John 1
The Gospel according to John
܀ ܝܘܚܢܢ ܐ ܀
1- ܒܪܺܝܫܺܝܬ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ. ܘܗܽܘ ܡܶܠܬܳܐ. ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰܠܳܗܳܐ. ܘܰܐܠܳܗܳܐ ܐܺܝܬܰܘܗ̱ܝ ܗܽܘ ܡܶܠܬܳܐ.
2- ܗܳܢܳܐ. ܐܺܝܬܰܘܗ̱ܝ ܗ̱ܘܳܐ ܒܪܺܝܫܺܝܬ ܠܘܳܬ ܐܰܠܳܗܳܐ.
3- ܟܽܠ ܒܺܐܝܕܶܗ ܗܘܳܐ. ܘܒܶܠܥܳܕ̈ܰܘܗ̱ܝ ܐܳܦܠܳܐ ܚܕܳܐ ܗܘܳܬ ܡܶܕܶܡ ܕܰܗܘܳܐ.
4- ܒܶܗ ܚܰܝ̈ܶܐ ܗܘܳܐ. ܘܚܰܝ̈ܶܐ ܐܺܝܬܰܝܗܽܘܢ. ܢܽܘܗܪܳܐ ܕܰܒܢܰܝ̈ܢܳܫܳܐ.
5- ܘܗܽܘ ܢܽܘܗܪܳܐ ܒܚܶܫܽܘܟܳܐ ܡܰܢܗܰܪ. ܘܚܶܫܽܘܟܳܐ ܠܳܐ ܐܰܕܪܟܶܗ܀
6- ܗܘܳܐ ܒܰܪܢܳܫܳܐ ܕܶܐܫܬܰܕܰܪ ܡܶܢ ܐܰܠܳܗܳܐ. ܫܡܶܗ ܝܽܘܚܰܢܳܢ.
7- ܗܳܢܳܐ ܐܶܬܳܐ ܠܣܳܗܕܽܘܬܳܐ ܕܢܶܣܗܰܕ ܥܰܠ ܢܽܘܗܪܳܐ. ܕܟܽܠܢܳܫ ܢܗܰܝܡܶܢ ܒܺܐܝܕܶܗ.
8- ܠܳܐ ܗܽܘ ܗ̱ܘܳܐ ܢܽܘܗܪܳܐ. ܐܶܠܳܐ ܕܢܶܣܗܰܕ ܥܰܠ ܢܽܘܗܪܳܐ.
9- ܐܺܝܬܰܘܗ̱ܝ ܗ̱ܘܳܐ ܓܶܝܪ ܢܽܘܗܪܳܐ ܕܰܫܪܳܪܳܐ܇ ܕܡܰܢܗܰܪ ܠܟܽܠܢܳܫ ܕܳܐܬܶܐ ܠܥܳܠܡܳܐ.
10- ܒܥܳܠܡܳܐ ܗ̱ܘܳܐ. ܘܥܳܠܡܳܐ ܒܺܐܝܕܶܗ ܗ̱ܘܳܐ. ܘܥܳܠܡܳܐ ܠܳܐ ܝܰܕܥܶܗ.
11- ܠܕܺܝܠܶܗ ܐܶܬܳܐ܁ ܘܕܺܝܠܶܗ ܠܳܐ ܩܰܒܠܽܘܗ̱ܝ܀
12- ܐܰܝܠܶܝܢ ܕܶܝܢ ܕܩܰܒܠܽܘܗ̱ܝ. ܝܰܗ̱ܒ ܠܗܽܘܢ ܫܽܘܠܛܳܢܳܐ ܕܰܒܢܰܝ̈ܳܐ ܕܰܐܠܳܗܳܐ ܢܶܗܘܽܘܢ. ܠܰܐܝܠܶܝܢ ܕܰܡܗܰܝܡܢܺܝܢ ܒܰܫܡܶܗ.
