Revelation 15
The Book of Revelation
܀ ܓܠܝܢܐ ܕܝܘܚܢܢ ܝܗ ܀
1- ܘܰܚܙܺܝܬ ܐ̱ܚܪܺܬܳܐ ܐܳܬܳܐ ܒܰܫܡܰܝܳܐ. ܪܰܒܬܳܐ ܘܰܬܡܺܝܗܬܳܐ. ܡ̈ܰܠܰܐܟܶܐ ܫܰܒܥܳܐ ܕܺܐܝܬ ܠܗܽܘܢ ܡܰܚ̈ܘܳܬܳܐ ܫܒܰܥ ܗܳܠܶܝܢ ܐ̱ܚܪ̈ܳܝܳܬܳܐ܇ ܡܶܛܽܠ ܕܰܒܗܶܝܢ ܐܶܫܬܰܡܠܝܰܬ ܚܶܡܬܶܗ ܕܰܐܠܳܗܳܐ.
2- ܘܰܚܙܺܝܬ ܐܰܝܟ ܝܰܡܳܐ ܕܰܙܓܽܘܓܺܝܬܳܐ ܕܰܚܠܺܝܛܳܐ ܒܢܽܘܪܳܐ. ܘܰܠܗܳܢܽܘܢ ܕܰܙܟܰܘ ܡܶܢ ܗܰܘ ܚܰܝܘܰܬ ܫܶܢܳܐ ܘܡܶܢ ܨܰܠܡܳܐ ܕܺܝܠܶܗ܇ ܘܡܶܢ ܡܶܢܝܳܢܳܐ ܕܰܫܡܳܐ ܕܺܝܠܶܗ܆ ܟܰܕ ܩܳܝܡܺܝܢ ܥܰܠ ܝܰܡܳܐ ܕܰܙܓܽܘܓܺܝܬܳܐ܆ ܘܺܐܝܬ ܠܗܽܘܢ ܩܺܝܬܳܪ̈ܰܘܗ̱ܝ ܕܰܐܠܳܗܳܐ.
3- ܘܰܡܫܰܒܚܺܝܢ ܬܶܫܒܽܘܚܬܳܐ ܕܡܽܘܫܶܐ ܗܰܘ ܥܰܒܕܶܗ ܕܰܐܠܳܗܳܐ܆ ܘܬܶܫܒܽܘܚܬܳܐ ܕܶܐܡܪܳܐ ܟܰܕ ܐܳܡܪܺܝܢ. ܪܰܘܪ̈ܒܶܐ ܘܰܬܡܺܝ̈ܗܶܐ ܥ̈ܒܳܕܶܐ ܕܺܝܠܳܟ ܡܳܪܝܳܐ ܐܰܠܳܗܳܐ ܗܰܘ ܐܰܚܺܝܕ ܟܽܠ: ܟܺܐܢ̈ܳܬܳܐ ܘܫܰܪ̈ܺܝܪܳܬܳܐ ܐܽܘܪ̈ܚܳܬܳܐ ܕܺܝܠܳܟ ܡܰܠܟܳܐ ܕܥܳܠܡ̈ܶܐ.
4- ܡܰܢܽܘ ܕܠܳܐ ܢܶܕܚܰܠ ܠܳܟ ܡܳܪܝܳܐ܆ ܘܰܢܫܰܒܰܚ ܠܰܫܡܳܐ ܕܺܝܠܳܟ؟ ܡܶܛܽܠ ܕܰܐܢ̱ܬ ܗ̱ܘ ܒܰܠܚܽܘܕ ܚܰܣܝܳܐ ܐܺܝܬܰܝܟ ܘܟܺܐܢܳܐ. ܡܶܛܽܠ ܕܟܽܠܗܽܘܢ ܥܰܡ̱̈ܡܶܐ ܢܺܐܬܽܘܢ ܘܢܶܣܓܕܽܘܢ ܩܕܳܡܰܝܟ܆ ܡܶܛܽܠ ܕܙܶܕ̈ܩܶܐ ܕܺܝܠܳܟ ܐܶܬܓܠܺܝ܀
5- ܘܒܳܬܰܪ ܗܳܠܶܝܢ ܚܙܺܝܬ܆ ܘܶܐܬܦܬܰܚ ܗܰܝܟܠܳܐ ܕܡܰܫܟܢܳܐ ܕܣܳܗܕܽܘܬܳܐ ܒܰܫܡܰܝܳܐ܆
6- ܘܰܢܦܰܩܘ ܗܳܢܽܘܢ ܫܰܒܥܳܐ ܡ̈ܰܠܰܐܟܶܐ ܗܳܠܶܝܢ ܕܺܐܝܬ ܠܗܽܘܢ ܫܒܰܥ ܡܰܚ̈ܘܳܬܳܐ ܡܶܢ ܗܰܝܟܠܳܐ܆ ܟܰܕ ܐܺܝܬܰܝܗܽܘܢ ܕܰܠܒܺܝܫܺܝܢ ܟܶܬܳܢܳܐ ܕܰܟܝܳܐ ܢܰܨܺܝܚܳܐ. ܘܰܐܣܺܝܪܺܝܢ ܠܘܳܬ ܚܰܕ̈ܝܶܐ ܕܺܝܠܗܽܘܢ ܙܽܘ̈ܢܰܐܣ ܕܕܰܗܒܳܐ.
7- ܘܰܚܕܳܐ ܡܶܢ ܐܰܪܒܰܥ ܚܰܝ̈ܘܳܬܳܐ ܝܶܗܒܰܬ ܠܗܳܢܽܘܢ ܡ̈ܰܠܰܐܟܶܐ܆ ܫܒܰܥ ܦܺܝ̈ܠܰܐܣ ܕܕܰܗܒܳܐ܆ ܕܡܰܠ̈ܝܳܢ ܡܶܢ ܚܶܡܬܶܗ ܕܰܐܠܳܗܳܐ ܗܰܘ ܕܚܰܝ ܠܥܳܠܡ̈ܶܐ ܕܥܳܠܡܳܐ.
8- ܘܶܐܬܡܠܺܝ ܗܰܝܟܠܳܐ ܡܶܢ ܬܶܢܳܢܳܐ ܡܶܢ ܕܬܶܫܒܽܘܚܬܶܗ ܕܰܐܠܳܗܳܐ܆ ܘܡܶܢ ܚܰܝܠܳܐ ܕܺܝܠܶܗ. ܘܠܳܐ ܐ̱ܢܳܫ ܡܨܶܐ ܗ̱ܘܳܐ ܠܡܶܥܰܠ ܠܗܰܝܟܠܳܐ܆ ܥܕܰܡܳܐ ܕܢܶܫ̈ܬܰܠܡܳܢ ܗܳܠܶܝܢ ܫܒܰܥ ܡܰܚ̈ܘܳܬܳܐ ܕܗܳܢܽܘܢ ܫܰܒܥܳܐ ܡ̈ܰܠܰܐܟܶܐ܀