1 Chronicles 21
The first Book of Chronicles
܀ ܐ ܕܘܒܪ ܝܘܡ̈ܬܐ ܟܐ ܀
1 ܘܩܳܡ ܣܳܛܳܢܳܐ ܠܺܝܣܪܳܐܶܝܠ. ܘܣܰܪܗܶܒ ܠܕܰܘܺܝܕ ܠܡܶܡܢܳܐ ܠܺܝܣܪܳܐܶܝܠ.
2 ܘܶܐܡܰܪ ܕܰܘܺܝܕ ܠܝܽܘܐܳܒ ܒܰܪ ܨܽܘܪܺܝܳܐ ܘܰܠܪܰܘܖ̈ܒܳܢܰܘ̈ܗܝ ܕܥܰܡܳܐ. ܙܶܠܘ ܘܰܡܢܰܘ ܠܥܰܡܳܐ ܕܺܝܣܪܳܐܶܝܠ. ܡܶܢ ܒܺܪܫܒܰܥ ܘܰܥܕܰܡܳܐ ܠܕܳܢ. ܘܬܰܘ ܠܘܳܬܝ. ܘܶܐܕܰܥ ܡܶܢܝܳܢܶܗ ܕܥܰܡܳܐ.
3 ܘܶܐܡܰܪ ܝܽܘܐܳܒ ܠܕܰܘܺܝܕ ܡܰܠܟܳܐ. ܢܰܘܣܶܦ ܡܳܪܝܳܐ ܐܰܠܳܗܳܟ ܥܰܠ ܥܰܡܶܗ. ܐܰܟܘܳܬܗܽܘܢ ܘܰܐܟܘܳܬܗܽܘܢ ܡܳܐܐ ܙܰܒܢܺܝ̈ܢ ܘܥܰܝܢܰܘ̈ܗܝ ܕܡܳܪܝ ܡܰܠܟܳܐ ܢܶܚܙ̈ܝܳܢ. ܡܶܛܽܠ ܕܟܽܠܗܽܘܢ ܥܰܒܕܰܘ̈ܗܝ ܐܶܢܽܘܢ. ܘܡܳܪܰܢ ܡܰܠܟܳܐ ܠܡܳܢܳܐ ܗ̱ܘ ܐܶܨܛܒܺܝ ܒܳܗ̇ ܒܡܶܠܬܳܐ ܗܳܕܶܐ.
4 ܘܡܶܠܬܶܗ ܕܡܰܠܟܳܐ ܥܶܫܢܰܬ ܥܰܠ ܝܽܘܐܳܒ. ܘܰܢܦܰܩ ܝܽܘܐܳܒ ܘܗܰܠܶܟ ܒܟܽܠܶܗ ܝܺܣܪܳܐܶܝܠ. ܘܰܗܦܰܟ ܘܶܐܬܳܐ ܠܽܐܘܪܺܫܠܶܡ.
5 ܘܝܰܗܒ ܝܽܘܐܳܒ ܡܶܢܝܳܢܳܐ ܘܚܽܘܫܒܳܢܳܐ ܕܥܰܡܳܐ ܠܕܰܘܺܝܕ. ܘܰܗܘܳܐ ܚܽܘܫܒܳܢܳܐ ܕܰܒܢܰܝ̈ ܝܺܣܪܳܐܶܝܠ ܐܳܠܶܦ ܐܰܠܦܺܝ̈ܢ ܘܡܳܐܐ ܐܰܠܦܺܝ̈ܢ ܖ̈ܶܓܠܳܝܶܐ ܫܳܡܛܰܝ̈ ܣܰܝܦܳܐ. ܘܫܰܒܛܳܐ ܕܒܶܝܬ ܝܺܗܽܘܕܳܐ ܗܘܰܘ ܒܡܶܢܝܳܢܳܐ ܐܰܪܒܰܥܡܳܐܐ ܘܫܰܒܥܺܝܢ ܐܰܠܦܺܝ̈ܢ ܓܰܒܖ̈ܶܐ ܫܳܠܦܰܝ̈ ܣܰܝܦܳܐ.
