Revelation 18
The Book of Revelation
܀ ܓܠܝܢܐ ܕܝܘܚܢܢ ܝܚ ܀
1- ܒܳܬܰܪ ܗܳܠܶܝܢ܆ ܚܙܺܝܬ ܐ̱ܚܪܺܢܳܐ ܡܰܠܰܐܟܳܐ ܕܢܳܚܶܬ ܡܶܢ ܫܡܰܝܳܐ܆ ܕܺܐܝܬ ܠܶܗ ܫܽܘܠܛܳܢܳܐ ܪܰܒܳܐ. ܘܰܐܪܥܳܐ ܢܶܗܪܰܬ ܡܶܢ ܬܶܫܒܽܘܚܬܳܐ ܕܺܝܠܶܗ.
2- ܘܰܩܥܳܐ ܒܩܳܠܳܐ ܚܰܝܠܬܳܢܳܐ ܟܰܕ ܐܳܡܰܪ܆ ܢܶܦܠܰܬ ܢܶܦܠܰܬ ܒܳܒܶܝܠ ܗܳܝ ܪܰܒܬܳܐ. ܘܰܗܘܳܬ ܡܰܥܡܪܳܐ ܕܕܰܝ̈ܘܶܐ܆ ܘܰܢܛܽܘܪܬܳܐ ܕܟܽܠ ܪܽܘܚܳܐ ܛܰܡܰܐܬܳܐ܇ ܘܰܢܛܽܘܪܬܳܐ ܕܟܽܠ ܦܳܪܰܚܬܳܐ ܛܰܡܰܐܬܳܐ ܘܰܣܢܺܝܬܳܐ܇ ܘܰܢܛܽܘܪܬܳܐ ܕܟܽܠ ܚܰܝܘܰܬ ܫܶܢܳܐ ܛܰܡܰܐܬܳܐ ܘܰܣܢܺܝܬܳܐ.
3- ܡܶܛܽܠ ܕܡܶܢ ܚܰܡܪܳܐ ܕܚܶܡܬܳܐ ܕܙܳܢܝܽܘܬܳܐ ܕܺܝܠܶܗ܆ ܐܶܫܬܺܝܘ ܟܽܠܗܽܘܢ ܥܰܡ̱̈ܡܶܐ܆ ܘܡ̈ܰܠܟܶܐ ܕܰܐܪܥܳܐ ܥܰܡܳܗ̇ ܙܰܢܺܝܘ. ܘܬܰܓܳܪ̈ܶܐ ܕܰܐܪܥܳܐ ܡܶܢ ܚܰܝܠܳܐ ܕܶܐܣܛܪܰܢܺܝܰܐ ܕܺܝܠܶܗ ܥܬܰܪܘ.
4- ܘܫܶܡܥܶܬ ܩܳܠܳܐ ܐ̱ܚܪܺܢܳܐ ܡܶܢ ܫܡܰܝܳܐ ܕܳܐܡܰܪ. ܦܽܘܩ ܡܶܢܳܗ̇ ܥܰܡܳܐ ܕܺܝܠܝ܆ ܐܰܝܟܰܢܳܐ ܕܠܳܐ ܬܶܫܬܰܘܬܦܽܘܢ ܠܰܚܛܳܗ̈ܶܐ ܕܺܝܠܳܗ̇. ܘܡܶܢ ܡܰܚ̈ܘܳܬܳܐ ܕܺܝܠܳܗ̇ ܕܰܠܡܳܐ ܬܶܣܒܽܘܢ܆
5- ܡܶܛܽܠ ܕܰܕܒܶܩܘ ܚܛܳܗ̈ܶܐ ܕܺܝܠܳܗ̇ ܥܕܰܡܳܐ ܠܰܫܡܰܝܳܐ. ܘܶܐܬܕܟܰܪ ܐܰܠܳܗܳܐ ܠܥܰܘ̈ܠܶܐ ܕܺܝܠܳܗ̇.
