1 Chronicles 17
The first Book of Chronicles
܀ ܐ ܕܘܒܪ ܝܘܡ̈ܬܐ ܝܙ ܀
1 ܘܰܗܘܳܐ ܕܟܰܕ ܝܺܬܶܒ ܕܰܘܺܝܕ ܒܒܰܝܬܶܗ. ܐܶܡܰܪ ܕܰܘܺܝܕ ܠܢܳܬܳܢ ܢܒܺܝܳܐ. ܚܙܺܝ ܕܶܐܢܳܐ ܝܳܬܶܒ ܒܒܰܝܬܳܐ ܕܰܡܛܰܠܰܠ ܒܩܳܖ̈ܝܳܬܳܐ ܕܰܐܪܙܳܐ. ܘܩܺܐܒܽܘܬܶܗ ܕܡܳܪܝܳܐ ܫܰܪܝܳܐ ܒܓܰܘ ܡܰܫܟܢܳܐ ܕܣܰܥܪܳܐ.
2 ܘܶܐܡܰܪ ܢܳܬܳܢ ܠܕܰܘܺܝܕ. ܟܽܠ ܡܳܐ ܕܰܒܠܶܒܳܟ. ܙܶܠ ܘܰܥܒܶܕ.
3 ܘܰܗܘܳܐ ܒܠܺܠܝܳܐ ܗܰܘ. ܘܡܶܠܬܶܗ ܕܡܳܪܝܳܐ ܗܘܳܬ ܥܰܠ ܢܳܬܳܢ ܢܒܺܝܳܐ ܘܶܐܡܰܪ ܠܶܗ.
4 ܙܶܠ ܘܗܳܟܰܢܳܐ ܬܺܐܡܰܪ ܠܥܰܒܕܝ ܕܰܘܺܝܕ. ܕܰܐܢ̱ܬ ܠܳܐ ܬܶܒܢܶܐ ܠܺܝ ܒܰܝܬܳܐ ܠܡܶܬܰܒ ܒܶܗ.
5 ܡܶܛܽܠ ܕܠܳܐ ܝܶܬܒܶܬ ܒܒܰܝܬܳܐ. ܡܶܢ ܝܰܘܡܳܐ ܕܰܐܣܩܶܬ ܠܺܝܣܪܳܐܶܝܠ ܡܶܢ ܡܶܨܪܶܝܢ ܘܰܥܕܰܡܳܐ ܠܝܰܘܡܳܢܳܐ. ܘܰܗܘܺܝܬ ܡܫܰܢܶܐ ܡܶܢ ܡܰܫܟܢܳܐ ܠܡܰܫܟܢܳܐ.
6 ܗܳܐ ܟܡܳܐ ܕܰܡܗܰܠܶܟ ܗܘܺܝܬ ܒܟܽܠܗܽܘܢ ܒܢܰܝ̈ ܝܺܣܪܳܐܶܝܠ. ܕܰܠܡܳܐ ܡܶܠܬܳܐ ܐܶܡܪܶܬ ܠܚܰܕ ܡܶܢ ܕܰܝܳܢ̈ܶܐ ܕܰܒܢܰܝ̈ ܝܺܣܪܳܐܶܝܠ. ܕܦܶܩܕܶܬ ܠܰܡܕܳܢ ܠܥܰܡܝ ܝܺܣܪܳܐܶܝܠ. ܘܶܐܡ̇ܪܶܬ ܠܗܽܘܢ. ܕܰܠܡܳܢܳܐ ܠܳܐ ܒܢܰܝܬܽܘܢ ܠܺܝ ܒܰܝܬܳܐ ܕܰܡܛܰܠܰܠ ܒܰܐܖ̈ܙܶܐ.
7 ܐܳܦ ܗܳܫܳܐ ܗܳܟܰܢܳܐ ܬܺܐܡܰܪ ܠܥܰܒܕܝ ܕܰܘܺܝܕ. ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ. ܐܶܢܳܐ ܕܒܰܪܬܳܟ ܡܶܢ ܕܰܝܪܳܐ. ܡܶܢ ܒܳܬܰܪ ܥܳܢ̈ܳܐ. ܠܡܶܗܘܳܐ ܡܰܠܟܳܐ ܥܰܠ ܝܺܣܪܳܐܶܝܠ ܥܰܡܝ.
