Revelation 22
The Book of Revelation
܀ ܓܠܝܢܐ ܕܝܘܚܢܢ ܟܒ ܀
1- ܘܚܰܘܺܝ ܠܺܝ ܢܰܗܪܳܐ ܕܡܰܝ̈ܳܐ ܚܰܝ̈ܶܐ ܢܰܨܺܝ̈ܚܶܐ ܐܰܝܟ ܩܪܽܘܣܛܶܠܳܘܣ. ܕܢܳܦܶܩ ܡܶܢ ܬܪܽܘܢܽܘܣ ܕܰܐܠܳܗܳܐ ܘܰܕܗܰܘ ܐܶܡܪܳܐ.
2- ܒܰܡܨܰܥܬܳܐ ܕܫܽܘܩܳܐ ܦܰܬܝܳܐ ܕܺܝܠܳܗ̇. ܥܰܠ ܢܰܗܪܳܐ ܡܶܢ ܗܳܪܟܳܐ ܘܡܶܢ ܠܗܰܠ܆ ܩܰܝܣܳܐ ܕܚܰܝ̈ܶܐ ܕܥܳܒܶܕ ܦܺܐܪ̈ܶܐ ܬܪܶܥܣܰܪ. ܕܰܒܟܽܠ ܝܰܪܚܳܐ ܝܳܗܶܒ ܟܽܠ ܚܰܕ ܦܺܐܪܳܐ ܕܺܝܠܶܗ. ܘܛܰܪ̈ܦܰܘܗ̱ܝ ܕܩܰܝܣܳܐ ܠܳܐܣܝܽܘܬܳܐ ܕܥܰܡ̱̈ܡܶܐ.
3- ܘܟܽܠ ܢܶܬܪܳܐ ܠܳܐ ܢܶܗܘܶܐ ܬܽܘܒ. ܘܰܬܪܽܘܢܽܘܣ ܕܰܐܠܳܗܳܐ ܘܰܕܗܰܘ ܐܶܡܪܳܐ ܒܳܗ̇ ܢܶܗܘܶܐ. ܘܥܰܒܕ̈ܶܐ ܕܺܝܠܶܗ ܢܫܰܡܫܽܘܢܳܝܗ̱ܝ.
4- ܘܢܶܚܙܽܘܢ ܦܰܪܨܽܘܦܳܐ ܕܺܝܠܶܗ. ܘܰܫܡܳܐ ܕܺܝܠܶܗ ܥܰܠ ܒܶܝܬ ܥܰܝ̈ܢܶܐ ܕܺܝܠܗܽܘܢ.
5- ܘܠܺܠܝܳܐ ܠܳܐ ܢܶܗܘܶܐ ܬܽܘܒ. ܘܠܳܐ ܢܶܗܘܶܐ ܠܗܽܘܢ ܣܽܘܢܩܳܢܳܐ ܕܢܽܘܗܪܳܐ ܕܰܫܪܳܓܳܐ ܘܰܕܢܽܘܗܪܳܐ ܕܫܶܡܫܳܐ. ܡܶܛܽܠ ܕܡܳܪܝܳܐ ܐܰܠܳܗܳܐ ܡܰܢܗܰܪ ܠܗܽܘܢ܆ ܘܢܰܡܠܟܽܘܢ ܠܥܳܠܡ̈ܶܐ ܕܥܳܠܡ̈ܶܐ܀
6- ܘܶܐܡܰܪ ܠܺܝ ܗܳܠܶܝܢ ܡ̈ܶܠܶܐ ܡܗܰܝܡ̈ܢܳܬܳܐ ܘܫܰܪܺܝܪ̈ܳܬܳܐ. ܘܡܳܪܝܳܐ ܐܰܠܳܗܳܐ ܕܪ̈ܽܘܚܶܐ ܕܰܢܒܺܝ̈ܶܐ܇ ܫܰܕܪܰܢܝ ܠܺܝ ܠܡܰܠܰܐܟܳܐ ܕܺܝܠܳܗ̇. ܠܰܡܚܰܘܳܝܽܘ ܠܥܰܒ̈ܕܶܐ ܕܺܝܠܶܗ܇ ܗܳܠܶܝܢ ܕܙܳܕܶܩ ܠܡܶܗܘܳܐ ܒܰܥܓܰܠ.
