Revelation 21
The Book of Revelation
܀ ܓܠܝܢܐ ܕܝܘܚܢܢ ܟܐ ܀
1- ܘܰܚܙܺܝܬ ܫܡܰܝ̈ܳܐ ܚܰܕ̱̈ܬܶܐ ܘܰܐܪܥܳܐ ܚܕܰܬܳܐ. ܗܰܘ ܓܶܝܪ ܩܰܕܡܳܝܳܐ܆ ܫܡܰܝܳܐ ܘܰܐܪܥܳܐ ܩܰܕܡܳܝܬܳܐ ܐܶܙܰܠܘ. ܘܝܰܡܳܐ ܠܳܐ ܐܺܝܬܰܘܗ̱ܝ ܬܽܘܒ.
2- ܘܠܰܡܕܺܝܢ̱ܬܳܐ ܩܰܕܺܝܫܬܳܐ ܐܽܘܪܺܫܠܶܡ ܚܕܰܬܳܐ܆ ܚܙܺܝܬ܆ ܟܰܕ ܢܳܚܬܳܐ ܡܶܢ ܫܡܰܝܳܐ ܡܶܢ ܐܰܠܳܗܳܐ. ܟܰܕ ܡܛܰܝܒܳܐ ܐܰܝܟ ܟܰܠܬܳܐ ܡܨܰܒܰܬܬܳܐ ܠܓܰܒܪܳܐ ܕܺܝܠܳܗ̇.
3- ܘܫܶܡܥܶܬ ܩܳܠܳܐ ܪܰܒܳܐ ܡܶܢ ܫܡܰܝܳܐ ܕܳܐܡܰܪ܆ ܗܳܐ ܡܰܫܟܢܳܐ ܕܰܐܠܳܗܳܐ ܥܰܡ ܒܢܰܝ̈ܢܳܫܳܐ ܘܫܳܪܶܐ ܥܰܡܗܽܘܢ. ܘܗܶܢܽܘܢ ܥܰܡܳܐ ܕܺܝܠܶܗ ܢܶܗܘܽܘܢ. ܘܗܽܘ ܐܰܠܳܗܳܐ ܥܰܡܗܽܘܢ. ܘܢܶܗܘܶܐ ܠܗܽܘܢ ܐܰܠܳܗܳܐ.
4- ܘܬܰܘܦܶܐ ܟܽܠ ܕܶܡܥܬܳܐ ܡܶܢ ܥܰܝ̈ܢܶܐ ܕܺܝܠܗܽܘܢ. ܘܡܰܘܬܳܐ ܠܳܐ ܢܶܗܘܶܐ ܬܽܘܒ. ܘܠܳܐ ܐܶܒܠܳܐ ܘܠܳܐ ܥܳܩܬܳܐ. ܘܠܳܐ ܟܺܐܒܳܐ ܠܳܐ ܢܶܗܘܶܐ ܬܽܘܒ܆ ܡܶܛܽܠ ܕܩܰܕ̈ܡܳܝܳܬܳܐ ܥܒܰܪ̈ܶܝܢ܀
5- ܘܶܐܡܰܪ ܗܰܘ ܕܝܳܬܶܒ ܥܰܠ ܬܪܽܘܢܽܘܣ. ܘܗܳܐ ܠܟܽܠܗܶܝܢ ܚ̈ܰܕ̱ܬܳܬܳܐ ܥܳܒܶܕ ܐ̱ܢܳܐ. ܘܳܐܡܰܪ ܟܬܽܘܒ܆ ܡܶܛܽܠ ܕܗܳܠܶܝܢ ܡ̈ܶܠܶܐ ܡܗܰܝܡ̈ܢܳܬܳܐ ܘܫܰܪܺܝܪ̈ܳܬܳܐ ܕܰܐܠܳܗܳܐ ܐܺܝܬܰܝܗܶܝܢ.