6 ܘܠܶܘ̈ܳܝܶܐ ܘܟܳܗ̈ܢܶܐ. ܘܫܰܒܛܳܐ ܕܒܶܝܬ ܒܶܢܝܳܡܶܝܢ ܠܳܐ ܐܶܬܡܢܺܝ ܥܰܡܗܽܘܢ. ܡܶܛܽܠ ܕܰܐܣܠܺܝ ܝܽܘܐܳܒ ܡܶܠܬܶܗ ܕܡܰܠܟܳܐ. ܘܠܳܐ ܨܒܳܐ ܝܽܘܐܳܒ ܠܡܶܡܢܳܐ ܐܶܢܽܘܢ.
7 ܘܶܐܬܒܐܶܫ ܦܶܬܓܳܡܳܐ ܒܥܰܝܢܰܝ̈ ܡܳܪܝܳܐ. ܥܰܠ ܕܰܡܢܳܐ ܕܰܘܺܝܕ ܠܺܝܣܪܳܐܶܝܠ.
8 ܘܶܐܡܰܪ ܕܰܘܺܝܕ ܠܡܳܪܝܳܐ. ܚܛܺܝܬ ܛܳܒ ܒܡܶܕܶܡ ܕܥܶܒܕܶܬ ܒܦܶܬܓܳܡܳܐ ܗܳܢܳܐ. ܘܳܐܦ ܗܳܫܳܐ ܐܰܥܒܰܪ ܚܰܘܒܰܘ̈ܗܝ ܕܥܰܒܕܳܟ. ܡܶܛܽܠ ܕܰܐܣܟܠܶܬ ܛܳܒ.
9 ܘܩܰܕܶܡ ܕܰܘܺܝܕ ܒܨܰܦܪܳܐ ܘܡܶܠܬܶܗ ܕܡܳܪܝܳܐ ܗܘܳܬ ܥܰܠ ܓܳܕ ܢܒܺܝܳܐ. ܘܶܐܡܰܪ ܠܶܗ.
10 ܙܶܠ ܘܶܐܡܰܪ ܠܕܰܘܺܝܕ. ܗܳܟܰܢܳܐ ܐܳܡܰܪ ܡܳܪܝܳܐ. ܬܠܳܬ ܒܺܝ̈ܫܳܢ ܡܰܝܬܶܐ ܐ̱ܢܳܐ ܥܠܰܝܟ ܓܒܺܝ ܠܳܟ ܚܕܳܐ ܡܶܢܗܶܝܢ. ܘܶܐܥܒܶܕ ܠܳܟ.
11 ܘܶܐܬܳܐ ܓܳܕ ܢܒܺܝܳܐ ܠܘܳܬ ܕܰܘܺܝܕ. ܘܶܐܡܰܪ ܠܶܗ. ܗܳܟܰܢܳܐ ܐܳܡܰܪ ܡܳܪܝܳܐ. ܩܰܒܶܠ ܠܳܟ.
12 ܐܳܘ ܬܠܳܬ ܫܢܺܝ̈ܢ ܟܰܦܢܳܐ ܒܰܐܪܥܳܐ. ܐܰܘ ܬܠܳܬܳܐ ܝܰܖ̈ܚܺܝܢ ܬܶܬܡܣܰܪ ܩܕܳܡ ܒܥܶܠܕܒܳܒܳܟ. ܘܗܽܘ ܢܶܗܘܶܐ ܪܳܕܶܦ ܠܳܟ. ܘܗܽܘ ܢܶܗܘܶܐ ܫܰܠܺܝܛ ܒܳܟ ܐܰܘ ܬܠܳܬܳܐ ܝܰܘܡܺܝ̈ܢ ܚܰܪܒܶܗ ܕܡܳܪܝܳܐ ܒܺܝܣܪܳܐܶܝܠ. ܘܳܐܦ ܗܳܫܳܐ ܕܰܥ ܘܰܚܙܺܝ ܡܳܢܳܐ ܝܳܗܶܒ ܐܰܢ̱ܬ ܦܶܬܓܳܡܳܐ ܠܘܳܬ ܡܰܢ ܕܫܰܕܪܰܢܝ ܠܘܳܬܟ.