7- ܘܗܳܐ ܐܳܬܶܐ ܐ̱ܢܳܐ ܥܓܰܠ. ܛܽܘܒܬܳܢܰܐ ܗ̱ܘ ܗܰܘ ܕܢܳܛܰܪ ܠܡ̈ܶܠܶܐ ܕܰܢܒܺܝܽܘܬܳܐ ܕܰܟܬܳܒܳܐ ܗܳܢܳܐ.
8- ܐܳܦ ܐܶܢܳܐ ܝܽܘܚܰܢܳܢ ܗܰܘ ܕܫܳܡܰܥ ܘܚܳܙܶܐ ܗܳܠܶܝܢ. ܘܟܰܕ ܫܶܡܥܶܬ ܘܰܚܙܺܝܬ܆ ܢܶܦܠܶܬ ܠܡܶܣܓܰܕ ܩܕܳܡ ܪ̈ܶܓܠܰܘܗ̱ܝ ܕܡܰܠܰܐܟܳܐ ܗܰܘ ܕܰܡܚܰܘܶܐ ܗ̱ܘܳܐ ܠܺܝ ܗܳܠܶܝܢ.
9- ܘܶܐܡܰܪ ܠܺܝ ܚܙܺܝ. ܠܳܐ ܟܢܳܬܳܐ ܕܺܝܠܳܟ ܐܺܝܬܰܝ܆ ܘܕܰܐܚ̈ܶܐ ܕܺܝܠܳܟ ܢܒܺܝ̈ܶܐ: ܘܕܰܐܝܠܶܝܢ ܕܢܳܛܪܺܝܢ ܠܡ̈ܶܠܶܐ ܕܰܟܬܳܒܳܐ ܗܳܢܳܐ܆ ܠܰܐܠܳܗܳܐ ܣܓܽܘܕ܀
10- ܘܶܐܡܰܪ ܠܺܝ. ܠܳܐ ܬܶܚܬܽܘܡ ܠܡ̈ܶܠܶܐ ܕܰܢܒܺܝܽܘܬܳܐ ܕܰܟܬܳܒܳܐ ܗܳܢܳܐ. ܗܽܘ ܙܰܒܢܳܐ ܓܶܝܪ ܩܰܪܺܝܒ ܐܺܝܬܰܘܗ̱ܝ.
11- ܗܰܘ ܕܡܰܥܘܶܠ ܢܰܥܘܶܠ ܬܽܘܒ. ܗܰܘ ܕܰܨܐܶܐ ܢܶܨܛܰܐܶܐ ܬܽܘܒ. ܘܙܰܕܺܝܩܳܐ ܙܰܕܺܝܩܽܘܬܳܐ ܢܶܥܒܶܕ ܬܽܘܒ. ܘܩܰܕܺܝܫܳܐ ܢܶܬܩܰܕܰܫ ܬܽܘܒ.
12- ܗܳܐ ܐܳܬܶܐ ܐ̱ܢܳܐ ܥܓܰܠ܆ ܘܰܐܓܪܳܐ ܕܺܝܠܝ ܥܰܡܝ. ܠܡܶܦܪܰܥ ܠܟܽܠ ܚܰܕ ܐܰܝܟ ܕܺܐܝܬܰܘܗ̱ܝ ܥܒܳܕܳܐ ܕܺܝܠܶܗ.
13- ܐܶܢܳܐ ܐܳܠܰܦ ܘܬܰܘ. ܗܰܘ ܩܰܕܡܳܝܳܐ ܘܗܰܘ ܐ̱ܚܪܳܝܳܐ. ܗܰܘ ܪܺܝܫܳܐ ܘܗܰܘ ܘܫܽܘܠܳܡܳܐ.
14- ܛܽܘ̈ܒܬܳܢܶܐ ܐܶܢܽܘܢ ܗܳܢܽܘܢ ܕܥܳܒܕܺܝܢ ܦܽܘܩ̈ܕܳܢܶܐ ܕܺܝܠܶܗ. ܐܰܝܟܰܢܳܐ ܕܢܶܗܘܶܐ ܫܽܘܠܛܳܢܳܐ ܕܺܝܠܗܽܘܢ ܥܰܠ ܩܰܝܣܳܐ ܕܚܰܝ̈ܶܐ. ܘܰܒܬܰܪܥܳܐ ܢܶܥܠܽܘܢ ܠܰܡܕܺܝܢ̱ܬܳܐ.
