Revelation 3
The Book of Revelation
܀ ܓܠܝܢܐ ܕܝܘܚܢܢ ܓ ܀
1- ܘܰܠܡܰܠܰܐܟܳܐ ܗܰܘ ܕܥܺܕܬܳܐ ܕܰܒܣܰܪܕܺܝܣ ܟܬܽܘܒ܆ ܗܳܠܶܝܢ ܐܳܡܰܪ ܗܰܘ ܕܺܐܝܬ ܠܶܗ ܗܳܢܶܝܢ ܫܒܰܥ ܪ̈ܽܘܚܶܐ ܕܰܐܠܳܗܳܐ ܘܗܳܢܽܘܢ ܫܰܒܥܳܐ ܟܰܘ̈ܟܒܶܐ. ܝܳܕܰܥ ܐ̱ܢܳܐ ܠܰܥ̈ܒܳܕܶܐ ܕܺܝܠܳܟ ܕܰܫܡܳܐ ܐܺܝܬ ܠܳܟ. ܕܚܰܝ ܐܰܢ̱ܬ ܘܡܺܝܬܳܐ ܗܘܰܝܬ.
2- ܐܶܬܬܥܺܝܪ. ܘܛܰܪ ܘܫܰܪܰܪ ܠܗܳܠܶܝܢ ܕܫܰܪܟܳܐ܇ ܗܳܠܶܝܢ ܕܰܥܬܺܝܕܺܝܢ ܗ̱ܘܰܘ ܠܰܡܡܳܬ. ܠܳܐ ܓܶܝܪ ܐܶܫܟܚܶܬ ܠܰܥ̈ܒܳܕܶܐ ܕܺܝܠܳܟ ܕܰܡܫܰܡܠܶܝܢ ܩܕܳܡ ܐܰܠܳܗܳܐ ܕܺܝܠܝ.
3- ܐܶܬܕܰܟِܪ ܗܳܟܺܝܠ ܐܰܝܟܰܢܳܐ ܢܣܰܒܬ ܘܰܫܡܰܥܬ. ܘܛܰܪ ܘܶܐܬܬܘܳܐ. ܘܶܐܢ ܗܳܟܺܝܠ ܠܳܐ ܬܶܬܥܺܝܪ܆ ܐܳܬܶܐ ܥܠܰܝܟ ܐܰܝܟ ܓܰܢܳܒܳܐ. ܘܠܳܐ ܬܶܕܰܥ ܐܰܝܕܳܐ ܫܳܥܬܳܐ ܐܳܬܶܐ ܥܠܰܝܟ.
4- ܐܶܠܳܐ ܐܺܝܬ ܠܳܟ ܩܰܠܺܝܠ ܫܡܳܗ̈ܶܐ ܒܣܰܪܕܺܝܣ. ܗܳܢܽܘܢ ܕܠܳܐ ܛܰܘܶܫܘ ܠܒܽܘ̈ܫܶܐ ܕܺܝܠܗܽܘܢ. ܘܰܢܗܰܠܟܽܘܢ ܥܰܡܝ ܒܚܶܘܳܪ̈ܶܐ. ܡܶܛܽܠ ܕܰܕܫܳܘܶܝܢ ܐܺܝܬܰܝܗܽܘܢ.
