1 Chronicles 29
The first Book of Chronicles
܀ ܐ ܕܘܒܪ ܝܘܡ̈ܬܐ ܟܛ ܀
1 ܘܶܐܡܰܪ ܕܰܘܺܝܕ ܡܰܠܟܳܐ ܠܟܽܠܗܶܝܢ ܟܢܽܘ̈ܫܳܬܳܐ ܕܺܝܣܪܳܐܶܝܠ. ܫܠܶܝܡܽܘܢ ܗܳܢܳܐ ܒܶܪܝ. ܛܰܠܝܰܐ ܗ̱ܘ ܙܥܽܘܪܳܐ. ܘܠܶܗ ܓܒܳܐ ܡܳܪܝܳܐ ܡܶܢ ܟܽܠܗܽܘܢ ܒܢܰܝ̈. ܡܶܛܽܠ ܕܛܰܠܝܳܐ ܚܰܟܺܝܡ ܘܣܰܟܽܘܠܬܳܢܰܐ ܗ̱ܘ. ܘܰܥܒܺܝܕܬܳܐ ܗܳܕܶܐ ܕܶܐܬܝܰܗܒܰܬ ܠܶܗ. ܠܳܐ ܗܘܳܬ ܙܥܽܘܪܳܐ. ܪܰܒܳܐ ܗ̱ܝ. ܡܶܛܽܠ ܕܰܠܒܰܪܢܳܫܳܐ ܠܳܐ ܐܶܬܝܰܗܒܰܬ ܗܳܟܰܢܳܐ. ܐܶܬܥܰܫܢܘ ܘܶܐܬܓܰܢ̱ܒܪܘ ܒܳܗ̇. ܡܶܛܽܠ ܕܰܕܡܳܪܝܳܐ ܗ̱ܝ ܐܰܠܳܗܰܢ.
2 ܟܽܠ ܚܰܝ̈ܠܰܝ ܘܟܽܠ ܢܶܟ̈ܣܰܝ ܛܰܝܒܶܬ. ܟܽܠ ܡܶܕܶܡ ܕܡܶܬܒܥܶܐ ܠܒܰܝܬܶܗ ܕܡܳܪܝܳܐ ܐܰܠܳܗܝ. ܕܰܗܒܳܐ ܠܕܰܗܒܳܐ. ܘܣܺܐܡܳܐ ܠܣܺܐܡܳܐ. ܘܰܢܚܳܫܳܐ ܠܰܢܚܳܫܳܐ. ܘܦܰܪܙܠܳܐ ܠܦܰܪܙܠܳܐ. ܕܩܰܝ̈ܣܶܐ ܠܩܰܝ̈ܣܶܐ. ܘܰܐܖ̈ܙܶܐ ܠܰܐܖ̈ܙܶܐ. ܟܺܐܦ̈ܶܐ ܛܳܒ̈ܳܬܳܐ ܘܡܰܖ̈ܓܳܢܝܳܬܳܐ.
3 ܘܟܽܠ ܡܶܕܶܡ ܕܡܶܬܒܥܶܐ ܠܶܗ ܠܒܰܝܬܳܐ. ܛܰܝܒܶܬ ܘܬܰܩܢܶܬ ܠܶܗ ܡܶܢ ܡܶܣܟܺܢܽܘܬܝ. ܘܟܶܣܦܳܐ ܛܰܝܒܶܬ ܠܰܢܦܰܩܬܶܗ ܕܒܰܝܬܳܐ ܕܰܐܠܳܗܝ ܡܶܢ ܡܶܣܟܺܢܽܘܬܝ.
4 ܐܳܠܶܦ ܐܰܠܦܺܝ̈ܢ ܟܰܟܖ̈ܶܐ ܕܕܰܗܒܳܐ. ܡܶܢ ܕܰܗܒܳܐ ܛܳܒܳܐ. ܘܬܰܪܬܶܝܢ ܙܰܒܢܺܝ̈ܢ ܐܳܠܶܦ ܐܰܠܦܺܝ̈ܢ ܟܰܟܖ̈ܺܝܢ ܕܟܶܣܦܳܐ. ܠܡܶܩܪܰܡ ܐܶܣ̈ܶܐ ܕܒܰܝܬܳܐ.