6- ܦܽܘܪܥܽܘܗ̇ ܐܰܝܟ ܕܳܐܦ ܗܺܝ ܦܶܪܥܰܬ. ܘܥܽܘܦܘ ܠܳܗ̇ ܥܶܐܦܳܐ ܐܰܝܟ ܥ̈ܒܳܕܶܐ ܕܺܝܠܳܗ̇. ܒܟܳܣܳܐ ܗܰܘ ܕܡܶܙܓܰܬ ܡܙܽܘܓܘ ܠܳܗ̇ ܥܶܐܦܳܐ܆
7- ܟܡܳܐ ܕܰܫܦܰܪ ܠܳܗ̇ ܠܡܶܨܛܪܳܝܽܘ܆ ܕܟܽܠܶܗ ܗܳܢܳܐ ܗܰܒܘ ܠܳܗ̇ ܚܽܘܒܠܳܐ ܘܶܐܒܠܳܐ. ܡܶܛܽܠ ܕܰܒܠܶܒܳܗ̇ ܐܳܡܪܳܐ. ܕܝܳܬܒܳܐ ܐ̱ܢܳܐ ܡܰܠܟܬܳܐ܆ ܘܰܐܪܡܰܠܬܳܐ ܠܳܐ ܐܺܝܬܰܝ. ܘܶܐܒܠܳܐ ܠܳܐ ܐܶܚܙܶܐ.
8- ܡܶܛܽܠ ܗܳܕܶܐ ܒܚܰܕ ܝܰܘܡܳܐ ܢܺܐܬ̈ܝܳܢ ܗܳܠܶܝܢ ܡܰܚ̈ܘܳܬܳܐ ܕܺܝܠܳܗ̇. ܡܰܘܬܳܐ ܘܶܐܒܠܳܐ ܘܟܰܦܢܳܐ. ܘܰܒܢܽܘܪܳܐ ܬܺܐܩܰܕ. ܡܶܛܽܠ ܕܚܰܝܠܬܳܢܰܐ ܗ̱ܘ ܡܳܪܝܳܐ ܐܰܠܳܗܳܐ ܗܰܘ ܕܕܳܢܳܗ̇܀
9- ܘܢܶܒܥܽܘܢ ܘܢܶܬܰܐܒܠܽܘܢ ܘܢܰܪܩܕܽܘܢ ܥܠܶܝܗ̇ ܡ̈ܰܠܟܶܐ ܕܰܐܪܥܳܐ܇ ܗܳܢܽܘܢ ܕܥܰܡܳܗ̇ ܙܰܢܺܝܘ ܘܶܐܨܛܪܺܝܘ܇ ܐܶܡܰܬܝ ܕܢܶܚܙܽܘܢ ܠܬܶܢܳܢܳܐ ܕܝܰܩܕܳܢܳܐ ܕܺܝܠܳܗ̇.
10- ܟܰܕ ܡܶܢ ܪܽܘܚܩܳܐ ܩܳܝܡܺܝܢ ܡܶܛܽܠ ܕܶܚܠܬܳܐ ܕܫܽܘܢܳܩܳܐ ܕܺܝܠܳܗ̇. ܟܰܕ ܐܳܡܪܺܝܢ܆ ܘܳܝ ܘܳܝ ܡܕܺܝܢ̱ܬܳܐ ܗܳܝ ܪܰܒܬܳܐ ܒܳܒܶܝܠ܆ ܡܕܺܝܢ̱ܬܳܐ ܗܳܝ ܚܰܝܠܬܳܢܺܝܬܳܐ. ܡܶܛܽܠ ܕܒܰܚܕܳܐ ܫܳܥܬܳܐ ܐܶܬܳܐ ܕܺܝܢܳܐ ܕܺܝܠܶܟܝ.
11- ܘܬܰܓܳܪ̈ܶܐ ܕܰܐܪܥܳܐ ܢܶܒܟܽܘܢ ܘܢܶܬܰܐܒܠܽܘܢ ܥܠܶܝܗ̇. ܡܶܛܽܠ ܕܛܰܥ̈ܢܶܐ ܕܺܝܠܗܽܘܢ܆ ܠܳܐ ܐ̱ܢܳܫ ܙܳܒܶܢ.