5- ܗܰܘ ܕܙܳܟܶܐ ܗܳܟܰܢܳܐ ܡܶܬܥܰܛܰܦ ܒܰܠܒܽܘ̈ܫܶܐ ܚܶܘܳܪ̈ܶܐ. ܘܠܳܐ ܐܶܠܚܶܐ ܫܡܳܐ ܕܺܝܠܗܽܘܢ ܡܶܢ ܟܬܳܒܳܐ ܗܰܘ ܕܚܰܝ̈ܶܐ. ܘܰܐܘܕܶܐ ܒܰܫܡܳܐ ܕܺܝܠܗܽܘܢ ܩܕܳܡ ܐܰܒܳܐ ܕܺܝܠܝ ܘܰܩܕܳܡ ܡ̈ܰܠܰܐܟܶܐ ܕܺܝܠܶܗ܀
6- ܗܰܘ ܕܺܐܝܬ ܠܶܗ ܐܶܕ̈ܢܶܐ܆ ܢܶܫܡܰܥ ܡܳܢܳܐ ܪܽܘܚܳܐ ܐܳܡܰܪ ܠܥ̈ܺܕܳܬܳܐ܀
7- ܘܰܠܡܰܠܰܐܟܳܐ ܗܰܘ ܕܥܺܕܬܳܐ ܕܰܒܦܺܝܠܰܕܶܠܦܺܝܰܐ ܟܬܽܘܒ܆ ܗܳܠܶܝܢ ܐܳܡܰܪ ܗܰܘ ܩܰܕܺܝܫܳܐ ܗܰܘ ܫܰܪܺܝܪܳܐ: ܗܰܘ ܕܺܐܝܬ ܠܶܗ ܩܠܺܝܕܳܐ ܕܕܰܘܺܝܕ. ܗܰܘ ܕܦܳܬܰܚ ܘܠܳܐ ܐ̱ܢܳܫ ܐܳܚܶܕ. ܘܳܐܚܶܕ ܘܠܳܐ ܐ̱ܢܳܫ ܦܳܬܰܚ.
8- ܝܳܕܰܥ ܐ̱ܢܳܐ ܠܰܥ̈ܒܳܕܶܐ ܕܺܝܠܳܟ. ܘܗܳܐ ܝܶܗܒܶܬ ܩܕܳܡܰܝܟ ܬܰܪܥܳܐ ܦܬܺܝܚܳܐ܆ ܗܰܘ ܕܠܳܐ ܐ̱ܢܳܫ ܡܨܶܐ ܠܡܶܐܚܕܶܗ. ܡܶܛܽܠ ܕܩܰܠܺܝܠ ܐܺܝܬ ܠܳܟ ܚܰܝܠܳܐ. ܘܰܢܛܰܪܬ ܠܡܶܠܬܳܐ ܕܺܝܠܝ. ܘܠܳܐ ܟܦܰܪܬ ܒܰܫܡܳܐ ܕܺܝܠܝ.
9- ܘܗܳܐ ܝܳܗܶܒ ܐ̱ܢܳܐ ܡܶܢ ܟܢܽܘܫܬܳܐ ܕܣܳܛܳܢܳܐ: ܡܶܢ ܗܳܢܽܘܢ ܕܳܐܡܪܺܝܢ ܗܶܢܽܘܢ ܠܗܽܘܢ ܕܺܝܗܽܘ̈ܕܳܝܶܐ ܐܶܢܽܘܢ ܘܠܳܐ ܐܺܝܬܰܝܗܽܘܢ ܐܶܠܳܐ ܡܕܰܓܠܺܝܢ. ܗܳܐ ܥܳܒܶܕ ܐ̱ܢܳܐ ܠܗܽܘܢ ܐܰܝܟܰܢܳܐ ܕܢܺܐܬܽܘܢ ܘܢܶܣܓܕܽܘܢ ܩܕܳܡ ܪ̈ܶܓܠܶܐ ܕܺܝܠܳܟ. ܘܢܶܕܥܽܘܢ ܕܶܐܢܳܐ ܐܰܚܶܒܬܳܟ.
10- ܡܶܛܽܠ ܕܰܢܛܰܪܬ ܠܡܶܠܬܳܐ ܕܰܡܣܰܝܒܪܳܢܽܘܬܳܐ ܕܺܝܠܝ. ܘܶܐܢܳܐ ܠܳܟ ܐܶܛܰܪ ܡܶܢ ܫܳܥܬܳܐ ܕܢܶܣܝܽܘܢܳܐ ܕܰܥܬܺܝܕ ܠܡܶܐܬܳܐ ܥܰܠ ܡܶܬܥܰܡܪܳܢܺܝܬܳܐ ܟܽܠܳܗ̇܇ ܠܰܡܢܰܣܳܝܽܘ ܠܗܳܢܽܘܢ ܕܥܳܡܪܺܝܢ ܥܰܠ ܐܰܪܥܳܐ.