5 ܠܰܐܝܟܳܐ ܕܡܶܬܒܥܶܐ ܕܰܗܒܳܐ. ܢܺܐܙܰܠ ܕܰܗܒܳܐ. ܘܠܰܐܝܟܳܐ ܕܡܶܬܒܥܶܐ ܣܺܐܡܳܐ. ܢܺܐܙܰܠ ܣܺܐܡܳܐ. ܘܰܠܟܽܠܗܶܝܢ ܥܒܺܝ̈ܕܳܬܳܐ. ܕܬܶܫܠܰܡ ܥܒܺܝܕܬܳܐ ܒܝܰܪܚܳܗ̇. ܥܒܺܝܕܬܳܐ ܠܳܐ ܬܶܫܬܰܘܚܰܪ. ܐܶܠܳܐ ܕܬܶܫܠܰܡ ܐܰܝܟܰܢܳܐ ܕܡܶܬܒܥܶܐ ܠܳܗ̇ ܒܚܽܘܫܒܳܢܳܗ̇.
6 ܘܶܐܬܟܰܢܰܫܘ ܪܰܘܖ̈ܒܳܢܶܐ ܕܰܐܒܳܗ̈ܳܬܳܐ. ܘܪܰܘܖ̈ܒܳܢܶܐ ܕܫܰܒ̈ܛܶܐ ܕܺܝܣܪܳܐܶܝܠ. ܘܪܰܘܖ̈ܒܳܢܶܐ ܕܰܐܠܦ̈ܶܐ ܘܰܕܡܰܐܘ̈ܳܬܳܐ. ܘܕܰܐܝܠܶܝܢ ܕܫܰܠܺܝܛܺܝܢ ܥܰܠ ܥܒܺܝ̈ܕܳܬܳܐ ܕܡܰܠܟܳܐ.
7 ܘܝܰܗܒܘ ܠܰܥܒܺܝ̈ܕܳܬܳܐ ܕܒܰܝܬܶܗ ܕܡܳܪܝܳܐ. ܕܰܗܒܳܐ ܟܰܟܖ̈ܶܐ ܚܰܡܫܳܐ ܐܰܠܦܺܝ̈ܢ. ܘܰܐܢܟܳܐ ܛܳܒܳܐ ܠܣܺܝ̈ܠܽܘܢܶܐ. ܡܰܐܬܶܝܢ ܐܰܠܦܺܝ̈ܢ. ܘܣܺܐܡܳܐ ܟܰܟܖ̈ܶܐ ܥܶܣܪܺܝܢ ܐܰܠܦܺܝ̈ܢ. ܘܰܢܚܳܫܳܐ ܩܽܘܪܺܝܢܬܳܝܳܐ ܟܰܟܖ̈ܶܐ ܬܡܳܢܬܰܥܣܰܪ ܐܰܠܦܺܝ̈ܢ. ܘܦܰܪܙܠܳܐ ܡܳܐܐ ܐܰܠܦܺܝ̈ܢ ܟܰܟܖ̈ܺܝܢ.
8 ܘܟܶܣܦܳܐ ܘܕܰܗܒܳܐ ܐܰܝܟܰܢܳܐ ܕܡܶܬܒܥܶܐ ܗܘܳܐ ܠܶܗ. ܝܰܗܒܘ ܒܶܝܬ ܓܰܙܳܐ ܕܒܰܝܬܶܗ ܕܡܳܪܝܳܐ. ܥܰܠ ܐܺܝܕܳܐ ܕܓܶܪܫܽܘܢ ܓܺܝܙܰܒܪܳܐ.
9 ܘܰܚܕܺܝܘ ܟܽܠܶܗ ܥܰܡܳܐ ܕܺܝܣܪܳܐܶܝܠ ܒܡܰܘ̈ܗܒܳܬܳܐ ܗܳܠܶܝܢ. ܡܶܛܽܠ ܕܰܒܠܶܒܳܐ ܫܰܠܡܳܐ ܝܰܗܒ ܐܶܢܶܝܢ ܕܰܘܺܝܕ ܩܕܳܡ ܡܳܪܝܳܐ. ܘܳܐܦ ܕܰܘܺܝܕ ܚܕܺܝ ܚܰܕܽܘܬܳܐ ܪܰܒܬܳܐ. ܘܫܰܒܰܚ ܬܶܫܒ̈ܚܳܬܳܐ ܪܰܘܖ̈ܒܳܬܳܐ ܠܡܳܪܝܳܐ.