13- ܐܰܝܠܶܝܢ ܕܠܰܘ ܡܶܢ ܕܡܳܐ. ܘܠܳܐ ܡܶܢ ܨܶܒܝܳܢܳܐ ܕܒܶܣܪܳܐ. ܘܠܳܐ ܡܶܢ ܨܶܒܝܳܢܳܐ ܕܓܰܒܪܳܐ. ܐܶܠܳܐ. ܡܶܢ ܐܰܠܳܗܳܐ ܐܶܬܺܝܠܶܕܘ܀
14- ܘܡܶܠܬܳܐ ܒܶܣܪܳܐ ܗܘܳܐ. ܘܰܐܓܶܢ ܒܰܢ. ܘܰܚܙܰܝܢ ܫܽܘܒܚܶܗ. ܫܽܘܒܚܳܐ ܐܰܝܟ ܕܺܝܚܺܝܕܳܝܳܐ ܕܡܶܢ ܐܰܒܳܐ܇ ܕܰܡܠܶܐ ܛܰܝܒܽܘܬܳܐ ܘܩܽܘܫܬܳܐ܀
15- ܝܽܘܚܰܢܳܢ ܣܗܶܕ ܥܠܰܘܗ̱ܝ ܘܰܩܥܳܐ ܘܶܐܡܰܪ. ܗܳܢܰܘ ܗܰܘ ܕܶܐܡܪܶܬ ܕܒܳܬܰܪܝ ܐܳܬܶܐ ܘܰܗܘܳܐ ܠܶܗ ܩܕܳܡܰܝ. ܡܶܛܽܠ ܕܩܰܕܡܳܝ ܗ̱ܘ ܡܶܢܝ.
16- ܘܡܶܢ ܡܰܠܝܽܘܬܶܗ ܚܢܰܢ ܟܽܠܰܢ ܢܣܰܒܢ. ܘܛܰܝܒܽܘܬܳܐ ܚܠܳܦ ܛܰܝܒܽܘܬܳܐ.
17- ܡܶܛܽܠ ܕܢܳܡܽܘܣܳܐ ܒܝܰܕ ܡܽܘܫܶܐ ܐܶܬܺܝܗܶܒ. ܫܪܳܪܳܐ ܕܶܝܢ ܘܛܰܝܒܽܘܬܳܐ ܒܝܰܕ ܝܶܫܽܘܥ ܡܫܺܝܚܳܐ ܗܘܳܐ.
18- ܐܰܠܳܗܳܐ ܠܳܐ ܚܙܳܐ ܐ̱ܢܳܫ ܡܶܡܬܽܘܡ. ܝܺܚܺܝܕܳܝܳܐ ܐܰܠܳܗܳܐ܁ ܗܰܘ ܕܺܐܝܬܰܘܗ̱ܝ ܒܥܽܘܒܳܐ ܕܰܐܒܽܘܗ̱ܝ. ܗܽܘ ܐܶܫܬܰܥܺܝ܀
19- ܘܗܳܕܳܐ ܗ̱ܝ ܣܳܗܕܽܘܬܶܗ ܕܝܽܘܚܰܢܳܢ܇ ܟܰܕ ܫܰܕܰܪܘ ܠܘܳܬܶܗ ܝܺܗܽܘ̈ܕܳܝܶܐ ܡܶܢ ܐܽܘܪܺܫܠܶܡ. ܟܳܗ̈ܢܶܐ ܘܠܶܘܳܝ̈ܶܐ ܕܰܢܫܰܐܠܽܘܢܳܝܗ̱ܝ. ܐܰܢ̱ܬ ܡܰܢ ܐܰܢ̱ܬ؟
20- ܘܰܐܘܕܺܝ ܘܠܳܐ ܟܦܰܪ. ܘܰܐܘܕܺܝ. ܕܠܰܘ ܐܶܢܳܐ ܐ̱ܢܳܐ ܡܫܺܝܚܳܐ.