11- ܐܳܬܶܐ ܐ̱ܢܳܐ ܥܓܰܠ. ܐܰܚܽܘܕ ܗܰܘ ܡܳܐ ܕܺܐܝܬ ܠܳܟ܆ ܐܰܝܟܰܢܳܐ ܕܠܳܐ ܐ̱ܢܳܫ ܢܶܣܰܒ ܠܰܟܠܺܝܠܳܐ ܕܺܝܠܳܟ܀
12- ܗܰܘ ܕܙܳܟܶܐ ܐܶܥܒܕܺܝܘܗ̱ܝ ܥܳܡܽܘܪܳܐ ܒܗܰܝܟܠܳܐ ܕܰܐܠܳܗܳܐ ܕܺܝܠܝ. ܘܰܠܒܰܪ ܠܳܐ ܢܶܦܽܘܩ ܬܽܘܒ. ܘܶܐܟܬܽܘܒ ܥܠܰܘܗ̱ܝ ܫܡܳܐ ܕܰܐܠܳܗܳܐ ܕܺܝܠܝ܆ ܘܰܫܡܳܐ ܕܰܡܕܺܝܢ̱ܬܳܐ ܕܰܐܠܳܗܳܐ ܕܺܝܠܝ ܕܽܐܘܪܺܫܠܶܡ ܚܕܰܬܳܐ. ܗܳܝ ܕܢܳܚܬܳܐ ܡܶܢ ܫܡܰܝ̈ܳܐ ܡܶܢ ܐܰܠܳܗܳܐ ܕܺܝܠܝ. ܘܠܰܫܡܳܐ ܕܺܝܠܝ ܗܰܘ ܚܰܕ̱ܬܳܐ܀
13- ܗܰܘ ܕܺܐܝܬ ܠܶܗ ܐܶܕ̈ܢܶܐ܆ ܢܶܫܡܰܥ ܡܳܢܳܐ ܪܽܘܚܳܐ ܐܳܡܰܪ ܠܥ̈ܺܕܳܬܳܐ܀
14- ܘܰܠܡܰܠܰܐܟܳܐ ܗܰܘ ܕܥܺܕܬܳܐ ܕܰܒܠܰܐܘܕܺܝܩܺܝܰܐ ܟܬܽܘܒ܆ ܗܳܠܶܝܢ ܐܳܡܰܪ ܗܰܘ ܐܰܡܺܝܢ܇ ܗܰܘ ܣܳܗܕܳܐ܆ ܗܰܘ ܡܗܰܝܡܢܳܐ܆ ܗܰܘ ܫܰܪܺܝܪܳܐ܇ ܗܰܘ ܕܰܝܳܢܳܐ ܕܰܒܪܺܝܬܳܐ ܕܰܐܠܳܗܳܐ.
15- ܝܳܕܰܥ ܐ̱ܢܳܐ ܠܰܥ̈ܒܳܕܶܐ ܕܺܝܠܳܟ. ܕܠܳܐ ܩܰܪܺܝܪܳܐ ܐܺܝܬܰܝܟ ܘܠܳܐ ܚܰܡܺܝܡܳܐ. ܠܘܰܝ ܩܰܪܺܝܪܳܐ ܗܘܰܝܬ. ܐܰܘ ܚܰܡܺܝܡܳܐ.
16- ܗܳܟܰܢܳܐ ܕܦܳܫܽܘܪܳܐ ܐܺܝܬܰܝܟ. ܘܠܳܐ ܚܰܡܺܝܡܳܐ ܘܠܳܐ ܩܰܪܺܝܪܳܐ. ܕܰܥܬܺܝܕ ܐ̱ܢܳܐ ܐܰܬܺܝܒܳܟ ܡܶܢ ܦܽܘܡܳܐ ܕܺܝܠܝ.