8 ܘܰܗܘܺܝܬ ܥܰܡܳܟ ܒܟܽܠ ܐܰܬܰܪ ܕܶܐܙܰܠܬ. ܘܰܐܘܒܕܶܬ ܠܟܽܠܗܽܘܢ ܒܥܶܠܕܒܳܒܰܝ̈ܟ ܡܶܢ ܩܕܳܡܰܝܟ. ܘܥܶܒܕܶܬ ܠܳܟ ܫܡܳܐ ܪܰܒܳܐ. ܐܰܝܟ ܫܡܳܐ ܕܪܰܘܖ̈ܒܳܢܶܐ ܕܺܐܝܬ ܒܰܐܪܥܳܐ.
9 ܘܶܐܨܽܘܒ ܕܽܘܟܬܳܐ ܠܥܰܡܝ ܝܺܣܪܳܐܶܝܠ. ܘܰܐܫܪܶܝܘܗܝ. ܘܢܶܬܶܒ ܒܕܽܘܟܬܶܗ. ܘܠܳܐ ܢܙܽܘܥ ܬܽܘܒ ܘܠܳܐ ܢܰܘܣܦܽܘܢ ܒܢܰܝ̈ ܥܰܘܠܳܐ ܠܰܡܓܰܠܳܝܽܘܬܶܗ ܐܰܝܟ ܕܰܒܩܰܕܡܳܝܬܳܐ.
10 ܡܶܢ ܝܰܘܡܳܐ ܕܰܥܒܰܕܬܳܟ ܕܰܝܳܢܳܐ ܥܰܠ ܥܰܡܝ ܝܺܣܪܳܐܶܝܠ. ܘܰܐܢܺܝܚܶܬ ܠܳܟ ܡܶܢ ܟܽܠܗܽܘܢ ܒܥܶܠܕܒܳܒܰܝ̈ܟ. ܘܚܰܘܝܳܟ ܡܳܪܝܳܐ ܕܡܰܠܟܽܘܬܳܐ ܩܝܳܡܳܐ ܗ̱ܝ ܠܳܟ ܠܥܳܠܰܡ.
11 ܘܟܰܕ ܢܶܫܠܡܽܘܢ ܝܰܘܡܰܝ̈ ܚܰܝܰܝ̈ܟ. ܘܬܺܐܙܰܠ ܘܬܶܬܟܰܢܰܫ ܠܘܳܬ ܐܰܒܳܗܰܝ̈ܟ ܐܰܩܺܝܡ ܙܰܪܥܳܟ ܡܶܢ ܒܳܬܪܳܟ. ܕܢܳܦܶܩ ܡܶܢ ܚܰܨܳܟ. ܘܰܐܬܩܢܺܝܗ̇ ܠܡܰܠܟܽܘܬܳܟ.
12 ܘܗܽܘ ܢܶܒܢܶܐ ܠܺܝ ܒܰܝܬܳܐ ܠܫܶܡܝ. ܘܰܐܬܩܶܢ ܟܽܘܪܣܝܳܐ ܕܡܰܠܟܽܘܬܶܗ ܠܥܳܠܰܡ.
13 ܐܶܢܳܐ ܐܶܗܘܶܐ ܠܶܗ ܠܰܐܒܳܐ. ܘܗܽܘ ܢܶܗܘܶܐ ܠܺܝ ܠܰܒܪܳܐ. ܘܛܰܝܒ̈ܘܳܬܝ ܠܳܐ ܢܶܥܒܖ̈ܳܢ ܡܶܢ ܠܘܳܬܶܗ. ܐܰܝܟ ܕܰܐܥܒܪܶܬ ܡܶܢ ܫܳܐܘܳܠ. ܕܰܗܘܳܐ ܡܶܢ ܩܕܳܡܰܝܟ.
14 ܘܶܐܫܠܛܺܝܘܗܝ ܒܒܰܝܬܝ ܘܰܒܡܰܠܟܽܘܬܝ ܠܥܳܠܰܡ ܥܳܠܡܺܝܢ. ܘܟܽܘܪܣܝܳܐ ܕܡܰܠܟܽܘܬܶܗ. ܢܶܗܘܶܐ ܡܛܰܝܰܒ ܠܶܗ ܠܥܳܠܰܡ.
15 ܥܰܠ ܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ. ܘܥܰܠ ܟܽܠܶܗ ܚܶܙܘܳܐ ܗܳܢܳܐ. ܗܳܟܰܢܳܐ ܡܰܠܶܠ ܢܳܬܰܢ ܢܒܺܝܳܐ ܥܰܡ ܕܰܘܺܝܕ.