6- ܘܶܐܡܰܪ ܠܺܝ. ܗܘܺܝܬ ܐܶܢܳܐ ܐܳܠܰܦ ܘܬܰܘ. ܪܺܝܫܳܐ ܘܫܽܘܠܳܡܳܐ. ܐܶܢܳܐ ܠܗܰܘ ܕܰܨܗܶܐ ܐܶܬܶܠ ܡܶܢ ܡܥܺܝܢܳܐ ܕܡܰܝ̈ܳܐ ܚܰܝ̈ܶܐ ܡܰܓܳܢ.
7- ܗܰܘ ܕܙܳܟܶܐ ܢܺܐܪܰܬ ܗܳܠܶܝܢ. ܘܶܐܗܘܶܐ ܠܶܗ ܐܰܠܳܗܳܐ. ܘܗܽܘ ܢܶܗܘܶܐ ܠܺܝ ܒܪܳܐ ܕܺܝܠܝ.
8- ܠܕܰܚܽܘ̈ܠܬܳܢܶܐ ܕܶܝܢ ܘܠܳܐ ܡܗܰܝܡ̈ܢܶܐ: ܘܚܰܛܳܝ̈ܶܐ ܘܰܡܣܰܝ̈ܒܶܐ ܘܩܳܛܽܘ̈ܠܶܐ܇ ܘܙܰܢܳܝ̈ܶܐ ܘܚܰܪ̈ܳܫܶܐ ܘܦܳܠܚ̈ܰܝ ܦܬܰܟܪ̈ܶܐ ܘܟܽܠܗܽܘܢ ܕܰܓ̈ܳܠܶܐ܆ ܡܢܳܬܳܐ ܕܺܝܠܗܽܘܢ ܒܝܰܡܬܳܐ ܗܳܝ ܕܝܳܩܕܳܐ ܒܢܽܘܪܳܐ ܘܟܶܒܪܺܝܬܳܐ܇ ܗܳܝ ܕܺܐܝܬܶܝܗ̇ ܡܰܘܬܳܐ ܗܰܘ ܬܶܢܝܳܢܳܐ܀
9- ܘܶܐܬܳܐ ܚܰܕ ܡܶܢ ܗܳܢܽܘܢ ܫܰܒܥܳܐ ܡ̈ܰܠܰܐܟܶܐ ܗܳܢܽܘܢ ܕܺܐܝܬ ܠܗܽܘܢ ܫܒܰܥ ܦܺܝ̈ܠܰܐܣ܇ ܗܳܢܶܝܢ ܕܡܰܠ̈ܝܳܢ ܡܶܢ ܫܒܰܥ ܡܰܚ̈ܘܳܬܳܐ ܗܳܠܶܝܢ ܐ̱ܚܪ̈ܳܝܳܬܳܐ. ܘܡܰܠܶܠ ܥܰܡܝ ܟܰܕ ܐܳܡܰܪ. ܬܳܐ ܐܶܚܰܘܶܐ ܠܳܟ ܠܟܰܠܬܳܐ ܗܳܝ ܐܰܢ̱ܬܬܶܗ ܕܗܰܘ ܐܶܡܪܳܐ.
10- ܘܰܐܘܒܠܰܢܝ ܒܪܽܘܚܳܐ ܥܰܠ ܛܽܘܪܳܐ ܪܰܒܳܐ ܘܪܳܡܳܐ. ܘܚܰܘܺܝ ܠܺܝ ܠܰܡܕܺܝܢ̱ܬܳܐ ܗܳܝ ܩܰܕܺܝܫܬܳܐ ܐܽܘܪܺܫܠܶܡ܇ ܟܰܕ ܢܳܚܬܳܐ ܡܶܢ ܫܡܰܝܳܐ ܡܶܢ ܐܰܠܳܗܳܐ.