17- ܡܶܛܽܠ ܕܳܐܡܰܪ ܐܰܢ̱ܬ ܕܥܰܬܺܝܪܳܐ ܐܺܝܬܰܝ ܘܥܶܬܪܶܬ. ܘܠܳܐ ܥܰܠ ܡܶܕܶܡ ܣܽܘܢܩܳܢܳܐ ܐܺܝܬ ܠܺܝ܇ ܘܠܳܐ ܝܳܕܰܥ ܐܰܢ̱ܬ ܕܰܐܢ̱ܬ ܐܺܝܬܰܝܟ ܕܳܘܝܳܐ ܘܰܡܚܺܝܠܳܐ܇ ܘܡܶܣܟܺܢܳܐ ܘܣܰܡܝܳܐ ܘܥܰܪܛܶܠܳܝܳܐ.
18- ܡܳܠܶܟ ܐ̱ܢܳܐ ܠܳܟ ܠܡܶܙܒܰܢ ܡܶܢܝ ܕܰܗܒܳܐ ܕܰܒܚܺܝܪ ܡܶܢ ܢܽܘܪܳܐ ܐܰܝܟܰܢܳܐ ܕܬܶܥܬܰܪ܆ ܘܰܠܒܽܘ̈ܫܶܐ ܚܶܘܳܪ̈ܶܐ ܠܡܶܬܥܰܛܳܦܽܘ܆ ܘܠܳܐ ܬܶܬܚܙܶܐ ܒܒܶܗܬܬܳܐ ܕܥܰܪܛܶܠܳܝܽܘܬܳܐ ܕܺܝܠܳܟ. ܘܰܫܝܳܦܳܐ ܟܚܽܘܠ ܥܰܝ̈ܢܰܝܟ ܐܰܝܟܰܢܳܐ ܕܬܶܗܘܶܐ ܚܳܙܶܐ.
19- ܐܶܢܳܐ ܠܟܽܠܗܽܘܢ ܗܳܢܽܘܢ ܕܶܐܢ ܐܶܪܚܰܡ܆ ܡܰܟܶܣ ܐ̱ܢܳܐ ܘܪܳܕܶܐ ܐ̱ܢܳܐ. ܛܰܢ ܗܳܟܺܝܠ ܘܶܐܬܬܘܳܐ.
20- ܗܳܐ ܩܳܡܶܬ ܥܰܠ ܬܰܪܥܳܐ ܘܶܐܩܽܘܫ ܐܶܢ ܐ̱ܢܳܫ ܫܳܡܰܥ ܠܩܳܠܳܐ ܕܺܝܠܝ. ܘܦܳܬܰܚ ܬܰܪܥܳܐ܆ ܐܶܥܽܘܠ ܠܘܳܬܶܗ. ܘܰܐܚܫܶܡ ܥܰܡܶܗ ܘܗܽܘ ܥܰܡܝ܀
21- ܗܰܘ ܕܙܳܟܶܐ ܐܶܬܶܠ ܠܶܗ ܠܡܶܬܰܒ ܥܰܡܝ ܥܰܠ ܟܽܘܪܣܝܳܐ ܕܺܝܠܝ. ܐܰܝܟܰܢܳܐ ܕܳܐܦ ܐܶܢܳܐ ܙܟܺܝܬ ܘܝܶܬܒܶܬ ܥܰܡ ܐܰܒܳܐ ܕܺܝܠܝ ܒܟܽܘܪܣܝܳܐ ܕܺܝܠܶܗ܀
22- ܗܰܘ ܕܺܐܝܬ ܠܶܗ ܐܶܕ̈ܢܶܐ܆ ܢܶܫܡܰܥ ܡܳܢܳܐ ܪܽܘܚܳܐ ܐܳܡܰܪ ܠܥ̈ܺܕܳܬܳܐ܀