1 Chronicles 15
The first Book of Chronicles
܀ ܐ ܕܘܒܪ ܝܘܡ̈ܬܐ ܝܗ ܀
1 ܘܰܒܢܳܐ ܗܘܳܐ ܠܶܗ ܐܳܦܰܕ̈ܢܶܐ ܒܩܽܘܖ̈ܝܳܐ ܕܕܰܘܺܝܕ. ܘܰܒܢܳܐ ܗܘܳܐ ܕܽܘܟܬܳܐ ܠܩܺܐܒܽܘܬܳܐ ܕܡܳܪܝܳܐ ܘܰܠܡܳܐܢܰܝ̈ ܡܰܫܟܢܳܐ.
2 ܗܳܝܕܶܝܢ ܐܶܡܰܪ ܗܘܳܐ ܕܰܘܺܝܕ ܠܠܶܘ̈ܳܝܶܐ ܠܡܶܫܩܰܠ ܩܺܐܒܽܘܬܶܗ ܕܡܳܪܝܳܐ. ܘܰܠܡܳܐܢܰܝ̈ ܡܰܫܟܢܳܐ. ܡܶܛܽܠ ܕܰܠܗܽܘܢ ܠܠܶܘ̈ܳܝܶܐ ܓܒܳܐ ܡܳܪܝܳܐ. ܠܰܡܫܰܡܳܫܽܘ ܘܰܠܡܶܫܩܰܠ ܩܺܒܽܘܬܶܗ ܕܡܳܪܝܳܐ. ܘܠܰܡܫܰܡܳܫܽܘܬܳܗ̇ ܠܥܳܠܰܡ.
3 ܘܟܰܢܶܫ ܕܰܘܺܝܕ ܠܟܽܠܶܗ ܝܺܣܪܳܐܶܝܠ. ܠܽܐܘܪܺܫܠܶܡ. ܠܡܰܣܳܩܽܘܬܳܗ̇ ܠܩܺܐܒܽܘܬܶܗ ܕܡܳܪܝܳܐ ܠܕܽܘܟܬܳܐ ܕܰܒܢܳܐ ܠܳܗ̇.
4 ܘܟܰܢܶܫ ܕܰܘܺܝܕ ܠܰܒܢܰܘ̈ܗܝ ܕܰܐܗܪܽܘܢ. ܘܰܠܠܶܘ̈ܳܝܶܐ. ܘܶܐܡܰܪ ܠܗܽܘܢ.
5 ܘܠܰܒܢܰܘ̈ܗܝ ܕܩܳܗܳܬ. ܠܽܐܘܪܶܝܠ ܩܰܫܺܝܫܳܐ ܘܠܰܐܚܰܘ̈ܗܝ. ܡܳܐܐ ܘܥܶܣܪܺܝܢ.
6 ܘܰܒܢܰܘ̈ܗܝ ܕܡܶܪܰܪܺܝ. ܥܫܳܐܶܝܠ ܩܰܫܺܝܫܳܐ ܘܠܰܐܚܰܘ̈ܗܝ. ܡܰܐܬܶܝܢ ܘܥܶܣܪܺܝܢ.
7 ܠܰܒܢܰܘ̈ܗܝ ܕܓܶܪܫܽܘܢ. ܝܽܘܐܶܝܠ ܩܰܫܺܝܫܳܐ ܘܰܐܚܰܘ̈ܗܝ. ܡܳܐܐ ܘܰܬܠܳܬܺܝܢ.
8 ܘܠܰܒܢܰܘ̈ܗܝ ܕܶܐܠܺܝܨܳܦܳܢ. ܫܡܰܥܝܳܐ ܩܰܫܺܝܫܳܐ ܘܰܐܚܰܘ̈ܗܝ. ܡܰܐܬܶܝܢ.
9 ܠܰܒܢܰܘ̈ܗܝ ܕܚܶܒܪܽܘܢ. ܐܶܠܝܰܐܒ ܩܰܫܺܝܫܳܐ ܘܰܐܚܰܘ̈ܗܝ. ܬܡܳܢܺܝܢ.
10 ܠܰܒܢܰܘ̈ܗܝ ܕܥܽܘܙܳܐܶܝܠ. ܥܰܡܺܝܢܳܕܳܒ ܩܰܫܺܝܫܳܐ ܘܰܐܚܰܘ̈ܗܝ. ܡܳܐܐ. ܘܰܬܪܶܥܣܰܪ.