10 ܘܒܰܪܶܟ ܕܰܘܺܝܕ ܠܡܳܪܝܳܐ ܩܕܳܡ ܟܽܠܗܶܝܢ ܟܢܽܘ̈ܫܳܬܳܐ ܕܺܝܣܪܳܐܶܝܠ. ܘܶܐܡܰܪ ܕܰܘܺܝܕ ܒܪܺܝܟ ܐܰܢ̱ܬ ܡܳܪܝܳܐ ܐܰܠܳܗܶܗ ܕܺܝܣܪܳܐܶܝܠ ܐܰܒܽܘܢ. ܡܶܢ ܥܳܠ̈ܡܶܐ ܘܰܥܕܰܡܳܐ ܠܥܳܠ̈ܡܶܐ.
11 ܡܶܛܽܠ ܕܕܺܝܠܳܟ ܗܺܝ ܡܳܪܝܳܐ ܪܰܒܽܘܬܳܐ. ܘܓܰܢ̱ܒܳܪܽܘܬܳܐ. ܘܬܶܫܒܽܘܚܬܳܐ. ܘܝܳܐܝܽܘܬܳܐ. ܘܗܶܕܪܳܐ. ܘܺܐܝܩܳܪܳܐ ܡܶܛܽܠ ܕܰܐܢ̱ܬ ܫܰܠܺܝܛ ܒܰܫܡܰܝܳܐ ܘܒܰܐܪܥܳܐ. ܕܺܝܠܳܟ ܗܺܝ ܡܳܪܝܳܐ ܡܰܠܟܽܘܬܳܐ. ܘܚܶܟܡܬܳܐ. ܘܓܰܢ̱ܒܳܪܽܘܬܳܐ. ܘܺܝܕܰܥܬܳܐ.
12 ܘܥܽܘܬܪܳܐ ܘܺܐܝܩܳܪܳܐ ܡܶܢ ܩܕܳܡܰܝܟ ܗ̱ܘ. ܘܰܐܢ̱ܬ ܫܰܠܺܝܛ ܒܟܽܠ ܡܶܕܶܡ. ܘܕܺܝܠܳܟ ܗܽܘ ܚܰܝܠܳܐ ܘܓܰܢ̱ܒܳܪܽܘܬܳܐ ܘܰܐܢ̱ܬ ܡܰܘܪܶܒ ܘܰܡܥܰܫܶܢ ܠܟܽܠܗܶܝܢ ܒܶܖ̈ܝܳܬܳܐ ܕܰܐܢ̱ܬ ܒܪܰܝܬ.
13 ܘܳܐܦ ܗܳܫܳܐ ܡܳܪܝܳܐ ܐܰܠܳܗܰܢ. ܡܰܘܕܶܝܢܰܢ ܠܳܟ ܘܰܡܫܰܒܚܺܝܢܰܢ ܠܰܫܡܳܐ ܕܪܰܒܽܘܬܳܟ.
14 ܡܶܛܽܠ ܕܡܳܢܳܐ ܐܶܢܳܐ ܘܡܳܢܳܐ ܥܰܡܝ. ܡܶܛܽܠ ܕܡܶܢ ܟܽܠܗܽܘܢ ܡܰܠܦܳܢܰܝ̈ ܝܶܠܦܶܬ ܡܶܛܽܠ ܕܽܐܘܪܚܳܟ ܕܚܰܝ̈ܶܐ ܗܺܝ ܥܰܕܰܪܬܰܢܝ. ܘܰܐܢ̱ܬ ܗܽܘ ܣܰܒܪܰܢ ܡܳܪܝܳܐ ܐܰܠܳܗܰܢ.
