Revelation 11
The Book of Revelation
܀ ܓܠܝܢܐ ܕܝܘܚܢܢ ܝܐ ܀
1- ܘܶܐܬܺܝܗܶܒ ܠܺܝ ܩܰܢܝܳܐ ܕܕܳܡܶܐ ܠܚܽܘܛܪܳܐ. ܘܩܳܐܶܡ ܗ̱ܘܳܐ ܡܰܠܰܐܟܳܐ ܟܰܕ ܐܳܡܰܪ. ܩܽܘܡ ܘܰܡܫܽܘܚ ܠܗܰܝܟܠܳܐ ܕܰܐܠܳܗܳܐ܆ ܘܰܠܡܰܕܒܚܳܐ ܘܰܠܗܳܢܽܘܢ ܕܣܳܓܕܺܝܢ ܒܶܗ.
2- ܘܰܠܕܳܪܬܳܐ ܕܰܠܒܰܪ ܡܶܢ ܗܰܝܟܠܳܐ܆ ܐܰܦܶܩ ܡܶܢ ܠܒܰܪ ܘܠܳܐ ܬܶܡܫܚܺܝܗ̇. ܡܶܛܽܠ ܕܶܐܬܝܰܗܒܰܬ ܠܥܰܡ̱̈ܡܶܐ. ܘܠܰܡܕܺܝܢ̱ܬܳܐ ܩܰܕܺܝܫܬܳܐ ܢܕܽܘܫܽܘܢ ܝܰܪ̈ܚܶܐ ܐܰܪܒܥܺܝܢ ܘܰܬܪܶܝܢ.
3- ܘܶܐܬܶܠ ܠܰܬܪܶܝܢ ܣܳܗ̈ܕܶܐ ܕܺܝܠܝ ܘܢܶܬܢܰܒܽܘܢ ܝܰܘ̈ܡܶܐ ܐܰܠܦܳܐ ܘܡܰܐܬܶܝܢ ܘܶܫܬܺܝܢ܆ ܟܰܕ ܡܥܰܛܦܺܝܢ ܣܰܩ̈ܶܐ.
4- ܗܳܢܽܘܢ ܐܺܝܬܰܝܗܽܘܢ ܬܪܶܝܢ ܙܰܝ̈ܬܶܐ ܘܬܰܪܬܶܝܢ ܡܢܳܪ̈ܳܬܳܐ܇ ܗܳܠܶܝܢ ܕܰܩܕܳܡ ܡܳܪܳܗ̇ ܕܰܐܪܥܳܐ ܩܳܝܡܺܝܢ.
5- ܘܶܐܢ ܐ̱ܢܳܫ ܠܗܽܘܢ ܨܳܒܶܐ ܠܡܰܟܳܝܽܘ܆ ܢܽܘܪܳܐ ܢܳܦܩܳܐ ܡܶܢ ܦܽܘܡܳܐ ܕܺܝܠܗܽܘܢ ܘܳܐܟܠܳܐ ܠܰܒܥܶܠܕ̈ܒܳܒܶܐ ܕܺܝܠܗܽܘܢ. ܘܶܐܢ ܐ̱ܢܳܫ ܠܗܽܘܢ ܨܳܒܶܐ ܠܡܰܟܳܝܽܘ܆ ܗܳܢܳܐ ܙܰܕܶܩ ܠܶܗ ܠܡܶܬܩܛܳܠܽܘ.
6- ܗܳܢܽܘܢ ܐܺܝܬ ܠܗܽܘܢ ܫܽܘܠܛܳܢܳܐ ܕܢܶܐܚܕܽܘܢ ܠܰܫܡܰܝܳܐ܆ ܐܰܝܟܰܢܳܐ ܕܠܳܐ ܡܶܛܪܳܐ ܢܰܡܛܰܪ ܒܝܰܘ̈ܡܳܬܳܐ ܕܰܢܒܺܝ̈ܰܘܳܬܳܐ ܕܺܝܠܗܽܘܢ. ܘܫܽܘܠܛܳܢܳܐ ܐܺܝܬ ܠܶܗ ܥܰܠ ܡܰܝ̈ܳܐ ܕܢܶܗܦܟܽܘܢ ܐܶܢܽܘܢ ܠܰܕܡܳܐ. ܘܰܠܡܶܡܚܳܐ ܠܰܐܪܥܳܐ ܒܟܽܠ ܡܚܽܘܬܳܐ ܟܡܳܐ ܙܰܒܢܺܝ̈ܢ ܕܶܐܢ ܢܶܨܒܽܘܢ܀
7- ܘܶܐܡܰܬܝ ܕܰܢܫܰܡܠܽܘܢ ܣܳܗܕܽܘܬܳܐ ܕܺܝܠܗܽܘܢ܆ ܚܰܝܘܰܬ ܫܶܢܳܐ ܗܳܝ ܕܣܳܠܩܳܐ ܡܶܢ ܬܗܽܘܡܳܐ܆ ܬܶܥܒܶܕ ܥܰܡܗܽܘܢ ܩܪܳܒܳܐ. ܘܬܶܙܟܶܐ ܐܶܢܽܘܢ ܘܬܶܩܛܽܘܠ ܐܶܢܽܘܢ.
