Revelation 14
The Book of Revelation
܀ ܓܠܝܢܐ ܕܝܘܚܢܢ ܝܕ ܀
1- ܘܰܚܙܺܝܬ ܘܗܳܐ ܗܰܘ ܐܶܡܪܳܐ ܩܳܐܶܡ ܥܰܠ ܛܽܘܪܳܐ ܕܨܶܗܝܽܘܢ܆ ܘܥܰܡܶܗ ܡܶܢܝܳܢܳܐ ܡܳܐܐ ܘܰܐܪܒܥܺܝܢ ܘܰܐܪܒܥܳܐ ܐܰܠܦܰܝ̈ܳܐ܇ ܕܺܐܝܬ ܠܗܽܘܢ ܫܡܳܐ ܕܺܝܠܶܗ ܘܰܫܡܳܐ ܕܰܐܒܽܘܗ̱ܝ ܕܰܟܬܺܝܒ ܥܰܠ ܒܶܝܬ ܥܰܝ̈ܢܶܐ ܕܺܝܠܗܽܘܢ.
2- ܘܫܶܡܥܶܬ ܩܳܠܳܐ ܡܶܢ ܫܡܰܝܳܐ ܐܰܝܟ ܩܳܠܳܐ ܕܡܰܝ̈ܳܐ ܣܰܓܺܝ̈ܶܐܐ܆ ܘܰܐܝܟ ܩܳܠܳܐ ܕܪܰܥܡܳܐ ܪܰܒܳܐ. ܘܩܳܠܳܐ ܗܰܘ ܕܫܶܡܥܶܬ܆ ܐܰܝܟ ܕܩܺܝܬܳܪܽܘܕܳܐ ܕܢܳܩܫܺܝܢ ܒܩܺܝܬܳܪ̈ܶܐ ܕܺܝܠܗܽܘܢ.
3- ܘܰܡܫܰܒܚܺܝܢ ܬܶܫܒܽܘܚܬܳܐ ܚܕܰܬܳܐ ܩܕܳܡܰܘܗ̱ܝ ܕܰܬܪܽܘܢܽܘܣ܆ ܘܰܩܕܳܡ ܗܳܠܶܝܢ ܐܰܪܒܰܥ ܚܰܝ̈ܘܳܬܳܐ ܘܰܕܗܳܢܽܘܢ ܩܰܫܺܝ̈ܫܶܐ. ܘܠܳܐ ܐ̱ܢܳܫ ܡܶܬܡܨܶܐ ܗ̱ܘܳܐ ܠܡܺܐܠܦܳܗ̇ ܠܬܶܫܒܽܘܚܬܳܐ. ܐܶܠܳܐ ܐܶܢ ܗܳܠܶܝܢ ܡܳܐܐ ܘܰܐܪܒܥܺܝܢ ܘܰܐܪܒܥܳܐ ܐܰܠܦܰܝ̈ܳܐ܇ ܗܳܢܽܘܢ ܙܒܺܝ̈ܢܰܝ ܡܶܢ ܐܰܪܥܳܐ.
4- ܗܳܢܽܘܢ ܐܺܝܬܰܝܗܽܘܢ ܗܳܠܶܝܢ ܕܥܰܡ ܢܶܫ̈ܶܐ ܠܳܐ ܐܶܬܛܰܘܰܫܘ. ܒܬܽܘ̈ܠܶܐ ܓܶܝܪ ܐܺܝܬܰܝܗܽܘܢ. ܗܳܢܽܘܢ ܐܺܝܬܰܝܗܽܘܢ ܗܳܠܶܝܢ ܕܢܰܩܦܽܘܗ̱ܝ ܠܶܐܡܪܳܐ ܠܰܐܝܟܳܐ ܕܶܐܢ ܐܳܙܶܠ. ܗܳܢܽܘܢ ܡܶܢ ܝܶܫܽܘܥ ܐܶܙܕܒܶܢܘ ܡܶܢ ܒܢܰܝ̈ܢܳܫܳܐ܆ ܪܺܝܫܺܝܬܳܐ ܠܰܐܠܳܗܳܐ ܘܠܶܐܡܪܳܐ.