15 ܡܶܛܽܠ ܕܰܚܢܰܢ ܡܰܡܬܠܺܝܢܰܢ ܒܠܰܗܓܳܐ ܕܩܶܕܪܳܐ. ܘܥܳܡܽܘܖ̈ܶܐ ܚܢܰܢ ܩܕܳܡܰܝܟ. ܙܥܽܘܪܺܝܢ ܒܥܳܠܡܳܐ. ܘܰܐܢ̱ܬ ܫܠܰܛܬ ܒܰܐܒܳܗ̈ܳܬܰܢ ܩܰܕܡܳܐܺܝܬ. ܘܦܰܩܶܕܬ ܐܶܢܽܘܢ ܒܰܐܝܕܳܐ ܐܽܘܪܚܳܐ ܢܺܐܙܽܠܘܢ ܘܢܺܚܽܘܢ.
16 ܘܠܳܟ ܚܢܰܢ ܡܫܰܒܚܺܝܢܰܢ ܡܳܪܝܳܐ ܐܰܠܳܗܰܢ. ܕܬܶܦܪܩܰܢ ܡܶܢ ܟܽܠ ܕܡܰܗܪܺܝܢ ܠܰܢ. ܘܰܡܚܰܣܕܺܝܢ ܠܰܢ ܥܰܡ̈ܡܶܐ. ܘܳܐܡܪܺܝܢ ܠܰܢ. ܕܰܐܝܟܰܐ ܗ̱ܘ ܐܰܠܳܗܟܽܘܢ ܕܦܳܠܚܺܝܢ ܐܢ̱ܬܽܘܢ ܠܶܗ.
17 ܘܝܳܕܰܥ ܐ̱ܢܳܐ ܐܰܠܳܗܝ ܕܰܐܢ̱ܬ ܒܳܕܶܩ ܠܶܒܳܐ. ܘܰܒܗܰܝܡܳܢܽܘܬܳܐ ܐܰܢ̱ܬ ܪܥܶܐ. ܘܶܐܢܳܐ ܒܗܰܝܡܳܢܽܘܬܳܐ ܕܠܶܒܝ ܫܰܒܚܶܬ ܗܳܠܶܝܢ ܟܽܠܗܶܝܢ. ܘܳܐܦ ܗܳܫܳܐ ܥܰܡܳܟ ܕܶܐܫܬܟܰܚ ܗܳܪܟܳܐ. ܚܙܺܝܬ ܕܰܒܚܰܕܽܘܬܳܐ ܪܰܒܬܳܐ ܡܫܰܒܚܺܝܢ ܠܳܟ ܘܳܐܡܪܺܝܢ.
18 ܡܳܪܝܳܐ ܐܰܠܳܗܶܗ ܕܰܐܒܪܳܗܳܡ ܘܕܺܐܝܣܚܳܩ ܘܕܺܝܣܪܳܐܶܝܠ ܐܰܒܳܗ̈ܳܬܰܢ. ܛܰܪ ܗܳܠܶܝܢ ܟܽܠܗܶܝܢ ܕܶܐܫܬܰܘܕܺܝܬ ܠܰܢ ܠܥܳܠܰܡ ܘܰܐܦܢܳܐ ܠܶܒܰܢ ܠܕܶܚܠܬܳܟ.
19 ܐܶܢܳܐ ܕܰܘܺܝܕ ܥܢܺܝܬ ܘܶܐܡܪܶܬ ܗܳܟܰܢܳܐ. ܡܳܪܝܳܐ ܐܰܠܳܗܝ. ܐܳܦ ܠܰܫܠܶܝܡܽܘܢ ܒܶܪܝ. ܗܰܒ ܠܶܒܳܐ ܫܰܠܡܳܐ. ܠܡܶܛܰܪ ܦܽܘܩܕܳܢܰܝ̈ܟ ܘܣܳܗ̈ܕܘܳܬܳܟ ܘܰܩܝܳܡܳܟ. ܘܰܠܡܶܥܒܰܕ ܟܽܠ ܡܶܕܶܡ ܕܦܰܩܶܕܬ. ܘܰܠܡܶܒܢܳܐ ܒܰܝܬܳܐ ܕܛܰܝܒܶܬ ܡܶܛܽܠ ܕܢܶܬܩܰܕܰܫ ܫܡܳܟ ܪܰܒܳܐ. ܘܢܶܫܬܰܒܰܚ ܒܥܳܠܡܳܐ ܕܰܒܪܰܝܬ ܩܕܳܡ ܕܳܚܠܰܝ̈ܟ.