11- ܟܰܕ ܐܺܝܬ ܠܳܗ̇ ܬܶܫܒܽܘܚܬܳܐ ܕܰܐܠܳܗܳܐ. ܐܰܝܟ ܢܰܗܺܝܪܳܐ ܕܙܰܠܓܳܐ ܕܕܳܡܶܐ ܠܟܺܐܦܳܐ ܣܰܓܺܝ ܡܝܰܩܰܪܬܳܐ܇ ܐܰܝܟ ܟܺܐܦܳܐ ܐܰܝܰܐܣܦܺܝܢ ܕܕܳܡܝܳܐ ܠܰܩܪܽܘܣܛܰܠܳܘܣ.
12- ܕܺܐܝܬ ܠܳܗ̇ ܫܽܘܪܳܐ ܪܰܒܳܐ ܘܪܳܡܳܐ. ܕܺܐܝܬ ܠܳܗ̇ ܬܰܪ̈ܥܶܐ ܬܪܶܥܣܰܪ. ܘܥܰܠ ܒܶܝܬ ܬܰܪ̈ܥܶܐ ܡ̈ܰܠܰܐܟܶܐ ܬܪܶܥܣܰܪ. ܘܰܫܡܳܗ̈ܶܐ ܕܰܟܬܺܝܒܺܝܢ ܥܠܰܝܗܽܘܢ. ܗܳܠܶܝܢ ܐܺܝܬܰܝܗܽܘܢ܆ ܫܡܳܗ̈ܶܐ ܕܬܰܪܬܰܥܶܣܪ̈ܶܐ ܫܰܪ̈ܒܳܬܳܐ ܕܺܐܝܣܰܪ̈ܠܳܝܶܐ.
13- ܡܶܢ ܡܰܕܢܚܳܐ ܬܰܪ̈ܥܶܐ ܬܠܳܬܳܐ. ܘܡܶܢ ܓܰܪܒܝܳܐ ܬܰܪ̈ܥܶܐ ܬܠܳܬܳܐ. ܘܡܶܢ ܬܰܝܡܢܳܐ ܬܰܪ̈ܥܶܐ ܬܠܳܬܳܐ. ܘܡܶܢ ܡܰܥܪܒܳܐ ܬܰܪ̈ܥܶܐ ܬܠܳܬܳܐ.
14- ܘܰܠܫܽܘܪܳܐ ܕܰܡܕܺܝܢ̱ܬܳܐ ܕܺܐܝܬ ܠܶܗ ܫܶܬܶܐܣ̈ܶܐ ܬܰܪܬܰܥܶܣܪ̈ܶܐ. ܘܺܐܝܬ ܥܠܰܝܗܶܝܢ ܬܪܶܥܣܰܪ ܫܠܺܝ̈ܚܰܘܗ̱ܝ ܕܗܰܘ ܐܶܡܪܳܐ܀
15- ܘܗܰܘ ܕܰܡܡܰܠܶܠ ܗ̱ܘܳܐ ܥܰܡܝ܆ ܐܺܝܬ ܗ̱ܘܳܐ ܠܶܗ ܡܫܽܘܚܬܳܐ ܩܰܢܝܳܐ ܕܕܰܗܒܳܐ܇ ܐܰܝܟܰܢܳܐ ܕܢܶܡِܫܚܺܝܗ̇ ܠܰܡܕܺܝܢ̱ܬܳܐ܆ ܘܰܠܬܰܪ̈ܥܶܐ ܕܺܝܠܳܗ̇ ܘܰܠܫܽܘܪܳܗ̇.
16- ܘܗܺܝ ܡܕܺܝܢ̱ܬܳܐ ܛܶܛܪܰܐܓܽܘܢܽܘܣ ܣܺܝܡܳܐ. ܘܽܐܘܪܟܳܐ ܕܺܝܠܳܗ̇ ܟܡܳܐ ܕܳܐܦ ܦܬܳܝܳܗ̇. ܘܡܰܫܚܳܗ̇ ܠܰܡܕܺܝܢ̱ܬܳܐ ܒܩܰܢܝܳܐ܆ ܥܰܠ ܬܪܶܥܣܰܪ ܐܶܣ̈ܛܕܰܘܳܬܳܐ ܕܰܬܪܶܥܣܰܪ ܐܰܠܦܰܝ̈ܳܐ. ܘܽܐܘܪܟܳܐ ܘܰܦܬܳܝܳܐ ܘܪܰܘܡܳܐ ܕܺܝܠܶܗ ܫܘܰܝ̈ܳܐ ܐܺܝܬܰܝܗܽܘܢ.