11 ܘܰܩܪܳܐ ܕܰܘܺܝܕ ܠܨܳܕܽܘܩ ܟܳܗܢܳܐ. ܘܠܰܐܒܺܝܬܳܪ. ܘܰܠܠܶܘ̈ܳܝܶܐ. ܘܰܠܐܽܘܪܶܝܠ. ܘܰܠܥܰܡܣܳܐ. ܘܰܠܝܽܘܐܶܝܠ. ܘܠܰܥܫܳܝܳܐ. ܘܠܰܫܡܰܥܝܳܐ. ܘܰܠܐܽܘܪܶܝܠ. ܘܰܠܥܰܡܺܝܢܳܕܳܒ.
12 ܘܶܐܡܰܪ ܠܗܽܘܢ. ܐܰܢ̱ܬܽܘܢ ܖ̈ܺܝܫܰܝ ܐܰܒܳܗ̈ܳܬܳܐ ܕܠܶܘ̈ܳܝܶܐ. ܐܶܬܩܰܕܰܫܘ ܐܰܢ̱ܬܽܘܢ ܘܰܐܚܰܝ̈ܟܽܘܢ. ܘܬܰܣܩܽܘܢ ܠܩܺܐܒܽܘܬܳܐ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܠܕܽܘܟܬܳܐ ܕܒܰܢܝܳܐ ܗܘܳܬ ܠܳܗ̇ ܡܶܢ ܠܽܘܩܕܰܡ.
13 ܕܠܳܐ ܢܶܬܪܽܘܥ ܡܳܪܝܳܐ ܐܰܠܳܗܰܢ. ܡܶܛܽܠ ܕܠܳܐ ܬܒܰܥܢܳܝܗܝ ܐܰܝܟ ܕܺܝܢܳܐ.
14 ܘܶܐܬܩܰܕܰܫܘ ܟܳܗ̈ܢܶܐ ܘܠܶܘ̈ܳܝܶܐ. ܠܡܰܣܳܩܽܘ ܠܩܺܐܒܽܘܬܶܗ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
15 ܘܰܫܩܰܠܘ ܠܶܘ̈ܳܝܶܐ ܠܩܺܐܒܽܘܬܶܗ ܕܡܳܪܝܳܐ. ܐܰܝܟܰܢܳܐ ܕܦܰܩܶܕ ܡܽܘܫܶܐ ܒܡܶܠܬܶܗ ܕܡܳܪܝܳܐ. ܘܰܫܩܰܠܘ ܗܶܢܽܘܢ ܒܟܰܬܦ̈ܳܬܗܽܘܢ.
16 ܘܶܐܡܰܪ ܕܰܘܺܝܕ ܠܩܰܫܺܝ̈ܫܶܐ ܕܠܶܘ̈ܳܝܶܐ. ܠܰܡܩܳܡܽܘ ܠܰܐܚܰܝ̈ܗܽܘܢ ܠܰܐܝܠܶܝܢ ܕܚܰܝܺܝܢ. ܘܰܡܫܰܒܚܺܝܢ ܒܡܳܐܢܰܝ̈ ܬܶܫܒ̈ܚܳܬܳܐ. ܒܢܰܒ̈ܠܶܐ ܘܰܒܟܶܢܳܖ̈ܶܐ. ܘܰܒܨܶܨ̈ܠܶܐ. ܕܢܶܗܘܽܘܢ ܡܰܫܡܥܺܝܢ ܠܰܡܪܳܡܽܘ ܩܳܠܰܝ̈ܗܽܘܢ ܒܚܰܕܽܘܬܳܐ.
17 ܘܰܐܩܺܝܡܘ ܠܶܘ̈ܳܝܶܐ ܠܗܳܡܳܢ ܒܰܪ ܝܽܘܐܶܝܠ. ܘܡܶܢ ܐܰܚܰܘ̈ܗܝ. ܠܳܐܣܳܦ ܒܰܪ ܒܪܰܟܝܳܐ. ܘܡܶܢ ܒܢܰܝ̈ ܡܶܪܰܪܺܝ ܐܰܚܰܝ̈ܗܽܘܢ. ܐܳܬܳܢ ܒܰܪ ܩܰܫܺܝܗܽܘ.