21- ܘܫܰܐܠܽܘܗ̱ܝ ܬܽܘܒ. ܡܳܢܳܐ ܗܳܟܺܝܠ. ܐܶܠܺܝܳܐ ܐܰܢ̱ܬ؟ ܘܶܐܡܰܪ ܠܳܐ ܐܺܝܬܰܝ. ܢܒܺܝܳܐ ܐܰܢ̱ܬ؟ ܘܶܐܡܰܪ ܠܳܐ.
22- ܘܶܐܡܰܪܘ ܠܶܗ. ܘܡܰܢܽܘ ܐܰܢ̱ܬ ܕܢܶܬܶܠ ܦܶܬܓܳܡܳܐ ܠܰܐܝܠܶܝܢ ܕܫܰܕܪܽܘܢ؟ ܡܳܢܳܐ ܐܳܡܰܪ ܐܰܢ̱ܬ ܥܰܠ ܢܰܦܫܳܟ؟܀
23- ܐܶܡܰܪ܆ ܐܶܢܳܐ ܩܳܠܳܐ ܕܩܳܪܶܐ ܒܡܰܕܒܪܳܐ܆ ܕܰܐܫܘܰܘ ܐܽܘܪܚܶܗ ܕܡܳܪܝܳܐ܆ ܐܰܝܟܰܢܳܐ ܕܶܐܡܰܪ ܐܶܫܰܥܝܳܐ ܢܒܺܝܳܐ.
24- ܗܳܢܽܘܢ ܕܶܝܢ ܕܶܐܫܬܰܕܰܪܘ. ܡܶܢ ܦܪ̈ܺܝܫܶܐ ܗ̱ܘܰܘ.
25- ܘܫܰܐܠܽܘܗ̱ܝ. ܘܶܐܡܰܪܘ ܠܶܗ. ܡܳܢܳܐ ܗܳܟܺܝܠ ܡܰܥܡܶܕ ܐܰܢ̱ܬ؟ ܐܶܢ ܐܰܢ̱ܬ ܠܳܐ ܐܺܝܬܰܝܟ ܡܫܺܝܚܳܐ܁ ܘܠܳܐ ܐܶܠܺܝܳܐ܁ ܘܠܳܐ ܢܒܺܝܳܐ؟܀
26- ܥܢܳܐ ܝܽܘܚܰܢܳܢ. ܘܶܐܡܰܪ ܠܗܽܘܢ. ܐܶܢܳܐ ܡܰܥܡܶܕ ܐ̱ܢܳܐ ܒܡܰܝ̈ܳܐ. ܒܰܝܢܳܬܟܽܘܢ ܕܶܝܢ ܩܳܐܶܡ܆ ܗܰܘ ܕܰܐܢ̱ܬܽܘܢ ܠܳܐ ܝܳܕܥܺܝܢ ܐܢ̱ܬܽܘܢ ܠܶܗ.
27- ܗܳܢܰܘ ܗܰܘ ܕܒܳܬܰܪܝ ܐܳܬܶܐ܆ ܘܰܗܘܳܐ ܠܶܗ ܩܕܳܡܰܝ܆ ܗܰܘ ܕܶܐܢܳܐ ܠܳܐ ܫܳܘܶܐ ܐ̱ܢܳܐ ܕܶܐܫܪܶܐ ܥܰܪ̈ܩܶܐ ܕܰܡܣܳܐܢܰܘ̈ܗ̱ܝ.
28- ܗܳܠܶܝܢ ܒܒܶܝܬ ܥܰܢܝܳܐ ܗܘ̈ܰܝ. ܒܥܶܒܪܳܐ ܕܝܽܘܪܕܢܳܢ. ܐܰܝܟܳܐ ܕܡܰܥܡܶܕ ܗ̱ܘܳܐ ܝܽܘܚܰܢܳܢ܀
29- ܘܰܠܝܰܘܡܳܐ ܕܒܳܬܪܶܗ. ܚܙܳܐ ܝܽܘܚܰܢܳܢ ܠܝܶܫܽܘܥ ܕܳܐܬܶܐ ܠܘܳܬܶܗ. ܘܶܐܡܰܪ. ܗܳܐ ܐܶܡܪܶܗ ܕܰܐܠܳܗܳܐ܆ ܗܰܘ ܕܫܳܩܶܠ ܚܛܺܝܬܶܗ ܕܥܳܠܡܳܐ!