16 ܘܶܐܬܳܐ ܡܰܠܟܳܐ ܕܰܘܺܝܕ. ܘܺܝܬܶܒ ܩܕܳܡ ܡܳܪܝܳܐ. ܘܶܐܡܰܪ. ܡܳܢܳܐ ܚܫܺܝܒ ܐ̱ܢܳܐ ܩܕܳܡܰܝܟ ܡܳܪܶܐ ܡܳܖ̈ܰܘܳܬܳܐ ܘܡܳܢܰܐ ܗ̱ܘ ܒܰܝܬܝ. ܕܡܰܛܺܝܬܳܢܝ ܥܕܰܡܳܐ ܠܗܳܪܟܳܐ.
17 ܙܥܽܘܪܝܳܐ ܗ̱ܝ ܗܳܕܶܐ ܒܥܰܝܢܰܝ̈ܟ. ܡܳܪܶܐ ܡܳܖ̈ܰܘܳܬܳܐ. ܕܡܰܠܶܠܬ ܥܰܠ ܒܰܝܬܶܗ ܕܥܰܒܕܳܟ ܡܶܢ ܠܩܽܘܕܡܺܝܢ ܘܟܽܠܗܽܘܢ ܒܢܰܝ̈ܢܳܫܳܐ ܕܥܳܒܕܺܝܢ ܕܶܚܠܬܳܟ ܒܟܽܠܶܗ ܠܶܒܗܽܘܢ. ܡܰܦܶܩ ܐܰܢ̱ܬ ܡܶܢ ܚܶܫܽܘܟܳܐ ܠܢܰܗܺܝܪܳܐ ܡܳܪܶܐ ܡܳܖ̈ܰܘܳܬܳܐ.
18 ܘܡܳܢܳܐ ܢܶܫܬܰܒܗܰܪ ܬܽܘܒ ܕܰܘܺܝܕ ܠܰܡܡܰܠܳܠܽܘ ܩܕܳܡܰܝܟ. ܓܠܶܝܢ ܥܒܳܕܰܘ̈ܗܝ ܕܥܰܒܕܳܟ ܡܳܪܶܐ ܡܳܖ̈ܰܘܳܬܳܐ.
19 ܡܶܛܽܠ ܕܝܳܕܰܥ ܐܰܢ̱ܬ. ܡܳܢܳܐ ܐܺܝܬ ܒܠܶܒܶܗ ܕܥܰܒܕܳܟ. ܥܒܰܕܬ ܠܶܗ ܟܽܠܗܶܝܢ ܪܰܘܖ̈ܒܳܬܳܐ ܗܳܠܶܝܢ. ܠܡܰܘܪܳܒܽܘ ܠܥܰܒܕܳܟ.
20 ܡܶܛܽܠ ܗܳܢܳܐ ܝܺܕܰܥܬ ܡܳܪܶܐ ܡܳܖ̈ܰܘܳܬܳܐ. ܡܶܛܽܠ ܕܠܰܝܬ ܐܰܟܘܳܬܳܟ. ܘܠܰܝܬ ܐܰܠܳܗܳܐ ܐܶܠܳܐ ܐܶܢ ܐܰܢ̱ܬ. ܐܰܝܟ ܟܽܠ ܕܰܫܡܰܥܢ ܒܶܐܕܢܰܝ̈ܢ.
21 ܘܡܰܢܽܘ ܐܺܝܬ ܠܳܟ ܐܰܝܟ ܥܰܡܳܟ ܝܺܣܪܳܐܶܝܠ. ܥܰܡܳܐ ܚܰܕ ܒܰܐܪܥܳܐ. ܕܶܐܬܓܠܺܝܬ ܡܶܢ ܫܡܰܝܳܐ ܘܰܦܪܰܩܬ ܐܶܢܽܘܢ. ܘܡܶܛܽܠܬܗܽܘܢ ܥܒܰܕܬ ܢܶܣܝܽܘܢ̈ܶܐ ܪܰܘܖ̈ܒܶܐ ܘܰܕܚܺܝ̈ܠܶܐ. ܘܡܰܚ̈ܘܳܬܳܐ ܪܰܘܖ̈ܒܳܬܳܐ ܥܰܠ ܡܶܨܖ̈ܳܝܶܐ. ܥܕܰܡܳܐ ܠܰܐܝܟܳܐ ܕܰܐܦܶܩܬ ܐܶܢܽܘܢ ܡܶܢ ܒܰܝܢܳܬܗܽܘܢ.