12- ܘܠܳܐ ܬܽܘܒ ܛܰܥ̈ܢܶܐ ܕܕܰܗܒܳܐ ܘܰܕܣܺܐܡܳܐ ܘܰܕܟܺܐܦ̈ܶܐ ܡܝܰܩܪ̈ܳܬܳܐ: ܘܰܕܡܰܪ̈ܓܳܢܝܳܬܳܐ ܘܰܕܒܽܘܨܳܐ ܘܕܰܐܪܓܘܳܢܳܐ: ܘܰܕܫܺܐܪܳܝܳܐ ܘܕܰܙܚܽܘܪܺܝܬܳܐ: ܘܟܽܠ ܩܰܝܣܳܐ ܕܒܶܣܡܳܐ: ܘܟܽܠ ܡܳܐܢܳܐ ܓܪܰܡܦܺܝܠܳܝܳܐ: ܘܟܽܠ ܡܳܐܢܳܐ ܕܩܰܝܣܳܐ ܝܰܬܺܝܪ ܡܝܰܩܪܳܐ. ܘܕܰܢܚܳܫܳܐ ܘܰܕܦܰܪܙܠܳܐ ܘܰܕܫܺܝܫܳܐ܇
13- ܘܩܽܘܢܺܝܡܳܘܢ ܘܰܐܡܽܘܡܽܘܢ ܘܒܶܣ̈ܡܳܢܶܐ ܘܡܽܘܪܽܘܢ ܘܠܺܒܰܐܢܽܘܢ: ܘܚܰܡܪܳܐ ܘܡܶܫܚܳܐ ܘܚ̈ܶܛܶܐ: ܘܰܒܥܺܝܪܳܐ ܘܥܶܪ̈ܒܶܐ ܘܪ̈ܰܟܫܳܐ ܘܡܰܪ̈ܟܒܳܬܳܐ: ܘܦܰܓܪ̈ܶܐ ܘܢܰܦ̈ܫܳܬܳܐ ܕܰܒܢܰܝ̈ܢܳܫܳܐ.
14- ܘܶܐܒܒܳܐ ܕܪܶܓܬܳܐ ܕܢܰܦܫܳܐ ܕܺܝܠܶܟܝ ܐܶܙܰܠ ܡܶܢܶܟܝ. ܘܟܽܠܗܶܝܢ ܗܳܠܶܝܢ܇ ܫܰܡܺܝ̈ܢܳܬܳܐ ܘܢܰܨܺܝ̈ܚܳܬܳܐ ܐܶܒܰܕܶܝ̈ܢ ܡܶܢܶܟܝ.
15- ܘܠܳܐ ܬܽܘܒ ܢܶܫܟܚܽܘܢ ܬܰܓܳܪ̈ܶܐ ܕܗܳܠܶܝܢ. ܗܳܢܽܘܢ ܕܰܥܬܰܪܘ ܡܶܢܳܗ̇܆ ܡܶܢ ܪܽܘܚܩܳܐ ܢܩܽܘܡܽܘܢ ܡܶܛܽܠ ܕܶܚܠܬܳܐ ܕܫܽܘܢܳܩܳܐ ܕܺܝܠܳܗ̇. ܘܢܶܒܟܽܘܢ ܘܢܶܬܰܐܒܠܽܘܢ.
16- ܟܰܕ ܐܳܡܪܺܝܢ. ܘܳܝ ܘܳܝ ܡܕܺܝܢ̱ܬܳܐ ܗܳܝ ܪܰܒܬܳܐ: ܗܳܝ ܕܰܡܥܰܛܦܳܐ ܕܒܽܘܨܳܐ ܘܕܰܐܪܓܘܳܢܳܐ ܘܕܰܙܚܽܘܪܺܝܬܳܐ ܘܕܰܡܕܰܗܒܳܐ ܒܕܰܗܒܳܐ ܘܰܒܟܺܐܦܳܐ ܡܝܰܩܰܪܬܳܐ ܘܡܰܪܓܳܢܺܝܬܳܐ.
17- ܡܶܛܽܠ ܕܒܰܚܕܳܐ ܫܳܥܬܳܐ ܚܪܶܒ ܥܽܘܬܪܳܐ ܗܰܘ ܕܕܰܐܝܟ ܗܳܢܳܐ. ܘܟܽܠ ܩܽܘܒܰܪܢܺܝܛܳܐ. ܘܟܽܠ ܗܰܘ ܕܰܠܕܽܘܟܬܳܐ ܛܳܐܶܦ: ܘܢܳܘ̈ܛܶܐ ܘܟܽܠ ܕܰܒܝܰܡܳܐ ܦܳܠܚܺܝܢ܆ ܡܶܢ ܪܽܘܚܩܳܐ ܩܳܡܘ
18- ܘܰܩܥܰܘ ܟܰܕ ܚܳܙܶܝܢ ܠܬܶܢܳܢܳܐ ܕܝܰܩܕܳܢܳܐ ܕܺܝܠܳܗ̇. ܟܰܕ ܐܳܡܪܺܝܢ܆ ܡܰܢ ܐܺܝܬ ܕܕܳܡܝܳܐ ܠܰܡܕܺܝܢ̱ܬܳܐ ܗܳܝ ܪܰܒܬܳܐ.