18 ܘܥܰܡܗܽܘܢ ܐܰܚܽܘܗܽܘܢ ܬܶܢܝܳܢܳܐ. ܙܟܰܪܝܳܐ ܒܰܪ ܢܥܳܐܶܝܠ. ܘܝܽܘܚܝܳܐܶܝܠ ܘܶܐܠܺܝܐܒ. ܘܒܰܢܝܳܐ. ܘܐܳܣܳܐ. ܘܡܰܬܺܝܬܳܐ. ܘܶܐܠܺܝܦܰܠܗܽܘ. ܘܡܶܩܳܝܗܽܘ. ܘܥܽܘܒܳܪ ܐܰܕܽܘܡ ܘܝܽܘܥܳܐܶܝܠ.
19 ܗܳܠܶܝܢ ܟܽܠܗܽܘܢ ܕܩܳܝܡܺܝܢ ܥܰܠ ܬܰܖ̈ܥܶܐ. ܘܰܡܫܰܒܚܺܝܢ. ܗܳܡܳܢ. ܘܳܐܣܳܦ. ܘܳܐܬܳܢ.
20 ܗܳܠܶܝܢ ܟܽܠܗܽܘܢ ܡܫܰܒܚܺܝܢ ܒܬܶܫܒ̈ܚܳܬܳܐ ܕܡܳܐܢܰܝ̈ ܢܚܳܫܳܐ. ܠܰܡܫܰܡܳܫܽܘ. ܥܰܙܰܪܝܳܐ. ܥܰܙܝܳܐܶܝܠ. ܘܝܽܘܚܶܝܠ. ܘܝܰܥܢܺܝ. ܘܶܐܠܝܰܐܒ. ܘܰܡܥܰܣܝܳܐ. ܘܒܰܢܝܳܐ.
21 ܘܕܰܡܫܰܒܚܺܝܢ ܒܬܶܫܒ̈ܚܳܬܳܐ. ܡܰܬܺܝܬܳܐ. ܘܡܶܩܝܳܗܽܘ. ܘܥܽܘܒܳܪ ܐܰܕܽܘܡ. ܘܥܽܘܙܳܐܶܝܠ. ܘܥܽܘܙܰܢܝܳܐ. ܗܳܠܶܝܢ ܡܫܰܒܚܺܝܢ ܒܟܶܢܳܖ̈ܶܐ ܟܽܠ ܝܽܘܡ ܒܝܽܘܡ. ܒܫܳܥܺܝ̈ܢ ܬܠܳܬ. ܘܰܒܫܶܬ. ܘܒܰܬܫܰܥ.
22 ܘܒܰܢܝܳܐ ܪܰܒܳܐ ܕܠܶܘ̈ܳܝܶܐ ܫܩܰܠ ܟܽܠ ܝܽܘܡ ܒܡܰܛܽܘܠܳܐ. ܡܶܛܽܠ ܕܕܽܘܟܬܳܐ ܡܰܬܩܢܳܐ ܗܘܳܬ ܠܶܗ.
23 ܘܰܒܪܰܟܝܳܐ. ܘܗܰܠܩܳܢܳܐ. ܣܳܥܪܺܝܢ ܗܘܰܘ ܠܩܺܐܒܽܘܬܳܐ ܡܶܕܶܡ ܕܡܶܬܒܥܶܐ ܠܳܗ̇.
24 ܘܫܰܒܢܳܐ. ܘܝܽܘܫܳܦܳܛ. ܘܢܰܬܢܺܝܐܶܝܠ. ܘܥܰܡܫܺܝ. ܘܰܙܟܰܪܝܳܐ. ܘܒܰܢܝܳܐ. ܘܶܐܠܺܝܥܳܙܳܪ. ܗܳܠܶܝܢ ܟܳܗ̈ܢܶܐ ܕܩܳܪܶܝܢ ܗܘܰܘ ܒܩܰܖ̈ܢܳܬܳܐ ܩܕܳܡ ܩܺܐܒܽܘܬܶܗ ܕܡܳܪܝܳܐ. ܘܥܽܘܒܳܪ ܐܰܕܽܘܡ ܘܰܐܚܺܝܳܐ ܣܳܥܪܺܝܢ ܗܘܰܘ ܠܩܺܐܒܽܘܬܳܐ.