30- ܗܳܢܰܘ ܕܶܐܢܳܐ ܐܶܡܪܶܬ ܥܠܰܘܗ̱ܝ܇ ܕܒܳܬܰܪܝ ܐܳܬܶܐ ܓܰܒܪܳܐ܁ ܘܰܗܘܳܐ ܠܶܗ ܩܕܳܡܰܝ. ܡܶܛܽܠ ܕܩܰܕܡܳܝ ܗ̱ܘ ܡܶܢܝ.
31- ܘܶܐܢܳܐ ܠܳܐ ܝܳܕܰܥ ܗ̱ܘܺܝܬ ܠܶܗ. ܐܶܠܳܐ ܕܢܶܬܺܝܕܰܥ ܠܺܐܝܣܪܳܐܶܝܠ. ܡܶܛܽܠ ܗܳܢܳܐ ܐܶܬܺܝܬ ܐܶܢܳܐ ܕܰܒܡܰܝ̈ܳܐ ܐܰܥܡܶܕ܀
32- ܘܰܐܣܗܶܕ ܝܽܘܚܰܢܳܢ ܘܶܐܡܰܪ. ܕܰܚܙܺܝܬ ܠܪܽܘܚܳܐ ܕܢܳܚܬܳܐ ܡܶܢ ܫܡܰܝܳܐ܁ ܐܰܝܟ ܝܰܘܢܳܐ ܘܩܰܘܝܰܬ ܥܠܰܘܗ̱ܝ.
33- ܘܶܐܢܳܐ ܠܳܐ ܝܳܕܰܥ ܗ̱ܘܺܝܬ ܠܶܗ. ܐܶܠܳܐ ܡܰܢ ܕܫܰܕܪܰܢܝ ܕܰܐܥܡܶܕ ܒܡܰܝ̈ܳܐ ܗܽܘ ܐܶܡܰܪ ܠܺܝ. ܕܰܐܝܢܳܐ ܕܚܳܙܶܐ ܐܰܢ̱ܬ ܕܢܳܚܬܳܐ ܪܽܘܚܳܐ܁ ܘܰܡܩܰܘܝܳܐ ܥܠܰܘܗ̱ܝ܆ ܗܽܘ ܡܰܥܡܶܕ ܒܪܽܘܚܳܐ ܕܩܽܘܕܫܳܐ.
34- ܘܶܐܢܳܐ ܚܙܺܝܬ ܘܰܐܣܗܕܶܬ. ܕܗܳܢܰܘ ܒܪܶܗ ܕܰܐܠܳܗܳܐ܀
35- ܘܰܠܝܰܘܡܳܐ ܐ̱ܚܪܺܢܳܐ܆ ܩܳܐܶܡ ܗ̱ܘܳܐ ܝܽܘܚܰܢܳܢ ܘܰܬܪܶܝܢ ܡܶܢ ܬܰܠܡܺܝ̈ܕܰܘܗ̱ܝ.
36- ܘܚܳܪ ܒܝܶܫܽܘܥ ܟܰܕ ܡܗܰܠܶܟ ܘܶܐܡܰܪ. ܗܳܐ ܐܶܡܪܶܗ ܕܰܐܠܳܗܳܐ.
37- ܘܰܫܡܰܥܘ ܬܪ̈ܰܝܗܽܘܢ ܬܰܠܡܺܝ̈ܕܰܘܗ̱ܝ ܟܰܕ ܐܶܡܰܪ܆ ܘܶܐܙܰܠܘ ܠܗܽܘܢ ܒܳܬܪܶܗ ܕܝܶܫܽܘܥ.