20 ܘܶܐܡܰܪ ܕܰܘܺܝܕ ܠܟܽܠܶܗ ܥܰܡܳܐ ܕܺܝܣܪܳܐܶܝܠ. ܒܰܪܶܟܘ ܠܡܳܪܝܳܐ ܐܰܠܳܗܟܽܘܢ ܘܒܰܪܶܟ ܟܽܠܶܗ ܥܰܡܳܐ ܠܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܗܽܘܢ. ܘܰܢܦܰܠܘ ܘܰܣܓܶܕܘ ܠܡܳܪܝܳܐ. ܘܒܰܪܶܟܘ ܐܳܦ ܠܡܰܠܟܳܐ ܕܰܘܺܝܕ. ܘܕܰܒܰܚܘ ܕܶܒܚ̈ܶܐ ܩܕܳܡ ܡܳܪܝܳܐ.
21 ܘܩܰܪܶܒܘ ܥܠܰܘ̈ܳܬܳܐ ܩܕܳܡ ܡܳܪܝܳܐ ܡܶܢ ܒܳܬܰܪ ܝܰܘܡܳܐ ܗܰܘ. ܬܰܘܖ̈ܶܐ ܐܳܠܶܦ. ܘܕܶܟܖ̈ܶܐ ܐܳܠܶܦ. ܘܶܐܡܖ̈ܶܐ ܐܳܠܶܦ. ܘܢܽܘ̈ܩܳܝܶܐ ܣܰܓܺܝ ܘܳܐܦ ܠܗܽܘܢ ܕܰܒܰܚܘ ܕܶܒ̈ܚܳܬܳܐ ܣܰܓܺܝ ܒܢܰܝ̈ ܝܺܣܪܳܐܶܝܠ.
22 ܘܶܐܟܰܠܘ ܘܶܐܫܬܺܝܘ ܩܕܳܡ ܡܳܪܝܳܐ ܒܝܰܘܡܳܐ ܗܰܘ. ܒܚܰܕܽܘܬܳܐ ܪܰܒܬܳܐ ܘܰܐܩܺܝܡܘ ܒܡܰܠܟܽܘܬܳܐ ܠܰܫܠܶܝܡܽܘܢ ܒܪܶܗ ܕܕܰܘܺܝܕ. ܘܰܠܨܳܕܽܘܩ ܐܰܩܺܝܡܘ ܟܳܗܢܳܐ.
23 ܘܺܝܬܶܒ ܫܠܶܝܡܽܘܢ ܥܰܠ ܟܽܘܪܣܰܝ ܡܰܠܟܽܘܬܶܗ ܕܡܳܪܝܳܐ. ܠܰܡܩܳܡ ܒܡܰܠܟܽܘܬܳܐ ܚܠܳܦ ܕܰܘܺܝܕ ܐܰܒܽܘܗܝ ܘܰܐܨܠܰܚ. ܘܶܐܫܬܡܰܥ ܠܶܗ ܟܽܠܶܗ ܝܺܣܪܳܐܶܝܠ.
24 ܘܟܽܠ ܒܢܰܘ̈ܗܝ ܕܡܰܠܟܳܐ ܕܰܘܺܝܕ. ܐܰܫܠܶܡܘ ܠܰܫܠܶܝܡܽܘܢ ܒܪܶܗ.
25 ܘܰܐܘܪܒܶܗ ܡܳܪܝܳܐ ܠܰܫܠܶܝܡܽܘܢ ܠܥܶܠ. ܠܥܺܝܢ ܟܽܠܶܗ ܝܺܣܪܳܐܶܝܠ. ܘܝܰܗܒ ܥܠܰܘܗܝ ܙܺܝܘܳܐ ܕܡܰܠܟܽܘܬܳܐ ܕܰܠܚܰܕ ܡܶܢ ܡܰܠ̈ܟܶܐ ܕܺܝܣܪܳܐܶܝܠ. ܕܰܗܘܰܘ ܩܕܳܡܰܘܗܝ. ܠܳܐ ܕܳܡܶܐ.