5- ܘܰܒܦܽܘܡܳܐ ܕܺܝܠܗܽܘܢ ܠܳܐ ܐܶܫܬܰܟܚܰܬ ܕܰܓܳܠܽܘܬܳܐ. ܕܠܳܐ ܡܽܘܡܳܐ ܓܶܝܪ ܐܺܝܬܰܝܗܽܘܢ܀
6- ܘܰܚܙܺܝܬ ܐ̱ܚܪܺܢܳܐ ܡܰܠܰܐܟܳܐ ܟܰܕ ܦܳܪܰܚ ܒܰܫܡܰܝܳܐ܆ ܕܒܰܕܡܳܐ ܐܺܝܬ ܠܶܗ ܐܶܘܰܢܓܶܠܺܝܳܘܢ ܕܰܠܥܳܠܰܡ. ܠܰܡܣܰܒܳܪܽܘ ܠܗܳܢܽܘܢ ܕܥܳܡܪܺܝܢ ܥܰܠ ܐܰܪܥܳܐ: ܘܥܰܠ ܟܽܠ ܐܽܘܡܬܳܐ ܘܫܰܪܒܬܳܐ ܘܠܶܫܳܢܳܐ ܘܥܰܡܳܐ:
7- ܕܳܐܡܰܪ ܒܩܳܠܳܐ ܪܰܒܳܐ܆ ܕܚܰܠܘ ܠܰܐܠܳܗܳܐ܆ ܘܗܰܒܘ ܠܶܗ ܬܶܫܒܽܘܚܬܳܐ. ܡܶܛܽܠ ܕܶܐܬܳܬ ܫܳܥܬܳܐ ܕܕܺܝܢܳܐ ܕܺܝܠܶܗ. ܘܰܣܓܽܘܕܘ ܠܗܰܘ ܕܰܥܒܰܕ ܠܰܫܡܰܝܳܐ ܘܠܰܐܪܥܳܐ܆ ܘܰܠܝܰܡܳܐ ܘܠܰܡܥܺܝ̈ܢܶܐ ܕܡܰܝ̈ܳܐ܀
8- ܘܰܐ̱ܚܪܺܢܳܐ ܡܰܠܰܐܟܳܐ ܬܪܰܝܳܢܳܐ ܢܩܶܦ ܠܶܗ ܟܰܕ ܐܳܡܰܪ܆ ܢܶܦܠܰܬ ܢܶܦܠܰܬ ܒܳܒܶܝܠ ܗܳܝ ܪܰܒܬܳܐ܇ ܗܳܝ ܕܡܶܢ ܚܰܡܪܳܐ ܚܶܡܬܳܐ ܕܙܳܢܝܽܘܬܳܐ ܕܺܝܠܳܗ̇. ܐܰܫܩܝܰܬ ܠܟܽܠܗܽܘܢ ܥܰܡ̱̈ܡܶܐ܀
9- ܘܰܐ̱ܚܪܺܢܳܐ ܡܰܠܰܐܟܳܐ ܬܠܺܝܬܳܝܳܐ ܢܩܶܦ ܠܗܽܘܢ ܟܰܕ ܐܳܡܰܪ ܒܩܳܠܳܐ ܪܰܒܳܐ܆ ܐܶܢ ܐ̱ܢܳܫ ܣܳܓܶܕ ܠܗܰܘ ܚܰܝܘܰܬ ܫܶܢܳܐ ܘܰܠܨܰܠܡܳܐ ܕܺܝܠܶܗ: ܘܢܳܣܶܒ ܪܩܺܝܡܳܐ ܕܺܝܠܶܗ ܥܰܠ ܒܶܝܬ ܥܰܝ̈ܢܰܘܗ̱ܝ܆ ܐܰܘ ܥܰܠ ܐܺܝܕܳܐ ܕܺܝܠܶܗ܇
10- ܐܳܦ ܗܽܘ ܢܶܫܬܶܐ ܡܶܢ ܚܰܡܪܳܐ ܕܚܶܡܬܳܐ ܕܡܳܪܝܳܐ܇ ܗܰܘ ܕܰܡܙܺܝܓ ܐܰܩܶܪܰܐܛܽܘܢ ܟܳܣܳܐ ܕܪܽܘܓܙܳܐ ܕܺܝܠܶܗ. ܘܢܶܫܬܰܢܰܩ ܒܢܽܘܪܳܐ ܘܟܶܒܪܺܝܬܳܐ܆ ܩܕܳܡ ܡ̈ܰܠܰܐܟܶܐ ܩܰܕܺܝ̈ܫܶܐ ܘܰܩܕܳܡ ܬܪܽܘܢܽܘܣ.