38- ܘܶܐܬܦܢܺܝ ܝܶܫܽܘܥ ܘܰܚܙܳܐ ܐܶܢܽܘܢ ܕܳܐܬܶܝܢ ܒܳܬܪܶܗ܆ ܘܶܐܡܰܪ ܠܗܽܘܢ. ”ܡܳܢܳܐ ܒܳܥܶܝܢ ܐܢ̱ܬܽܘܢ؟“ ܐܳܡܪܺܝܢ ܠܶܗ. ܪܰܒܰܢ ܐܰܝܟܳܐ ܗܳܘܶܐ ܐܰܢ̱ܬ؟
39- ܐܳܡܰܪ ܠܗܽܘܢ ”ܬܰܘ. ܘܬܶܚܙܽܘܢ.“ ܗܶܢܽܘܢ ܕܶܝܢ ܐܶܬܰܘ. ܘܰܚܙܰܘ ܐܰܝܟܳܐ ܕܗܳܘܶܐ. ܘܰܠܘܳܬܶܗ ܗܘܰܘ ܝܰܘܡܳܐ ܗܰܘ. ܘܺܐܝܬ ܗ̱ܘ̈ܰܝ ܐܰܝܟ ܫܳܥ̈ܶܐ ܥܣܰܪ܀
40- ܚܰܕ ܕܶܝܢ ܡܶܢ ܗܳܢܽܘܢ ܕܰܫܡܰܥܘ ܡܶܢ ܝܽܘܚܰܢܳܢ܁ ܘܶܐܙܰܠܘ ܒܳܬܪܶܗ ܕܝܶܫܽܘܥ. ܐܺܝܬܰܘܗ̱ܝ ܗ̱ܘܳܐ ܐܰܢܕܪܶܐܘܳܣ ܐܰܚܽܘܗ̱ܝ ܕܫܶܡܥܽܘܢ.
41- ܗܳܢܳܐ ܚܙܳܐ ܠܽܘܩܕܰܡ ܠܫܶܡܥܽܘܢ ܐܰܚܽܘܗ̱ܝ. ܘܶܐܡܰܪ ܠܶܗ. ܐܶܫܟܰܚܢܳܝܗ̱ܝ ܠܰܡܫܺܝܚܳܐ.
42- ܘܰܐܝܬܝܶܗ ܠܘܳܬ ܝܶܫܽܘܥ. ܘܚܳܪ ܒܶܗ ܝܶܫܽܘܥ ܘܶܐܡܰܪ. ”ܐܰܢ̱ܬ ܗ̱ܘ ܫܶܡܥܽܘܢ ܒܪܶܗ ܕܝܳܘܢܰܐ܆ ܐܰܢ̱ܬ ܬܶܬܩܪܶܐ ܟܺܐܦܳܐ.“
43- ܘܰܠܝܰܘܡܳܐ ܐ̱ܚܪܺܢܳܐ܆ ܨܒܳܐ ܝܶܫܽܘܥ ܠܡܶܦܰܩ ܠܰܓܠܺܝܠܳܐ. ܘܶܐܫܟܰܚ ܠܦܺܝܠܺܝܦܳܘܣ ܘܶܐܡܰܪ ܠܶܗ ”ܬܳܐ ܒܳܬܰܪܝ.“
44- ܗܽܘ ܕܶܝܢ ܦܺܝܠܺܝܦܳܘܣ ܐܺܝܬܰܘܗ̱ܝ ܗ̱ܘܳܐ ܡܶܢ ܒܶܝܬ ܨܰܝܳܕܳܐ. ܡܶܢ ܡܕܺܝܢ̱ܬܶܗ ܕܰܐܢܕܪܶܐܘܳܣ ܘܰܕܫܶܡܥܽܘܢ.