26 ܘܕܰܘܺܝܕ ܒܪܶܗ ܕܺܐܝܫܰܝ. ܐܰܩܺܝܡ ܒܡܰܠܟܽܘܬܶܗ ܠܰܫܠܶܝܡܽܘܢ ܒܪܶܗ. ܥܰܠ ܟܽܠܶܗ ܝܺܣܪܳܐܶܝܠ.
27 ܘܝܰܘ̈ܡܳܬܳܐ ܕܩܳܡ ܕܰܘܺܝܕ ܒܡܰܠܟܽܘܬܳܐ ܥܰܠ ܟܽܠܶܗ ܝܺܣܪܳܐܶܝܠ. ܐܰܪܒܥܺܝܢ ܫܢܺܝ̈ܢ. ܒܚܶܒܪܽܘܢ ܩܳܡ ܒܡܰܠܟܽܘܬܳܐ ܫܒܰܥ ܫܢܺܝ̈ܢ ܘܒܽܐܘܪܺܫܠܶܡ ܩܳܡ ܒܡܰܠܟܽܘܬܳܐ ܬܠܳܬܺܝܢ ܘܰܬܠܳܬ ܫܢܺܝ̈ܢ. ܥܰܠ ܟܽܠܶܗ ܝܺܣܪܳܐܶܝܠ ܘܺܝܗܽܘܕܳܐ.
28 ܘܡܺܝܬ ܕܰܘܺܝܕ ܒܪܶܗ ܕܺܐܝܫܰܝ ܒܣܰܝܒܽܘܬܳܐ ܛܳܒܬܳܐ. ܣܐܶܒ ܘܰܣܒܰܥ ܝܰܘ̈ܡܰܝ ܚܰܝܰܘ̈ܗܝ. ܘܺܝܪܶܒ ܒܥܽܘܬܪܳܐ ܕܥܳܠܡܳܐ. ܘܒܺܐܝܩܳܪܶܗ ܘܩܳܡ ܒܡܰܠܟܽܘܬܳܐ ܫܠܶܝܡܽܘܢ ܒܪܶܗ ܒܳܬܪܶܗ.
29 ܘܦܶܬܓܳܡܰܘ̈ܗܝ ܕܕܰܘܺܝܕ ܡܰܠܟܳܐ ܕܺܝܣܪܳܐܶܝܠ. ܩܰܕܡܳܝ̈ܶܐ ܘܰܐ̱ܚܖ̈ܳܝܶܐ. ܗܶܢܽܘܢ ܟܬܺܝܒܺܝܢ ܒܦܶܬܓܳܡܰܘ̈ܗܝ ܕܰܫܡܽܘܐܶܝܠ ܢܒܺܝܳܐ. ܘܰܒܦܶܬܓܳܡܰܘ̈ܗܝ ܕܢܳܬܳܢ ܢܒܺܝܳܐ. ܘܰܒܦܶܬܓܳܡܰܘ̈ܗܝ ܕܓܳܕ ܢܒܺܝܳܐ.
30 ܘܟܽܠܳܗ̇ ܡܰܠܟܽܘܬܶܗ ܘܓܰܢ̱ܒܳܪܽܘܬܶܗ. ܘܙܰܒܢ̈ܶܐ ܕܰܥܒܰܪܘ ܥܠܰܘܗܝ ܘܥܰܠ ܝܺܣܪܳܐܶܝܠ. ܘܥܰܠ ܟܽܠ ܡܰܠܟܽܘܬ ܐܰܪܥܶܗ. ܡܶܛܽܠ ܕܰܥܒܰܕ ܕܰܘܺܝܕ ܫܰܦܺܝܪ ܩܕܳܡ ܡܳܪܝܳܐ. ܘܠܳܐ ܥܒܰܪ ܡܶܢ ܟܽܠ ܡܶܕܶܡ ܕܦܰܩܕܶܗ. ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗܝ.