Revelation 10
The Book of Revelation
܀ ܓܠܝܢܐ ܕܝܘܚܢܢ ܝ ܀
1- ܘܰܚܙܺܝܬ ܐ̱ܚܪܺܢܳܐ ܡܰܠܰܐܟܳܐ ܚܰܝܠܬܳܢܳܐ ܕܰܢܚܶܬ ܡܶܢ ܫܡܰܝܳܐ ܕܰܡܥܰܛܰܦ ܥܢܳܢܳܐ. ܘܩܶܫܬܳܐ ܕܰܥܢܳܢ̈ܶܐ ܥܰܠ ܪܺܝܫܶܗ. ܘܦܰܪܨܽܘܦܳܐ ܕܺܝܠܶܗ ܐܰܝܟ ܫܶܡܫܳܐ܆ ܘܪ̈ܶܓܠܶܐ ܕܺܝܠܶܗ ܐܰܝܟ ܥܰܡܽܘܕܳܐ ܕܢܽܘܪܳܐ.
2- ܘܺܐܝܬ ܗ̱ܘܳܐ ܠܶܗ ܒܺܐܝܕܶܗ ܐܰܝܟ ܟܬܳܒܽܘܢܳܐ ܦܬܺܝܚܳܐ. ܘܣܳܡ ܪܶܓܠܶܗ ܕܝܰܡܺܝܢܳܐ ܥܰܠ ܝܰܡܳܐ܆ ܗܳܝ ܕܶܝܢ ܕܣܶܡܳܠܳܐ ܥܰܠ ܐܰܪܥܳܐ.
3- ܘܰܩܥܳܐ ܒܩܳܠܳܐ ܪܰܒܳܐ ܐܰܝܟܰܢܳܐ ܕܓܳܣܰܪ ܐܰܪܝܳܐ. ܘܟܰܕ ܩܥܳܐ ܡܰܠܶܠܘ ܗܳܠܶܝܢ ܫܰܒܥܳܐ ܪ̈ܰܥܡܶܐ ܩ̈ܳܠܶܐ ܕܺܝܠܗܽܘܢ.
4- ܘܟܰܕ ܡܰܠܶܠܘ ܗܳܠܶܝܢ ܫܰܒܥܳܐ ܪ̈ܰܥܡܶܐ܆ ܥܬܺܝܕ ܗ̱ܘܺܝܬ ܠܡܶܟܬܰܒ. ܘܫܶܡܥܶܬ ܩܳܠܳܐ ܡܶܢ ܫܡܰܝܳܐ ܕܳܐܡܰܪ܆ ܚܬܽܘܡ ܗܳܠܶܝܢ ܕܡܰܠܶܠܘ ܗܳܠܶܝܢ ܫܰܒܥܳܐ ܪ̈ܰܥܡܶܐ ܘܰܠܗܶܝܢ ܠܳܐ ܬܶܟܬܽܘܒ܀
5- ܘܗܰܘ ܡܰܠܰܐܟܳܐ ܕܰܚܙܺܝܬ ܕܩܳܐܶܡ ܥܰܠ ܝܰܡܳܐ ܘܥܰܠ ܐܰܪܥܳܐ܆ ܐܰܪܺܝܡ ܐܺܝܕܶܗ ܗܳܝ ܕܝܰܡܺܝܢܳܐ ܠܰܫܡܰܝܳܐ.
6- ܘܺܝܡܳܐ ܒܗܰܘ ܕܚܰܝ ܠܥܳܠܡ̈ܶܐ ܕܥܳܠܡ̈ܶܐ. ܗܰܘ ܕܰܒܪܳܐ ܠܰܫܡܰܝܳܐ ܘܰܠܗܳܠܶܝܢ ܕܒܳܗ̇: ܘܠܰܐܪܥܳܐ ܘܰܠܗܳܠܶܝܢ ܕܒܳܗ̇܆ ܘܰܠܝܰܡܳܐ ܘܰܠܗܳܠܶܝܢ ܕܒܶܗ܆ ܕܙܰܒܢܳܐ ܠܳܐ ܬܽܘܒ ܢܶܗܘܶܐ.
7- ܐܶܠܳܐ ܒܝܰܘ̈ܡܳܬܳܐ ܕܩܳܠܶܗ ܕܡܰܠܰܐܟܳܐ ܫܒܺܝܥܳܝܳܐ܇ ܐܶܡܰܬܝ ܕܰܥܬܺܝܕ ܠܰܡܝܰܒܳܒܽܘ܆ ܘܶܐܫܬܰܠܰܡ ܐ̱ܪܳܙܶܗ ܕܰܐܠܳܗܳܐ܇ ܐܰܝܟ ܕܣܰܒܰܪ ܠܥܰܒ̈ܕܶܐ ܕܺܝܠܶܗ ܠܗܳܢܽܘܢ ܢܒܺܝ̈ܶܐ܀
8- ܘܩܳܠܳܐ ܗܰܘ ܕܫܶܡܥܶܬ ܕܡܰܠܶܠ ܥܰܡܝ ܘܶܐܡܰܪ. ܙܶܠ ܣܰܒ ܠܰܟܬܳܒܽܘܢܳܐ ܗܰܘ ܕܰܦܬܺܝܚ ܒܺܐܝܕܶܗ ܕܡܰܠܰܐܟܳܐ ܗܰܘ ܕܩܳܐܶܡ ܥܰܠ ܐܰܪܥܳܐ ܘܥܰܠ ܝܰܡܳܐ.
9- ܘܶܐܙܶܠ̱ܬ ܠܘܳܬ ܡܰܠܰܐܟܳܐ ܟܰܕ ܐܳܡܰܪ ܐ̱ܢܳܐ ܠܶܗ܇ ܠܡܶܬܰܠ ܠܺܝ ܠܰܟܬܳܒܽܘܢܳܐ. ܘܶܐܡܰܪ ܠܺܝ ܣܰܒ ܘܰܐܟܽܘܠܳܝܗ̱ܝ ܘܢܰܡܰܪ ܠܳܟ ܟܰܪܣܳܟ. ܐܶܠܳܐ ܒܦܽܘܡܳܐ ܕܺܝܠܳܟ ܢܶܗܘܶܐ ܚܰܠܝܳܐ ܐܰܝܟ ܕܶܒܫܳܐ܀
10- ܘܢܶܣܒܶܬ ܠܰܟܬܳܒܽܘܢܳܐ ܡܶܢ ܐܺܝܕܶܗ ܕܡܰܠܰܐܟܳܐ ܘܶܐܟܰܠܬܶܗ. ܘܺܐܝܬܰܘܗ̱ܝ ܗ̱ܘܳܐ ܒܦܽܘܡܳܐ ܕܺܝܠܝ ܐܰܝܟ ܕܶܒܫܳܐ ܚܰܠܝܳܐ. ܘܟܰܕ ܐܶܟܰܠܬܶܗ ܡܶܪܰܬ ܟܰܪܣܳܐ ܕܺܝܠܝ.
11- ܘܶܐܡܰܪ ܠܺܝ. ܙܳܕܶܩ ܠܳܟ ܬܽܘܒ ܠܡܶܬܢܰܒܳܝܽܘ ܥܰܠ ܥܰܡ̱̈ܡܶܐ ܘܥܰܠ ܐܶܡ̈ܘܳܬܳܐ ܘܠܶܫܳܢ̈ܶܐ ܘܡ̈ܰܠܟܶܐ ܣܰܓܺܝ̈ܶܐܐ܀