John 4
The Gospel according to John
܀ ܝܘܚܢܢ ܕ ܀
1- ܝܺܕ̥ܰܥ ܕ̊ܶܝܢ ܝܶܫܽܘܥ ܕ̊ܰܫܡܰܥܘ ܦ̊ܪ̈ܺܝܫܶܐ ܕ̊ܬ̥ܰܠܡܺܝ̈ܕ̥ܶܐ ܣܰܓ̊ܺܝ̈ܶܐܐ ܥܒ̥ܰܕ̥. ܘܡܰܥܡܶܕ̥ ܝܰܬ̊ܺܝܪ ܡܶܢ ܝܽܘܚܰܢܳܢ.
2- ܟ̊ܰܕ̥ ܠܳܐ ܗ̱ܘܳܐ ܗܽܘ ܝܶܫܽܘܥ ܡܰܥܡܶܕ̥ ܗ̱ܘܳܐ. ܐܶܠܳܐ ܬ̊ܰܠܡܺܝ̈ܕ̥ܰܘܗ̱ܝ.
3- ܘܫܰܒ̥ܩܳܗ̇ ܠܺܝܗܽܘܕ̥܆ ܘܶܐܙܰܠ ܠܶܗ ܬ̊ܽܘܒ̥ ܠܰܓ̥ܠܺܝܠܳܐ܀
4- ܡܰܥܒ̊ܕ̥ܳܐ ܗ̱ܘܳܬ̥ ܠܶܗ ܕ̊ܶܝܢ ܕ̊ܢܺܐܬ̥ܶܐ ܢܶܥܒ̊ܰܪ ܥܰܠ ܒ̊ܶܝܬ̥ ܫܳܡܪ̈ܳܝܶܐ.
5- ܘܶܐܬ̥ܳܐ ܠܰܡܕ̥ܺܝܢ̱ܬ̊ܳܐ܁ ܕ̊ܡܶܬ̥ܩܰܪܝܳܐ ܫܳܟ̥ܰܪ. ܥܰܠ ܓ̊ܶܢ̱ܒ̥ ܩܪܺܝܬ̥ܳܐ. ܕ̊ܝܰܗ̱ܒ̥ ܗ̱ܘܳܐ ܝܰܥܩܽܘܒ̥ ܠܝܰܘܣܶܦ̥ ܒ̊ܪܶܗ.
6- ܘܺܐܝܬ̥ ܗ̱ܘܳܐ ܬ̊ܰܡܳܢ ܡܥܺܝܢܳܐ ܕ̊ܡܰܝ̈ܳܐ ܕ̊ܝܰܥܩܽܘܒ̥. ܗܽܘ ܕ̊ܶܝܢ ܝܶܫܽܘܥ ܠܶܐܐ ܗ̱ܘܳܐ ܡܶܢ ܥܰܡܠܳܐ ܕ̊ܽܐܘܪܚܳܐ. ܘܺܝܬ̥ܶܒ̥ ܗ̱ܘܳܐ ܠܶܗ ܥܰܠ ܡܥܺܝܢܳܐ. ܘܺܐܝܬ̥ ܗ̱ܘ̈ܰܝ ܫܶܬ̥ ܫܳܥܺܝ̈ܢ.
7- ܘܶܐܬ̥ܳܬ̥ ܐܰܢ̱ܬ̊ܬ̥ܳܐ ܡܶܢ ܫܳܡܪܺܝܢ ܕ̊ܬ̥ܶܡܠܶܐ ܡܰܝ̈ܳܐ. ܘܶܐܡܰܪ ܠܳܗ̇ ܝܶܫܽܘܥ. ”ܗܰܒ̥ܝ ܠܺܝ ܡܰܝ̈ܳܐ ܐܶܫܬ̊ܶܐ.“
8- ܬ̊ܰܠܡܺܝ̈ܕ̥ܰܘܗ̱ܝ ܓ̊ܶܝܪ ܥܰܠܘ ܗ̱ܘܰܘ ܠܰܡܕ̥ܺܝܢ̱ܬ̊ܳܐ. ܕ̊ܢܶܙܒ̊ܢܽܘܢ ܠܗܽܘܢ ܣܰܝܒ̊ܳܪܬ̊ܳܐ.
9- ܐܳܡܪܳܐ ܠܶܗ ܗܳܝ ܐܰܢ̱ܬ̊ܬ̥ܳܐ ܫܳܡܪܳܝܬ̊ܳܐ. ܐܰܝܟ̊ܰܢܳܐ ܐܰܢ̱ܬ̊ ܝܺܗܽܘܕ̥ܳܝܳܐ ܐܰܢ̱ܬ̊܇ ܘܡܶܢܝ ܫܳܐܶܠ ܐܰܢ̱ܬ̊ ܠܡܶܫܬ̊ܳܐ. ܕ̊ܺܐܝܬ̥ܰܝ ܐܰܢ̱ܬ̊ܬ̥ܳܐ ܫܳܡܪܳܝܬ̊ܳܐ؟ ܠܳܐ ܓ̊ܶܝܪ ܡܶܬ̥ܚܰܫܚܺܝܢ ܝܺܗܽܘ̈ܕ̥ܳܝܶܐ ܥܰܡ ܫܳܡܪ̈ܳܝܶܐ.
10- ܥܢܳܐ ܝܶܫܽܘܥ ܘܶܐܡܰܪ ܠܳܗ̇. ”ܐܶܠܽܘ ܝܳܕ̥ܥܳܐ ܗܘܰܝܬ̊ܝ ܡܰܘܗܰܒ̥ܬ̥ܳܐ ܕ̊ܰܐܠܳܗܳܐ: ܘܡܰܢܽܘ ܗܳܢܳܐ ܕ̊ܶܐܡܰܪ ܠܶܟ̥ܝ ܗܰܒ̥ܝ ܠܺܝ ܐܶܫܬ̊ܶܐ܆ ܐܰܢ̱ܬ̊ܝ ܫܳܐܠܳܐ ܗ̱ܘܰܝܬ̊ܝ ܠܶܗ ܘܝܳܗܶܒ̥ ܗ̱ܘܳܐ ܠܶܟ̥ܝ ܡܰܝ̈ܳܐ ܚܰܝ̈ܶܐ!“
11- ܐܳܡܪܳܐ ܠܶܗ ܐܰܢ̱ܬ̊ܬ̥ܳܐ ܗܳܝ. ܡܳܪܝ܆ ܠܳܐ ܕ̊ܰܘܠܳܐ ܐܺܝܬ̥ ܠܳܟ̥܁ ܘܒ̥ܺܪܳܐ ܥܰܡܺܝܩܳܐ. ܐܰܝܡܶܟ̊ܳܐ ܠܳܟ̥ ܡܰܝ̈ܳܐ ܚܰܝ̈ܶܐ؟
12- ܠܡܳܐ ܐܰܢ̱ܬ̊ ܪܰܒ̥ ܐܰܢ̱ܬ̊ ܡܶܢ ܐܰܒ̥ܽܘܢ ܝܰܥܩܽܘܒ̥؟ ܗܰܘ ܕ̊ܗܽܘ ܝܰܗ̱ܒ̥ ܠܰܢ ܒ̊ܺܪܳܐ ܗܳܕ̥ܶܐ: ܘܗܽܘ ܡܶܢܳܗ̇ ܐܶܫܬ̊ܺܝ ܘܰܒ̥ܢܰܘ̈ܗ̱ܝ ܘܥܳܢ̈ܶܗ.
13- ܥܢܳܐ ܝܶܫܽܘܥ ܘܶܐܡܰܪ ܠܳܗ̇. ”ܟ̊ܽܠ ܕ̊ܢܶܫܬ̊ܶܐ ܡܶܢ ܗܳܠܶܝܢ ܡܰܝ̈ܳܐ. ܬ̊ܽܘܒ̥ ܢܶܨܗܶܐ.
14- ܟ̊ܽܠ ܕ̊ܶܝܢ ܕ̊ܢܶܫܬ̊ܶܐ ܡܶܢ ܡܰܝ̈ܳܐ ܕ̊ܶܐܢܳܐ ܐܶܬ̊ܶܠ ܠܶܗ ܠܳܐ ܢܶܨܗܶܐ ܠܥܳܠܰܡ. ܐܶܠܳܐ ܡܰܝ̈ܳܐ ܗܳܢܽܘܢ ܕ̊ܝܳܗܶܒ̥ ܐ̱ܢܳܐ ܠܶܗ܆ ܢܶܗܘܽܘܢ ܒ̊ܶܗ ܡܥܺܝܢܳܐ ܕ̊ܡܰܝ̈ܳܐ܁ ܕ̊ܢܳܒ̊ܥܺܝܢ ܠܚܰܝ̈ܶܐ ܕ̊ܰܠܥܳܠܰܡ.“
15- ܐܳܡܪܳܐ ܠܶܗ ܐܰܢ̱ܬ̊ܬ̥ܳܐ ܗܳܝ. ܡܳܪܝ܆ ܗܰܒ̥ ܠܺܝ ܡܶܢ ܗܳܠܶܝܢ ܡܰܝ̈ܳܐ܁ ܕ̊ܠܳܐ ܬ̊ܽܘܒ̥ ܐܶܨܗܶܐ. ܘܠܳܐ ܗܘܺܝܬ̥ ܐܳܬ̥ܝܳܐ ܕ̊ܳܠܝܳܐ ܡܶܢ ܗܳܪܟ̊ܳܐ.
16- ܐܳܡܰܪ ܠܳܗ̇ ܝܶܫܽܘܥ. ”ܙܶܠܝ ܩܪܳܝ ܠܒ̥ܰܥܠܶܟ̥ܝ ܘܬ̥ܳܝ ܠܗܳܪܟ̊ܳܐ.“
17- ܐܳܡܪܳܐ ܠܶܗ ܠܰܝܬ̊ ܠܺܝ ܒ̊ܰܥܠܳܐ. ܐܳܡܰܪ ܠܳܗ̇ ܝܶܫܽܘܥ. ”ܫܰܦ̊ܺܝܪ ܐܶܡܰܪܬ̊ܝ ܕ̊ܠܰܝܬ̊ ܠܺܝ ܒ̊ܰܥܠܳܐ.
18- ܚܰܡܫܳܐ ܓ̊ܶܝܪ ܒ̊ܰܥ̈ܠܺܝܢ ܗܘܰܘ ܠܶܟ̥ܝ. ܘܗܳܢܳܐ ܕ̊ܺܐܝܬ̥ ܠܶܟ̥ܝ ܗܳܫܳܐ ܠܳܐ ܗ̱ܘܳܐ ܒ̊ܰܥܠܶܟ̥ܝ. ܗܳܕ̥ܶܐ ܫܰܪܺܝܪܬ̊ܳܐ ܐܶܡܰܪܬ̊ܝ.“
19- ܐܳܡܪܳܐ ܠܶܗ ܗܳܝ ܐܰܢ̱ܬ̊ܬ̥ܳܐ. ܡܳܪܝ܆ ܚܳܙܝܳܐ ܐ̱ܢܳܐ ܕ̊ܰܢܒ̥ܺܝܳܐ ܐܰܢ̱ܬ̊.
20- ܐܰܒ̥ܳܗܰܝ̈ܢ ܒ̊ܗܳܢܳܐ ܛܽܘܪܳܐ ܣܓ̥ܶܕ̥ܘ. ܘܰܐܢ̱ܬ̊ܽܘܢ ܐܳܡܪܺܝܢ ܐܢ̱ܬ̊ܽܘܢ. ܕ̊ܒ̥ܽܐܘܪܺܫܠܶܡ ܗ̱ܘ ܐܰܬ̥ܰܪ ܕ̊ܘܳܠܶܐ ܠܡܶܣܓ̊ܰܕ̥.
21- ܐܳܡܰܪ ܠܳܗ̇ ܝܶܫܽܘܥ. ”ܐܰܢ̱ܬ̊ܬ̥ܳܐ. ܗܰܝܡܶܢܺܝܢܝ ܕ̊ܳܐܬ̥ܝܳܐ ܫܳܥܬ̥ܳܐ܆ ܕ̊ܠܳܐ ܒ̊ܗܳܢܳܐ ܛܽܘܪܳܐ ܘܳܐܦ̥ ܠܳܐ ܒ̊ܽܐܘܪܺܫܠܶܡ ܬ̊ܶܣܓ̊ܕ̥ܽܘܢ ܠܰܐܒ̥ܳܐ.
22- ܐܰܢ̱ܬ̊ܽܘܢ ܣܳܓ̥ܕ̊ܺܝܢ ܐܢ̱ܬ̊ܽܘܢ ܠܡܶܕ̊ܶܡ ܕ̊ܠܳܐ ܝܳܕ̥ܥܺܝܢ ܐܢ̱ܬ̊ܽܘܢ. ܚܢܰܢ ܕ̊ܶܝܢ ܣܳܓ̥ܕ̊ܺܝܢܰܢ ܠܡܳܐ ܕ̊ܝܳܕ̥ܥܺܝܢܰܢ. ܕ̊ܚܰܝ̈ܶܐ ܡܶܢ ܝܺܗܽܘ̈ܕ̥ܳܝܶܐ ܐܶܢܽܘܢ.
23- ܐܶܠܳܐ ܐܳܬ̥ܝܳܐ ܫܳܥܬ̥ܳܐ ܘܗܳܫܳܐ ܐܺܝܬ̥ܶܝܗ̇܆ ܐܶܡܰܬ̥ܝ ܕ̊ܣܳܓ̥ܽܘ̈ܕ̥ܶܐ ܫܰܪܺܝܪ̈ܶܐ ܢܶܣܓ̊ܕ̥ܽܘܢ ܠܰܐܒ̥ܳܐ ܒ̊ܪܽܘܚܳܐ ܘܒ̥ܰܫܪܳܪܳܐ. ܐܳܦ̥ ܐܰܒ̥ܳܐ ܓ̊ܶܝܪ ܕ̊ܰܐܝܟ̥ ܗܳܠܶܝܢܽ ܗ̱ܘ ܣܳܓ̥ܽܘ̈ܕ̥ܶܐ ܒ̊ܳܥܶܐ.
24- ܪܽܘܚܰܐ ܗ̱ܘ ܓ̊ܶܝܪ ܐܰܠܳܗܳܐ. ܘܰܐܝܠܶܝܢ ܕ̊ܣܳܓ̥ܕ̊ܺܝܢ ܠܶܗ܆ ܒ̊ܪܽܘܚܳܐ ܘܒ̥ܰܫܪܳܪܳܐ ܘܳܠܶܐ ܕ̊ܢܶܣܓ̊ܕ̥ܽܘܢ.“
25- ܐܳܡܪܳܐ ܠܶܗ ܐܰܢ̱ܬ̊ܬ̥ܳܐ ܗܳܝ. ܝܳܕ̥ܥܳܐ ܐ̱ܢܳܐ ܕ̊ܰܡܫܺܝܚܳܐ ܐܳܬ̥ܶܐ. ܘܡܳܐ ܕ̊ܶܐܬ̥ܳܐ ܗܽܘ ܡܰܠܶܦ̥ ܠܰܢ ܟ̊ܽܠܡܶܕ̊ܶܡ.
26- ܐܳܡܰܪ ܠܳܗ̇ ܝܶܫܽܘܥ. ”ܐܶܢܳܐ ܐ̱ܢܳܐ ܕ̊ܰܡܡܰܠܶܠ ܐ̱ܢܳܐ ܥܰܡܶܟ̥ܝ.“
27- ܘܟ̥ܰܕ̥ ܡܡܰܠܶܠ܆ ܐܶܬ̥ܰܘ ܬ̊ܰܠܡܺܝ̈ܕ̥ܰܘܗ̱ܝ ܘܡܶܬ̊ܕ̊ܰܡܪܺܝܢ ܗ̱ܘܰܘ ܕ̊ܥܰܡ ܐܰܢ̱ܬ̊ܬ̥ܳܐ ܡܡܰܠܶܠ. ܠܳܐ ܕ̊ܶܝܢ ܐ̱ܢܳܫ ܐܶܡܰܪ. ܡܳܢܳܐ ܒ̊ܳܥܶܐ ܐܰܢ̱ܬ̊܆ ܐܰܘ ܡܳܢܳܐ ܡܡܰܠܶܠ ܐܰܢ̱ܬ̊ ܥܰܡܳܗ̇؟
28- ܘܫܶܒ̥ܩܰܬ̥ ܩܽܘܠܬ̥ܳܗ̇ ܐܰܢ̱ܬ̊ܬ̥ܳܐ. ܘܶܐܙܰܠ̱ܬ̥ ܠܰܡܕ̥ܺܝܢ̱ܬ̊ܳܐ. ܘܳܐܡܪܳܐ ܠܐ̱ܢܳܫ̈ܳܐ.
29- ܬ̊ܰܘ ܚܙܰܘ ܓ̊ܰܒ̥ܪܳܐ ܕ̊ܶܐܡܰܪ ܠܺܝ ܟ̊ܽܠܡܶܕ̊ܶܡ ܕ̊ܥܶܒ̥ܕ̊ܶܬ̥. ܠܡܳܐ ܗܽܘܝܽܘ ܡܫܺܝܚܳܐ؟
30- ܘܰܢܦ̥ܰܩܘ ܐ̱ܢܳܫ̈ܳܐ ܡܶܢ ܡܕ̥ܺܝܢ̱ܬ̊ܳܐ܆ ܘܳܐܬ̥ܶܝܢ ܗ̱ܘܰܘ ܠܘܳܬ̥ܶܗ܀
31- ܘܒ̥ܰܝܢܳܬ̥ ܗܳܠܶܝܢ ܒ̊ܳܥܶܝܢ ܗ̱ܘܰܘ ܡܶܢܶܗ ܬ̊ܰܠܡܺܝ̈ܕ̥ܰܘܗ̱ܝ ܘܳܐܡܪܺܝܢ ܠܶܗ. ܪܰܒ̊ܰܢ ܠܥܰܣ.
32- ܗܽܘ ܕ̊ܶܝܢ ܐܶܡܰܪ ܠܗܽܘܢ. ”ܐܺܝܬ̥ ܠܺܝ ܡܶܐܟ̥ܽܘܠܬ̊ܳܐ ܕ̊ܶܐܟ̥ܽܘܠ܆ ܐܰܝܕ̥ܳܐ ܕ̊ܰܐܢ̱ܬ̊ܽܘܢ. ܠܳܐ ܝܳܕ̥ܥܺܝܢ ܐܢ̱ܬ̊ܽܘܢ.“
33- ܐܳܡܪܺܝܢ ܬ̊ܰܠܡܺܝ̈ܕ̥ܶܐ ܒ̊ܰܝ̈ܢܰܝܗܽܘܢ. ܠܡܳܐ܆ ܐ̱ܢܳܫ ܐܰܝܬ̊ܺܝ ܠܶܗ ܡܶܕ̊ܶܡ ܠܡܶܐܟ̥ܰܠ؟
34- ܐܳܡܰܪ ܠܗܽܘܢ ܝܶܫܽܘܥ. ”ܡܶܐܟ̥ܽܘܠܬ̊ܝ܁ ܕ̊ܺܝܠܝ ܐܺܝܬ̥ܶܝܗ̇܆ ܕ̊ܶܐܥܒ̊ܶܕ̥ ܨܶܒ̥ܝܳܢܶܗ ܕ̊ܡܰܢ ܕ̊ܫܰܕ̊ܪܰܢܝ. ܘܶܐܫܰܠܡܺܝܘܗ̱ܝ ܠܰܥܒ̥ܳܕ̥ܶܗ.
35- ܠܳܐ ܐܰܢ̱ܬ̊ܽܘܢ ܐܳܡܪܺܝܢ ܕ̊ܒ̥ܳܬ̥ܰܪ ܐܰܪܒ̊ܥܳܐ ܝܰܪ̈ܚܺܝܢ ܐܳܬ̥ܶܐ ܚܨܳܕ̥ܳܐ؟ ܗܳܐ ܐܳܡܰܪ ܐ̱ܢܳܐ ܠܟ̥ܽܘܢ. ܕ̊ܰܐܪܺܝܡܘ ܥܰܝ̈ܢܰܝܟ̊ܽܘܢ ܘܰܚܙܰܘ ܐܰܪ̈ܥܳܬ̥ܳܐ ܕ̊ܰܚܘܰܪ̈ܝ ܘܡ̈ܰܛܺܝ ܠܰܚܨܳܕ̥ܳܐ. ܡܶܢ ܟ̊ܰܕ̊ܽܘ.“
36- ”ܘܰܐܝܢܳܐ ܕ̊ܚܳܨܶܕ̥ ܐܰܓ̥ܪܳܐ ܢܳܣܶܒ̥. ܘܟ̥ܳܢܶܫ ܦ̊ܺܐܪ̈ܶܐ ܠܚܰܝ̈ܶܐ ܕ̊ܰܠܥܳܠܰܡ. ܘܙܳܪܽܘܥܳܐ ܘܚܳܨܽܘܕ̥ܳܐ ܐܰܟ̥ܚܕ̥ܳܐ ܢܶܚܕ̊ܽܘܢ.
37- ܒ̊ܗܳܕ̥ܶܐ ܓ̊ܶܝܪ ܐܺܝܬ̥ܶܝܗ̇ ܡܶܠܬ̥ܳܐ ܕ̊ܰܫܪܳܪܳܐ. ܕ̊ܰܐ̱ܚܪܺܝܢܽ ܗ̱ܘ ܙܳܪܰܥ܆ ܘܰܐ̱ܚܪܺܝܢ ܚܳܨܶܕ̥.
38- ܐܶܢܳܐ ܫܰܕ̊ܰܪܬ̊ܟ̥ܽܘܢ ܠܡܶܚܨܰܕ̥܆ ܡܶܕ̊ܶܡ ܕ̊ܠܳܐ ܗ̱ܘܳܐ ܐܰܢ̱ܬ̊ܽܘܢ ܠܺܐܝܬ̊ܽܘܢ ܒ̊ܶܗ. ܐ̱ܚܪ̈ܳܢܶܐ ܓ̊ܶܝܪ ܠܺܐܝܘ܆ ܘܰܐܢ̱ܬ̊ܽܘܢ ܥܰܠܬ̊ܽܘܢ ܥܰܠ ܥܰܡܠܗܽܘܢ ܕ̊ܗܳܢܽܘܢ.“
39- ܡܶܢ ܗܳܝ ܡܕ̥ܺܝܢ̱ܬ̊ܳܐ ܕ̊ܶܝܢ ܣܰܓ̊ܺܝ̈ܶܐܐ ܗܰܝܡܶܢܘ ܒ̊ܶܗ ܫܳܡܪ̈ܳܝܶܐ. ܡܶܛܽܠ ܡܶܠܬ̥ܳܗ̇ ܕ̊ܰܐܢ̱ܬ̊ܬ̥ܳܐ ܗܳܝ. ܕ̊ܡܰܣܗܕ̥ܳܐ ܗ̱ܘܳܬ̥ ܕ̊ܶܐܡܰܪ ܠܺܝ ܟ̊ܽܠܡܶܕ̊ܶܡ ܕ̊ܥܶܒ̥ܕ̊ܶܬ̥.
40- ܘܟ̥ܰܕ̥ ܐܶܬ̥ܰܘ ܠܘܳܬ̥ܶܗ ܗܳܢܽܘܢ ܫܳܡܪ̈ܳܝܶܐ܆ ܒ̊ܥܰܘ ܡܶܢܶܗ ܕ̊ܢܶܗܘܶܐ ܠܘܳܬ̥ܗܽܘܢ. ܘܰܗܘܳܐ ܠܘܳܬ̥ܗܽܘܢ ܬ̊ܪܶܝܢ ܝܰܘ̈ܡܺܝܢ.
41- ܘܣܰܓ̊ܺܝ̈ܶܐܐ ܗܰܝܡܶܢܘ ܒ̊ܶܗ ܡܶܛܽܠ ܡܶܠܬ̥ܶܗ܇
42- ܘܳܐܡܪܺܝܢ ܗ̱ܘܰܘ ܠܰܐܢ̱ܬ̊ܬ̥ܳܐ ܗܳܝ. ܕ̊ܡܶܟ̊ܺܝܠ ܠܳܐ ܗ̱ܘܳܐ ܡܶܛܽܠ ܡܶܠܬ̥ܶܟ̥ܝ ܡܗܰܝܡܢܺܝܢ ܚ̱ܢܰܢ ܒ̊ܶܗ. ܚܢܰܢ ܓ̊ܶܝܪ ܗܰܝܡܶܢܢ. ܘܺܝܕ̥ܰܥܢ܆ ܕ̊ܗܳܢܰܘ ܫܰܪܺܝܪܳܐܺܝܬ̥ ܡܫܺܝܚܳܐ ܡܰܚܝܳܢܶܗ ܕ̊ܥܳܠܡܳܐ܀
43- ܘܒ̥ܳܬ̥ܰܪ ܬ̊ܪܶܝܢ ܝܰܘ̈ܡܺܝܢ܆ ܢܦ̥ܰܩ ܝܶܫܽܘܥ ܡܶܢ ܬ̊ܰܡܳܢ ܘܶܐܙܰܠ ܠܰܓ̥ܠܺܝܠܳܐ.
44- ܗܽܘ ܓ̊ܶܝܪ ܝܶܫܽܘܥ ܣܗܶܕ̥܆ ”ܕ̊ܰܢܒ̥ܺܝܳܐ ܒ̊ܰܡܕ̥ܺܝܢ̱ܬ̊ܶܗ ܠܳܐ ܡܶܬ̥ܝܰܩܰܪ.“
45- ܟ̊ܰܕ̥ ܕ̊ܶܝܢ ܐܶܬ̥ܳܐ ܠܰܓ̥ܠܺܝܠܳܐ. ܩܰܒ̊ܠܽܘܗ̱ܝ ܓ̊ܠܺܝ̈ܠܳܝܶܐ. ܕ̊ܰܚܙܰܘ ܐܳܬ̥ܘ̈ܳܬ̥ܳܐ ܟ̊ܽܠ ܕ̊ܰܥܒ̥ܰܕ̥ ܒ̊ܽܐܘܪܺܫܠܶܡ ܒ̊ܥܰܕ̥ܥܺܕ̥ܳܐ. ܐܶܬ̥ܰܘ ܗ̱ܘܰܘ ܓ̊ܶܝܪ ܘܳܐܦ̥ ܗܶܢܽܘܢ ܠܥܰܕ̥ܥܺܕ̥ܳܐ܀
46- ܐܶܬ̥ܳܐ ܕ̊ܶܝܢ ܬ̊ܽܘܒ̥ ܝܶܫܽܘܥ ܠܩܳܛܢܶܐ ܕ̊ܰܓ̥ܠܺܝܠܳܐ܇ ܐܰܝܟ̊ܳܐ ܕ̊ܰܥܒ̥ܰܕ̥ ܡܰܝ̈ܳܐ ܚܰܡܪܳܐ. ܘܺܐܝܬ̥ ܗ̱ܘܳܐ ܒ̊ܰܟ̥ܦ̥ܰܪܢܰܚܽܘܡ ܥܒ̥ܶܕ̥ ܡܰܠܟ̊ܳܐ ܚܰܕ̥. ܕ̊ܰܒ̥ܪܶܗ ܟ̊ܪܺܝܗ ܗ̱ܘܳܐ.