13 ܘܶܐܡܰܪ ܕܰܘܺܝܕ ܠܓܳܕ ܥܳܩܰܬ ܠܺܝ ܛܳܒ. ܢܶܫܬܠܶܡ ܒܺܐܝܕܰܘ̈ܗܝ ܕܡܳܪܝܳܐ ܕܣܰܓܺܝܐܺܝܢ ܖ̈ܰܚܡܰܘܗܝ ܛܳܒ. ܘܒܺܐܝܕܳܐ ܕܰܒܢܰܝ̈ܢܳܫܳܐ ܠܳܐ ܢܶܫܬܠܶܡ.
14 ܘܝܰܗܒ ܡܳܪܝܳܐ ܡܰܘܬܳܢܳܐ ܒܺܝܣܪܳܐܶܝܠ. ܘܰܢܦܰܠܘ ܡܶܢ ܝܺܣܪܳܐܶܝܠ ܫܰܒܥܺܝܢ ܐܰܠܦܺܝ̈ܢ ܓܰܒܖ̈ܶܐ.
15 ܘܫܰܕܰܪ ܡܳܪܝܳܐ ܡܰܠܰܐܟܳܐ ܠܽܐܘܪܺܫܠܶܡ ܠܰܡܚܰܒܳܠܽܘܬܳܗ̇. ܘܟܰܕ ܡܚܰܒܶܠ ܠܳܗ̇. ܚܙܳܝܗܝ ܡܳܪܝܳܐ. ܘܶܐܬܒܰܝܰܐ ܡܶܢ ܒܺܝܫܬܳܐ. ܘܶܐܡܰܪ ܠܡܰܠܰܐܟܳܐ ܕܰܡܚܰܒܶܠ. ܣܰܓܺܝ ܚܰܒܶܠܬ ܡܶܟܺܝܠ ܩܦܽܘܣ ܐܺܝܕܳܟ. ܘܡܰܠܰܐܟܶܗ ܕܡܳܪܝܳܐ. ܫܪܶܐ ܗܘܳܐ ܠܘܳܬ ܐܶܕܪܶܗ ܕܳܐܪܳܢ ܝܳܒܽܘܣܳܝܳܐ.
16 ܘܰܐܪܺܝܡ ܕܰܘܺܝܕ ܥܰܝܢܰܘ̈ܗܝ. ܘܰܚܙܳܐ ܡܰܠܰܐܟܶܗ ܕܡܳܪܝܳܐ ܩܳܐܶܡ ܒܶܝܬ ܫܡܰܝܳܐ ܠܰܐܪܥܳܐ. ܘܣܰܝܦܶܗ ܫܡܺܝܛ ܒܺܐܝܕܶܗ. ܘܩܳܐܶܡ ܠܥܶܠ ܡܶܢ ܐܽܘܪܺܫܠܶܡ ܘܰܢܦܰܠ ܕܰܘܺܝܕ. ܘܩܰܫܺܝ̈ܫܶܐ ܕܺܐܝܬ ܗܘܰܘ ܥܰܡܶܗ. ܡܟܰܣܶܝܢ ܗܘܰܘ ܣܰܩ̈ܶܐ. ܘܰܢܦܰܠܘ ܥܰܠ ܐܰܦܰܝ̈ܗܽܘܢ.
17 ܘܶܐܡܰܪ ܕܰܘܺܝܕ ܠܡܳܪܝܳܐ. ܘܶܐܢܰܐ ܗ̱ܘ ܚܛܺܝܬ. ܘܛܳܒ ܪܰܒܳܐ ܗ̱ܝ ܣܰܟܠܽܘܬܳܐ ܕܰܐܣܟܠܶܬ. ܗܳܠܶܝܢ ܕܶܝܢ ܥܳܢ̈ܳܐ ܬܰܡܺܝ̈ܡܳܬܳܐ ܡܳܢܳܐ ܥܒܰܕ̈ܝ. ܡܳܪܝܳܐ ܐܰܠܳܗܝ. ܬܶܗܘܶܐ ܐܺܝܕܳܟ ܒܺܝ ܘܰܒܒܶܝܬ ܐܳܒܝ ܡܶܢ ܥܰܡܳܐ ܢܶܬܟܠܶܐ ܡܰܘܬܳܢܳܐ.
