ ܘܣܳܦܖ̈ܶܐ. ܫܬܳܐ ܫܬܳܐ ܥܰܠ ܡܰܐܬܳܐ.
5 ܕܢܶܗܘܽܘܢ ܚܳܙܶܝܢ ܒܶܢܝܳܢܳܐ. ܘܩܳܝܡܺܝܢ ܘܪܳܗܛܺܝܢ ܒܚܰܝܠܗܽܘܢ. ܘܰܒܡܰܖ̈ܗܳܛܰܝܗܽܘܢ. ܘܒܰܥܒܺܝ̈ܕܳܬܗܽܘܢ. ܘܰܒܚܽܘܫܒܳܢܰܝ̈ܗܽܘܢ. ܘܰܒܢܶܟܣܰܝ̈ܗܽܘܢ. ܘܰܒܙܶܕܩ̈ܳܬܳܐ. ܕܢܶܗܘܽܘܢ ܡܦܰܪܢܣܺܝܢ ܡܶܣܟܺܢ̈ܶܐ ܘܰܐܩܺܝܡ ܕܰܘܺܝܕ ܥܰܠ ܡܶܣܟܺܢ̈ܶܐ ܘܥܰܠ ܒܳܝܫ̈ܶܐ. ܡܦܰܖ̈ܢܣܳܢܶܐ. ܘܩܳܝܽܘ̈ܡܶܐ. ܕܢܶܗܘܽܘܢ ܙܳܝܢܺܝܢ ܘܰܡܦܰܪܢܣܺܝܢ ܡܶܣܟܺܢ̈ܶܐ. ܚܰܕ ܥܰܠ ܥܶܣܪܳܐ. ܘܡܶܕܶܡ ܠܳܐ ܡܚܰܣܪܺܝܢ ܠܗܽܘܢ.
6 ܘܰܐܩܺܝܡ ܐܶܢܽܘܢ ܕܰܘܺܝܕ ܠܟܽܠܗܽܘܢ ܒܫܽܘܠܛܳܢܰܝ̈ܗܽܘܢ. ܠܰܒܢܰܘ̈ܗܝ ܕܠܶܘܺܝ. ܓܶܪܫܽܘܢ. ܩܳܗܳܬ. ܘܡܶܪܰܪܺܝ.
7 ܠܓܶܪܫܽܘܢ. ܠܰܥܕܳܢ. ܘܫܶܡܥܺܝ.
8 ܘܰܒܢܰܘ̈ܗܝ ܕܠܰܥܕܳܢ. ܩܰܫܺܝܫܶܗ ܢܰܚܠܳܐܶܝܠ. ܘܝܽܘܬܳܡ. ܘܝܽܘܐܶܝܠ. ܬܠܳܬܳܐ.
9 ܒܢܰܘ̈ܗܝ ܕܫܡܰܥܝܳܐ. ܣܰܠܡܽܘܬ. ܘܰܚܙܳܐܝܠ. ܘܳܐܪܳܢ. ܬܠܳܬܳܐ ܗܳܠܶܝܢ ܖ̈ܺܝܫܰܝ ܐܰܒܳܗ̈ܳܬܳܐ ܕܫܶܡܥܺܝ.
10 ܒܢܰܘ̈ܗܝ ܕܫܶܡܥܺܝ. ܢܳܚܳܬ. ܙܰܒܕܳܐ. ܝܰܥܽܘܫ. ܒܪܺܝܥܳܐ. ܗܳܠܶܝܢ ܒܢܰܘ̈ܗܝ ܕܫܶܡܥܺܝ ܐܰܪܒܥܳܐ.
11 ܘܰܗܘܳܐ ܢܳܚܳܬ ܩܰܫܺܝܫܶܗ. ܘܙܰܒܕܳܐ ܬܶܢܝܳܢܳܐ. ܘܝܰܥܽܘܫ ܘܰܒܪܺܝܥܳܐ. ܘܰܒܪܺܝܥܳܐ ܠܳܐ ܐܰܣܓܺܝ ܠܶܗ ܒܢܰܝ̈ܳܐ. ܘܰܗܘܳܐ ܠܒܶܝܬ ܐܰܒܽܘܗܽܘܢ ܫܰܪܒܬܳܐ ܚܕܳܐ.
12 ܒܢܰܘ̈ܗܝ ܕܩܳܗܳܬ. ܥܰܡܪܰܡ. ܘܝܰܨܗܳܪ. ܘܚܶܒܪܽܘܢ. ܘܥܽܘܙܺܝܶܠ. ܐܰܪܒܥܳܐ.
13 ܒܢܰܘ̈ܗܝ ܕܥܰܡܪܰܡ. ܐܰܗܪܽܘܢ. ܘܡܽܘܫܶܐ. ܘܶܐܬܓܒܺܝ ܐܰܗܪܽܘܢ ܠܰܡܫܰܡܳܫܽܘ ܒܰܩܕܽܘܫ ܩܽܘܕ̈ܫܶܐ. ܗܽܘ ܘܰܒܢܰܘ̈ܗܝ ܥܕܰܡܳܐ ܠܥܳܠܰܡ. ܠܰܡܩܰܪܳܒܽܘ ܩܕܳܡ ܡܳܪܝܳܐ ܩܰܛܖ̈ܽܘܩܶܐ ܕܒܶܣ̈ܡܶܐ. ܠܰܡܫܰܡܳܫܽܘܬܶܗ ܘܠܰܡܒܰܪܳܟܽܘ ܒܰܫܡܶܗ ܥܕܰܡܳܐ ܠܥܳܠܰܡ.
14 ܘܡܽܘܫܶܐ ܢܒܺܝܳܐ ܕܡܳܪܝܳܐ. ܐܶܬܩܪܺܝ ܫܰܒܛܳܐ ܕܒܶܝܬ ܠܶܘܺܝ.
15 ܒܢܰܘ̈ܗܝ ܕܡܽܘܫܶܐ ܓܶܪܫܽܘܢ. ܘܶܐܠܺܝܥܳܙܳܪ.
16 ܒܢܰܘ̈ܗܝ ܕܓܶܪܫܽܘܢ. ܫܡܽܘܐܶܝܠ ܩܰܫܺܝܫܶܗ.
17 ܘܰܗܘܰܘ ܒܢܰܘ̈ܗܝ ܕܶܐܠܺܝܥܳܙܳܪ. ܐܰܪܚܺܝܡܳܐ ܩܰܫܺܝܫܶܗ. ܘܠܳܐ ܗܘܰܘ ܠܶܐܠܺܝܥܳܙܳܪ ܒܢܰܝ̈ܳܐ ܐ̱ܚܖ̈ܳܢܶܐ. ܘܰܒܢܰܘ̈ܗܝ ܕܰܐܪܚܺܝܡܳܐ. ܪܺܝܒܺܝ ܩܰܫܺܝܫܶܗ.
18 ܒܢܰܘ̈ܗܝ ܕܝܰܨܗܳܪ. ܣܰܠܡܽܘܬ ܩܰܫܺܝܫܶܗ.
19 ܒܢܰܘ̈ܗܝ ܕܚܶܒܪܽܘܢ. ܝܽܘܕܳܐ ܩܰܫܺܝܫܶܗ. ܐܶܡܰܪܝܳܐ ܬܶܢܝܳܢܳܐ. ܢܰܚܙܳܐܶܝܠ ܬܠܺܝܬܳܝܳܐ. ܢܰܩܡܳܐܶܝܠ ܪܒܺܝܥܳܝܳܐ.
20 ܒܢܰܘ̈ܗܝ ܕܥܰܙܝܳܐܶܝܠ. ܡܺܝܟܳܐ ܩܰܫܺܝܫܶܗ. ܫܽܘܚ ܬܶܢܝܳܢܳܐ.
21 ܒܢܰܘ̈ܗܝ ܕܡܶܪܰܪܺܝ. ܡܰܚܠܺܝ. ܘܡܽܘܫܺܝ ܒܢܰܘ̈ܗܝ ܕܡܰܚܠܺܝ. ܐܶܠܺܝܥܳܙܳܪ ܘܩܺܝܫ.
22 ܘܡܺܝܬ ܐܶܠܺܝܥܳܙܳܪ ܘܠܳܐ ܗܘܰܘ ܠܶܗ ܒܢܰܝ̈ܳܐ ܐܶܠܳܐ ܒܢ̈ܳܬܳܐ. ܘܰܢܣܰܒܘ ܐܶܢܶܝܢ ܒܢܰܘ̈ܗܝ ܕܩܺܝܫ ܕܳܕܗܶܝܢ.
23 ܒܢܰܘ̈ܗܝ ܕܡܽܘܫܺܝ. ܡܰܚܠܺܝ. ܘܥܳܕܳܪ. ܘܝܰܪܡܽܘܬ ܬܠܳܬܳܐ.
24 ܗܳܠܶܝܢ ܒܢܰܘ̈ܗܝ ܕܠܶܘܺܝ ܠܒܶܝܬ ܐܰܒܳܗܰܝ̈ܗܽܘܢ. ܖ̈ܺܝܫܰܝ ܐܰܒܳܗ̈ܳܬܳܐ ܠܡܶܢܝܳܢܗܽܘܢ ܒܡܶܢܝܳܢܳܐ ܕܰܫܡܳܗܰܝ̈ܗܽܘܢ. ܠܪܺܝܫ ܐ̱ܢܳܫ ܩܳܝܡܰܝ̈ ܥܰܠ ܥܒܺܝ̈ܕܳܬܳܐ ܕܒܰܝܬܶܗ ܕܡܳܪܝܳܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ.
25 ܡܶܛܽܠ ܕܶܐܡܰܪ ܕܰܘܺܝܕ. ܐܰܢܺܝܚ ܡܳܪܶܐ ܡܳܖ̈ܰܘܳܬܳܐ ܠܺܝܣܪܳܐܶܝܠ ܥܰܡܶܗ. ܘܰܫܪܳܐ ܒܽܐܘܪܺܫܠܶܡ. ܡܶܟܺܝܠ ܘܰܥܕܰܡܳܐ ܠܥܳܠܰܡ.
26 ܘܳܐܦ ܠܶܘ̈ܳܝܶܐ ܗܶܢܽܘܢ. ܢܶܫܩܠܽܘܢ ܡܰܫܟܢܳܐ. ܘܟܽܠܗܽܘܢ ܡܳܐܢܰܝ̈ ܥܒܺܝ̈ܕܳܬܶܗ.
27 ܡܶܛܽܠ ܕܰܒܡܶܠܰܘ̈ܗܝ ܕܕܰܘܺܝܕ ܐ̱ܚܖ̈ܳܝܳܬܳܐ. ܫܠܶܡ ܡܶܢܝܳܢܳܐ ܕܰܒܢܰܝ̈ ܠܶܘܺܝ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ.
28 ܡܶܛܽܠ ܕܰܐܩܺܝܡ ܐܶܢܽܘܢ ܥܰܠ ܓܶܢ̱ܒ̣ ܒܢܰܝ̈ ܐܰܗܪܽܘܢ. ܕܢܶܗܘܽܘܢ ܫܰܠܺܝܛܺܝܢ ܒܒܰܝܬܶܗ ܕܡܳܪܝܳܐ. ܥܰܠ ܐܰܝܠܶܝܢ ܕܩܳܪܶܝܢ ܒܩܰܖ̈ܢܳܬܳܐ ܦܫܺܝ̈ܛܳܬܳܐ ܘܰܟܦܺܝ̈ܦܳܬܳܐ. ܘܥܰܠ ܦܰܖ̈ܕܰܝܣܩܶܐ ܕܚܳܡܠܺܝܢ ܒܗܽܘܢ ܡܳܐܢܰܝ̈ ܩܽܘܕܫܳܐ ܕܡܳܪܝܳܐ.
29 ܘܰܠܠܰܚܡܳܐ ܕܣܶܕܖ̈ܶܐ. ܘܰܠܢܰܫܺܝܦܳܐ. ܘܠܰܟܡܺܝ̈ܣܶܐ ܦܰܛܺܝܖ̈ܶܐ. ܘܰܠܟܽܠ ܕܰܡܫܰܒܚܺܝܢ ܘܡܰܘܕܶܝܢ.
30 ܕܢܶܗܘܽܘܢ ܩܳܝܡܺܝܢ ܒܟܽܠ ܨܦܰܪ ܘܰܨܦܰܪ. ܘܡܰܘܕܶܝܢ. ܘܰܡܫܰܒܚܺܝܢ ܠܡܳܪܝܳܐ. ܘܳܐܦ ܒܟܽܠ ܪܡܶܫ ܘܰܪܡܶܫ.
31 ܘܰܠܡܰܣܳܩܽܘ ܥܠܰܘ̈ܳܬܳܐ ܠܡܳܪܝܳܐ. ܒܫܰܒ̈ܶܐ. ܘܰܒܪܺܝܫ ܝܰܖ̈ܚܶܐ. ܘܰܒܥܺܐܕ̈ܶܐ ܒܡܶܢܝܳܢܗܽܘܢ. ܐܰܝܟ ܕܙܳܕܶܩ ܠܗܽܘܢ ܐܰܡܺܝܢܳܐܺܝܬ ܩܕܳܡ ܡܳܪܝܳܐ.
32 ܢܶܗܘܽܘܢ ܢܳܛܪܺܝܢ ܡܰܛܰܪܬܳܐ ܕܡܳܐܢܰܝ̈ ܡܰܫܟܢܳܐ. ܘܡܳܐܢܰܝ̈ ܩܽܘܕܫܳܐ. ܢܶܗܘܽܘܢ ܢܳܛܪܺܝܢ ܡܰܛܰܪܬܳܐ ܕܰܒܢܰܝ̈ ܐܰܗܪܽܘܢ ܐܰܚܰܝ̈ܗܽܘܢ. ܐܶܡܰܬܝ ܕܡܶܬܒܥܶܝܢ ܠܰܡܫܰܡܳܫܽܘ ܒܒܰܝܬܶܗ ܕܡܳܪܝܳܐ.