17- ܘܰܡܫܰܚ ܠܫܽܘܪܳܐ ܕܺܝܠܶܗ܆ ܡܳܐܐ ܘܰܐܪܒܥܺܝܢ ܘܰܐܪܒܰܥ ܡܽܘܫ̈ܚܳܬܳܐ ܕܰܐܡ̈ܶܐ ܕܒܰܪܢܳܫܳܐ܇ ܗܳܝ ܕܺܐܝܬܶܝܗ̇ ܕܡܰܠܰܐܟܳܐ.
18- ܘܕܽܘܡܣܳܝܽܘܬܳܐ ܕܫܽܘܪܳܐ ܕܺܝܠܳܗ̇ ܐܺܝܰܣܦܺܝܣ. ܘܗܺܝ ܡܕܺܝܢ̱ܬܳܐ ܕܕܰܗܒܳܐ ܕܰܟܝܳܐ ܕܕܳܡܶܐ ܠܰܙܓܽܘܓܺܝܬܳܐ ܕܟܺܝܬܳܐ.
19- ܘܗܶܢܶܝܢ ܫܶܬܶܐܣ̈ܶܐ ܕܫܽܘܪܳܐ ܕܰܡܕܺܝܢ̱ܬܳܐ܆ ܟܰܕ ܒܟܽܠ ܟܺܐܦܳܐ ܡܰܢ ܡܝܰܩܰܪܬܳܐ ܡ̈ܨܰܒܬܳܢ. ܫܶܬܶܐܣܬܳܐ ܩܰܕܡܳܝܬܳܐ ܐܺܝܰܣܦܺܝܣ. ܗܳܝ ܬܪܰܝܳܢܺܝܬܳܐ ܣܰܐܦܰܦܺܝܪܽܘܣ. ܗܳܝ ܬܠܺܝܬܳܝܬܳܐ ܟܰܐܠܺܝܕܽܘܢ. ܗܳܝ ܪܒܺܝܥܳܝܬܳܐ ܣܡܰܐܪܓܕܽܘܣ.
20- ܗܳܝ ܚܡܺܝܫܳܝܬܳܐ ܣܰܐܪܕܳܘܢܽܘܟܰܐܣ. ܗܳܝ ܫܬܺܝܬܳܝܬܳܐ ܣܰܐܪܕܝܽܘܢ. ܗܳܝ ܫܒܺܝܥܳܝܬܳܐ ܟܪܽܘܒܽܘܠܺܝܬܽܘܣ. ܗܳܝ ܬܡܺܝܢܳܝܬܳܐ ܒܶܪܽܘܠܳܐ. ܗܳܝ ܬܫܺܝܥܳܝܬܳܐ ܛܽܘܦܰܐܙܝܳܘܢ. ܗܳܝ ܥܣܺܝܪܳܝܬܳܐ ܟܪܽܘܣܽܘܦܪܰܐܣܳܘܣ. ܗܳܝ ܚܕܰܥܣܶܪܳܝܬܳܐ ܗܽܘܦܰܐܩܺܝܢܬܳܘܣ. ܗܳܝ ܬܰܪܬܰܥܶܣܪܳܝܬܳܐ ܐܰܡܰܐܬܰܐܳܘܣܛܳܘܣ܀
21- ܘܗܳܢܽܘܢ ܬܪܶܥܣܰܪ ܬܰܪ̈ܥܶܐ ܬܰܪܬܰܥܶܣܪ̈ܶܐ ܡܰܪ̈ܓܳܢܝܳܬܳܐ. ܚܕܳܐ ܚܕܳܐ ܟܽܠ ܚܰܕ ܡܶܢ ܬܰܪ̈ܥܶܐ. ܚܰܕ ܡܶܢ ܚܕܳܐ ܡܰܪܓܳܢܺܝܬܳܐ. ܘܫܽܘܩܳܐ ܦܰܬܝܳܐ ܕܰܡܕܺܝܢ̱ܬܳܐ ܕܕܰܗܒܳܐ ܕܰܟܝܳܐ. ܐܰܝܟ ܙܓܽܘܓܺܝܬܳܐ ܕܡܰܙܠܓܳܐ.