18 ܘܡܰܠܰܐܟܶܗ ܕܡܳܪܝܳܐ ܐܶܡܰܪ ܠܓܳܕ ܣܰܩ ܐܶܡܰܪ ܠܕܰܘܺܝܕ. ܣܳܠܶܩ ܒܳܢܶܐ ܡܰܕܒܚܳܐ ܠܡܳܪܝܳܐ. ܒܶܐܕܪܶܗ ܕܳܐܪܳܢ ܝܳܒܽܘܣܳܝܳܐ.
19 ܘܰܣܠܶܩ ܕܰܘܺܝܕ ܐܰܝܟ ܦܶܬܓܳܡܶܗ ܕܓܳܕ ܕܶܐܡܰܪ ܒܰܫܡܶܗ ܕܡܳܪܝܳܐ.
20 ܘܰܚܙܳܐ ܕܰܘܺܝܕ ܠܡܰܠܰܐܟܳܐ ܕܰܡܚܰܒܶܠ ܒܥܰܡܳܐ. ܕܰܩܦܰܣ ܐܺܝܕܶܗ. ܘܠܳܐ ܚܰܒܶܠ ܬܽܘܒ.
21 ܘܶܐܬܳܐ ܕܰܘܺܝܕ ܠܘܳܬ ܐܳܪܳܢ. ܘܶܐܬܦܢܺܝ ܐܳܪܳܢ ܘܰܚܙܳܐ ܠܕܰܘܺܝܕ ܘܰܣܓܶܕ ܠܕܰܘܺܝܕ ܥܰܠ ܐܰܦܰܘ̈ܗܝ ܥܰܠ ܐܰܪܥܳܐ ܘܰܢܦܰܩ ܐܳܪܳܢ ܡܶܢ ܐܶܕܪܶܗ.
22 ܘܶܐܡܰܪ ܕܰܘܺܝܕ ܠܳܐܪܳܢ. ܗܰܒܠܺܝ ܕܽܘܟܬܳܐ ܕܶܐܕܪܳܐ ܗܳܢܳܐ. ܘܶܐܒܢܶܐ ܒܶܗ ܡܰܕܒܚܳܐ ܠܡܳܪܝܳܐ. ܒܟܶܣܦܳܐ ܘܒܰܕܡܰܝ̈ܳܐ ܛܳܒ̈ܶܐ. ܗܒܳܝܗܝ ܠܺܝ. ܘܢܶܬܟܠܶܐ ܡܰܘܬܳܢܳܐ ܡܶܢ ܥܰܡܳܐ.
23 ܘܶܐܡܰܪ ܐܳܪܳܢ ܠܕܰܘܺܝܕ. ܣܰܒ ܠܳܟ ܡܳܪܝ ܡܰܠܟܳܐ. ܘܢܶܥܒܶܕ ܡܳܪܝ ܡܰܠܟܳܐ ܡܶܕܶܡ ܕܫܰܦܺܝܪ ܒܥܰܝܢܰܘ̈ܗܝ ܐܶܢܳܐ ܝܳܗܶܒ ܐ̱ܢܳܐ ܬܰܘܖ̈ܶܐ ܠܰܥܠܳܬܳܐ. ܘܓܰܪܓܪܳܐ ܠܩܰܝ̈ܣܶܐ. ܘܚܶܛ̈ܶܐ ܠܩܽܘܪܒܳܢܳܐ ܘܟܽܠ ܡܶܕܶܡ ܕܡܶܬܒܥܶܐ. ܐܶܢܳܐ ܝܳܗܶܒ ܐ̱ܢܳܐ.