22 ܘܰܐܬܩܶܢܬ ܠܳܟ ܠܥܰܡܳܟ ܝܺܣܪܳܐܶܝܠ. ܠܡܶܗܘܳܐ ܠܳܟ ܥܰܡܳܐ. ܥܕܰܡܳܐ ܠܥܳܠܰܡ ܥܳܠܡܺܝܢ. ܘܰܐܢ̱ܬ ܡܳܪܝܳܐ ܗܘܰܝܬ ܠܗܽܘܢ ܐܰܠܳܗܳܐ.
23 ܡܶܟܺܝܠ ܡܳܪܝܳܐ. ܡܶܠܬܳܐ ܕܶܐܡܰܪܬ ܥܰܠ ܥܰܒܕܳܟ. ܘܥܰܠ ܒܢܰܝ̈ ܒܰܝܬܶܗ. ܩܰܝܶܡ ܠܥܳܠܰܡ ܘܰܥܒܶܕ ܐܰܝܟܰܢܳܐ ܕܶܐܡܰܪܬ.
24 ܘܢܶܫܬܰܪܪܽܘܢ ܥܒܳܕܰܝ̈ܟ ܠܥܳܠܰܡ ܘܢܶܫܬܰܒܰܚ ܫܡܳܟ ܠܥܳܠܰܡ ܒܓܰܘ ܥܳܠܡܳܐ. ܘܢܶܗܘܽܘܢ ܐܳܡܪܺܝܢ. ܡܳܪܝܳܐ ܚܰܝܠܬܳܢܳܐ ܡܳܪܶܐ ܡܳܖ̈ܰܘܳܬܳܐ. ܐܰܠܳܗܳܐ ܕܺܝܣܪܳܐܶܝܠ ܘܒܰܝܬܶܗ ܕܕܰܘܺܝܕ ܥܰܒܕܳܟ. ܢܶܗܘܶܐ ܡܰܬܩܰܢ ܩܕܳܡܰܝܟ ܠܥܳܠܰܡ.
25 ܡܶܛܽܠ ܕܰܐܢ̱ܬ ܐܰܠܳܗܝ ܓܠܰܝܬ ܐ̱ܪܳܙܳܐ ܠܥܰܒܕܳܟ. ܘܶܐܡܰܪܬ ܠܶܗ. ܕܒܰܝܬܳܐ ܒܢܺܝ ܠܳܟ. ܡܶܛܽܠ ܗܳܢܳܐ ܣܕܰܪ ܥܰܒܕܳܟ ܒܠܶܒܶܗ. ܠܰܡܨܰܠܳܝܽܘ ܩܕܳܡܰܝܟ ܨܠܽܘܬܳܐ ܗܳܕܶܐ.
26 ܡܶܟܺܝܠ ܡܳܪܝܳܐ ܐܰܢ̱ܬ ܗ̱ܘ ܐܰܠܳܗܝ. ܘܟܽܠ ܡܶܠܰܝ̈ܟ ܬܖ̈ܺܝܨܳܬܳܐ. ܐܰܝܠܶܝܢ ܕܡܰܠܶܠܬ ܠܥܰܒܕܳܟ. ܛܳܒ̈ܳܬܳܐ ܐܶܢܶܝܢ.
27 ܘܡܶܟܺܝܠ ܐܶܬܓܠܰܝ ܠܰܡܒܰܪܳܟܽܘ ܠܒܰܝܬܶܗ ܕܥܰܒܕܳܟ. ܕܢܶܗܘܶܐ ܩܕܳܡܰܝܟ ܠܥܳܠܰܡ ܥܳܠܡܺܝܢ. ܡܶܛܽܠ ܕܰܐܢ̱ܬ ܗ̱ܘ ܡܳܪܝܳܐ ܡܳܪܶܐ ܡܳܖ̈ܰܘܳܬܳܐ ܡܰܠܶܠܬ ܘܡܶܢ ܒܽܘܪܟܬܳܟ ܡܶܬܒܰܪܟܺܝܢ ܒܳܬܰܝ̈ܗܽܘܢ ܕܙܰܕܺܝ̈ܩܶܐ ܠܥܳܠܰܡ.