22- ܘܗܰܝܟܠܳܐ ܠܳܐ ܚܙܺܝܬ ܒܳܗ̇. ܗܽܘ ܓܶܝܪ ܡܳܪܝܳܐ ܐܰܠܳܗܳܐ ܗܰܘ ܐܰܚܺܝܕ ܟܽܠ. ܗܰܝܟܠܳܐ ܕܺܝܠܶܗ ܐܺܝܬܰܘܗ̱ܝ.
23- ܘܗܰܘ ܐܶܡܪܳܐ ܘܗܺܝ ܡܕܺܝܢ̱ܬܳܐ܆ ܠܳܐ ܐܺܝܬ ܠܳܗ̇ ܣܽܘܢܩܳܢܳܐ ܕܫܶܡܫܳܐ ܘܠܳܐ ܕܣܰܗܪܳܐ܇ ܐܰܝܟܰܢܳܐ ܕܢܰܢܗܪܽܘܢ ܠܳܗ̇. ܗܺܝ ܓܶܝܪ ܬܶܫܒܽܘܚܬܳܐ ܕܰܐܠܳܗܳܐ ܐܰܢܗܰܪܬܳܗ̇. ܘܰܫܪܳܓܳܐ ܕܺܝܠܳܗ̇ ܗܰܘ ܐܶܡܪܳܐ.
24- ܘܰܢܗܰܠܟܽܘܢ ܥܰܡ̱̈ܡܶܐ ܒܝܰܕ ܢܽܘܗܪܳܐ ܕܺܝܠܳܗ̇. ܘܡ̈ܰܠܟܶܐ ܕܰܐܪܥܳܐ ܟܰܕ ܡܰܝܬܶܝܢ ܬܶܫܒܽܘܚܬܳܐ ܕܺܝܠܗܽܘܢ܆ ܘܺܐܝܩܳܪܳܐ ܬܽܘܒ ܕܥܰܡ̱̈ܡܶܐ ܒܳܗ̇.
25- ܘܬܰܪ̈ܥܶܐ ܕܺܝܠܳܗ̇ ܠܳܐ ܢܶܬܬܰܚܕܽܘܢ ܒܺܐܝܡܳܡܳܐ. ܠܺܠܝܳܐ ܓܶܝܪ ܠܳܐ ܐܺܝܬ ܬܰܡܳܢ.
26- ܘܢܰܝܬܽܘܢ ܠܬܶܫܒܽܘܚܬܳܐ ܘܠܺܐܝܩܳܪܳܐ ܕܥܰܡ̱̈ܡܶܐ ܒܳܗ̇.
27- ܘܠܳܐ ܢܶܥܽܘܠ ܠܳܗ̇ ܟܽܠ ܡܣܰܝܒܳܐ܆ ܘܰܕܥܳܒܶܕ ܛܰܡܽܐܘܬܳܐ. ܘܕܰܓܳܠܽܘܬܳܐ. ܐܶܠܳܐ ܐܶܢ ܗܳܢܽܘܢ ܕܰܟܬܺܝ̈ܒܳܢ ܒܰܟܬܳܒܳܐ ܕܚܰܝ̈ܶܐ ܕܗܰܘ ܐܶܡܪܳܐ܀