19- ܘܰܐܪܡܺܝܘ ܥܰܦܪܳܐ ܥܰܠ ܪ̈ܺܝܫܰܝܗܽܘܢ. ܘܰܩܥܰܘ ܟܰܕ ܒܳܟܶܝܢ ܘܰܐܒܺܝܠܺܝܢ ܘܳܐܡܪܺܝܢ. ܘܳܝ ܘܳܝ ܡܕܺܝܢ̱ܬܳܐ ܗܳܝ ܪܰܒܬܳܐ. ܗܳܝ ܕܒܳܗ̇ ܥܬܰܪܘ ܟܽܠܗܽܘܢ ܗܳܢܽܘܢ ܕܺܐܝܬ ܠܗܽܘܢ ܐܶܠܦ̈ܶܐ ܒܝܰܡܳܐ܇ ܡܶܢ ܡܝܰܩܪܽܘܬܳܐ ܕܺܝܠܳܗ̇. ܡܶܛܽܠ ܕܒܰܚܕܳܐ ܫܳܥܬܳܐ ܚܶܪܒܰܬ.
20- ܐܶܬܒܰܣܰܡܘ ܥܠܶܝܗ̇ ܫܡܰܝܳܐ ܘܡ̈ܰܠܰܐܟܶܐ. ܘܰܫܠܺܝ̈ܚܶܐ ܘܰܢܒܺܝ̈ܶܐ܆ ܡܶܛܽܠ ܕܕܳܢ ܐܰܠܳܗܳܐ ܕܺܝܢܳܐ ܕܺܝܠܟܽܘܢ ܡܶܢܳܗ̇܀
21- ܘܰܫܩܰܠ ܚܰܕ ܡܰܠܰܐܟܳܐ ܚܰܝܠܬܳܢܳܐ ܟܺܐܦܳܐ ܐܰܝܟ ܪܰܚܝܳܐ ܪܰܒܬܳܐ܆ ܘܰܐܪܡܺܝ ܒܝܰܡܳܐ ܟܰܕ ܐܳܡܰܪ. ܗܳܟܰܢܳܐ ܒܚܺܐܦܳܐ ܬܶܬܪܡܶܐ ܒܳܒܶܝܠ ܡܕܺܝܢ̱ܬܳܐ ܗܳܝ ܪܰܒܬܳܐ܇ ܘܠܳܐ ܬܶܫܬܟܰܚ ܬܽܘܒ.
22- ܘܩܳܠܳܐ ܕܩܺܝܬܳܪ̈ܽܘܕܶܐ ܘܰܕܡܽܘ̈ܣܺܝܩܶܐ ܘܕܰܙܡܳܪ̈ܶܐ ܘܰܕܫܺܝܦܽܘܪܳܐ܆ ܠܳܐ ܢܶܫܬܡܰܥ ܒܶܟܝ ܬܽܘܒ. ܘܟܽܠ ܐܽܘܡܢܳܐ ܕܟܽܠ ܐܽܘܡܳܢܽܘܬܳܐ ܠܳܐ ܢܶܫܬܟܰܚ ܒܶܟܝ ܬܽܘܒ. ܘܩܳܠܳܐ ܕܪܰܚܝܳܐ ܠܳܐ ܢܶܫܬܡܰܥ ܒܶܟܝ ܬܽܘܒ.
23- ܘܢܽܘܗܪܳܐ ܕܰܫܪܳܓܳܐ ܠܳܐ ܢܶܬܚܙܶܐ ܒܶܟܝ ܬܽܘܒ. ܘܩܳܠܳܐ ܕܚܰܬܢܳܐ ܘܰܕܟܰܠܬܳܐ ܠܳܐ ܢܶܫܬܡܰܥ ܒܶܟܝ ܬܽܘܒ. ܡܶܛܽܠ ܕܬܰܓܳܪ̈ܶܐ ܕܺܝܠܶܟܝ ܐܺܝܬܰܝܗܽܘܢ ܗ̱ܘܰܘ ܪܰܘܪ̈ܒܳܢܶܐ ܕܰܐܪܥܳܐ. ܡܶܛܽܠ ܕܰܒܚܰܪ̈ܳܫܽܘܬܳܐ ܕܺܝܠܶܟܝ ܐܶܬܛܥܺܝܘ ܟܽܠܗܽܘܢ ܥܰܡ̱̈ܡܶܐ.
24- ܘܒܳܗ̇ ܕܡܳܐ ܕܰܢܒܺܝ̈ܶܐ ܘܰܕܩܰܕܺܝ̈ܫܶܐ ܐܶܫܬܟܰܚ ܘܰܕܟܽܠܗܽܘܢ ܗܳܢܽܘܢ ܕܰܢܟܺܝܣܺܝܢ ܥܰܠ ܐܰܪܥܳܐ܀