Revelation 5
The Book of Revelation
܀ ܓܠܝܢܐ ܕܝܘܚܢܢ ܗ ܀
1- ܘܰܚܙܺܝܬ ܥܰܠ ܝܰܡܺܝܢܶܗ ܕܗܰܘ ܕܝܳܬܶܒ ܥܰܠ ܬܪܽܘܢܽܘܣ܆ ܟܬܳܒܳܐ ܕܰܟܬܺܝܒ ܡܶܢ ܠܓܰܘ ܘܡܶܢ ܒܶܣܬܪܳܐ. ܕܰܛܒܺܝܥ ܒܛܰܒ̈ܥܶܐ ܫܰܒܥܳܐ.
2- ܘܰܚܙܺܝܬ ܡܰܠܰܐܟܳܐ ܚܰܝܠܬܳܢܳܐ ܕܡܰܟܪܶܙ ܒܩܳܠܳܐ ܪܰܒܳܐ܆ ܡܰܢܽܘ ܐܺܝܬܰܘܗ̱ܝ ܕܫܳܘܶܐ ܠܡܶܦܬܰܚ ܠܰܟܬܳܒܳܐ܇ ܘܰܠܡܶܫܪܳܐ ܠܛܰܒ̈ܥܶܐ ܕܺܝܠܶܗ.
3- ܘܠܳܐ ܐ̱ܢܳܫ ܡܨܶܐ ܗ̱ܘܳܐ ܒܰܫܡܰܝܳܐ ܠܥܶܠ܆ ܘܠܳܐ ܥܰܠ ܐܰܪܥܳܐ ܘܠܳܐ ܠܬܰܚܬ ܡܶܢ ܐܰܪܥܳܐ: ܠܡܶܦܬܰܚ ܠܰܟܬܳܒܳܐ ܘܠܳܐ ܠܡܶܚܙܝܶܗ.
4- ܘܶܐܢܳܐ ܒܳܟܶܐ ܗ̱ܘܺܝܬ ܣܰܓܺܝ܇ ܡܶܛܽܠ ܕܠܳܐ ܐ̱ܢܳܫ ܐܶܫܬܟܰܚ ܕܫܳܘܶܐ ܠܡܶܦܬܰܚ ܠܰܟܬܳܒܳܐ ܘܠܳܐ ܠܡܶܚܙܝܶܗ.
5- ܘܚܰܕ ܡܶܢ ܗܳܢܽܘܢ ܩܰܫܺܝ̈ܫܶܐ ܐܶܡܰܪ ܠܺܝ ܠܳܐ ܬܶܒܟܶܐ. ܗܳܐ ܙܟܳܐ ܐܰܪܝܳܐ ܗܰܘ ܕܡܶܢ ܫܰܪܒܬܳܐ ܕܺܝܗܽܘܕܳܐ܆ ܗܰܘ ܥܶܩܳܪܳܐ ܕܕܰܘܺܝܕ ܗܽܘ ܢܶܦܬܰܚ ܠܰܟܬܳܒܳܐ ܘܰܠܫܰܒܥܳܐ ܚܳܬܡ̈ܶܐ ܕܺܝܠܶܗ܀
6- ܘܰܚܙܺܝܬ ܒܰܡܨܰܥܬܳܐ ܕܰܬܪܽܘܢܽܘܣ ܘܰܕܗܳܢܶܝܢ ܐܰܪܒܰܥ ܚܰܝ̈ܘܳܬܳܐ܆ ܘܒܰܡܨܰܥܬܳܐ ܕܗܳܢܽܘܢ ܩܰܫܺܝ̈ܫܶܐ܆ ܐܶܡܪܳܐ ܕܩܳܐܶܡ ܐܰܝܟ ܢܟܺܝܣܳܐ. ܕܺܐܝܬ ܠܶܗ ܩܰܪ̈ܢܳܬܳܐ ܫܒܰܥ ܘܥܰܝ̈ܢܶܐ ܫܒܰܥ. ܗܳܠܶܝܢ ܕܺܐܝܬܰܝܗܶܝܢ ܫܒܰܥ ܪ̈ܽܘܚܶܐ ܕܰܐܠܳܗܳܐ܇ ܗܳܠܶܝܢ ܕܶܐܫܬܰܕܰܪ̈ܶܝܢ ܠܟܽܠܳܗ̇ ܐܰܪܥܳܐ.