25 ܘܰܗܘܳܐ ܕܰܘܺܝܕ. ܘܩܰܫܺܝ̈ܫܶܐ ܕܺܝܣܪܳܐܶܝܠ. ܘܪܰܘܖ̈ܒܳܢܶܐ ܕܰܐܠܦ̈ܶܐ. ܐܳܙܺܠܝܢ ܠܡܰܣܳܩܽܘ ܩܺܐܒܽܘܬܳܐ ܕܕܺܝܰܐܬܺܝܩܺܝ ܕܡܳܪܝܳܐ. ܡܶܢ ܒܰܝܬܶܗ ܕܥܽܘܒܳܪ ܐܰܕܽܘܡ ܠܰܩܪܺܝܬܶܗ ܕܕܰܘܺܝܕ ܒܚܰܕܽܘܬܳܐ ܪܰܒܬܳܐ.
26 ܘܰܗܘܳܐ ܕܟܰܕ ܥܰܕܰܪ ܡܳܪܝܳܐ ܠܠܶܘ̈ܳܝܶܐ. ܕܰܫܩܺܝܠܺܝܢ ܩܺܐܒܽܘܬܳܐ ܕܺܐܝܬ ܒܳܗ̇ ܕܺܝܰܐܬܺܝܩܺܝ ܕܡܳܪܝܳܐ. ܕܰܒܰܚܘ ܫܰܒܥܳܐ ܬܰܘܖ̈ܺܝܢ. ܘܫܰܒܥܳܐ ܕܶܟܖ̈ܺܝܢ.
27 ܘܕܰܘܺܝܕ ܠܒܺܝܫ ܢܰܚ̈ܬܶܐ ܕܒܽܘܨܳܐ. ܘܟܽܠܗܽܘܢ ܠܶܘ̈ܳܝܶܐ ܕܰܫܩܺܝܠܺܝܢ ܩܺܐܒܽܘܬܳܐ ܠܒܺܝܫܺܝܢ ܐܳܦ ܗܶܢܽܘܢ ܢܰܚ̈ܬܶܐ ܕܒܽܘܨܳܐ. ܘܰܠܥܶܠ ܡܶܢ ܢܰܚܬܰܘ̈ܗܝ ܕܕܰܘܺܝܕ ܕܒܽܘܨܳܐ. ܠܒܺܝܫ ܗܘܳܐ ܦܶܕܬܳܐ ܕܒܽܘܨܳܐ.
28 ܘܕܰܘܺܝܕ ܘܟܽܠܗܽܘܢ ܕܒܶܝܬ ܝܺܣܪܳܐܶܝܠ. ܡܰܣܩܺܝܢ ܠܩܺܐܒܽܘܬܳܐ ܕܺܐܝܬ ܒܳܗ̇ ܕܺܝܰܐܬܺܝܩܺܝ ܕܡܳܪܝܳܐ ܒܬܶܫ̈ܒܚܳܬܳܐ. ܘܰܒܩܳܠܳܐ ܕܩܰܖ̈ܢܳܬܳܐ ܦܫܺܝ̈ܛܳܬܳܐ ܘܰܟܦܺܝ̈ܦܳܬܳܐ ܘܡܰܥܫܢܺܝܢ ܩܳܠܗܽܘܢ ܥܕܰܡܳܐ ܠܰܡܪܰܘܡܳܐ.
29 ܘܰܗܘܳܐ ܕܟܰܕ ܡܰܛܝܰܬ ܩܺܐܒܽܘܬܳܐ ܕܺܐܝܬ ܒܳܗ̇ ܕܺܝܰܐܬܺܝܩܺܝ ܕܡܳܪܝܳܐ. ܘܥܶܠܰܬ ܘܰܡܛܳܬ ܠܰܩܪܺܝܬܶܗ ܕܕܰܘܺܝܕ. ܡܰܠܟܶܠ ܒܰܪܬ ܫܳܐܘܳܠ ܐܰܕܺܝܩܰܬ ܡܶܢ ܟܰܘܬܳܐ. ܘܰܚܙܳܬܶܗ ܠܡܰܠܟܳܐ ܕܰܘܺܝܕ ܕܡܶܫܬܥܶܐ. ܘܰܐܫܛܝܰܬ ܥܠܰܘܗܝ ܒܠܶܒܳܗ̇.