24 ܘܶܐܡܰܪ ܡܰܠܟܳܐ ܕܰܘܺܝܕ ܠܳܐܪܳܢ. ܚܳܣ ܠܺܝ. ܡܶܙܒܰܢ ܙܳܒܶܢ ܐ̱ܢܳܐ ܡܶܢܳܟ ܒܟܶܣܦܳܐ ܘܒܰܕܡܰܝ̈ܳܐ. ܐܰܝܟ ܕܫܳܘܶܐ ܡܶܛܽܠ ܕܠܳܐ ܢܳܣܶܒ ܐ̱ܢܳܐ ܕܺܝܠܳܟ. ܘܡܰܣܶܩ ܐ̱ܢܳܐ ܠܡܳܪܝܳܐ ܥܠܳܬܳܐ ܕܡܰܓܳܢ.
25 ܘܰܙܒܰܢ ܕܰܘܺܝܕ ܡܶܢ ܐܳܪܳܢ. ܕܽܘܟܬܳܐ ܗܳܝ ܕܶܐܕܪܳܐ ܒܚܰܡܫܺܝܢ ܐܶܣܬܺܖ̈ܺܝܢ.
26 ܘܰܒܢܳܐ ܕܰܘܺܝܕ ܬܰܡܳܢ ܡܰܕܒܚܳܐ ܠܡܳܪܝܳܐ ܘܩܰܪܶܒ ܥܠܰܘ̈ܳܬܳܐ ܘܫܰܠ̈ܡܶܐ. ܐܶܡܖ̈ܶܐ. ܘܨܰܠܺܝ ܩܕܳܡ ܡܳܪܝܳܐ. ܘܰܥܢܳܝܗܝ ܘܢܶܚܬܰܬ ܢܽܘܪܳܐ ܡܶܢ ܫܡܰܝܳܐ. ܘܶܐܟܠܰܬ ܥܠܰܘ̈ܳܬܳܐ ܕܺܐܝܬ ܗܘܰܝ̈ ܥܰܠ ܡܰܕܒܚܳܐ.
27 ܘܶܐܡܰܪ ܡܳܪܝܳܐ ܠܡܰܠܰܐܟܳܐ. ܟܰܕ ܚܙܳܐ. ܐܰܗܦܶܟ ܣܰܝܦܳܟ ܠܚܶܠܬܶܗ.
28 ܒܙܰܒܢܳܐ ܗܰܘ ܟܰܕ ܚܙܳܐ ܕܰܘܺܝܕ ܕܰܥܢܳܝܗܝ ܡܳܪܝܳܐ ܒܶܐܕܪܶܗ ܕܳܐܪܳܢ ܝܳܒܽܘܣܳܝܳܐ. ܘܕܰܒܰܚ ܬܰܡܳܢ ܕܶܒܚ̈ܶܐ ܪܰܘܖ̈ܒܶܐ.
29 ܘܨܰܠܺܝ ܬܰܡܳܢ ܩܕܳܡ ܡܰܫܟܢܳܐ ܕܰܥܒܰܕ ܗܘܳܐ ܡܽܘܫܶܐ. ܒܡܰܕܒܪܳܐ. ܒܡܰܦܩܳܢܳܐ ܕܰܒܢܰܝ̈ ܝܺܣܪܳܐܶܝܠ ܡܶܢ ܡܶܨܪܶܝܢ.
30 ܒܶܗ ܒܙܰܒܢܳܐ ܗܰܘ. ܕܚܶܠ ܗܘܳܐ ܕܰܘܺܝܕ ܛܳܒ. ܘܠܳܐ ܡܶܫܟܰܚ ܗܘܳܐ ܠܡܺܐܙܰܠ ܠܰܡܨܰܠܳܝܽܘ ܩܕܳܡ ܡܳܪܝܳܐ. ܡܶܛܽܠ ܕܰܕܚܶܠ ܗܘܳܐ ܡܶܢ ܩܕܳܡ ܚܰܪܒܳܐ ܕܡܰܠܰܐܟܶܗ ܕܡܳܪܝܳܐ.