15- ܠܒܰܪ ܟܰܠܒ̈ܶܐ ܘܚܰܪ̈ܳܫܶܐ ܘܙܰܢܳܝ̈ܶܐ ܘܩܳܛܽܘ̈ܠܶܐ ܘܦܳܠܚ̈ܰܝ ܦܬܰܟܪ̈ܶܐ. ܘܟܽܠ ܕܪܳܚܶܡ ܘܥܳܒܶܕ ܕܰܓܳܠܽܘܬܳܐ܀
16- ܐܶܢܳܐ ܝܶܫܽܘܥ ܫܰܕܪܶܬ ܠܡܰܠܰܐܟܳܐ ܕܺܝܠܝ ܠܡܰܣܗܳܕܽܘ ܠܟܽܘܢ ܗܳܠܶܝܢ ܩܕܳܡ ܥ̈ܺܕܳܬܳܐ. ܐܶܢܳܐ ܐܺܝܬܰܝ ܗܰܘ ܥܶܩܳܪܳܐ ܘܓܶܢܣܳܐ ܕܕܰܘܺܝܕ. ܐܰܝܟ ܗܰܘ ܟܰܘܟܒܳܐ ܢܰܨܺܝܚܳܐ܇ ܗܰܘ ܨܰܦܪܳܝܳܐ.
17- ܘܪܽܘܚܳܐ ܘܟܰܠܬܳܐ ܐܳܡܪܺܝܢ ܬܳܐ. ܘܗܰܘ ܕܫܳܡܰܥ ܢܺܐܡܰܪ ܬܳܐ. ܘܗܰܘ ܕܰܨܗܶܐ ܢܺܐܬܶܐ ܘܗܰܘ ܕܨܳܒܶܐ ܢܶܣܰܒ ܡܰܝ̈ܳܐ ܕܚܰܝ̈ܶܐ ܡܰܓܳܢ܀
18- ܡܣܰܗܶܕ ܐ̱ܢܳܐ ܐܶܢܳܐ ܠܟܽܠ ܕܫܳܡܰܥ ܠܡ̈ܶܠܶܐ ܕܰܢܒܺܝܽܘܬܳܐ ܕܰܟܬܳܒܳܐ ܗܳܢܳܐ܆ ܘܶܐܢ ܐ̱ܢܳܫ ܢܣܺܝܡ ܥܠܰܝܗܶܝܢ܆ ܢܣܺܝܡ ܐܰܠܳܗܳܐ ܥܠܰܘܗ̱ܝ܇ ܠܡܰܚ̈ܘܳܬܳܐ ܗܳܠܶܝܢ ܕܰܟܬܺܝ̈ܒܳܢ ܒܰܟܬܳܒܳܐ ܗܳܢܳܐ.
19- ܘܶܐܢ ܐ̱ܢܳܫ ܢܒܰܨܰܪ ܡܶܢ ܡ̈ܶܠܶܐ ܕܰܢܒܺܝܽܘܬܳܐ ܕܰܟܬܳܒܳܐ ܗܳܢܳܐ܆ ܢܒܰܨܰܪ ܐܰܠܳܗܳܐ ܡܢܳܬܶܗ ܡܶܢ ܩܰܝܣܳܐ ܕܚܰܝ̈ܶܐ܇ ܘܡܶܢ ܡܕܺܝܢ̱ܬܳܐ ܗܳܝ ܩܰܕܺܝܫܬܳܐ܇ ܕܗܳܠܶܝܢ ܕܰܟܬܺܝܒܺܝܢ ܒܰܟܬܳܒܳܐ ܗܳܢܳܐ܀
20- ܐܳܡܰܪ ܗܰܘ ܕܰܡܣܰܗܶܕ ܗܳܠܶܝܢ. ܐܺܝܢ ܐܳܬܶܐ ܐ̱ܢܳܐ ܥܓܰܠ. ܐܰܡܺܝܢ. ܬܳܐ ܡܳܪܝܳܐ ܝܶܫܽܘܥ.
21- ܛܰܝܒܽܘܬܶܗ ܕܡܳܪܝܳܐ ܝܶܫܽܘܥ ܡܫܺܝܚܳܐ ܥܰܡ ܟܽܠܗܽܘܢ ܩܰܕܺܝ̈ܫܶܐ. ܐܰܡܺܝܢ܀