8- ܘܰܫܠܰܕܳܐ ܕܺܝܠܗܽܘܢ ܥܰܠ ܫܽܘܩܳܐ ܦܰܬܝܳܐ ܕܰܡܕܺܝܢ̱ܬܳܐ. ܗܳܝ ܐܰܝܕܳܐ ܕܡܶܬܩܰܪܝܳܐ ܪܽܘܚܳܢܳܐܺܝܬ ܣܕܽܘܡ ܘܡܶܨܪܶܝܢ܆ ܐܰܝܟܳܐ ܕܳܐܦ ܡܳܪܝܳܐ ܕܺܝܠܗܽܘܢ ܐܶܨܛܠܶܒ.
9- ܘܚܳܙܶܝܢ ܡܶܢ ܥܰܡ̱̈ܡܶܐ ܘܫܰܪ̈ܒܳܬܳܐ ܘܠܶܫܳܢ̈ܶܐ ܘܶܐܡ̈ܘܳܬܳܐ ܠܰܫ̈ܠܰܕܶܐ ܕܺܝܠܗܽܘܢ ܝܰܘ̈ܡܶܐ ܬܠܳܬܳܐ ܘܦܶܠܓܶܗ. ܘܠܰܫ̈ܠܰܕܶܐ ܕܺܝܠܗܽܘܢ ܠܳܐ ܢܶܫܒܩܽܘܢ ܠܡܶܬܬܣܳܡܽܘ ܒܩܰܒܪܳܐ.
10- ܘܗܳܢܽܘܢ ܕܥܳܡܪܺܝܢ ܥܰܠ ܐܰܪܥܳܐ ܢܶܚܕܽܘܢ ܥܠܰܝܗܽܘܢ ܘܰܢܒܰܣܡܽܘܢ. ܘܡܰܘܗ̈ܒܳܬܳܐ ܢܫܰܕܪܽܘܢ ܠܰܚܕ̈ܳܕܶܐ. ܡܶܛܽܠ ܕܗܳܢܽܘܢ ܬܪܶܥܣܰܪ ܢܒܺܝ̈ܶܐ ܫܰܢܶܩܘ ܠܗܳܠܶܝܢ ܕܥܳܡܪܺܝܢ ܥܰܠ ܐܰܪܥܳܐ.
11- ܘܒܳܬܰܪ ܗܳܠܶܝܢ ܬܠܳܬܳܐ ܝܰܘ̈ܡܶܐ ܘܦܶܠܓܶܗ܆ ܪܽܘܚܳܐ ܕܚܰܝ̈ܶܐ ܡܶܢ ܐܰܠܳܗܳܐ ܥܶܠܰܬ ܒܗܽܘܢ. ܘܩܳܡܘ ܥܰܠ ܪ̈ܶܓܠܶܐ ܕܺܝܠܗܽܘܢ. ܘܕܶܚܠܬܳܐ ܪܰܒܬܳܐ ܢܶܦܠܰܬ ܥܰܠ ܗܳܠܶܝܢ ܕܚܳܙܶܝܢ ܠܗܽܘܢ.
12- ܘܰܫܡܰܥܘ ܩܳܠܳܐ ܡܶܢ ܫܡܰܝܳܐ ܕܳܐܡܰܪ ܠܗܽܘܢ܆ ܣܰܩܘ ܠܗܳܪܟܳܐ. ܘܰܣܠܶܩܘ ܠܰܫܡܰܝܳܐ ܒܰܥܢܳܢܳܐ. ܘܰܚܙܰܘ ܐܶܢܽܘܢ ܒܥܶܠܕ̈ܒܳܒܶܐ ܕܺܝܠܗܽܘܢ.