11- ܘܬܶܢܳܢܳܐ ܕܬܰܫܢܺܝܩܳܐ ܕܺܝܠܗܽܘܢ܆ ܠܥܳܠܡ̈ܶܐ ܕܥܳܠܡ̈ܶܐ ܢܶܣܰܩ. ܘܠܳܐ ܐܺܝܬ ܠܗܽܘܢ ܢܝܳܚܳܐ ܐܺܝܡܳܡܳܐ ܘܠܺܠܝܳܐ܇ ܠܗܳܠܶܝܢ ܕܣܳܓܕܺܝܢ ܠܗܰܘ ܚܰܝܘܰܬ ܫܶܢܳܐ ܘܰܠܨܰܠܡܳܐ ܕܺܝܠܶܗ܇ ܘܰܠܐ̱ܢܳܫ ܕܶܐܢ ܢܳܣܶܒ ܠܪܽܘܫܡܳܐ ܕܰܫܡܳܐ ܕܺܝܠܶܗ܀
12- ܗܳܪܟܳܐ ܡܰܢ ܡܣܰܝܒܪܳܢܽܘܬܳܐ ܕܩܰܕܺܝ̈ܫܶܐ ܐܺܝܬܶܝܗ̇: ܗܳܢܽܘܢ ܕܢܳܛܪܺܝܢ ܠܦܽܘܩ̈ܕܳܢܰܘܗ̱ܝ ܕܰܐܠܳܗܳܐ ܘܰܠܗܰܝܡܳܢܽܘܬܶܗ ܕܝܶܫܽܘܥ.
13- ܘܫܶܡܥܶܬ ܩܳܠܳܐ ܡܶܢ ܫܡܰܝܳܐ ܕܳܐܡܰܪ ܟܬܽܘܒ܆ ܛܽܘ̈ܒܬܳܢܶܐ ܐܶܢܽܘܢ ܡܺܝ̈ܬܶܐ ܗܳܢܽܘܢ ܕܰܒܡܳܪܝܳܐ ܡܳܝܬܺܝܢ ܡܶܢ ܗܳܫܳܐ. ܐܺܝܢ ܐܳܡܰܪ ܪܽܘܚܳܐ܆ ܕܢܶܬܬܢܺܝܚܽܘܢ ܡܶܢ ܥܰܡ̈ܠܶܐ ܕܺܝܠܗܽܘܢ. ܗܶܢܽܘܢ ܓܶܝܪ ܥ̈ܒܳܕܶܐ ܕܺܝܠܗܽܘܢ ܢܳܦܩܺܝܢ ܥܰܡܗܽܘܢ܀
14- ܘܰܚܙܺܝܬ ܘܗܳܐ ܥܢܳܢܳܐ ܚܶܘܳܪܬܳܐ. ܘܥܰܠ ܥܢܳܢܳܐ ܝܳܬܶܒ ܕܕܳܡܶܐ ܠܰܒܪܶܗ ܕܐ̱ܢܳܫܳܐ. ܕܺܐܝܬ ܥܰܠ ܪܺܝܫܳܐ ܕܺܝܠܶܗ ܟܠܺܝܠܳܐ ܕܕܰܗܒܳܐ. ܘܒܺܐܝܕܳܐ ܕܺܝܠܶܗ ܡܰܓܠܳܐ ܚܰܪܺܝܦܬܳܐ.