47- ܗܳܢܳܐ ܫܡܰܥ ܕ̊ܶܐܬ̥ܳܐ ܝܶܫܽܘܥ ܡܶܢ ܝܺܗܽܘܕ̥ ܠܰܓ̥ܠܺܝܠܳܐ܆ ܘܶܐܙܰܠ ܠܘܳܬ̥ܶܗ ܘܒ̥ܳܥܶܐ ܗ̱ܘܳܐ ܡܶܢܶܗ܆ ܕ̊ܢܶܚܽܘܬ̥ ܘܢܰܐܣܶܐ ܠܰܒ̥ܪܶܗ. ܩܰܪܺܝܒ̥ ܗ̱ܘܳܐ ܓ̊ܶܝܪ ܠܰܡܡܳܬ̥.
48- ܐܳܡܰܪ ܠܶܗ ܝܶܫܽܘܥ. ”ܐܶܢ ܐܳܬ̥ܘ̈ܳܬ̥ܳܐ ܘܬ̥ܶܕ̥ܡܪ̈ܳܬ̥ܳܐ ܠܳܐ ܬ̊ܶܚܙܽܘܢ. ܠܳܐ ܬ̊ܗܰܝܡܢܽܘܢ.“
49- ܐܳܡܰܪ ܠܶܗ ܗܰܘ ܥܒ̥ܶܕ̥ ܡܰܠܟ̊ܳܐ. ܡܳܪܝ܆ ܚܽܘܬ̥ ܥܰܕ̥ܠܳܐ ܡܳܐܶܬ̥ ܠܶܗ ܛܰܠܝܳܐ!
50- ܐܳܡܰܪ ܠܶܗ ܝܶܫܽܘܥ܁ ”ܙܶܠ܆ ܒ̊ܪܳܟ̥ ܚܰܝ ܗ̱ܘ.“ ܘܗܰܝܡܶܢ ܗܰܘ ܓ̊ܰܒ̥ܪܳܐ ܒ̊ܡܶܠܬ̥ܳܐ ܕ̊ܶܐܡܰܪ ܠܶܗ ܝܶܫܽܘܥ. ܘܶܐܙܰܠ.
51- ܟ̊ܰܕ̥ ܕ̊ܶܝܢ ܢܳܚܶܬ̥ ܗ̱ܘܳܐ܆ ܐܰܪܥܽܘܗ̱ܝ ܥܰܒ̥̈ܕ̊ܰܘܗ̱ܝ ܘܣܰܒ̊ܪܽܘܗ̱ܝ ܘܳܐܡܪܺܝܢ ܠܶܗ. ܒ̊ܪܳܟ̥ ܚܝܳܐ.
52- ܘܫܰܐܶܠ ܐܶܢܽܘܢ ܒ̊ܰܐܝܢܳܐ ܥܶܕ̊ܳܢܳܐ ܐܶܬ̥ܚܠܶܡ؟ ܐܳܡܪܺܝܢ ܠܶܗ. ܐܶܬ̥ܡܳܠܝ ܒ̊ܰܫܒ̥ܰܥ ܫܳܥܺܝ̈ܢ ܫܒ̥ܰܩܬ̥ܶܗ ܐܶܫܳܬ̥ܳܐ.
53- ܘܺܝܕ̥ܰܥ ܐܰܒ̥ܽܘܗ̱ܝ ܕ̊ܰܒ̥ܗܳܝ ܫܳܥܬ̥ܳܐ ܕ̊ܒ̥ܳܗ̇ ܐܶܡܰܪ ܠܶܗ ܝܶܫܽܘܥ ܕ̊ܰܒ̥ܪܳܟ̥ ܚܝܳܐ. ܘܗܰܝܡܶܢ ܗܽܘ ܘܒ̥ܰܝܬ̊ܶܗ ܟ̊ܽܠܶܗ.
54- ܗܳܕ̥ܶܐ ܬ̊ܽܘܒ̥ ܐܳܬ̥ܳܐ ܕ̊ܬ̥ܰܪܬ̊ܶܝܢ ܥܒ̥ܰܕ̥ ܝܶܫܽܘܥ: ܟ̊ܰܕ̥ ܐܶܬ̥ܳܐ ܡܶܢ ܝܺܗܽܘܕ̥ ܠܰܓ̥ܠܺܝܠܳܐ܀