13- ܘܰܒܗܳܝ ܫܳܥܬܳܐ ܗܘܳܐ ܙܰܘܥܳܐ ܪܰܒܳܐ. ܘܚܰܕ ܡܶܢ ܥܶܣܪܳܐ ܕܰܡܕܺܝܢ̱ܬܳܐ ܢܦܰܠ܆ ܘܶܐܬܩܰܛܰܠܘ ܒܙܰܘܥܳܐ ܫܡܳܗ̈ܶܐ ܕܰܒܢܰܝ̈ܢܳܫܳܐ ܐܰܠܦܰܝ̈ܳܐ ܫܰܒܥܳܐ. ܘܗܳܢܽܘܢ ܕܫܰܪܟܳܐ ܕܰܚܺܝ̈ܠܶܐ ܗܘܰܘ. ܘܝܰܗ̱ܒܘ ܬܶܫܒܽܘܚܬܳܐ ܠܰܐܠܳܗܳܐ ܕܒܰܫܡܰܝܳܐ܀
14- ܗܰܘ ܘܳܝܳܐ ܬܪܰܝܳܢܳܐ ܐܶܙܰܠܘ. ܘܗܰܘ ܘܳܝܳܐ ܬܠܺܝܬܳܝܳܐ ܐܶܬܳܐ ܥܓܰܠ܀
15- ܘܗܰܘ ܡܰܠܰܐܟܳܐ ܫܒܺܝܥܳܝܳܐ ܝܰܒܶܒ܆ ܘܰܗܘܰܘ ܩ̈ܳܠܶܐ ܪܰܘܪ̈ܒܶܐ ܒܰܫܡܰܝܳܐ ܕܳܐܡܪܺܝܢ܆ ܗܘܳܬ ܡܰܠܟܽܘܬܳܐ ܕܥܳܠܡܳܐ ܕܡܳܪܝܳܐ ܕܺܝܠܰܢ ܘܕܰܡܫܺܝܚܳܐ ܕܺܝܠܶܗ܆ ܘܢܰܡܠܶܟ ܠܥܳܠܡ̈ܶܐ ܕܥܳܠܡ̈ܶܐ.
16- ܘܗܳܢܽܘܢ ܥܶܣܪܺܝܢ ܘܰܐܪܒܥܳܐ ܩܰܫܺܝ̈ܫܶܐ܆ ܗܳܠܶܝܢ ܕܰܩܕܳܡ ܬܪܽܘܢܽܘܣ ܕܰܐܠܳܗܳܐ ܗܳܢܽܘܢ ܕܝܳܬܒܺܝܢ ܥܰܠ ܟܽܘܪ̈ܣܰܘܳܬܳܐ ܕܺܝܠܗܽܘܢ܆ ܢܦܰܠܘ ܥܰܠ ܦܰܪ̈ܨܽܘܦܶܐ ܕܺܝܠܗܽܘܢ܆ ܘܰܣܓܶܕܘ ܠܰܐܠܳܗܳܐ
17- ܟܰܕ ܐܳܡܪܺܝܢ܆ ܡܰܘܕܶܝܢܰܢ ܠܳܟ ܡܳܪܝܳܐ ܐܰܠܳܗܳܐ ܗܰܘ ܐܰܚܺܝܕ ܟܽܠ. ܗܰܘ ܕܺܐܝܬܰܘܗ̱ܝ ܘܗܰܘ ܕܺܐܝܬܰܘܗ̱ܝ ܗ̱ܘܳܐ. ܡܶܛܽܠ ܕܰܢܣܰܒܬ ܠܚܰܝܠܳܐ ܕܺܝܠܳܟ ܗܰܘ ܪܰܒܳܐ ܘܰܐܡܠܶܟܬ.
18- ܘܥܰܡ̱̈ܡܶܐ ܪܓܶܙܘ. ܘܶܐܬܳܐ ܪܽܘܓܙܳܐ ܕܺܝܠܳܟ ܘܙܰܒܢܳܐ ܠܡܺܝ̈ܬܶܐ ܠܡܶܬܬܕܳܢܽܘ. ܘܰܠܡܶܬܰܠ ܐܰܓܪܳܐ ܠܥܰܒ̈ܕܶܐ ܕܺܝܠܳܟ ܠܰܢܒܺܝ̈ܶܐ܆ ܘܰܠܩܰܕܺܝ̈ܫܶܐ ܘܰܠܗܳܠܶܝܢ ܕܕܳܚܠܺܝܢ ܠܰܫܡܳܐ ܕܺܝܠܳܟ. ܠܰܙܥܽܘܪ̈ܶܐ ܘܰܠܪܰܘܪ̈ܒܶܐ. ܘܠܰܡܚܰܒܳܠܽܘ ܠܗܳܢܽܘܢ ܕܚܰܒܶܠܘ ܠܰܐܪܥܳܐ܀
19- ܘܶܐܬܦܬܰܚ ܗܰܝܟܠܳܐ ܕܰܐܠܳܗܳܐ ܒܰܫܡܰܝܳܐ܆ ܘܶܐܬܚܰܙܝܰܬ ܩܺܒܽܘܬܳܐ ܕܕܺܝܰܬܺܩܺܐ ܕܺܝܠܶܗ ܒܗܰܝܟܠܳܐ. ܘܰܗܘܰܘ ܒܰܪ̈ܩܶܐ ܘܪ̈ܰܥܡܶܐ ܘܩ̈ܳܠܶܐ ܘܙܰܘܥܳܐ ܘܒܰܪܕܳܐ ܪܰܒܳܐ܀