15- ܘܰܐ̱ܚܪܺܢܳܐ ܡܰܠܰܐܟܳܐ ܢܦܰܩ ܡܶܢ ܗܰܝܟܠܳܐ܆ ܟܰܕ ܩܳܥܶܐ ܠܗܰܘ ܒܩܳܠܳܐ ܪܰܒܳܐ܇ ܠܗܰܘ ܕܝܳܬܶܒ ܥܰܠ ܥܢܳܢܳܐ܆ ܠܰܡܫܰܕܳܪܽܘ ܠܡܰܓܠܳܐ ܕܺܝܠܶܗ ܘܰܠܡܶܚܨܰܕ܆ ܡܶܛܽܠ ܕܶܐܬܳܬ ܫܳܥܬܳܐ ܠܡܶܚܨܰܕ܆ ܡܶܛܽܠ ܕܺܝܒܶܫ ܚܨܳܕܳܗ̇ ܕܰܐܪܥܳܐ.
16- ܘܰܐܪܡܺܝ ܗܰܘ ܕܝܳܬܶܒ ܥܰܠ ܥܢܳܢܳܐ ܡܰܓܠܳܐ ܕܺܝܠܶܗ ܥܰܠ ܐܰܪܥܳܐ܆ ܘܶܐܬܚܰܨܕܰܬ ܐܰܪܥܳܐ܀
17- ܘܰܐ̱ܚܪܺܢܳܐ ܡܰܠܰܐܟܳܐ ܢܦܰܩ ܡܶܢ ܗܰܝܟܠܳܐ ܗܰܘ ܕܒܰܫܡܰܝܳܐ. ܕܺܐܝܬ ܠܶܗ ܡܰܓܠܳܐ ܚܰܪܺܝܦܬܳܐ.
18- ܘܰܐ̱ܚܪܺܢܳܐ ܡܰܠܰܐܟܳܐ ܢܦܰܩ ܡܶܢ ܡܰܕܒܚܳܐ܆ ܗܰܘ ܕܺܐܝܬ ܠܶܗ ܫܽܘܠܛܳܢܳܐ ܥܰܠ ܢܽܘܪܳܐ. ܘܰܩܥܳܐ ܒܰܩܥܳܬܳܐ ܪܰܒܬܳܐ ܠܗܰܘ ܕܺܐܝܬ ܠܶܗ ܡܰܓܠܳܐ ܚܰܪܺܝܦܬܳܐ ܟܰܕ ܐܳܡܰܪ܆ ܫܰܕܰܪ ܠܡܰܓܠܳܐ ܕܺܝܠܳܟ ܗܳܝ ܚܰܪܺܝܦܬܳܐ܆ ܘܰܩܛܽܘܦ ܠܰܣ̈ܓܽܘܠܶܐ ܕܟܰܪܡܳܐ ܕܰܐܪܥܳܐ. ܡܶܛܽܠ ܕܶܐܬܥܰܠܰܡ̈ܝ ܥܶܢ̈ܒܶܝܗ̇ ܕܰܐܪܥܳܐ.
19- ܘܰܐܪܡܺܝ ܡܰܠܰܐܟܳܐ ܠܡܰܓܠܳܐ ܕܺܝܠܶܗ ܒܰܐܪܥܳܐ܆ ܘܰܩܛܰܦ ܠܟܰܪܡܳܗ̇ ܕܰܐܪܥܳܐ܆ ܘܰܐܪܡܺܝ ܒܡܰܥܨܰܪܬܳܐ ܕܚܶܡܬܶܗ ܕܰܐܠܳܗܳܐ ܗܰܘ ܪܰܒܳܐ.
20- ܘܶܐܬܬܕܺܝܫܰܬ ܗܺܝ ܡܰܥܨܰܪܬܳܐ ܠܒܰܪ ܡܶܢ ܡܕܺܝܢ̱ܬܳܐ܆ ܘܰܢܦܰܩ ܕܡܳܐ ܡܶܢ ܡܰܥܨܰܪܬܳܐ܆ ܥܕܰܡܳܐ ܠܰܦܓܽܘ̈ܕܶܐ ܕܪ̈ܰܟܫܳܐ܆ ܡܶܢ ܐܶܣ̈ܛܕܰܘܳܬܳܐ ܐܰܠܦܳܐ ܘܫܶܬܡܳܐ܀