1 Chronicles 18
The first Book of Chronicles
܀ ܐ ܕܘܒܪ ܝܘܡ̈ܬܐ ܝܚ ܀
1 ܘܰܗܘܳܐ ܡܶܢ ܒܳܬܰܪ ܗܳܠܶܝܢ. ܘܰܚܪܰܒ ܕܰܘܺܝܕ ܠܰܦܠܶܫܬܳܝ̈ܶܐ ܘܰܐܘܒܶܕ ܐܶܢܽܘܢ. ܘܰܢܣܰܒ ܕܰܘܺܝܕ ܚܽܘܛܳܐ ܕܰܡܫܽܘܚܬܳܐ. ܡܶܢ ܐܺܝܕܳܐ ܕܰܦܠܶܫܬܳܝ̈ܶܐ. ܘܰܢܣܰܒ ܠܓܳܬ ܘܰܠܟܰܦܖ̈ܽܘܢܶܝܗ̇. ܗܳܠܶܝܢ ܕܰܩܕܩ̈ܶܐ ܕܰܚܕܺܝܪܺܝܢ ܗܘܰܘ ܠܳܗ̇ ܡܶܢ ܦܠܶܫܬܳܝ̈ܶܐ.
2 ܘܰܚܪܰܒ ܠܡܽܘܐܳܒܳܝ̈ܶܐ. ܘܰܗܘܰܘ ܡܽܘܐܳܒܳܝ̈ܶܐ ܥܰܒܕ̈ܶܐ ܫܳܩܠܰܝ̈ ܡܰܕܰܐܬܳܐ.
3 ܘܰܩܛܰܠ ܕܰܘܺܝܕ ܠܰܗܕܰܪܥܙܰܪ ܡܰܠܟܳܐ ܕܰܢܨܺܝܒܺܝܢ. ܟܰܕ ܐܶܙܰܠ ܣܳܡ ܬܚܽܘܡܳܐ ܒܢܰܗܪܳܐ ܦܪܳܬ.
4 ܘܶܐܚܰܕ ܕܰܘܺܝܕ ܡܶܢܶܗ ܐܳܠܶܦ ܙܰܘ̈ܓܺܝܢ. ܘܫܰܒܥܳܐ ܐܰܠܦܺܝ̈ܢ ܦܰܖ̈ܳܫܺܝܢ. ܘܰܥܩܰܪ ܕܰܘܺܝܕ ܠܟܽܠܗܽܘܢ ܙܰܘ̈ܓܶܐ. ܘܰܫܒܰܩ ܡܶܢܗܽܘܢ ܡܳܐܐ ܙܰܘ̈ܓܺܝܢ.
5 ܘܶܐܬܰܘ ܐ̱ܢܳܫܰܝ̈ ܐܰܕܽܘܡ ܘܕܰܪܡܣܽܘܩ. ܠܰܡܥܰܕܳܪܽܘ ܠܰܗܕܰܪܥܙܰܪ ܡܰܠܟܳܐ ܕܰܢܨܺܝܒܺܝܢ. ܘܩܰܛܶܠ ܕܰܘܺܝܕ ܡܶܢ ܐܰܕܽܘܡ. ܥܶܣܪܺܝܢ ܘܰܬܪܶܝܢ ܐܰܠܦܺܝ̈ܢ ܓܰܒܖ̈ܺܝܢ.
6 ܘܰܐܩܺܝܡ ܕܰܘܺܝܕ ܫܰܠܺܝܛܳܢ̈ܶܐ ܒܕܰܪܡܣܽܘܩ. ܘܰܗܘܰܘ ܕܰܖ̈ܡܽܘܣܩܳܝܶܐ ܥܰܒܕ̈ܶܐ ܠܕܰܘܺܝܕ. ܫܳܩܠܰܝ̈ ܡܰܕܰܐܬܳܐ ܘܰܦܪܰܩ ܡܳܪܝܳܐ ܠܕܰܘܺܝܕ ܒܟܽܠ ܕܽܘܟܳܐ ܕܶܐܙܰܠ.
7 ܘܰܫܩܰܠ ܕܰܘܺܝܕ ܫܳܠ̈ܛܶܐ ܕܕܰܗܒܳܐ ܕܰܗܘܰܘ ܬܠܶܝܢ ܥܰܠ ܖ̈ܰܟܫܳܐ ܕܥܰܒܕܰܘ̈ܗܝ ܕܰܗܕܰܪܥܙܰܪ. ܘܰܐܝܬܺܝ ܐܶܢܽܘܢ ܠܽܐܘܪܺܫܠܶܡ.
8 ܘܡܶܢ ܛܒܰܚ. ܘܡܶܢ ܒܪܽܘܬܺܝ. ܩܽܘܖ̈ܝܳܐ ܕܰܗܕܰܪܥܙܰܪ. ܢܣܰܒ ܕܰܘܺܝܕ ܢܚܳܫܳܐ ܕܣܰܓܺܝ ܛܳܒ. ܘܡܶܢܶܗ ܥܒܰܕ ܕܰܘܺܝܕ. ܝܰܡܳܐ ܕܰܢܚܳܫܳܐ. ܘܶܐܣܛܽܘܢ̈ܶܐ ܕܰܢܚܳܫܳܐ. ܘܬܰܘܖ̈ܶܐ ܕܰܢܚܳܫܳܐ. ܘܡܳܐܢܰܝ̈ ܢܚܳܫܳܐ. ܣܽܘܓܳܐܐ ܕܛܳܒ.
9 ܘܰܫܡܰܥ ܦܽܘܠ ܡܰܠܟܳܐ ܕܰܐܢܛܺܝܽܘܟܳܝ̈ܶܐ. ܕܰܚܪܰܒ ܕܰܘܺܝܕ ܚܰܝ̈ܠܰܘܳܬܳܐ ܕܰܗܕܰܪܥܙܰܪ ܡܰܠܟܳܐ ܕܰܢܨܺܝܒܺܝܢ.
10 ܘܫܰܕܰܪ ܠܝܽܘܪܳܡ ܒܪܶܗ ܠܘܳܬ ܡܰܠܟܳܐ ܕܰܘܺܝܕ. ܠܡܶܫܐܰܠ ܒܰܫܠܳܡܶܗ. ܘܠܰܡܒܰܪܳܟܽܘܬܶܗ. ܥܰܠ ܕܶܐܬܟܰܬܰܫ ܥܰܡ ܗܕܰܪܥܙܰܪ ܘܰܡܚܳܝܗܝ. ܡܶܛܽܠ ܕܓܰܒܪܳܐ ܗܘܳܐ ܩܪܰܒܬܳܢܳܐ ܗܕܰܪܥܙܰܪ. ܘܒܺܐܝܕܶܗ ܕܝܽܘܪܳܡ ܗܘܰܘ ܡܳܐܢܰܝ̈ ܟܶܣܦܳܐ. ܘܡܳܐܢܰܝ̈ ܕܰܗܒܳܐ. ܘܡܳܐܢܰܝ̈ ܢܚܳܫܳܐ.
11 ܘܳܐܦ ܡܶܢܗܽܘܢ ܩܰܕܶܫ ܡܰܠܟܳܐ ܕܰܘܺܝܕ ܠܡܳܪܝܳܐ. ܥܰܡ ܟܶܣܦܳܐ ܘܕܰܗܒܳܐ ܕܰܢܣܰܒ ܡܶܢ ܟܽܠܗܽܘܢ ܥܰܡ̈ܡܶܐ ܕܰܟܒܰܫ. ܡܶܢ ܐܰܕܽܘܡܳܝ̈ܶܐ. ܘܡܶܢ ܒܢܰܝ̈ ܥܰܡܽܘܢ. ܘܡܶܢ ܡܽܘܐܳܒܳܝ̈ܶܐ. ܘܡܶܢ ܦܠܶܫܬܳܝ̈ܶܐ. ܘܡܶܢ ܥܰܡܠܩܳܝ̈ܶܐ.
12 ܘܰܐܒܺܝܫܺܝ ܒܰܪ ܨܽܘܪܺܝܳܐ. ܐܰܚܽܘܗܝ ܕܝܽܘܐܳܒ. ܗܽܘ ܚܪܰܒ ܠܰܐܕܽܘܡܳܝ̈ܶܐ ܒܢܰܚܠܳܐ ܕܡܶܠܚܳܐ. ܬܡܳܢܬܰܥܣܰܪ ܐܰܠܦܺܝ̈ܢ ܓܰܒܖ̈ܺܝܢ.
13 ܘܰܐܩܺܝܡ ܕܰܘܺܝܕ ܥܰܠ ܐܰܕܽܘܡܳܝ̈ܶܐ ܫܰܠܺܝܛܳܢ̈ܶܐ. ܘܰܗܘܰܘ ܟܽܠܗܽܘܢ ܐܰܕܽܘܡܳܝ̈ܶܐ ܥܰܒܕ̈ܶܐ ܠܕܰܘܺܝܕ. ܘܰܦܪܰܩ ܡܳܪܝܳܐ ܠܕܰܘܺܝܕ ܒܟܽܠ ܕܽܘܟܳܐ ܕܳܐܙܶܠ ܗܘܳܐ.
14 ܘܰܐܡܠܶܟ ܕܰܘܺܝܕ ܥܰܠ ܟܽܠܶܗ ܝܺܣܪܳܐܶܝܠ. ܘܰܗܘܳܐ ܕܰܘܺܝܕ ܥܳܒܶܕ ܕܺܝܢܳܐ ܘܙܰܕܺܝܩܽܘܬܳܐ ܠܟܽܠܶܗ ܥܰܡܳܐ.
15 ܘܝܽܘܐܳܒ ܒܰܪ ܨܽܘܪܺܝܳܐ ܫܰܠܺܝܛ ܥܰܠ ܟܽܠܗܽܘܢ ܚܰܝ̈ܠܰܘܳܬܳܐ. ܘܝܳܗܽܘܫܳܦܳܛ ܒܰܪ ܐܰܚܺܝܠܽܘܕ ܡܕܰܒܪܳܢܳܐ.
16 ܘܨܳܕܽܘܩ ܒܰܪ ܐܰܚܺܝܛܽܘܒ. ܘܰܐܚܺܝܡܰܠܟ ܒܰܪ ܐܳܒܺܝܬܳܪ ܟܳܗ̈ܢܶܐ. ܘܣܰܪܺܝܳܐ ܣܳܦܪܳܐ.
17 ܘܒܰܢܝܳܐ ܒܰܪ ܝܽܘܝܳܕܳܥ. ܥܰܠ ܩܰܫ̈ܳܬܶܐ ܘܥܰܠ ܩܶܠܥ̈ܶܐ. ܘܰܒܢܰܘ̈ܗܝ ܕܕܰܘܺܝܕ ܪܰܘܖ̈ܒܺܝܢ ܗܘܰܘ.