45- ܘܦܺܝܠܺܝܦܳܘܣ ܐܶܫܟܰܚ ܠܢܰܬܰܢܰܝܺܐܝܠ. ܘܶܐܡܰܪ ܠܶܗ. ܗܰܘ ܕܰܟܬܰܒ ܥܠܰܘܗ̱ܝ ܡܽܘܫܶܐ ܒܢܳܡܽܘܣܳܐ ܘܒܰܢܒܺܝ̈ܶܐ܆ ܐܶܫܟܰܚܢܳܝܗ̱ܝ. ܕܝܶܫܽܘܥ ܗ̱ܘ ܒܰܪ ܝܰܘܣܶܦ ܕܡܶܢ ܢܳܨܪܰܬ.
46- ܐܳܡܰܪ ܠܶܗ ܢܰܬܰܢܰܝܺܐܝܠ. ܡܶܢ ܢܳܨܪܰܬ܆ ܡܶܫܟܰܚ ܡܶܕܶܡ ܕܛܳܒ ܢܶܗܘܶܐ؟ ܐܳܡܰܪ ܠܶܗ ܦܺܝܠܺܝܦܳܘܣ. ܬܳܐ ܘܬܶܚܙܶܐ.
47- ܘܰܚܙܳܝܗ̱ܝ ܝܶܫܽܘܥ ܠܢܰܬܰܢܰܝܺܐܝܠ ܟܰܕ ܐܳܬܶܐ ܠܘܳܬܶܗ. ܘܶܐܡܰܪ ܥܠܰܘܗ̱ܝ. ”ܗܳܐ ܫܰܪܺܝܪܳܐܺܝܬ ܒܰܪ ܐܺܝܣܪܳܐܶܝܠ ܕܢܶܟܠܳܐ ܠܰܝܬ ܒܶܗ!“
48- ܐܳܡܰܪ ܠܶܗ ܢܰܬܰܢܰܝܺܐܝܠ. ܡܶܢ ܐܰܝܡܶܟܳܐ ܝܳܕܰܥ ܐܰܢ̱ܬ ܠܺܝ؟ ܐܳܡܰܪ ܠܶܗ ܝܶܫܽܘܥ. ”ܥܰܕܠܳܐ ܢܶܩܪܶܝܟ ܦܺܝܠܺܝܦܳܘܣ ܟܰܕ ܬܚܶܝܬ ܬܺܬܳܐ ܐܰܢ̱ܬ ܚܙܺܝܬܳܟ.“
49- ܥܢܳܐ ܢܰܬܰܢܰܝܺܐܝܠ ܘܶܐܡܰܪ ܠܶܗ. ܪܰܒܺܝ܆ ܐܰܢ̱ܬ ܗ̱ܘ ܒܪܶܗ ܕܰܐܠܳܗܳܐ. ܐܰܢ̱ܬ ܗ̱ܘ ܡܰܠܟܶܗ ܕܺܐܝܣܪܳܐܶܝܠ!
50- ܐܳܡܰܪ ܠܶܗ ܝܶܫܽܘܥ. ”ܥܰܠ ܕܶܐܡܪܶܬ ܠܳܟ ܕܰܚܙܺܝܬܳܟ ܬܚܶܝܬ ܬܺܬܳܐ ܡܗܰܝܡܶܢ ܐܰܢ̱ܬ؟ ܕܪܰܘܪ̈ܒܳܢ ܡܶܢ ܗܳܠܶܝܢ ܬܶܚܙܶܐ.“
51- ܐܳܡܰܪ ܠܶܗ. ”ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܡܶܢ ܗܳܫܳܐ ܬܶܚܙܽܘܢ ܫܡܰܝ̈ܳܐ ܕܰܦܬܺܝ̈ܚܳܢ܆ ܘܡܰܠܰܐܟܰܘ̈ܗ̱ܝ ܕܰܐܠܳܗܳܐ ܟܰܕ ܣܳܠܩܺܝܢ ܘܢܳܚܬܺܝܢ ܠܘܳܬ ܒܪܶܗ ܕܐ̱ܢܳܫܳܐ.“