7- ܘܶܐܬܳܐ ܘܰܢܣܰܒ ܟܬܳܒܳܐ ܡܶܢ ܝܰܡܺܝܢܶܗ ܕܗܰܘ ܕܝܳܬܶܒ ܥܰܠ ܬܪܽܘܢܽܘܣ܀
8- ܘܟܰܕ ܢܰܣܒܶܗ ܠܰܟܬܳܒܳܐ܆ ܗܳܢܶܝܢ ܫܒܰܥ ܚܰܝ̈ܘܳܬܳܐ ܘܗܳܢܽܘܢ ܥܶܣܪܺܝܢ ܘܰܐܪܒܥܳܐ ܩܰܫܺܝ̈ܫܶܐ܆ ܢܦܰܠܘ ܩܕܳܡܰܘܗ̱ܝ ܕܶܐܡܪܳܐ. ܟܰܕ ܐܺܝܬ ܠܟܽܠ ܚܰܕ ܡܶܢܗܽܘܢ܆ ܩܺܝܬܳܪܳܐ ܘܦܺܝ̈ܠܰܐܣ ܕܕܰܗܒܳܐ ܕܡܰܠ̈ܝܳܢ ܡܶܢ ܒܶܣ̈ܡܶܐ: ܗܳܠܶܝܢ ܕܺܐܝܬܰܝܗܽܘܢ ܨܠܰܘ̈ܳܬܳܐ ܕܩܰܕܺܝ̈ܫܶܐ:
9- ܘܰܡܫܰܒܚܺܝܢ ܬܶܫܒܽܘܚܬܳܐ ܚܕܰܬܳܐ ܟܰܕ ܐܳܡܪܺܝܢ. ܕܫܳܘܶܐ ܐܺܝܬܰܝܟ ܠܡܶܣܰܒ ܟܬܳܒܳܐ ܘܰܠܡܶܦܬܰܚ ܠܰܚܬܳܡܳܐ ܕܺܝܠܶܗ. ܡܶܛܽܠ ܕܶܐܬܢܟܶܣܬ ܘܰܙܒܰܢܬ ܠܰܢ ܠܰܐܠܳܗܳܐ ܒܰܕܡܳܐ ܕܺܝܠܳܟ܇ ܡܶܢ ܟܽܠ ܫܰܪ̈ܒܳܬܳܐ ܘܠܶܫܳܢܳܐ ܘܥܰܡܳܐ ܘܽܐܘܡܬܳܐ.
10- ܘܰܥܒܰܕܬ ܐܶܢܽܘܢ ܠܰܐܠܳܗܳܐ ܕܺܝܠܰܢ ܟܳܗ̈ܢܶܐ ܘܡ̈ܰܠܟܶܐ܇ ܘܡܰܡܠܟܺܝܢ ܥܰܠ ܐܰܪܥܳܐ܀
11- ܘܰܚܙܺܝܬ ܘܫܶܡܥܶܬ ܐܰܝܟ ܩܳܠܳܐ ܕܡ̈ܰܠܰܐܟܶܐ ܣܰܓܺܝ̈ܶܐܐ ܚܕܳܪ̈ܰܘܗ̱ܝ ܕܰܬܪܽܘܢܽܘܣ. ܘܰܕܚܰܝ̈ܘܳܬܳܐ ܘܰܕܩܰܫܺܝ̈ܫܶܐ. ܘܺܐܝܬܰܘܗ̱ܝ ܗ̱ܘܳܐ ܡܶܢܝܳܢܳܐ ܕܺܝܠܗܽܘܢ ܪܶܒܽܘ ܪ̈ܶܒܘܳܢ ܘܳܐܠܶܦ ܐܰܠܦܺܝ̈ܢ.
12- ܕܳܐܡܪܺܝܢ ܒܩܳܠܳܐ ܪܰܒܳܐ܆ ܕܫܳܘܶܐ ܐܺܝܬܰܘܗ̱ܝ ܗ̱ܘܳܐ ܐܶܡܪܳܐ ܗܰܘ ܢܟܺܝܣܳܐ܇ ܠܡܶܣܰܒ ܚܰܝܠܳܐ ܘܥܽܘܬܪܳܐ ܘܚܶܟܡܬܳܐ ܘܥܽܘܫܢܳܐ ܘܺܐܝܩܳܪܳܐ ܘܬܶܫܒܽܘܚܬܳܐ ܘܒܽܘܪܟܬܳܐ.
13- ܘܟܽܠ ܒܪܺܝܬܳܐ ܗܳܝ ܕܺܐܝܬܶܝܗ̇ ܒܰܫܡܰܝܳܐ ܘܥܰܠ ܐܰܪܥܳܐ ܘܰܠܬܰܚܬ ܡܶܢ ܐܰܪܥܳܐ܇ ܘܰܒܝܰܡܳܐ ܘܟܽܠܗܶܝܢ ܗܳܠܶܝܢ ܕܰܒܗܽܘܢ. ܘܫܶܡܥܶܬ ܗܰܘ ܕܝܰܬܺܝܒ ܥܰܠ ܬܪܽܘܢܽܘܣ ܕܳܐܡܰܪ܆ ܠܶܐܡܪܳܐ ܬܶܬܺܝܗܶܒ ܒܽܘܪܟܬܳܐ ܘܺܐܝܩܳܪܳܐ ܘܬܶܫܒܽܘܚܬܳܐ ܘܽܐܘܚܕܳܢܳܐ ܠܥܳܠܡ̈ܶܐ ܕܥܳܠܡ̈ܶܐ.
14- ܘܗܳܠܶܝܢ ܐܰܪܒܰܥ ܚܰܝ̈ܘܳܬܳܐ ܐܳܡܪ̈ܳܢ ܗ̱ܘ̈ܰܝ ܐܰܡܺܝܢ. ܘܗܳܢܽܘܢ ܩܰܫܺܝ̈ܫܶܐ ܢܦܰܠܘ ܘܰܣܓܶܕܘ܀